എല്ലാവ​രും മാനസാ​ന്ത​ര​പ്പെ​ടാൻ യഹോവ ആഗ്രഹി​ക്കു​ന്നു

1. മാനസാ​ന്ത​ര​പ്പെ​ടു​ന്ന​തിൽ എന്താണ്‌ ഉൾപ്പെ​ടു​ന്നത്‌?

നമ്മൾ ഒരു തെറ്റു ചെയ്‌താൽ മാനസാ​ന്ത​ര​പ്പെ​ടേ​ണ്ടത്‌ അഥവാ പശ്ചാത്ത​പി​ക്കേ​ണ്ടതു പ്രധാ​ന​മാണ്‌. തെറ്റു ചെയ്‌ത ഒരു വ്യക്തി തെറ്റി​നെ​ക്കു​റി​ച്ചുള്ള തന്റെ മനോ​ഭാ​വ​ത്തി​നു മാറ്റം വരുത്തു​ന്ന​തും ആ തെറ്റ്‌ ആവർത്തി​ക്കാ​തി​രി​ക്കു​ന്ന​തും ഇനി ഒരിക്ക​ലും അങ്ങനെ ഒരു തെറ്റു ചെയ്യി​ല്ലെന്ന്‌ ഉറച്ച തീരു​മാ​ന​മെ​ടു​ക്കു​ന്ന​തും ആണ്‌ അതിൽ ഉൾപ്പെ​ടു​ന്നത്‌.—ബൈബിൾ പദാവ​ലി​യിൽ “പശ്ചാത്താ​പം” കാണുക.

2. നമ്മളെ​ല്ലാം മാനസാ​ന്ത​ര​ത്തെ​ക്കു​റിച്ച്‌ പഠി​ക്കേ​ണ്ടത്‌ എന്തു​കൊണ്ട്‌? (നെഹമ്യ 8:9-11)

² നമ്മളെ​ല്ലാം മാനസാ​ന്ത​ര​ത്തെ​ക്കു​റിച്ച്‌ പഠി​ക്കേ​ണ്ട​തുണ്ട്‌. കാരണം നമ്മൾ ദിവസ​വും പാപം ചെയ്യുന്നു. ആദാമി​ന്റെ​യും ഹവ്വയു​ടെ​യും മക്കളായ നമുക്കു പാപവും മരണവും കൈമാ​റി​ക്കി​ട്ടി​യി​രി​ക്കു​ന്നു. (റോമ. 3:23; 5:12) നമ്മൾ ആരും അതിൽനിന്ന്‌ ഒഴിവു​ള്ള​വരല്ല. നല്ല വിശ്വാ​സ​മു​ണ്ടാ​യി​രുന്ന അപ്പോ​സ്‌ത​ല​നായ പൗലോ​സി​നു​പോ​ലും പാപത്തിന്‌ എതിരെ പോരാ​ടേ​ണ്ട​തു​ണ്ടാ​യി​രു​ന്നു. (റോമ. 7:21-24) അതിന്റെ അർഥം നമ്മുടെ പാപ​ത്തെ​ക്കു​റിച്ച്‌ ഓർത്ത്‌ നമ്മൾ എപ്പോ​ഴും വിഷമി​ച്ചി​രി​ക്കണം എന്നാണോ? അല്ല. യഹോവ കരുണ​യുള്ള ദൈവ​മാണ്‌. നമ്മളെ​ല്ലാം സന്തോ​ഷ​ത്തോ​ടെ​യി​രി​ക്ക​ണ​മെ​ന്നാണ്‌ യഹോ​വ​യു​ടെ ആഗ്രഹം. നെഹമ്യ​യു​ടെ കാലത്തെ ജൂതന്മാ​രെ​ക്കു​റിച്ച്‌ ചിന്തി​ക്കുക. (നെഹമ്യ 8:9-11 വായി​ക്കുക.) ചെയ്‌ത തെറ്റു​ക​ളെ​ക്കു​റിച്ച്‌ ഓർത്ത്‌ സങ്കട​പ്പെ​ട്ടി​രി​ക്കു​ന്ന​തി​നു പകരം, തന്നെ അവർ സന്തോ​ഷ​ത്തോ​ടെ ആരാധി​ക്കാ​നാണ്‌ യഹോവ ആഗ്രഹി​ച്ചത്‌. മാനസാ​ന്ത​ര​പ്പെ​ടു​ക​യാ​ണെ​ങ്കിൽ നമുക്കു സന്തോഷം ലഭിക്കു​മെന്ന്‌ യഹോ​വ​യ്‌ക്ക്‌ അറിയാം. അതു​കൊ​ണ്ടാണ്‌ യഹോവ മാനസാ​ന്ത​ര​ത്തെ​ക്കു​റിച്ച്‌ നമ്മളെ പഠിപ്പി​ക്കു​ന്നത്‌. നമ്മൾ മാനസാ​ന്ത​ര​പ്പെ​ടു​ന്നെ​ങ്കിൽ കരുണ​യുള്ള പിതാവ്‌ നമ്മളോ​ടു ക്ഷമിക്കു​മെന്ന്‌ ഉറപ്പാണ്‌.

3. ഈ ലേഖന​ത്തിൽ നമ്മൾ എന്തു പഠിക്കും?

³ ഈ ലേഖന​ത്തിൽ നമ്മൾ മാനസാ​ന്ത​ര​ത്തെ​ക്കു​റിച്ച്‌ പ്രധാ​ന​മാ​യും മൂന്നു കാര്യ​ങ്ങ​ളാ​ണു പഠിക്കു​ന്നത്‌: (1) മാനസാ​ന്ത​ര​ത്തെ​ക്കു​റിച്ച്‌ യഹോവ ഇസ്രാ​യേ​ല്യ​രെ എന്താണു പഠിപ്പി​ച്ചത്‌? (2) മാനസാ​ന്ത​ര​പ്പെ​ടാൻ യഹോവ എങ്ങനെ​യാണ്‌ ആളുകളെ സഹായി​ക്കു​ന്നത്‌? (3) മാനസാ​ന്ത​ര​ത്തെ​ക്കു​റിച്ച്‌ യേശു തന്റെ അനുഗാ​മി​കളെ എന്താണു പഠിപ്പി​ച്ചത്‌?

