ഓരോ ദിവസ​വും യഹോ​വ​യോ​ടൊത്ത്‌ പ്രവർത്തി​ക്കു​ക

1. നമുക്ക്‌ ഏതൊക്കെ വിധങ്ങ​ളിൽ യഹോ​വ​യോ​ടൊ​പ്പം പ്രവർത്തി​ക്കാ​നാ​കും?

പൂർണരായ മനുഷ്യർ തന്റെ ഉദ്ദേശ്യം നിവർത്തിക്കുന്നതിനുവേണ്ടി തന്നോ​ടൊ​പ്പം പ്രവർത്തി​ക്ക​ണ​മെ​ന്നാ​യി​രു​ന്നു യഹോ​വ​യു​ടെ ആഗ്രഹം. മനുഷ്യ​വർഗം ഇപ്പോൾ അപൂർണ​രാ​ണെ​ങ്കി​ലും, വിശ്വ​സ്‌ത​രായ ആളുകൾക്ക്‌ ഓരോ ദിവസ​വും യഹോ​വ​യോ​ടൊ​പ്പം പ്രവർത്തി​ക്കാൻ കഴിയും. ഉദാഹ​ര​ണ​ത്തിന്‌, ദൈവ​രാ​ജ്യ​ത്തി​ന്റെ സന്തോ​ഷ​വാർത്ത അറിയി​ച്ചു​കൊ​ണ്ടും ആളുകളെ ശിഷ്യ​രാ​ക്കി​ക്കൊ​ണ്ടും നമ്മൾ ‘ദൈവ​ത്തി​ന്റെ സഹപ്ര​വർത്ത​ക​രാ​യി’ പ്രവർത്തി​ക്കു​ക​യാണ്‌. (1 കൊരി. 3:5-9) സർവശ​ക്ത​നായ സ്രഷ്ടാവ്‌ പ്രധാ​ന​പ്പെ​ട്ട​തെന്നു വീക്ഷി​ക്കുന്ന ഒരു പ്രവർത്ത​ന​ത്തിൽ ആ സ്രഷ്ടാ​വി​നോ​ടൊ​പ്പം സഹകരി​ക്കാൻ കഴിയു​ന്നത്‌ എത്ര വലിയ ഒരു പദവി​യാണ്‌! എന്നാൽ പ്രസം​ഗ​പ്ര​വർത്ത​ന​ത്തി​ലും ശിഷ്യ​രാ​ക്കൽവേ​ല​യി​ലും മാത്രമല്ല യഹോ​വ​യോ​ടൊ​പ്പം നമുക്കു പ്രവർത്തി​ക്കാ​നാ​കു​ന്നത്‌. കുടും​ബാം​ഗ​ങ്ങ​ളെ​യും സഹാരാ​ധ​ക​രെ​യും സഹായി​ച്ചു​കൊ​ണ്ടും അതിഥി​പ്രി​യം കാണി​ച്ചു​കൊ​ണ്ടും ദിവ്യാ​ധി​പ​ത്യ​പ്ര​വർത്ത​ന​ങ്ങ​ളിൽ സ്വമന​സ്സാ​ലെ ഉൾപ്പെ​ട്ടു​കൊ​ണ്ടും വിശു​ദ്ധ​സേ​വ​ന​ത്തിൽ കൂടുതൽ ഏർപ്പെ​ട്ടു​കൊ​ണ്ടും നമുക്ക്‌ യഹോ​വ​യോ​ടൊത്ത്‌ പ്രവർത്തി​ക്കാൻ എങ്ങനെ കഴിയു​മെന്ന്‌ ഈ ലേഖന​ത്തിൽ ചിന്തി​ക്കും.—കൊലോ. 3:23.

2. യഹോ​വ​യു​ടെ ഉദ്ദേശ്യ​ത്തി​നു​വേണ്ടി നിങ്ങൾ ചെയ്യു​ന്ന​തി​നെ മറ്റുള്ള​വ​രു​ടേ​തു​മാ​യി ഒരിക്ക​ലും താരത​മ്യം ചെയ്യരു​താ​ത്തത്‌ എന്തു​കൊണ്ട്‌?

² ഈ ലേഖനം ചർച്ച ചെയ്യു​മ്പോൾ ഒരു കാര്യം മനസ്സിൽപ്പി​ടി​ക്കുക: യഹോ​വ​യ്‌ക്കു​വേണ്ടി നിങ്ങൾക്കു ചെയ്യാൻ കഴിയു​ന്ന​തി​നെ മറ്റുള്ളവർ ചെയ്യു​ന്ന​തു​മാ​യി ഒരിക്ക​ലും താരത​മ്യം ചെയ്യരുത്‌. ഓരോ​രു​ത്ത​രു​ടെ​യും പ്രായ​വും ആരോ​ഗ്യ​വും സാഹച​ര്യ​ങ്ങ​ളും കഴിവു​ക​ളും വ്യത്യ​സ്‌ത​മാ​ണെന്ന കാര്യം ഓർക്കുക. പൗലോസ്‌ അപ്പോ​സ്‌തലൻ ഇങ്ങനെ പറഞ്ഞു: “ഓരോ​രു​ത്ത​രും സ്വന്തം പ്രവൃത്തി വിലയി​രു​ത്തട്ടെ. അപ്പോൾ, തന്നെ മറ്റാരു​മാ​യും താരത​മ്യ​പ്പെ​ടു​ത്താ​തെ തന്നിൽത്തന്നെ അഭിമാ​നി​ക്കാൻ അയാൾക്കു വകയു​ണ്ടാ​കും.”—ഗലാ. 6:4.

കുടും​ബാം​ഗ​ങ്ങ​ളെ​യും സഹാരാ​ധ​ക​രെ​യും സഹായി​ക്കു​ക

3. കുടും​ബ​ത്തി​നു​വേണ്ടി കരുതു​മ്പോൾ യഹോ​വ​യോ​ടൊത്ത്‌ പ്രവർത്തി​ക്കു​ക​യാ​ണെന്നു പറയാൻ കഴിയു​ന്നത്‌ എന്തു​കൊണ്ട്‌?

