“അധാർമി​ക​പ്ര​വൃ​ത്തി​ക​ളിൽനിന്ന്‌ ഓടി​യ​കലൂ!”

1, 2. യഹോ​വ​യു​ടെ ജനത്തെ കുരു​ക്കാൻ ബിലെ​യാം പദ്ധതി ഒരുക്കി​യത്‌ എങ്ങനെ?

ചൂണ്ടയു​മാ​യി തന്റെ പതിവ്‌ സ്ഥലത്തേക്കു പോകു​ക​യാണ്‌ ഒരു മീൻപി​ടി​ത്ത​ക്കാ​രൻ. ഒരു പ്രത്യേ​ക​യി​നം മത്സ്യമാണ്‌ അദ്ദേഹ​ത്തി​ന്റെ മനസ്സി​ലു​ള്ളത്‌. പറ്റിയ ഇര കോർത്ത്‌ അദ്ദേഹം ചൂണ്ട വെള്ളത്തി​ലേക്ക്‌ ഇടുന്നു. അൽപ്പസ​മ​യ​ത്തി​നു​ള്ളിൽ മീൻ ചൂണ്ടയിൽ കൊത്തി​വ​ലി​ക്കു​ന്നു; ചൂണ്ടക്കണ വളയുന്നു. ഇര ഫലി​ച്ചെന്നു കണ്ട അദ്ദേഹം സന്തോ​ഷ​ത്തോ​ടെ മത്സ്യത്തെ വലിച്ച്‌ കരയ്‌ക്കി​ടു​ന്നു.

² ഇതു പുരാ​ത​ന​കാ​ലത്തെ ഒരു സംഭവം നമ്മുടെ മനസ്സി​ലേക്കു കൊണ്ടു​വ​രു​ന്നു. ബി.സി. 1473. ബിലെ​യാം എന്നൊ​രാൾ ദൈവ​ജ​നത്തെ കുടു​ക്കാൻ പദ്ധതി​യി​ട്ടു; പറ്റിയ ഒരു ഇരയെ കണ്ടെത്തു​ക​യും ചെയ്‌തു. ദൈവ​ജനം അപ്പോൾ വാഗ്‌ദ​ത്ത​ദേ​ശ​ത്തി​ന്റെ അതിർത്തി​യി​ലുള്ള മോവാബ്‌ സമഭൂ​മി​യിൽ പാളയ​മ​ടി​ച്ചി​രി​ക്കു​ക​യാ​യി​രു​ന്നു. യഹോ​വ​യു​ടെ പ്രവാ​ച​ക​നാ​ണെന്ന്‌ അവകാ​ശ​പ്പെ​ട്ടെ​ങ്കി​ലും ഇസ്രാ​യേ​ലി​നെ ശപിക്കാൻ ശത്രുക്കൾ കൂലി​ക്കെ​ടുത്ത ഒരു അത്യാ​ഗ്ര​ഹി​യാ​യി​രു​ന്നു ബിലെ​യാം. പക്ഷേ യഹോവ ഇടപെ​ട്ട​തു​കൊണ്ട്‌ അവന്‌ അനു​ഗ്ര​ഹി​ക്കാ​നേ കഴിഞ്ഞു​ള്ളൂ. ഏതു വിധേ​ന​യും തനിക്കുള്ള പ്രതി​ഫലം സ്വന്തമാ​ക്കാൻ ആഗ്രഹിച്ച ബിലെ​യാം, ഇസ്രാ​യേ​ല്യ​രെ​ക്കൊണ്ട്‌ കടുത്ത പാപം ചെയ്യി​ക്കാൻ പദ്ധതി​യി​ട്ടു. അങ്ങനെ സംഭവി​ച്ചാൽ ദൈവം​തന്നെ സ്വന്തജ​നത്തെ ശപിച്ചു​കൊ​ള്ളു​മെ​ന്നാ​യി​രു​ന്നു ബിലെ​യാ​മി​ന്റെ കണക്കു​കൂ​ട്ടൽ. ആ ലക്ഷ്യത്തിൽ അയാൾ തന്റെ ഇര എറിഞ്ഞു—സുന്ദരി​ക​ളായ മോവാ​ബ്യ​യു​വ​തി​കൾ.—സംഖ്യ 22:1-7; 31:15, 16; വെളി​പാട്‌ 2:14.

