എല്ലാവ​രോ​ടും ആദരവ്‌ കാണി​ക്കു​ക

1. ആദരവ്‌ ലഭിക്കു​മ്പോൾ നമുക്കു സന്തോഷം തോന്നു​ന്നത്‌ എന്തു​കൊണ്ട്‌? (സുഭാ​ഷി​തങ്ങൾ 22:1)

മറ്റുള്ളവർ നമ്മളോ​ടു ബഹുമാ​നം കാണി​ക്കു​മ്പോൾ നമുക്കു സന്തോഷം തോന്നാ​റി​ല്ലേ? തീർച്ച​യാ​യും. കാരണം ആദരവ്‌ കിട്ടുക എന്നത്‌ എല്ലാ മനുഷ്യ​രു​ടെ​യും ഉള്ളിലുള്ള ഒരു ആഗ്രഹ​മാണ്‌. അതു​കൊ​ണ്ടു​ത​ന്നെ​യാണ്‌ “ആദരവ്‌ നേടു​ന്നതു സ്വർണ​ത്തെ​ക്കാ​ളും വെള്ളി​യെ​ക്കാ​ളും നല്ലത്‌” എന്നു ബൈബിൾ പറയു​ന്നത്‌.—സുഭാ​ഷി​തങ്ങൾ 22:1 വായി​ക്കുക.

2-3. (എ) മറ്റുള്ള​വ​രോട്‌ ആദരവ്‌ കാണി​ക്കാൻ എപ്പോ​ഴും അത്ര എളുപ്പ​മ​ല്ലാ​ത്തത്‌ എന്തു​കൊണ്ട്‌? (ബി) ഈ ലേഖന​ത്തിൽ നമ്മൾ എന്തു പഠിക്കും?

² എന്നാൽ ആദരവ്‌ കാണി​ക്കുക എന്നത്‌ എല്ലായ്‌പോ​ഴും അത്ര എളുപ്പമല്ല. കാരണം, പലപ്പോ​ഴും നമ്മൾ കാണു​ന്നത്‌ ആളുക​ളു​ടെ കുറവു​ക​ളാണ്‌. ഇനി, ആളുകൾ ആദരവ്‌ കാണി​ക്കാത്ത ഒരു ലോക​ത്താണ്‌ നമ്മൾ ജീവി​ക്കു​ന്ന​തും. പക്ഷേ നമ്മൾ വ്യത്യ​സ്‌ത​രാ​യി​രി​ക്കണം. എന്തു​കൊണ്ട്‌? കാരണം യഹോവ പറയുന്നു: “എല്ലാ മനുഷ്യ​രെ​യും ബഹുമാ​നി​ക്കുക.”—1 പത്രോ. 2:17.

³ ഈ ലേഖന​ത്തിൽ, മറ്റുള്ള​വ​രോട്‌ ആദരവ്‌ കാണി​ക്കുക എന്നു പറഞ്ഞാൽ എന്താണ്‌ അർഥ​മെ​ന്നും (1) കുടും​ബാം​ഗ​ങ്ങ​ളോ​ടും (2) സഹോ​ദ​ര​ങ്ങ​ളോ​ടും (3) ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോ​ടും എങ്ങനെ ആദരവ്‌ കാണി​ക്കാം എന്നും പഠിക്കും. ആദരവ്‌ കാണി​ക്കാൻ ബുദ്ധി​മു​ട്ടുള്ള സാഹച​ര്യ​ങ്ങ​ളി​ലും അത്‌ എങ്ങനെ ചെയ്യാ​മെന്നു നമ്മൾ ചിന്തി​ക്കും.

മറ്റുള്ള​വരെ ആദരി​ക്കുക എന്നതിന്റെ അർഥം

4. മറ്റുള്ള​വരെ ആദരി​ക്കുക എന്നു പറഞ്ഞാൽ എന്താണ്‌ അർഥം?

⁴ നിങ്ങൾ ഒരാളെ “ആദരി​ക്കു​ന്നു” അല്ലെങ്കിൽ “ബഹുമാ​നി​ക്കു​ന്നു” എന്നു പറയു​മ്പോൾ അദ്ദേഹ​ത്തെ​ക്കു​റിച്ച്‌ നിങ്ങൾ എന്തു ചിന്തി​ക്കു​ന്നു എന്നതും അദ്ദേഹ​ത്തോട്‌ എങ്ങനെ പെരു​മാ​റു​ന്നു എന്നതും അതിൽ ഉൾപ്പെ​ടും. ഒരാളു​ടെ നല്ല ഗുണങ്ങ​ളോ അയാൾ ചെയ്‌ത നല്ല കാര്യ​ങ്ങ​ളോ അല്ലെങ്കിൽ അയാളു​ടെ അധികാ​ര​മോ ഒക്കെയാ​യി​രി​ക്കാം ആ വ്യക്തിയെ ബഹുമാ​നി​ക്കാൻ നിങ്ങളെ പ്രേരി​പ്പി​ക്കു​ന്നത്‌. അദ്ദേഹത്തെ ബഹുമാ​നി​ക്കു​ന്നു​ണ്ടെന്നു നിങ്ങളു​ടെ പ്രവൃ​ത്തി​ക​ളിൽനിന്ന്‌ അദ്ദേഹ​ത്തി​നു മനസ്സി​ലാ​കും. ഈ ആദരവ്‌ ആത്മാർഥ​മാ​ക​ണ​മെ​ങ്കിൽ, അതു ഹൃദയ​ത്തിൽനിന്ന്‌ ഉള്ളതാ​യി​രി​ക്കണം.—മത്താ. 15:8.

5. മറ്റുള്ള​വരെ ആദരി​ക്കാൻ നമ്മളെ പ്രേരി​പ്പി​ക്കു​ന്നത്‌ എന്താണ്‌?

