മരണ​ത്തെ​ക്കു​റി​ച്ചുള്ള സത്യം അറിഞ്ഞ നമ്മൾ എന്തു ചെയ്യണം?

1-2. (എ) ഏതെല്ലാം വിധങ്ങ​ളി​ലാ​ണു സാത്താൻ ആളുകളെ വഞ്ചിച്ചി​രി​ക്കു​ന്നത്‌? (ബി) ഈ ലേഖന​ത്തിൽ നമ്മൾ എന്തെല്ലാം പഠിക്കും?

മനുഷ്യ​ച​രി​ത്ര​ത്തി​ന്റെ തുടക്കം​മു​തൽ ‘നുണയു​ടെ അപ്പനായ’ സാത്താൻ ആളുകളെ വഞ്ചിച്ചി​രി​ക്കു​ന്നു. (യോഹ. 8:44) മരണ​ത്തെ​യും മരണാ​ന​ന്ത​ര​ജീ​വി​ത​ത്തെ​യും കുറി​ച്ചുള്ള തെറ്റായ പഠിപ്പി​ക്ക​ലു​ക​ളാണ്‌ അവന്റെ നുണക​ളിൽ ചിലത്‌. ജനപ്രീ​തി നേടിയ അനേകം ആചാര​ങ്ങൾക്കും അന്ധവി​ശ്വാ​സ​ങ്ങൾക്കും ആ പഠിപ്പി​ക്ക​ലു​കൾ വഴി​വെ​ച്ചി​രി​ക്കു​ന്നു. അതിന്റെ ഫലമായി, നമ്മുടെ പല സഹോ​ദ​ര​ങ്ങൾക്കും അവരുടെ വീട്ടി​ലോ നാട്ടി​ലോ ആരെങ്കി​ലും മരിച്ച​പ്പോൾ ‘വിശ്വാ​സ​ത്തി​നു​വേണ്ടി കഠിന​മാ​യി പോരാ​ടേ​ണ്ടി​വ​ന്നി​ട്ടുണ്ട്‌.’—യൂദ 3.

² നിങ്ങൾക്ക്‌ അങ്ങനെ​യുള്ള പരി​ശോ​ധന നേരി​ട്ടാൽ, മരണ​ത്തെ​ക്കു​റിച്ച്‌ ബൈബിൾ പഠിപ്പി​ക്കുന്ന കാര്യ​ങ്ങൾക്കു​വേണ്ടി ഉറച്ച നിലപാ​ടു സ്വീക​രി​ക്കാൻ എന്തു സഹായി​ക്കും? (എഫെ. 6:11) ദൈവത്തെ അപ്രീ​തി​പ്പെ​ടു​ത്തുന്ന ആചാര​ങ്ങ​ളിൽ പങ്കെടു​ക്കാൻ സമ്മർദം നേരി​ടുന്ന ഒരു സഹക്രി​സ്‌ത്യാ​നി​യെ നിങ്ങൾക്ക്‌ എങ്ങനെ ആശ്വസി​പ്പി​ക്കു​ക​യും ബലപ്പെ​ടു​ത്തു​ക​യും ചെയ്യാം? ഈ ലേഖന​ത്തിൽ യഹോവ നൽകി​യി​രി​ക്കുന്ന മാർഗ​നിർദേ​ശങ്ങൾ നമ്മൾ ചർച്ച ചെയ്യും. ആദ്യമാ​യി, മരണ​ത്തെ​ക്കു​റിച്ച്‌ ബൈബിൾ എന്താണു പറയു​ന്ന​തെന്നു നോക്കാം.

മരിച്ച​വ​രു​ടെ അവസ്ഥ​യെ​ക്കു​റി​ച്ചുള്ള സത്യം

3. ആദ്യനു​ണ​യു​ടെ ഫലമായി എന്തു സംഭവി​ച്ചു?

³ മനുഷ്യർ മരിക്ക​ണ​മെന്നു ദൈവം ഉദ്ദേശി​ച്ചി​രു​ന്നില്ല. എന്നാൽ എന്നേക്കും ജീവി​ച്ചി​രി​ക്കാൻ ആദ്യമ​നു​ഷ്യ​രായ ആദാമും ഹവ്വയും യഹോ​വയെ അനുസ​രി​ക്ക​ണ​മാ​യി​രു​ന്നു. യഹോവ അവർക്കു ലളിത​മായ ഈ കല്‌പന നൽകി: “ശരി​തെ​റ്റു​ക​ളെ​ക്കു​റി​ച്ചുള്ള അറിവി​ന്റെ മരത്തിൽനിന്ന്‌ തിന്നരുത്‌, അതിൽനിന്ന്‌ തിന്നുന്ന ദിവസം നീ നിശ്ചയ​മാ​യും മരിക്കും.” (ഉൽപ. 2:16, 17) ഈ സമയത്താ​ണു സാത്താൻ രംഗ​പ്ര​വേശം ചെയ്യു​ന്നത്‌. ഒരു സർപ്പത്തെ ഉപയോ​ഗിച്ച്‌ സാത്താൻ ഹവ്വയോ​ടു പറഞ്ഞു: “നിങ്ങൾ മരിക്കില്ല, ഉറപ്പ്‌!” സങ്കടക​ര​മെന്നു പറയട്ടെ, ഹവ്വ ആ നുണ വിശ്വ​സി​ക്കു​ക​യും മരത്തിന്റെ പഴം തിന്നു​ക​യും ചെയ്‌തു. പിന്നീട്‌ അവളുടെ ഭർത്താ​വും പഴം തിന്നു. (ഉൽപ. 3:4, 6) അങ്ങനെ പാപവും മരണവും മനുഷ്യ​കു​ടും​ബ​ത്തിൽ പ്രവേ​ശി​ച്ചു.—റോമ. 5:12.

4-5. സാത്താൻ മനുഷ്യ​രെ ഇപ്പോ​ഴും വഞ്ചിച്ചു​കൊ​ണ്ടി​രി​ക്കു​ന്നത്‌ എങ്ങനെ?