³ തന്റെ ദാസന്മാർ കുടും​ബാം​ഗ​ങ്ങൾക്കു​വേണ്ടി കരുതാൻ യഹോവ പ്രതീ​ക്ഷി​ക്കു​ന്നു. ഉദാഹ​ര​ണ​ത്തിന്‌, നിങ്ങളു​ടെ പ്രിയ​പ്പെ​ട്ട​വ​രു​ടെ സാമ്പത്തി​കാ​വ​ശ്യ​ങ്ങൾ നിറ​വേ​റ്റു​ന്ന​തി​നു​വേണ്ടി നിങ്ങൾ ജോലി ചെയ്യേ​ണ്ട​തു​ണ്ടാ​യി​രി​ക്കാം. മക്കളെ നോക്കു​ന്ന​തി​നു​വേണ്ടി അനേകം അമ്മമാ​രും വീട്ടിൽത്തന്നെ കഴിയു​ന്നു. ഇനി, മുതിർന്ന ചില മക്കൾക്കു തങ്ങളുടെ പ്രായ​മായ മാതാ​പി​താ​ക്കളെ പരിപാ​ലി​ക്കണം. ഇതൊ​ന്നും അവഗണി​ക്കാൻ കഴിയുന്ന കാര്യ​ങ്ങളല്ല. ദൈവ​വ​ചനം പറയുന്നു: “തനിക്കു​ള്ള​വർക്കു​വേണ്ടി, പ്രത്യേ​കിച്ച്‌ സ്വന്തകു​ടും​ബ​ത്തി​നു​വേണ്ടി, കരുതാ​ത്ത​യാൾ വിശ്വാ​സം തള്ളിക്ക​ളഞ്ഞ്‌ അവിശ്വാ​സി​യെ​ക്കാൾ മോശ​മാ​യി​രി​ക്കു​ന്നു.” (1 തിമൊ. 5:8) ഇതു​പോ​ലുള്ള ഉത്തരവാ​ദി​ത്വ​ങ്ങ​ളു​ണ്ടെ​ങ്കിൽ ദിവ്യാ​ധി​പ​ത്യ​പ്ര​വർത്ത​ന​ങ്ങ​ളിൽ നിങ്ങൾ ആഗ്രഹി​ക്കു​ന്നത്ര ചെയ്യാൻ സമയം കിട്ടി​യെ​ന്നു​വ​രില്ല. എന്നാൽ വിഷമി​ക്കേ​ണ്ട​തില്ല. കുടും​ബ​ത്തി​നു​വേണ്ടി കരുതു​ന്നത്‌ യഹോ​വയെ സന്തോ​ഷി​പ്പി​ക്കു​ന്നു.—1 കൊരി. 10:31.

4. സ്വന്തം ആഗ്രഹ​ങ്ങ​ളെ​ക്കാൾ ഉപരി ദിവ്യാ​ധി​പ​ത്യ​കാ​ര്യ​ങ്ങൾ ഒന്നാമതു വെക്കാൻ മാതാ​പി​താ​ക്കൾക്ക്‌ എങ്ങനെ കഴിയും, അതിന്റെ ഫലം എന്താണ്‌?

⁴ കുട്ടി​കളെ ദിവ്യാ​ധി​പ​ത്യ​ല​ക്ഷ്യ​ങ്ങൾ വെക്കാൻ പ്രോ​ത്സാ​ഹി​പ്പി​ക്കു​മ്പോൾ ക്രിസ്‌തീ​യ​മാ​താ​പി​താ​ക്കൾ യഹോ​വ​യോ​ടൊത്ത്‌ പ്രവർത്തി​ക്കു​ക​യാണ്‌. ഇങ്ങനെ ചെയ്‌ത പല മാതാ​പി​താ​ക്കൾക്കും തങ്ങളുടെ മക്കൾ മുഴു​സ​മ​യ​സേ​വനം ഏറ്റെടു​ത്തി​രി​ക്കു​ന്നതു കാണാൻ കഴിഞ്ഞി​രി​ക്കു​ന്നു. അവരിൽ പലരും വീട്ടിൽനി​ന്നും അകലെ​യാണ്‌. ചിലർ മിഷന​റി​മാ​രാണ്‌. മറ്റു ചിലർ ആവശ്യം അധിക​മു​ള്ളി​ടത്ത്‌ പോയി മുൻനി​ര​സേ​വനം ചെയ്യുന്നു. വേറെ ചിലർ ബഥേലിൽ സേവി​ക്കു​ന്നു. ആഗ്രഹി​ക്കു​മ്പോ​ഴെ​ല്ലാം ഒത്തു​ചേ​രാൻ ഇത്തരം കുടും​ബ​ങ്ങൾക്കു കഴി​ഞ്ഞെ​ന്നു​വ​രില്ല. എങ്കിലും ആത്മത്യാ​ഗം ചെയ്യാൻ മനസ്സൊ​രു​ക്ക​മുള്ള മാതാ​പി​താ​ക്കൾ മക്കൾ അവരുടെ നിയമ​ന​ത്തിൽത്തന്നെ തുടരാ​നാണ്‌ അവരെ പ്രോ​ത്സാ​ഹി​പ്പി​ക്കു​ന്നത്‌. എന്തു​കൊണ്ട്‌? തങ്ങളുടെ മക്കൾ രാജ്യ​താ​ത്‌പ​ര്യ​ങ്ങൾ ഒന്നാമതു വെക്കു​ന്നതു കാണു​മ്പോൾ ആ മാതാ​പി​താ​ക്കൾക്ക്‌ അത്രയ​ധി​കം സന്തോ​ഷ​വും സംതൃ​പ്‌തി​യും തോന്നു​ന്നു. (3 യോഹ. 4) സ്വന്തം മകനെ യഹോ​വ​യ്‌ക്കു ‘സമർപ്പി​ച്ച​പ്പോൾ’ ഹന്നയ്‌ക്കു തോന്നി​യ​തു​ത​ന്നെ​യാ​യി​രി​ക്കും അവർക്കും തോന്നു​ന്നത്‌. ഈ വിധത്തിൽ യഹോ​വ​യോ​ടൊത്ത്‌ പ്രവർത്തി​ക്കു​ന്ന​തി​നെ മാതാ​പി​താ​ക്കൾ ഒരു പദവി​യാ​യി കാണുന്നു. മക്കൾ മറ്റ്‌ ഏതെങ്കി​ലും വിധത്തിൽ ശോഭി​ക്കാൻ അവർ പ്രതീ​ക്ഷി​ക്കു​ന്നില്ല.—1 ശമു. 1:28.

5. സഭയി​ലുള്ള സഹോ​ദ​ര​ങ്ങൾക്കു പ്രാ​യോ​ഗി​ക​മാ​യി എന്തൊക്കെ സഹായങ്ങൾ നിങ്ങൾക്കു ചെയ്യാ​നാ​കും? (ലേഖനാ​രം​ഭ​ത്തി​ലെ ചിത്രം കാണുക.)