മാനസാ​ന്ത​ര​ത്തെ​ക്കു​റിച്ച്‌ യഹോവ ഇസ്രാ​യേ​ല്യ​രെ എന്താണു പഠിപ്പി​ച്ചത്‌?

4. മാനസാ​ന്ത​ര​ത്തെ​ക്കു​റിച്ച്‌ ഇസ്രാ​യേൽ ജനതയെ യഹോവ എന്താണു പഠിപ്പി​ച്ചത്‌?

⁴ യഹോവ ഇസ്രാ​യേ​ല്യ​രെ തന്റെ ജനതയാ​യി തിര​ഞ്ഞെ​ടു​ത്ത​പ്പോൾ അവരു​മാ​യി ഒരു ഉടമ്പടി ചെയ്‌തു. യഹോവ കൊടുത്ത നിയമങ്ങൾ അവർ അനുസ​രി​ക്കു​ക​യാ​ണെ​ങ്കിൽ യഹോവ അവരെ സംരക്ഷി​ക്കു​ക​യും അനു​ഗ്ര​ഹി​ക്കു​ക​യും ചെയ്യു​മാ​യി​രു​ന്നു. ആ നിയമ​ങ്ങ​ളു​ടെ കാര്യ​ത്തിൽ ഇങ്ങനെ ഒരു ഉറപ്പും കൊടു​ത്തു: “ഞാൻ ഇന്നു നിങ്ങ​ളോ​ടു കല്പിക്കുന്ന ഈ കല്പന അത്ര ബുദ്ധി​മു​ട്ടു​ള്ളതല്ല; അതു നിങ്ങളു​ടെ എത്തുപാ​ടിന്‌ അതീത​വു​മല്ല.” (ആവ. 30:11, 16) എന്നാൽ വേറെ ദൈവ​ങ്ങളെ ആരാധി​ക്കു​ക​യും മറ്റും ചെയ്‌തു​കൊണ്ട്‌ അവർ യഹോ​വയെ ധിക്കരി​ക്കു​ക​യാ​ണെ​ങ്കിൽ യഹോവ തന്റെ സംരക്ഷണം പിൻവ​ലി​ക്കു​ക​യും അവർ കഷ്ടപ്പെ​ടേ​ണ്ടി​വ​രു​ക​യും ചെയ്യു​മാ​യി​രു​ന്നു. അതിന്റെ അർഥം യഹോവ അവരെ പൂർണ​മാ​യി ഉപേക്ഷി​ക്കു​മാ​യി​രു​ന്നു എന്നല്ല. അവർക്കു ദൈവ​മായ ‘യഹോ​വ​യി​ലേക്കു തിരി​യാ​നും ദൈവ​ത്തി​ന്റെ വാക്കു​ക​ളെ​ല്ലാം അനുസ​രി​ക്കാ​നും’ കഴിയു​മാ​യി​രു​ന്നു. (ആവ. 30:1-3, 17-20) മറ്റു വാക്കു​ക​ളിൽ പറഞ്ഞാൽ, അവർക്കു മാനസാ​ന്ത​ര​പ്പെ​ടാൻ സാധി​ക്കു​മാ​യി​രു​ന്നു. അങ്ങനെ ചെയ്‌താൽ യഹോവ അവരോട്‌ അടുക്കു​ക​യും അവരെ വീണ്ടും അനു​ഗ്ര​ഹി​ക്കു​ക​യും ചെയ്യും.

5. തന്റെ ജനതയെ ഉപേക്ഷി​ച്ചി​ട്ടി​ല്ലെന്ന്‌ യഹോവ എങ്ങനെ​യാ​ണു തെളി​യി​ച്ചത്‌? (2 രാജാ​ക്ക​ന്മാർ 17:13, 14)

⁵ ഇസ്രാ​യേൽ ജനത യഹോ​വ​യോ​ടു വീണ്ടും​വീ​ണ്ടും ധിക്കാരം കാണിച്ചു. അവർ വിഗ്ര​ഹ​ങ്ങളെ ആരാധി​ക്കുക മാത്രമല്ല, മോശ​മായ മറ്റു പല കാര്യ​ങ്ങ​ളും ചെയ്‌തു. അതിന്റെ ഫലമായി അവർക്കു ദുരി​തങ്ങൾ അനുഭ​വി​ക്കേ​ണ്ടി​വന്നു. എന്നാൽ അവർ വഴി​തെ​റ്റി​പ്പോ​യി​ട്ടും യഹോവ അവരെ ഉപേക്ഷി​ച്ചില്ല. മാനസാ​ന്ത​ര​പ്പെട്ട്‌ തിരി​ഞ്ഞു​വ​രാൻ അവരെ സഹായി​ക്കു​ന്ന​തിന്‌ യഹോവ വീണ്ടും​വീ​ണ്ടും പ്രവാ​ച​ക​ന്മാ​രെ അവരുടെ അടു​ത്തേക്ക്‌ അയച്ചു.—2 രാജാ​ക്ക​ന്മാർ 17:13, 14 വായി​ക്കുക.

6. മാനസാ​ന്ത​ര​പ്പെ​ടേ​ണ്ട​തി​ന്റെ പ്രാധാ​ന്യ​ത്തെ​ക്കു​റിച്ച്‌ തന്റെ ജനത്തെ പഠിപ്പി​ക്കാൻ യഹോവ പ്രവാ​ച​ക​ന്മാ​രെ എങ്ങനെ​യാണ്‌ ഉപയോ​ഗി​ച്ചത്‌? (ചിത്ര​വും കാണുക.)