⁴ ദൈവം പറഞ്ഞതു​ത​ന്നെ​യാ​ണു സംഭവി​ച്ചത്‌, ആദാമും ഹവ്വയും മരിച്ചു. എന്നാൽ സാത്താൻ മരണ​ത്തെ​ക്കു​റിച്ച്‌ നുണ പറയു​ന്നത്‌ അവസാ​നി​പ്പി​ച്ചില്ല. പിന്നീടു സാത്താൻ വേറെ​യും നുണകൾ മനയാ​നും മനുഷ്യർക്കി​ട​യിൽ പരത്താ​നും തുടങ്ങി. അതിൽ ഒരു നുണയാണ്‌, ഒരു വ്യക്തി​യു​ടെ ശരീരം മരിച്ചാ​ലും ആ വ്യക്തി​യു​ടെ ഉള്ളിലുള്ള എന്തോ ഒന്ന്‌ എവി​ടെ​യെ​ങ്കി​ലും, ഒരുപക്ഷേ ആത്മമണ്ഡ​ല​ത്തിൽ, തുടർന്നും ജീവി​ക്കും എന്ന പഠിപ്പി​ക്കൽ. ആ നുണ പലപല രൂപത്തി​ലും ഭാവത്തി​ലും എണ്ണമറ്റ മനുഷ്യ​രെ ഇന്നോളം വഞ്ചിച്ചി​രി​ക്കു​ന്നു.—1 തിമൊ. 4:1.

⁵ എന്തു​കൊ​ണ്ടാണ്‌ ഇത്ര​യേറെ മനുഷ്യർ ഈ നുണ വിശ്വ​സി​ക്കു​ന്നത്‌? മരണത്തെ മനുഷ്യർ എങ്ങനെ​യാ​ണു വീക്ഷി​ക്കു​ന്ന​തെന്നു സാത്താനു നന്നായി അറിയാം. നമ്മൾ മരണത്തെ ഒരു ശത്രു​വാ​യി​ട്ടാ​ണു കാണു​ന്നത്‌. (1 കൊരി. 15:26) എന്നേക്കും ജീവി​ക്കാൻ സൃഷ്ടി​ക്ക​പ്പെ​ട്ട​വ​രാ​യ​തു​കൊണ്ട്‌ നമ്മൾ മരിക്കാൻ ആഗ്രഹി​ക്കു​ന്നില്ല. (സഭാ. 3:11) മനുഷ്യ​രു​ടെ ഈ ആഗ്രഹം മുത​ലെ​ടു​ത്തു​കൊ​ണ്ടാ​ണു സാത്താൻ നുണകൾ മനഞ്ഞി​രി​ക്കു​ന്നത്‌.

6-7. (എ) മരിച്ച​വ​രെ​ക്കു​റി​ച്ചുള്ള സത്യം മറച്ചു​വെ​ക്കു​ന്ന​തിൽ സാത്താൻ വിജയി​ച്ചി​ട്ടു​ണ്ടോ? വിശദീ​ക​രി​ക്കുക. (ബി) ബൈബിൾസ​ത്യം അകാര​ണ​മായ ഭയത്തിൽനിന്ന്‌ നമ്മളെ മോചി​പ്പി​ക്കു​ന്നത്‌ എങ്ങനെ?

⁶ സാത്താൻ ഇത്ര​യെ​ല്ലാം ശ്രമി​ച്ചി​ട്ടും മരണ​ത്തെ​ക്കു​റി​ച്ചുള്ള സത്യം ഒളിച്ചു​വെ​ക്കാൻ അവനു കഴിഞ്ഞി​ട്ടില്ല. വാസ്‌ത​വ​ത്തിൽ ഇന്ന്‌, മരിച്ച​വ​രു​ടെ അവസ്ഥ​യെ​യും അവരുടെ പ്രത്യാ​ശ​യെ​യും കുറിച്ച്‌ ബൈബിൾ പറയുന്ന കാര്യങ്ങൾ മുമ്പെ​ന്ന​ത്തെ​ക്കാ​ളും കൂടുതൽ പേർക്ക്‌ അറിയാം. ഈ കാര്യങ്ങൾ അവർ ആളുക​ളോ​ടു പറയു​ന്നു​മുണ്ട്‌. (സഭാ. 9:5, 10; പ്രവൃ. 24:15) ഈ സത്യങ്ങൾ നമ്മളെ ആശ്വസി​പ്പി​ക്കു​ന്നു, അനാവ​ശ്യ​മായ ഭയത്തിൽനി​ന്നും ആശയക്കു​ഴ​പ്പ​ത്തിൽനി​ന്നും നമ്മളെ മോചി​പ്പി​ക്കു​ന്നു. ഉദാഹ​ര​ണ​ത്തിന്‌, നമ്മൾ മരിച്ച​വരെ ഭയപ്പെ​ടു​ന്നില്ല. മരിച്ചു​പോയ നമ്മുടെ പ്രിയ​പ്പെ​ട്ട​വർക്കു മോശ​മായ എന്തെങ്കി​ലും സംഭവി​ക്കു​മോ എന്ന ഉത്‌ക​ണ്‌ഠ​യു​മില്ല. അവർ ഇപ്പോൾ ജീവി​ച്ചി​രി​ക്കു​ന്നി​ല്ലെ​ന്നും അവർക്ക്‌ ആരെയും ഉപദ്ര​വി​ക്കാൻ കഴിയി​ല്ലെ​ന്നും നമുക്ക്‌ അറിയാം. അവർ ഒരു ഗാഢനി​ദ്ര​യി​ലാ​ണെന്നു പറയാം. (യോഹ. 11:11-14) അതു​പോ​ലെ, മരിച്ച​വർക്കു സമയം കടന്നു​പോ​കു​ന്ന​തി​നെ​ക്കു​റിച്ച്‌ ഒരു അറിവു​മില്ല എന്നും നമുക്ക്‌ അറിയാം. അതു​കൊണ്ട്‌, നൂറ്റാ​ണ്ടു​കൾക്കു മുമ്പ്‌ മരിച്ചു​പോയ ആളുകൾപോ​ലും പുനരു​ത്ഥാ​ന​പ്പെ​ട്ടു​വ​രു​മ്പോൾ ഒരു നിമിഷം കടന്നു​പോ​യ​തു​പോ​ലെ മാത്രമേ അവർക്കു തോന്നു​ക​യു​ള്ളൂ!