3. ബിലെ​യാ​മി​ന്റെ പദ്ധതി എത്ര​ത്തോ​ളം വിജയി​ച്ചു?

³ ആ തന്ത്രം ഫലിച്ചോ? ഉവ്വ്‌, ഒരു പരിധി​വരെ. “മോവാ​ബി​ലെ സ്‌ത്രീ​ക​ളു​മാ​യി അധാർമി​ക​പ്ര​വൃ​ത്തി​കൾ” ചെയ്‌തു​കൊണ്ട്‌ ആയിര​ക്ക​ണ​ക്കിന്‌ ഇസ്രാ​യേ​ല്യ​പു​രു​ഷ​ന്മാർ ആ ഇരയിൽ കൊത്തി. എന്തിന​ധി​കം, ഫലപു​ഷ്ടി​യു​ടെ അഥവാ ലൈം​ഗി​ക​ത​യു​ടെ ദേവനായ പെയോ​രി​ലെ ബാൽ ഉൾപ്പെ​ടെ​യുള്ള മോവാ​ബ്യ​ദൈ​വ​ങ്ങളെ അവർ ആരാധി​ക്കു​ക​പോ​ലും ചെയ്‌തു. ഫലമോ? വാഗ്‌ദ​ത്ത​ദേ​ശ​ത്തി​ന്റെ കവാട​ത്തിൽ എത്തിനിൽക്കെ 24,000 ഇസ്രാ​യേ​ല്യർ മരിച്ചു​വീ​ണു. എത്ര ഭീകര​മായ ദുരന്തം!—സംഖ്യ 25:1-9.

4. ആയിര​ക്ക​ണ​ക്കിന്‌ ഇസ്രാ​യേ​ല്യർക്ക്‌ അധാർമി​കത ഒരു കെണി​യാ​യി​ത്തീർന്നത്‌ എന്തു​കൊണ്ട്‌?

⁴ എന്താണ്‌ ഈ ദുരന്ത​ത്തി​നു കളമൊ​രു​ക്കി​യത്‌? ഈജി​പ്‌തിൽനിന്ന്‌ തങ്ങളെ വിടു​വി​ച്ചു​കൊ​ണ്ടു​വന്ന്‌, മരുഭൂ​മി​യി​ലു​ട​നീ​ളം പോറ്റി​പ്പു​ലർത്തി, യാതൊ​രു ഹാനി​യും തട്ടാതെ വാഗ്‌ദ​ത്ത​ദേ​ശ​ത്തി​ന്റെ കവാട​ത്തോ​ളം എത്തിച്ച യഹോ​വ​യിൽനിന്ന്‌ അകന്നു​മാ​റിയ അവരി​ല​നേ​ക​രും ഒരു ദുഷ്ടഹൃ​ദയം വളർത്തി​യെ​ടു​ത്തി​രു​ന്നു. (എബ്രായർ 3:12) അക്കാര്യം സൂചി​പ്പി​ച്ചു​കൊണ്ട്‌ പൗലോസ്‌ അപ്പോ​സ്‌തലൻ എഴുതി: “അവരിൽ ചില​രെ​പ്പോ​ലെ നമ്മൾ അധാർമി​ക​പ്ര​വൃ​ത്തി​കൾ ചെയ്യരുത്‌. അധാർമി​ക​പ്ര​വൃ​ത്തി കാരണം ഒറ്റ ദിവസം​കൊണ്ട്‌ അവരിൽ 23,000 പേരാണു മരിച്ചു​വീ​ണത്‌.”a—1 കൊരി​ന്ത്യർ 10:8.

