യേശു—സഹതാ​പ​മുള്ള ഒരു മഹാപു​രോ​ഹി​തൻ

1-2. (എ) യഹോവ എന്തു​കൊ​ണ്ടാണ്‌ തന്റെ മകനെ ഭൂമി​യി​ലേക്ക്‌ അയച്ചത്‌? (ബി) ഈ ലേഖന​ത്തിൽ നമ്മൾ എന്തു പഠിക്കും? (എബ്രായർ 5:7-9)

ഏതാണ്ട്‌ 2000 വർഷങ്ങൾക്കു മുമ്പ്‌ ദൈവ​മായ യഹോവ തന്റെ പ്രിയ​മ​കനെ ഭൂമി​യി​ലേക്ക്‌ അയച്ചു. എന്തിനു​വേണ്ടി? മനുഷ്യ​രെ പാപത്തി​ന്റെ​യും മരണത്തി​ന്റെ​യും പിടി​യിൽനിന്ന്‌ മോചി​പ്പി​ക്കുക എന്നതും സാത്താൻ വരുത്തി​വെച്ച പ്രശ്‌നങ്ങൾ ഇല്ലാതാ​ക്കുക എന്നതും അതിന്റെ ഒരു ലക്ഷ്യമാ​യി​രു​ന്നു. (യോഹ. 3:16; 1 യോഹ. 3:8) അതു​പോ​ലെ യേശു ഒരു മനുഷ്യ​നാ​യി ഭൂമി​യിൽ ജീവി​ക്കു​ന്ന​തു​കൊണ്ട്‌ മറ്റൊരു പ്രയോ​ജ​ന​വും ഉണ്ടെന്ന്‌ യഹോ​വ​യ്‌ക്ക്‌ അറിയാ​മാ​യി​രു​ന്നു. അത്‌ യേശു​വി​നെ കൂടുതൽ അനുക​മ്പ​യും സഹതാ​പ​വും ഉള്ള ഒരു മഹാപു​രോ​ഹി​തൻ ആക്കുമാ​യി​രു​ന്നു. എ.ഡി. 29-ലെ തന്റെ സ്‌നാ​ന​ത്തി​നു ശേഷം യേശു നമ്മുടെ മഹാപു​രോ​ഹി​ത​നാ​യി സേവി​ക്കാൻതു​ടങ്ങി.a

² ഈ ലേഖന​ത്തിൽ, ഭൂമി​യിൽവെ​ച്ചു​ണ്ടായ അനുഭ​വങ്ങൾ യേശു​വി​നെ എങ്ങനെ​യാ​ണു സഹതാ​പ​മുള്ള ഒരു മഹാപു​രോ​ഹി​ത​നാ​യി​ത്തീ​രാൻ കൂടുതൽ സഹായി​ച്ച​തെന്നു നമ്മൾ കാണും. ഈയൊ​രു ഉത്തരവാ​ദി​ത്വം ചെയ്യു​ന്ന​തിൽ യേശു ‘പൂർണ​നാ​യി​ത്തീർന്നു’ എന്നു മനസ്സി​ലാ​ക്കു​ന്നതു നമ്മളെ എങ്ങനെ സഹായി​ക്കും? അക്കാര്യം ഓർത്താൽ സ്വന്തം പാപങ്ങ​ളും ബലഹീ​ന​ത​ക​ളും കാരണം തളർന്നി​രി​ക്കു​മ്പോൾപ്പോ​ലും പ്രാർഥ​ന​യിൽ യഹോ​വ​യോട്‌ അടുത്ത്‌ ചെല്ലാൻ നമുക്കു തോന്നും.—എബ്രായർ 5:7-9 വായി​ക്കുക.

ദൈവ​ത്തി​ന്റെ പ്രിയ​മകൻ ഭൂമി​യി​ലേക്കു വരുന്നു

3-4. ഭൂമി​യി​ലേക്ക്‌ വന്നപ്പോൾ എന്തെല്ലാം വലിയ മാറ്റങ്ങൾ യേശു​വി​ന്റെ ജീവി​ത​ത്തിൽ ഉണ്ടായി?

³ നമ്മളിൽ പലർക്കും ജീവി​ത​ത്തിൽ പല മാറ്റങ്ങ​ളും സംഭവി​ച്ചി​ട്ടു​ണ്ടാ​കാം. കുടും​ബാം​ഗ​ങ്ങ​ളെ​യും കൂട്ടു​കാ​രെ​യും വിട്ട്‌ ദൂരേക്കു പോകു​ന്ന​തു​പോ​ലുള്ള മാറ്റങ്ങൾ ശരിക്കും ബുദ്ധി​മു​ട്ടു നിറഞ്ഞ​താണ്‌. എന്നാൽ യേശു​വി​നു​ണ്ടായ അത്രയും വലിയ മാറ്റങ്ങൾ ഒരു മനുഷ്യ​നും നേരി​ട്ടി​ട്ടില്ല. സ്വർഗ​ത്തി​ലെ ദൈവ​ത്തി​ന്റെ ആത്മപു​ത്ര​ന്മാ​രിൽ ഏറ്റവും പ്രമു​ഖ​സ്ഥാ​നം യേശു​വി​നാ​യി​രു​ന്നു. ഓരോ ദിവസ​വും യഹോ​വ​യു​ടെ സ്‌നേഹം നുകരു​ക​യും ദൈവ​ത്തി​ന്റെ “വലതു​വ​ശത്ത്‌” ഇരുന്ന്‌ ദൈവത്തെ സേവി​ക്കു​ന്ന​തിൽ സന്തോ​ഷി​ക്കു​ക​യും ചെയ്‌ത ആളായി​രു​ന്നു യേശു. (സങ്കീ. 16:11; സുഭാ. 8:30) എങ്കിലും ഫിലി​പ്പി​യർ 2:7 പറയു​ന്ന​തു​പോ​ലെ, “തനിക്കു​ള്ള​തെ​ല്ലാം ഉപേക്ഷിച്ച്‌,” സ്വർഗ​ത്തി​ലെ ഉന്നതമായ സ്ഥാന​മെ​ല്ലാം ഉപേക്ഷിച്ച്‌ യേശു ഭൂമി​യിൽ അപൂർണ​രായ മനുഷ്യ​രോ​ടൊ​പ്പം ജീവി​ക്കാൻ മനസ്സ്‌ കാണിച്ചു.