⁷ മരിച്ച​വ​രു​ടെ അവസ്ഥ​യെ​ക്കു​റി​ച്ചുള്ള സത്യം വ്യക്തവും ലളിത​വും യുക്തിക്കു നിരക്കു​ന്ന​തും ആണെന്നു നിങ്ങൾക്കു തോന്നു​ന്നി​ല്ലേ? ചിന്താ​ക്കു​ഴ​പ്പ​മു​ണ്ടാ​ക്കുന്ന സാത്താന്റെ നുണകൾക്കു നേർവി​പ​രീ​തം, അല്ലേ? ആളുകളെ വഴി​തെ​റ്റി​ക്കു​ന്ന​തി​നു പുറമേ, ആ നുണകൾ നമ്മുടെ സ്രഷ്ടാ​വി​നെ നിന്ദി​ക്കു​ക​യും ചെയ്യുന്നു. സാത്താൻ വരുത്തി​വെ​ച്ചി​രി​ക്കുന്ന കുഴപ്പ​ങ്ങ​ളു​ടെ ആഴം കുറെ​ക്കൂ​ടി നന്നായി മനസ്സി​ലാ​ക്കാൻ നമുക്കു പിൻവ​രുന്ന ചോദ്യ​ങ്ങൾ പരി​ശോ​ധി​ച്ചു​നോ​ക്കാം: സാത്താന്റെ നുണകൾ എങ്ങനെ​യാണ്‌ യഹോ​വയെ നിന്ദി​ച്ചി​രി​ക്കു​ന്നത്‌? ആ നുണകൾ, ക്രിസ്‌തു​വി​ന്റെ മോച​ന​വി​ല​യിൽ വിശ്വ​സി​ക്കേ​ണ്ട​തി​ല്ലെന്നു പലരും ചിന്തി​ക്കാൻ ഇടയാ​ക്കി​യി​രി​ക്കു​ന്നത്‌ എങ്ങനെ​യാണ്‌? മനുഷ്യ​കു​ടും​ബ​ത്തി​ന്റെ ദുഃഖ​വും വേദന​യും ആ നുണകൾ എങ്ങനെ​യാ​ണു വർധി​പ്പി​ച്ചി​രി​ക്കു​ന്നത്‌?

സാത്താന്റെ നുണകൾ വരുത്തി​വെ​ച്ചി​രി​ക്കുന്ന ദ്രോഹം

8. യിരെമ്യ 19:5-ൽ കാണു​ന്ന​തു​പോ​ലെ, എങ്ങനെ​യാ​ണു സാത്താന്റെ നുണകൾ യഹോ​വയെ നിന്ദി​ക്കു​ന്നത്‌?

⁸ മരിച്ച​വ​രെ​ക്കു​റി​ച്ചുള്ള സാത്താന്റെ നുണകൾ യഹോ​വയെ നിന്ദി​ക്കു​ന്നു. മരിച്ചവർ ഒരു തീനര​ക​ത്തിൽ കിടന്ന്‌ നരകി​ക്കു​ക​യാ​ണെന്ന വ്യാജ​പ​ഠി​പ്പി​ക്ക​ലും അതിൽ ഉൾപ്പെ​ടു​ന്നു. അത്തരം പഠിപ്പി​ക്ക​ലു​കൾ ദൈവത്തെ നിന്ദി​ക്കു​ന്നു. എങ്ങനെ? സ്‌നേ​ഹ​ത്തി​ന്റെ ദൈവ​മായ യഹോ​വ​യ്‌ക്കു സാത്താന്റെ സ്വഭാ​വ​മാ​ണെന്നു പറയു​ന്ന​തു​പോ​ലെ​യാണ്‌ ഇത്‌. (1 യോഹ. 4:8) അതെക്കു​റിച്ച്‌ നിങ്ങൾക്ക്‌ എന്താണു തോന്നു​ന്നത്‌? അതിൽ ഉപരി, യഹോ​വ​യ്‌ക്ക്‌ എന്തായി​രി​ക്കും തോന്നു​ന്നത്‌? എല്ലാ തരം ക്രൂര​ത​യും വെറു​ക്കു​ന്ന​വ​നാണ്‌ യഹോ​വ​യെന്ന്‌ ഓർക്കണം.—യിരെമ്യ 19:5 വായി​ക്കുക.

9. യോഹ​ന്നാൻ 3:16-ലും 15:13-ലും വർണി​ച്ചി​രി​ക്കുന്ന ക്രിസ്‌തു​വി​ന്റെ മോച​ന​വി​ല​യി​ലുള്ള വിശ്വാ​സ​ത്തിന്‌, സാത്താന്റെ നുണകൾ തുരങ്കം​വെ​ക്കു​ന്നത്‌ എങ്ങനെ?

⁹ മരണ​ത്തെ​ക്കു​റി​ച്ചുള്ള സാത്താന്റെ നുണകൾ ക്രിസ്‌തു​വി​ന്റെ മോച​ന​വി​ല​യി​ലുള്ള വിശ്വാ​സ​ത്തി​നു തുരങ്കം​വെ​ക്കു​ന്നു. (മത്താ. 20:28) മനുഷ്യർക്ക്‌ അമർത്യ​മായ ഒരു ആത്മാവു​ണ്ടെ​ന്ന​താ​ണു സാത്താന്റെ മറ്റൊരു നുണ. അതു സത്യമാ​ണെ​ങ്കിൽ എല്ലാവ​രും എന്നേക്കും ജീവി​ക്കും. അങ്ങനെ​യാ​യാൽ നമുക്കു നിത്യ​ജീ​വൻ നേടി​ത്ത​രു​ന്ന​തി​നു ക്രിസ്‌തു തന്റെ ജീവൻ മോച​ന​വി​ല​യാ​യി കൊടു​ക്കേണ്ട ആവശ്യ​മി​ല്ലാ​യി​രു​ന്നു എന്നു വരും. ഓർക്കുക: മനുഷ്യ​കു​ടും​ബ​ത്തോ​ടു കാണി​ച്ചി​രി​ക്കുന്ന സ്‌നേ​ഹ​ത്തി​ന്റെ ഏറ്റവും വലിയ പ്രകട​ന​മാ​ണു ക്രിസ്‌തു​വി​ന്റെ ബലി. (യോഹ​ന്നാൻ 3:16; 15:13 വായി​ക്കുക.) വില മതിക്കാ​നാ​കാത്ത ആ സമ്മാന​ത്തി​ന്റെ വില ഇടിച്ചു​ക​ള​യുന്ന ഇത്തരം പഠിപ്പി​ക്ക​ലു​ക​ളെ​ക്കു​റിച്ച്‌ യഹോ​വ​യ്‌ക്കും യഹോ​വ​യു​ടെ പുത്ര​നും എന്തായി​രി​ക്കും തോന്നുക!

10. മരണ​ത്തെ​ക്കു​റി​ച്ചുള്ള നുണകൾ എങ്ങനെ​യാ​ണു മനുഷ്യ​രു​ടെ ദുഃഖ​ത്തി​ന്റെ​യും വേദന​യു​ടെ​യും ആഴം കൂട്ടി​യി​രി​ക്കു​ന്നത്‌?