⁵ നിങ്ങളു​ടെ കുടും​ബ​ത്തി​ലെ സാഹച​ര്യം എന്താണ്‌? നിങ്ങൾക്ക്‌ ഇപ്പോൾ ഭാരിച്ച കുടും​ബോ​ത്ത​ര​വാ​ദി​ത്വ​ങ്ങ​ളു​ണ്ടോ? ഇല്ലെങ്കിൽ, പ്രായ​മാ​യ​വരെ പരിച​രി​ക്കുന്ന സഹാരാ​ധ​കരെ നിങ്ങൾക്കു സഹായി​ക്കാ​നാ​കു​മോ? അതു​പോ​ലെ രോഗി​ക​ളെ​യോ പ്രായ​മാ​യ​വ​രെ​യോ മറ്റ്‌ ഏതെങ്കി​ലും വിധത്തിൽ സഹായം ആവശ്യ​മു​ള്ള​വ​രെ​യോ നിങ്ങൾക്കു പിന്തു​ണ​യ്‌ക്കാ​നാ​കു​മോ? നിങ്ങളു​ടെ സഭയി​ലു​ള്ള​വ​രെ​ക്കു​റിച്ച്‌ ഒന്നു ചിന്തി​ച്ചു​നോ​ക്കുക, അവരിൽ ആർക്കാണു സഹായം ആവശ്യ​മാ​യി​രി​ക്കു​ന്നത്‌? ഒരുപക്ഷേ സഭയിലെ ഒരു സഹോ​ദരി പ്രായ​മായ മാതാ​പി​താ​ക്കളെ ശുശ്രൂ​ഷി​ക്കു​ന്ന​തി​നു​വേണ്ടി വളരെ​യ​ധി​കം സമയം ചെലവി​ടു​ന്നു​ണ്ടാ​യി​രി​ക്കും. നിങ്ങൾക്ക്‌ ആ പ്രായ​മായ മാതാ​പി​താ​ക്കൾക്കു കൂട്ടി​രി​ക്കാ​നാ​കു​മോ? അപ്പോൾ ആ സഹോ​ദ​രി​ക്കു മറ്റു കാര്യങ്ങൾ ചെയ്യു​ന്ന​തി​നു സമയം ലഭിക്കും. അതുമ​ല്ലെ​ങ്കിൽ സഹോ​ദ​ര​ങ്ങളെ മീറ്റി​ങ്ങു​കൾക്കു പോകാ​നോ കടയിൽ പോയി സാധനങ്ങൾ വാങ്ങാ​നോ ആശുപ​ത്രി​യി​ലാ​യി​രി​ക്കുന്ന ആരെ​യെ​ങ്കി​ലും സന്ദർശി​ക്കാ​നോ നിങ്ങൾക്കു കൂട്ടി​ക്കൊണ്ട്‌ പോകാ​നാ​കു​മോ? നിങ്ങൾ പുറത്ത്‌ പോകു​മ്പോൾ അവർക്ക്‌ ആവശ്യ​മുള്ള എന്തെങ്കി​ലും ചെയ്‌തു​കൊ​ടു​ക്കാ​നോ വാങ്ങി​ക്കൊ​ണ്ടു​വ​രാ​നോ കഴിയു​മോ? ഇങ്ങനെ​യെ​ല്ലാം ചെയ്യു​മ്പോൾ അവരുടെ പ്രാർഥ​ന​യ്‌ക്ക്‌ ഉത്തരം കൊടു​ക്കു​ന്ന​തിൽ നിങ്ങൾ യഹോ​വ​യോ​ടൊത്ത്‌ പ്രവർത്തി​ക്കു​ക​യാ​യി​രി​ക്കും.—1 കൊരി​ന്ത്യർ 10:24 വായി​ക്കുക.

അതിഥി​പ്രി​യം കാണി​ക്കു​ക

6. അതിഥി​പ്രി​യം കാണി​ക്കു​ന്ന​തിൽ എന്താണ്‌ ഉൾപ്പെ​ട്ടി​രി​ക്കു​ന്നത്‌?

⁶ അതിഥി​പ്രി​യം കാണി​ക്കു​ന്ന​തിൽ ദൈവ​ത്തി​ന്റെ സഹപ്ര​വർത്തകർ പേരു​കേ​ട്ട​വ​രാണ്‌. ഗ്രീക്കു തിരു​വെ​ഴു​ത്തു​ക​ളിൽ “ആതിഥ്യം” എന്നു പരിഭാഷ ചെയ്‌തി​രി​ക്കുന്ന വാക്കിന്റെ അർഥം “അപരി​ചി​ത​രോ​ടു ദയ” എന്നാണ്‌. (എബ്രാ. 13:2, അടിക്കു​റിപ്പ്‌) അങ്ങനെ​യുള്ള സ്‌നേഹം കാണി​ക്കാൻ നമ്മളെ പഠിപ്പി​ക്കുന്ന പല ഉദാഹ​ര​ണ​ങ്ങ​ളും ബൈബി​ളി​ലുണ്ട്‌. (ഉൽപ. 18:1-5) ‘വിശ്വാ​സ​ത്താൽ നമ്മുടെ ബന്ധുക്ക​ളാ​യ​വ​രാ​ണെ​ങ്കി​ലും’ അല്ലെങ്കി​ലും മറ്റുള്ള​വരെ സഹായി​ക്കു​ന്ന​തി​നുള്ള അവസരങ്ങൾ കണ്ടെത്തി നമ്മൾ ഉപയോ​ഗി​ക്കണം.—ഗലാ. 6:10.

7. താമസ​സൗ​ക​ര്യം ആവശ്യ​മുള്ള മുഴു​സ​മ​യ​സേ​വ​ക​രോട്‌ അതിഥി​പ്രി​യം കാണി​ക്കേ​ണ്ടത്‌ എന്തു​കൊ​ണ്ടാ​ണെ​ന്നാ​ണു നിങ്ങൾക്കു തോന്നു​ന്നത്‌?