⁴ ഇനി യേശു ഒരു മനുഷ്യ​നാ​യി ഭൂമി​യിൽ ജനിച്ച​തി​നു ശേഷമുള്ള ആദ്യവർഷ​ങ്ങ​ളി​ലെ സംഭവങ്ങൾ നോക്കുക. ഒരു പാവപ്പെട്ട കുടും​ബ​ത്തി​ലാണ്‌ യേശു ജനിച്ചത്‌. കുഞ്ഞു ജനിച്ച്‌ കഴിഞ്ഞ്‌ മറിയ​യും യോ​സേ​ഫും അർപ്പിച്ച ബലിയിൽനിന്ന്‌ നമുക്ക്‌ അതു മനസ്സി​ലാ​ക്കാ​നാ​കും. (ലേവ്യ 12:8; ലൂക്കോ. 2:24) മിശിഹ ജനി​ച്ചെന്ന്‌ ദുഷ്ടനായ ഹെരോദ്‌ രാജാവ്‌ അറിഞ്ഞ​പ്പോൾ അയാൾ യേശു​വി​നെ കൊല്ലാൻ നോക്കി. ഹെരോ​ദി​ന്റെ കൈയിൽനിന്ന്‌ രക്ഷപ്പെ​ടാൻവേണ്ടി ആ കുടും​ബ​ത്തി​നു കുറച്ച്‌ കാലം ഈജി​പ്‌തിൽ അഭയാർഥി​ക​ളാ​യി കഴി​യേ​ണ്ടി​വന്നു. (മത്താ. 2:13, 15) സ്വർഗ​ത്തി​ലേ​തിൽനി​ന്നും എത്രയോ വ്യത്യ​സ്‌ത​മാ​യൊ​രു ജീവിതം!

5. ഭൂമി​യി​ലാ​യി​രു​ന്ന​പ്പോൾ യേശു എന്തെല്ലാം കണ്ടു, തന്റെ ഈ അനുഭ​വങ്ങൾ മഹാപു​രോ​ഹി​തൻ എന്ന ഉത്തരവാ​ദി​ത്വ​ത്തി​നാ​യി യേശു​വി​നെ ഒരുക്കി​യത്‌ എങ്ങനെ​യാണ്‌? (ചിത്ര​വും കാണുക.)

⁵ ഭൂമി​യി​ലാ​യി​രു​ന്ന​പ്പോൾ യേശു തന്റെ ചുറ്റു​മു​ള്ളവർ ദുരി​തങ്ങൾ അനുഭ​വി​ക്കു​ന്നതു കണ്ടു. പ്രിയ​പ്പെ​ട്ടവർ മരിക്കു​മ്പോ​ഴുള്ള വേദന യേശു സ്വന്തം ജീവി​ത​ത്തിൽ അനുഭ​വി​ച്ച​റി​ഞ്ഞു. സാധ്യ​ത​യ​നു​സ​രിച്ച്‌ വളർത്തു​പി​താ​വായ യോ​സേഫ്‌, യേശു ഭൂമി​യി​ലാ​യി​രി​ക്കു​മ്പോൾ മരിച്ചി​ട്ടു​ണ്ടാ​കാം. ഇനി ശുശ്രൂ​ഷ​യു​ടെ സമയത്ത്‌ കുഷ്‌ഠ​രോ​ഗി​ക​ളെ​യും അന്ധരെ​യും തളർവാ​ത​രോ​ഗി​ക​ളെ​യും മക്കൾ നഷ്ടപ്പെട്ട മാതാ​പി​താ​ക്ക​ളെ​യും യേശു നേരിട്ട്‌ കണ്ടു. അവരോട്‌ യേശു​വിന്‌ അനുകമ്പ തോന്നി. (മത്താ. 9:2, 6; 15:30; 20:34; മർക്കോ. 1:40, 41; ലൂക്കോ. 7:13) മനുഷ്യ​രു​ടെ ഈ കഷ്ടപ്പാ​ടു​കൾ യേശു സ്വർഗ​ത്തി​ലി​രുന്ന്‌ കണ്ടിട്ടു​ള്ള​താണ്‌. എന്നാൽ ഒരു മനുഷ്യ​നാ​യി ഭൂമി​യിൽ വന്നപ്പോൾ ഈ പ്രശ്‌ന​ങ്ങളെ പുതി​യൊ​രു വീക്ഷണ​കോ​ണിൽനിന്ന്‌ കാണാൻ യേശു​വി​നു കഴിഞ്ഞു. (യശ. 53:4) മനുഷ്യ​രു​ടെ വികാ​ര​ങ്ങ​ളും വേദന​ക​ളും നിസ്സഹാ​യ​ത​യും യേശു​വിന്‌ അപ്പോൾ പൂർണ​മാ​യും മനസ്സി​ലാ​ക്കാ​നാ​യി. ഇനി യേശു​വി​നു​തന്നെ സാധാരണ മനുഷ്യർക്കു​ണ്ടാ​കുന്ന മനോ​വേ​ദ​ന​യും ദുഃഖ​വും ക്ഷീണവും ഒക്കെ അനുഭ​വി​ക്കേ​ണ്ടി​വന്നു.