⁵ നമ്മൾ ആളുക​ളോട്‌ ആദരവ്‌ കാണി​ക്കാൻ യഹോവ പ്രതീ​ക്ഷി​ക്കു​ന്നു. ഉദാഹ​ര​ണ​ത്തിന്‌ ‘ഉന്നതാ​ധി​കാ​രി​കളെ’ ആദരി​ക്കാൻ ദൈവം പറഞ്ഞി​ട്ടുണ്ട്‌. (റോമ. 13:1, 7) എന്നാൽ ചിലർ ഇങ്ങനെ പറഞ്ഞേ​ക്കാം, “നല്ലതു ചെയ്യു​ന്ന​വ​രോ​ടേ ബഹുമാ​നം കാണി​ക്കാൻ എനിക്കു തോന്നാ​റു​ള്ളൂ.” ആ ചിന്ത ശരിയാ​ണോ? അല്ല. മനുഷ്യ​രു​ടെ പ്രവൃത്തി മാത്രം നോക്കി​യല്ല അവരോ​ടു ബഹുമാ​നം കാണി​ക്കേ​ണ്ട​തെന്ന്‌ യഹോ​വ​യു​ടെ ദാസരായ നമുക്ക്‌ അറിയാം. ആളുകളെ ബഹുമാ​നി​ക്കു​ന്ന​തി​നു നമുക്കു പ്രധാ​ന​പ്പെട്ട മറ്റൊരു കാരണ​മുണ്ട്‌. യഹോ​വ​യോ​ടുള്ള സ്‌നേ​ഹ​വും യഹോ​വയെ സന്തോ​ഷി​പ്പി​ക്കാ​നുള്ള ആഗ്രഹ​വും!—യോശു. 4:14; 1 പത്രോ. 3:15.

6. നിങ്ങ​ളോട്‌ ആദരവ്‌ കാണി​ക്കാത്ത ഒരാ​ളോട്‌ തിരിച്ച്‌ ആദരവ്‌ കാണി​ക്കാൻ പറ്റുമോ? വിശദീ​ക​രി​ക്കുക. (ചിത്ര​വും കാണുക.)

⁶ ചിലർ ഇങ്ങനെ ചിന്തി​ച്ചേ​ക്കാം, ‘എന്നോട്‌ ആദരവ്‌ കാണി​ക്കാത്ത ഒരാ​ളോ​ടു തിരിച്ച്‌ ആദരവ്‌ കാണി​ക്കാൻ ശരിക്കും എനിക്കു പറ്റുമോ?’ പറ്റും. ചില ബൈബിൾ ഉദാഹ​ര​ണങ്ങൾ നോക്കാം. ശൗൽ രാജാവ്‌ മകനായ യോനാ​ഥാ​നോട്‌ മറ്റുള്ള​വ​രു​ടെ മുന്നിൽവെച്ച്‌ വല്ലാതെ ദേഷ്യ​പ്പെട്ടു. (1 ശമു. 20:30-34) എന്നിട്ടും യോനാ​ഥാൻ പിതാ​വി​നോട്‌ ആദര​വോ​ടെ​തന്നെ ഇടപെട്ടു. അവസാ​നം​വരെ യോനാ​ഥാൻ അദ്ദേഹ​ത്തോ​ടൊ​പ്പം​നിന്ന്‌ പോരാ​ടി. (പുറ. 20:12; 2 ശമു. 1:23) മറ്റൊരു ഉദാഹ​ര​ണ​മാണ്‌ ഹന്ന. മഹാപു​രോ​ഹി​ത​നായ ഏലി, ഹന്ന കുടി​ച്ചി​ട്ടാണ്‌ ആലയത്തിൽ വന്നതെന്ന്‌ ആരോ​പി​ച്ചു. (1 ശമു. 1:12-14) ഒരു പിതാ​വും മഹാപു​രോ​ഹി​ത​നും എന്ന നിലയി​ലുള്ള ഉത്തരവാ​ദി​ത്വ​ങ്ങൾ നിറ​വേ​റ്റാൻ ഏലിക്കു കഴിയു​ന്നില്ല എന്നത്‌ ഇസ്രാ​യേ​ലിൽ പരക്കെ അറിവുള്ള കാര്യ​മാ​യി​രു​ന്നു. ഇങ്ങനെ​യൊ​ക്കെ​യാ​യി​ട്ടും ഹന്ന അദ്ദേഹ​ത്തോട്‌ ആദര​വോ​ടെ​തന്നെ സംസാ​രി​ച്ചു. (1 ശമു. 1:15-18; 2:22-24) ഇനി ആതൻസി​ലെ ആളുകൾ പൗലോസ്‌ അപ്പോ​സ്‌ത​ലനെ “വിടു​വാ​യൻ” എന്നു വിളിച്ച്‌ കളിയാ​ക്കി. (പ്രവൃ. 17:18) എങ്കിലും അദ്ദേഹം തിരിച്ച്‌ അവരോട്‌ ആദര​വോ​ടെ സംസാ​രി​ച്ചു. (പ്രവൃ. 17:22) ഇതെല്ലാം നമ്മൾ എന്താണു പഠിപ്പി​ക്കു​ന്നത്‌? യഹോ​വ​യോ​ടുള്ള സ്‌നേ​ഹ​വും യഹോ​വയെ വിഷമി​പ്പി​ക്ക​രുത്‌ എന്ന ആഗ്രഹ​വും, ആദരവ്‌ കാണി​ക്കാൻ ബുദ്ധി​മു​ട്ടു​ള്ള​പ്പോ​ഴും അങ്ങനെ ചെയ്യാൻ നമ്മളെ പ്രേരി​പ്പി​ക്കും. നമ്മൾ ആരോ​ടെ​ല്ലാ​മാണ്‌ ആദരവ്‌ കാണി​ക്കേ​ണ്ട​തെ​ന്നും എന്തു​കൊ​ണ്ടാണ്‌ അങ്ങനെ ചെയ്യേ​ണ്ട​തെ​ന്നും ഇനി നോക്കാം.

കുടും​ബാം​ഗ​ങ്ങ​ളോട്‌ ആദരവ്‌ കാണി​ക്കു​ക

7. കുടും​ബാം​ഗ​ങ്ങ​ളോട്‌ ആദരവ്‌ കാണി​ക്കാൻ നമുക്കു ബുദ്ധി​മുട്ട്‌ തോന്നി​യേ​ക്കാ​വുന്ന ചില സാഹച​ര്യ​ങ്ങൾ ഏതൊ​ക്കെ​യാണ്‌?

