സായുധ കവർച്ച​ക്കാർ ആക്രമി​ക്കു​മ്പോൾ

പശ്ചിമ ആഫ്രി​ക്ക​യി​ലെ ഒരു ഒറ്റപ്പെട്ട പ്രാന്ത​പ്ര​ദേ​ശ​മായ ഇക്കൊ​യി​ലെ വലിയ വീടുകൾ കോട്ട​ക​ളെ​പ്പോ​ലെ ആയിത്തീർന്നി​രി​ക്കു​ന്നു. മിക്കവ​യു​ടെ​യും മതിലു​കൾക്ക്‌ 10 അടി ഉയരമുണ്ട്‌. അവയുടെ മുകളിൽ കൂർത്ത വലിയ ഇരുമ്പാ​ണി​ക​ളോ കുപ്പി​ച്ചി​ല്ലു​ക​ളോ മുള്ളു​ക​മ്പി​ക​ളോ പിടി​പ്പി​ച്ചി​രി​ക്കു​ന്നു. ബോൾട്ടും അഴിയും ചങ്ങലയും പാഡ്‌ലോ​ക്കു​മുള്ള കൂറ്റൻ ഗേറ്റു​കൾക്ക്‌ മുന്നിൽ കാവൽക്കാർ നിൽക്കു​ന്നു. അഴിക​ളുള്ള ജനലുകൾ. വീടിന്റെ മറ്റു മുറി​ക​ളിൽനി​ന്നു വ്യത്യ​സ്‌ത​മാ​യി കിടക്ക​മു​റിക്ക്‌ ഇരുമ്പു​വാ​തിൽ. രാത്രി​യിൽ മതിലി​നു​ള്ളിൽ ചുറ്റി​ക്ക​റ​ങ്ങു​ന്ന​തി​നാ​യി അഴിച്ചു​വി​ട്ടി​രി​ക്കുന്ന അൽസേ​ഷ്യൻ, റോട്ട്‌വെ​യ്‌ലർ ഇനത്തിൽപ്പെട്ട വലിയ പട്ടികൾ. രാത്രി​യെ പകൽസ​മാ​നം ആക്കുന്ന പ്രകാ​ശ​ധാര. നുഴഞ്ഞു​ക​യ​റ്റ​ക്കാ​രെ കുറിച്ചു വിവരം ധരിപ്പി​ക്കുന്ന രഹസ്യ കമ്പ്യൂട്ടർ സംവി​ധാ​ന​ങ്ങ​ളും.

സ്വന്തം ഭവനങ്ങൾ സുരക്ഷി​ത​മാ​ക്കേ​ണ്ട​തി​ന്റെ ആവശ്യം എല്ലാവ​രും അംഗീ​ക​രി​ക്കും. പത്ര ശീർഷ​കങ്ങൾ ഇങ്ങനെ വിലപി​ക്കു​ന്നു: “സായുധ കവർച്ച​ക്കാർ കൊള്ള​യ​ടി​ക്കു​ന്നു”; “ബാല മോഷ്ടാ​ക്ക​ളു​ടെ സ്വൈര വിഹാരം”; “[നഗരം] തെരുവു റൗഡി സംഘങ്ങ​ളു​ടെ പിടി​യിൽ, എങ്ങും പരി​ഭ്രാ​ന്തി.” മിക്ക രാജ്യ​ങ്ങ​ളി​ലും ഇതാണ്‌ സ്ഥിതി. ബൈബിൾ മുൻകൂ​ട്ടി പറഞ്ഞതു​പോ​ലെ, നാം ജീവി​ക്കു​ന്നത്‌ ദുർഘ​ട​സ​മ​യ​ത്തു​ത​ന്നെ​യാണ്‌.—2 തിമൊ​ഥെ​യൊസ്‌ 3:1.

സായുധ കവർച്ച ഉൾപ്പെ​ടെ​യുള്ള കുറ്റകൃ​ത്യ​ങ്ങ​ളു​ടെ എണ്ണം ആഗോ​ള​മാ​യി പെരു​കു​ക​യാണ്‌. സ്വന്ത പൗരന്മാ​രെ സംരക്ഷി​ക്കുന്ന കാര്യ​ത്തിൽ ഗവൺമെ​ന്റു​കൾ കൂടു​തൽക്കൂ​ടു​തൽ അപ്രാ​പ്‌ത​രും ഉദാസീ​ന​രും ആയിത്തീ​രു​ക​യാണ്‌. ചില രാജ്യ​ങ്ങ​ളിൽ വേണ്ടത്ര പൊലീ​സു​കാ​രോ അവർക്ക്‌ ആവശ്യ​ത്തി​നു തോക്കു​ക​ളോ ഇല്ലാത്ത​തി​നാൽ സഹായാ​ഭ്യർഥ​ന​ക​ളോ​ടു ശരിയാ​യി പ്രതി​ക​രി​ക്കാൻ അവർക്ക്‌ ആവുന്നില്ല. അക്രമം കാണു​ന്നവർ മിക്കവ​രും ഇടപെ​ടാൻ മടിക്കു​ന്നു.

