യഹോവ നിങ്ങ​ളോ​ടു ക്ഷമി​ച്ചെന്ന്‌ അംഗീ​ക​രി​ക്കു​ക

1-2. യഹോവ നമ്മുടെ തെറ്റുകൾ ക്ഷമി​ച്ചെന്ന്‌ അറിയു​മ്പോൾ നമുക്ക്‌ എന്തു തോന്നും? (ചിത്ര​വും കാണുക.)

ചെയ്‌തു​പോയ തെറ്റു​ക​ളെ​ക്കു​റി​ച്ചുള്ള കുറ്റ​ബോ​ധം എത്ര വേദനാ​ക​ര​മാ​ണെന്ന്‌ ദാവീദ്‌ രാജാ​വിന്‌ അറിയാ​മാ​യി​രു​ന്നു. (സങ്കീ. 40:12; 51:3; മേലെ​ഴുത്ത്‌) അദ്ദേഹം ഗുരു​ത​ര​മായ ചില തെറ്റുകൾ ചെയ്‌തു​പോ​യി​ട്ടുണ്ട്‌. എങ്കിലും ദാവീദ്‌ ആത്മാർഥ​മാ​യി പശ്ചാത്ത​പി​ച്ച​പ്പോൾ യഹോവ അദ്ദേഹ​ത്തോട്‌ ക്ഷമിച്ചു. (2 ശമു. 12:13) അതു​കൊണ്ട്‌ യഹോ​വ​യു​ടെ ക്ഷമ ലഭിക്കു​മ്പോൾ തോന്നുന്ന ആശ്വാസം എത്ര വലുതാ​ണെ​ന്നും ദാവീ​ദിന്‌ അറിയാ​മാ​യി​രു​ന്നു.—സങ്കീ. 32:1.

² ദാവീ​ദി​നെ​പ്പോ​ലെ യഹോ​വ​യിൽനി​ന്നുള്ള കരുണ കിട്ടു​മ്പോ​ഴുള്ള സമാധാ​നം നിങ്ങൾക്കും അനുഭ​വി​ച്ച​റി​യാൻ കഴിയും. നമ്മുടെ പാപങ്ങൾ, അത്‌ ഗുരു​ത​ര​മാ​ണെ​ങ്കിൽപ്പോ​ലും ആത്മാർഥ​മാ​യി പശ്ചാത്ത​പി​ക്കു​ക​യും തെറ്റുകൾ ഏറ്റുപ​റ​യു​ക​യും അത്‌ ആവർത്തി​ക്കാ​തി​രി​ക്കാൻ പരമാ​വധി ശ്രമി​ക്കു​ക​യും ചെയ്‌താൽ യഹോവ ക്ഷമിക്കാൻ തയ്യാറാണ്‌. അത്‌ എത്ര ആശ്വാസം തരുന്ന ഒന്നാണ്‌ അല്ലേ! (സുഭാ. 28:13; പ്രവൃ. 26:20; 1 യോഹ. 1:9) അതു​പോ​ലെ യഹോവ ഒരു തെറ്റ്‌ ക്ഷമിക്കു​മ്പോൾ അത്‌ ഒരിക്ക​ലും സംഭവി​ച്ചി​ട്ടി​ല്ലാ​ത്ത​തു​പോ​ലെ അത്ര പൂർണ​മാ​യി ക്ഷമിക്കു​മെന്ന്‌ അറിയു​ന്ന​തും നമുക്ക്‌ എത്ര സന്തോഷം തരുന്നു!—യഹ. 33:16.

3-4. സ്‌നാ​ന​പ്പെ​ട്ട​തി​നു ശേഷം ഒരു സഹോ​ദ​രിക്ക്‌ എന്തു തോന്നി, നമ്മൾ ഈ ലേഖന​ത്തിൽ എന്തു പഠിക്കും?

³ എങ്കിലും യഹോവ ക്ഷമിച്ചെന്ന കാര്യം അംഗീ​ക​രി​ക്കാൻ ചിലർക്കെ​ങ്കി​ലും ബുദ്ധി​മുട്ട്‌ തോന്നാം. അതാണ്‌ ജെനി​ഫ​റി​ന്റെ അനുഭവം കാണി​ക്കു​ന്നത്‌. സത്യത്തി​ലാണ്‌ വളർന്നു​വ​ന്ന​തെ​ങ്കി​ലും കൗമാ​ര​ത്തിൽ എത്തിയ​തോ​ടെ അവൾ തെറ്റായ പല കാര്യ​ങ്ങ​ളും ചെയ്യു​ക​യും അത്‌ മാതാ​പി​താ​ക്ക​ളിൽനിന്ന്‌ മറച്ചു​വെ​ക്കു​ക​യും ചെയ്‌തു. വർഷങ്ങൾക്കു ശേഷം അവൾ യഹോ​വ​യി​ലേക്കു തിരി​ച്ചു​വന്നു; പുരോ​ഗ​മിച്ച്‌ സ്‌നാ​ന​മേറ്റു. ജെനിഫർ പറയുന്നു: “മുമ്പ്‌ തീർത്തും വഴിവിട്ട ഒരു ജീവി​ത​മാ​യി​രു​ന്നു എന്റേത്‌. ഞാൻ ലൈം​ഗിക അധാർമി​ക​ത​യിൽ ഏർപ്പെട്ടു; ഒരുപാട്‌ കുടി​ക്കു​ക​യും വല്ലാതെ ദേഷ്യ​പ്പെ​ടു​ക​യും ചെയ്‌തി​രു​ന്നു; അതു​പോ​ലെ പണമാ​യി​രു​ന്നു എനിക്ക്‌ എല്ലാം. പിന്നീട്‌ ഞാൻ ക്ഷമയ്‌ക്കാ​യി യാചി​ക്കു​ക​യും മാനസാ​ന്ത​ര​പ്പെ​ടു​ക​യും ചെയ്‌ത​തു​കൊണ്ട്‌ യേശു​വി​ന്റെ ബലിയു​ടെ അടിസ്ഥാ​ന​ത്തിൽ യഹോ​വ​യ്‌ക്ക്‌ എന്നോടു ക്ഷമിക്കാ​നാ​കു​മെന്ന്‌ എനിക്ക്‌ അറിയാ​മാ​യി​രു​ന്നു. എങ്കിലും യഹോവ എന്നോട്‌ ക്ഷമി​ച്ചെന്ന്‌ എന്റെ ഹൃദയത്തെ ബോധ്യ​പ്പെ​ടു​ത്താൻ എനിക്കു കഴിയു​ന്നു​ണ്ടാ​യി​രു​ന്നില്ല.”