⁷ താമസ​സൗ​ക​ര്യം ആവശ്യ​മുള്ള മുഴു​സ​മ​യ​സേ​വ​ന​ത്തി​ലാ​യി​രി​ക്കുന്ന സഹോ​ദ​ര​ങ്ങ​ളോട്‌ അതിഥി​പ്രി​യം കാണി​ച്ചു​കൊണ്ട്‌ നിങ്ങൾക്കു ദൈവ​ത്തോ​ടൊ​പ്പം പ്രവർത്തി​ക്കാ​നാ​കു​മോ? (3 യോഹ​ന്നാൻ 5, 8 വായി​ക്കുക.) അത്തരം സന്ദർഭങ്ങൾ ‘പരസ്‌പരം പ്രോ​ത്സാ​ഹനം’ നൽകാ​നുള്ള അവസര​ങ്ങ​ളാണ്‌. (റോമ. 1:11, 12) ഓലാഫ്‌ എന്ന സഹോ​ദ​രനു പതിറ്റാ​ണ്ടു​കൾക്കു മുമ്പു​ണ്ടായ ഒരു അനുഭവം നോക്കുക. ഓലാഫ്‌ കുട്ടി​യാ​യി​രു​ന്ന​പ്പോൾ അദ്ദേഹ​ത്തി​ന്റെ സഭ സന്ദർശി​ക്കാൻ ഏകാകി​യായ ഒരു സർക്കിട്ട്‌ മേൽവി​ചാ​രകൻ വന്നു. അദ്ദേഹ​ത്തി​നു താമസ​സൗ​ക​ര്യം കൊടു​ക്കാൻ ആരും മുന്നോ​ട്ടു​വ​ന്നില്ല. സർക്കിട്ട്‌ മേൽവി​ചാ​ര​കനെ വീട്ടിൽ താമസി​പ്പി​ച്ചോ​ട്ടേ എന്ന്‌ ഓലാഫ്‌ സഹോ​ദരൻ സാക്ഷി​ക​ള​ല്ലാത്ത തന്റെ മാതാ​പി​താ​ക്ക​ളോ​ടു ചോദി​ച്ചു. അവർ സമ്മതിച്ചു, ഓലാഫ്‌ സോഫ​യിൽ കിട​ക്കേ​ണ്ടി​വ​രു​മെന്നു പറഞ്ഞു. അൽപ്പം ബുദ്ധി​മു​ട്ടു സഹി​ക്കേ​ണ്ടി​വ​ന്നെ​ങ്കി​ലും അങ്ങനെ ചെയ്‌ത​തു​കൊണ്ട്‌ വളരെ പ്രയോ​ജ​ന​മു​ണ്ടാ​യി. ഓലാഫ്‌ പറയുന്നു: “ആ ആഴ്‌ച ഞാൻ ഒരിക്ക​ലും മറക്കില്ല. സർക്കിട്ട്‌ മേൽവി​ചാ​ര​ക​നും ഞാനും എന്നും അതിരാ​വി​ലെ എഴു​ന്നേൽക്കും. രസകര​മായ പല വിഷയ​ങ്ങ​ളും ചർച്ച ചെയ്‌തു​കൊ​ണ്ടാ​ണു ഞങ്ങൾ പ്രഭാ​ത​ഭ​ക്ഷണം കഴിച്ചി​രു​ന്നത്‌. മുഴു​സ​മ​യ​സേ​വനം ഏറ്റെടു​ക്കാ​നുള്ള ആഗ്രഹം അത്‌ എന്നിൽ ജ്വലി​പ്പി​ച്ചു.” 40 വർഷത്തി​ല​ധി​ക​മാ​യി ഓലാഫ്‌ പല സ്ഥലങ്ങളിൽ മിഷന​റി​യാ​യി സേവി​ക്കു​ന്നു.

8. നമ്മൾ ദയ കാണി​ക്കു​ന്നത്‌ ആളുകൾ ആദ്യ​മൊ​ന്നും വിലമ​തി​ച്ചി​ല്ലെ​ങ്കി​ലും തുടർന്നും ദയ കാണി​ക്കാൻ എന്തൊക്കെ കാരണ​ങ്ങ​ളുണ്ട്‌? ഉദാഹ​രണം പറയുക.

⁸ അപരി​ചി​ത​രോ​ടു പല വിധങ്ങ​ളിൽ സ്‌നേഹം കാണി​ക്കാ​നാ​കും. ആദ്യ​മൊ​ക്കെ നിങ്ങളു​ടെ ശ്രമങ്ങൾ അവർ കാര്യ​മാ​യി എടു​ത്തെന്നു വരില്ല. ഒരു അനുഭവം നോക്കാം. ഒരിക്കൽ സ്‌പെ​യി​നി​ലെ ഒരു പ്രചാരക ഇക്വ​ഡോ​റിൽനി​ന്നുള്ള യെസിക എന്ന ഒരു സ്‌ത്രീ​യു​മാ​യി ബൈബിൾപ​ഠനം നടത്തു​ക​യാ​യി​രു​ന്നു. പഠനത്തി​നി​ടെ യെസിക നിറു​ത്താ​തെ കരയാൻ തുടങ്ങി. പ്രചാരക കാര്യം തിരക്കി. സ്‌പെ​യി​നി​ലേക്കു കുടി​യേ​റു​ന്ന​തി​നു മുമ്പുള്ള ഒരു സംഭവം യെസിക അപ്പോൾ പറഞ്ഞു. ഇക്വ​ഡോ​റിൽ തീർത്തും ദാരി​ദ്ര്യ​ത്തി​ലാ​ണു യെസിക കഴിഞ്ഞി​രു​ന്നത്‌. ഒരു ദിവസം യെസി​ക​യു​ടെ വീട്ടിൽ അൽപ്പം​പോ​ലും ഭക്ഷണമി​ല്ലാ​യി​രു​ന്നു. മകൾക്കു കൊടു​ക്കാൻ വെള്ളം മാത്രമേ ഉണ്ടായി​രു​ന്നു​ള്ളൂ. കുഞ്ഞിനെ സമാധാ​നി​പ്പിച്ച്‌ ഉറക്കാൻ ശ്രമി​ക്കു​മ്പോൾത്തന്നെ സഹായ​ത്തി​നു​വേണ്ടി യെസിക പ്രാർഥി​ക്കു​ക​യും ചെയ്‌തു. അധികം വൈകാ​തെ രണ്ടു സാക്ഷികൾ വീട്ടിൽ വന്നു. പക്ഷേ യെസിക ഒരു മര്യാ​ദ​യു​മി​ല്ലാ​തെ​യാണ്‌ അവരോട്‌ ഇടപെ​ട്ടത്‌. അവർ കൊടുത്ത മാസിക കീറി​ക്ക​ളഞ്ഞു. എന്നിട്ട്‌ ചോദി​ച്ചു: “ഇതു കൊടു​ത്താൽ എന്റെ മോളു​ടെ വിശപ്പു മാറു​മോ?” സഹോ​ദ​രി​മാർ യെസി​കയെ ആശ്വസി​പ്പി​ക്കാൻ ശ്രമി​ച്ചെ​ങ്കി​ലും ഫലമു​ണ്ടാ​യില്ല. പിന്നീട്‌ അവർ ഒരു കുട്ട നിറയെ ഭക്ഷണം യെസി​ക​യു​ടെ വീട്ടു​വാ​തിൽക്കൽ കൊണ്ടു​വെച്ചു. അവരുടെ ദയ യെസി​ക​യു​ടെ ഹൃദയത്തെ സ്‌പർശി​ച്ചു. ആ സംഭവം ഓർത്താ​ണു യെസിക ഇപ്പോൾ കരഞ്ഞത്‌. ദൈവം തന്റെ പ്രാർഥ​ന​യ്‌ക്ക്‌ ഉത്തരം തന്നപ്പോൾ അതു താൻ ശ്രദ്ധി​ച്ചി​ല്ല​ല്ലോ എന്ന്‌ ഓർത്ത്‌ യെസി​ക​യ്‌ക്കു വിഷമം തോന്നി. എന്നാൽ ഇപ്പോൾ യെസിക യഹോ​വയെ സേവി​ക്കാൻ ഉറച്ച തീരു​മാ​ന​മെ​ടു​ത്തു. ആ സഹോ​ദ​രി​മാർ ഔദാ​ര്യം കാണി​ച്ച​തു​കൊണ്ട്‌ എന്തു നല്ല ഫലമാ​ണു​ണ്ടാ​യത്‌! —സഭാ. 11:1, 6.

