യഹോവ ‘ഹൃദയം തകർന്ന​വരെ സുഖ​പ്പെ​ടു​ത്തു​ന്നു’

1. തന്റെ ദാസന്മാ​രെ​ക്കു​റിച്ച്‌ യഹോ​വ​യ്‌ക്ക്‌ എന്താണു തോന്നു​ന്നത്‌?

ഭൂമി​യി​ലെ തന്റെ വിശ്വ​സ്‌ത​ദാ​സ​രിൽ ഓരോ​രു​ത്ത​രും കടന്നു​പോ​കുന്ന സാഹച​ര്യ​ങ്ങൾ യഹോവ ശ്രദ്ധി​ക്കു​ന്നുണ്ട്‌. നമുക്ക്‌ എപ്പോ​ഴാ​ണു സന്തോഷം തോന്നു​ന്നത്‌, എപ്പോ​ഴാ​ണു നമ്മൾ സങ്കട​പ്പെ​ട്ടി​രി​ക്കു​ന്നത്‌ എന്നെല്ലാം യഹോവ അറിയു​ന്നു. (സങ്കീ. 37:18) മനസ്സ്‌ വല്ലാതെ വേദനി​ച്ചി​രി​ക്കുന്ന സമയത്തും, കഴിവി​ന്റെ പരമാ​വധി ദൈവത്തെ സേവി​ക്കാൻ നമ്മൾ ശ്രമി​ക്കു​ന്നതു കാണു​മ്പോൾ യഹോ​വ​യ്‌ക്ക്‌ എത്ര സന്തോഷം തോന്നു​ന്നു​ണ്ടാ​കും! എന്നാൽ അതുമാ​ത്രമല്ല, നമ്മളെ സഹായി​ക്കാ​നും ആശ്വസി​പ്പി​ക്കാ​നും യഹോവ അതിയാ​യി ആഗ്രഹി​ക്കു​ക​യും ചെയ്യുന്നു.

2. ഹൃദയം തകർന്നി​രി​ക്കു​ന്ന​വർക്കു​വേണ്ടി യഹോവ എന്തു ചെയ്യും, അതിൽനിന്ന്‌ പ്രയോ​ജനം നേടാൻ നമ്മൾ എന്തു ചെയ്യണം?

² സങ്കീർത്തനം 147:3-ൽ യഹോവ ഹൃദയം തകർന്ന​വ​രു​ടെ “മുറി​വു​കൾ വെച്ചു​കെ​ട്ടു​ന്നു” എന്നു പറഞ്ഞി​രി​ക്കു​ന്നു. മനസ്സിനു മുറി​വേ​റ്റ​വരെ യഹോവ എത്ര സ്‌നേ​ഹ​ത്തോ​ടെ​യാ​ണു പരിപാ​ലി​ക്കു​ന്ന​തെന്ന്‌ ഈ വാക്യം നന്നായി കാണി​ച്ചു​ത​രു​ന്നു. ആ സ്‌നേ​ഹ​ത്തിൽനിന്ന്‌ പ്രയോ​ജനം നേടാൻ നമ്മൾ എന്തു ചെയ്യണം? അതു മനസ്സി​ലാ​ക്കാൻ ഒരു ഉദാഹ​രണം നോക്കാം. മുറി​വേറ്റ ഒരു വ്യക്തി പെട്ടെന്നു സുഖ​പ്പെ​ടു​ന്ന​തി​നു വിദഗ്‌ധ​നായ ഒരു ഡോക്‌ടർക്കു പലതും ചെയ്യാ​നാ​കും. പക്ഷേ ആ വ്യക്തിക്കു മുഴുവൻ പ്രയോ​ജ​ന​വും കിട്ടണ​മെ​ങ്കിൽ ഡോക്‌ടർ പറയു​ന്ന​തെ​ല്ലാം അദ്ദേഹം അനുസ​രി​ക്കേ​ണ്ട​തുണ്ട്‌. അതു​പോ​ലെ, വൈകാ​രി​ക​മാ​യി സുഖ​പ്പെ​ടു​ന്ന​തിന്‌ ഒരാൾ യഹോവ നൽകുന്ന നിർദേ​ശങ്ങൾ അനുസ​രി​ക്കണം. ഈ ലേഖന​ത്തിൽ, അങ്ങനെ​യു​ള്ള​വ​രോ​ടു തന്റെ വചനത്തി​ലൂ​ടെ യഹോവ എന്താണു പറയു​ന്ന​തെന്നു നമ്മൾ കാണും. സ്‌നേ​ഹ​ത്തോ​ടെ ദൈവം നൽകുന്ന ആ നിർദേ​ശങ്ങൾ നമുക്ക്‌ എങ്ങനെ അനുസ​രി​ക്കാ​മെ​ന്നും പഠിക്കും.

നമ്മൾ വില​പ്പെ​ട്ട​വ​രാ​ണെന്ന്‌ യഹോവ ഉറപ്പു​ത​രു​ന്നു

3. തങ്ങൾ വില​കെ​ട്ട​വ​രാ​ണെന്നു ചിലർക്കു തോന്നി​പ്പോ​കു​ന്നത്‌ എന്തു​കൊണ്ട്‌?

³ സ്‌നേ​ഹ​മി​ല്ലാത്ത ഒരു ലോക​ത്താണ്‌ നമ്മൾ ജീവി​ക്കു​ന്നത്‌. ആളുകൾ മോശ​മാ​യി ഇടപെ​ടു​ന്ന​തു​കൊണ്ട്‌ പലർക്കും തങ്ങൾ വിലയി​ല്ലാ​ത്ത​വ​രാ​ണെന്ന തോന്ന​ലുണ്ട്‌. ഹെലൻa എന്ന സഹോ​ദരി ഇങ്ങനെ പറയുന്നു: “എന്റെ മാതാ​പി​താ​ക്കൾ എന്നെ ഒട്ടും സ്‌നേ​ഹി​ച്ചി​ട്ടില്ല. ഡാഡി വളരെ ക്രൂര​മാ​യി​ട്ടാണ്‌ എന്നോട്‌ ഇടപെ​ട്ടി​രു​ന്നത്‌. ഞാൻ ഒന്നിനും കൊള്ളാ​ത്ത​വ​ളാ​ണെന്ന്‌ എന്നും പറയു​മാ​യി​രു​ന്നു.” ഹെല​നെ​പ്പോ​ലെ നിങ്ങൾക്കും മോശം പെരു​മാ​റ്റ​മോ കൂടെ​ക്കൂ​ടെ​യുള്ള കുറ്റ​പ്പെ​ടു​ത്ത​ലോ നേരി​ട്ടി​ട്ടു​ണ്ടാ​കാം. അല്ലെങ്കിൽ നിങ്ങൾ വിലയി​ല്ലാ​ത്ത​വ​രാണ്‌ എന്ന തോന്നൽ ആരെങ്കി​ലും നിങ്ങളിൽ ഉണ്ടാക്കി​യി​ട്ടു​ണ്ടാ​കാം. അതു​കൊ​ണ്ടു​തന്നെ നിങ്ങളെ ആരെങ്കി​ലും ശരിക്കും സ്‌നേ​ഹി​ക്കു​ന്നു​ണ്ടെന്നു വിശ്വ​സി​ക്കാൻ നിങ്ങൾക്കു ബുദ്ധി​മു​ട്ടു തോന്നി​യേ​ക്കാം.