⁴ മുമ്പ്‌ ചെയ്‌തു​പോയ തെറ്റുകൾ യഹോവ ക്ഷമി​ച്ചെന്ന്‌ വിശ്വ​സി​ക്കാൻ നിങ്ങൾക്കു ചില​പ്പോ​ഴെ​ങ്കി​ലും ബുദ്ധി​മുട്ട്‌ തോന്നാ​റു​ണ്ടോ? ദൈവം നമ്മളോ​ടു കരുണ കാണി​ച്ചെന്നു ദാവീ​ദി​നെ​പ്പോ​ലെ നമ്മളും ഉറച്ചു​വി​ശ്വ​സി​ക്കാൻ ദൈവം ആഗ്രഹി​ക്കു​ന്നു. ഈ ലേഖന​ത്തിൽ, യഹോവ ക്ഷമി​ച്ചെന്ന്‌ നമ്മൾ അംഗീ​ക​രി​ക്കേ​ണ്ടത്‌ എന്തു​കൊ​ണ്ടാ​ണെ​ന്നും അതിനു നമ്മളെ എന്തു സഹായി​ക്കു​മെ​ന്നും കാണും.

യഹോവ ക്ഷമി​ച്ചെന്ന്‌ നമ്മൾ അംഗീ​ക​രി​ക്കേ​ണ്ടത്‌ എന്തു​കൊണ്ട്‌?

5. നമ്മൾ എന്തു വിശ്വ​സി​ക്കണം എന്നാണ്‌ സാത്താന്റെ ആഗ്രഹം? ഒരു ഉദാഹ​രണം പറയുക.

⁵ യഹോവ ക്ഷമി​ച്ചെന്ന്‌ അംഗീ​ക​രി​ക്കു​ന്നെ​ങ്കിൽ സാത്താന്റെ ഒരു കെണി​യിൽ വീഴു​ന്നത്‌ ഒഴിവാ​ക്കാ​നാ​കും. നമ്മൾ യഹോ​വയെ സേവി​ക്കു​ന്നത്‌ നിറു​ത്തണം എന്നാണ്‌ സാത്താന്റെ ആഗ്രഹം. ആ ലക്ഷ്യം നേടാൻ അവൻ ഏതു തന്ത്രവും ഉപയോ​ഗി​ക്കും. നമ്മുടെ തെറ്റുകൾ ഒരിക്ക​ലും ക്ഷമിച്ചു​കി​ട്ടി​ല്ലെന്ന്‌ നമ്മളെ വിശ്വ​സി​പ്പി​ക്കു​ന്നത്‌ അതിൽ ഒന്നാണ്‌. കൊരിന്ത്‌ സഭയിൽ ഉണ്ടായ ഒരു സംഭവം നോക്കാം. ലൈം​ഗിക അധാർമി​ക​ത​യിൽ ഏർപ്പെ​ട്ട​തു​കൊണ്ട്‌ ആ സഭയിൽനിന്ന്‌ ഒരാളെ നീക്കം ചെയ്‌തു. (1 കൊരി. 5:1, 5, 13) എന്നാൽ പിന്നീട്‌ അയാൾ മാനസാ​ന്ത​ര​പ്പെട്ട്‌ തിരി​ച്ചു​വ​ന്ന​പ്പോൾ സാത്താൻ ആഗ്രഹി​ച്ചത്‌, സഭയിലെ സഹോ​ദ​രങ്ങൾ അദ്ദേഹ​ത്തോട്‌ ക്ഷമിക്ക​രു​തെ​ന്നും സഭയി​ലേക്ക്‌ ആ വ്യക്തിയെ സ്വാഗതം ചെയ്യരു​തെ​ന്നും ആണ്‌. അതിലൂ​ടെ ആ വ്യക്തി, തന്റെ തെറ്റ്‌ ഒരിക്ക​ലും ക്ഷമിച്ചു​കി​ട്ടാ​ത്ത​താണ്‌ എന്നു ചിന്തി​ക്കാ​നും അങ്ങനെ ‘കടുത്ത ദുഃഖ​ത്തിൽ ആണ്ടു​പോ​യിട്ട്‌’ യഹോ​വയെ സേവി​ക്കു​ന്നത്‌ നിറു​ത്താ​നും സാത്താൻ ആഗ്രഹി​ച്ചു. ഇന്നും അവന്റെ ലക്ഷ്യത്തി​നും കെണി​കൾക്കും ഒരു മാറ്റവും വന്നിട്ടില്ല. എങ്കിലും “നമ്മൾ സാത്താന്റെ തന്ത്രങ്ങൾ അറിയാ​ത്ത​വരല്ല.”—2 കൊരി. 2:5-11.

6. കുറ്റ​ബോ​ധ​ത്തി​ന്റെ ഭാരം ഒഴിവാ​ക്കാൻ നമുക്ക്‌ എന്തു ചെയ്യാ​നാ​കും?