പൊലീ​സിൽനി​ന്നോ പൊതു​ജ​ന​ങ്ങ​ളിൽനി​ന്നോ സഹായം കിട്ടാതെ വരുന്ന​തി​നാൽ, അക്രമ​ത്തി​ന്റെ ഇരകൾക്കു സ്വയം പ്രതി​രോ​ധി​ക്കേ​ണ്ടി​വ​രു​ന്നു. വികസ്വര രാഷ്‌ട്ര​ത്തി​ലെ ഒരു ക്രിസ്‌തീയ മൂപ്പൻ പറഞ്ഞു: “സഹായ​ത്തി​നാ​യി മുറവി​ളി​കൂ​ട്ടി​യാൽ, കവർച്ച​ക്കാർ നിങ്ങളെ ഗുരു​ത​ര​മാ​യി പരി​ക്കേൽപ്പി​ക്കു​ക​യോ കൊല്ലു​ക​യോ ചെയ്യും. പുറത്തു​നി​ന്നു സഹായം ലഭിക്കു​മെന്നു കരുതാൻ വയ്യ. ലഭിച്ചാൽ നന്ന്‌, എന്നാൽ പ്രതീ​ക്ഷി​ക്ക​രുത്‌, അതിനാ​യി വിളി​ച്ച​പേ​ക്ഷി​ക്ക​യു​മ​രുത്‌; എന്തെന്നാൽ അതു കൂടുതൽ കുഴപ്പം വിളി​ച്ചു​വ​രു​ത്തു​കയേ ഉള്ളൂ.”

സംരക്ഷ​ണ​വും ദൈവ​വ​ച​ന​വും

ക്രിസ്‌ത്യാ​നി​കൾ ലോക​ത്തി​ന്റെ ഭാഗമ​ല്ലെ​ങ്കി​ലും, അവർ ലോക​ത്തിൽ ആണ്‌. (യോഹ​ന്നാൻ 17:11, 16) അതു​കൊണ്ട്‌ മറ്റാ​രെ​യും​പോ​ലെ, തങ്ങളുടെ സുരക്ഷ​യ്‌ക്കാ​യി അവരും ന്യായ​മായ ക്രമീ​ക​ര​ണങ്ങൾ ചെയ്യുന്നു. എങ്കിലും, യഹോ​വയെ സേവി​ക്കാത്ത അനേക​രിൽനി​ന്നു വ്യത്യ​സ്‌ത​രാ​യി, ദൈവ​ജനം ക്രിസ്‌തീയ തത്ത്വങ്ങ​ളു​ടെ പരിധി​യിൽനി​ന്നു​കൊണ്ട്‌ സുരക്ഷി​ത​ത്വം തേടുന്നു.

അതിനു നേർവി​പ​രീ​ത​മാണ്‌ ചില ആഫ്രിക്കൻ രാജ്യ​ങ്ങ​ളി​ലെ അവസ്ഥ. കവർച്ച​ക്കാ​രിൽനി​ന്നുള്ള സംരക്ഷ​ണ​ത്തി​നാ​യി അവർ മന്ത്രവാ​ദം ഉപയോ​ഗി​ക്കു​ന്നു. സഹായം തേടി​യെ​ത്തു​ന്ന​വ​രു​ടെ കണ​ങ്കൈ​യി​ലോ നെഞ്ചി​ലോ മുതു​കി​ലോ മന്ത്രവാ​ദി വൈദ്യൻ മുറി​വു​ണ്ടാ​ക്കി ഒരു മന്ത്രമ​രു​ന്നു പുരട്ടി തിരു​മ്മു​ക​യും മന്ത്രോ​ച്ചാ​രണം നടത്തു​ക​യും ചെയ്യുന്നു. അതോടെ ആ വ്യക്തിക്കു മേലാൽ കവർച്ച​ക്കാ​രു​ടെ ഉപദ്രവം ഉണ്ടാകി​ല്ലെ​ന്നാ​ണു കരുത​പ്പെ​ടു​ന്നത്‌. കവർച്ച​ക്കാർ തങ്ങളെ ഉപദ്ര​വി​ക്കാ​തെ സ്ഥലം വിടു​മെ​ന്നുള്ള വിശ്വാ​സ​ത്തിൽ ചിലർ രക്ഷാക​വ​ച​ങ്ങ​ളോ മന്ത്രമ​രു​ന്നു​ക​ളോ “ഇൻഷ്വ​റൻസ്‌” എന്ന മട്ടിൽ ഭവനത്തിൽ സൂക്ഷി​ക്കു​ന്നു.