4. സങ്കീർത്തനം 34:18 അനുസ​രിച്ച്‌ യഹോവ നമുക്ക്‌ എന്ത്‌ ഉറപ്പു​ത​രു​ന്നു?

⁴ മറ്റുള്ളവർ നിങ്ങ​ളോ​ടു മോശ​മാ​യി പെരു​മാ​റി​യി​ട്ടു​ണ്ടെ​ങ്കി​ലും, യഹോവ നിങ്ങളെ സ്‌നേ​ഹി​ക്കു​ന്നു​ണ്ടെ​ന്നും വില​പ്പെ​ട്ട​വ​രാ​യി കാണു​ന്നു​ണ്ടെ​ന്നും ഉറപ്പു​ണ്ടാ​യി​രി​ക്കുക. “യഹോവ ഹൃദയം തകർന്ന​വ​രു​ടെ അരികി​ലുണ്ട്‌.” (സങ്കീർത്തനം 34:18 വായി​ക്കുക.) വിഷമിച്ച്‌, ‘മനസ്സ്‌ തകർന്നി​രി​ക്കു​മ്പോ​ഴും’ നിങ്ങൾക്ക്‌ ഓർക്കാ​നാ​കുന്ന ഒന്നുണ്ട്‌: യഹോവ നിങ്ങളു​ടെ നല്ല ഗുണങ്ങൾ കണ്ട്‌ നിങ്ങളെ തന്നി​ലേക്ക്‌ ആകർഷി​ച്ച​താണ്‌ എന്ന കാര്യം. (യോഹ. 6:44) ദൈവം നിങ്ങളെ സഹായി​ക്കാൻ എപ്പോ​ഴും തയ്യാറാണ്‌. കാരണം, നിങ്ങൾ യഹോ​വ​യ്‌ക്ക്‌ അത്രയ്‌ക്കു വില​പ്പെ​ട്ട​വ​രാണ്‌.

5. ആളുകൾ വിലയി​ല്ലാ​ത്ത​വ​രാ​യി കണ്ടവ​രോ​ടു യേശു ഇടപെട്ട വിധത്തിൽനിന്ന്‌ നമുക്ക്‌ എന്തു മനസ്സി​ലാ​ക്കാം?

⁵ യഹോ​വ​യ്‌ക്കു നമ്മളോട്‌ എന്താണു തോന്നു​ന്ന​തെന്നു മനസ്സി​ലാ​ക്കാൻ യേശു ഭൂമി​യി​ലാ​യി​രുന്ന സമയത്ത്‌ മറ്റുള്ള​വ​രോട്‌ ഇടപെട്ട വിധം നോക്കി​യാൽ മതി. ആളുകൾ തീരെ വിലയി​ല്ലാ​ത്ത​വ​രാ​യി കണ്ടവ​രോ​ടു യേശു വളരെ ദയയോ​ടെ ഇടപെട്ടു. (മത്താ. 9:9-12) ഒരിക്കൽ വലി​യൊ​രു രോഗ​ത്താൽ വിഷമി​ച്ചി​രുന്ന ഒരു സ്‌ത്രീ, സുഖ​പ്പെ​ടു​മെന്ന പ്രതീ​ക്ഷ​യോ​ടെ യേശു​വി​ന്റെ വസ്‌ത്ര​ത്തിൽ തൊട്ടു. അപ്പോൾ യേശു അവളെ ആശ്വസി​പ്പി​ക്കു​ക​യും അവളുടെ വിശ്വാ​സത്തെ അഭിന​ന്ദി​ക്കു​ക​യും ചെയ്‌തു. (മർക്കോ. 5:25-34) പിതാ​വി​ന്റെ വ്യക്തി​ത്വ​മാണ്‌ യേശു അങ്ങനെ​തന്നെ പ്രതി​ഫ​ലി​പ്പി​ച്ചത്‌. (യോഹ. 14:9) അതു​കൊണ്ട്‌ യഹോ​വ​യ്‌ക്കു നിങ്ങൾ വില​പ്പെ​ട്ട​വ​രാ​ണെന്ന്‌ ഉറപ്പു​ണ്ടാ​യി​രി​ക്കുക. ദൈവ​ത്തോ​ടു നിങ്ങൾ കാണി​ക്കുന്ന വിശ്വാ​സ​വും സ്‌നേ​ഹ​വും പോലുള്ള നല്ല ഗുണങ്ങൾ ദൈവം തീർച്ച​യാ​യും ശ്രദ്ധി​ക്കു​ന്നുണ്ട്‌.

6. വില​കെ​ട്ട​വ​രാ​ണെന്ന തോന്ന​ലി​നെ മറിക​ട​ക്കാൻ ഒരാൾക്ക്‌ എന്തു ചെയ്യാം?