⁶ യഹോവ ക്ഷമി​ച്ചെന്ന്‌ അംഗീ​ക​രി​ക്കു​ന്നെ​ങ്കിൽ കുറ്റ​ബോ​ധ​ത്തി​ന്റെ ഭാരം നിങ്ങൾക്കു ചുമ​ക്കേ​ണ്ടി​വ​രില്ല. തെറ്റു ചെയ്യു​മ്പോൾ കുറ്റ​ബോ​ധം തോന്നു​ന്നതു സ്വാഭാ​വി​ക​മാണ്‌. (സങ്കീ. 51:17) അതു നല്ലതു​മാണ്‌. കാരണം തെറ്റു തിരു​ത്താൻ വേണ്ട കാര്യങ്ങൾ ചെയ്യാൻ നമ്മളെ പ്രേരി​പ്പി​ക്കു​ന്നത്‌ അതാണ്‌. (2 കൊരി. 7:10, 11) എങ്കിലും മാനസാ​ന്ത​ര​പ്പെട്ട്‌ കുറെ നാൾ കഴിഞ്ഞും ആ കുറ്റ​ബോ​ധം നമ്മൾ മനസ്സിൽ കൊണ്ടു​ന​ട​ക്കു​ക​യാ​ണെ​ങ്കിൽ നമ്മൾ മടുത്ത്‌ യഹോ​വയെ സേവി​ക്കു​ന്നത്‌ നിറു​ത്താൻ ഇടയുണ്ട്‌. പക്ഷേ യഹോ​വ​യു​ടെ ക്ഷമ അംഗീ​ക​രി​ക്കു​ന്നെ​ങ്കിൽ കുറ്റ​ബോ​ധത്തെ പിന്നി​ലേക്ക്‌ എറിഞ്ഞു​ക​ള​യാൻ നമുക്കാ​കും. അപ്പോൾ യഹോവ ആഗ്രഹി​ക്കു​ന്ന​തു​പോ​ലെ ഒരു ശുദ്ധമ​ന​സ്സാ​ക്ഷി​യോ​ടെ​യും നിറഞ്ഞ സന്തോ​ഷ​ത്തോ​ടെ​യും ദൈവത്തെ സേവി​ക്കാൻ നമുക്കു കഴിയും. (കൊലോ. 1:10, 11; 2 തിമൊ. 1:3) അങ്ങനെ​യെ​ങ്കിൽ യഹോവ ക്ഷമി​ച്ചെന്ന്‌ നമ്മളെ​ത്തന്നെ ബോധ്യ​പ്പെ​ടു​ത്താൻ നമുക്ക്‌ എന്തു ചെയ്യാ​നാ​കും?

യഹോ​വ​യു​ടെ ക്ഷമ അംഗീ​ക​രി​ക്കാൻ നമ്മളെ എന്തു സഹായി​ക്കും?

7-8. യഹോവ തന്നെക്കു​റിച്ച്‌ മോശ​യോട്‌ എന്താണു പറഞ്ഞത്‌, അത്‌ നമുക്ക്‌ എന്തു ഉറപ്പു തരുന്നു? (പുറപ്പാട്‌ 34:6, 7)

⁷ യഹോവ തന്നെത്തന്നെ വർണി​ച്ചി​രി​ക്കു​ന്നത്‌ എങ്ങനെ​യെന്നു ചിന്തി​ക്കുക. സീനായ്‌ മലയിൽവെച്ച്‌ യഹോവ മോശ​യോട്‌ പറഞ്ഞ വാക്കുകൾ ഉദാഹ​ര​ണ​മാ​യി എടുക്കാം.a (പുറപ്പാട്‌ 34:6, 7 വായി​ക്കുക.) തനിക്കു ഒരുപാട്‌ ഗുണങ്ങൾ ഉണ്ടായി​രു​ന്നി​ട്ടും യഹോവ ഏറ്റവും ആദ്യം പറഞ്ഞത്‌ തന്റെ കരുണ​യെ​യും അനുക​മ്പ​യെ​യും കുറി​ച്ചാണ്‌. ഇങ്ങനെ “കരുണ​യും അനുക​മ്പ​യും ഉള്ള ദൈവം” ആത്മാർഥ​മാ​യി പശ്ചാത്ത​പി​ക്കുന്ന തന്റെ ഒരു ആരാധ​ക​നോട്‌ ക്ഷമിക്കി​ല്ലെന്ന്‌ നമുക്കു ചിന്തി​ക്കാ​നാ​കു​മോ? ഒരിക്ക​ലു​മില്ല. അങ്ങനെ ചെയ്‌താൽ ദൈവം ക്രൂര​നായ, കരുണ​യി​ല്ലാത്ത ഒരാളാ​ണെന്നു വരും. പക്ഷേ യഹോ​വ​യ്‌ക്ക്‌ ഒരിക്ക​ലും അങ്ങനെ ആകാൻ പറ്റില്ല.

⁸ താൻ കരുണ​യുള്ള ദൈവ​മാ​ണെന്ന്‌ യഹോവ പറഞ്ഞി​ട്ടു​ണ്ടെ​ങ്കിൽ നമുക്ക്‌ അത്‌ ഉറപ്പാ​യും വിശ്വ​സി​ക്കാ​നാ​കും. കാരണം സത്യത്തി​ന്റെ ദൈവ​മായ യഹോ​വ​യ്‌ക്കു നുണ പറയാ​നാ​കില്ല. (സങ്കീ. 31:5) അതു​കൊണ്ട്‌ ചെയ്‌തു​പോയ തെറ്റു​ക​ളെ​ക്കു​റി​ച്ചുള്ള കുറ്റ​ബോ​ധം മനസ്സിൽനിന്ന്‌ കളയാൻ പറ്റുന്നി​ല്ലെ​ങ്കിൽ സ്വയം ഇങ്ങനെ ചോദി​ക്കുക: ‘യഹോവ ശരിക്കും കരുണ​യും അനുക​മ്പ​യും ഉള്ള ദൈവ​മാ​ണെ​ന്നും ആത്മാർഥ​മാ​യി പശ്ചാത്ത​പി​ക്കുന്ന ഏതൊ​രാ​ളോ​ടും ക്ഷമിക്കു​മെ​ന്നും ഞാൻ വിശ്വ​സി​ക്കു​ന്നു​ണ്ടോ? ഉണ്ടെങ്കിൽ യഹോവ എന്നോ​ടും ക്ഷമി​ച്ചെന്ന്‌ ഞാൻ വിശ്വ​സി​ക്കേ​ണ്ട​തല്ലേ?’