സത്യ ക്രിസ്‌ത്യാ​നി​കൾ മന്ത്രവി​ദ്യ​ക​ളൊ​ന്നും ഉപയോ​ഗി​ക്കു​ക​യില്ല. ബൈബിൾ എല്ലാവിധ മന്ത്രവി​ദ്യ​ക​ളെ​യും കുറ്റം വിധി​ക്കു​ന്നു, അത്‌ ഉചിത​മാ​ണു​താ​നും. കാരണം അവയ്‌ക്ക്‌ ഭൂമി​യിൽ അക്രമം വർധി​പ്പി​ക്കുന്ന ഭൂതങ്ങ​ളു​മാ​യി ആളുകളെ സമ്പർക്ക​ത്തി​ലാ​ക്കാൻ കഴിയും. (ഉല്‌പത്തി 6:2, 4, 11) ബൈബിൾ വ്യക്തമാ​യി പ്രസ്‌താ​വി​ക്കു​ന്നു: “നീ മന്ത്രവാ​ദം ചെയ്യരു​തു.”—ലേവ്യ​പു​സ്‌തകം 19:26, NW.

ഗത്യന്ത​ര​മി​ല്ലാ​തെ വരു​മ്പോൾ ചിലർ തോക്കു​കൾകൊ​ണ്ടു സുരക്ഷ ഉറപ്പാ​ക്കാൻ ശ്രമി​ക്കു​ന്നു. എന്നാൽ ക്രിസ്‌ത്യാ​നി​കൾ യേശു​വി​ന്റെ പിൻവ​രുന്ന വാക്കുകൾ ഗൗരവ​മാ​യി എടുക്കു​ന്നു: “വാൾ എടുക്കു​ന്നവർ ഒക്കെയും വാളാൽ നശിച്ചു​പോ​കും.” (മത്തായി 26:52) ദൈവ​ജനം ‘തങ്ങളുടെ വാളു​കളെ കൊഴു​ക്ക​ളാ​യി അടിച്ചു​തീർത്തി’രിക്കു​ക​യാണ്‌, അവർ കവർച്ച​ക്കാ​രിൽനി​ന്നോ അക്രമി​ക​ളിൽനി​ന്നോ ഉള്ള രക്ഷയ്‌ക്കാ​യി തോക്കു​കൾ വാങ്ങു​ന്നില്ല.—മീഖാ 4:3.

ആയുധ​ധാ​രി​ക​ളായ കാവൽക്കാ​രെ നിർത്തുന്ന കാര്യ​മോ? ഇത്‌ വ്യക്തി​പ​ര​മാ​യി തീരു​മാ​നി​ക്കേണ്ട സംഗതി​യാ​ണെ​ങ്കി​ലും, അത്‌ മറ്റൊ​രാ​ളു​ടെ കൈയിൽ ആയുധം നൽകുന്ന ഏർപ്പാ​ടാ​ണെന്ന്‌ ഓർക്കുക. കവർച്ച​ക്കാ​രൻ വരു​മ്പോൾ കാവൽക്കാ​രൻ എന്തു ചെയ്യണ​മെ​ന്നാണ്‌ കാവൽക്കാ​രനെ നിറു​ത്തു​ന്ന​യാൾ പ്രതീ​ക്ഷി​ക്കു​ന്നത്‌? ആളുക​ളു​ടെ​യും വസ്‌തു​വ​ക​ക​ളു​ടെ​യും സംരക്ഷ​ണാർഥം, ആവശ്യ​മാ​യി​വ​രു​ന്ന​പക്ഷം, കാവൽക്കാ​രൻ കള്ളനു​നേരെ നിറ​യൊ​ഴി​ക്കാൻ അദ്ദേഹം പ്രതീ​ക്ഷി​ക്കു​മോ?

