നിങ്ങളുടെ സംഭാവനകൾ എങ്ങനെ ഉപയോഗിക്കുന്നു?
കോവിഡ്‌ 19-ന്റെ സമയത്ത്‌ രാജ്യഹാളുകൾ സുരക്ഷിതമാക്കാൻ ചെയ്‌തത്‌
2022 ഒക്ടോബർ 1
“ഗവൺമെന്റ്‌ നിയന്ത്രണങ്ങൾ ഇല്ലാത്തിടത്തോളം ഏപ്രിൽ 1 മുതൽ ഒരുമിച്ച്‌ കൂടിവന്നുള്ള യോഗങ്ങൾ നടത്താൻ എല്ലാ സഭകളെയും ഭരണസംഘം പ്രോത്സാഹിപ്പിക്കുന്നു.” 2022 മാർച്ച്‌ തുടക്കത്തിൽ jw.org-ൽ വന്ന ഈ അറിയിപ്പ്‌ ലോകമെങ്ങുമുള്ള യഹോവയുടെ ജനത്തിന്‌ ആവേശം പകർന്നു. പക്ഷേ കോവിഡ്‌-19 മഹാമാരി അപ്പോഴും അവസാനിച്ചിരുന്നില്ല.a മീറ്റിങ്ങുകൾക്കു കൂടിവരുന്നവർക്ക്‌ വൈറസ്‌ പകരാതിരിക്കാൻ രാജ്യഹാളുകളിൽ എന്തൊക്കെ മാറ്റങ്ങളും സജ്ജീകരണങ്ങളും ഉപകരണങ്ങളും ആവശ്യമായിരുന്നു? രണ്ടു വർഷമായി മീറ്റിങ്ങുകളൊന്നും നടക്കാതിരുന്ന രാജ്യഹാളുകൾ പെട്ടെന്ന്‌ എങ്ങനെയാണ്‌ മീറ്റിങ്ങുകൾക്കു സജ്ജമായത്‌?
ശരിക്കും പറഞ്ഞാൽ, രാജ്യഹാളിൽ മീറ്റിങ്ങുകൾ തുടങ്ങുന്നതിന്‌ മാസങ്ങൾക്കു മുമ്പുതന്നെ സഹോദരങ്ങൾ അതിനുവേണ്ടിയുള്ള ക്രമീകരണങ്ങൾ ചെയ്യാൻ തുടങ്ങി.
വ്യത്യസ്‌ത ആവശ്യങ്ങൾ, വ്യത്യസ്‌ത പരിഹാരങ്ങൾ
2020-ൽ നമ്മുടെ നേരിട്ടുള്ള മീറ്റിങ്ങുകൾ നിറുത്തിവെച്ച്‌ ഒരു മാസത്തിനുള്ളിൽത്തന്നെ ന്യൂയോർക്കിലെ വാർവിക്കിലുള്ള നമ്മുടെ ലോകവ്യാപക ഡിസൈൻ/നിർമാണ വിഭാഗം (ഡബ്ല്യുഡിസി) രാജ്യഹാളുകളെക്കുറിച്ച്‌ ചിന്തിച്ചുതുടങ്ങിയിരുന്നു. കോവിഡ്‌-19 വന്ന ഈ സാഹചര്യത്തിൽ, ഇനി മുന്നോട്ട്‌ രാജ്യഹാളുകൾ ഉപയോഗിക്കുന്ന രീതിയിൽ എന്തൊക്കെ മാറ്റം വരുത്തണമെന്നും അതു കൂടുതൽ സുരക്ഷിതമാക്കാൻ എന്തു ചെയ്യാമെന്നും അവർ ആലോചിച്ചു.