¹⁰ സാത്താന്റെ നുണകൾ മനുഷ്യ​വർഗ​ത്തി​ന്റെ വേദന​യും ദുഃഖ​വും കൂട്ടി​യി​രി​ക്കു​ന്നു. കുഞ്ഞിന്റെ മരണ​ത്തെ​ക്കു​റിച്ച്‌ വിഷമി​ച്ചി​രി​ക്കുന്ന മാതാ​പി​താ​ക്ക​ളോട്‌, ദൈവ​മാണ്‌ അവരുടെ കുഞ്ഞിനെ എടുത്ത​തെന്നു ചിലർ പറയാ​റുണ്ട്‌. അവരുടെ കുട്ടി സ്വർഗ​ത്തിൽ ഇപ്പോൾ ഒരു മാലാ​ഖ​യാ​ണെ​ന്നും അതിനു​വേ​ണ്ടി​യാ​ണു ദൈവം കുട്ടിയെ കൊണ്ടു​പോ​യ​തെ​ന്നും അവർ പറഞ്ഞേ​ക്കാം. നിങ്ങൾക്ക്‌ എന്തു തോന്നു​ന്നു? സാത്താന്റെ ഈ നുണ കേൾക്കു​മ്പോൾ അവരുടെ ദുഃഖം കുറയു​മോ, കൂടു​മോ? ആളുകളെ ക്രൂര​മാ​യി ഉപദ്ര​വി​ക്കു​ന്ന​തി​നുള്ള ഒരു ന്യായീ​ക​ര​ണ​മാ​യി തീനര​ക​ത്തെ​ക്കു​റി​ച്ചുള്ള വ്യാജ​പ​ഠി​പ്പി​ക്കൽ ഉപയോ​ഗി​ച്ചി​രി​ക്കു​ന്നു, സഭാപ​ഠി​പ്പി​ക്ക​ലു​കളെ ചോദ്യം ചെയ്‌ത​വരെ സ്‌തം​ഭ​ത്തിൽ കെട്ടി ചുട്ടു​കൊ​ല്ലു​ന്ന​തും അത്തരം ഉപദ്ര​വ​ങ്ങ​ളിൽ ഉൾപ്പെ​ട്ടി​രു​ന്നു. സ്‌പാ​നീഷ്‌ മത​ദ്രോഹ വിചാ​ര​ണ​യെ​ക്കു​റി​ച്ചുള്ള ഒരു പുസ്‌തകം പറയു​ന്ന​ത​നു​സ​രിച്ച്‌, “നരകത്തിൽ എന്നേക്കും അനുഭ​വി​ക്കാൻപോ​കുന്ന യാതന​യു​ടെ ഒരു ചിത്രം (മതനി​ന്ദ​കർക്ക്‌) കൊടു​ക്കുക” മാത്ര​മാ​ണു തങ്ങൾ ചെയ്യു​ന്ന​തെന്ന്‌ ഈ ക്രൂരത ചെയ്‌തു​കൂ​ട്ടി​യവർ കരുതി​യി​രി​ക്കാം. അങ്ങനെ ചെയ്‌താൽ മതനി​ന്ദകർ മരിക്കു​ന്ന​തി​നു മുമ്പ്‌ പശ്ചാത്ത​പി​ക്കാ​നും നരകത്തി​ലെ ശിക്ഷയിൽനിന്ന്‌ രക്ഷപ്പെ​ടാ​നും സാധ്യ​ത​യു​ണ്ടെ​ന്നാ​യി​രു​ന്നു അവരുടെ അഭി​പ്രാ​യം. ഇനി, പല നാടു​ക​ളി​ലും മരിച്ച പൂർവി​കരെ ആരാധി​ക്കു​ന്ന​തും അവരെ ആദരി​ക്കു​ന്ന​തും അവരുടെ അനു​ഗ്രഹം തേടു​ന്ന​തും തങ്ങളുടെ കർത്തവ്യ​മാ​യി ആളുകൾ കാണുന്നു. തങ്ങൾക്കു ശിക്ഷ​യൊ​ന്നും വരാതി​രി​ക്കാൻ ചിലർ പൂർവി​കരെ പ്രീതി​പ്പെ​ടു​ത്താൻ ആഗ്രഹി​ക്കു​ന്നു. സങ്കടക​ര​മെന്നു പറയട്ടെ, സാത്താന്റെ ഇത്തരം നുണകൾ ശരിക്കുള്ള ആശ്വാസം തരുന്നില്ല. മറിച്ച്‌ അനാവ​ശ്യ​മായ ഉത്‌ക​ണ്‌ഠ​ക​ളാ​ണു സമ്മാനി​ക്കു​ന്നത്‌, ആളുകളെ ഭയത്തി​ലാ​ഴ്‌ത്തു​ക​പോ​ലും ചെയ്യുന്നു.

ബൈബിൾസ​ത്യ​ത്തി​നു ചേർച്ച​യിൽ ജീവി​ക്കു​ക

11. ദൈവ​വ​ച​ന​ത്തി​നു വിരു​ദ്ധ​മാ​യി പ്രവർത്തി​ക്കാൻ നല്ല ഉദ്ദേശ്യ​ത്തോ​ടെ ബന്ധുക്ക​ളോ സുഹൃ​ത്തു​ക്ക​ളോ നമ്മളെ എങ്ങനെ നിർബ​ന്ധി​ച്ചേ​ക്കാം?

¹¹ തിരു​വെ​ഴു​ത്തു​വി​രു​ദ്ധ​മായ ആചാര​ങ്ങ​ളിൽ ഏർപ്പെ​ടാൻ നല്ല ഉദ്ദേശ്യ​ത്തോ​ടെ ബന്ധുക്ക​ളും സുഹൃ​ത്തു​ക്ക​ളും നമ്മളെ നിർബ​ന്ധി​ക്കു​മ്പോൾ ദൈവ​ത്തോ​ടും ദൈവ​വ​ച​ന​ത്തോ​ടും ഉള്ള സ്‌നേഹം യഹോ​വയെ അനുസ​രി​ക്കാ​നുള്ള ശക്തി നമുക്കു തരും. അവർ ചില​പ്പോൾ നമ്മളെ നാണം​കെ​ടു​ത്തി​യേ​ക്കാം. മരിച്ച​വ​രോ​ടു സ്‌നേ​ഹ​മി​ല്ലെ​ന്നോ അവരോ​ടു ബഹുമാ​ന​മി​ല്ലെ​ന്നോ പറഞ്ഞേ​ക്കാം. നമ്മുടെ പ്രവൃ​ത്തി​കൾ കാരണം മരിച്ച വ്യക്തി ജീവി​ച്ചി​രി​ക്കു​ന്ന​വരെ ഏതെങ്കി​ലും തരത്തിൽ ദ്രോ​ഹി​ക്കു​മെ​ന്നും അവർ പറഞ്ഞേ​ക്കാം. അത്തരം സാഹച​ര്യ​ങ്ങ​ളിൽ, നമുക്ക്‌ എങ്ങനെ ബൈബിൾസ​ത്യ​ത്തി​നു​വേണ്ടി നില​കൊ​ള്ളാം? പിൻവ​രുന്ന ബൈബിൾത​ത്ത്വ​ങ്ങൾ നിങ്ങൾക്ക്‌ എങ്ങനെ ബാധക​മാ​ക്കാ​മെന്നു ചിന്തി​ക്കുക.