ദിവ്യാ​ധി​പത്യ പ്രോ​ജ​ക്‌ടു​ക​ളിൽ സന്നദ്ധ​സേ​വ​ക​രാ​യി പ്രവർത്തി​ക്കു​ക

9, 10. (എ) ബൈബിൾക്കാ​ല​ങ്ങ​ളിൽ ദൈവ​ജ​ന​ത്തി​നി​ട​യിൽ സന്നദ്ധ​സേ​വ​ക​രു​ടെ ആവശ്യ​മു​ണ്ടാ​യി​രുന്ന ചില സാഹച​ര്യ​ങ്ങൾ ഏതൊ​ക്കെ​യാണ്‌? (ബി) ഇന്നു മനസ്സൊ​രു​ക്ക​മുള്ള സഹോ​ദ​ര​ന്മാർ സഭയുടെ ഏതൊക്കെ ആവശ്യ​ങ്ങ​ളാ​ണു കൈകാ​ര്യം ചെയ്യു​ന്നത്‌?

⁹ പുരാതന ഇസ്രാ​യേ​ലി​ന്റെ ചരിത്രം നോക്കി​യാൽ, വ്യത്യസ്‌ത അവസര​ങ്ങ​ളിൽ സന്നദ്ധ​സേ​വ​ക​രു​ടെ ആവശ്യ​മു​ണ്ടാ​യി​ട്ടുണ്ട്‌. (പുറ. 36:2; 1 ദിന. 29:5; നെഹ. 11:2) ഇന്നും, നിങ്ങളു​ടെ സമയവും കഴിവു​ക​ളും പണവും മറ്റു വസ്‌തു​ക്ക​ളും സ്വമന​സ്സാ​ലെ വിട്ടു​കൊ​ടു​ത്തു​കൊണ്ട്‌ സഹോ​ദ​ര​ങ്ങളെ സഹായി​ക്കാ​നുള്ള അവസര​ങ്ങ​ളുണ്ട്‌. അങ്ങനെ ചെയ്യു​മ്പോൾ നിങ്ങൾക്കു വലിയ സന്തോ​ഷ​വും അനു​ഗ്ര​ഹ​ങ്ങ​ളും ലഭിക്കും.

¹⁰ ശുശ്രൂ​ഷാ​ദാ​സ​ന്മാ​രും മൂപ്പന്മാ​രും എന്ന നിയമ​ന​ങ്ങ​ളിൽ എത്തിപ്പി​ടി​ച്ചു​കൊണ്ട്‌ യഹോ​വ​യോ​ടൊത്ത്‌ പ്രവർത്തി​ക്കാൻ സഹോ​ദ​ര​ന്മാ​രെ ദൈവ​വ​ചനം പ്രോ​ത്സാ​ഹി​പ്പി​ക്കു​ന്നു. (1 തിമൊ. 3:1, 8, 9; 1 പത്രോ. 5:2, 3) അങ്ങനെ ചെയ്യു​ന്നവർ മറ്റുള്ള​വരെ പ്രാ​യോ​ഗി​ക​മാ​യും ആത്മീയ​മാ​യും സഹായി​ക്കാൻ ആഗ്രഹി​ക്കും. (പ്രവൃ. 6:1-4) ഒരു സേവക​നാ​യി പ്രവർത്തി​ക്കാ​നോ പ്രസി​ദ്ധീ​ക​ര​ണങ്ങൾ, സഭാ​പ്ര​ദേശം, രാജ്യ​ഹാ​ളി​ന്റെ അറ്റകു​റ്റ​പ്പ​ണി​കൾ എന്നിങ്ങ​നെ​യുള്ള കാര്യ​ങ്ങ​ളിൽ സഹായി​ക്കാ​നോ നിങ്ങൾക്കു കഴിയു​മോ എന്നു മൂപ്പന്മാർ ചോദി​ച്ചി​ട്ടു​ണ്ടോ? ഈ വിധങ്ങ​ളിൽ മറ്റുള്ള​വരെ സഹായി​ക്കു​ന്നത്‌ അങ്ങേയറ്റം സന്തോഷം തരു​മെ​ന്നാണ്‌ ഇത്തരം ഉത്തരവാ​ദി​ത്വ​ങ്ങൾ നിർവ​ഹി​ക്കുന്ന സഹോ​ദ​രങ്ങൾ പറയു​ന്നത്‌.

11. ദിവ്യാ​ധി​പത്യ പ്രോ​ജ​ക്‌ടു​ക​ളിൽ ഏർപ്പെ​ട്ട​പ്പോൾ കിട്ടിയ കൂട്ടു​കാർ ഒരു സഹോ​ദ​രി​യെ എങ്ങനെ​യാ​ണു സഹായി​ച്ചത്‌?