ലോകത്തിന്റെ ഒരു ഭാഗത്ത്‌ ആവശ്യമുള്ള കാര്യങ്ങളല്ല മറ്റു ചില ഭാഗങ്ങളിൽ ആവശ്യമായിട്ടുള്ളത്‌. ഡബ്ല്യുഡിസി-യിൽ പ്രവർത്തിക്കുന്ന മാത്യു ഡി സാൻക്‌റ്റിസ്‌ സഹോദരൻ പറയുന്നു: “ചിലയിടങ്ങളിലെ പ്രശ്‌നം, കൈ കഴുകാൻ ആവശ്യമായ സൗകര്യങ്ങൾ ഇല്ലാത്തതാണ്‌. രാജ്യഹാളുകളിൽ വെള്ളം ലഭ്യമല്ലെങ്കിൽ അത്‌ പണം കൊടുത്ത്‌ മേടിക്കുകയോ തൊട്ടടുത്തുള്ള പുഴയിലോ കിണറിലോ പോയി എടുത്തുകൊണ്ടുവരുകയോ വേണം. മറ്റു രാജ്യങ്ങളിൽ, കെട്ടിടത്തിൽ വെക്കുന്ന എ.സി., വായുസഞ്ചാര യൂണിറ്റുകൾ, ആരോഗ്യത്തോടും ശുചിത്വത്തോടും ബന്ധപ്പെട്ട സൈൻബോർഡുകൾ എന്നീ കാര്യങ്ങളിൽ ഗവൺമെന്റുകൾ ചില ഭേദഗതികൾ വരുത്തിയിരിക്കുന്നു.”
ഇത്തരം പ്രശ്‌നങ്ങളെ എങ്ങനെയാണ്‌ സഹോദരങ്ങൾ കൈകാര്യം ചെയ്‌തത്‌? പല രാജ്യഹാളുകളിലും “ലളിതവും ചെലവ്‌ കുറഞ്ഞതും ആയ രീതികൾ വളരെ ഫലപ്രദമായി കണ്ടു” എന്ന്‌ മാത്യു പറയുന്നു. ഉദാഹരണത്തിന്‌, പാപ്പുവ ന്യൂഗിനിയിൽ 20 ലിറ്റർ കൊള്ളുന്ന ക്യാനുകളിൽ പൈപ്പ്‌ പിടിപ്പിച്ച്‌ കൈ കഴുകാനുള്ള സൗകര്യം ഒരുക്കി. ഉൾപ്രദേശങ്ങളിലുള്ള രാജ്യഹാളുകളിൽ പൊതുവേ ഈ സജ്ജീകരണം ഒരുക്കാൻ ഏകദേശം 3,000 രൂപയേ (40 യു.എസ്‌. ഡോളർ) വേണ്ടിവന്നുള്ളൂ. ആഫ്രിക്കയിലെ രാജ്യഹാളുകൾക്കായി 6,000-ത്തിലധികം ഉയർന്ന നിലവാരമുള്ള കൈ കഴുകൽ കേന്ദ്രങ്ങൾ ഏഷ്യയിലെ ഒരു വിതരണക്കാരനിൽനിന്ന്‌ വാങ്ങിച്ചു.
ശുചിത്വകാര്യങ്ങളിൽ മാതാപിതാക്കൾ മക്കൾക്ക്‌ നല്ല മാതൃക വെക്കുന്നു
രാജ്യഹാളുകളിൽ മറ്റു ചില മാറ്റങ്ങളും വരുത്തി. വായുസഞ്ചാരം കൂട്ടുന്നതിനുവേണ്ടി ഫാനുകളിലും വായുസഞ്ചാര യൂണിറ്റുകളിലും മാറ്റം വരുത്തുകയോ പുതിയത്‌ പിടിപ്പിക്കുകയോ ചെയ്‌തു. മൈക്കുകൾ കൈകളിലൂടെ കൈമാറാതിരിക്കാൻ മിക്ക രാജ്യഹാളുകളിലും മൈക്ക്‌ ഘടിപ്പിക്കാനുള്ള നീണ്ട സ്റ്റിക്കുകൾ വാങ്ങിച്ചു. ടാപ്പുകളിലോ വാതിലിന്റെ പിടിയിലോ ഒക്കെ കൂടുതലായി സ്‌പർശിക്കാൻ ഇടയുള്ളതുകൊണ്ട്‌ അവിടെ നിരന്തരം അണുവിമുക്തമാക്കി. ഇനി അതോടൊപ്പം, അത്തരം സ്ഥലങ്ങളിൽ സ്‌പർശിക്കുന്നതു പരമാവധി കുറയ്‌ക്കാനുള്ള ക്രമീകരണങ്ങളും ചെയ്‌തു. ഉദാഹരണത്തിന്‌, ചില സഭകൾ ബാത്‌റൂമുകളിലൊക്കെ തനിയെ ഓണാകുന്ന സെൻസർ ടാപ്പുകൾ പിടിപ്പിച്ചു. ചിലിയിൽ ഈ ക്രമീകരണങ്ങൾ ചെയ്യുന്നതിന്‌ ഒരു രാജ്യഹാളിന്‌ ഏതാണ്ട്‌ ഒരു ലക്ഷത്തിലധികം രൂപയാണ്‌ ആവശ്യമായിവന്നത്‌.