12. മരിച്ച​വ​രു​മാ​യി ബന്ധപ്പെട്ട ഏതെല്ലാം ആചാരങ്ങൾ വ്യക്തമാ​യും തിരു​വെ​ഴു​ത്തു​വി​രു​ദ്ധ​മാണ്‌?

¹² തിരു​വെ​ഴു​ത്തു​വി​രു​ദ്ധ​മായ വിശ്വാ​സ​ങ്ങ​ളിൽനി​ന്നും ആചാര​ങ്ങ​ളിൽനി​ന്നും ‘അകന്നു​നിൽക്കാൻ’ ഉറച്ച തീരു​മാ​ന​മെ​ടു​ക്കുക. (2 കൊരി. 6:17) ഒരു കരീബി​യൻ രാജ്യത്ത്‌, ഒരു വ്യക്തി മരിച്ചു​ക​ഴി​ഞ്ഞാൽ അയാളു​ടെ ‘പ്രേതം’ അവി​ടെ​യൊ​ക്കെ കറങ്ങി​ന​ട​ക്കു​മെ​ന്നും ജീവി​ച്ചി​രു​ന്ന​പ്പോൾ അയാ​ളോ​ടു മോശ​മാ​യി പെരു​മാ​റി​യ​വരെ ഉപദ്ര​വി​ക്കു​മെ​ന്നും ചിലർ വിശ്വ​സി​ക്കു​ന്നു. ഒരു പുസ്‌തകം പറയു​ന്നത്‌, ‘പ്രേതം’ “സമൂഹ​ത്തി​നു മുഴുവൻ നാശം വിത​ച്ചേ​ക്കാം” എന്നു വിശ്വ​സി​ക്കു​ന്ന​വ​രു​മുണ്ട്‌ എന്നാണ്‌. മരിച്ച​വ​രു​ടെ വീടു​ക​ളി​ലെ കണ്ണാടി​കൾ മൂടു​ക​യും അവരുടെ ചിത്രങ്ങൾ ഭിത്തിക്കു മുഖം തിരി​ച്ചു​വെ​ക്കു​ക​യും ചെയ്യുന്ന ഒരു രീതി ആഫ്രി​ക്ക​യി​ലുണ്ട്‌. എന്താണു കാരണം? അങ്ങനെ ചെയ്‌തി​ല്ലെ​ങ്കിൽ മരിച്ചവർ തങ്ങളെ​ത്തന്നെ കാണും എന്നാണ്‌ അവർ ചിന്തി​ക്കു​ന്നത്‌! യഹോ​വ​യു​ടെ ദാസരായ നമ്മൾ, സാത്താന്റെ നുണകൾ ഏറ്റുപാ​ടുന്ന കെട്ടു​ക​ഥകൾ വിശ്വ​സി​ക്കു​ക​യോ ആചാര​ങ്ങ​ളിൽ ഉൾപ്പെ​ടു​ക​യോ ചെയ്യില്ല.—1 കൊരി. 10:21, 22.

13. ഒരു പ്രത്യേക ആചാര​ത്തെ​ക്കു​റിച്ച്‌ നിങ്ങൾക്കു സംശയ​മു​ണ്ടെ​ങ്കിൽ, യാക്കോബ്‌ 1:5 പറയു​ന്ന​തു​പോ​ലെ നിങ്ങൾ എന്തു ചെയ്യണം?

¹³ ഒരു ആചാര​ത്തെ​യോ സമ്പ്രദാ​യ​ത്തെ​യോ കുറിച്ച്‌ സംശയ​മു​ണ്ടെ​ങ്കിൽ ദൈവി​ക​ജ്ഞാ​നം തരാനാ​യി യഹോ​വ​യോ​ടു പ്രാർഥി​ക്കുക. (യാക്കോബ്‌ 1:5 വായി​ക്കുക.) അതിനു ശേഷം, നമ്മുടെ പ്രസി​ദ്ധീ​ക​ര​ണങ്ങൾ ഉപയോ​ഗിച്ച്‌ ഗവേഷണം ചെയ്യുക. ആവശ്യ​മെ​ങ്കിൽ സഭയിലെ മൂപ്പന്മാ​രു​മാ​യി സംസാ​രി​ക്കുക. നിങ്ങൾ എന്തു ചെയ്യണ​മെന്ന്‌ അവർ പറഞ്ഞു​ത​രില്ല. എന്നാൽ നിങ്ങളു​ടെ സാഹച​ര്യ​വു​മാ​യി ബന്ധപ്പെട്ട ബൈബിൾത​ത്ത്വ​ങ്ങൾ അവർ ചൂണ്ടി​ക്കാ​ണി​ക്കും. ഇങ്ങനെ​യെ​ല്ലാം ചെയ്യു​മ്പോൾ നിങ്ങൾ ‘വിവേ​ച​നാ​പ്രാ​പ്‌തി​യെ’ പരിശീ​ലി​പ്പി​ക്കു​ക​യാണ്‌. ‘ശരിയും തെറ്റും വേർതി​രി​ച്ച​റി​യാൻ’ ഈ പ്രാപ്‌തി നിങ്ങളെ സഹായി​ക്കും.—എബ്രാ. 5:14.

14. നമ്മൾ കാരണം ആരും ഇടറി​വീ​ഴാൻ ഇടയാ​കാ​തി​രി​ക്കാൻ എന്തെല്ലാം ഒഴിവാ​ക്കണം?