⁶ തന്നോട്‌ അനുസ​ര​ണ​ക്കേടു കാണിച്ച ആ ജനതയ്‌ക്ക്‌ മുന്നറി​യി​പ്പു നൽകാ​നും അവരെ തിരു​ത്താ​നും യഹോവ വീണ്ടും​വീ​ണ്ടും പ്രവാ​ച​ക​ന്മാ​രെ ഉപയോ​ഗി​ച്ച​തി​ന്റെ ചില ഉദാഹ​ര​ണങ്ങൾ നോക്കുക. ഇസ്രാ​യേൽ ജനത​യോട്‌ ഇങ്ങനെ പറയാൻ യഹോവ യിരെ​മ്യ​യോ​ടു പറഞ്ഞു: “വിശ്വാ​സ​വഞ്ചന കാണിച്ച ഇസ്രാ​യേലേ, മടങ്ങി​വരൂ. . . . ഞാൻ വിശ്വ​സ്‌ത​നാ​ണ​ല്ലോ. അതു​കൊണ്ട്‌ കോപ​ത്തോ​ടെ നിന്നെ നോക്കില്ല. . . . ഞാൻ എന്നെന്നും കോപം വെച്ചു​കൊ​ണ്ടി​രി​ക്കില്ല. നീ നിന്റെ കുറ്റം സമ്മതി​ച്ചാൽ മാത്രം മതി; കാരണം, നീ നിന്റെ ദൈവ​മായ യഹോ​വയെ ധിക്കരി​ച്ചു.” (യിരെ. 3:12, 13) യോവേൽ പ്രവാ​ച​ക​നി​ലൂ​ടെ യഹോവ പറഞ്ഞത്‌ ഇതാണ്‌: “നിങ്ങൾ പൂർണ​ഹൃ​ദ​യ​ത്തോ​ടെ തിരികെ വരൂ.” (യോവേ. 2:12, 13) യഹോവ യശയ്യയി​ലൂ​ടെ അവരോ​ടു പറഞ്ഞു: “നിങ്ങ​ളെ​ത്തന്നെ . . . കഴുകി വെടി​പ്പാ​ക്കുക; എന്റെ മുന്നിൽനിന്ന്‌ നിങ്ങളു​ടെ ദുഷ്‌ചെ​യ്‌തി​കൾ നീക്കി​ക്ക​ള​യുക; തിന്മ പ്രവർത്തി​ക്കു​ന്നതു മതിയാ​ക്കുക.” (യശ. 1:16-19) യഹസ്‌കേ​ലി​ലൂ​ടെ യഹോവ തന്റെ ജനത്തോട്‌ ഇങ്ങനെ ചോദി​ച്ചു: “‘ഒരു ദുഷ്ടൻ മരിക്കു​മ്പോൾ ഞാൻ അൽപ്പ​മെ​ങ്കി​ലും സന്തോ​ഷി​ക്കു​മെന്നു തോന്നു​ന്നു​ണ്ടോ?’ . . . അവൻ തന്റെ വഴികൾ വിട്ടു​തി​രിഞ്ഞ്‌ ജീവി​ച്ചി​രി​ക്കാ​നല്ലേ ഞാൻ ആഗ്രഹി​ക്കു​ന്നത്‌? . . . ആരു​ടെ​യും മരണത്തിൽ ഞാൻ ഒട്ടും സന്തോ​ഷി​ക്കു​ന്നില്ല. . . . അതു​കൊണ്ട്‌ പിന്തി​രി​യൂ! അങ്ങനെ, ജീവി​ച്ചി​രി​ക്കൂ!” (യഹ. 18:23, 32) ആളുകൾ മാനസാ​ന്ത​ര​പ്പെ​ടു​ന്നതു കാണു​മ്പോൾ യഹോവ സന്തോ​ഷി​ക്കു​ന്നു. കാരണം അവർ എന്നും ജീവി​ച്ചി​രി​ക്കാ​നാണ്‌ യഹോവ ആഗ്രഹി​ക്കു​ന്നത്‌. അതു​കൊണ്ട്‌ ‘ആളുകൾ മാനസാ​ന്ത​ര​പ്പെട്ട്‌ വരട്ടെ, എന്നിട്ട്‌ അവരെ സഹായി​ക്കാം’ എന്നു ചിന്തിച്ച്‌ യഹോവ വെറുതേ കാത്തി​രി​ക്കു​കയല്ല. അതിന്റെ മറ്റു ചില ഉദാഹ​ര​ണങ്ങൾ നമുക്കു നോക്കാം.

7. ഹോശേയ പ്രവാ​ച​ക​ന്റെ​യും ഭാര്യ​യു​ടെ​യും വിവര​ണ​ത്തി​ലൂ​ടെ യഹോവ എന്താണു തന്റെ ജനത്തെ പഠിപ്പി​ച്ചത്‌?