സംരക്ഷ​ണ​ത്തി​നാ​യി മന്ത്രവി​ദ്യ​യി​ലും ആയുധ​ങ്ങ​ളി​ലും ആശ്രയി​ക്കാത്ത ക്രിസ്‌ത്യാ​നി​ക​ളു​ടെ നിലപാട്‌, ദൈവത്തെ അറിയാ​ത്ത​വ​രു​ടെ ദൃഷ്ടി​യിൽ ഭോഷ​ത്ത​മാ​യി തോന്നി​യേ​ക്കാം. എന്നിരു​ന്നാ​ലും ബൈബിൾ നമുക്ക്‌ ഈ ഉറപ്പ്‌ നൽകുന്നു: “യഹോ​വ​യിൽ ആശ്രയി​ക്കു​ന്നവൻ സംരക്ഷി​ക്ക​പ്പെ​ടും.” (സദൃശ​വാ​ക്യ​ങ്ങൾ 29:25, NW) യഹോവ തന്റെ ജനത്തെ മൊത്ത​ത്തിൽ സംരക്ഷി​ക്കു​ന്നു​ണ്ടെ​ങ്കി​ലും, തന്റെ ദാസന്മാ​രു​ടെ നേരെ ഉണ്ടാകുന്ന എല്ലാ കവർച്ചാ​ശ്ര​മ​ങ്ങ​ളിൽനി​ന്നും അവരെ സംരക്ഷി​ക്കാ​നാ​യി അവൻ ഇടപെ​ടു​ന്നില്ല. ഇയ്യോബ്‌ വളരെ വിശ്വ​സ്‌ത​നായ ഒരുവ​നാ​യി​രു​ന്നു. എന്നിട്ടും കവർച്ച​ക്കാർ വേലക്കാ​രെ കൊന്ന്‌ ഇയ്യോ​ബി​ന്റെ കന്നുകാ​ലി​സ​മ്പത്ത്‌ അപഹരി​ക്കു​ന്ന​തി​നു ദൈവം അനുവ​ദി​ച്ചു. (ഇയ്യോബ്‌ 1:14, 15, 17) പൗലൊസ്‌ അപ്പൊ​സ്‌ത​ലന്‌ “കള്ളൻമാ​രാ​ലുള്ള ആപത്തു” നേരി​ടാ​നും ദൈവം അനുവ​ദി​ച്ചു. (2 കൊരി​ന്ത്യർ 11:26) എന്നുവ​രി​കി​ലും, കവർച്ച​ക്കാ​രിൽനി​ന്നുള്ള അപകടം കുറയ്‌ക്കുന്ന തത്ത്വങ്ങൾ അനുസ​രി​ച്ചു ജീവി​ക്കാൻ ദൈവം തന്റെ ദാസന്മാ​രെ പഠിപ്പി​ക്കു​ന്നു. പരി​ക്കേൽക്കാ​നുള്ള സാധ്യത കുറയ്‌ക്കുന്ന വിധത്തിൽ കവർച്ച​ക്കാ​രോട്‌ പ്രതി​ക​രി​ക്കാൻ നമ്മെ സഹായി​ക്കുന്ന ജ്ഞാനവും അവൻ നമുക്കു നൽകുന്നു.

കവർച്ച​ക്കാ​രിൽനി​ന്നുള്ള ഭീഷണി കുറയ്‌ക്കൽ

ദീർഘ​നാൾമുമ്പ്‌, ജ്ഞാനി​യായ ഒരു മനുഷ്യൻ ഇങ്ങനെ പ്രസ്‌താ​വി​ച്ചു: “ധനവാന്റെ സമൃദ്ധി​യോ അവനെ ഉറങ്ങു​വാൻ സമ്മതി​ക്കു​ന്നില്ല.” (സഭാ​പ്ര​സം​ഗി 5:12) മറ്റു വാക്കു​ക​ളിൽ പറഞ്ഞാൽ, തങ്ങളുടെ സമ്പത്ത്‌ നഷ്ടപ്പെ​ടു​മോ എന്ന അമിത​മായ ഉത്‌കണ്‌ഠ ഏറെ സ്വത്തു​ള്ള​വ​രു​ടെ ഉറക്കം കെടു​ത്തു​ന്നു.

അതു​കൊണ്ട്‌ ഉത്‌കണ്‌ഠ മാത്രമല്ല, കവർച്ച​ക്കാ​രിൽനി​ന്നുള്ള ഭീഷണി​യും കുറയ്‌ക്കാ​നുള്ള ഒരു മാർഗം വിലപി​ടി​പ്പുള്ള വസ്‌തു​വ​കകൾ ധാരാ​ള​മാ​യി വാങ്ങി​ക്കൂ​ട്ടു​ന്നത്‌ ഒഴിവാ​ക്കുക എന്നതാണ്‌. നിശ്വസ്‌ത അപ്പൊ​സ്‌തലൻ എഴുതി: “ജഡമോ​ഹം, കണ്മോഹം, ജീവന​ത്തി​ന്റെ പ്രതാപം ഇങ്ങനെ ലോക​ത്തി​ലു​ള്ളതു എല്ലാം പിതാ​വിൽനി​ന്നല്ല, ലോക​ത്തിൽനി​ന്ന​ത്രേ ആകുന്നു.” (1 യോഹ​ന്നാൻ 2:16) വിലപി​ടി​പ്പുള്ള വസ്‌തു​ക്കൾ വാങ്ങാൻ ആളുകളെ പ്രേരി​പ്പി​ക്കുന്ന അതേ മോഹം​ത​ന്നെ​യാണ്‌ മോഷ്ടി​ക്കാൻ മറ്റുള്ള​വരെ പ്രേരി​പ്പി​ക്കു​ന്ന​തും. ഒരുവന്റെ “ജീവന​ത്തി​ന്റെ പ്രതാപം” കവർച്ച​ക്കാ​രെ ആകർഷി​ക്കു​ക​യേ​യു​ള്ളൂ.