¹⁴ “എന്തു ചെയ്‌താ​ലും എല്ലാം ദൈവ​ത്തി​ന്റെ മഹത്ത്വ​ത്തി​നു​വേണ്ടി ചെയ്യുക. നിങ്ങൾ കാരണം (ആരും) ഇടറി​വീ​ഴാൻ ഇടയാ​ക​രുത്‌.” (1 കൊരി. 10:31, 32) ഒരു ആചാര​ത്തിൽ പങ്കെടു​ക്ക​ണോ വേണ്ടയോ എന്നു തീരു​മാ​നി​ക്കു​മ്പോൾ, നമ്മുടെ തീരു​മാ​നം മറ്റുള്ള​വരെ, പ്രത്യേ​കി​ച്ചും നമ്മുടെ സഹക്രി​സ്‌ത്യാ​നി​കളെ എങ്ങനെ സ്വാധീ​നി​ക്കു​മെ​ന്നും ചിന്തി​ക്കുക. നമ്മുടെ പ്രവൃത്തി കാരണം ആരും വിശ്വാ​സ​ത്തിൽനിന്ന്‌ വീണു​പോ​കാൻ നമ്മൾ ആഗ്രഹി​ക്കില്ല. (മർക്കോ. 9:42) കൂടാതെ, സാക്ഷി​ക​ള​ല്ലാത്ത ആളുകളെ ആവശ്യ​മി​ല്ലാ​തെ മുഷി​പ്പി​ക്കു​ന്നത്‌ നമ്മൾ ഒഴിവാ​ക്കും. ആദര​വോ​ടെ അവരോ​ടു സംസാ​രി​ക്കാൻ സ്‌നേഹം നമ്മളെ പ്രേരി​പ്പി​ക്കും. അങ്ങനെ ചെയ്യു​ന്നത്‌ യഹോ​വയെ മഹത്ത്വ​പ്പെ​ടു​ത്തും. നമ്മൾ ആളുക​ളു​മാ​യി തർക്കി​ക്കു​ക​യോ അവരുടെ സമ്പ്രദാ​യ​ങ്ങളെ പുച്ഛി​ക്കു​ക​യോ ചെയ്യില്ല. ഓർക്കുക, സ്‌നേ​ഹ​ത്തി​നു ശക്തിയുണ്ട്‌! ആദര​വോ​ടെ​യും പരിഗ​ണ​ന​യോ​ടെ​യും ഇടപെ​ട്ടു​കൊണ്ട്‌ സ്‌നേഹം കാണി​ക്കു​മ്പോൾ നമ്മൾ എതിരാ​ളി​ക​ളു​ടെ ഹൃദയത്തെ മയപ്പെ​ടു​ത്തു​ക​പോ​ലും ചെയ്‌തേ​ക്കാം.

15-16. (എ) നിങ്ങളു​ടെ വിശ്വാ​സം മറ്റുള്ള​വരെ അറിയി​ക്കു​ന്നതു ജ്ഞാനമാ​യി​രി​ക്കു​ന്നത്‌ എന്തു​കൊണ്ട്‌? ഒരു ഉദാഹ​രണം പറയുക. (ബി) റോമർ 1:16-ലെ പൗലോ​സി​ന്റെ വാക്കുകൾ നമുക്ക്‌ എങ്ങനെ​യാ​ണു ബാധക​മാ​കു​ന്നത്‌?

¹⁵ നിങ്ങൾ ഒരു യഹോ​വ​യു​ടെ സാക്ഷി​യാ​ണെന്ന്‌ എല്ലാവ​രെ​യും അറിയി​ക്കുക. (യശ. 43:10) നിങ്ങളു​ടെ കുടും​ബ​ത്തി​ലെ ആരെങ്കി​ലും മരിച്ചാൽ, മരണാ​ന​ന്ത​ര​ച​ട​ങ്ങു​ക​ളിൽ നിങ്ങൾ ഉൾപ്പെ​ടാ​തി​രി​ക്കു​ന്നതു ബന്ധുക്ക​ളെ​യും അയൽക്കാ​രെ​യും അസ്വസ്ഥ​രാ​ക്കി​യേ​ക്കാം. എന്നാൽ നിങ്ങളു​ടെ വിശ്വാ​സങ്ങൾ മുന്ന​മേ​തന്നെ അവരെ അറിയി​ക്കു​ന്നെ​ങ്കിൽ അത്തരം സാഹച​ര്യ​ങ്ങൾ കൈകാ​ര്യം ചെയ്യാൻ എളുപ്പ​മാണ്‌. മൊസാ​മ്പി​ക്കിൽ താമസി​ക്കുന്ന ഫ്രാൻസി​സ്‌കോ സഹോ​ദരൻ പറയുന്നു: “ഞാനും ഭാര്യ കരോ​ലീ​ന​യും സത്യം പഠിച്ച​പ്പോൾ ഞങ്ങൾ ഇനി മരിച്ച​വരെ ആരാധി​ക്കി​ല്ലെന്നു ഞങ്ങളുടെ കുടും​ബ​ത്തോ​ടു പറഞ്ഞു. കരോ​ലീ​ന​യു​ടെ ചേച്ചി മരിച്ച​പ്പോൾ ഒരു പ്രശ്‌ന​മു​ണ്ടാ​യി. മൃതശ​രീ​രം ആചാര​പ​ര​മാ​യി കുളി​പ്പി​ക്കു​ന്നത്‌ അവിടത്തെ ഒരു ചടങ്ങാ​യി​രു​ന്നു. കുളി​പ്പിച്ച വെള്ളം ഒഴിച്ചു​കളഞ്ഞ സ്ഥലത്ത്‌ മരിച്ച​യാ​ളു​ടെ ഏറ്റവും അടുത്ത ബന്ധു മൂന്നു രാത്രി ഉറങ്ങണ​മാ​യി​രു​ന്നു. മരിച്ച​വ​രു​ടെ ആത്മാക്കളെ പ്രീതി​പ്പെ​ടു​ത്തുക എന്ന ഉദ്ദേശ്യ​ത്തി​ലാ​യി​രു​ന്നു ഈ ചടങ്ങുകൾ. വെള്ളം ഒഴിച്ചു​കളഞ്ഞ സ്ഥലത്ത്‌ കരോ​ലീന കിടന്നു​റ​ങ്ങാൻ കുടും​ബാം​ഗങ്ങൾ പ്രതീ​ക്ഷി​ച്ചു.”