യേശു ആളുക​ളോ​ടു സഹാനു​ഭൂ​തി കാണി​ക്കു​ന്നു

6. യേശു​വി​ന്റെ സഹാനു​ഭൂ​തി​യെ​ക്കു​റിച്ച്‌ യശയ്യയു​ടെ പ്രവച​ന​ത്തിൽനിന്ന്‌ നമ്മൾ എന്താണു പഠിക്കു​ന്നത്‌? (യശയ്യ 42:3)

⁶ ആളുകൾ പരുഷ​മാ​യി ഇടപെ​ട്ടി​രു​ന്ന​വ​രോട്‌ യേശു തന്റെ ശുശ്രൂ​ഷ​യി​ലു​ട​നീ​ളം വലിയ സഹാനു​ഭൂ​തി കാണിച്ചു. അതൊരു പ്രവച​ന​ത്തി​ന്റെ നിവൃ​ത്തി​യാ​യി​രു​ന്നു. എബ്രാ​യ​തി​രു​വെ​ഴു​ത്തു​ക​ളിൽ സമ്പന്നരും ശക്തരും ആയ ആളുകളെ ചില​പ്പോ​ഴൊ​ക്കെ ഫലഭൂ​യി​ഷ്‌ഠ​മായ തോട്ട​ത്തോ​ടോ, ഉയരവും കരുത്തും ഉള്ള വൃക്ഷങ്ങ​ളോ​ടോ താരത​മ്യം ചെയ്‌തി​ട്ടുണ്ട്‌. (സങ്കീ. 92:12; യശ. 61:3; യിരെ. 31:12) എന്നാൽ പാവ​പ്പെ​ട്ട​വ​രെ​യും അടിച്ച​മർത്ത​പ്പെ​ട്ട​വ​രെ​യും ചതഞ്ഞ ഈറ്റ​യോ​ടും പുകയുന്ന തിരി​യോ​ടും ആണ്‌ താരത​മ്യം ചെയ്‌തി​രി​ക്കു​ന്നത്‌. ആർക്കും വലിയ ഉപയോ​ഗ​മി​ല്ലാത്ത വസ്‌തു​ക്ക​ളാണ്‌ അവ. (യശയ്യ 42:3 വായി​ക്കുക.) യേശു​വി​നെ​ക്കു​റിച്ച്‌ ഒരു പ്രവചനം നടത്തി​യ​പ്പോ​ഴാണ്‌ ദൈവ​പ്ര​ചോ​ദി​ത​മാ​യി യശയ്യ ഈ താരത​മ്യം ഉപയോ​ഗി​ച്ചത്‌. ആളുകൾ വിലയി​ല്ലാ​ത്ത​വ​രാ​യി കണ്ടിരുന്ന സാധാ​ര​ണ​ക്കാ​രോട്‌ യേശു സ്‌നേ​ഹ​വും അനുക​മ്പ​യും കാണി​ക്കു​മെന്ന്‌ അതിലൂ​ടെ യശയ്യ മുൻകൂ​ട്ടി പറയു​ക​യാ​യി​രു​ന്നു.

7-8. യേശു എങ്ങനെ​യാണ്‌ യശയ്യയു​ടെ പ്രവചനം നിറ​വേ​റ്റി​യത്‌?