പ്രതാപ പ്രകട​ന​ത്തിൽനിന്ന്‌ ഒഴിഞ്ഞി​രി​ക്കു​ന്നതു കൂടാതെ, ഒരു സത്യ ക്രിസ്‌ത്യാ​നി ആണെന്നു പ്രകട​മാ​ക്കു​ന്ന​തും നിങ്ങളെ കവർച്ച​ക്കാ​രിൽനി​ന്നു സംരക്ഷി​ക്കു​ന്ന​തി​നുള്ള മറ്റൊരു മാർഗ​മാണ്‌. നിങ്ങൾ മറ്റുള്ള​വ​രോ​ടു സ്‌നേഹം പ്രകടി​പ്പി​ക്കു​ക​യും സത്യസന്ധത കാട്ടു​ക​യും ക്രിസ്‌തീയ ശുശ്രൂ​ഷ​യിൽ സജീവ​മാ​യി പങ്കെടു​ക്കു​ക​യും ചെയ്യു​ന്നെ​ങ്കിൽ, നിങ്ങൾ നല്ലവനും സമാദ​ര​ണീ​യ​നും ആണെന്നുള്ള സത്‌പേര്‌ നിങ്ങളു​ടെ പ്രദേ​ശത്തു വളർന്നു​വ​രും. (ഗലാത്യർ 5:19-23) അത്തര​മൊ​രു ക്രിസ്‌തീയ സത്‌പേ​രിന്‌ ഒരു ആയുധ​ത്തെ​ക്കാൾ സംരക്ഷ​ണാ​ത്മകം ആയിരി​ക്കാൻ കഴിയും.

സായുധ കവർച്ച​ക്കാർ വരു​മ്പോൾ

എന്നാൽ കവർച്ച​ക്കാർ നിങ്ങളു​ടെ ഭവനത്തിൽ അതി​ക്ര​മി​ച്ചു കയറി​യി​രി​ക്കുന്ന ഒരു സ്ഥിതി​വി​ശേഷം നിങ്ങൾ അഭിമു​ഖീ​ക​രി​ക്കു​ന്നെ​ങ്കി​ലോ? സ്വത്തി​നെ​ക്കാൾ പ്രധാ​ന​പ്പെ​ട്ട​താണ്‌ നിങ്ങളു​ടെ ജീവൻ എന്നോർക്കുക. “ദുഷ്ട​നോ​ടു എതിർക്ക​രു​തു; നിന്നെ വലത്തെ ചെകി​ട്ടത്തു അടിക്കു​ന്ന​വന്നു മറേറ​തും തിരി​ച്ചു​കാ​ണിക്ക. . . . നിന്റെ വസ്‌ത്രം എടുപ്പാൻ ഇച്ഛിക്കു​ന്ന​വന്നു നിന്റെ പുതപ്പും വിട്ടു​കൊ​ടുക്ക” എന്നു യേശു പറഞ്ഞി​രി​ക്കു​ന്നു.—മത്തായി 5:39, 40.

ഇതു ജ്ഞാനപൂർവ​ക​മായ ബുദ്ധ്യു​പ​ദേശം ആണ്‌. തങ്ങളുടെ സ്വത്തു​ക്കളെ കുറി​ച്ചുള്ള വിവരം കുറ്റവാ​ളി​കളെ ധരിപ്പി​ക്കാൻ ക്രിസ്‌ത്യാ​നി​കൾ ബാധ്യ​സ്ഥ​ര​ല്ലെ​ങ്കി​ലും, ചെറു​ത്തു​നിൽപ്പോ നിസ്സഹ​ക​ര​ണ​മോ ചതിയോ ഉണ്ടാകു​മെന്നു തോന്നി​യാൽ കവർച്ച​ക്കാർ അക്രമാ​സക്തർ ആയിത്തീ​രു​ന്ന​തി​നുള്ള സാധ്യത കൂടു​ത​ലാണ്‌. അവരിൽ പലരും “മനം തഴമ്പി​ച്ചു​പോ​യവർ” ആണ്‌, അതു​കൊണ്ട്‌ അവർ എളുപ്പം പ്രകോ​പി​ത​രാ​യി പകയോ​ടെ, മയമി​ല്ലാ​തെ ഇടപെ​ടും.—എഫെസ്യർ 4:19.