9. പാപങ്ങൾ ക്ഷമിച്ചു​തന്നു എന്നു പറയു​മ്പോൾ എന്താണ്‌ അർഥം? (സങ്കീർത്തനം 32:5)

⁹ യഹോ​വ​യു​ടെ ക്ഷമയെ​പ്പറ്റി ദൈവ​പ്ര​ചോ​ദി​ത​മാ​യി ബൈബി​ളെ​ഴു​ത്തു​കാർ പറഞ്ഞ കാര്യ​ങ്ങ​ളെ​ക്കു​റിച്ച്‌ ചിന്തി​ക്കുക. ഉദാഹ​ര​ണ​ത്തിന്‌ ദാവീദ്‌ എഴുതിയ ഒരു കാര്യം നോക്കാം. (സങ്കീർത്തനം 32:5 വായി​ക്കുക.) “എന്റെ തെറ്റുകൾ, എന്റെ പാപങ്ങൾ, അങ്ങ്‌ ക്ഷമിച്ചു​ത​രു​ക​യും ചെയ്‌തു” എന്ന്‌ ദാവീദ്‌ പറഞ്ഞു. “ക്ഷമിച്ചു​ത​രുക” എന്ന എബ്രാ​യ​വാ​ക്കിന്‌ “എടുത്ത്‌ പൊക്കുക,” “എടുത്ത്‌ മാറ്റുക,” “ചുമക്കുക” എന്നൊക്കെ അർഥമുണ്ട്‌. യഹോവ ക്ഷമിച്ച​പ്പോൾ തന്റെ തോളിൽ ഉണ്ടായി​രുന്ന വലി​യൊ​രു ഭാരം യഹോവ ദൂരേക്ക്‌ എടുത്തു​കൊണ്ട്‌ പോകു​ന്ന​താ​യി ദാവീ​ദി​നു തോന്നി. യഹോവ തന്നോടു പൂർണ​മാ​യി ക്ഷമി​ച്ചെന്നു മനസ്സി​ലാ​യ​പ്പോൾ തന്നെ അലട്ടി​യി​രുന്ന കുറ്റ​ബോ​ധ​ത്തിൽനിന്ന്‌ ദാവീ​ദിന്‌ ഒരു മോചനം കിട്ടി. (സങ്കീ. 32:2-4) നമുക്കും അതേ ആശ്വാസം അനുഭ​വി​ച്ച​റി​യാ​നാ​കും. തെറ്റു ചെയ്‌തെ​ങ്കി​ലും ആത്മാർഥ​മാ​യി പശ്ചാത്ത​പി​ച്ച​പ്പോൾ ദൈവം നമ്മുടെ പാപം ദൂരേക്ക്‌ എടുത്ത്‌ മാറ്റി​യ​താണ്‌. നമ്മൾ വീണ്ടും അതെക്കു​റി​ച്ചുള്ള കുറ്റ​ബോ​ധം മനസ്സിൽ കൊണ്ടു​ന​ട​ക്കേണ്ട കാര്യ​മില്ല.

10-11. ‘ക്ഷമിക്കാൻ സന്നദ്ധനാണ്‌’ എന്ന വാക്കുകൾ യഹോ​വ​യെ​ക്കു​റിച്ച്‌ നമ്മളെ എന്തു പഠിപ്പി​ക്കു​ന്നു? (സങ്കീർത്തനം 86:5)

¹⁰ സങ്കീർത്തനം 86:5 വായി​ക്കുക. യഹോവ ‘ക്ഷമിക്കാൻ സന്നദ്ധനാ​ണെന്ന്‌’ ദാവീദ്‌ പറഞ്ഞു. ഒരു പുസ്‌ത​ക​ത്തിൽ ഈ പദപ്ര​യോ​ഗം വിശദീ​ക​രി​ക്കു​ന്നി​ടത്ത്‌ യഹോ​വ​യെ​ക്കു​റിച്ച്‌ ഇങ്ങനെ പറയുന്നു: “(ദൈവം) ‘ക്ഷമിക്കു​ന്നവൻ’ ആണ്‌, അതു ദൈവ​ത്തി​ന്റെ ‘പ്രകൃ​ത​മാണ്‌.’” എന്തു​കൊ​ണ്ടാണ്‌ അതു ദൈവ​ത്തി​ന്റെ പ്രകൃ​ത​മാ​യി​രി​ക്കു​ന്നത്‌? ഉത്തരം, വാക്യ​ത്തി​ന്റെ ബാക്കി ഭാഗത്ത്‌ കാണാം: “അങ്ങയെ വിളി​ച്ച​പേ​ക്ഷി​ക്കു​ന്ന​വ​രോ​ടെ​ല്ലാം സമൃദ്ധ​മാ​യി അചഞ്ചല​സ്‌നേഹം കാണി​ക്കു​ന്നവൻ” എന്നു ദൈവ​ത്തെ​ക്കു​റിച്ച്‌ അവിടെ പറയുന്നു. കഴിഞ്ഞ ലേഖന​ത്തിൽ നമ്മൾ പഠിച്ച​തു​പോ​ലെ ഈ അചഞ്ചല​സ്‌നേ​ഹ​മാണ്‌ തന്റെ വിശ്വസ്‌ത ആരാധ​ക​രു​മാ​യി ആഴത്തി​ലുള്ള, എന്നും നിലനിൽക്കുന്ന ഒരു ബന്ധത്തി​ലേക്കു വരാൻ യഹോ​വയെ പ്രേരി​പ്പി​ക്കു​ന്നത്‌. ഇങ്ങനെ ഒരു സ്‌നേഹം ഉള്ളതു​കൊണ്ട്‌ പശ്ചാത്ത​പി​ക്കുന്ന എല്ലാ പാപി​ക​ളോ​ടും യഹോവ “ഉദാര​മാ​യി ക്ഷമിക്കും.” (യശ. 55:7) യഹോവ ക്ഷമി​ച്ചെന്ന്‌ അംഗീ​ക​രി​ക്കാൻ നിങ്ങൾക്കു ബുദ്ധി​മുട്ട്‌ തോന്നു​ന്നു​ണ്ടെ​ങ്കിൽ സ്വയം ഇങ്ങനെ ചോദി​ക്കാം: ‘പശ്ചാത്ത​പി​ക്കു​ക​യും കരുണ​യ്‌ക്കാ​യി അപേക്ഷി​ക്കു​ക​യും ചെയ്യുന്ന എല്ലാവ​രോ​ടും യഹോവ ക്ഷമിക്കാൻ സന്നദ്ധനാ​ണെന്ന്‌ ഞാൻ വിശ്വ​സി​ക്കു​ന്നു​ണ്ടോ? എങ്കിൽ ഞാൻ കരുണ​യ്‌ക്കാ​യി കരഞ്ഞ​പേ​ക്ഷി​ച്ച​പ്പോൾ യഹോവ എന്നോ​ടും ക്ഷമി​ച്ചെന്ന്‌ ഞാൻ വിശ്വ​സി​ക്കേ​ണ്ട​തല്ലേ?’