⁷ യശയ്യയു​ടെ ഈ പ്രവചനം യേശു​വിൽ നിറ​വേറി എന്ന്‌ കാണി​ച്ചു​കൊണ്ട്‌ മത്തായി ഇങ്ങനെ പറഞ്ഞു: “ചതഞ്ഞ ഈറ്റ അവൻ ഒടിച്ചു​ക​ള​യില്ല, പുകയുന്ന തിരി കെടു​ത്തി​ക്ക​ള​യു​ക​യു​മില്ല.” (മത്താ. 12:20) ചതഞ്ഞ ഈറ്റ​പോ​ലെ അടിച്ച​മർത്ത​പ്പെട്ട ആളുക​ളും പെട്ടെന്നു കെടാൻപോ​കുന്ന പുകയുന്ന തിരി​പോ​ലെ പ്രതീ​ക്ഷയറ്റ ആളുക​ളും യേശു​വി​ന്റെ കാലത്ത്‌ ഉണ്ടായി​രു​ന്നു. യേശു പല അത്ഭുത​ങ്ങ​ളും ചെയ്‌തത്‌ അവർക്കു​വേ​ണ്ടി​യാണ്‌. അങ്ങനെ​യുള്ള ചില​രെ​ക്കു​റിച്ച്‌ നോക്കാം. ദേഹമാ​സ​കലം കുഷ്‌ഠം ബാധിച്ച ഒരാളു​ണ്ടാ​യി​രു​ന്നു. താൻ സുഖ​പ്പെ​ടു​മെ​ന്നോ വീണ്ടും കുടും​ബാം​ഗ​ങ്ങ​ളോ​ടും കൂട്ടു​കാ​രോ​ടും ഒപ്പം ചേരു​മെ​ന്നോ അദ്ദേഹ​ത്തിന്‌ ഒരു പ്രതീ​ക്ഷ​യും ഉണ്ടായി​ക്കാ​ണില്ല. (ലൂക്കോ. 5:12, 13) കേൾക്കാ​നും സംസാ​രി​ക്കാ​നും കഴിയാത്ത മറ്റൊ​രാ​ളും അന്ന്‌ ഉണ്ടായി​രു​ന്നു. മറ്റുള്ളവർ ചിരി​ച്ചു​ക​ളിച്ച്‌ സംസാ​രി​ക്കു​ന്നതു കാണു​മ്പോൾ അത്‌ എന്താ​ണെന്ന്‌ അറിയാൻ അദ്ദേഹ​ത്തിന്‌ എന്തുമാ​ത്രം ആഗ്രഹം തോന്നി​ക്കാ​ണും. (മർക്കോ. 7:32, 33) ഇനിയും ഉണ്ടായി​രു​ന്നു പ്രശ്‌നങ്ങൾ.

⁸ യേശു​വി​ന്റെ കാലത്തെ പല ജൂതന്മാ​രും, ആളുകൾക്ക്‌ അസുഖ​മോ വൈക​ല്യ​മോ വരുന്നത്‌ അവരു​ടെ​യോ അവരുടെ മാതാ​പി​താ​ക്ക​ളു​ടെ​യോ പാപത്തി​ന്റെ ശിക്ഷയാ​യി​ട്ടാ​ണെന്ന്‌ വിശ്വ​സി​ച്ചി​രു​ന്നു. (യോഹ. 9:2) ഈ തെറ്റായ വിശ്വാ​സം വെച്ചു​പു​ലർത്തി​യി​രു​ന്നവർ അവരോ​ടു ദയയി​ല്ലാ​തെ ഇടപെട്ടു. അത്‌ അവരെ വല്ലാതെ തളർത്തി​ക്ക​ള​ഞ്ഞി​രു​ന്നു. എന്നാൽ യശയ്യയു​ടെ പ്രവച​ന​ത്തി​ന്റെ നിവൃ​ത്തി​യാ​യി യേശു, കഷ്ടപ്പെ​ട്ടി​രു​ന്ന​വരെ സുഖ​പ്പെ​ടു​ത്തു​ക​യും ദൈവ​ത്തി​ലുള്ള അവരുടെ പ്രതീ​ക്ഷ​യ്‌ക്കു വീണ്ടും തിരി​കൊ​ളു​ത്തു​ക​യും ചെയ്‌തു. ഇതു നമുക്ക്‌ എന്ത്‌ ഉറപ്പാണു തരുന്നത്‌?

9. അപൂർണ​രായ മനുഷ്യ​രോ​ടു സ്വർഗ​ത്തി​ലുള്ള നമ്മുടെ മഹാപു​രോ​ഹി​തൻ ശരിക്കും സഹതാപം കാണി​ക്കു​മെന്ന്‌ എബ്രായർ 4:15, 16 വ്യക്തമാ​ക്കു​ന്നത്‌ എങ്ങനെ?