5, 6. മോവാബ്‌ സമഭൂ​മി​യിൽവെച്ച്‌ ഇസ്രാ​യേ​ല്യർ പാപം ചെയ്‌തതു സംബന്ധിച്ച വിവരണം ഇന്നു നമുക്കു പ്രസക്ത​മാ​യി​രി​ക്കു​ന്നത്‌ എന്തു​കൊണ്ട്‌?

⁵ പുരാ​ത​ന​കാ​ല​ത്തേ​തി​നെ​ക്കാൾ ശ്രേഷ്‌ഠ​മായ ഒരു വാഗ്‌ദ​ത്ത​ദേ​ശ​ത്തി​ന്റെ കവാട​ത്തിൽ എത്തിനിൽക്കുന്ന ദൈവ​ജ​ന​ത്തി​നു സംഖ്യാ​പു​സ്‌ത​ക​ത്തി​ലെ ആ വിവര​ണ​ത്തിൽനിന്ന്‌ സുപ്ര​ധാ​ന​മായ നിരവധി പാഠങ്ങൾ പഠിക്കാ​നുണ്ട്‌. (1 കൊരി​ന്ത്യർ 10:11) ഉദാഹ​ര​ണ​ത്തിന്‌, ലൈം​ഗി​ക​ത​യോ​ടുള്ള അഭിനി​വേ​ശ​ത്തി​ന്റെ കാര്യ​ത്തിൽ പുരാ​ത​ന​മോ​വാ​ബി​ലെ സ്ഥിതി​വി​ശേ​ഷ​മാണ്‌ ഇന്നു ലോക​ത്തി​ലു​ള്ളത്‌, വാസ്‌ത​വ​ത്തിൽ അന്നത്തെ​ക്കാൾ അധഃപ​തിച്ച അവസ്ഥ. ഓരോ വർഷവും ആയിര​ക്ക​ണ​ക്കി​നു ക്രിസ്‌ത്യാ​നി​ക​ളാണ്‌ ഇസ്രാ​യേ​ല്യർ കുടു​ങ്ങിയ അതേ കെണി​യിൽ വീണു​പോ​കു​ന്നത്‌. (2 കൊരി​ന്ത്യർ 2:11) യാതൊ​രു കൂസലു​മി​ല്ലാ​തെ ഒരു മിദ്യാ​ന്യ​സ്‌ത്രീ​യെ ഇസ്രാ​യേ​ല്യ​പാ​ള​യ​ത്തി​ലുള്ള തന്റെ കൂടാ​ര​ത്തി​ലേക്കു കൊണ്ടു​വന്ന സിമ്രി​യെ​പ്പോ​ലെ, ഇന്നു ദൈവ​ജ​ന​വു​മാ​യി സഹവസി​ക്കുന്ന ചിലർ ക്രിസ്‌തീ​യ​സ​ഭ​യിൽ ഒരു ദുസ്സ്വാ​ധീ​ന​മാ​യി​ത്തീർന്നി​രി​ക്കു​ന്നു.—സംഖ്യ 25:6, 14; യൂദ 4.

⁶ നിങ്ങൾ ഇന്ന്‌ എത്തിനിൽക്കു​ന്നത്‌ ആധുനി​ക​കാ​ലത്തെ മോവാബ്‌ സമഭൂ​മി​യി​ലാ​ണെന്നു നിങ്ങൾ തിരി​ച്ച​റി​യു​ന്നു​ണ്ടോ? നിങ്ങളു​ടെ പ്രതി​ഫലം—ഇന്നോളം കാത്തു​കാ​ത്തി​രുന്ന ആ പുതി​യ​ലോ​കം—കൺമു​മ്പിൽ കാണാൻ നിങ്ങൾക്കാ​കു​ന്നു​ണ്ടോ? ഉണ്ടെങ്കിൽ, “അധാർമി​ക​പ്ര​വൃ​ത്തി​ക​ളിൽനിന്ന്‌ ഓടി​യ​കലൂ!” എന്ന കല്‌പന അനുസ​രി​ച്ചു​കൊണ്ട്‌ ദൈവ​സ്‌നേ​ഹ​ത്തിൽ നിലനിൽക്കാൻ സാധി​ക്കു​ന്ന​തെ​ല്ലാം ചെയ്യുക.—1 കൊരി​ന്ത്യർ 6:18.

