യുവജനങ്ങൾ ചോദിക്കുന്നു
എനിക്ക്‌ എങ്ങനെ സമീകൃതാഹാരം കഴിക്കാം?
സമീകൃതാഹാരം കഴിച്ചില്ലെങ്കിൽ ആരോഗ്യം മോശമാകുമെന്ന കാര്യം നിങ്ങൾക്ക്‌ അറിയാമായിരിക്കും. ആരോഗ്യത്തിനു ഗുണം ചെയ്യാത്ത ഭക്ഷണം കഴിക്കുന്ന ചെറുപ്പക്കാർ മുതിർന്നാലും അതേ ശീലം തുടരും. അതുകൊണ്ട്‌ നല്ല ഭക്ഷണശീലങ്ങൾ ചെറുപ്പത്തിലേ തുടങ്ങുക.
എന്താണു സമീകൃതാഹാരം?
‘ശീലങ്ങളിൽ മിതത്വം പാലിക്കാൻ’ ബൈബിൾ പറയുന്നു. അതിൽ നമ്മുടെ ഭക്ഷണശീലങ്ങളും ഉൾപ്പെടുന്നുണ്ട്‌. (1 തിമൊഥെയൊസ്‌ 3:11) ആ തത്ത്വം മനസ്സിൽപ്പിടിച്ചുകൊണ്ട്‌ ചില കാര്യങ്ങൾ നമുക്കു നോക്കാം.
സമീകൃതാഹാരത്തിൽ എല്ലാ തരം ഭക്ഷണവും ഉൾപ്പെടുന്നു. പാൽ ഉത്‌പന്നങ്ങൾ, മാംസ്യം (പ്രോട്ടീനുകൾ), പഴങ്ങൾ, പച്ചക്കറികൾ, ധാന്യങ്ങൾ എന്നീ അഞ്ചു തരം ഭക്ഷണവും ഉൾപ്പെടുന്നതാണ്‌ സമീകൃതാഹാരം. ചിലയാളുകൾ ഇതിലെ ഒന്നോ അതിൽ അധികമോ ഭക്ഷണസാധനങ്ങൾ ഒഴിവാക്കുന്നു. തടി കുറയുമെന്ന ചിന്തയാണ്‌ അവർക്കുള്ളത്‌. എന്നാൽ അങ്ങനെ ചെയ്‌താൽ ശരീരത്തിനുവേണ്ട പോഷകങ്ങൾ നമ്മൾ നിഷേധിക്കുകയാണ്‌.
ചെയ്‌തുനോക്കൂ: ചില ഭക്ഷണസാധനങ്ങൾ കഴിക്കേണ്ടതു പ്രധാനമായിരിക്കുന്നത്‌ എന്തുകൊണ്ടാണ്‌ എന്ന കാര്യം ഗവേഷണം ചെയ്യുക, അല്ലെങ്കിൽ ഒരു ഡോക്ടറോടു ചോദിച്ച്‌ മനസ്സിലാക്കുക. ഉദാഹരണത്തിന്‌: അന്നജം നിങ്ങൾക്കുവേണ്ട ഊർജം തരുമ്പോൾ മാംസ്യം നിങ്ങളുടെ പ്രതിരോധശേഷി വർധിപ്പിക്കുകയും പുതിയ കോശങ്ങൾ നിർമിക്കുകയും അവ പുതുക്കിപ്പണിയുകയും ചെയ്യും. ശരിയായ അളവിലുള്ള ചില കൊഴുപ്പുകൾ ഹൃദ്രോഗത്തിനുള്ള സാധ്യത കുറയ്‌ക്കുന്നു. ഉന്മേഷം നിലനിറുത്താൻ സഹായിക്കുന്നു.