¹⁶ ഫ്രാൻസി​സ്‌കോ സഹോ​ദ​ര​നും ഭാര്യ​യും എന്തു ചെയ്‌തു? സഹോ​ദരൻ പറയുന്നു: “യഹോ​വയെ സ്‌നേ​ഹി​ക്കു​ക​യും യഹോ​വയെ പ്രീതി​പ്പെ​ടു​ത്താൻ ആഗ്രഹി​ക്കു​ക​യും ചെയ്‌ത​തു​കൊണ്ട്‌ ആ ആചാര​ത്തിൽ പങ്കെടു​ക്കാൻ ഞങ്ങൾ വിസമ്മ​തി​ച്ചു. കരോ​ലീ​ന​യു​ടെ വീട്ടു​കാർ ഞങ്ങളോ​ടു ശരിക്കും കോപി​ച്ചു. മരിച്ച​വ​രോ​ടുള്ള അനാദ​ര​വാണ്‌ ഇതെന്നും കുടും​ബാം​ഗ​ങ്ങ​ളാ​രും ഇനി ഒരിക്ക​ലും ഞങ്ങളെ കാണാൻ വരുക​യോ സഹായി​ക്കു​ക​യോ ചെയ്യി​ല്ലെ​ന്നും പറഞ്ഞു. ഞങ്ങൾ നേര​ത്തേ​തന്നെ ഞങ്ങളുടെ വിശ്വാ​സ​ങ്ങ​ളെ​ക്കു​റിച്ച്‌ അവരോ​ടു പറഞ്ഞി​രു​ന്ന​തു​കൊണ്ട്‌ അവർ ദേഷ്യ​പ്പെ​ട്ടി​രുന്ന സമയത്ത്‌ അതെക്കു​റി​ച്ചൊ​ന്നും ഞങ്ങൾ സംസാ​രി​ച്ചില്ല. നേര​ത്തേ​തന്നെ ഞങ്ങളുടെ നിലപാ​ടു വ്യക്തമാ​ക്കി​യി​രു​ന്ന​താ​ണ​ല്ലോ എന്ന്‌ ചില ബന്ധുക്കൾ ഞങ്ങൾക്കു​വേണ്ടി പറയു​ക​പോ​ലും ചെയ്‌തു. പതു​ക്കെ​പ്പ​തു​ക്കെ, കരോ​ലീ​ന​യു​ടെ ബന്ധുക്കൾ തണുത്തു. അവരു​മാ​യി സമാധാ​ന​ത്തി​ലാ​കാൻ ഞങ്ങൾക്കു കഴിഞ്ഞു. ചിലർ ഞങ്ങളുടെ വീട്ടിൽ വന്ന്‌ ബൈബിൾപ്ര​സി​ദ്ധീ​ക​ര​ണങ്ങൾ ചോദി​ക്കു​ക​പോ​ലും ചെയ്‌തു.” മരിച്ച​വ​രെ​ക്കു​റി​ച്ചുള്ള സത്യം മനസ്സി​ലാ​ക്കിയ നമ്മൾ അതിനു ചേർച്ചയിൽ പ്രവർത്തിക്കുന്നതിൽ ലജ്ജി​ക്കേ​ണ്ട​തില്ല.—റോമർ 1:16 വായി​ക്കുക.

ദുഃഖി​ക്കു​ന്ന​വരെ ആശ്വസി​പ്പി​ക്കു​ക​യും പിന്തു​ണ​യ്‌ക്കു​ക​യും ചെയ്യുക

17. ഒരു സഹക്രി​സ്‌ത്യാ​നി​യു​ടെ പ്രിയ​പ്പെട്ട ഒരാൾ മരിച്ചു​പോ​കു​മ്പോൾ അദ്ദേഹ​ത്തി​ന്റെ ഒരു യഥാർഥ​സ്‌നേ​ഹി​ത​നാ​കാൻ നമ്മളെ എന്തു സഹായി​ക്കും?

¹⁷ ഒരു ക്രിസ്‌ത്യാ​നി​യു​ടെ പ്രിയ​പ്പെട്ട ആരെങ്കി​ലും മരിക്കു​മ്പോൾ ഒരു ‘യഥാർഥ​സ്‌നേ​ഹി​ത​നാ​കാൻ,’ ‘കഷ്ടതക​ളു​ടെ സമയത്ത്‌ കൂടപ്പി​റ​പ്പാ​കാൻ,’ നമ്മൾ നല്ല ശ്രമം ചെയ്യണം. (സുഭാ. 17:17) അവർക്കു തിരു​വെ​ഴു​ത്തു​വി​രു​ദ്ധ​മായ ആചാര​ങ്ങ​ളിൽ ഏർപ്പെ​ടാൻ സമ്മർദ​മു​ണ്ടാ​കു​ന്നെ​ങ്കിൽ നമ്മൾ ഇക്കാര്യം പ്രത്യേ​കം ശ്രദ്ധി​ക്കണം. മരണദുഃ​ഖ​ത്തിൽ കഴിയു​ന്ന​വരെ ആശ്വസി​പ്പി​ക്കാൻ നമ്മളെ സഹായി​ക്കുന്ന രണ്ടു ബൈബിൾത​ത്ത്വ​ങ്ങൾ നോക്കാം.

18. യേശു കരഞ്ഞത്‌ എന്തു​കൊണ്ട്‌, യേശു​വി​ന്റെ മാതൃ​ക​യിൽനിന്ന്‌ എന്തു പഠിക്കാം?

¹⁸ “കരയു​ന്ന​വ​രു​ടെ​കൂ​ടെ കരയുക.” (റോമ. 12:15) ദുഃഖ​ത്തി​ലാ​ണ്ടു​പോ​യ​വ​രോട്‌ എന്തു പറയണ​മെന്നു നമുക്ക്‌ അറിയി​ല്ലാ​യി​രി​ക്കും. ചില​പ്പോൾ നമ്മുടെ കണ്ണുനീർ നമ്മുടെ വാക്കു​ക​ളെ​ക്കാൾ നന്നായി സംസാ​രി​ക്കും. യേശു​വി​ന്റെ സ്‌നേ​ഹി​ത​നായ ലാസർ മരിച്ച​പ്പോൾ എന്തു സംഭവി​ച്ചെന്നു നോക്കാം. മറിയ​യും മാർത്ത​യും മറ്റുള്ള​വ​രും പ്രിയ​പ്പെട്ട ലാസറി​ന്റെ മരണത്തിൽ വല്ലാതെ ദുഃഖിച്ച്‌ കരഞ്ഞു. നാലു ദിവസം കഴിഞ്ഞ്‌ യേശു വന്നു. താൻ ലാസറി​നെ ഉയിർപ്പി​ക്കാൻപോ​കു​ക​യാ​ണെന്ന്‌ അറിയാ​മാ​യി​രു​ന്നി​ട്ടും “യേശു​വി​ന്റെ കണ്ണു നിറ​ഞ്ഞൊ​ഴു​കി.” (യോഹ. 11:17, 33-35) യേശു​വി​ന്റെ കണ്ണുനീർ യഹോ​വ​യു​ടെ വികാ​ര​ങ്ങ​ളെ​യാ​ണു പ്രതി​ഫ​ലി​പ്പി​ച്ചത്‌. യേശു കരയു​ന്നതു മറിയ​യും മാർത്ത​യും കണ്ടപ്പോൾ യേശു​വി​നു തങ്ങളോ​ടുള്ള സ്‌നേഹം അവർക്കു ശരിക്കും മനസ്സി​ലാ​യി, അത്‌ അവരെ ആശ്വസി​പ്പി​ച്ചു. സമാന​മാ​യി, സഹോ​ദ​ര​ങ്ങ​ളോ​ടു നമുക്കു സ്‌നേ​ഹ​വും താത്‌പ​ര്യ​വും ഉണ്ടെന്നു കാണു​മ്പോൾ തങ്ങൾ ഒറ്റയ്‌ക്കല്ല എന്ന്‌ അവർക്കു ബോധ്യ​മാ​കും, തങ്ങളെ​ക്കു​റിച്ച്‌ ചിന്തയുള്ള, കൂടെ നിൽക്കുന്ന സുഹൃ​ത്തു​ക്ക​ളു​ണ്ടെന്ന്‌ അവർ മനസ്സി​ലാ​ക്കും.