എന്താണു ലൈം​ഗിക അധാർമി​കത?

7, 8. എന്താണു ലൈം​ഗിക അധാർമി​കത, അധാർമി​ക​പ്ര​വൃ​ത്തി​കൾ ചെയ്യു​ന്നവർ വിതയ്‌ക്കു​ന്ന​തു​തന്നെ കൊയ്യു​മെന്നു പറയു​ന്നത്‌ എന്തു​കൊണ്ട്‌?

⁷ ബൈബി​ളിൽ “ലൈം​ഗിക അധാർമി​കത” (ഗ്രീക്ക്‌, പോർണിയ) എന്ന പദം അവിഹി​ത​മായ ലൈം​ഗി​ക​ബ​ന്ധ​ങ്ങ​ളെ​യാ​ണു കുറി​ക്കു​ന്നത്‌. അതായത്‌, തിരു​വെ​ഴു​ത്ത​ധി​ഷ്‌ഠി​ത​മായ വിവാ​ഹ​ത്തി​നു പുറത്തുള്ള ലൈം​ഗി​ക​ബ​ന്ധങ്ങൾ. വ്യഭി​ചാ​രം, വേശ്യാ​വൃ​ത്തി, അവിവാ​ഹി​തർ തമ്മിലുള്ള ലൈം​ഗി​ക​ബന്ധം (അധരസം​ഭോ​ഗം, ഗുദസം​ഭോ​ഗം എന്നിവ ഉൾപ്പെടെ), വിവാ​ഹ​യി​ണ​യ​ല്ലാത്ത ഒരാളു​ടെ ലൈം​ഗി​കാ​വ​യവം ഉത്തേജി​പ്പി​ക്കൽ എന്നിവ​യെ​ല്ലാം അതിൽ ഉൾപ്പെ​ടു​ന്നു. സ്വവർഗ​സം​ഭോ​ഗം, മൃഗസം​ഭോ​ഗം എന്നിവ​യും ഇതിൽപ്പെ​ടു​ന്നു.b

⁸ തിരു​വെ​ഴു​ത്തു​വീ​ക്ഷണം വളരെ വ്യക്തമാണ്‌: അധാർമി​ക​പ്ര​വൃ​ത്തി​കൾ ചെയ്യു​ന്ന​വർക്കു ക്രിസ്‌തീ​യ​സ​ഭ​യു​ടെ ഭാഗമാ​യി​രി​ക്കാ​നോ നിത്യ​ജീ​വൻ നേടാ​നോ കഴിയില്ല. (1 കൊരി​ന്ത്യർ 6:9; വെളി​പാട്‌ 22:15) ഇപ്പോൾപ്പോ​ലും അത്‌ അവർക്കു വലിയ ദോഷം വരുത്തി​വെ​ക്കു​ന്നു. മറ്റുള്ള​വർക്ക്‌ അവരി​ലുള്ള വിശ്വാ​സം, അവരു​ടെ​തന്നെ ആത്മാഭി​മാ​നം എന്നിവ നഷ്ടമാ​കു​മെന്നു മാത്രമല്ല, ദാമ്പത്യ​ത്തി​ലെ അസ്വാ​ര​സ്യ​ങ്ങൾ, കുറ്റഭാ​രം പേറുന്ന മനസ്സാക്ഷി, ആഗ്രഹി​ക്കാത്ത ഗർഭധാ​രണം, രോഗങ്ങൾ, മരണം തുടങ്ങി​യ​വ​യ്‌ക്കും അതു വഴി​വെ​ക്കു​ന്നു. (ഗലാത്യർ 6:7, 8 വായി​ക്കുക.) ഇത്ര​യേറെ ദുരന്തങ്ങൾ നിറഞ്ഞ ഒരു പാതയി​ലേക്ക്‌ എന്തിനു കാലെ​ടു​ത്തു​വെ​ക്കണം? അതി​ലേ​ക്കുള്ള ആദ്യചു​വടു വെക്കു​മ്പോൾ പലരും അത്ര കടന്നു​ചി​ന്തി​ക്കാ​റില്ല എന്നതാണു ദുഃഖ​ക​ര​മായ സത്യം. പലപ്പോ​ഴും അശ്ലീല​ത്തി​ന്റെ രൂപത്തിൽ തുടങ്ങുന്ന ആ ആദ്യചു​വ​ടി​നെ​ക്കു​റിച്ച്‌ നമുക്ക്‌ ഇപ്പോൾ ചിന്തി​ക്കാം.