⁷ ഹോശേയ പ്രവാ​ച​കന്റെ ഭാര്യ​യായ ഗോമ​റി​ന്റെ ജീവി​തത്തെ ഉദാഹ​ര​ണ​മാ​യി ഉപയോ​ഗി​ച്ചു​കൊണ്ട്‌ യഹോവ തന്റെ ജനത്തെ എന്താണു പഠിപ്പി​ച്ച​തെന്നു നോക്കുക. വ്യഭി​ചാ​രം ചെയ്‌ത അവൾ പിന്നീട്‌ ഹോ​ശേ​യയെ ഉപേക്ഷിച്ച്‌ മറ്റു പുരു​ഷ​ന്മാ​രു​ടെ​കൂ​ടെ പോയി. യഹോവ അപ്പോൾ എന്തു ചെയ്‌തു? ഹൃദയങ്ങൾ അറിയുന്ന യഹോവ ഹോ​ശേ​യ​യോ​ടു പറഞ്ഞു: ‘ഇസ്രാ​യേൽ ജനം അന്യ​ദൈ​വ​ങ്ങ​ളി​ലേക്കു തിരി​ഞ്ഞ​പ്പോ​ഴും യഹോവ അവരെ സ്‌നേ​ഹി​ച്ചു. അതു​പോ​ലെ മറ്റൊരു പുരു​ഷനെ സ്‌നേ​ഹിച്ച്‌ വ്യഭി​ചാ​രം ചെയ്യുന്ന ആ സ്‌ത്രീ​യെ നീ ഒരിക്കൽക്കൂ​ടി സ്‌നേ​ഹി​ക്കുക.’ (ഹോശേ. 3:1; സുഭാ. 16:2) ഹോ​ശേ​യ​യു​ടെ ഭാര്യ അപ്പോ​ഴും ഗുരു​ത​ര​മായ തെറ്റിൽ തുടരു​ക​യാ​യി​രു​ന്നു. എന്നിട്ടും യഹോവ ഹോ​ശേ​യ​യോട്‌, അവളെ സഹായി​ക്കാൻ മുൻ​കൈ​യെ​ടു​ക്കാ​നും അവളോ​ടു ക്ഷമിച്ച്‌ അവളെ തിരികെ ഭാര്യ​യാ​യി സ്വീക​രി​ക്കാ​നും ആവശ്യ​പ്പെട്ടു.a ഇതിലൂ​ടെ ധിക്കാ​രി​ക​ളായ തന്റെ ജനത്തെ താൻ എങ്ങനെ​യാ​ണു കാണു​ന്ന​തെന്ന്‌ യഹോവ പഠിപ്പി​ക്കു​ക​യാ​യി​രു​ന്നു. അവർ ഗുരു​ത​ര​മായ തെറ്റുകൾ ചെയ്യു​ന്നു​ണ്ടാ​യി​രു​ന്നെ​ങ്കി​ലും യഹോവ അപ്പോ​ഴും അവരെ സ്‌നേ​ഹി​ച്ചു. പശ്ചാത്ത​പിച്ച്‌ തിരി​ഞ്ഞു​വ​രാൻ അവരെ സഹായി​ക്കു​ന്ന​തിന്‌ യഹോവ പല തവണ പ്രവാ​ച​ക​ന്മാ​രെ അവരുടെ അടു​ത്തേക്ക്‌ അയച്ചു. “ഹൃദയ​ങ്ങളെ പരി​ശോ​ധി​ക്കുന്ന” യഹോവ ഗുരു​ത​ര​മായ തെറ്റു ചെയ്യുന്ന ഒരാളെ സഹായി​ക്കാ​നും മാനസാ​ന്ത​ര​ത്തി​ലേക്കു നയിക്കാ​നും ശ്രമി​ക്കു​മെന്ന്‌ ഈ ദൃഷ്ടാന്തം പഠിപ്പി​ക്കു​ന്നു. (സുഭാ. 17:3) യഹോവ എങ്ങനെ​യാണ്‌ അതു ചെയ്യു​ന്ന​തെന്നു നമുക്കു വിശദ​മാ​യി നോക്കാം.

മാനസാ​ന്ത​ര​പ്പെ​ടാൻ യഹോവ എങ്ങനെ​യാണ്‌ ആളുകളെ സഹായി​ക്കു​ന്നത്‌?

8. കയീനെ മാനസാ​ന്ത​ര​ത്തി​ലേക്കു നയിക്കാൻ യഹോവ എന്തു ചെയ്‌തു? (ഉൽപത്തി 4:3-7) (ചിത്ര​വും കാണുക.)

⁸ ആദാമി​ന്റെ​യും ഹവ്വയു​ടെ​യും മൂത്ത മകനാ​യി​രു​ന്നു കയീൻ. തെറ്റു ചെയ്യാ​നുള്ള ചായ്‌വ്‌ കയീനു മാതാ​പി​താ​ക്ക​ളിൽനിന്ന്‌ കിട്ടി. കൂടാതെ, ബൈബി​ളിൽ കയീ​നെ​ക്കു​റിച്ച്‌ പറയു​ന്നത്‌ അയാളു​ടെ ‘പ്രവൃ​ത്തി​കൾ ദുഷ്ടത നിറഞ്ഞ​താ​യി​രു​ന്നു’ എന്നാണ്‌. (1 യോഹ. 3:12) അതു​കൊ​ണ്ടാ​യി​രി​ക്കാം യഹോവ ‘കയീനി​ലും കയീന്റെ യാഗത്തി​ലും പ്രസാ​ദി​ക്കാ​തി​രു​ന്നത്‌.’ തന്റെ സ്വഭാ​വ​ത്തി​നു മാറ്റം വരുത്തു​ന്ന​തി​നു പകരം കയീൻ ‘വല്ലാതെ കോപി​ക്കു​ക​യും കയീന്റെ മുഖം വാടു​ക​യും ചെയ്‌തു.’ അപ്പോൾ യഹോവ എന്താണു ചെയ്‌തത്‌? യഹോവ കയീ​നോ​ടു ദയയോ​ടെ സംസാ​രി​ച്ചു. (ഉൽപത്തി 4:3-7 വായി​ക്കുക.) നല്ലതു ചെയ്‌താൽ ലഭിക്കുന്ന അനു​ഗ്ര​ഹ​ങ്ങ​ളെ​ക്കു​റിച്ച്‌ യഹോവ പറഞ്ഞു. അതോ​ടൊ​പ്പം കോപം വെച്ചു​കൊ​ണ്ടി​രു​ന്നാൽ ഉണ്ടാ​യേ​ക്കാ​വുന്ന അപകട​ത്തെ​ക്കു​റിച്ച്‌ മുന്നറി​യി​പ്പു കൊടു​ക്കു​ക​യും ചെയ്‌തു. എന്നാൽ കയീൻ ആ വാക്കുകൾ ശ്രദ്ധി​ക്കാൻ തയ്യാറാ​യില്ല. മാനസാ​ന്ത​ര​പ്പെ​ടാ​നുള്ള സഹായം യഹോവ നൽകി​യെ​ങ്കി​ലും കയീൻ അതു തള്ളിക്ക​ളഞ്ഞു. കയീൻ അങ്ങനെ ചെയ്‌ത​തു​കൊണ്ട്‌, മാനസാ​ന്ത​ര​പ്പെ​ടാൻ ഇനി ആരെയും സഹായി​ക്കേണ്ടാ എന്ന്‌ യഹോവ തീരു​മാ​നി​ച്ചോ? ഒരിക്ക​ലു​മില്ല.