ശമുവേൽ താമസി​ക്കു​ന്നത്‌ ഒരു പാർപ്പിട സമുച്ച​യ​ത്തി​ലാണ്‌. കവർച്ച​ക്കാർ എത്തി വഴിയ​ട​ച്ചിട്ട്‌ ഓരോ കെട്ടി​ട​ത്തി​ലും കയറി കൊള്ള​യ​ടി​ക്കാൻ തുടങ്ങി. വെടി​യു​ടെ​യും വാതിൽ അടിച്ചു​പൊ​ളി​ക്കു​ന്ന​തി​ന്റെ​യും ശബ്ദവും ആളുകൾ അലറി​വി​ളി​ക്കു​ന്ന​തും മുറവി​ളി​കൂ​ട്ടു​ന്ന​തും എല്ലാം ശമുവേൽ കേട്ടു. രക്ഷപ്പെ​ടാൻ സാധി​ക്കു​മാ​യി​രു​ന്നില്ല. മുട്ടു​കു​ത്തി​നിന്ന്‌ കൈക​ളു​യർത്തി കണ്ണുക​ള​ടച്ച്‌ കാത്തി​രി​ക്കാൻ ശമുവേൽ ഭാര്യ​യോ​ടും മൂന്നു പുത്ര​ന്മാ​രോ​ടും പറഞ്ഞു. കവർച്ച​ക്കാർ ഇരച്ചു​ക​യ​റി​യ​പ്പോൾ, അവരുടെ മുഖത്തു നോക്കാ​തെ താഴേക്കു നോക്കി​ക്കൊണ്ട്‌ ശമുവേൽ അവരോ​ടു സംസാ​രി​ച്ചു. മുഖം കണ്ടു താൻ അവരെ പിന്നീടു തിരി​ച്ച​റി​ഞ്ഞേ​ക്കു​മെന്ന വിചാരം അവർക്ക്‌ ഉണ്ടാകേണ്ട എന്ന്‌ അദ്ദേഹം കരുതി. അദ്ദേഹം പറഞ്ഞു: “അകത്തു​വന്ന്‌ നിങ്ങൾക്ക്‌ ഇഷ്ടമു​ള്ള​തെ​ല്ലാം എടു​ത്തോ​ളൂ. എന്തു വേണ​മെ​ങ്കി​ലും എടുക്കാം. ഞങ്ങൾ യഹോ​വ​യു​ടെ സാക്ഷികൾ ആണ്‌. ഞങ്ങൾ നിങ്ങളെ തടയില്ല.” ഇതു കേട്ട്‌ കവർച്ച​ക്കാർ യഥാർഥ​ത്തിൽ അമ്പരന്നു. പിന്നീട്‌ ഏതാണ്ട്‌ ഒരു മണിക്കൂ​റി​നു​ള്ളിൽ ആയുധ​ധാ​രി​ക​ളായ 12 പേരുടെ ഒരു കൂട്ടം വന്നു. ആഭരണ​ങ്ങ​ളും പണവും ഇലക്‌​ട്രോ​ണിക്‌ ഉപകര​ണ​ങ്ങ​ളും മോഷ്ടി​ച്ചെ​ങ്കി​ലും അവർ, മറ്റുള്ള കെട്ടി​ട​ങ്ങ​ളിൽ ചെയ്‌ത​തു​പോ​ലെ, കുടും​ബാം​ഗ​ങ്ങളെ അടിക്കു​ക​യോ വാക്കത്തി​കൊണ്ട്‌ തല വെട്ടു​ക​യോ ചെയ്‌തില്ല. ജീവൻ തിരി​ച്ചു​കി​ട്ടി​യ​തിന്‌ ശമു​വേ​ലി​ന്റെ കുടും​ബം യഹോ​വ​യ്‌ക്കു നന്ദി പറഞ്ഞു.