അശ്ലീലം—ആദ്യചു​വട്‌

9. ചിലർ പറയു​ന്ന​തു​പോ​ലെ, അശ്ലീലം നിരു​പ​ദ്ര​വ​ക​ര​മാ​ണോ? വിശദ​മാ​ക്കുക.

⁹ സംഗീതം, ടെലി​വി​ഷൻ, ഇന്റർനെറ്റ്‌, കടകളിൽ പ്രദർശി​പ്പി​ച്ചി​രി​ക്കുന്ന പത്രമാ​സി​കകൾ എന്നിവ​യി​ലെ​ല്ലാം അശ്ലീലം സർവസാ​ധാ​ര​ണ​മാണ്‌.c ചിലർ പറയു​ന്ന​തു​പോ​ലെ അതു നിരു​പ​ദ്ര​വ​ക​ര​മാ​ണോ? ഒരിക്ക​ലു​മല്ല! അശ്ലീലം കാണു​ന്നവർ സ്വയം​ഭോ​ഗം ഒരു ശീലമാ​ക്കു​ക​യും “കടിഞ്ഞാ​ണി​ല്ലാത്ത കാമവി​കാ​രങ്ങൾ” മനസ്സി​ലിട്ട്‌ താലോ​ലി​ക്കു​ക​യും ചെയ്‌തേ​ക്കാം.d ഫലമോ? ലൈം​ഗി​കാ​സക്തി, വഴിപി​ഴച്ച മോഹങ്ങൾ, ഗുരു​ത​ര​മായ ദാമ്പത്യ​പ്ര​ശ്‌നങ്ങൾ, വിവാ​ഹ​മോ​ചനം എന്നിവ​തന്നെ. (റോമർ 1:24-27; എഫെസ്യർ 4:19) ലൈം​ഗി​കാ​സ​ക്തി​യെ ഒരു ഗവേഷകൻ കാൻസ​റി​നോ​ടാണ്‌ ഉപമി​ച്ചത്‌. “അതു വളർന്നു​വ്യാ​പി​ച്ചു​കൊ​ണ്ടി​രി​ക്കും. തനിയെ മാറാൻ സാധ്യ​ത​യി​ല്ലെന്നു മാത്രമല്ല, ചികി​ത്സിച്ച്‌ ഭേദമാ​ക്കാൻ വളരെ പ്രയാ​സ​വു​മാണ്‌,” അദ്ദേഹം പറയുന്നു.

10. യാക്കോബ്‌ 1:14, 15-ലെ തത്ത്വം നമുക്ക്‌ എങ്ങനെ പ്രാവർത്തി​ക​മാ​ക്കാം? (“ധാർമികശുദ്ധി പാലി​ക്കാ​നുള്ള ശക്തി” എന്ന ചതുര​വും കാണുക.)