9. മാനസാ​ന്ത​ര​പ്പെ​ടാൻ യഹോവ ദാവീ​ദി​നെ എങ്ങനെ​യാ​ണു സഹായി​ച്ചത്‌?

⁹ യഹോവ ദാവീദ്‌ രാജാ​വി​നെ വളരെ​യ​ധി​കം സ്‌നേ​ഹി​ച്ചു. “എന്റെ മനസ്സിന്‌ ഇണങ്ങിയ ഒരാൾ” എന്നു​പോ​ലും യഹോവ ദാവീ​ദി​നെ​ക്കു​റിച്ച്‌ പറഞ്ഞു. (പ്രവൃ. 13:22) എന്നാൽ ദാവീദ്‌ വ്യഭി​ചാ​ര​വും കൊല​പാ​ത​ക​വും പോലുള്ള ഗുരു​ത​ര​മായ പല തെറ്റു​ക​ളും ചെയ്‌തു. മോശ​യി​ലൂ​ടെ കൊടുത്ത നിയമ​മ​നു​സ​രി​ച്ചാ​ണെ​ങ്കിൽ, ദാവീദ്‌ മരി​ക്കേ​ണ്ട​താ​യി​രു​ന്നു. (ലേവ്യ 20:10; സംഖ്യ 35:31) പക്ഷേ യഹോവ ദാവീ​ദി​നെ സഹായി​ക്കാൻ തയ്യാറാ​യി.b ദാവീദ്‌ പശ്ചാത്താ​പ​ത്തി​ന്റെ ഒരു ലക്ഷണം​പോ​ലും കാണി​ക്കാ​തി​രു​ന്നി​ട്ടും യഹോവ നാഥാൻ പ്രവാ​ച​കനെ ദാവീ​ദി​ന്റെ അടു​ത്തേക്ക്‌ അയച്ചു. ദാവീ​ദി​ന്റെ ഹൃദയത്തെ തൊടുന്ന ഒരു ദൃഷ്ടാന്തം അദ്ദേഹം ഉപയോ​ഗി​ച്ചു. യഹോ​വയെ താൻ വളരെ​യ​ധി​കം വേദനി​പ്പി​ച്ചെന്നു മനസ്സി​ലാ​ക്കിയ ദാവീദ്‌ പശ്ചാത്ത​പി​ക്കാൻ തയ്യാറാ​യി. (2 ശമു. 12:1-14) താൻ ചെയ്‌ത തെറ്റി​നെ​ക്കു​റിച്ച്‌ തനിക്ക്‌ എത്ര​ത്തോ​ളം പശ്ചാത്താ​പ​മു​ണ്ടെന്നു തെളി​യി​ക്കുന്ന ഒരു സങ്കീർത്തനം ദാവീദ്‌ എഴുതി. (സങ്കീ. 51, മേലെ​ഴുത്ത്‌) തെറ്റു ചെയ്‌ത ഒരുപാ​ടു പേർക്ക്‌ 51-ാം സങ്കീർത്തനം വലിയ ആശ്വാ​സ​മാ​യി​രു​ന്നി​ട്ടുണ്ട്‌. അത്‌ അവരെ മാനസാ​ന്ത​ര​ത്തി​ലേക്കു നയിക്കു​ക​യും ചെയ്‌തി​രി​ക്കു​ന്നു. തന്റെ പ്രിയ​ദാ​സ​നായ ദാവീ​ദി​നെ മാനസാ​ന്ത​ര​ത്തി​ലേക്കു നയിക്കാൻ യഹോവ സ്‌നേ​ഹ​ത്തോ​ടെ സഹായി​ച്ച​തിൽ നമുക്കു സന്തോഷം തോന്നു​ന്നി​ല്ലേ?

10. പാപി​ക​ളോ​ടു ക്ഷമയോ​ടെ ഇടപെ​ടാ​നും അവരുടെ തെറ്റുകൾ ക്ഷമിക്കാ​നും ഉള്ള യഹോ​വ​യു​ടെ മനസ്സൊ​രു​ക്ക​ത്തെ​ക്കു​റിച്ച്‌ നിങ്ങൾക്ക്‌ എന്താണു തോന്നു​ന്നത്‌?

¹⁰ യഹോവ എല്ലാ തരം പാപങ്ങ​ളും വെറു​ക്കു​ന്നു. (സങ്കീ. 5:4, 5) എങ്കിലും യഹോവ നമ്മളെ​യെ​ല്ലാം സ്‌നേ​ഹി​ക്കു​ന്ന​തു​കൊണ്ട്‌ നമുക്ക്‌ എന്തെങ്കി​ലും തെറ്റുകൾ പറ്റിയാ​ലും നമ്മളെ സഹായി​ക്കാൻ ആഗ്രഹി​ക്കു​ന്നു. എത്ര ഗുരു​ത​ര​മായ തെറ്റു ചെയ്‌തവർ ആണെങ്കിൽപ്പോ​ലും മാനസാ​ന്ത​ര​പ്പെ​ടാ​നും തന്നോടു കൂടുതൽ അടുക്കാ​നും അവരെ സഹായി​ക്കാൻ യഹോവ എപ്പോ​ഴും ശ്രമി​ക്കു​ന്നു. അത്‌ എത്ര ആശ്വാ​സ​മാ​ണല്ലേ? ക്ഷമയോ​ടെ ഇടപെ​ടാ​നും തെറ്റുകൾ ക്ഷമിക്കാ​നും ഉള്ള യഹോ​വ​യു​ടെ മനസ്സൊ​രു​ക്ക​ത്തെ​ക്കു​റിച്ച്‌ ചിന്തി​ക്കു​മ്പോൾ വിശ്വ​സ്‌ത​രാ​യി തുടരാ​നും, അഥവാ ഒരു തെറ്റു സംഭവി​ച്ചാ​ലും പെട്ടെ​ന്നു​തന്നെ മാനസാ​ന്ത​ര​പ്പെ​ടാ​നും നമുക്കു തോന്നും. മാനസാ​ന്ത​ര​ത്തെ​ക്കു​റിച്ച്‌ യേശു തന്റെ അനുഗാ​മി​കളെ എന്താണു പഠിപ്പി​ച്ച​തെന്ന്‌ ഇനി നോക്കാം.