⁶ വില​കെ​ട്ട​വ​രാ​ണെന്ന തോന്നൽ നിങ്ങളു​ടെ ഉള്ളിൽ മാറാതെ നിൽക്കു​ന്നെ​ങ്കിൽ എന്തു ചെയ്യാ​നാ​കും? യഹോ​വ​യ്‌ക്കു നിങ്ങൾ വില​പ്പെ​ട്ട​വ​രാ​ണെന്ന്‌ ഉറപ്പു​ത​രുന്ന തിരു​വെ​ഴു​ത്തു​കൾ വായി​ക്കു​ക​യും അതെക്കു​റിച്ച്‌ ചിന്തി​ക്കു​ക​യും ചെയ്യുക.b (സങ്കീ. 94:19) ഒരു ലക്ഷ്യം​വെ​ച്ചിട്ട്‌ അതിൽ എത്തി​ച്ചേ​രാൻ പരാജ​യ​പ്പെ​ടു​ക​യോ മറ്റുള്ള​വ​രു​ടെ അത്രയും ചെയ്യാൻ പറ്റാ​തെ​വ​രു​ക​യോ ചെയ്യു​മ്പോൾ നിങ്ങൾക്കു നിരാശ തോന്നി​യേ​ക്കാം. പക്ഷേ സ്വയം കുറ്റ​പ്പെ​ടു​ത്ത​രുത്‌. യഹോവ നിങ്ങളിൽനിന്ന്‌ ന്യായ​മാ​യതേ പ്രതീ​ക്ഷി​ക്കു​ന്നു​ള്ളൂ എന്ന്‌ ഓർക്കുക. (സങ്കീ. 103:13, 14) നിങ്ങൾക്കു മറ്റുള്ള​വ​രിൽനിന്ന്‌ ക്രൂര​മായ പെരു​മാ​റ്റം സഹി​ക്കേ​ണ്ടി​വ​ന്നി​ട്ടു​ണ്ടെ​ങ്കിൽ, അങ്ങനെ സംഭവി​ച്ചതു നിങ്ങളു​ടെ കുറ്റം​കൊ​ണ്ടാ​ണെന്നു ചിന്തി​ക്ക​രുത്‌. യഹോവ ഒരിക്ക​ലും അങ്ങനെ ചിന്തി​ക്കു​ന്നില്ല. യഹോവ കുറ്റം വിധി​ക്കു​ന്നതു നിങ്ങ​ളോ​ടു മോശ​മാ​യി പെരു​മാ​റിയ ആളെയാണ്‌, അല്ലാതെ നിങ്ങളെ അല്ല. (1 പത്രോ. 3:12) കുട്ടി​യാ​യി​രു​ന്ന​പ്പോൾ ക്രൂര​മായ പെരു​മാ​റ്റ​ത്തിന്‌ ഇരയായ സാന്ദ്ര പറയുന്നു: “യഹോവ എന്നിൽ കാണുന്ന നല്ല ഗുണങ്ങൾ തിരി​ച്ച​റി​യാൻ എന്നെയും സഹായി​ക്കണേ എന്നു ഞാൻ എപ്പോ​ഴും പ്രാർഥി​ക്കാ​റുണ്ട്‌.”

7. നമ്മുടെ മുൻകാല ജീവി​താ​നു​ഭ​വങ്ങൾ യഹോ​വ​യു​ടെ സേവന​ത്തിൽ എങ്ങനെ നന്നായി ഉപയോ​ഗി​ക്കാം?

⁷ മറ്റുള്ള​വരെ സഹായി​ക്കു​ന്ന​തി​നു​വേണ്ടി യഹോ​വ​യ്‌ക്കു നിങ്ങളെ ഉപയോ​ഗി​ക്കാ​നാ​കും. പ്രസം​ഗ​പ്ര​വർത്ത​ന​ത്തിൽ തന്റെ സഹപ്ര​വർത്ത​ക​രാ​യി​രി​ക്കാ​നുള്ള വലിയ അവസരം യഹോവ നിങ്ങൾക്കു നൽകി​യി​രി​ക്കു​ന്നു. (1 കൊരി. 3:9) നിങ്ങൾ ബുദ്ധി​മു​ട്ടുള്ള പല സാഹച​ര്യ​ങ്ങ​ളി​ലൂ​ടെ കടന്നു​പോ​യ​തു​കൊണ്ട്‌ അതേ സാഹച​ര്യ​ത്തി​ലാ​യി​രി​ക്കുന്ന മറ്റുള്ള​വർക്ക്‌ എന്താണു തോന്നു​ന്ന​തെന്നു നിങ്ങൾക്ക്‌ എളുപ്പം മനസ്സി​ലാ​കും. അതു​കൊ​ണ്ടു​തന്നെ അവരെ സഹായി​ക്കാൻ നിങ്ങൾക്ക്‌ ഒരുപാ​ടു കാര്യങ്ങൾ ചെയ്യാ​നാ​കും. മുമ്പ്‌ കണ്ട ഹെലൻ യഹോ​വ​യു​ടെ​യും സഹോ​ദ​ര​ങ്ങ​ളു​ടെ​യും സഹായം സ്വീക​രി​ച്ചു. ഇപ്പോൾ ഹെലനു മറ്റുള്ള​വരെ സഹായി​ക്കാ​നാ​കു​ന്നുണ്ട്‌. സഹോ​ദരി പറയുന്നു: “വിലയി​ല്ലാ​ത്ത​വ​ളാ​ണെന്ന തോന്നൽ എനിക്ക്‌ എപ്പോ​ഴു​മു​ണ്ടാ​യി​രു​ന്നു. എന്നാൽ എന്നെ സ്‌നേ​ഹി​ക്കു​ന്ന​വ​രു​ണ്ടെ​ന്നും മറ്റുള്ള​വർക്ക്‌ എന്നെ​ക്കൊണ്ട്‌ ഉപകാ​ര​മു​ണ്ടെ​ന്നും എനിക്കു തോന്നാൻ യഹോവ ഇടയാക്കി.” ഹെലൻ ഇപ്പോൾ സന്തോ​ഷ​ത്തോ​ടെ സാധാരണ മുൻനി​ര​സേ​വനം ചെയ്യുന്നു.

യഹോവ ക്ഷമി​ച്ചെന്നു നമ്മൾ അംഗീ​ക​രി​ക്കാൻ യഹോവ ആഗ്രഹി​ക്കു​ന്നു

8. യശയ്യ 1:18-ൽ യഹോവ നമുക്ക്‌ എന്ത്‌ ഉറപ്പു നൽകി​യി​രി​ക്കു​ന്നു?