⁹ എബ്രായർ 4:15, 16 വായി​ക്കുക. യേശു എപ്പോ​ഴും നമ്മളോ​ടു സഹതാ​പ​ത്തോ​ടെ ഇടപെ​ടു​മെന്നു നമുക്ക്‌ ഉറപ്പു​ണ്ടാ​യി​രി​ക്കാം. എന്താണ്‌ അതിന്റെ അർഥം? ഇവിടെ “സഹതാപം” എന്നു പരിഭാ​ഷ​പ്പെ​ടു​ത്തി​യി​രി​ക്കുന്ന ഗ്രീക്കു​വാ​ക്കി​ന്റെ അർഥം മറ്റൊ​രാ​ളു​ടെ സങ്കടവും വേദന​യും തന്റേതാ​യി കാണുക എന്നാണ്‌. (പൗലോസ്‌ ഇതേ ഗ്രീക്കു​വാക്ക്‌ ഉപയോ​ഗി​ച്ചി​രി​ക്കുന്ന എബ്രായർ 10:34-ഉം കാണുക.) മറ്റുള്ള​വ​രു​ടെ കഷ്ടപ്പാ​ടു​കൾ യേശു​വി​നെ എത്ര​ത്തോ​ളം ബാധി​ച്ചെന്ന്‌ യേശു ചെയ്‌ത അത്ഭുതങ്ങൾ തെളി​യി​ക്കു​ന്നുണ്ട്‌. യേശു അവരെ സുഖ​പ്പെ​ടു​ത്തി​യത്‌ ഒരു കടമയു​ടെ പുറത്തല്ല. യേശു അവരെ​ക്കു​റിച്ച്‌ ശരിക്കും ചിന്തി​ക്കു​ക​യും അവരെ സഹായി​ക്കാൻ ആഗ്രഹി​ക്കു​ക​യും ചെയ്‌തി​രു​ന്നു. ഉദാഹ​ര​ണ​ത്തിന്‌, കുഷ്‌ഠ​രോ​ഗി​യെ സുഖ​പ്പെ​ടു​ത്തി​യ​പ്പോൾ യേശു​വി​നു വേണ​മെ​ങ്കിൽ ആ അത്ഭുതം ദൂരെ​നിന്ന്‌ ചെയ്യാ​മാ​യി​രു​ന്നു. എന്നാൽ വർഷങ്ങ​ളാ​യി ഒരു മനുഷ്യ​സ്‌പർശം ഏറ്റിരി​ക്കാൻ സാധ്യ​ത​യി​ല്ലാത്ത ആ വ്യക്തിയെ ഒന്നു തൊട്ട്‌ സുഖ​പ്പെ​ടു​ത്താൻ യേശു​വി​നു തോന്നി. ഇനി, ബധിര​നായ വ്യക്തിയെ യേശു പരിഗ​ണ​ന​യോ​ടെ ആൾക്കൂ​ട്ട​ത്തി​ന്റെ ബഹളങ്ങൾക്കി​ട​യിൽനിന്ന്‌ മാറ്റി​ക്കൊ​ണ്ടു​പോ​യി​ട്ടാണ്‌ സുഖ​പ്പെ​ടു​ത്തി​യത്‌. മറ്റൊരു സന്ദർഭ​ത്തിൽ കണ്ണീർകൊണ്ട്‌ യേശു​വി​ന്റെ കാലുകൾ കഴുകു​ക​യും തലമു​ടി​കൊണ്ട്‌ തുടയ്‌ക്കു​ക​യും ചെയ്‌ത പശ്ചാത്ത​പിച്ച ഒരു സ്‌ത്രീ​യെ ഒരു പരീശൻ കുറ്റ​പ്പെ​ടു​ത്തി​യ​പ്പോൾ യേശു അവൾക്കു​വേണ്ടി ശക്തമായി വാദിച്ചു. (മത്താ. 8:3; മർക്കോ. 7:33; ലൂക്കോ. 7:44) അസുഖ​മു​ള്ള​വ​രെ​യോ ഗുരു​ത​ര​മായ പാപം ചെയ്‌ത​വ​രെ​യോ യേശു ഒരിക്ക​ലും അകറ്റി നിറു​ത്തി​യില്ല. പകരം അവരെ തന്റെ അടു​ത്തേക്കു സ്വാഗതം ചെയ്യു​ക​യും താൻ അവരെ സ്‌നേ​ഹി​ക്കു​ന്നു​ണ്ടെന്ന്‌ ഉറപ്പ്‌ കൊടു​ക്കു​ക​യും ചെയ്‌തു. യേശു നമ്മളോ​ടും ഇതേ സഹതാപം കാണി​ക്കു​മെന്നു നമുക്ക്‌ ഉറപ്പു​ണ്ടാ​യി​രി​ക്കാം.

നമ്മുടെ മഹാപു​രോ​ഹി​തനെ അനുക​രി​ക്കു​ന്നു

10. ബധിര​രെ​യും അന്ധരെ​യും സഹായി​ക്കാൻ നമുക്ക്‌ ഇന്ന്‌ എന്തെല്ലാം ഉപയോ​ഗി​ക്കാം? (ചിത്ര​ങ്ങ​ളും കാണുക.)

¹⁰ യേശു​വി​ന്റെ വിശ്വസ്‌ത അനുഗാ​മി​കൾ എന്ന നിലയിൽ നമ്മൾ യേശു​വി​ന്റെ സ്‌നേ​ഹ​വും സഹാനു​ഭൂ​തി​യും അനുക​മ്പ​യും അനുക​രി​ക്കാൻ പരമാ​വധി ശ്രമി​ക്കു​ന്നു. (1 പത്രോ. 2:21; 3:8) നമുക്കു ബധിര​രെ​യോ അന്ധരെ​യോ സുഖ​പ്പെ​ടു​ത്താ​നാ​കി​ല്ലെ​ങ്കി​ലും അവരെ ആത്മീയ​മാ​യി സഹായി​ക്കാൻ കഴിയും. ഉദാഹ​ര​ണ​ത്തിന്‌, 100-ലധികം ആംഗ്യ​ഭാ​ഷ​ക​ളിൽ ഇന്ന്‌ ബൈബിൾപ്ര​സി​ദ്ധീ​ക​ര​ണങ്ങൾ ലഭ്യമാണ്‌. കാഴ്‌ച പരിമി​തി​യു​ള്ള​വരെ സഹായി​ക്കു​ന്ന​തി​നു 60-ലധികം ഭാഷക​ളിൽ ബ്രെയിൽ പ്രസി​ദ്ധീ​ക​ര​ണ​ങ്ങ​ളും 100-ലധികം ഭാഷക​ളിൽ നമ്മുടെ വീഡി​യോ​ക​ളു​ടെ ഓഡി​യോ വിവര​ണ​ങ്ങ​ളും ലഭ്യമാ​ക്കു​ന്നുണ്ട്‌. ബധിരർക്കും അന്ധർക്കും യഹോ​വ​യോ​ടും യേശു​വി​നോ​ടും അടുക്കാൻ കഴി​യേ​ണ്ട​തി​നാ​ണു നമ്മൾ ഇതെല്ലാം ചെയ്യു​ന്നത്‌.