¹⁰ യാക്കോബ്‌ 1:14, 15-ലെ വാക്കുകൾ ശ്രദ്ധി​ക്കുക: “സ്വന്തം മോഹ​ങ്ങ​ളാണ്‌ ഓരോ​രു​ത്ത​രെ​യും ആകർഷിച്ച്‌ മയക്കി പരീക്ഷ​ണ​ങ്ങ​ളിൽ അകപ്പെ​ടു​ത്തു​ന്നത്‌. പിന്നെ മോഹം ഗർഭം ധരിച്ച്‌ പാപത്തെ പ്രസവി​ക്കു​ന്നു. അങ്ങനെ പാപം ചെയ്യു​മ്പോൾ മരണം ജനിക്കു​ന്നു.” അതു​കൊണ്ട്‌ തെറ്റായ ഒരു മോഹം നിങ്ങളു​ടെ മനസ്സിൽ കയറി​ക്കൂ​ടു​ന്ന​പക്ഷം എത്രയും പെട്ടെന്ന്‌ അതു പിഴു​തു​ക​ള​യുക! ഉദാഹ​ര​ണ​ത്തിന്‌, യാദൃ​ച്ഛി​ക​മാ​യി നഗ്നചി​ത്രങ്ങൾ നിങ്ങളു​ടെ കൺമു​മ്പിൽ പ്രത്യ​ക്ഷ​പ്പെ​ട്ടാൽ പെട്ടെ​ന്നു​തന്നെ നോട്ടം മാറ്റു​ക​യോ കമ്പ്യൂട്ടർ ഓഫ്‌ ചെയ്യു​ക​യോ ടിവി ചാനൽ മാറ്റു​ക​യോ ചെയ്യുക. അധാർമി​ക​മോ​ഹ​ങ്ങൾക്കു കീഴട​ങ്ങാ​തി​രി​ക്കാൻ കഴിയു​ന്ന​തെ​ല്ലാം ചെയ്യുക. അങ്ങനെ അവ നിയ​ന്ത്ര​ണാ​തീ​ത​മാ​യി​ത്തീർന്ന്‌ നിങ്ങളെ കീഴ്‌പെ​ടു​ത്തു​ന്നത്‌ ഒഴിവാ​ക്കുക.—മത്തായി 5:29, 30 വായി​ക്കുക.

11. തെറ്റായ മോഹ​ങ്ങ​ളോ​ടു പോരാ​ടു​മ്പോൾ യഹോ​വ​യിൽ ആശ്രയി​ക്കു​ന്നെന്നു നമുക്ക്‌ എങ്ങനെ തെളി​യി​ക്കാം?

¹¹ നമ്മളെ​ക്കു​റിച്ച്‌ നമ്മളെ​ക്കാ​ളും അറിയാ​വുന്ന ദൈവം, ഇങ്ങനെ ഉപദേ​ശി​ക്കു​ന്ന​തി​നു തക്ക കാരണ​മുണ്ട്‌: “അതു​കൊണ്ട്‌ ലൈം​ഗിക അധാർമി​കത, അശുദ്ധി, അനിയ​ന്ത്രി​ത​മായ കാമാ​വേശം, ദുഷിച്ച മോഹങ്ങൾ, അത്യാ​ഗ്ര​ഹ​മെന്ന വിഗ്ര​ഹാ​രാ​ധന എന്നിങ്ങ​നെ​യുള്ള കാര്യ​ങ്ങ​ളിൽ നിങ്ങളു​ടെ ഭൗമി​കാ​വ​യ​വ​ങ്ങളെ കൊന്നു​ക​ള​യുക.” (കൊ​ലോ​സ്യർ 3:5) അങ്ങനെ ചെയ്യാൻ എളുപ്പമല്ല എന്നതു ശരിതന്നെ. എന്നാൽ നമുക്കു വിളി​ച്ച​പേ​ക്ഷി​ക്കാൻ, സ്‌നേ​ഹ​വും ക്ഷമയും ഉള്ള ഒരു സ്വർഗീ​യ​പി​താവ്‌ ഉണ്ടെന്ന്‌ ഓർക്കുക. (സങ്കീർത്തനം 68:19) അതു​കൊണ്ട്‌ തെറ്റായ ചിന്തകൾ മനസ്സി​ലേക്കു വരു​മ്പോൾത്തന്നെ ദൈവ​ത്തി​ലേക്കു തിരി​യുക. “അസാധാ​ര​ണ​ശക്തി”ക്കായി പ്രാർഥി​ക്കു​ക​യും മനസ്സിനെ മറ്റു കാര്യ​ങ്ങ​ളി​ലേക്കു തിരി​ച്ചു​വി​ടു​ക​യും ചെയ്യുക.—2 കൊരി​ന്ത്യർ 4:7; 1 കൊരി​ന്ത്യർ 9:27; “എനിക്ക്‌ എങ്ങനെ ഒരു ദുശ്ശീലം നിറു​ത്താ​നാ​കും?” എന്ന ചതുരം കാണുക.