മൈക്കുകൾ കൈകളിലൂടെ കൈമാറുന്നില്ല
രാജ്യഹാളുകൾ സുരക്ഷിതമാക്കുന്നതിന്‌ പ്രാധാന്യം കൊടുത്തപ്പോൾത്തന്നെ സംഭാവനകൾ പാഴാക്കാതിരിക്കാനും സഹോദരങ്ങൾ പ്രത്യേകം ശ്രദ്ധിച്ചു. ഉദാഹരണത്തിന്‌, ചില സ്ഥലങ്ങളിൽ കൈ കഴുകൽ കേന്ദ്രങ്ങൾക്കും മൈക്കുകൾ പിടിപ്പിക്കാനുള്ള സ്റ്റിക്കുകൾ മേടിക്കുന്നതിനും ഗവൺമെന്റുകൾ തന്നിരിക്കുന്ന ഇളവുകൾ പ്രയോജനപ്പെടുത്തി. ബ്രാഞ്ചോഫീസുകൾ വലിയ അളവിൽ സാധനങ്ങൾ മേടിച്ചപ്പോൾ അതും പണം ലാഭിക്കാൻ സഹായിച്ചു. ഇനി, ബ്രാഞ്ചോഫീസും ആഗോള പർച്ചേസിങ്‌ ഡിപ്പാർട്ടുമെന്റും മിക്കപ്പോഴും നിർമാതാക്കളുടെ കൈയിൽനിന്ന്‌ നേരിട്ട്‌ സാധനങ്ങൾ മേടിച്ചു. അങ്ങനെ കുറഞ്ഞ ചെലവിൽ സാധനങ്ങൾ കിട്ടിയെന്നു മാത്രമല്ല അതു പെട്ടെന്നു ലഭ്യമാകുകയും ചെയ്‌തു.
കൈകൾ അണുവിമുക്തമാക്കാനുള്ള സൗകര്യം
“ഇവിടെ ആയിരിക്കുമ്പോൾ എനിക്കു ടെൻഷനില്ല”
രാജ്യഹാളുകൾ സുരക്ഷിതമാക്കാൻ ക്രമീകരണങ്ങൾ ചെയ്‌തപ്പോൾ അതു മീറ്റിങ്ങിനു വന്ന സഹോദരങ്ങളെ സംരക്ഷിച്ചെന്നു മാത്രമല്ല അത്‌ സഹോദരങ്ങൾക്ക്‌ സമാധാനവും നൽകി. ഉദാഹരണത്തിന്‌, പെറുവിലെ ഡൂൾസീനെ എന്ന സഹോദരിക്ക്‌ വീണ്ടും രാജ്യഹാളുകളിൽ മീറ്റിങ്ങ്‌ തുടങ്ങാൻപോകുന്നെന്നു കേട്ടപ്പോൾ ഉള്ളിൽ “ചെറിയ പേടി തോന്നി.” അതിന്റെ കാരണത്തെക്കുറിച്ച്‌ സഹോദരി പറയുന്നത്‌ ഇങ്ങനെയാണ്‌: “മഹാമാരി തുടങ്ങിയപ്പോൾത്തന്നെ എനിക്കു കോവിഡ്‌ വന്നിരുന്നു. രാജ്യഹാളിൽ പോയിക്കഴിഞ്ഞാൽ കോവിഡ്‌ പിന്നെയും വന്നാലോ എന്ന പേടിയായിരുന്നു എനിക്ക്‌. പക്ഷേ രാജ്യഹാളിൽ സുരക്ഷയ്‌ക്കുവേണ്ടി മൂപ്പന്മാർ ചെയ്‌ത ക്രമീകരണങ്ങൾ കണ്ടപ്പോൾ ശരിക്കും ആശ്വാസം തോന്നി. എല്ലാവർക്കും സാനിറ്റൈസ്‌ ചെയ്യാൻവേണ്ട സൗകര്യങ്ങൾ ഉണ്ടായിരുന്നു. ഉത്തരം പറയുമ്പോൾ ആരും മൈക്കിൽ പിടിക്കേണ്ട ആവശ്യംപോലും വരുന്നില്ല. ഇനി ഓരോ മീറ്റിങ്ങിനു മുമ്പും ശേഷവും ഹാളുകൾ അണുവിമുക്തമാക്കുന്നു. അതുകൊണ്ടുതന്നെ ഇവിടെ ആയിരിക്കുമ്പോൾ എനിക്കു ടെൻഷനില്ല.”b