11. എല്ലാ പശ്ചാത്ത​ല​ത്തി​ലു​മുള്ള ആളുക​ളോട്‌ യേശു​വി​നുള്ള അനുകമ്പ, ഇന്ന്‌ യഹോ​വ​യു​ടെ സംഘടന അനുക​രി​ക്കു​ന്നത്‌ എങ്ങനെ​യാണ്‌? (പ്രവൃ​ത്തി​കൾ 2:5-7, 33) (ചിത്ര​ങ്ങ​ളും കാണുക.)

¹¹ എല്ലാ പശ്ചാത്ത​ല​ത്തിൽനി​ന്നും ഉള്ള ആളുകളെ സഹായി​ക്കാൻ യഹോ​വ​യു​ടെ സംഘടന ശ്രമി​ക്കു​ന്നു. പുനരു​ത്ഥാ​ന​പ്പെട്ട യേശു പെന്തി​ക്കോ​സ്‌ത്‌ ഉത്സവത്തി​ന്റെ സമയത്ത്‌ തന്റെ ശിഷ്യ​ന്മാർക്കു പരിശു​ദ്ധാ​ത്മാ​വി​നെ പകർന്ന​പ്പോൾ എന്താണു സംഭവി​ച്ച​തെന്ന്‌ ഓർക്കുക. അവിടെ കൂടിവന്ന എല്ലാവർക്കും “അവരുടെ ഭാഷക​ളിൽ” സന്തോ​ഷ​വാർത്ത കേൾക്കാ​നാ​യി. (പ്രവൃ​ത്തി​കൾ 2:5-7, 33 വായി​ക്കുക.) ഇന്ന്‌ യേശു​വി​ന്റെ നേതൃ​ത്വ​ത്തിൻകീ​ഴിൽ സംഘടന 1000-ത്തിലധി​കം ഭാഷക​ളിൽ ബൈബിൾപ്ര​സി​ദ്ധീ​ക​ര​ണങ്ങൾ ലഭ്യമാ​ക്കു​ന്നുണ്ട്‌. അതിൽ ചിലതു വളരെ കുറച്ച്‌ ആളുകൾ മാത്രം സംസാ​രി​ക്കുന്ന ഭാഷക​ളാണ്‌. ചില അമരി​ന്ത്യൻ ഭാഷകൾ അതിന്‌ ഉദാഹ​ര​ണ​മാണ്‌. വടക്കേ അമേരി​ക്ക​യി​ലും തെക്കേ അമേരി​ക്ക​യി​ലും ഉള്ള വളരെ കുറച്ച്‌ പേർ സംസാ​രി​ക്കുന്ന ഭാഷക​ളാണ്‌ അവ. എന്നിട്ടും സന്തോ​ഷ​വാർത്ത പരമാ​വധി ആളുക​ളി​ലേക്ക്‌ എത്തുന്ന​തി​നു​വേണ്ടി അക്കൂട്ട​ത്തിൽപ്പെട്ട 160-ലധികം ഭാഷക​ളിൽ നമ്മൾ പ്രസി​ദ്ധീ​ക​ര​ണങ്ങൾ പുറത്തി​റ​ക്കു​ന്നുണ്ട്‌. ഇനി 20-ലധികം റോമനി ഭാഷക​ളി​ലും നമ്മുടെ പ്രസി​ദ്ധീ​ക​ര​ണങ്ങൾ ലഭ്യമാണ്‌. ഇത്തരം ഭാഷകൾ സംസാ​രി​ക്കുന്ന ആയിര​ക്ക​ണ​ക്കിന്‌ ആളുകൾ സത്യ​ത്തോ​ടു താത്‌പ​ര്യം കാണി​ച്ചി​രി​ക്കു​ന്നു.

12. ആളുകൾക്കു​വേണ്ടി ഇന്ന്‌ യഹോ​വ​യു​ടെ സംഘടന വേറെ എന്തെല്ലാം ചെയ്യു​ന്നുണ്ട്‌?

¹² സന്തോ​ഷ​വാർത്ത പരമാ​വധി ആളുകളെ അറിയി​ക്കാൻ ശ്രമി​ക്കു​ന്ന​തോ​ടൊ​പ്പം പ്രകൃ​തി​ദു​ര​ന്ത​ങ്ങൾക്ക്‌ ഇരയാ​യ​വ​രെ​യും യഹോ​വ​യു​ടെ സംഘടന സഹായി​ക്കു​ന്നുണ്ട്‌. ആയിര​ക്ക​ണ​ക്കിന്‌ സന്നദ്ധ​സേ​വ​ക​രാണ്‌ ഈ രീതി​യിൽ തങ്ങളുടെ സഹോ​ദ​ര​ങ്ങളെ സഹായി​ക്കാ​നാ​യി മുന്നോ​ട്ടു​വ​രു​ന്നത്‌. അതു​പോ​ലെ ദൈവ​ത്തി​ന്റെ സ്‌നേ​ഹ​ത്തെ​ക്കു​റിച്ച്‌ ആളുകൾക്ക്‌ ഒരുമി​ച്ചി​രുന്ന്‌ പഠിക്കാ​നാ​യി ലളിത​മായ ആരാധ​നാ​സ്ഥ​ലങ്ങൾ ഒരുക്കാ​നും സംഘടന സഹായി​ക്കു​ന്നു.

നമ്മുടെ മഹാപു​രോ​ഹി​തൻ നിങ്ങളെ സഹായി​ക്കും

13. യേശു നമ്മളെ സഹായി​ക്കുന്ന ചില വിധങ്ങൾ ഏതൊ​ക്കെ​യാണ്‌?