⁷ തടസ്സം. കുടും​ബാം​ഗ​ങ്ങ​ളോ​ടൊ​പ്പം ഒരുപാ​ടു സമയം ചെലവ​ഴി​ക്കു​ന്ന​തു​കൊണ്ട്‌ നമുക്ക്‌ അവരുടെ നല്ല ഗുണങ്ങ​ളും ബലഹീ​ന​വ​ശ​ങ്ങ​ളും നന്നായി അറിയാം. ഒരുപക്ഷേ അവരിൽ ആർക്കെ​ങ്കി​ലും ഒരു രോഗ​മോ അമിത​മായ ഉത്‌ക​ണ്‌ഠ​യോ ഉണ്ടായി​രി​ക്കാം. അതു കാരണം അവർ ചില​പ്പോൾ ഇടപെ​ടുന്ന രീതി​കൊണ്ട്‌ അവരെ പരിച​രി​ക്കു​ന്ന​തും ബഹുമാ​നി​ക്കു​ന്ന​തും നമുക്കു ബുദ്ധി​മു​ട്ടാ​യി​രു​ന്നേ​ക്കാം. അല്ലെങ്കിൽ കുടും​ബാം​ഗ​ങ്ങ​ളിൽ ആരെങ്കി​ലും വേദനി​പ്പി​ക്കുന്ന രീതി​യിൽ സംസാ​രി​ക്കു​ക​യോ പെരു​മാ​റു​ക​യോ ചെയ്യു​ന്നു​ണ്ടാ​കാം. ഇത്തരം സാഹച​ര്യ​ങ്ങ​ളിൽ അവരോ​ടു ബഹുമാ​നം കാണി​ക്കാൻ നമുക്കു ബുദ്ധി​മുട്ട്‌ തോന്നാം. എന്നാൽ ആദരവി​ല്ലാ​തെ പെരു​മാ​റി​യാൽ, കുടും​ബം സമാധാ​ന​ത്തി​ന്റെ​യും സന്തോ​ഷ​ത്തി​ന്റെ​യും ഇടമാ​കു​ന്ന​തി​നു പകരം ദേഷ്യ​വും ഒച്ചപ്പാ​ടും ഒക്കെ നിറഞ്ഞ ഒരിട​മാ​യി​ത്തീർന്നേ​ക്കാം. അവസാനം കുടും​ബാം​ഗ​ങ്ങൾക്കി​ട​യിൽ ഒരു യോജി​പ്പും ഇല്ലാതാ​യി​ത്തീ​രും. ഇതു സന്ധിവാ​തം വരുന്ന​തു​പോ​ലെ​യാണ്‌. അതുള്ള ഒരാൾക്കു ജോയി​ന്റു​ക​ളി​ലെ വേദന കാരണം ശരീര​ഭാ​ഗങ്ങൾ ഒരുമിച്ച്‌ സുഗമ​മാ​യി ചലിപ്പി​ക്കാ​നാ​കില്ല. ഇതു​പോ​ലെ ആദരവി​ല്ലാ​തെ ഇടപെ​ടു​മ്പോൾ കുടും​ബാം​ഗ​ങ്ങൾക്ക്‌ ഒരുമിച്ച്‌, ഐക്യ​ത്തോ​ടെ പ്രവർത്തി​ക്കാൻ കഴിയാ​തെ​വ​രും. സന്ധിവാ​തം നമുക്കു പൂർണ​മാ​യും ചികി​ത്സിച്ച്‌ മാറ്റാൻ ബുദ്ധി​മു​ട്ടാണ്‌. എന്നാൽ ആദരവി​ല്ലാ​യ്‌മ​യു​ടെ കാര്യം അങ്ങനെയല്ല. കുടും​ബ​ത്തിൽ ആദരവി​ല്ലാ​തെ പെരു​മാ​റു​ന്നതു നിറു​ത്താ​നും കുടും​ബ​ബ​ന്ധ​ങ്ങൾക്കു വൈക​ല്യം വരുന്നതു തടയാ​നും നമുക്കു കഴിയും.

8. കുടും​ബാം​ഗ​ങ്ങ​ളോട്‌ ആദരവ്‌ കാണി​ക്കേ​ണ്ടത്‌ പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌? (1 തിമൊ​ഥെ​യൊസ്‌ 5:4, 8)

⁸ ആദരവ്‌ കാണി​ക്കേ​ണ്ടത്‌ എന്തു​കൊണ്ട്‌? (1 തിമൊ​ഥെ​യൊസ്‌ 5:4, 8 വായി​ക്കുക.) പൗലോസ്‌ തിമൊ​ഥെ​യൊ​സിന്‌ എഴുതിയ ആദ്യക​ത്തിൽ കുടും​ബാം​ഗങ്ങൾ പരസ്‌പരം കരു​തേ​ണ്ട​തി​നെ​ക്കു​റിച്ച്‌ പറയു​ന്നുണ്ട്‌. കുടും​ബ​ത്തിൽ ആദരവ്‌ കാണി​ക്കു​ന്നത്‌ കടമയാ​യ​തു​കൊ​ണ്ടല്ല, മറിച്ച്‌ “ദൈവ​ഭക്തി” കാരണ​മാ​യി​രി​ക്കണം എന്ന്‌ പൗലോസ്‌ അവിടെ വിശദീ​ക​രി​ക്കു​ന്നു. ആ പദം സൂചി​പ്പി​ക്കു​ന്നതു കുടും​ബാം​ഗ​ങ്ങ​ളോട്‌ ആദരവ്‌ കാണി​ക്കു​ന്നതു ദൈവ​സേ​വ​ന​ത്തി​ന്റെ​യും ആരാധ​ന​യു​ടെ​യും ഭാഗമാണ്‌ എന്നാണ്‌. കുടും​ബ​ക്ര​മീ​ക​രണം കൊണ്ടു​വ​ന്നത്‌ യഹോ​വ​യാണ്‌. (എഫെ. 3:14, 15) അതു​കൊ​ണ്ടു​തന്നെ നമ്മൾ കുടും​ബാം​ഗ​ങ്ങ​ളോട്‌ ആദരവ്‌ കാണി​ക്കു​മ്പോൾ ആ ക്രമീ​ക​രണം ഏർപ്പെ​ടു​ത്തിയ യഹോ​വയെ ആദരി​ക്കു​ക​യാണ്‌. കുടും​ബാം​ഗ​ങ്ങ​ളോട്‌ ആദര​വോ​ടെ ഇടപെ​ടേ​ണ്ട​തി​ന്റെ എത്ര വലിയ കാരണം!