⁸ യഹോ​വ​യു​ടെ ദാസരിൽ ചിലർ, ചെയ്‌തു​പോയ തെറ്റുകൾ ഓർത്ത്‌ കുറ്റ​ബോ​ധ​ത്താൽ നീറു​ന്ന​വ​രാണ്‌. സ്‌നാ​ന​പ്പെ​ടു​ന്ന​തി​നു മുമ്പോ അതിനു ശേഷ​മോ​പോ​ലും അവർ തെറ്റുകൾ ചെയ്‌തി​ട്ടു​ണ്ടാ​കാം. പക്ഷേ നമ്മൾ ഒരു കാര്യം എപ്പോ​ഴും ഓർക്കണം: നമ്മളെ യഹോവ ഒരുപാട്‌ സ്‌നേ​ഹി​ക്കു​ന്ന​തു​കൊ​ണ്ടും നമ്മളോ​ടു ക്ഷമിക്കാൻ ആഗ്രഹി​ക്കു​ന്ന​തു​കൊ​ണ്ടും ആണ്‌ മോച​ന​വില എന്ന സമ്മാനം നൽകി​യി​രി​ക്കു​ന്നത്‌. ആ സമ്മാനം നമ്മൾ സ്വീക​രി​ക്കാൻത​ന്നെ​യാണ്‌ യഹോവ ആഗ്രഹി​ക്കു​ന്നത്‌. നമ്മൾ യഹോ​വ​യു​മാ​യി ‘കാര്യങ്ങൾ പറഞ്ഞ്‌ നേരെ​യാ​ക്കി​ക്ക​ഴി​ഞ്ഞാൽ’c പിന്നെ ഒരിക്ക​ലും നമ്മുടെ തെറ്റുകൾ ഓർത്തു​വെ​ക്കില്ല എന്ന്‌ യഹോവ ഉറപ്പു​ത​ന്നി​ട്ടുണ്ട്‌. (യശയ്യ 1:18 വായി​ക്കുക.) നമ്മൾ ചെയ്‌തു​പോയ തെറ്റുകൾ യഹോവ പൂർണ​മാ​യും മറന്നു​ക​ള​യു​ന്ന​തിൽ നമ്മൾ എത്ര നന്ദിയു​ള്ള​വ​രാ​ണല്ലേ? അതേസ​മയം, നമ്മൾ ചെയ്‌ത നല്ല കാര്യങ്ങൾ യഹോവ ഒരിക്ക​ലും മറക്കു​ക​യു​മില്ല.—സങ്കീ. 103:9, 12; എബ്രാ. 6:10.

9. കഴിഞ്ഞ കാല​ത്തെ​ക്കു​റിച്ച്‌ ചിന്തി​ച്ചു​കൊ​ണ്ടി​രി​ക്കാ​തെ ഇപ്പോ​ഴ​ത്തെ​യും ഭാവി​യി​ലെ​യും കാര്യ​ങ്ങ​ളെ​ക്കു​റിച്ച്‌ ചിന്തി​ക്കേ​ണ്ടത്‌ എന്തു​കൊണ്ട്‌?

⁹ മുമ്പ്‌ ചെയ്‌ത തെറ്റു​ക​ളെ​ക്കു​റിച്ച്‌ ഓർത്ത്‌ വല്ലാത്ത വിഷമം തോന്നു​ന്നെ​ങ്കിൽ നിങ്ങൾക്ക്‌ എന്തു ചെയ്യാം? മുമ്പ്‌ ചെയ്‌തു​പോയ കാര്യ​ങ്ങ​ളെ​ക്കു​റി​ച്ചല്ല, പകരം ഇപ്പോൾ ചെയ്‌തു​കൊ​ണ്ടി​രി​ക്കുന്ന കാര്യ​ങ്ങ​ളെ​ക്കു​റി​ച്ചും ഭാവി​യിൽ ചെയ്യാ​നാ​കു​ന്ന​തി​നെ​ക്കു​റി​ച്ചും ചിന്തി​ക്കാൻ ശ്രമി​ക്കുക. ഇക്കാര്യ​ത്തിൽ അപ്പോ​സ്‌ത​ല​നായ പൗലോസ്‌ നല്ലൊരു മാതൃ​ക​യാണ്‌. മുമ്പ്‌ ക്രിസ്‌ത്യാ​നി​കളെ ക്രൂര​മാ​യി ഉപദ്ര​വി​ച്ച​തി​നെ​ക്കു​റിച്ച്‌ ഓർത്ത്‌ പൗലോ​സി​നു കുറ്റ​ബോ​ധം തോന്നി​യി​ട്ടുണ്ട്‌. പക്ഷേ, യഹോവ തന്നോടു ക്ഷമി​ച്ചെന്നു പൗലോ​സിന്‌ ഉറപ്പാ​യി​രു​ന്നു. (1 തിമൊ. 1:12-15) അദ്ദേഹം പിന്നെ​യും താൻ ചെയ്‌തു​പോയ തെറ്റു​ക​ളെ​ക്കു​റിച്ച്‌ ഓർത്തു​കൊ​ണ്ടി​രു​ന്നോ? ഒരിക്ക​ലു​മില്ല. ക്രിസ്‌ത്യാ​നി​യാ​കു​ന്ന​തി​നു മുമ്പ്‌ താൻ നേടി​യെ​ടുത്ത കാര്യ​ങ്ങ​ളൊ​ക്കെ വിട്ടു​ക​ള​ഞ്ഞ​തു​പോ​ലെ​തന്നെ അദ്ദേഹം തന്റെ മുൻകാ​ല​തെ​റ്റു​ക​ളും വിട്ടു​ക​ളഞ്ഞു. (ഫിലി. 3:4-8, 13-15) എന്നിട്ടു പൗലോസ്‌, താൻ അപ്പോൾ ചെയ്‌തു​കൊ​ണ്ടി​രുന്ന ശുശ്രൂഷ തീക്ഷ്‌ണ​ത​യോ​ടെ ചെയ്യു​ക​യും ഭാവി​യി​ലേക്ക്‌ ആകാം​ക്ഷ​യോ​ടെ നോക്കു​ക​യും ചെയ്‌തു. നിങ്ങൾക്കും പൗലോ​സി​നെ അനുക​രി​ക്കാം. കഴിഞ്ഞു​പോ​യ​തി​നെ മാറ്റാൻ നിങ്ങൾക്കാ​കില്ല. എന്നാൽ ഇപ്പോൾ നിങ്ങൾക്ക്‌ യഹോ​വയെ സ്‌തു​തി​ക്കാ​നും സന്തോ​ഷി​പ്പി​ക്കാ​നും പറ്റും. അതു​പോ​ലെ ഭാവി​യി​ലേ​ക്കാ​യി യഹോവ നൽകി​യി​രി​ക്കുന്ന വാഗ്‌ദാ​ന​ങ്ങ​ളെ​ക്കു​റിച്ച്‌ ചിന്തി​ക്കാ​നു​മാ​കും.

10. നമ്മൾ മുമ്പ്‌ ചെയ്‌ത ചില കാര്യങ്ങൾ മറ്റുള്ള​വരെ വേദനി​പ്പി​ച്ചി​ട്ടു​ണ്ടെ​ങ്കിൽ നമുക്ക്‌ എന്തു ചെയ്യാം?