¹³ നല്ല ഇടയൻ എന്ന നിലയിൽ യേശു ഓരോ വ്യക്തി​യു​ടെ​യും ആത്മീയാ​വ​ശ്യ​ങ്ങൾക്കു ശ്രദ്ധ കൊടു​ക്കു​ന്നു. (യോഹ. 10:14; എഫെ. 4:7) ചില​പ്പോൾ ജീവി​ത​ത്തി​ലെ ചില സാഹച​ര്യ​ങ്ങൾ കാരണം നമ്മൾ ഒരു ചതഞ്ഞ ഈറ്റയോ പുകയുന്ന തിരി​യോ പോ​ലെ​യാ​ണെന്നു നമുക്കു തോന്നി​യേ​ക്കാം. ഗുരു​ത​ര​മായ ഒരു രോഗ​മോ ചെയ്‌തു​പോയ ഒരു തെറ്റോ സഹാരാ​ധ​ക​രു​മാ​യുള്ള എന്തെങ്കി​ലും പ്രശ്‌ന​മോ നിമി​ത്ത​മാ​യി​രി​ക്കാം നമുക്ക്‌ അങ്ങനെ തോന്നു​ന്നത്‌. അങ്ങനെ​യൊ​രു സാഹച​ര്യ​ത്തിൽ ഇപ്പോ​ഴുള്ള വേദന​യും പ്രശ്‌ന​ങ്ങ​ളും മാത്ര​മാ​യി​രി​ക്കും നമ്മൾ കാണുക. ഭാവി​പ്ര​ത്യാ​ശ​യിൽ ശ്രദ്ധ കേന്ദ്രീ​ക​രി​ക്കാ​നൊ​ന്നും നമുക്കു പറ്റുന്നു​ണ്ടാ​കില്ല. എന്നാൽ നിങ്ങൾ കടന്നു​പോ​കുന്ന സാഹച​ര്യ​ങ്ങൾ യേശു കാണു​ന്നു​ണ്ടെ​ന്നും നിങ്ങളു​ടെ ഉള്ളിലെ ചിന്തകൾ മനസ്സി​ലാ​ക്കു​ന്നു​ണ്ടെ​ന്നും ഓർക്കുക. നിങ്ങളെ സഹായി​ക്കാൻ അനുകമ്പ യേശു​വി​നെ പ്രേരി​പ്പി​ക്കും. ഉദാഹ​ര​ണ​ത്തിന്‌, തളർന്നി​രി​ക്കുന്ന നിങ്ങളെ പരിശു​ദ്ധാ​ത്മാ​വി​നെ ഉപയോ​ഗിച്ച്‌ ശക്തി​പ്പെ​ടു​ത്താൻ യേശു​വി​നാ​കും. (യോഹ. 16:7; തീത്തോ. 3:6) ഇനി ‘സമ്മാന​ങ്ങ​ളാ​കുന്ന’ മൂപ്പന്മാ​രെ​യും മറ്റു സഹാരാ​ധ​ക​രെ​യും ഉപയോ​ഗി​ച്ചു​കൊണ്ട്‌ നിങ്ങളെ പ്രോ​ത്സാ​ഹി​പ്പി​ക്കാ​നും പിന്തു​ണ​യ്‌ക്കാ​നും സഹായി​ക്കാ​നും യേശു​വി​നു കഴിയും.—എഫെ. 4:8.

14. നിരു​ത്സാ​ഹം തോന്നു​മ്പോൾ നമുക്ക്‌ എന്തു ചെയ്യാ​നാ​കും?

¹⁴ നിങ്ങളു​ടെ ഉള്ളിലെ തീ കെടാൻപോ​കു​ന്ന​താ​യി, ആത്മബലം നഷ്ടമാ​കു​ന്ന​താ​യി തോന്നു​മ്പോൾ മഹാപു​രോ​ഹി​തൻ എന്ന നിലയിൽ യേശു നിങ്ങൾക്കു​വേണ്ടി ചെയ്യുന്ന കാര്യ​ങ്ങ​ളെ​ക്കു​റിച്ച്‌ ചിന്തി​ക്കുക. യഹോവ യേശു​വി​നെ ഭൂമി​യി​ലേക്ക്‌ അയച്ചത്‌, ജീവൻ മോച​ന​വി​ല​യാ​യി കൊടു​ക്കാൻ മാത്രമല്ല അപൂർണ​രായ മനുഷ്യ​രു​ടെ പ്രശ്‌നങ്ങൾ കൂടുതൽ നന്നായി മനസ്സി​ലാ​ക്കാൻവേ​ണ്ടി​യും ആണ്‌. പാപങ്ങ​ളോ ബലഹീ​ന​ത​ക​ളോ കാരണം നിരു​ത്സാ​ഹ​പ്പെ​ട്ടു​പോ​കു​മ്പോൾ നമ്മളെ സഹായി​ക്കാൻ യേശു ഒരുങ്ങി​യി​രി​ക്കു​ക​യാണ്‌. “സഹായം ആവശ്യ​മുള്ള സമയത്തു​തന്നെ” യേശു അതു തരും.—എബ്രാ. 4:15, 16.

15. സഭയി​ലേക്കു തിരി​ച്ചു​വ​രാൻ ഒരു സഹോ​ദ​രനെ സഹായി​ച്ചത്‌ എന്താണ്‌?