¹¹ നമ്മുടെ പാപ​പ്ര​കൃ​തം യഹോവ നന്നായി മനസ്സി​ലാ​ക്കു​ന്നു​ണ്ടെന്ന്‌ അറിയു​ന്നത്‌ നമുക്ക്‌ ആശ്വാസം തരും. (സങ്കീ. 139:1, 2) മറ്റൊരു സങ്കീർത്ത​ന​ത്തിൽ ദാവീദ്‌ അതെക്കു​റിച്ച്‌ എന്താണ്‌ പറയു​ന്ന​തെ​ന്നും യഹോവ ക്ഷമി​ച്ചെന്ന്‌ അംഗീ​ക​രി​ക്കാൻ അത്‌ എങ്ങനെ​യാണ്‌ നമ്മളെ സഹായി​ക്കു​ന്ന​തെ​ന്നും നോക്കാം.

യഹോവ ഓർക്കു​ന്നത്‌ നമ്മൾ മറക്കരുത്‌

12-13. സങ്കീർത്തനം 103:14 അനുസ​രിച്ച്‌ യഹോവ നമ്മളെ​ക്കു​റിച്ച്‌ എന്ത്‌ ഓർക്കു​ന്നു, അത്‌ എന്തു ചെയ്യാൻ യഹോ​വയെ പ്രേരി​പ്പി​ക്കു​ന്നു?

¹² സങ്കീർത്തനം 103:14 വായി​ക്കുക. “നാം പൊടി​യെന്നു ദൈവം ഓർക്കു​ന്നു” എന്ന്‌ ദാവീദ്‌ യഹോ​വ​യെ​ക്കു​റിച്ച്‌ പറഞ്ഞു. പശ്ചാത്ത​പി​ക്കുന്ന തന്റെ ആരാധ​ക​രോട്‌ യഹോവ ക്ഷമിക്കാൻ തയ്യാറാ​കു​ന്ന​തി​ന്റെ ഒരു കാരണം ദാവീ​ദി​ന്റെ ആ വാക്കു​ക​ളിൽ കാണാം. നമ്മൾ അപൂർണ​രാണ്‌ എന്ന കാര്യം എപ്പോ​ഴും ദൈവ​ത്തി​ന്റെ മനസ്സി​ലുണ്ട്‌. അതു കൂടു​ത​ലാ​യി മനസ്സി​ലാ​ക്കാൻ ദാവീ​ദി​ന്റെ വാക്കുകൾ നമു​ക്കൊന്ന്‌ അടുത്ത്‌ പരി​ശോ​ധി​ക്കാം.

¹³ “നമ്മെ ഉണ്ടാക്കി​യി​രി​ക്കു​ന്നത്‌ എങ്ങനെ​യെന്നു ദൈവ​ത്തി​നു നന്നായി അറിയാം” എന്നു ദാവീദ്‌ പറയുന്നു. ദൈവം ആദാമി​നെ ‘നിലത്തെ പൊടി​കൊ​ണ്ടാണ്‌’ ഉണ്ടാക്കി​യത്‌. അതു​കൊ​ണ്ടു​തന്നെ പൂർണ​രായ മനുഷ്യർക്കു​പോ​ലും പല പരിമി​തി​ക​ളും ഉണ്ടെന്ന്‌ ദൈവ​ത്തിന്‌ അറിയാം. ഉദാഹ​ര​ണ​ത്തിന്‌, ഭക്ഷണം കഴിക്കു​ക​യും ഉറങ്ങു​ക​യും ശ്വസി​ക്കു​ക​യും ഒന്നും ചെയ്യാതെ മനുഷ്യ​നു ജീവ​നോ​ടി​രി​ക്കാൻ കഴിയില്ല. (ഉൽപ. 2:7) എങ്കിലും ആദാമും ഹവ്വയും തെറ്റു ചെയ്‌ത​പ്പോൾ, നമ്മൾ പൊടി​യാണ്‌ എന്നതിന്‌ പുതി​യൊ​രു അർഥം​കൂ​ടി കൈവന്നു. അവരുടെ പിൻഗാ​മി​ക​ളായ നമുക്കു പാപം കൈമാ​റി കിട്ടി​യ​തു​കൊണ്ട്‌ എപ്പോ​ഴും തെറ്റു ചെയ്യാ​നുള്ള പ്രവണ​ത​യാ​ണു​ള്ളത്‌. നമ്മുടെ ഈ അവസ്ഥ യഹോവ അറിയു​ന്നു എന്നല്ല “ഓർക്കു​ന്നു” എന്നാണ്‌ ദാവീദ്‌ പറഞ്ഞത്‌. “ഓർക്കു​ന്നു” എന്നതി​നുള്ള എബ്രായ പദത്തിനു നല്ലൊരു പ്രവൃത്തി ചെയ്യു​ന്ന​തി​നെ അർഥമാ​ക്കാ​നാ​കും. ചുരു​ക്ക​ത്തിൽ, ദാവീദ്‌ പറഞ്ഞ വാക്കു​ക​ളു​ടെ അർഥം ഇതാണ്‌: നമുക്ക്‌ ചില​പ്പോ​ഴൊ​ക്കെ തെറ്റുകൾ പറ്റു​മെന്ന്‌ യഹോവ മനസ്സി​ലാ​ക്കു​ന്നു. എന്നാൽ അതുമാ​ത്രമല്ല, ആത്മാർഥ​മായ നമ്മുടെ പശ്ചാത്താ​പം കാണു​മ്പോൾ കരുണ കാണി​ക്കാ​നും ക്ഷമിക്കാ​നും യഹോ​വ​യ്‌ക്കു തോന്നു​ന്നു.—സങ്കീ. 78:38, 39.