19. വേർപാ​ടി​ന്റെ വേദന​യിൽ കഴിയുന്ന ഒരു സഹോ​ദ​രനെ ആശ്വസി​പ്പി​ക്കു​മ്പോൾ സഭാ​പ്ര​സം​ഗകൻ 3:7 എങ്ങനെ ബാധക​മാ​ക്കാം?

¹⁹ “മൗനമാ​യി​രി​ക്കാൻ ഒരു സമയം, സംസാ​രി​ക്കാൻ ഒരു സമയം.” (സഭാ. 3:7) വേർപാ​ടി​ന്റെ വേദന​യിൽ കഴിയുന്ന ഒരു ക്രിസ്‌ത്യാ​നി​യെ ആശ്വസി​പ്പി​ക്കാ​നുള്ള മറ്റൊരു വിധം നല്ല ഒരു ശ്രോ​താ​വാ​യി​രി​ക്കുക എന്നതാണ്‌. ഉള്ളിലു​ള്ള​തെ​ല്ലാം തുറന്നു​പ​റ​യാൻ സഹോ​ദ​രനെ അനുവ​ദി​ക്കുക. അദ്ദേഹം “മയമി​ല്ലാ​തെ, നിയ​ന്ത്ര​ണം​വിട്ട്‌” സംസാ​രി​ച്ചാൽ നമ്മൾ മുഷി​യ​രുത്‌. (ഇയ്യോ. 6:2, 3, അടിക്കു​റിപ്പ്‌) സാക്ഷി​ക​ള​ല്ലാത്ത ബന്ധുക്ക​ളിൽനി​ന്നുള്ള സമ്മർദം കാരണം അദ്ദേഹം മാനസി​ക​മാ​യി ആകെ തകർന്നി​രി​ക്കു​ക​യാ​യി​രി​ക്കും. അതു​കൊണ്ട്‌ അദ്ദേഹ​ത്തോ​ടൊ​പ്പം പ്രാർഥി​ക്കുക. അദ്ദേഹ​ത്തി​നു ശക്തിയും ശരിയാ​യി ചിന്തി​ക്കാ​നുള്ള പ്രാപ്‌തി​യും കൊടു​ക്കാ​നാ​യി ‘പ്രാർഥന കേൾക്കു​ന്ന​വ​നോ​ടു’ യാചി​ക്കുക. (സങ്കീ. 65:2) സാഹച​ര്യ​ങ്ങൾ അനുവ​ദി​ക്കു​ന്നെ​ങ്കിൽ ഒരുമിച്ച്‌ ബൈബിൾ വായി​ക്കുക. അല്ലെങ്കിൽ, നമ്മുടെ പ്രസി​ദ്ധീ​ക​ര​ണ​ങ്ങ​ളിൽനിന്ന്‌ പ്രോ​ത്സാ​ഹനം പകരുന്ന ഒരു ജീവി​ത​ക​ഥ​പോ​ലെ അനു​യോ​ജ്യ​മായ ഒരു ലേഖനം വായി​ക്കുക.

20. അടുത്ത ലേഖന​ത്തിൽ നമ്മൾ എന്തു ചർച്ച ചെയ്യും?

²⁰ മരിച്ച​വ​രെ​ക്കു​റി​ച്ചുള്ള സത്യവും സ്‌മാ​ര​ക​ക്ക​ല്ല​റ​ക​ളി​ലു​ള്ള​വരെ കാത്തി​രി​ക്കുന്ന മഹത്തായ ഭാവി​പ്ര​ത്യാ​ശ​യും അറിയാൻ കഴിഞ്ഞ​തിൽ നമ്മൾ നന്ദിയു​ള്ള​വ​രല്ലേ! (യോഹ. 5:28, 29) അതു​കൊണ്ട്‌ വാക്കി​ലൂ​ടെ​യും പ്രവൃ​ത്തി​യി​ലൂ​ടെ​യും നമുക്കു ബൈബിൾസ​ത്യ​ത്തി​നു​വേണ്ടി ധൈര്യ​ത്തോ​ടെ നില​കൊ​ള്ളാം. സാധി​ക്കുന്ന എല്ലാ അവസര​ങ്ങ​ളി​ലും അതെക്കു​റിച്ച്‌ മറ്റുള്ള​വ​രോ​ടു പറയാം. ആളുകളെ ആത്മീയ​മായ അന്ധകാ​ര​ത്തിൽ അടച്ചി​ടാൻ സാത്താൻ ഉപയോ​ഗി​ക്കുന്ന മറ്റൊരു കാര്യ​ത്തെ​ക്കു​റി​ച്ചാണ്‌ അടുത്ത ലേഖനം. അത്‌ എന്താണ്‌? ഭൂതവി​ദ്യ. സാത്താന്റെ ഈ കെണി​യു​മാ​യി ബന്ധപ്പെട്ട ആചാര​ങ്ങ​ളും വിനോ​ദ​പ​രി​പാ​ടി​ക​ളും നമ്മൾ എന്തു​കൊ​ണ്ടാണ്‌ ഒഴിവാ​ക്കേ​ണ്ട​തെന്ന്‌ അടുത്ത ലേഖനം ചർച്ച ചെയ്യും.