¹¹ ദിവ്യാ​ധി​പത്യ പ്രോ​ജ​ക്‌ടു​ക​ളിൽ പങ്കെടു​ക്കു​ന്ന​വർക്കു പുതി​യ​പു​തിയ കൂട്ടു​കാ​രെ കണ്ടെത്താൻ കഴിയും. 18 വർഷമാ​യി രാജ്യ​ഹാൾ നിർമാ​ണ​പ്ര​വർത്ത​ന​ങ്ങ​ളിൽ പങ്കെടു​ക്കുന്ന മാർജി എന്ന സഹോ​ദ​രി​യു​ടെ അനുഭവം നോക്കുക. ഈ കാലയ​ള​വിൽ മാർജി സഹോ​ദരി ചെറു​പ്പ​ക്കാ​രായ പല സഹോ​ദ​രി​മാ​രെ​യും സ്‌നേ​ഹ​ത്തോ​ടെ പരിശീ​ലി​പ്പി​ച്ചു. ഇങ്ങനെ​യുള്ള പ്രോ​ജ​ക്‌ടു​കൾ പരസ്‌പരം ആത്മീയ​മാ​യി പ്രോ​ത്സാ​ഹി​പ്പി​ക്കാ​നുള്ള നല്ല അവസര​ങ്ങ​ളാ​ണെന്നു സഹോ​ദരി മനസ്സി​ലാ​ക്കി. (റോമ. 1:12) നിർമാ​ണ​പ്രോ​ജ​ക്‌ടു​ക​ളിൽ കിട്ടിയ സുഹൃ​ത്തു​ക്കൾ ജീവി​ത​ത്തി​ന്റെ ബുദ്ധി​മു​ട്ടേ​റിയ സമയങ്ങ​ളിൽ മാർജി സഹോ​ദ​രി​ക്കു പ്രോ​ത്സാ​ഹ​ന​ത്തി​ന്റെ ഒരു ഉറവാണ്‌. നിങ്ങൾ എപ്പോ​ഴെ​ങ്കി​ലും അങ്ങനെ​യുള്ള നിർമാ​ണ​പ്ര​വർത്ത​ന​ങ്ങ​ളിൽ പങ്കെടു​ത്തി​ട്ടു​ണ്ടോ? എന്തെങ്കി​ലും പ്രത്യേക വൈദ​ഗ്‌ധ്യം ഉണ്ടെങ്കി​ലും ഇല്ലെങ്കി​ലും നിങ്ങൾക്കു മുന്നോ​ട്ടു​വ​രാ​നാ​കു​മോ?

12. ദുരന്ത​ങ്ങ​ളു​ണ്ടാ​കു​മ്പോൾ നിങ്ങൾക്ക്‌ എങ്ങനെ മറ്റുള്ള​വരെ സഹായി​ക്കാം?

¹² ദുരന്തങ്ങൾ ആഞ്ഞടി​ക്കുന്ന സമയത്ത്‌ സഹോ​ദ​ര​ങ്ങളെ പ്രാ​യോ​ഗി​ക​മായ വിധങ്ങ​ളിൽ സഹായി​ച്ചു​കൊണ്ട്‌ ദൈവ​ത്തോ​ടൊ​പ്പം പ്രവർത്തി​ക്കാ​നുള്ള അവസരങ്ങൾ ദൈവ​ജ​ന​ത്തി​നുണ്ട്‌. ഉദാഹ​ര​ണ​ത്തിന്‌, അവർ ദുരന്ത​ത്തി​ന്റെ കെടു​തി​കൾ അനുഭ​വി​ക്കു​ന്ന​വരെ സാമ്പത്തി​ക​മാ​യി സഹായി​ക്കു​ന്നു. (യോഹ. 13:34, 35; പ്രവൃ. 11:27-30) ശുചീ​ക​ര​ണ​ജോ​ലി​ക​ളി​ലും പുനർനിർമാ​ണ​പ്ര​വർത്ത​ന​ങ്ങ​ളി​ലും സഹായി​ക്കു​ന്ന​താ​ണു മറ്റൊരു വിധം. ഒരു പ്രളയ​മു​ണ്ടാ​യ​പ്പോൾ ഗബ്രി​യേല എന്ന പോള​ണ്ടു​കാ​രി​യായ സഹോ​ദ​രി​യു​ടെ വീട്‌ ഏതാണ്ട്‌ പൂർണ​മാ​യി നശിച്ചു. അയൽസ​ഭ​ക​ളിൽനി​ന്നുള്ള സഹോ​ദ​രങ്ങൾ സഹായി​ക്കാൻ എത്തിയ​പ്പോൾ സഹോ​ദ​രി​യു​ടെ മനസ്സു നിറഞ്ഞു. സഹോ​ദരി പറയുന്നു: “എനിക്കു നഷ്ടപ്പെ​ട്ട​തി​നെ​ക്കു​റിച്ച്‌ സംസാ​രി​ക്കാൻ ഞാൻ ആഗ്രഹി​ക്കു​ന്നില്ല. അതെല്ലാം വെറും ഭൗതി​ക​വ​സ്‌തു​ക്ക​ളാണ്‌. കിട്ടി​യ​തി​നെ​ക്കു​റിച്ച്‌ സംസാ​രി​ക്കാ​നാണ്‌ എനിക്ക്‌ ഇഷ്ടം. ക്രിസ്‌തീ​യ​സ​ഭ​യു​ടെ ഭാഗമാ​യി​രി​ക്കു​ന്നത്‌ ഒരു അതുല്യ​പ​ദ​വി​യാ​ണെ​ന്നും അതു സന്തോ​ഷ​ത്തി​ന്റെ​യും ആനന്ദത്തി​ന്റെ​യും ഉറവാ​ണെ​ന്നും ഈ അനുഭവം എനിക്കു കൂടുതൽ ഉറപ്പു തന്നു.” ദുരന്ത​ങ്ങ​ളിൽ സഹായം ലഭിച്ച മിക്കവർക്കും ഇങ്ങനെ​ത​ന്നെ​യാ​ണു തോന്നു​ന്നത്‌. അത്തരം സഹായം കൊടു​ത്തു​കൊണ്ട്‌ യഹോ​വ​യോ​ടൊ​പ്പം പ്രവർത്തി​ക്കു​ന്ന​വ​രും വലിയ സംതൃ​പ്‌തി ആസ്വദി​ക്കു​ന്നു.—പ്രവൃ​ത്തി​കൾ 20:35; 2 കൊരി​ന്ത്യർ 9:6, 7 വായി​ക്കുക.

13. സന്നദ്ധ​സേ​വനം ചെയ്യു​ന്നത്‌ യഹോ​വ​യു​മാ​യുള്ള ബന്ധം ശക്തി​പ്പെ​ടു​ത്തു​ന്നത്‌ എങ്ങനെ? ഒരു ഉദാഹ​രണം പറയുക.