¹⁰ നിങ്ങൾ ചെയ്‌തു​പോയ ഒരു കാര്യം മറ്റുള്ള​വരെ വേദനി​പ്പി​ച്ചി​ട്ടു​ണ്ടെ​ങ്കിൽ അത്‌ ഓർത്ത്‌ നിങ്ങളു​ടെ മനസ്സ്‌ വല്ലാതെ വിഷമി​ക്കു​ന്നു​ണ്ടാ​കാം. എങ്കിൽ എന്തു സഹായി​ക്കും? അവർക്കു​ണ്ടായ വേദന കുറയ്‌ക്കാൻ നിങ്ങൾക്കു ചെയ്യാ​നാ​കു​ന്ന​തൊ​ക്കെ ചെയ്യുക. അതിൽ ആത്മാർഥ​മാ​യി ക്ഷമ ചോദി​ക്കു​ന്നത്‌ ഉൾപ്പെ​ടും. (2 കൊരി. 7:11) ഇനി, നമ്മൾ കാരണം വേദന അനുഭ​വി​ക്കേ​ണ്ടി​വ​ന്ന​വരെ സഹായി​ക്കണേ എന്ന്‌ യഹോ​വ​യോ​ടു പ്രാർഥി​ക്കുക. സഹിച്ചു​നിൽക്കാ​നും മനസ്സമാ​ധാ​നം വീണ്ടെ​ടു​ക്കാ​നും നിങ്ങ​ളെ​യും അവരെ​യും സഹായി​ക്കാൻ യഹോ​വ​യ്‌ക്കാ​കും.

11. പ്രവാ​ച​ക​നായ യോന​യു​ടെ മാതൃ​ക​യിൽനിന്ന്‌ നമുക്ക്‌ എന്തു പഠിക്കാം? (ചിത്ര​വും കാണുക.)

¹¹ ചെയ്‌തു​പോയ തെറ്റു​ക​ളിൽനിന്ന്‌ പാഠം പഠിക്കുക; എന്നിട്ട്‌ യഹോവ തരുന്ന ഏതൊരു നിയമ​ന​വും ചെയ്യാൻ തയ്യാറാ​കുക. യോന പ്രവാ​ച​കന്റെ ജീവിതം അതാണു നമ്മളെ പഠിപ്പി​ക്കു​ന്നത്‌. യഹോവ പറഞ്ഞത​നു​സ​രിച്ച്‌ നിനെ​വെ​യി​ലേക്കു പോകു​ന്ന​തി​നു പകരം, യോന നേരെ എതിർദി​ശ​യി​ലേക്ക്‌ ഓടി​പ്പോ​യി. അതിന്‌ യഹോവ യോനയെ ശിക്ഷിച്ചു. അദ്ദേഹം തനിക്കു പറ്റിയ തെറ്റിൽനിന്ന്‌ പാഠം പഠിക്കു​ക​യും ചെയ്‌തു. (യോന 1:1-4, 15-17; 2:7-10) ഒരു തെറ്റു ചെയ്‌തെന്ന്‌ ഓർത്ത്‌, യഹോവ യോനയെ പ്രവാ​ച​ക​നാ​യി ഉപയോ​ഗി​ക്കു​ന്നതു നിറു​ത്തി​യോ? ഇല്ല. നിനെ​വെ​യി​ലേക്കു പോകാൻ ദൈവം അദ്ദേഹ​ത്തിന്‌ ഒരു അവസരം​കൂ​ടെ കൊടു​ത്തു. ഇത്തവണ യോന പെട്ടെ​ന്നു​തന്നെ അനുസ​രി​ച്ചു. ചെയ്‌തു​പോയ തെറ്റി​നെ​ക്കു​റിച്ച്‌ യോന​യ്‌ക്കു കുറ്റ​ബോ​ധ​മു​ണ്ടാ​യി​രു​ന്നു. പക്ഷേ യഹോവ കൊടുത്ത നിയമനം സ്വീക​രി​ക്കു​ന്ന​തിൽനിന്ന്‌ തന്നെ തടയാൻ അദ്ദേഹം ആ കുറ്റ​ബോ​ധത്തെ അനുവ​ദി​ച്ചില്ല.—യോന 3:1-3.

യഹോവ പരിശു​ദ്ധാ​ത്മാ​വി​ലൂ​ടെ നമ്മളെ ആശ്വസി​പ്പി​ക്കു​ന്നു

12. നമ്മളെ പിടി​ച്ചു​ല​യ്‌ക്കുന്ന ഒരു ദുരന്തം ജീവി​ത​ത്തി​ലു​ണ്ടാ​കു​മ്പോൾ യഹോവ എങ്ങനെ​യാണ്‌ നമുക്കു സമാധാ​നം തരുന്നത്‌? (ഫിലി​പ്പി​യർ 4:6, 7)

¹² നമ്മളെ പിടി​ച്ചു​ല​യ്‌ക്കുന്ന ഒരു ദുരന്തം ജീവി​ത​ത്തി​ലു​ണ്ടാ​കു​മ്പോൾ തന്റെ പരിശു​ദ്ധാ​ത്മാ​വി​നെ ഉപയോ​ഗിച്ച്‌ യഹോവ നമ്മളെ ആശ്വസി​പ്പി​ക്കും. റോണി​ന്റെ​യും ക്യാര​ളി​ന്റെ​യും അനുഭവം നോക്കാം. മകൻ ആത്മഹത്യ ചെയ്‌ത​പ്പോൾ തങ്ങൾ കടന്നു​പോയ സാഹച​ര്യ​ത്തെ​ക്കു​റിച്ച്‌ അവർ പറയുന്നു: “പല തരത്തി​ലുള്ള ബുദ്ധി​മു​ട്ടു​കൾ ഞങ്ങൾക്കു മുമ്പും നേരി​ടേ​ണ്ടി​വ​ന്നി​ട്ടുണ്ട്‌. പക്ഷേ ഇതു​പോ​ലെ തകർന്നു​പോയ ഒരു സാഹച​ര്യം ഉണ്ടായി​ട്ടേ​യില്ല. പല രാത്രി​ക​ളി​ലും ഉറങ്ങാൻ കഴിയാ​തെ ഞങ്ങൾ യഹോ​വ​യോ​ടു പ്രാർഥി​ച്ചു​കൊ​ണ്ടേ​യി​രു​ന്നു. അപ്പോൾ ഫിലി​പ്പി​യർ 4:6, 7-ൽ (വായി​ക്കുക.) പറയുന്ന ദൈവ​സ​മാ​ധാ​നം ഞങ്ങൾക്കു ശരിക്കും അനുഭ​വി​ച്ച​റി​യാൻ കഴിഞ്ഞു.” ഹൃദയം തകർന്നു​പോ​കുന്ന ഒരു സാഹച​ര്യ​ത്തി​ലൂ​ടെ​യാണ്‌ നിങ്ങൾ കടന്നു​പോ​കു​ന്ന​തെ​ങ്കിൽ നിങ്ങൾക്ക്‌ എന്താണു തോന്നു​ന്ന​തെന്നു പ്രാർഥ​ന​യിൽ യഹോ​വ​യോ​ടു തുറന്നു​പ​റ​യുക. എത്ര കൂടെ​ക്കൂ​ടെ വേണ​മെ​ങ്കി​ലും എത്ര സമയം വേണ​മെ​ങ്കി​ലും നിങ്ങൾക്ക്‌ യഹോ​വ​യോ​ടു പ്രാർഥി​ക്കാം. (സങ്കീ. 86:3; 88:1) പരിശു​ദ്ധാ​ത്മാ​വി​നാ​യി വീണ്ടും​വീ​ണ്ടും യാചി​ച്ചു​കൊ​ണ്ടി​രി​ക്കുക. യഹോവ ഒരിക്ക​ലും നിങ്ങളു​ടെ അപേക്ഷ തള്ളിക്ക​ള​യില്ല.—ലൂക്കോ. 11:9-13.