14. (എ) യഹോവ ക്ഷമിക്കുന്ന വിധത്തെ ദാവീദ്‌ വേറെ എങ്ങനെ​യാണ്‌ വർണി​ച്ചത്‌? (സങ്കീർത്തനം 103:12) (ബി) യഹോവ പൂർണ​മാ​യി ക്ഷമിക്കു​ന്നു എന്ന്‌ ദാവീ​ദി​ന്റെ ഉദാഹ​രണം കാണി​ക്കു​ന്നത്‌ എങ്ങനെ? (“യഹോവ ക്ഷമിക്കു​ക​യും മറക്കു​ക​യും ചെയ്യുന്നു” എന്ന ചതുരം കാണുക.)

¹⁴ യഹോവ ക്ഷമിക്കുന്ന വിധ​ത്തെ​ക്കു​റിച്ച്‌ 103-ാം സങ്കീർത്ത​ന​ത്തിൽനിന്ന്‌ നമുക്ക്‌ വേറെ എന്തു പഠിക്കാ​നാ​കും? (സങ്കീർത്തനം 103:12 വായി​ക്കുക.) ദാവീദ്‌ പറഞ്ഞത്‌ യഹോവ ക്ഷമിക്കു​മ്പോൾ “സൂര്യോ​ദയം (കിഴക്ക്‌) സൂര്യാ​സ്‌ത​മ​യ​ത്തിൽനിന്ന്‌ (പടിഞ്ഞാറ്‌) എത്ര അകലെ​യാ​ണോ അത്ര അകലേക്കു” ദൈവം നമ്മുടെ പാപങ്ങൾ കൊണ്ടു​പോ​കു​ന്നു എന്നാണ്‌. ഒരർഥ​ത്തിൽ പറഞ്ഞാൽ, പടിഞ്ഞാ​റിൽനിന്ന്‌ സങ്കൽപ്പി​ക്കാ​വു​ന്ന​തി​ലേ​ക്കും ഏറ്റവും അകലെ​യാണ്‌ കിഴക്ക്‌. ഒരിക്ക​ലും അവയ്‌ക്കു കൂട്ടി​മു​ട്ടാ​നാ​കില്ല. യഹോവ ക്ഷമിച്ചു​തന്ന പാപ​ത്തെ​ക്കു​റിച്ച്‌ അത്‌ എന്ത്‌ പഠിപ്പി​ക്കു​ന്നു? ഒരു പുസ്‌തകം അതിനെ ഇങ്ങനെ​യാണ്‌ വിവരി​ക്കു​ന്നത്‌: “നമ്മുടെ പാപം ഇത്ര ദൂരേക്ക്‌ നീക്കി​ക്ക​ള​യു​ന്നു എന്നു പറയു​മ്പോൾ നമുക്ക്‌ ഒരു കാര്യം ഉറപ്പി​ക്കാം; അതിന്റെ എന്തെങ്കി​ലും ഒരു മണമോ അംശമോ ഓർമ​യോ​പോ​ലും ഒട്ടും അവശേ​ഷി​ക്കു​ന്നില്ല.” ഒരു മണത്തിനു നമ്മളെ പലതും ഓർമി​പ്പി​ക്കാ​നാ​കും, അല്ലേ? എന്നാൽ യഹോവ ക്ഷമിക്കു​മ്പോൾ യഹോവ ആ പാപം ദൂരേക്ക്‌ എറിഞ്ഞു​ക​ള​യു​ന്ന​തു​കൊണ്ട്‌ അതിന്റെ ഒരു മണം​പോ​ലും അവശേ​ഷി​ക്കു​ന്നില്ല. അതു​കൊ​ണ്ടു​തന്നെ നമ്മളെ കുറ്റ​പ്പെ​ടു​ത്താ​നോ ശിക്ഷി​ക്കാ​നോ ആയി പിന്നെ ഒരിക്ക​ലും അതു ദൈവ​ത്തി​ന്റെ ഓർമ​യി​ലേക്ക്‌ വരുക​യും ഇല്ല.—യഹ. 18:21, 22; പ്രവൃ. 3:19.

15. ചെയ്‌തു​പോയ തെറ്റു​ക​ളെ​ക്കു​റി​ച്ചുള്ള കുറ്റ​ബോ​ധം നമ്മളെ വിടാതെ പിന്തു​ട​രു​ന്നെ​ങ്കിൽ എന്തു ചെയ്യാം?