¹³ ഐക്യ​നാ​ടു​ക​ളിൽ അഭയാർഥി​ക​ളാ​യി എത്തിയ സാക്ഷി​കളെ സഹായി​ച്ചു​കൊണ്ട്‌ സ്റ്റെഫാ​നി​യും മറ്റു പ്രചാ​ര​ക​രും ദൈവ​ത്തോ​ടൊ​പ്പം പ്രവർത്തി​ക്കു​ന്ന​തി​ന്റെ സന്തോഷം ആസ്വദി​ച്ചു. യുദ്ധബാ​ധി​ത​പ്ര​ദേ​ശ​ങ്ങ​ളിൽനിന്ന്‌ എത്തിയ കുടും​ബ​ങ്ങൾക്കു​വേണ്ടി വീടുകൾ കണ്ടെത്താ​നും അവ സജ്ജീക​രി​ക്കാ​നും അവർ സഹായി​ച്ചു. സ്റ്റെഫാനി പറയുന്നു: “ലോക​വ്യാ​പക സഹോ​ദ​ര​സ​മൂ​ഹ​ത്തി​ന്റെ സ്‌നേഹം അനുഭ​വി​ച്ച​പ്പോൾ അവരുടെ നന്ദിയും സന്തോ​ഷ​വും ഒന്നു കാണേ​ണ്ട​താ​യി​രു​ന്നു. അതു ഞങ്ങളുടെ ഹൃദയത്തെ ശരിക്കും സ്‌പർശി​ച്ചു. ഞങ്ങൾ അവരെ സഹായി​ച്ചെ​ന്നാണ്‌ അവർ പറയു​ന്നത്‌. എന്നാൽ വാസ്‌തവം പറയട്ടെ, ഞങ്ങൾക്കാ​ണു കൂടുതൽ സഹായം കിട്ടി​യത്‌. സ്‌നേഹം, ഐക്യം, വിശ്വാ​സം, യഹോ​വ​യി​ലുള്ള ആശ്രയം ഒക്കെ കാണാ​നി​ട​യായ ഞങ്ങൾക്ക്‌ യഹോ​വ​യോ​ടുള്ള സ്‌നേഹം ശക്തി​പ്പെട്ടു. യഹോ​വ​യു​ടെ സംഘട​ന​യി​ലൂ​ടെ ലഭിക്കുന്ന എല്ലാത്തി​നോ​ടും ആഴമായ വിലമ​തി​പ്പു​ള്ള​വ​രാ​യി​രി​ക്കാ​നും ഈ അനുഭവം ഞങ്ങളെ സഹായി​ച്ചു.”

നിങ്ങളു​ടെ സേവനം വികസി​പ്പി​ക്കു​ക

14, 15. (എ) യശയ്യ പ്രവാ​ചകൻ എങ്ങനെ​യുള്ള മനോ​ഭാ​വ​മാ​ണു പ്രകടി​പ്പി​ച്ചത്‌? (ബി) ഇന്നത്തെ രാജ്യ​പ്ര​ചാ​ര​കർക്ക്‌ യശയ്യ പ്രവാ​ച​കന്റെ മനോ​ഭാ​വം എങ്ങനെ അനുക​രി​ക്കാം?

¹⁴ യഹോവയോടൊപ്പം ഇപ്പോഴത്തേതിനെക്കാൾ കൂടുതൽ പ്രവർത്തി​ക്കാൻ നിങ്ങൾ ആഗ്രഹി​ക്കു​ന്നു​ണ്ടോ? സംഘട​ന​യു​ടെ ആവശ്യ​ങ്ങൾക്ക​നു​സ​രിച്ച്‌ മറ്റൊരു സ്ഥലത്തേക്കു മാറി​ത്താ​മ​സി​ക്കാൻ നിങ്ങൾ സന്നദ്ധനാ​ണോ? ഉദാര​മ​ന​സ്‌കത പ്രകട​മാ​ക്കു​ന്ന​തി​നു ദൈവ​ത്തി​ന്റെ ദാസന്മാർ വീട്ടിൽനി​ന്നും അകലേക്കു മാറണ​മെ​ന്നില്ല എന്നതു ശരിയാണ്‌. എങ്കിലും അനുകൂ​ല​മായ സാഹച​ര്യ​ങ്ങ​ളുള്ള ചില സഹോ​ദ​രങ്ങൾ ദൂരെ​യുള്ള സ്ഥലങ്ങളി​ലേക്കു മാറി​ത്താ​മ​സി​ച്ചി​രി​ക്കു​ന്നു. യശയ്യ പ്രവാ​ച​കന്റെ അതേ മനോ​ഭാ​വ​മാണ്‌ അവർ കാണി​ച്ചി​രി​ക്കു​ന്നത്‌. “ഞാൻ ആരെ അയയ്‌ക്കണം? ആരു ഞങ്ങൾക്കു​വേണ്ടി പോകും” എന്ന യഹോ​വ​യു​ടെ ചോദ്യ​ത്തി​നു മറുപ​ടി​യാ​യി യശയ്യ പറഞ്ഞു: “ഇതാ ഞാൻ, എന്നെ അയച്ചാ​ലും!” (യശ. 6:8) സംഘട​ന​യു​ടെ ആവശ്യ​ങ്ങ​ളോട്‌ ഇതേ രീതി​യിൽ പ്രതി​ക​രി​ക്കാ​നുള്ള ആഗ്രഹം നിങ്ങൾക്കു​ണ്ടോ, അതിനു സാഹച​ര്യ​ങ്ങൾ നിങ്ങളെ അനുവ​ദി​ക്കു​ന്നു​ണ്ടോ? നിലവിൽ എന്തൊക്കെ ആവശ്യ​ങ്ങ​ളാ​ണു​ള്ളത്‌?

¹⁵ പ്രസംഗ-ശിഷ്യ​രാ​ക്കൽ വേല​യെ​ക്കു​റിച്ച്‌ യേശു പറഞ്ഞു: “വിളവ്‌ ധാരാ​ള​മുണ്ട്‌; പക്ഷേ പണിക്കാർ കുറവാണ്‌. അതു​കൊണ്ട്‌ വിള​വെ​ടു​പ്പി​നു പണിക്കാ​രെ അയയ്‌ക്കാൻ വിള​വെ​ടു​പ്പി​ന്റെ അധികാ​രി​യോ​ടു യാചി​ക്കുക.” (മത്താ. 9:37, 38) പ്രചാ​ര​ക​രു​ടെ ആവശ്യം അധിക​മുള്ള ഒരു സ്ഥലത്ത്‌, ഒരുപക്ഷേ മുൻനി​ര​സേ​വ​ക​നാ​യി, പ്രവർത്തി​ക്കാൻ നിങ്ങൾക്കു കഴിയു​മോ? അല്ലെങ്കിൽ അങ്ങനെ ചെയ്യാൻ മറ്റൊ​രാ​ളെ സഹായി​ക്കാൻ കഴിയു​മോ? ദൈവ​ത്തോ​ടും അയൽക്കാ​രോ​ടും സ്‌നേഹം കാണി​ക്കാൻ കഴിയുന്ന ഏറ്റവും നല്ല മാർഗം കൊയ്‌ത്തു​കാ​രു​ടെ ആവശ്യം അധിക​മു​ള്ളി​ടത്ത്‌ മുൻനി​ര​സേ​വനം ചെയ്യു​ന്ന​താ​ണെന്ന്‌ അനേകം സഹോ​ദ​രീ​സ​ഹോ​ദ​ര​ന്മാർ കണ്ടെത്തി​യി​രി​ക്കു​ന്നു. നിങ്ങളു​ടെ സേവനം വികസി​പ്പി​ക്കാൻ കഴിയുന്ന മറ്റു മാർഗ​ങ്ങ​ളെ​ക്കു​റിച്ച്‌ നിങ്ങൾക്കു ചിന്തി​ക്കാൻ കഴിയു​മോ? അങ്ങനെ ചെയ്യു​ന്നതു വലിയ സന്തോഷം കൈവ​രു​ത്തും.