¹⁵ യഹോ​വ​യു​ടെ ആട്ടിൻകൂ​ട്ട​ത്തിൽനിന്ന്‌ അകന്നു​പോ​യ​വരെ കണ്ടെത്താ​നും സഹായി​ക്കാ​നും ഉള്ള തന്റെ ജനത്തിന്റെ ശ്രമങ്ങളെ യേശു വഴിന​യി​ക്കു​ന്നു. (മത്താ. 18:12, 13) സ്റ്റെഫാനോയുടെb അനുഭവം നോക്കുക. തന്നെ സഭയിൽനിന്ന്‌ നീക്കം ചെയ്‌ത്‌ 12 വർഷത്തി​നു ശേഷം അദ്ദേഹം ഒരു മീറ്റി​ങ്ങി​നു വരാൻ തീരു​മാ​നി​ച്ചു. സഹോ​ദരൻ പറയുന്നു: “എനിക്ക്‌ ആകപ്പാടെ ചമ്മൽ തോന്നി. പക്ഷേ വീണ്ടും യഹോ​വ​യു​ടെ സ്‌നേ​ഹ​മുള്ള കുടും​ബ​ത്തി​ന്റെ ഭാഗമാ​കാൻ ഞാൻ ആഗ്രഹി​ച്ചു. എന്നെ കണ്ട മൂപ്പന്മാർ എന്നെ സ്‌നേ​ഹ​ത്തോ​ടെ സ്വാഗതം ചെയ്‌തു. യഹോ​വയെ വിട്ടു​പോ​യ​തി​ന്റെ കുറ്റ​ബോ​ധം കാരണം, എല്ലാം അങ്ങ്‌ നിറു​ത്തി​യാ​ലോ എന്നു ചില​പ്പോൾ എനിക്കു തോന്നി​യി​ട്ടുണ്ട്‌. എന്നാൽ ഞാൻ മടുത്ത്‌ പിന്മാ​റ​രുത്‌ എന്നാണ്‌ യഹോ​വ​യും യേശു​വും ആഗ്രഹി​ക്കു​ന്ന​തെന്നു മൂപ്പന്മാർ ഓർമി​പ്പി​ച്ചു. എന്നെ പുനഃ​സ്ഥി​തീ​ക​രി​ച്ച​പ്പോൾ മുഴു​സ​ഭ​യും എന്നെയും എന്റെ കുടും​ബ​ത്തെ​യും സ്‌നേ​ഹ​ത്തോ​ടെ ചേർത്തു​നി​റു​ത്തി. പിന്നീട്‌ എന്റെ ഭാര്യ​യും ഒരു ബൈബിൾപ​ഠനം സ്വീക​രി​ച്ചു. ഇന്ന്‌ ഞങ്ങൾ ഒരു കുടും​ബ​മാ​യി യഹോ​വയെ സേവി​ക്കു​ന്നു.” പശ്ചാത്ത​പി​ക്കു​ന്ന​വരെ സഭയി​ലേക്കു തിരി​ച്ചു​കൊ​ണ്ടു​വ​രാൻ നമ്മൾ എല്ലാവ​രും ശ്രമി​ക്കു​ന്നതു കാണു​മ്പോൾ നമ്മുടെ സ്‌നേ​ഹ​നി​ധി​യായ മഹാപു​രോ​ഹി​തൻ എത്രയ​ധി​കം സന്തോ​ഷി​ക്കു​ന്നു​ണ്ടാ​കും!

16. ഇത്രയ​ധി​കം സഹതാ​പ​മുള്ള ഒരു മഹാപു​രോ​ഹി​തനെ കിട്ടി​യ​തിൽ നിങ്ങൾക്കു നന്ദിയു​ള്ളത്‌ എന്തു​കൊണ്ട്‌?

¹⁶ ഭൂമി​യി​ലാ​യി​രു​ന്ന​പ്പോൾ എണ്ണമറ്റ ആളുകൾക്കു യേശു ആവശ്യ​മുള്ള സമയത്തു​തന്നെ സഹായം കൊടു​ത്തു. ഇന്നു നമ്മളെ​യും യേശു അങ്ങനെ​തന്നെ സഹായി​ക്കു​മെന്നു നമുക്ക്‌ ഉറപ്പു​ണ്ടാ​യി​രി​ക്കാ​നാ​കും. ഇനി പെട്ടെ​ന്നു​തന്നെ വരാനി​രി​ക്കുന്ന പുതിയ ഭൂമി​യിൽ അനുസ​ര​ണ​മുള്ള മനുഷ്യ​രെ പാപത്തി​ന്റെ​യും അപൂർണ​ത​യു​ടെ​യും എല്ലാ പ്രശ്‌ന​ങ്ങ​ളിൽനി​ന്നും പൂർണ​മാ​യും പുറത്തു​ക​ട​ക്കാൻ യേശു സഹായി​ക്കും. നമ്മളോ​ടുള്ള വലിയ സ്‌നേ​ഹ​വും കരുണ​യും കാരണം യഹോവ തന്റെ മകനെ സഹതാ​പ​മുള്ള ഒരു മഹാപു​രോ​ഹി​ത​നാ​യി തന്നിരി​ക്കു​ന്ന​തിൽ എത്ര നന്ദി പറഞ്ഞാ​ലും മതിയാ​കില്ല!