13. വിശ്വ​സ്‌ത​മാ​യി യഹോ​വയെ സേവി​ക്കു​ന്ന​തിൽ തുടരാൻ പരിശു​ദ്ധാ​ത്മാവ്‌ നിങ്ങളെ സഹായി​ക്കു​ന്നത്‌ എങ്ങനെ? (എഫെസ്യർ 3:16)

¹³ ജീവി​ത​ത്തി​ലു​ണ്ടായ ഒരു പ്രശ്‌നം കാരണം നിങ്ങൾ ആകെ തളർന്നു​പോ​യോ? എങ്കിൽ, യഹോ​വയെ തുടർന്നും വിശ്വ​സ്‌ത​മാ​യി സേവി​ക്കാൻവേണ്ട ശക്തി നിങ്ങൾക്കു തരാൻ പരിശു​ദ്ധാ​ത്മാ​വി​നു കഴിയും. (എഫെസ്യർ 3:16 വായി​ക്കുക.) അതു​പോ​ലൊ​രു സാഹച​ര്യ​ത്തി​ലാ​യി​രു​ന്നു ഫ്ലോറ സഹോ​ദരി. സഹോ​ദ​രി​യും ഭർത്താ​വും മിഷന​റി​മാ​രാ​യി സേവി​ക്കു​ക​യാ​യി​രു​ന്നു. അങ്ങനെ​യി​രി​ക്കെ ഭർത്താവ്‌ സഹോ​ദ​രി​യോട്‌ അവിശ്വ​സ്‌തത കാണി​ക്കു​ക​യും അതു വിവാ​ഹ​മോ​ച​ന​ത്തിൽ ചെന്നെ​ത്തു​ക​യും ചെയ്‌തു. ഫ്ലോറ പറയുന്നു: “അദ്ദേഹം എന്നെ വഞ്ചിച്ചു എന്ന ചിന്ത എനിക്കു താങ്ങാ​വു​ന്ന​തി​നും അപ്പുറ​മാ​യി​രു​ന്നു. അത്‌ എന്നെ കാർന്നു​തി​ന്നു​ക​യാ​യി​രു​ന്നു എന്നു വേണ​മെ​ങ്കിൽ പറയാം. സഹിച്ചു​നിൽക്കു​ന്ന​തി​നു പരിശു​ദ്ധാ​ത്മാ​വി​നെ തരണേ എന്നു ഞാൻ യഹോ​വ​യോ​ടു പ്രാർഥി​ച്ചു. യഹോവ എന്നെ ആശ്വസി​പ്പി​ച്ചു; ഒരിക്ക​ലും മറിക​ട​ക്കാൻ പറ്റി​ല്ലെന്നു തുടക്ക​ത്തിൽ തോന്നിയ ആ സാഹച​ര്യ​വു​മാ​യി ഒത്തു​പോ​കാൻവേണ്ട ശക്തി എനിക്കു നൽകി.” യഹോ​വ​യിൽ കൂടു​തൽക്കൂ​ടു​തൽ ആശ്രയി​ക്കാ​നും, ഭാവി​യിൽ എന്തു പ്രശ്‌ന​മു​ണ്ടാ​യാ​ലും യഹോവ കൂടെ​യു​ണ്ടാ​കു​മെന്ന ബോധ്യം ശക്തമാ​ക്കാ​നും തന്നെ ദൈവം സഹായി​ച്ച​താ​യി ഫ്ലോറയ്‌ക്കു തോന്നി. സഹോ​ദരി തുടർന്നു പറയുന്നു: “സങ്കീർത്തനം 119:32-ലെ ഈ വാക്കുകൾ എന്റെ കാര്യ​ത്തിൽ സത്യമാ​യി​രു​ന്നു. ‘ഞാൻ ഉത്സാഹ​ത്തോ​ടെ അങ്ങയുടെ കല്പനകൾ പിൻപ​റ്റും. അങ്ങ്‌ എന്റെ ഹൃദയ​ത്തിൽ അവയ്‌ക്കാ​യി ഇടമൊ​രു​ക്കു​ന്ന​ല്ലോ.’”

14. ദൈവാ​ത്മാവ്‌ നമ്മളിൽ പ്രവർത്തി​ക്കാൻ നമ്മൾ എന്തു ചെയ്യണം?