മാനസാ​ന്ത​ര​ത്തെ​ക്കു​റിച്ച്‌ യേശു തന്റെ അനുഗാ​മി​കളെ എന്താണു പഠിപ്പി​ച്ചത്‌?

11-12. തെറ്റു ചെയ്യുന്ന ഒരാ​ളോ​ടു ക്ഷമിക്കാൻ തന്റെ പിതാ​വി​ന്റെ താത്‌പ​ര്യ​ത്തെ​ക്കു​റിച്ച്‌ യേശു എന്താണു പഠിപ്പി​ച്ചത്‌? (പുറം​താ​ളി​ലെ ചിത്ര​വും കാണുക.)

¹¹ മിശിഹ ഭൂമി​യിൽ വരാനുള്ള സമയമാ​യ​പ്പോൾ മാനസാ​ന്ത​ര​പ്പെ​ടാൻ യഹോവ സ്‌നാ​പ​ക​യോ​ഹ​ന്നാ​നെ ഉപയോ​ഗിച്ച്‌ തന്റെ ജനത്തെ പ്രോ​ത്സാ​ഹി​പ്പി​ച്ചു. ഇനി യേശു ശുശ്രൂഷ തുടങ്ങി​യ​പ്പോ​ഴും, മാനസാ​ന്ത​ര​പ്പെ​ടേ​ണ്ടത്‌ എത്ര പ്രധാ​ന​മാ​ണെന്നു പഠിപ്പി​ച്ചു.—മത്താ. 3:1, 2; 4:17.

¹² നമുക്കു തെറ്റുകൾ പറ്റിയാൽ നമ്മളോ​ടു ക്ഷമിക്കാൻ യഹോ​വ​യ്‌ക്ക്‌ എത്രമാ​ത്രം താത്‌പ​ര്യ​മു​ണ്ടെന്ന്‌, ഭൂമി​യി​ലാ​യി​രു​ന്ന​പ്പോൾ യേശു പഠിപ്പി​ച്ചു. അതിനു​വേണ്ടി യേശു ധൂർത്ത​പു​ത്രന്റെ ദൃഷ്ടാ​ന്തകഥ ഉപയോ​ഗി​ച്ചു. ആ ചെറു​പ്പ​ക്കാ​രൻ വീടു വിട്ടു​പോ​യി, കുറെ​ക്കാ​ലം കുത്തഴിഞ്ഞ ജീവിതം നയിച്ചു. എന്നാൽ സുബോ​ധ​മു​ണ്ടാ​യ​പ്പോൾ അവൻ വീട്ടി​ലേക്കു മടങ്ങി​വന്നു. അപ്പോൾ അവന്റെ അപ്പൻ എന്തു ചെയ്‌തു? “ദൂരെ​വെ​ച്ചു​തന്നെ അപ്പൻ അവനെ തിരി​ച്ച​റി​ഞ്ഞു. മനസ്സ്‌ അലിഞ്ഞ്‌ അപ്പൻ ഓടി​ച്ചെന്ന്‌ അവനെ കെട്ടി​പ്പി​ടിച്ച്‌ സ്‌നേ​ഹ​ത്തോ​ടെ ചുംബി​ച്ചു” എന്നു യേശു പറഞ്ഞു. അപ്പൻ തന്നോടു ക്ഷമിക്കു​മെന്ന്‌ ആ മകൻ ഒരിക്ക​ലും കരുതി​യില്ല. അതു​കൊണ്ട്‌ ഒരു കൂലി​ക്കാ​ര​നാ​യെ​ങ്കി​ലും തന്നെ ആ വീട്ടിൽ നിറു​ത്താ​മോ എന്നാണ്‌ അവൻ ചോദി​ച്ചത്‌. എന്നാൽ അപ്പൻ അങ്ങനെയല്ല ചിന്തി​ച്ചത്‌. “എന്റെ ഈ മകൻ” എന്നു പറഞ്ഞ്‌ അവനെ തന്റെ കുടും​ബ​ത്തി​ലേക്കു വീണ്ടും സ്വീക​രി​ക്കു​ക​യാ​ണു ചെയ്‌തത്‌. “ഇവനെ കാണാ​തെ​പോ​യി​രു​ന്നു, ഇപ്പോൾ കണ്ടുകി​ട്ടി” എന്ന്‌ അപ്പൻ പറഞ്ഞു. (ലൂക്കോ. 15:11-32) യേശു സ്വർഗ​ത്തി​ലാ​യി​രുന്ന സമയത്ത്‌, മാനസാ​ന്ത​ര​പ്പെ​ടുന്ന പാപി​ക​ളോ​ടു തന്റെ പിതാവ്‌ അനുക​മ്പ​യോ​ടെ ഇടപെ​ടു​ന്ന​തും അവരുടെ തെറ്റുകൾ പെട്ടെന്നു ക്ഷമിക്കു​ന്ന​തും കണ്ടിട്ടുണ്ട്‌. നമ്മുടെ പിതാ​വായ യഹോവ എത്ര കരുണ​യോ​ടെ​യാ​ണു പാപി​ക​ളോട്‌ ഇടപെ​ടു​ന്ന​തെന്ന്‌ ആ ദൃഷ്ടാ​ന്തകഥ കാണി​ക്കു​ന്നി​ല്ലേ? അതു നമുക്ക്‌ എത്ര ആശ്വാ​സ​മാണ്‌!