12. എന്താണു നമ്മുടെ “ഹൃദയം,” അതു കാത്തു​സൂ​ക്ഷി​ക്കേ​ണ്ടത്‌ എന്തു​കൊണ്ട്‌?

¹² ജ്ഞാനി​യായ ശലോ​മോൻ എഴുതി: “മറ്റ്‌ എന്തി​നെ​ക്കാ​ളും പ്രധാനം നിന്റെ ഹൃദയം കാത്തു​സൂ​ക്ഷി​ക്കു​ന്ന​താണ്‌; അതിൽനി​ന്നാ​ണു ജീവന്റെ ഉറവുകൾ ആരംഭി​ക്കു​ന്നത്‌.” (സുഭാ​ഷി​തങ്ങൾ 4:23) നമ്മുടെ ആന്തരി​ക​വ്യ​ക്തി​ത്വ​ത്തെ, അതായത്‌ ദൈവ​ദൃ​ഷ്ടി​യിൽ നമ്മൾ എങ്ങനെ​യുള്ള വ്യക്തി​ക​ളാണ്‌ എന്നതി​നെ​യാ​ണു “ഹൃദയം” എന്ന പ്രയോ​ഗം അർഥമാ​ക്കു​ന്നത്‌. മറ്റുള്ളവർ നമ്മളെ എങ്ങനെ കാണുന്നു എന്നതല്ല, നമ്മുടെ ‘ഹൃദയത്തെ’ ദൈവം എങ്ങനെ കാണുന്നു എന്നതാണു നമുക്കു നിത്യ​ജീ​വൻ കിട്ടു​മോ ഇല്ലയോ എന്നു നിശ്ചയി​ക്കു​ന്നത്‌. അത്ര ലളിത​മാണ്‌ അത്‌, അത്രതന്നെ ഗൗരവ​മു​ള്ള​തും. മോശ​മായ രീതി​യിൽ ഒരു സ്‌ത്രീ​യെ നോക്കാ​തി​രി​ക്കേ​ണ്ട​തി​നു വിശ്വ​സ്‌ത​നായ ഇയ്യോബ്‌ തന്റെ കണ്ണുമാ​യി ഒരു ഉടമ്പടി ചെയ്‌തു. (ഇയ്യോബ്‌ 31:1) എത്ര നല്ല മാതൃക! അതേ മനോ​ഭാ​വ​ത്തോ​ടെ ഒരു സങ്കീർത്ത​ന​ക്കാ​രൻ ഇങ്ങനെ പ്രാർഥി​ച്ചു: “ഒരു ഗുണവു​മി​ല്ലാത്ത കാര്യങ്ങൾ കാണാ​തി​രി​ക്കാൻ എന്റെ നോട്ടം തിരി​ച്ചു​വി​ടേ​ണമേ.”—സങ്കീർത്തനം 119:37.

ദീനയു​ടെ ബുദ്ധി​മോ​ശം

13. ദീന ആരായി​രു​ന്നു, സുഹൃ​ത്തു​ക്കളെ തിര​ഞ്ഞെ​ടു​ക്കു​ന്ന​തിൽ അവൾ ബുദ്ധി​മോ​ശം കാണി​ച്ചത്‌ എങ്ങനെ?