¹⁴ പരിശു​ദ്ധാ​ത്മാ​വി​നു​വേണ്ടി പ്രാർഥിച്ച്‌ കഴിഞ്ഞാൽപ്പി​ന്നെ നിങ്ങൾ എന്തു ചെയ്യണം? ദൈവാ​ത്മാവ്‌ നിങ്ങളിൽ പ്രവർത്തി​ക്കാൻ ഇടയാ​ക്കുന്ന കാര്യങ്ങൾ ചെയ്യുക. അതിൽ മീറ്റി​ങ്ങു​കൾക്കു പോകു​ന്ന​തും പ്രസം​ഗ​പ്ര​വർത്തനം ചെയ്യു​ന്ന​തും ഒക്കെ ഉൾപ്പെ​ടും. കൂടാതെ എന്നും ദൈവ​വ​ചനം വായി​ച്ചു​കൊണ്ട്‌ യഹോ​വ​യു​ടെ ചിന്തക​ളാൽ മനസ്സ്‌ നിറയ്‌ക്കുക. (ഫിലി. 4:8, 9) ബൈബിൾ വായി​ക്കു​മ്പോൾ, പ്രശ്‌നങ്ങൾ നേരിട്ട ബൈബിൾക​ഥാ​പാ​ത്ര​ങ്ങളെ ശ്രദ്ധി​ക്കുക; വിശ്വ​സ്‌ത​മാ​യി സഹിച്ചു​നിൽക്കാൻ യഹോവ അവരെ എങ്ങനെ​യാ​ണു സഹായി​ച്ചത്‌ എന്നതി​നെ​ക്കു​റിച്ച്‌ ചിന്തി​ക്കുക. മുമ്പ്‌ പറഞ്ഞ സാന്ദ്ര​യ്‌ക്കു പല തരത്തി​ലുള്ള പ്രശ്‌നങ്ങൾ നേരി​ടേ​ണ്ടി​വ​ന്നി​ട്ടുണ്ട്‌. സഹോ​ദരി പറയുന്നു: “യോ​സേ​ഫി​നെ​ക്കു​റി​ച്ചുള്ള ബൈബിൾവി​വ​രണം എനിക്കു ശരിക്കും പ്രോ​ത്സാ​ഹനം തരുന്നു. തനിക്കു നേരി​ടേ​ണ്ടി​വന്ന പ്രശ്‌ന​ങ്ങ​ളോ അനീതി​ക​ളോ ഒന്നും യഹോ​വ​യു​മാ​യുള്ള തന്റെ ബന്ധത്തെ ദുർബ​ല​മാ​ക്കാൻ യോ​സേഫ്‌ അനുവ​ദി​ച്ചില്ല.”—ഉൽപ. 39:21-23.

സഹോ​ദ​ര​ങ്ങളെ ഉപയോ​ഗിച്ച്‌ യഹോവ ആശ്വസി​പ്പി​ക്കു​ന്നു

15. നമുക്ക്‌ ആരിൽനിന്ന്‌ ആശ്വാസം ലഭിക്കും, അവർ നമ്മളെ എങ്ങനെ സഹായി​ക്കും? (ചിത്ര​വും കാണുക.)

¹⁵ പ്രയാ​സങ്ങൾ അനുഭ​വി​ക്കുന്ന സമയത്ത്‌ സഹവി​ശ്വാ​സി​കൾ നമുക്കു “വലിയ ഒരു ആശ്വാ​സ​മാണ്‌.” (കൊലോ. 4:11) സഹോ​ദ​ര​ങ്ങ​ളി​ലൂ​ടെ നമുക്ക്‌ യഹോ​വ​യു​ടെ സ്‌നേഹം അനുഭ​വി​ച്ച​റി​യാ​നാ​കും. നമ്മളോ​ടൊ​പ്പം സമയം ചെലവ​ഴി​ച്ചു​കൊ​ണ്ടും നമ്മൾ പറയു​ന്നതു ശ്രദ്ധ​യോ​ടെ കേട്ടു​കൊ​ണ്ടും സഹോ​ദ​രങ്ങൾ നമ്മളെ ആശ്വസി​പ്പി​ക്കും. അവർ ബൈബിൾവാ​ക്യ​ങ്ങൾ ഉപയോ​ഗിച്ച്‌ നമ്മളെ പ്രോ​ത്സാ​ഹി​പ്പി​ക്കു​ക​യോ നമ്മളോ​ടൊ​പ്പം പ്രാർഥി​ക്കു​ക​യോ ഒക്കെ ചെയ്‌തേ​ക്കാം.d (റോമ. 15:4) ചില​പ്പോൾ ഒരു കാര്യ​ത്തെ​ക്കു​റിച്ച്‌ യഹോ​വ​യു​ടെ ചിന്ത മനസ്സി​ലാ​ക്കാ​നും അങ്ങനെ സമനി​ല​യോ​ടെ മുന്നോ​ട്ടു​പോ​കാ​നും ഒരു സഹോ​ദ​ര​നോ സഹോ​ദ​രി​ക്കോ നമ്മളെ സഹായി​ക്കാ​നാ​കും. ഇനി, നമ്മൾ നിരാ​ശ​പ്പെ​ട്ടി​രി​ക്കു​മ്പോൾ ഒരു നേരത്തെ ഭക്ഷണം ഉണ്ടാക്കി​ത്ത​രു​ന്ന​തു​പോ​ലെ എന്തെങ്കി​ലു​മൊ​ക്കെ സഹായങ്ങൾ ചെയ്‌തു​ത​രാ​നും അവർക്കു കഴിയും.

16. മറ്റുള്ള​വ​രു​ടെ സഹായം ലഭിക്കാൻ നമ്മൾ എന്താണു ചെയ്യേ​ണ്ടത്‌?

¹⁶ മറ്റുള്ള​വ​രിൽനിന്ന്‌ സഹായം കിട്ടാൻ നമ്മൾ ചില​പ്പോൾ സഹായം ചോദി​ക്കേ​ണ്ട​തു​ണ്ടാ​യി​രി​ക്കാം. സഹോ​ദ​രങ്ങൾ നമ്മളെ സ്‌നേ​ഹി​ക്കു​ന്നുണ്ട്‌, സഹായി​ക്കാൻ ആഗ്രഹി​ക്കു​ന്നു​മുണ്ട്‌. (സുഭാ. 17:17) പക്ഷേ നമുക്ക്‌ എന്താണു തോന്നു​ന്ന​തെ​ന്നോ, എന്താണു വേണ്ട​തെ​ന്നോ അവർക്ക്‌ അറിയാൻ കഴി​ഞ്ഞെ​ന്നു​വ​രില്ല. (സുഭാ. 14:10) നിങ്ങളു​ടെ മനസ്സ്‌ വേദനി​ച്ചി​രി​ക്കു​ക​യാ​ണെ​ങ്കിൽ നിങ്ങൾക്ക്‌ എന്താണു തോന്നു​ന്ന​തെന്നു പക്വത​യുള്ള കൂട്ടു​കാ​രോ​ടു തുറന്നു​പ​റ​യാൻ തയ്യാറാ​കുക. എങ്കിലേ നിങ്ങളെ സഹായി​ക്കാൻ എന്താണു ചെയ്യേ​ണ്ട​തെന്ന്‌ അവർക്കു മനസ്സി​ലാ​കു​ക​യു​ള്ളൂ. ചില​പ്പോൾ നിങ്ങൾക്ക്‌ അടുപ്പ​മുള്ള ഒന്നോ രണ്ടോ മൂപ്പന്മാ​രോ​ടാ​യി​രി​ക്കും നിങ്ങൾ സംസാ​രി​ക്കാൻ തീരു​മാ​നി​ക്കു​ന്നത്‌. ഇനി ചില സഹോ​ദ​രി​മാർക്കു പക്വത​യുള്ള മറ്റൊരു സഹോ​ദ​രി​യോട്‌ ഉള്ളുതു​റ​ക്കു​ന്നതു കൂടുതൽ എളുപ്പ​മാ​യി തോന്നി​യി​ട്ടുണ്ട്‌.