¹⁵ യഹോവ ക്ഷമി​ച്ചെന്ന്‌ അംഗീ​ക​രി​ക്കാൻ 103-ാം സങ്കീർത്ത​ന​ത്തി​ലെ ദാവീ​ദി​ന്റെ വാക്കുകൾ നമ്മളെ സഹായി​ക്കു​ന്നത്‌ എങ്ങനെ​യാണ്‌? ചെയ്‌തു​പോയ തെറ്റു​ക​ളെ​ക്കു​റി​ച്ചുള്ള കുറ്റ​ബോ​ധം നിങ്ങളെ വിടാതെ പിന്തു​ട​രു​ന്നെ​ങ്കിൽ സ്വയം ഇങ്ങനെ ചോദി​ക്കുക: ‘യഹോവ ഓർക്കുന്ന കാര്യം ഞാൻ മറന്നു​ക​ള​യു​ന്നു​ണ്ടോ? അതായത്‌, എനിക്കു തെറ്റുകൾ പറ്റു​മെന്ന്‌ യഹോ​വ​യ്‌ക്ക്‌ അറിയാ​മെ​ന്നും എന്നെ​പ്പോ​ലെ പശ്ചാത്ത​പി​ക്കുന്ന ഒരു പാപി​യോട്‌ യഹോവ ക്ഷമിക്കു​മെ​ന്നും ഞാൻ മറക്കു​ന്നു​ണ്ടോ? ഇനി, യഹോവ മറക്കുന്ന കാര്യം ഞാൻ ഓർത്തു​വെ​ക്കു​ന്നു​ണ്ടോ? അതായത്‌, യഹോവ ക്ഷമിച്ചു​ത​രു​ക​യും ഇനി ഒരിക്ക​ലും എനിക്ക്‌ എതിരെ ഉപയോ​ഗി​ക്കു​ക​യും ഇല്ലാത്ത എന്റെ പാപങ്ങൾ ഞാൻ ഓർത്തു​കൊ​ണ്ടി​രി​ക്കു​ക​യാ​ണോ?’ യഹോവ നമ്മൾ ചെയ്‌തു​പോയ തെറ്റു​ക​ളി​ലല്ല ശ്രദ്ധ​വെ​ക്കു​ന്നത്‌. നമ്മളും അങ്ങനെ ചെയ്യരുത്‌. (സങ്കീ. 130:3) യഹോവ ക്ഷമി​ച്ചെന്ന്‌ അംഗീ​ക​രി​ക്കു​മ്പോൾ നമുക്കു നമ്മളോ​ടു​തന്നെ ക്ഷമിക്കാ​നും സന്തോ​ഷ​ത്തോ​ടെ മുന്നോ​ട്ടു​പോ​കാ​നും കഴിയും.

16. ചെയ്‌തു​പോയ തെറ്റു​ക​ളെ​ക്കു​റി​ച്ചുള്ള കുറ്റ​ബോ​ധം മനസ്സിൽ വെച്ചു​കൊ​ണ്ടി​രി​ക്കു​ന്ന​തി​ന്റെ അപകടം ഒരു ദൃഷ്ടാന്തം ഉപയോ​ഗിച്ച്‌ പറയുക. (ചിത്ര​വും കാണുക.)

¹⁶ നമുക്ക്‌ ഒരു ദൃഷ്ടാന്തം നോക്കാം. ചെയ്‌തു​പോയ തെറ്റു​ക​ളെ​ക്കു​റി​ച്ചുള്ള കുറ്റ​ബോ​ധം മനസ്സിൽ വെച്ചു​കൊ​ണ്ടി​രി​ക്കു​ന്നത്‌ ഒരു കാർ ഓടി​ക്കു​മ്പോൾ പുറകി​ലു​ള്ളത്‌ കാണാ​നുള്ള കണ്ണാടി​യിൽത്തന്നെ നോക്കി​യി​രി​ക്കു​ന്നതു പോ​ലെ​യാണ്‌. ഇടയ്‌ക്കൊ​ക്കെ ആ കണ്ണാടി​യിൽ നോക്കു​ന്നതു നല്ലതാണ്‌. കാരണം പുറകി​ലുള്ള അപകടങ്ങൾ മനസ്സി​ലാ​ക്കി പ്രവർത്തി​ക്കാൻ അതു സഹായി​ക്കും. പക്ഷേ സുരക്ഷി​ത​മാ​യി മുന്നോ​ട്ടു പോകാൻ പറ്റണ​മെ​ങ്കിൽ നിങ്ങൾ കൂടു​ത​ലും ശ്രദ്ധി​ക്കു​ന്നത്‌ മുന്നി​ലുള്ള റോഡിൽ ആയിരി​ക്കണം. അതു​പോ​ലെ, ചെയ്‌തു​പോയ തെറ്റു​ക​ളെ​ക്കു​റിച്ച്‌ ഇടയ്‌ക്കൊ​ക്കെ ഓർക്കു​ന്നത്‌ നല്ലതാണ്‌. കാരണം ആ തെറ്റു​ക​ളിൽനിന്ന്‌ പാഠങ്ങൾ പഠിക്കാ​നും വീണ്ടും അത്‌ ആവർത്തി​ക്കി​ല്ലെന്ന തീരു​മാ​നം ശക്തമാ​ക്കാ​നും അതു നിങ്ങളെ സഹായി​ക്കും. എങ്കിലും, എപ്പോ​ഴും ചെയ്‌തു​പോയ തെറ്റു​ക​ളെ​ക്കു​റി​ച്ചു​തന്നെ ചിന്തി​ക്കു​ന്നെ​ങ്കിൽ കുറ്റ​ബോ​ധം കാരണം നിങ്ങളു​ടെ സന്തോഷം നഷ്ടപ്പെ​ടും; ഇപ്പോൾ ദൈവ​സേ​വ​ന​ത്തിൽ പരമാ​വധി ചെയ്യാൻ കഴിയാ​തെ വരും. അതു​കൊണ്ട്‌ നമുക്കു മുന്നോ​ട്ടുള്ള പാതയിൽത്തന്നെ ശ്രദ്ധി​ക്കാം. ദൈവം വാഗ്‌ദാ​നം ചെയ്‌തി​രി​ക്കുന്ന പുതിയ ലോക​ത്തി​ലേ​ക്കുള്ള പാതയാണ്‌ അത്‌. ആ പുതിയ ലോക​ത്തിൽ മോശം ഓർമകൾ “ആരു​ടെ​യും മനസ്സി​ലേക്കു വരില്ല.”—യശ. 65:17; സുഭാ. 4:25.