9. ഭർത്താ​വി​നും ഭാര്യ​ക്കും പരസ്‌പരം എങ്ങനെ​യെ​ല്ലാം ആദരവ്‌ കാണി​ക്കാം? (ചിത്ര​ങ്ങ​ളും കാണുക.)

⁹ ആദരവ്‌ എങ്ങനെ കാണി​ക്കാം? ഭാര്യ​യോട്‌ ആദരവ്‌ കാണി​ക്കുന്ന ഭർത്താവ്‌ വീടി​നു​ള്ളി​ലും പുറത്തും, ഭാര്യ തനിക്കു വില​പ്പെ​ട്ട​വ​ളാ​ണെന്ന രീതി​യിൽ ഇടപെ​ടും. (സുഭാ. 31:28; 1 പത്രോ. 3:7) അദ്ദേഹം ഒരിക്ക​ലും അവളെ ഉപദ്ര​വി​ക്കു​ക​യോ കളിയാ​ക്കു​ക​യോ വില​കെ​ട്ട​വ​ളാ​ണെന്ന്‌ തോന്നി​പ്പി​ക്കു​ക​യോ ഇല്ല. അർജന്റീ​ന​യിൽ താമസി​ക്കുന്ന അരീൽa എന്ന സഹോ​ദരൻ പറയുന്നു: “എന്റെ ഭാര്യക്ക്‌ ഒരു അസുഖ​മു​ള്ള​തു​കൊണ്ട്‌ ചില സമയത്ത്‌ അവളുടെ വാക്കുകൾ എന്നെ വേദനി​പ്പി​ക്കാ​റുണ്ട്‌. അങ്ങനെ സംഭവി​ക്കു​മ്പോൾ അവൾ മനഃപൂർവം അല്ലല്ലോ, അസുഖം​കൊ​ണ്ടാ​ണ​ല്ലോ അങ്ങനെ പറയു​ന്ന​തെന്നു ഞാൻ എന്നെത്തന്നെ ഓർമി​പ്പി​ക്കും. അതു​പോ​ലെ 1 കൊരി​ന്ത്യർ 13:5 ഞാൻ എന്റെ മനസ്സി​ലേക്കു കൊണ്ടു​വ​രും. ദേഷ്യ​പ്പെ​ടു​ന്ന​തി​നു പകരം ആദര​വോ​ടെ അവളോട്‌ ഇടപെ​ടാൻ അത്‌ എന്നെ സഹായി​ക്കു​ന്നു.” (സുഭാ. 19:11) ഇനി, ഒരു ഭാര്യക്കു ഭർത്താ​വി​നോട്‌ ആദരവു​ണ്ടെന്ന്‌ എങ്ങനെ കാണി​ക്കാം? ഭർത്താ​വി​നെ​ക്കു​റിച്ച്‌ നല്ല രീതി​യിൽ മറ്റുള്ള​വ​രോട്‌ സംസാ​രി​ച്ചു​കൊണ്ട്‌. (എഫെ. 5:33) അവൾ കുത്തു​വാ​ക്കു​കൾ പറയു​ക​യോ കളിയാ​ക്കു​ക​യോ വിലയി​ടി​ക്കുന്ന തരം പേരുകൾ ഭർത്താ​വി​നെ വിളി​ക്കു​ക​യോ ചെയ്യില്ല. അത്തരം പെരു​മാ​റ്റം കുടും​ബ​ത്തി​ന്റെ ബലം തകർക്കുന്ന തുരു​മ്പു​പോ​ലെ​യാ​ണെന്ന്‌ അവൾ തിരി​ച്ച​റി​യും. (സുഭാ. 14:1) ഇറ്റലി​യി​ലുള്ള ഒരു സഹോ​ദ​രി​യു​ടെ കാര്യ​മെ​ടു​ക്കാം. സഹോ​ദ​രി​യു​ടെ ഭർത്താ​വിന്‌ അമിത​മാ​യി ഉത്‌ക​ണ്‌ഠ​പ്പെ​ടുന്ന ഒരു പ്രശ്‌ന​മുണ്ട്‌. സഹോ​ദരി ഇങ്ങനെ പറയുന്നു: “എന്റെ ഭർത്താവ്‌ എന്തിനും ഏതിനും ഉത്‌ക​ണ്‌ഠ​പ്പെ​ടു​ന്ന​താ​യി പലപ്പോ​ഴും എനിക്കു തോന്നാ​റുണ്ട്‌. അതു​കൊണ്ട്‌ മുമ്പൊ​ക്കെ എന്റെ വാക്കു​ക​ളും മുഖഭാ​വ​വും അദ്ദേഹ​ത്തോട്‌ ആദരവി​ല്ലാത്ത രീതി​യി​ലാ​യി​രു​ന്നു. പക്ഷേ, ആദര​വോ​ടെ സംസാ​രി​ക്കുന്ന ആളുക​ളോട്‌ ഞാൻ എത്രമാ​ത്രം സഹവസി​ച്ചോ അത്രമാ​ത്രം എന്റെ ഭർത്താ​വി​നോ​ടും ആദര​വോ​ടെ ഇടപെ​ടാൻ എനിക്കു തോന്നി.”

10. മാതാ​പി​താ​ക്ക​ളോട്‌ ആദരവു​ണ്ടെന്നു ചെറു​പ്പ​ക്കാർക്ക്‌ എങ്ങനെ കാണി​ക്കാം?