17. ഏതു കാര്യങ്ങൾ പ്രോ​ത്സാ​ഹനം സ്വീക​രി​ക്കു​ന്ന​തി​നു നമു​ക്കൊ​രു തടസ്സമാ​യേ​ക്കാം, നമുക്ക്‌ എങ്ങനെ അതിനെ മറിക​ട​ക്കാം?

¹⁷ നിങ്ങ​ളെ​ത്തന്നെ ഒറ്റപ്പെ​ടു​ത്താ​നുള്ള തോന്ന​ലി​നെ മറിക​ട​ക്കുക. മനസ്സ്‌ ആകെ അസ്വസ്ഥ​മാ​യി​രി​ക്കുന്ന സമയത്ത്‌ മറ്റുള്ള​വ​രോ​ടൊ​പ്പം ആയിരി​ക്കാ​നോ അവരോ​ടു സംസാ​രി​ക്കാ​നോ ഒന്നും നമുക്കു തോന്നി​ല്ലാ​യി​രി​ക്കും. ചില​പ്പോൾ സഹോ​ദ​ര​ങ്ങൾക്കു നിങ്ങളു​ടെ സാഹച​ര്യം മനസ്സി​ലാ​കാ​തെ പോകു​ക​യോ അല്ലെങ്കിൽ അവർ പറഞ്ഞത്‌ എന്തെങ്കി​ലും നിങ്ങളെ വേദനി​പ്പി​ക്കു​ക​യോ ഒക്കെ ചെയ്‌തി​ട്ടു​ണ്ടാ​കാം. (യാക്കോ. 3:2) പക്ഷേ ആ കാരണ​ങ്ങൾകൊ​ണ്ടൊ​ന്നും സഹോ​ദ​ര​ങ്ങ​ളിൽനിന്ന്‌ ഒഴിഞ്ഞു​മാ​റി നിൽക്ക​രുത്‌. നിങ്ങളെ പ്രോ​ത്സാ​ഹി​പ്പി​ക്കാൻ യഹോ​വ​യ്‌ക്ക്‌ അവരെ ഉപയോ​ഗി​ക്കാ​നാ​കും. വിഷാ​ദ​ത്തി​ന്റെ ബുദ്ധി​മു​ട്ടു​കൾ അനുഭ​വി​ക്കുന്ന ഗ്യാവിൻ എന്ന മൂപ്പൻ പറയുന്നു: “മിക്ക​പ്പോ​ഴും കൂട്ടു​കാ​രോ​ടൊ​പ്പം ആയിരി​ക്കാ​നോ അവരോ​ടു സംസാ​രി​ക്കാ​നോ എനിക്കു തോന്നാ​റേ​യില്ല.” എങ്കിലും ഗ്യാവിൻ, സഹോ​ദ​ര​ങ്ങ​ളോ​ടൊ​പ്പം ആയിരി​ക്കാൻ പ്രത്യേ​ക​ശ്രമം ചെയ്‌തു. അങ്ങനെ ചെയ്‌ത​പ്പോ​ഴെ​ല്ലാം സഹോ​ദ​രന്‌ ആശ്വാസം തോന്നി. ആമി എന്ന ഒരു സഹോ​ദരി പറയുന്നു: “മുമ്പു​ണ്ടായ ചില അനുഭ​വങ്ങൾ കാരണം എനിക്ക്‌ ആളുകളെ വിശ്വ​സി​ക്കാൻ ബുദ്ധി​മു​ട്ടാണ്‌. പക്ഷേ യഹോ​വയെ അനുക​രി​ച്ചു​കൊണ്ട്‌ എന്റെ സഹോ​ദ​ര​ങ്ങളെ സ്‌നേ​ഹി​ക്കാ​നും വിശ്വ​സി​ക്കാ​നും ഞാൻ ഇപ്പോൾ പഠിക്കു​ന്നു. അത്‌ യഹോ​വയെ സന്തോ​ഷി​പ്പി​ക്കും. എനിക്കും സന്തോഷം തരും. അക്കാര്യം എനിക്ക്‌ ഉറപ്പാണ്‌.”

ഭാവി​യെ​ക്കു​റി​ച്ചുള്ള യഹോ​വ​യു​ടെ വാഗ്‌ദാ​നങ്ങൾ നമ്മളെ ആശ്വസി​പ്പി​ക്കും

18. നമുക്ക്‌ എന്തിനാ​യി നോക്കി​യി​രി​ക്കാം, നമുക്ക്‌ ഇപ്പോൾ എന്തു ചെയ്യാം?

¹⁸ നമുക്കു ശാരീ​രി​ക​മാ​യും വൈകാ​രി​ക​മാ​യും വേദന​യു​ണ്ടാ​ക്കുന്ന എല്ലാ കാര്യ​ങ്ങ​ളും യഹോവ പെട്ടെ​ന്നു​തന്നെ, പൂർണ​മാ​യി നീക്കി​ക്ക​ള​യും. (വെളി. 21:3, 4) ഇന്നു നമ്മൾ അനുഭ​വി​ക്കുന്ന വിഷമ​ങ്ങ​ളൊ​ന്നും അന്ന്‌ നമ്മുടെ ‘ഹൃദയ​ത്തിൽ ഉണ്ടായി​രി​ക്കില്ല.’ (യശ. 65:17) എന്നാൽ നമ്മൾ കണ്ടതു​പോ​ലെ യഹോവ ഇപ്പോൾത്തന്നെ നമ്മുടെ “മുറി​വു​കൾ വെച്ചു​കെ​ട്ടു​ന്നു.” നമ്മളെ സഹായി​ക്കാ​നും ആശ്വസി​പ്പി​ക്കാ​നും ആയി യഹോവ സ്‌നേ​ഹ​ത്തോ​ടെ ചെയ്‌തി​രി​ക്കുന്ന എല്ലാ കാര്യ​ങ്ങ​ളും പരമാ​വധി പ്രയോ​ജ​ന​പ്പെ​ടു​ത്തുക. ‘ദൈവ​ത്തി​നു നിങ്ങ​ളെ​ക്കു​റിച്ച്‌ ചിന്തയു​ണ്ടോ’ എന്ന്‌ ഒരു നിമി​ഷം​പോ​ലും സംശയി​ക്ക​രുത്‌.—1 പത്രോ. 5:7.