നിങ്ങളു​ടെ ഹൃദയത്തെ തുടർന്നും ബോധ്യ​പ്പെ​ടു​ത്തുക

17. യഹോവ സ്‌നേ​ഹി​ക്കു​ക​യും ക്ഷമിക്കു​ക​യും ചെയ്യു​ന്നെന്ന്‌ നമ്മുടെ ഹൃദയത്തെ ബോധ്യ​പ്പെ​ടു​ത്തി​ക്കൊ​ണ്ടേ​യി​രി​ക്കേ​ണ്ടത്‌ എന്തു​കൊണ്ട്‌?

¹⁷ യഹോവ നമ്മളെ സ്‌നേ​ഹി​ക്കു​ന്നെ​ന്നും നമ്മളോട്‌ ക്ഷമിക്കാൻ തയ്യാറാ​ണെ​ന്നും നമ്മുടെ ഹൃദയത്തെ ബോധ്യ​പ്പെ​ടു​ത്തി​ക്കൊ​ണ്ടി​രി​ക്കണം. (1 യോഹ. 3:20, അടിക്കു​റിപ്പ്‌) കാരണം നമ്മൾ സ്‌നേ​ഹ​ത്തി​നും ക്ഷമയ്‌ക്കും അർഹര​ല്ലെന്നു നമ്മളെ വിശ്വ​സി​പ്പി​ക്കാൻ സാത്താൻ കിണഞ്ഞ്‌ ശ്രമി​ച്ചു​കൊ​ണ്ടേ​യി​രി​ക്കും. അതു വിശ്വ​സി​ച്ചാൽ നമ്മൾ യഹോ​വയെ സേവി​ക്കു​ന്നതു നിറു​ത്തു​മെന്ന്‌ അവന്‌ അറിയാം. അതാണ്‌ അവന്റെ ലക്ഷ്യവും. തനിക്കു കുറച്ചു സമയ​മേ​യു​ള്ളൂ എന്ന്‌ അറിയാ​വു​ന്ന​തു​കൊണ്ട്‌ സാത്താൻ തന്റെ ശ്രമങ്ങ​ളു​ടെ തീവ്രത കൂട്ടു​മെന്ന്‌ നമ്മൾ പ്രതീ​ക്ഷി​ക്കണം. (വെളി. 12:12) സാത്താനെ വിജയി​ക്കാൻ നമ്മൾ ഒരിക്ക​ലും സമ്മതി​ക്ക​രുത്‌.

18. യഹോവ സ്‌നേ​ഹി​ക്കു​ക​യും ക്ഷമിക്കു​ക​യും ചെയ്യു​ന്നെന്ന്‌ നമ്മുടെ ഹൃദയത്തെ ബോധ്യ​പ്പെ​ടു​ത്താൻ എന്തു ചെയ്യാം?

¹⁸ യഹോവ നമ്മളെ സ്‌നേ​ഹി​ക്കു​ന്നു​ണ്ടെന്ന വിശ്വാ​സം ശക്തമാ​ക്കാൻ കഴിഞ്ഞ ലേഖന​ത്തിൽ പഠിച്ച നിർദേ​ശങ്ങൾ നിങ്ങളെ സഹായി​ക്കും. ഇനി, യഹോവ ക്ഷമി​ച്ചെന്ന്‌ നമ്മുടെ ഹൃദയത്തെ ബോധ്യ​പ്പെ​ടു​ത്താൻ യഹോവ തന്നെത്തന്നെ എങ്ങനെ​യാണ്‌ വർണി​ച്ചി​രി​ക്കു​ന്നത്‌ എന്നതി​നെ​ക്കു​റിച്ച്‌ ചിന്തി​ക്കുക. യഹോ​വ​യു​ടെ ക്ഷമയെ​ക്കു​റിച്ച്‌ ബൈബി​ളെ​ഴു​ത്തു​കാർ പറഞ്ഞി​രി​ക്കുന്ന കാര്യ​ങ്ങ​ളെ​ക്കു​റിച്ച്‌ ധ്യാനി​ക്കുക. നമ്മൾ അപൂർണ​രാ​ണെന്ന്‌ യഹോ​വ​യ്‌ക്ക്‌ നന്നായി അറിയാ​മെ​ന്നും അതു​കൊണ്ട്‌ നമ്മളോട്‌ കരുണ​യോ​ടെ ഇടപെ​ടു​മെ​ന്നും നമുക്കു മറക്കാ​തി​രി​ക്കാം. അതു​പോ​ലെ യഹോവ തെറ്റുകൾ ക്ഷമിക്കു​മ്പോൾ അത്‌ പൂർണ​മാ​യും ക്ഷമിക്കു​മെ​ന്നും നമുക്ക്‌ ഓർക്കാം. ഇങ്ങനെ​യൊ​ക്കെ ചെയ്യു​ന്നെ​ങ്കിൽ, യഹോ​വ​യു​ടെ കരുണ​യിൽ ദാവീ​ദി​നു​ണ്ടാ​യി​രുന്ന അതേ വിശ്വാ​സം നമുക്കും ഉണ്ടായി​രി​ക്കും. നമ്മളും അപ്പോൾ ഇങ്ങനെ പറയും: “യഹോവേ ‘എന്റെ തെറ്റുകൾ, എന്റെ പാപങ്ങൾ’ അങ്ങ്‌ ക്ഷമിച്ചു​ത​ന്ന​തിന്‌ നന്ദി!”—സങ്കീ. 32:5.