രാജ്യഹാൾ അണുവിമുക്തമാക്കുന്നു
സാംബിയയിലുള്ള സാറ സഹോദരിക്ക്‌ മറ്റൊരു പ്രശ്‌നമാണ്‌ നേരിട്ടത്‌. സാറ പറയുന്നു: “കുറച്ച്‌ മാസങ്ങൾക്കു മുമ്പാണ്‌ എന്റെ ഭർത്താവ്‌ കോവിഡ്‌ വന്ന്‌ മരിച്ചത്‌. വീണ്ടും രാജ്യഹാളിൽ പോയിത്തുടങ്ങുമ്പോൾ എന്റെ ഭർത്താവ്‌ കൂടെയുണ്ടാകില്ലല്ലോ എന്നോർത്ത്‌ എനിക്ക്‌ ടെൻഷനും വിഷമവും ഒക്കെ തോന്നി.” പക്ഷേ മീറ്റിങ്ങിനു പോയപ്പോൾ സഹോദരിക്ക്‌ എന്താണ്‌ തോന്നിയത്‌? സാറ പറയുന്നത്‌ കേൾക്കുക: “ഈ അവസാനനാളുകളിൽ യഹോവ നമ്മുടെ കൂടെയുണ്ടെന്ന്‌ നേരിട്ട്‌ മീറ്റിങ്ങിനു പോയപ്പോൾ എനിക്കു കൂടുതൽ ഉറപ്പായി. മുമ്പത്തെക്കാളും അധികം എനിക്കു പ്രോത്സാഹനവും ആശ്വാസവും പിന്തുണയും ഒക്കെ സഹോദരീസഹോദരന്മാരിൽനിന്നും മൂപ്പന്മാരിൽനിന്നും ലഭിച്ചു.”
മീറ്റിങ്ങിന്‌ നേരിട്ടുവന്നപ്പോഴുള്ള സന്തോഷം
രാജ്യഹാളുകളിൽ വീണ്ടും ഒത്തുച്ചേരാനായതിൽ ലോകമെങ്ങുമുള്ള നമ്മുടെ സഹോദരങ്ങൾ വളരെയധികം നന്ദിയുള്ളവരാണ്‌. നിങ്ങളുടെ സംഭാവനകൾക്കു ഒത്തിരി നന്ദി. പലരും donate.jw.org-ലൂടെയാണ്‌ സംഭാവനകൾ നൽകിയത്‌. ശുദ്ധാരാധനയ്‌ക്കായി കൂടിവരുന്ന ഇടങ്ങൾ സുരക്ഷിതവും സൗകര്യപ്രദവും ആക്കാൻ ഈ സംഭാവനകൾ സഹായിച്ചു.
a ഫോണിലൂടെയോ വീഡിയോ കോൺഫറൻസിലൂടെയോ മീറ്റിങ്ങുകൾ കൂടാനുള്ള സൗകര്യം സാധ്യമായ ഇടങ്ങളിൽ ചെയ്‌തിട്ടുണ്ട്‌.
b അതോടൊപ്പം രാജ്യഹാളിൽ മീറ്റിങ്ങ്‌ കൂടുന്നവരെ മാസ്‌ക്‌ ധരിക്കാൻ വളരെയധികം പ്രോത്സാഹിപ്പിച്ചിരുന്നു.