പണത്തി​ന്റെ​യോ ഭൗതിക സ്വത്തു​ക്ക​ളു​ടെ​യോ കാര്യ​ത്തിൽ ചെറു​ത്തു​നിൽപ്പ്‌ നടത്തു​ന്നി​ല്ലെ​ങ്കിൽ ഇരകൾക്കു പരി​ക്കേൽക്കാ​നുള്ള സാധ്യത കുറവാ​ണെന്ന്‌ ഈ ദൃഷ്ടാന്തം പ്രകട​മാ​ക്കു​ന്നു.a

ക്രിസ്‌ത്യാ​നി ഒരു സാക്ഷ്യം കൊടു​ക്കു​ന്നത്‌ ചില​പ്പോൾ ഉപദ്രവം ഏൽക്കാ​തി​രി​ക്കാൻ സഹായി​ച്ചേ​ക്കാം. കവർച്ച​ക്കാർ ആഡേയു​ടെ വീട്‌ ആക്രമി​ച്ച​പ്പോൾ, അദ്ദേഹം അവരോ​ടു പറഞ്ഞു: “നിങ്ങൾക്കു കഷ്ടപ്പാ​ടു​കൾ ഉള്ളതു​കൊ​ണ്ടാ​ണു നിങ്ങൾ ഇത്തരം പ്രവൃ​ത്തി​യിൽ ഏർപ്പെ​ടു​ന്ന​തെന്ന്‌ എനിക്ക​റി​യാം. സകല കുടും​ബ​ങ്ങൾക്കും വേണ്ടത്ര ഭക്ഷിക്കാൻ ഉണ്ടായി​രി​ക്കുന്ന ഒരു കാലം വരു​മെന്ന്‌ യഹോ​വ​യു​ടെ സാക്ഷികൾ എന്ന നിലയിൽ ഞങ്ങൾ വിശ്വ​സി​ക്കു​ന്നു. ദൈവ​രാ​ജ്യ​ത്തിൻ കീഴിൽ സകലരും സമാധാ​ന​ത്തി​ലും സന്തോ​ഷ​ത്തി​ലും ജീവി​ക്കും.” അത്‌ കവർച്ച​ക്കാ​രു​ടെ ആക്രമ​ണ​ത്തിന്‌ മയം വരുത്തി. അവരിൽ ഒരാൾ പറഞ്ഞു: “നിങ്ങളു​ടെ വീട്ടി​ലേക്കു വന്നതിൽ ഞങ്ങൾക്കു വിഷമ​മുണ്ട്‌, പക്ഷേ വിശപ്പു​കൊ​ണ്ടാ​ണു ഞങ്ങൾ വന്നതെ​ന്നോർക്കണം.” ആഡേയു​ടെ വസ്‌തു​വ​കകൾ കൊള്ള​യ​ടി​ച്ചെ​ങ്കി​ലും, അവർ അദ്ദേഹ​ത്തെ​യും കുടും​ബ​ത്തെ​യും യാതൊ​ന്നും ചെയ്‌തില്ല.

ശാന്തരാ​യി നില​കൊ​ള്ളു​ക

അപകടാ​വ​സ്ഥ​യിൽ ആയിരി​ക്കു​മ്പോൾ ശാന്തരാ​യി നില​കൊ​ള്ളു​ന്നത്‌ എളുപ്പമല്ല, വിശേ​ഷി​ച്ചും കവർച്ച​ക്കാ​രു​ടെ മുഖ്യ​ല​ക്ഷ്യം തങ്ങളുടെ ഇരകളെ ഭീതി​യി​ലാ​ഴ്‌ത്തി കീഴ്‌പെ​ടു​ത്തു​ക​യാ​കു​മ്പോൾ. പ്രാർഥന നമ്മെ സഹായി​ക്കും. നിശ്ശബ്ദ​മാ​യി, ഹ്രസ്വ​മാ​യി നാം സഹായ​ത്തി​നാ​യി വിളി​ച്ച​പേ​ക്ഷി​ക്കു​ന്നത്‌ യഹോ​വ​യ്‌ക്കു കേൾക്കാ​നാ​കും. “യഹോ​വ​യു​ടെ കണ്ണു നീതി​മാ​ന്മാ​രു​ടെ മേലും അവന്റെ ചെവി അവരുടെ നിലവി​ളി​ക്കും തുറന്നി​രി​ക്കു​ന്നു” എന്നു ബൈബിൾ നമുക്ക്‌ ഉറപ്പു നൽകുന്നു. (സങ്കീർത്തനം 34:15) യഹോവ നമ്മുടെ പ്രാർഥന കേൾക്കു​ന്നുണ്ട്‌, ഏതു സ്ഥിതി​വി​ശേ​ഷ​ത്തെ​യും ശാന്തമാ​യി കൈകാ​ര്യം ചെയ്യു​ന്ന​തി​നുള്ള ജ്ഞാനം നൽകാൻ അവനു കഴിയും.—യാക്കോബ്‌ 1:5.