13-14. മാനസാ​ന്ത​ര​പ്പെ​ടു​ന്ന​തി​നെ​ക്കു​റിച്ച്‌ അപ്പോ​സ്‌ത​ല​നായ പത്രോസ്‌ എന്താണു പഠിച്ചത്‌, അദ്ദേഹം അതെക്കു​റിച്ച്‌ മറ്റുള്ള​വരെ എന്താണു പഠിപ്പി​ച്ചത്‌? (ചിത്ര​വും കാണുക.)

¹³ മാനസാ​ന്ത​ര​പ്പെ​ടുന്ന പാപി​ക​ളോട്‌ യഹോവ ക്ഷമിക്കു​ന്ന​തി​നെ​ക്കു​റി​ച്ചുള്ള ചില പ്രധാ​ന​പ്പെട്ട പാഠങ്ങൾ അപ്പോ​സ്‌ത​ല​നായ പത്രോസ്‌ യേശു​വിൽനിന്ന്‌ പഠിച്ചു. പത്രോസ്‌ പല തെറ്റു​ക​ളും ചെയ്‌തു. അപ്പോ​ഴെ​ല്ലാം യേശു ക്ഷമിക്കാൻ തയ്യാറാ​യി. ഉദാഹ​ര​ണ​ത്തിന്‌, തന്റെ കർത്താ​വി​നെ അറിയി​ല്ലെന്നു പത്രോസ്‌ മൂന്നു പ്രാവ​ശ്യം പറഞ്ഞു. തനിക്കു പറ്റി​പ്പോ​യ​തി​നെ​ക്കു​റിച്ച്‌ ഓർത്ത്‌ പത്രോ​സിന്‌ അതിയായ ദുഃഖം തോന്നി. (മത്താ. 26:34, 35, 69-75) എന്നാൽ പുനരു​ത്ഥാ​ന​പ്പെട്ട യേശു പത്രോ​സി​നെ കാണാൻ ചെന്നു, സാധ്യ​ത​യ​നു​സ​രിച്ച്‌ പത്രോസ്‌ ഒറ്റയ്‌ക്കാ​യി​രു​ന്ന​പ്പോൾ. (ലൂക്കോ. 24:33, 34; 1 കൊരി. 15:3-5) പത്രോ​സി​നു പശ്ചാത്താ​പ​മു​ണ്ടെന്നു യേശു​വിന്‌ അറിയാ​മാ​യി​രു​ന്നു. അതു​കൊണ്ട്‌ താൻ അദ്ദേഹ​ത്തോ​ടു ക്ഷമി​ച്ചെന്ന്‌ ഉറപ്പു കൊടു​ക്കാൻ യേശു ആഗ്രഹി​ച്ചു.

¹⁴ മാനസാ​ന്ത​ര​പ്പെ​ടു​ന്ന​തി​നെ​ക്കു​റി​ച്ചും തെറ്റുകൾ ക്ഷമിച്ചു​കി​ട്ടു​ന്ന​തി​നെ​ക്കു​റി​ച്ചും സ്വന്തം അനുഭ​വ​ത്തിൽനിന്ന്‌ പത്രോ​സിന്‌ ആളുകളെ പഠിപ്പി​ക്കാ​നാ​യി. പെന്തി​ക്കോ​സ്‌ത്‌ ഉത്സവ​ത്തെ​ത്തു​ടർന്ന്‌ പത്രോസ്‌ ജൂതന്മാ​രു​ടെ ഒരു കൂട്ട​ത്തോ​ടു പ്രസം​ഗി​ക്കു​മ്പോൾ അവർ മിശി​ഹ​യെ​യാ​ണു കൊന്നു​ക​ള​ഞ്ഞ​തെന്നു വിശദീ​ക​രി​ച്ചു. എന്നിട്ടും അദ്ദേഹം സ്‌നേ​ഹ​ത്തോ​ടെ അവരോട്‌ പറഞ്ഞു: ‘നിങ്ങളു​ടെ പാപങ്ങൾ മായ്‌ച്ചു​കി​ട്ടാൻ മാനസാ​ന്ത​ര​പ്പെട്ട്‌ ദൈവ​ത്തി​ലേക്കു തിരി​യുക; അപ്പോൾ യഹോവ ഉന്മേഷ​കാ​ലങ്ങൾ നൽകും.’ (പ്രവൃ. 3:14, 15, 17, 19) പശ്ചാത്താ​പം ദൈവ​ത്തി​ലേക്കു തിരി​ഞ്ഞു​വ​രാൻ ഒരാളെ പ്രേരി​പ്പി​ക്കു​മെന്നു പത്രോസ്‌ ഇവിടെ പറഞ്ഞു. അങ്ങനെ​യുള്ള ഒരാൾ തന്റെ തെറ്റായ ചിന്തകൾക്കും പ്രവൃ​ത്തി​കൾക്കും മാറ്റം വരുത്തി ദൈവ​ത്തിന്‌ ഇഷ്ടമുള്ള ഒരു ജീവി​ത​രീ​തി തിര​ഞ്ഞെ​ടു​ക്കും. കൂടാതെ, യഹോവ അവരുടെ പാപങ്ങൾ മായ്‌ച്ചു​ക​ള​യും, അതായത്‌, അവരുടെ തെറ്റുകൾ പൂർണ​മാ​യി ക്ഷമിക്കും എന്നും പത്രോസ്‌ പറഞ്ഞു. വർഷങ്ങൾക്കു ശേഷം പത്രോസ്‌ ക്രിസ്‌ത്യാ​നി​കൾക്ക്‌ ഈ ഉറപ്പും കൊടു​ത്തു: ‘യഹോവ ആരും നശിച്ചു​പോ​കാ​തെ എല്ലാവ​രും മാനസാ​ന്ത​ര​പ്പെ​ടാൻ ആഗ്രഹി​ക്കു​ന്ന​തു​കൊണ്ട്‌ നിങ്ങ​ളോ​ടു ക്ഷമ കാണി​ക്കു​ക​യാണ്‌.’ (2 പത്രോ. 3:9) ഗുരു​ത​ര​മായ തെറ്റുകൾ ചെയ്‌താൽപ്പോ​ലും നമ്മൾ മാനസാ​ന്ത​ര​പ്പെ​ടു​ന്നെ​ങ്കിൽ യഹോവ നമ്മളോ​ടു പൂർണ​മാ​യി ക്ഷമിക്കും എന്നറി​യു​ന്നത്‌ എത്ര ആശ്വാ​സ​മാണ്‌!