“എല്ലാ തരം ഭക്ഷണസാധനങ്ങളും ഉൾപ്പെടുത്തിക്കൊണ്ടുള്ള സമീകൃതാഹാരം കഴിക്കാൻ ഞാൻ ശ്രമിക്കാറുണ്ട്‌. വല്ലപ്പോഴും ഒരു മിഠായി കഴിക്കുന്നതിലും ഫാസ്റ്റ്‌ ഫുഡ്‌ കഴിക്കുന്നതിലും തെറ്റില്ലെന്നാണ്‌ എനിക്കു തോന്നുന്നത്‌. എന്നാൽ ഇതുപോലുള്ളവ മാത്രം കഴിക്കുന്നതിനോട്‌ എനിക്കു വലിയ അഭിപ്രായമില്ല. എല്ലാത്തിനും ഒരു പരിധി വെക്കുന്നതു നല്ലതാണ്‌.”—ബ്രെൻഡ.
പോഷകമൂല്യം കുറഞ്ഞ ഭക്ഷണം കഴിക്കുന്നത്‌ ഒരു കാലില്ലാത്ത കസേരയിൽ ഇരിക്കുന്നതുപോലെയായിരിക്കും
‘അങ്ങേയറ്റവും ഇങ്ങേയറ്റവും വേണ്ട.’ ആവശ്യത്തിനു കഴിക്കാതിരിക്കുക, കുറെ പട്ടിണി കിടന്നിട്ട്‌ പിന്നെ വലിച്ചുവാരി കഴിക്കുക, ഇഷ്ടമുള്ള ചില ഭക്ഷണസാധനങ്ങൾ പൂർണമായി ഒഴിവാക്കുക—സമീകൃതാഹാരം എന്നു പറഞ്ഞാൽ ഇതൊന്നുമല്ല.
ചെയ്‌തുനോക്കൂ: ഒരു മാസത്തേക്കു നിങ്ങളുടെ ഭക്ഷണശീലമൊന്നു ശ്രദ്ധിക്കുക. നിങ്ങൾ ‘അങ്ങേയറ്റവും ഇങ്ങേയറ്റവും’ എത്ര കൂടെക്കൂടെ പോകുന്നുണ്ട്‌? സമീകൃതാഹാരം കഴിക്കാൻ എന്തൊക്കെ കാര്യങ്ങൾ ചെയ്യാൻ കഴിയും?
ചില ദിവസങ്ങളിൽ കൂടുതൽ കലോറി അടങ്ങിയ ഭക്ഷണങ്ങൾ ഞാൻ അമിതമായി കഴിക്കും. ചിലപ്പോൾ ഞാൻ കടുത്ത നിയന്ത്രണം വെക്കും, കലോറി കുറഞ്ഞ ഭക്ഷണം കഴിക്കും. ഒടുവിൽ, ഞാൻ എത്ര കലോറി കഴിക്കുന്നു എന്നു നോക്കുന്നതു നിറുത്തി. അമിതമായി ഭക്ഷണം കഴിക്കാതെ, വയറു നിറയുമ്പോൾത്തന്നെ നിറുത്തും. ഇതിന്‌ കുറച്ച്‌ സമയമെടുത്തെങ്കിലും ഇപ്പോൾ ഞാൻ സമീകൃതാഹാരമാണു കഴിക്കുന്നത്‌.—ഹെയ്‌ലി.
എനിക്ക്‌ എങ്ങനെ സമീകൃതാഹാരം ശീലമാക്കാം?
മുന്നമേ ചിന്തിക്കുക. ബൈബിൾ പറയുന്നു: “പരിശ്രമശാലിയുടെ പദ്ധതികൾ വിജയിക്കും.” (സുഭാഷിതങ്ങൾ 21:5) നല്ല ഭക്ഷണശീലം ഉണ്ടായിരിക്കാൻ മുൻകൂട്ടിയുള്ള പ്ലാനിങ്‌ വേണമെന്ന്‌ അർഥം.
“നല്ല ഭക്ഷണസാധനങ്ങൾ കഴിക്കാൻ നല്ല ആസൂത്രണം വേണം. വീട്ടിലുണ്ടാക്കുന്ന ഭക്ഷണമാണ്‌ ഏറ്റവും നല്ലത്‌. കുറച്ച്‌ ബുദ്ധിമുട്ടാണെങ്കിലും ഗുണം നോക്കുമ്പോൾ അതാണു നല്ലത്‌. നിങ്ങളുടെ പണം പോക്കറ്റിലിരിക്കുകയും ചെയ്യും.”—തോമസ്‌.