¹⁰ ചെറു​പ്പ​ക്കാ​രേ, മാതാ​പി​താ​ക്കൾ നിങ്ങളു​ടെ കാര്യ​ത്തിൽ വെച്ചി​രി​ക്കുന്ന നിയമങ്ങൾ അനുസ​രി​ക്കുക. (എഫെ. 6:1-3) അവരോട്‌ ആദര​വോ​ടെ സംസാ​രി​ക്കുക. (പുറ. 21:17) ഇനി പ്രായ​മാ​കു​മ്പോൾ മാതാ​പി​താ​ക്കൾക്കു കൂടുതൽ സഹായം വേണ്ടി​വ​ന്നേ​ക്കാം. അത്‌ ഏറ്റവും നന്നായി ചെയ്യാൻ ശ്രമി​ക്കുക. മരിയ സഹോ​ദരി അതാണ്‌ ചെയ്‌തത്‌. സഹോ​ദ​രി​യു​ടെ പപ്പ ഒരു യഹോ​വ​യു​ടെ സാക്ഷി​യാ​യി​രു​ന്നില്ല. അദ്ദേഹം വയ്യാതാ​യ​പ്പോൾ മരിയ​യോ​ടു വളരെ ദയയി​ല്ലാ​തെ​യാണ്‌ ഇടപെ​ട്ടി​രു​ന്നത്‌. അതു കാരണം അദ്ദേഹത്തെ പരിച​രി​ക്കു​ന്നതു മരിയ​യ്‌ക്കു വളരെ ബുദ്ധി​മു​ട്ടാ​യി​രു​ന്നു. സഹോ​ദരി പറയുന്നു: “പപ്പയോട്‌ ആദരവ്‌ തോന്നാൻ മാത്രമല്ല അതു കാണി​ക്കാ​നും എന്നെ സഹായി​ക്കണേ എന്നു ഞാൻ പ്രാർഥി​ച്ചു. മാതാ​പി​താ​ക്കളെ ബഹുമാ​നി​ക്കാൻ യഹോവ പറഞ്ഞി​ട്ടു​ണ്ടെ​ങ്കിൽ അതു ചെയ്യാൻവേണ്ട ശക്തിയും യഹോവ തരും എന്ന്‌ എനിക്ക്‌ ഉറപ്പാ​യി​രു​ന്നു. പപ്പയോട്‌ ആദര​വോ​ടെ ഇടപെ​ടാൻ, പപ്പ തന്റെ സ്വഭാ​വ​ത്തിൽ മാറ്റം വരുത്തേണ്ട ആവശ്യ​മി​ല്ലെന്നു ഞാൻ പതിയെ മനസ്സി​ലാ​ക്കി.” കുടും​ബാം​ഗ​ങ്ങ​ളു​ടെ ഭാഗത്ത്‌ തെറ്റുകൾ പറ്റിയാ​ലും നമ്മൾ അവരെ ബഹുമാ​നി​ക്കാൻ ശ്രമി​ക്കു​മ്പോൾ, നമ്മൾ ശരിക്കും കുടും​ബ​ക്ര​മീ​ക​രണം ഏർപ്പെ​ടു​ത്തിയ യഹോ​വയെ ആദരി​ക്കു​ന്നെന്നു കാണി​ക്കു​ക​യാണ്‌.

സഹോ​ദ​ര​ങ്ങ​ളോട്‌ ആദരവ്‌ കാണി​ക്കു​ക

11. സഹോ​ദ​ര​ങ്ങ​ളോട്‌ ആദര​വോ​ടെ ഇടപെ​ടാൻ ബുദ്ധി​മുട്ട്‌ തോന്നി​യേ​ക്കാ​വു​ന്നത്‌ എപ്പോ​ഴാണ്‌?

¹¹ തടസ്സം. നമ്മുടെ സഹോ​ദ​രങ്ങൾ ബൈബിൾനി​ല​വാ​രങ്ങൾ അനുസ​രിച്ച്‌ ജീവി​ക്കാൻ ശ്രമി​ക്കു​ന്ന​വ​രാണ്‌. എങ്കിലും ചില​പ്പോൾ അവരിൽ ചിലർ ദയയി​ല്ലാ​തെ പെരു​മാ​റു​ക​യോ നമ്മളെ​ക്കു​റിച്ച്‌ തെറ്റായി ചിന്തി​ക്കു​ക​യോ നമ്മളെ അസ്വസ്ഥ​രാ​ക്കു​ക​യോ ചെയ്‌തേ​ക്കാം. ഒരു സഹവി​ശ്വാ​സി എന്തെങ്കി​ലും ‘പരാതി​ക്കു കാരണ​മു​ണ്ടാ​ക്കു​മ്പോൾ’ അവരോ​ടു ബഹുമാ​ന​ത്തോ​ടെ ഇടപെ​ടാൻ നമുക്കു ബുദ്ധി​മുട്ട്‌ തോന്നാം. (കൊലോ. 3:13) ആ സമയത്തും ആദരവ്‌ കാണി​ക്കാൻ നമ്മളെ എന്തു സഹായി​ക്കും?

12. സഹോ​ദ​ര​ങ്ങ​ളോട്‌ ആദരവ്‌ കാണി​ക്കു​ന്നതു പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌? (2 പത്രോസ്‌ 2:9-12)

¹² ആദരവ്‌ കാണി​ക്കേ​ണ്ടത്‌ എന്തു​കൊണ്ട്‌? (2 പത്രോസ്‌ 2:9-12 വായി​ക്കുക.) ഒന്നാം നൂറ്റാ​ണ്ടി​ലെ ക്രിസ്‌തീ​യ​സ​ഭ​യിൽ ആദരവി​ല്ലാ​തെ സംസാ​രിച്ച ചില​രെ​ക്കു​റിച്ച്‌ പത്രോസ്‌ തന്റെ രണ്ടാമത്തെ കത്തിൽ പറയു​ന്നുണ്ട്‌. അവർ ‘മഹത്ത്വ​മാർന്ന​വ​രെ​ക്കു​റിച്ച്‌’ അഥവാ മൂപ്പന്മാ​രെ​ക്കു​റിച്ച്‌ ആദരവി​ല്ലാ​തെ സംസാ​രി​ച്ചു. ഇതു കണ്ട വിശ്വ​സ്‌ത​രായ ദൂതന്മാർ എങ്ങനെ പ്രതി​ക​രി​ച്ചു? “യഹോ​വ​യോ​ടുള്ള ആദരവ്‌ കാരണം,” തെറ്റു​കാർക്ക്‌ എതിരെ അവർ ഒരു അധി​ക്ഷേ​പ​വാ​ക്കു​പോ​ലും ഉച്ചരി​ച്ചില്ല. അതെക്കു​റിച്ച്‌ ഒന്ന്‌ ചിന്തി​ച്ചു​നോ​ക്കൂ. പൂർണ​രായ ദൂതന്മാർ അഹങ്കാ​രി​ക​ളായ ആ മനുഷ്യ​രെ​ക്കു​റിച്ച്‌ ദേഷ്യ​ത്തോ​ടെ സംസാ​രി​ച്ചില്ല. പകരം ന്യായം വിധി​ക്കാ​നും ശിക്ഷി​ക്കാ​നും അധികാ​ര​മുള്ള യഹോ​വ​യ്‌ക്ക്‌ അവർ ആ പ്രശ്‌നം വിട്ടു​കൊ​ടു​ത്തു. (റോമ. 14:10-12; യൂദ 9 താരത​മ്യം ചെയ്യുക.) ഇതു നമുക്ക്‌ നല്ലൊരു പാഠമാണ്‌. ദൂതന്മാർ എതിരാ​ളി​ക​ളു​ടെ കാര്യ​ത്തിൽപ്പോ​ലും ആദരവി​ല്ലാ​തെ സംസാ​രി​ച്ചില്ല. അങ്ങനെ​യെ​ങ്കിൽ യഹോ​വയെ സ്‌നേ​ഹി​ക്കുന്ന നമ്മുടെ സഹോ​ദ​രീ​സ​ഹോ​ദ​ര​ന്മാ​രോ​ടു നമ്മൾ എത്ര ആദര​വോ​ടെ ഇടപെ​ടണം? ബൈബിൾ പറയു​ന്നത്‌, ബഹുമാ​നം കാണി​ക്കു​ന്ന​തിൽ ‘മുൻ​കൈ​യെ​ടു​ക്കാ​നാണ്‌.’ (റോമ. 12:10) അങ്ങനെ ചെയ്യു​മ്പോൾ നമ്മൾ യഹോ​വയെ ആദരി​ക്കു​ക​യാണ്‌.