15-16. (എ) പാപി​ക​ളായ മനുഷ്യ​രോ​ടു ക്ഷമിക്കു​ന്ന​തി​നെ​ക്കു​റിച്ച്‌ അപ്പോ​സ്‌ത​ല​നായ പൗലോ​സിന്‌ എങ്ങനെ​യാ​ണു പഠിക്കാ​നാ​യത്‌? (1 തിമൊ​ഥെ​യൊസ്‌ 1:12-15) (ബി) അടുത്ത ലേഖന​ത്തിൽ നമ്മൾ എന്തു പഠിക്കും?

¹⁵ ഒരുപാ​ടു തെറ്റുകൾ ചെയ്‌ത വ്യക്തി​യാ​യി​രു​ന്നു തർസൊ​സു​കാ​ര​നായ ശൗൽ. ക്രിസ്‌തു​വി​ന്റെ അനുഗാ​മി​കളെ അദ്ദേഹം ക്രൂര​മാ​യി ഉപദ്ര​വി​ച്ചു. (പ്രവൃ. 7:58–8:3) അദ്ദേഹം ഒരിക്ക​ലും മാറ്റം വരുത്തി​ല്ലെന്നു മിക്ക ക്രിസ്‌ത്യാ​നി​ക​ളും ചിന്തി​ച്ചു​കാ​ണും. എന്നാൽ ശൗലിനു പശ്ചാത്ത​പിച്ച്‌ മാറ്റം​വ​രു​ത്താൻ കഴിയു​മെന്നു യേശു​വിന്‌ അറിയാ​മാ​യി​രു​ന്നു. ശൗലിന്റെ നല്ല ഗുണങ്ങൾ യേശു​വും യഹോ​വ​യും ശ്രദ്ധിച്ചു. യേശു പറഞ്ഞു: “ജനതക​ളു​ടെ . . . മുമ്പാകെ എന്റെ പേര്‌ വഹിക്കാൻ ഞാൻ തിര​ഞ്ഞെ​ടു​ത്തി​രി​ക്കുന്ന ഒരു പാത്ര​മാണ്‌ ആ മനുഷ്യൻ.” (പ്രവൃ. 9:15) ശൗലിനെ മാനസാ​ന്ത​ര​ത്തി​ലേക്കു നയിക്കാൻ യേശു ഒരു അത്ഭുതം​പോ​ലും പ്രവർത്തി​ച്ചു. (പ്രവൃ. 9:1-9, 17-20) തന്നോടു കാണിച്ച കരുണ​യ്‌ക്കും ദയയ്‌ക്കും താൻ എത്ര നന്ദിയു​ള്ള​വ​നാ​ണെന്ന്‌ ഒരു ക്രിസ്‌ത്യാ​നി​യാ​യി​ത്തീർന്ന​ശേഷം ശൗൽ (പിന്നീട്‌ അപ്പോ​സ്‌ത​ല​നായ പൗലോസ്‌ എന്ന്‌ അറിയ​പ്പെട്ടു.) പലപ്പോ​ഴും പറഞ്ഞു. (1 തിമൊ​ഥെ​യൊസ്‌ 1:12-15 വായി​ക്കുക.) ‘ദൈവം കനിവ്‌ കാണി​ക്കു​ന്നതു നിന്നെ മാനസാ​ന്ത​ര​ത്തി​ലേക്കു നയിക്കാ​നാണ്‌’ എന്ന്‌ അദ്ദേഹം ആളുകളെ പഠിപ്പി​ച്ചു.—റോമ. 2:4.

¹⁶ അധാർമിക പ്രവൃ​ത്തി​ക​ളിൽ ഏർപ്പെ​ട്ടി​രി​ക്കുന്ന ഒരാൾ കൊരി​ന്തു​സ​ഭ​യിൽ തുടരു​ന്ന​താ​യി പൗലോസ്‌ ഒരിക്കൽ അറിഞ്ഞു. അദ്ദേഹം ആ പ്രശ്‌നം കൈകാ​ര്യം ചെയ്‌ത വിധത്തിൽനിന്ന്‌ ശിക്ഷണം നൽകു​മ്പോൾ യഹോവ എങ്ങനെ​യാ​ണു സ്‌നേഹം കാണി​ക്കു​ന്ന​തെ​ന്നും മാനസാ​ന്ത​ര​പ്പെ​ടു​മ്പോൾ എങ്ങനെ​യാ​ണു കരുണ കാണി​ക്കു​ന്ന​തെ​ന്നും മനസ്സി​ലാ​ക്കാം. കൊരി​ന്തു​സ​ഭ​യിൽ എന്താണു സംഭവി​ച്ചത്‌ എന്നതി​നെ​ക്കു​റിച്ച്‌ അടുത്ത ലേഖന​ത്തിൽ നമ്മൾ വിശദ​മാ​യി പഠിക്കും.