നല്ല ഭക്ഷണസാധനങ്ങൾ കഴിക്കുക. ‘പ്രായോഗികജ്ഞാനം കാത്തുസൂക്ഷിക്കുക’ എന്നു ബൈബിൾ പറയുന്നു. (സുഭാഷിതങ്ങൾ 3:21, അടിക്കുറിപ്പ്‌) ആരോഗ്യത്തിനു ഗുണം ചെയ്യുന്ന ഭക്ഷണം കഴിക്കാനുള്ള വഴികൾ കണ്ടെത്താനും നല്ല ആഹാരശീലങ്ങൾ വളർത്തിയെടുക്കാനും പ്രായോഗികജ്ഞാനം നിങ്ങളെ സഹായിക്കും.
“ദിവസവും ഗുണമില്ലാത്ത ഓരോ ഭക്ഷണം ഒഴിവാക്കിയിട്ട്‌ അതിനു പകരം ഗുണമുള്ള മറ്റൊരു ഭക്ഷണം കഴിക്കാൻ തുടങ്ങി. ഇതായിരുന്നു ആദ്യ പടി. ഉദാഹരണത്തിന്‌, ഒരു മിഠായി കഴിക്കുന്നതിനു പകരം ഒരു ആപ്പിൾ കഴിക്കുക. അങ്ങനെ കുറച്ച്‌ കാലംകൊണ്ട്‌, ഗുണം ചെയ്യാത്ത പലപല ഭക്ഷണങ്ങൾ ഒഴിവാക്കി അതിനു പകരം എന്നും നല്ല ഭക്ഷണം കഴിക്കാൻ തുടങ്ങി!”—കിയ.
ന്യായമായ പ്രതീക്ഷകളേ വെക്കാവൂ. “ആനന്ദത്തോടെ നിന്റെ ഭക്ഷണം കഴിക്കുക” എന്നു ബൈബിൾ പറയുന്നു. (സഭാപ്രസംഗകൻ 9:7) സമീകൃതാഹാരം കഴിക്കുക എന്നു പറഞ്ഞാൽ ഒരു രുചിയും ഇല്ലാത്ത ആഹാരം കഴിക്കുക എന്നല്ല അർഥം. അതുപോലെതന്നെ നിങ്ങൾ കഴിക്കുന്ന ഓരോ ഭക്ഷണവും നല്ലതാണോ ചീത്തയാണോ എന്നു ചിന്തിച്ച്‌ ഉത്‌കണ്‌ഠപ്പെടേണ്ടതും ഇല്ല. തടി കുറയ്‌ക്കാനാണ്‌ നിങ്ങൾ നോക്കുന്നതെങ്കിലും ആരോഗ്യം കാത്തുസൂക്ഷിക്കാൻ മറക്കരുത്‌. ഇക്കാര്യത്തിലും ന്യായമായ പ്രതീക്ഷയേ വെക്കാവൂ.
“ഈ അടുത്ത കാലത്ത്‌ ഞാൻ13.5 കിലോ കുറഞ്ഞു. പക്ഷേ അതിനുവേണ്ടി ഞാൻ പട്ടിണി കിടക്കുകയോ ഏതെങ്കിലും തരം ഭക്ഷണം ഒഴിവാക്കുകയോ ചെയ്‌തില്ല. അതുപോലെ ഐസ്‌ക്രീമോ മധുരപലഹാരമോ കഴിച്ചാൽ, ഒരു വലിയ തെറ്റു ചെയ്‌തെന്നു ഞാൻ ചിന്തിക്കാറില്ല. ഒറ്റ രാത്രികൊണ്ടൊന്നും തടി കുറയില്ല എന്നു ഞാൻ മനസ്സിലാക്കി. ഞാൻ മാറ്റം വരുത്തേണ്ടിയിരുന്നത്‌ എന്റെ ഭക്ഷണശീലത്തിനായിരുന്നു.”—മെലാനി.