13-14. സഭയി​ലു​ള്ള​വ​രോ​ടു നമുക്ക്‌ ആദരവ്‌ കാണി​ക്കാ​നാ​കു​ന്നത്‌ എങ്ങനെ​യാണ്‌? ഉദാഹ​ര​ണങ്ങൾ പറയുക. (ചിത്ര​ങ്ങ​ളും കാണുക.)

¹³ ആദരവ്‌ എങ്ങനെ കാണി​ക്കാം? മൂപ്പന്മാ​രേ, സഹോ​ദ​ര​ങ്ങളെ പഠിപ്പി​ക്കു​മ്പോൾ അതു സ്‌നേ​ഹ​ത്തോ​ടെ​യാണ്‌ ചെയ്യു​ന്ന​തെന്ന്‌ ഉറപ്പു​വ​രു​ത്തുക. (ഫിലേ. 8, 9) ഒരാൾക്ക്‌ ഉപദേശം കൊടു​ക്കേ​ണ്ടി​വ​രു​മ്പോൾ അതു ദയയോ​ടെ ചെയ്യുക. നിങ്ങൾ ദേഷ്യ​പ്പെ​ട്ടി​രി​ക്കുന്ന ഒരു സമയത്ത്‌ ഉപദേശം കൊടു​ക്കാ​തി​രി​ക്കുക. സഹോ​ദ​രി​മാ​രേ, മറ്റുള്ള​വ​രു​ടെ കുറ്റവും കുറവും പറഞ്ഞു​ന​ട​ക്കു​ക​യോ പരദൂ​ഷണം പറയു​ക​യോ ചെയ്യാ​തി​രു​ന്നു​കൊണ്ട്‌ പരസ്‌പരം ആദരി​ക്കാൻ സഭയി​ലു​ള്ള​വരെ നിങ്ങൾക്കു സഹായി​ക്കാ​നാ​കും. (തീത്തോ. 2:3-5) ഇനി നമുക്ക്‌ എല്ലാവർക്കും മൂപ്പന്മാ​രെ ആദരി​ക്കു​ന്നു​ണ്ടെന്നു കാണി​ക്കാൻ കഴിയും. എങ്ങനെ? അവരോ​ടു ചേർന്ന്‌ പ്രവർത്തി​ക്കുക. അതു​പോ​ലെ മീറ്റി​ങ്ങു​കൾ നടത്താ​നും പ്രസം​ഗ​പ്ര​വർത്തനം സംഘടി​പ്പി​ക്കാ​നും ‘തെറ്റായ ചുവടു വെക്കു​ന്ന​വരെ’ സഹായി​ക്കാ​നും ഒക്കെയാ​യി അവർ ചെയ്യുന്ന കഠിനാ​ധ്വാ​നത്തെ വിലമ​തി​ക്കു​ന്നു​ണ്ടെന്ന്‌ കാണി​ക്കുക.—ഗലാ. 6:1; 1 തിമൊ. 5:17.

¹⁴ റോസി​യോ സഹോ​ദ​രിക്ക്‌ ഒരു മൂപ്പൻ ബുദ്ധി​യു​പ​ദേശം കൊടു​ത്ത​പ്പോൾ, പിന്നെ അദ്ദേഹത്തെ ബഹുമാ​നി​ക്കാൻ സഹോ​ദ​രി​ക്കു ബുദ്ധി​മുട്ട്‌ തോന്നി. സഹോ​ദരി പറയുന്നു: “ബുദ്ധി​യു​പ​ദേശം തന്ന രീതി ശരിയാ​യി​ല്ലെന്ന്‌ എനിക്കു തോന്നി. അതു​കൊണ്ട്‌ ഞാൻ വീട്ടിൽ ചെന്ന്‌ സഹോ​ദ​ര​നെ​ക്കു​റി​ച്ചുള്ള കുറ്റ​മൊ​ക്കെ പറയാൻതു​ടങ്ങി. പുറമേ ഞാൻ കാണി​ച്ചി​ല്ലെ​ങ്കി​ലും ഉള്ളിൽ അദ്ദേഹ​ത്തോ​ടു ദേഷ്യ​മാ​യി​രു​ന്നു. എന്നെ സഹായി​ക്കാ​നൊ​ന്നു​മല്ല അദ്ദേഹം ബുദ്ധി​യു​പ​ദേശം തന്നതെന്നു ചിന്തി​ച്ചു​കൊണ്ട്‌ ഞാൻ ആ ഉപദേശം തള്ളിക്ക​ളഞ്ഞു.” മാറ്റം വരുത്താൻ റോസി​യോ​യെ സഹായി​ച്ചത്‌ എന്താണ്‌? സഹോ​ദരി പറയുന്നു: “ബൈബിൾ വായി​ച്ച​പ്പോൾ 1 തെസ്സ​ലോ​നി​ക്യർ 5:12, 13 ഞാൻ കണ്ടു. ആ സഹോ​ദ​ര​നോ​ടു ഞാൻ ബഹുമാ​നം കാണി​ക്കു​ന്നി​ല്ലെന്ന്‌ എനിക്കു മനസ്സി​ലാ​യി. മനസ്സാക്ഷി എന്നെ കുറ്റ​പ്പെ​ടു​ത്താൻ തുടങ്ങി. അപ്പോൾ ഞാൻ യഹോ​വ​യോ​ടു പ്രാർഥി​ച്ചു. എന്നിട്ട്‌ എന്റെ മനോ​ഭാ​വ​ത്തിൽ മാറ്റം വരുത്താൻ സഹായി​ക്കുന്ന വിവര​ങ്ങൾക്കാ​യി നമ്മുടെ പ്രസി​ദ്ധീ​ക​ര​ണ​ങ്ങ​ളിൽ തിരഞ്ഞു. അങ്ങനെ പഠിച്ച​പ്പോൾ, പ്രശ്‌നം എന്റെ അഹങ്കാ​ര​മാ​ണെന്ന്‌ മനസ്സി​ലാ​യി. സഹോ​ദ​രന്റെ ഭാഗത്ത്‌ ഒരു തെറ്റു​മി​ല്ലാ​യി​രു​ന്നു. മറ്റുള്ള​വ​രോ​ടു ബഹുമാ​നം കാണി​ക്ക​ണ​മെ​ങ്കിൽ എനിക്കു താഴ്‌മ വേണ​മെന്ന്‌ ഇപ്പോൾ എനിക്ക​റി​യാം. ഞാൻ ഇനിയും പുരോ​ഗ​മി​ക്കാ​നുണ്ട്‌. പക്ഷേ, മറ്റുള്ള​വ​രോട്‌ ആദരവ്‌ കാണി​ക്കാൻ ഞാൻ ശ്രമി​ക്കു​മ്പോൾ യഹോവ അതിൽ സന്തോ​ഷി​ക്കും.”

ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോട്‌ ആദരവ്‌ കാണി​ക്കു​ക

15. ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോട്‌ ആദരവ്‌ കാണി​ക്കാൻ ബുദ്ധി​മുട്ട്‌ തോന്നി​യേ​ക്കാ​വു​ന്നത്‌ എന്തു​കൊണ്ട്‌?

¹⁵ തടസ്സം. ശുശ്രൂ​ഷ​യി​ലാ​യി​രി​ക്കു​മ്പോൾ ബൈബിൾസ​ത്യ​ത്തോട്‌ യാതൊ​രു സ്‌നേ​ഹ​വും ഇല്ലാത്ത ആളുകളെ നമ്മൾ കണ്ടുമു​ട്ടി​യേ​ക്കാം. (എഫെ. 4:18) ചെറു​പ്പം​മു​തലേ വിശ്വ​സി​ച്ചു​പോ​രുന്ന കാര്യങ്ങൾ കാരണം ചിലർ നമ്മൾ പറയുന്ന സത്യം കേൾക്ക​ണ​മെ​ന്നില്ല. ഇനി, എന്തു ചെയ്‌താ​ലും സന്തോ​ഷി​പ്പി​ക്കാൻ പറ്റാത്ത തൊഴി​ലു​ട​മ​യോ സ്‌കൂൾ ടീച്ചർമാ​രോ ആയിരി​ക്കാം നമുക്കു​ള്ളത്‌. കൂടെ ജോലി ചെയ്യു​ന്ന​വ​രോ, കൂടെ പഠിക്കു​ന്ന​വ​രോ നമ്മളോ​ടു നന്നായി ഇടപെ​ടണം എന്നുമില്ല. അങ്ങനെ​യാ​കു​മ്പോൾ പതിയെ അവരോ​ടുള്ള ആദരവ്‌ കുറഞ്ഞു​പോ​കാ​നും നമ്മൾ ദയയി​ല്ലാ​തെ പെരു​മാ​റാ​നും ഉള്ള സാധ്യ​ത​യുണ്ട്‌.

16. ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോട്‌ ആദരവ്‌ കാണി​ക്കേ​ണ്ടത്‌ എന്തു​കൊണ്ട്‌? (1 പത്രോസ്‌ 2:12; 3:15)

¹⁶ ആദരവ്‌ കാണി​ക്കേ​ണ്ടത്‌ എന്തു​കൊണ്ട്‌? പുറത്തു​ള്ള​വ​രോ​ടു നമ്മൾ എങ്ങനെ ഇടപെ​ടു​ന്നു എന്നത്‌ യഹോവ പ്രത്യേ​കം ശ്രദ്ധി​ക്കു​ന്നു​ണ്ടെന്ന്‌ ഓർക്കണം. നമ്മുടെ നല്ല പെരു​മാ​റ്റം കണ്ട്‌ ആളുകൾ ‘ദൈവത്തെ മഹത്ത്വ​പ്പെ​ടു​ത്തി​യേ​ക്കാം’ എന്ന്‌ അപ്പോ​സ്‌ത​ല​നായ പത്രോസ്‌ ക്രിസ്‌ത്യാ​നി​കളെ ഓർമി​പ്പി​ച്ചു. അതു​കൊ​ണ്ടാണ്‌ മറ്റുള്ള​വ​രോ​ടു വിശ്വാ​സ​ത്തെ​ക്കു​റിച്ച്‌ സംസാ​രി​ക്കു​മ്പോൾ ‘സൗമ്യ​ത​യും ആഴമായ ബഹുമാ​ന​വും’ കാണി​ക്കാൻ പത്രോസ്‌ പറഞ്ഞത്‌. (1 പത്രോസ്‌ 2:12; 3:15 വായി​ക്കുക.) നമ്മുടെ വിശ്വാ​സ​ത്തെ​ക്കു​റിച്ച്‌ അധികാ​രി​ക​ളോ​ടോ മറ്റുള്ള​വ​രോ​ടോ ഒക്കെ പറയു​മ്പോൾ നല്ല ആദര​വോ​ടെ വേണം എപ്പോ​ഴും സംസാ​രി​ക്കാൻ. കാരണം യഹോവ നമ്മളെ നിരീ​ക്ഷി​ക്കു​ന്നുണ്ട്‌; നമ്മൾ എന്തു പറയുന്നു, എങ്ങനെ പറയുന്നു എന്നതെ​ല്ലാം ശ്രദ്ധി​ക്കു​ന്നു​മുണ്ട്‌. ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോട്‌ ആദര​വോ​ടെ ഇടപെ​ടാ​നുള്ള എത്ര ശക്തമാ​യൊ​രു കാരണം!

17. ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോ​ടു നമുക്ക്‌ എങ്ങനെ ആദരവ്‌ കാണി​ക്കാം?

¹⁷ ആദരവ്‌ എങ്ങനെ കാണി​ക്കാം? ശുശ്രൂ​ഷ​യിൽ ആയിരി​ക്കു​മ്പോൾ ബൈബി​ളി​നെ​ക്കു​റിച്ച്‌ അധികം അറിവി​ല്ലാ​ത്ത​വ​രെ​യോ ഒട്ടും അറിയാ​ത്ത​വ​രെ​യോ നമ്മൾ കണ്ടേക്കാം. പക്ഷേ, അതിന്റെ പേരിൽ നമ്മൾ ഒരിക്ക​ലും അവരെ വില കുറഞ്ഞ​വ​രാ​യി കാണു​ക​യോ ആ രീതി​യിൽ അവരോട്‌ ഇടപെ​ടു​ക​യോ ഇല്ല. പകരം അവർ ദൈവ​ത്തി​ന്റെ കണ്ണിൽ അമൂല്യ​വ​സ്‌തു​ക്ക​ളാ​ണെ​ന്നും നമ്മളെ​ക്കാൾ ശ്രേഷ്‌ഠ​രാ​ണെ​ന്നും നമ്മൾ ചിന്തി​ക്കും. (ഹഗ്ഗാ. 2:7; ഫിലി. 2:3) വിശ്വാ​സ​ത്തെ​പ്രതി ആരെങ്കി​ലും നമ്മളെ കളിയാ​ക്കു​ന്നെ​ങ്കി​ലോ? തിരിച്ച്‌ അതേ രീതി​യിൽ പ്രതി​ക​രി​ക്കു​ക​യോ തമാശ​രൂ​പ​ത്തിൽ എന്തെങ്കി​ലും പറഞ്ഞ്‌ അവരെ പരിഹ​സി​ക്കു​ക​യോ ചെയ്യരുത്‌. (1 പത്രോ. 2:23) ഇനി വിഷമി​പ്പി​ക്കുന്ന എന്തെങ്കി​ലും പറഞ്ഞു​പോ​യെ​ങ്കിൽ ഉടനെ ക്ഷമ ചോദി​ക്കുക. ജോലി​സ്ഥ​ലത്ത്‌ നമുക്ക്‌ എങ്ങനെ മറ്റുള്ള​വരെ ആദരി​ക്കാം? നല്ല കഠിനാ​ധ്വാ​നി​കൾ ആയിരി​ക്കുക. സഹജോ​ലി​ക്കാ​രു​ടെ​യും തൊഴി​ലു​ട​മ​യു​ടെ​യും നല്ല ഗുണങ്ങൾ കാണാൻ ശ്രമി​ക്കുക. (തീത്തോ. 2:9, 10) നിങ്ങൾ സത്യസ​ന്ധ​രും കഠിനാ​ധ്വാ​നി​ക​ളും ആണെങ്കിൽ അതു മനുഷ്യ​രെ സന്തോ​ഷി​പ്പി​ക്കു​ക​യോ സന്തോ​ഷി​പ്പി​ക്കാ​തി​രി​ക്കു​ക​യോ ചെയ്‌തേ​ക്കാം. പക്ഷേ അത്‌ ഉറപ്പാ​യും ദൈവത്തെ സന്തോ​ഷി​പ്പി​ക്കും.—കൊലോ. 3:22, 23.

18. ആദരവ്‌ വളർത്തി​യെ​ടു​ക്കു​ക​യും കാണി​ക്കു​ക​യും ചെയ്യു​ന്നത്‌ പ്രയോ​ജ​ന​ക​ര​മാ​ണെന്നു പറയു​ന്നത്‌ എന്തു​കൊണ്ട്‌?

¹⁸ ആദരവ്‌ വളർത്തി​യെ​ടു​ക്കാ​നും കാണി​ക്കാ​നും ഉള്ള എത്ര നല്ല കാരണ​ങ്ങ​ളാ​ണു നമ്മൾ കണ്ടത്‌. നമ്മൾ പഠിച്ച​തു​പോ​ലെ, കുടും​ബ​ത്തിൽ ആദരവ്‌ കാണി​ക്കു​മ്പോൾ കുടും​ബ​ത്തി​ന്റെ തലയായ യഹോ​വയെ ആദരി​ക്കു​ക​യാണ്‌. അതു​പോ​ലെ സഹോ​ദ​ര​ങ്ങ​ളോട്‌ നമ്മൾ ആദരവ്‌ കാണി​ക്കു​മ്പോ​ഴും സ്വർഗീയ പിതാ​വി​നെ ബഹുമാ​നി​ക്കു​ക​യാണ്‌. ഇനി, ദൈവ​ജ​ന​ത്തി​ന്റെ ഭാഗമ​ല്ലാ​ത്ത​വ​രോട്‌ ആദര​വോ​ടെ ഇടപെ​ടു​മ്പോൾ ഒരുനാൾ യഹോ​വയെ മഹത്ത്വ​പ്പെ​ടു​ത്താ​നും ബഹുമാ​നി​ക്കാ​നും ഉള്ള അവസരം നമ്മൾ അവർക്കാ​യി ഒരുക്കു​ക​യാണ്‌. ഇങ്ങനെ​യൊ​ക്കെ ചെയ്‌താ​ലും ചിലർ നമ്മളെ തിരിച്ച്‌ ബഹുമാ​നി​ക്ക​ണ​മെ​ന്നില്ല. പക്ഷേ ഈ ഗുണം വളർത്തി​യെ​ടു​ക്കു​ക​യും കാണി​ക്കു​ക​യും ചെയ്യു​ന്നെ​ങ്കിൽ അതു നമുക്കു പ്രയോ​ജനം ചെയ്യും. എന്തു​കൊണ്ട്‌? യഹോവ നമ്മളെ അനു​ഗ്ര​ഹി​ക്കും. യഹോവ ഈ ഉറപ്പു​ത​ന്നി​രി​ക്കു​ന്നു: “എന്നെ ബഹുമാ​നി​ക്കു​ന്ന​വരെ ഞാൻ ബഹുമാ​നി​ക്കും.”—1 ശമു. 2:30.