പ്രാർഥ​ന​യ്‌ക്കു പുറമേ, ശാന്തരാ​യി നില​കൊ​ള്ളു​ന്ന​തി​നുള്ള മറ്റൊരു സഹായം കവർച്ച​ക്കാ​രെ അഭിമു​ഖീ​ക​രി​ക്കേണ്ടി വരു​മ്പോൾ എന്തു ചെയ്യണം, എന്തു ചെയ്യരുത്‌ എന്നു മുന്നമേ തീരു​മാ​നി​ക്കു​ന്ന​താണ്‌. നിങ്ങൾക്ക്‌ എന്തെല്ലാം സ്ഥിതി​വി​ശേ​ഷങ്ങൾ നേരി​ടു​മെന്നു മുന്നമേ അറിയാൻ സാധി​ക്കു​ക​യില്ല എന്നതു ശരിതന്നെ. എങ്കിലും, തത്ത്വങ്ങൾ മനസ്സിൽ പിടി​ക്കു​ന്നതു നല്ലതാണ്‌, കെട്ടി​ട​ത്തി​നു തീപി​ടി​ക്കു​മ്പോൾ എടുക്കേണ്ട സുരക്ഷാ നടപടി​കൾ മനസ്സിൽ പിടി​ക്കു​ന്നത്‌ ജ്ഞാനപൂർവകം ആയിരി​ക്കു​ന്ന​തു​പോ​ലെ. മാനസി​ക​മാ​യി മുന്നമേ ഒരുങ്ങു​ന്നതു നിങ്ങളെ ശാന്തരാ​യി നില​കൊ​ള്ളാ​നും പരി​ഭ്രാ​ന്തി ഒഴിവാ​ക്കാ​നും പരിക്കിൽനി​ന്നു രക്ഷപ്പെ​ടാ​നും സഹായി​ക്കു​ന്നു.

കവർച്ചയെ കുറി​ച്ചുള്ള ദൈവ​ത്തി​ന്റെ വീക്ഷണം വ്യക്തമാ​യി പ്രസ്‌താ​വി​ച്ചി​ട്ടുണ്ട്‌: “യഹോ​വ​യായ ഞാൻ ന്യായത്തെ ഇഷ്ടപ്പെ​ടു​ക​യും അന്യാ​യ​മായ കവർച്ചയെ വെറു​ക്ക​യും ചെയ്യുന്നു.” (യെശയ്യാ​വു 61:8) കവർച്ചയെ വളരെ ഗൗരവ​മായ പാപമാ​യി പട്ടിക​പ്പെ​ടു​ത്താൻ യഹോവ തന്റെ പ്രവാ​ച​ക​നായ യെഹെ​സ്‌കേ​ലി​നെ നിശ്വ​സ്‌ത​നാ​ക്കി. (യെഹെ​സ്‌കേൽ 18:18) എന്നാൽ, കവർച്ചയെ കുറിച്ച്‌ അനുത​പി​ക്കു​ക​യും മോഷണ വസ്‌തു​ക്കൾ തിരിച്ചു കൊടു​ക്കു​ക​യും ചെയ്യുന്ന വ്യക്തി​യോട്‌ ദൈവം കരുണാ​പൂർവം ക്ഷമിക്കു​മെന്ന്‌ അതേ ബൈബിൾ പുസ്‌തകം പ്രകട​മാ​ക്കു​ക​യും ചെയ്യുന്നു.—യെഹെ​സ്‌കേൽ 33:14-16.

കുറ്റകൃ​ത്യ​ങ്ങൾ നിറഞ്ഞി​രി​ക്കുന്ന ഒരു ലോകത്ത്‌ ജീവി​ക്കു​ന്ന​വ​രാ​ണെ​ങ്കി​ലും, കവർച്ച മേലാൽ ഉണ്ടായി​രി​ക്കു​ക​യി​ല്ലാത്ത ദൈവ​രാ​ജ്യ​ത്തിൻ കീഴിൽ ജീവി​ക്കു​ന്ന​തി​നുള്ള പ്രത്യാ​ശ​യിൽ ക്രിസ്‌ത്യാ​നി​കൾ ആഹ്ലാദി​ക്കു​ന്നു. ആ കാലത്തെ കുറിച്ച്‌ ബൈബിൾ വാഗ്‌ദാ​നം ചെയ്യുന്നു: “ഓരോ​രു​ത്തൻ [ദൈവ​ജനം] താന്താന്റെ മുന്തി​രി​വ​ള്ളി​യു​ടെ കീഴി​ലും അത്തിവൃ​ക്ഷ​ത്തി​ന്റെ കീഴി​ലും പാർക്കും; ആരും അവരെ ഭയപ്പെ​ടു​ത്തു​ക​യില്ല; സൈന്യ​ങ്ങ​ളു​ടെ യഹോ​വ​യു​ടെ വായ്‌ അതു അരുളി​ച്ചെ​യ്‌തി​രി​ക്കു​ന്നു.”—മീഖാ 4:4.

[അടിക്കു​റി​പ്പു​കൾ]