16, 17. യഹോ​വ​യു​ടെ സേവന​ത്തിൽ കൂടു​ത​ലാ​യി ചെയ്യാൻ നിങ്ങൾക്ക്‌ മറ്റ്‌ എന്തെല്ലാം അവസര​ങ്ങ​ളുണ്ട്‌?

¹⁶ കുറച്ച്‌ മാസ​ത്തേക്ക്‌ ബഥേലി​ലോ നിർമാ​ണ​പ്ര​വർത്ത​ന​ങ്ങ​ളി​ലോ സേവി​ക്കാൻ നിങ്ങൾ സന്നദ്ധനാ​ണോ? അല്ലെങ്കിൽ വീട്ടിൽനിന്ന്‌ പോയി​വന്ന്‌ സേവി​ക്കാ​നാ​കു​മോ? ഏതു സ്ഥലത്തും ഏതു നിയമ​ന​വും ഏറ്റെടു​ക്കാൻ മനസ്സുള്ള വ്യക്തി​കളെ സംഘട​ന​യിൽ എപ്പോ​ഴും ആവശ്യ​മുണ്ട്‌. അതു​കൊണ്ട്‌ ചില പ്രത്യേ​ക​മേ​ഖ​ല​ക​ളിൽ കഴിവു​ക​ളു​ണ്ടെ​ങ്കി​ലും ആവശ്യം കൂടു​ത​ലുള്ള മറ്റൊരു മേഖല​യിൽ നിങ്ങൾക്കു നിയമനം ലഭി​ച്ചേ​ക്കാം. ആവശ്യം അധിക​മുള്ള മേഖല​യിൽ സേവി​ക്കാൻ തങ്ങളെ​ത്തന്നെ വിട്ടു​കൊ​ടു​ക്കുന്ന വ്യക്തി​ക​ളു​ടെ ആത്മത്യാ​ഗ​മ​നോ​ഭാ​വത്തെ യഹോവ വിലമ​തി​ക്കു​ന്നു.—സങ്കീ. 110:3.

¹⁷ യഹോ​വയെ തിക​വോ​ടെ സേവി​ക്കു​ന്ന​തി​നു കൂടുതൽ പരിശീ​ലനം കിട്ടാൻ നിങ്ങൾ ആഗ്രഹി​ക്കു​ന്നു​ണ്ടോ? അങ്ങനെ​യെ​ങ്കിൽ രാജ്യ​സു​വി​ശേ​ഷ​കർക്കുള്ള സ്‌കൂ​ളിൽ പങ്കെടു​ക്കാൻ അപേക്ഷി​ക്കാ​വു​ന്ന​താണ്‌. ഈ സ്‌കൂ​ളി​ലൂ​ടെ, മുഴു​സ​മ​യ​സേ​വ​ന​ത്തി​ലുള്ള ആത്മീയ​മ​ന​സ്‌ക​രായ സഹോ​ദ​ര​ങ്ങൾക്കു കൂടുതൽ പരിശീ​ലനം കിട്ടുന്നു. സേവനം വികസി​പ്പി​ക്കാൻ അത്‌ അവരെ സഹായി​ക്കും. ഈ സ്‌കൂ​ളിൽ ചേരാൻ അപേക്ഷി​ക്കു​ന്നവർ കോഴ്‌സ്‌ പൂർത്തി​യാ​ക്കി​യ​ശേഷം ലഭിക്കുന്ന ഏതു നിയമ​ന​വും സ്വീക​രി​ക്കാൻ മനസ്സു​ള്ള​വ​രാ​യി​രി​ക്കണം. ഈ അവസരം പ്രയോ​ജ​ന​പ്പെ​ടു​ത്തി​ക്കൊണ്ട്‌ കൂടുതൽ സേവന​പ​ദ​വി​കൾ എത്തിപ്പി​ടി​ക്കാൻ നിങ്ങൾ തയ്യാറാ​ണോ?—1 കൊരി. 9:23.

18. ഓരോ ദിവസ​വും യഹോ​വ​യോ​ടൊ​പ്പം പ്രവർത്തി​ക്കു​ന്ന​തി​ന്റെ പ്രയോ​ജ​നങ്ങൾ എന്തായി​രി​ക്കും?

¹⁸ ഉദാരത കാണി​ക്കാൻ മനസ്സു​ള്ള​വ​രാണ്‌ യഹോ​വ​യു​ടെ ജനം. അതു നന്മയു​ടെ​യും ദയയു​ടെ​യും സ്‌നേ​ഹ​ത്തി​ന്റെ​യും തെളി​വാണ്‌. അതു​പോ​ലെ എപ്പോ​ഴും മറ്റുള്ള​വരെ സഹായി​ക്കാ​നും അവർ ഒരുക്ക​മാണ്‌. അങ്ങനെ ചെയ്യു​മ്പോൾ ആഹ്ലാദ​വും സമാധാ​ന​വും സന്തോ​ഷ​വും നമ്മുടെ ഉള്ളിൽ തിരത​ല്ലും. (ഗലാ. 5:22, 23) നിങ്ങളു​ടെ സാഹച​ര്യ​ങ്ങൾ എന്തുത​ന്നെ​യാ​യാ​ലും, യഹോ​വ​യു​ടെ ഉദാരത അനുക​രി​ക്കുക, യഹോ​വ​യു​ടെ വില​യേ​റിയ ഒരു സഹപ്ര​വർത്ത​ക​നാ​യി തുടരുക, അങ്ങനെ യഥാർഥ​സ​ന്തോ​ഷം ആസ്വദി​ക്കുക!—സുഭാ. 3:9, 10.