¹³ മൂന്നാം അധ്യാ​യ​ത്തിൽ കണ്ടതു​പോ​ലെ, സുഹൃ​ത്തു​ക്കൾക്കു നമ്മളെ ശക്തമായി സ്വാധീ​നി​ക്കാ​നാ​കും. അതിന്റെ ഫലം നല്ലതോ മോശ​മോ ആകാം. (സുഭാ​ഷി​തങ്ങൾ 13:20; 1 കൊരി​ന്ത്യർ 15:33 വായി​ക്കുക.) ഗോ​ത്ര​പി​താ​വായ യാക്കോ​ബി​ന്റെ മകൾ ദീനയു​ടെ കാര്യ​മെ​ടു​ക്കുക. മാതാ​പി​താ​ക്ക​ളു​ടെ നല്ല പരിശീ​ലനം കിട്ടി​യി​രു​ന്നെ​ങ്കി​ലും അവൾ കനാന്യ​പെൺകു​ട്ടി​ക​ളു​മാ​യി ചങ്ങാത്ത​ത്തി​ലാ​യി. അതു ബുദ്ധി​മോ​ശ​മാ​യി​രു​ന്നു; കാരണം മോവാ​ബ്യ​രെ​പ്പോ​ലെ കനാന്യ​രും അധാർമി​ക​ത​യ്‌ക്കു പേര്‌ കേട്ടവ​രാ​യി​രു​ന്നു. (ലേവ്യ 18:6-25) മറ്റു കനാന്യ​സ്‌ത്രീ​ക​ളെ​പ്പോ​ലെ ദീനയും തങ്ങളുടെ ആഗ്രഹ​ങ്ങൾക്കു വഴങ്ങി​ത്ത​രു​മെന്ന്‌, ശെഖേം (പിതൃ​ഭ​വ​ന​ത്തി​ലെ “ഏറ്റവും ആദരണീ​യ​നാ​യി​രു​ന്നു” ശെഖേം) ഉൾപ്പെ​ടെ​യുള്ള കനാന്യ​പു​രു​ഷ​ന്മാർ ചിന്തി​ച്ചി​രി​ക്കണം.—ഉൽപത്തി 34:18, 19.

14. ദീനയു​ടെ കൂട്ടു​കെട്ടു ദുരന്ത​ത്തി​ലേക്കു നയിച്ചത്‌ എങ്ങനെ?

¹⁴ ശെഖേ​മു​മാ​യി ലൈം​ഗി​ക​ബ​ന്ധ​ത്തിൽ ഏർപ്പെ​ട​ണ​മെന്നു ദീന ആഗ്രഹി​ച്ചി​രി​ക്കാ​നി​ട​യില്ല. ലൈം​ഗി​ക​മോ​ഹം തോന്നു​മ്പോൾ മിക്ക കനാന്യ​രും ചെയ്യു​മാ​യി​രു​ന്നതു പക്ഷേ ശെഖേ​മും ചെയ്‌തു. ചെറു​ത്തു​നിൽക്കാൻ അവൾ ശ്രമി​ച്ചെ​ങ്കിൽത്തന്നെ അതു പരാജ​യ​പ്പെട്ടു. കാരണം, അവൻ അവളെ “പിടി​ച്ചു​കൊ​ണ്ടു​പോ​യി” എന്നും “മാനഭം​ഗ​പ്പെ​ടു​ത്തി” എന്നും ബൈബിൾ പറയുന്നു. പിന്നീട്‌ ശെഖേം ദീനയെ ‘പ്രണയി​ക്കാൻതു​ട​ങ്ങി​യെ​ങ്കി​ലും’ അവന്റെ തെറ്റിന്‌ അതു പരിഹാ​ര​മാ​കു​മാ​യി​രു​ന്നില്ല. (ഉൽപത്തി 34:1-4 വായി​ക്കുക.) ദീന മാത്രമല്ല അതിന്റെ ഭവിഷ്യത്ത്‌ അനുഭ​വി​ക്കേ​ണ്ടി​വ​ന്നത്‌. അവളുടെ മോശ​മായ കൂട്ടു​കെട്ട്‌, കുടും​ബ​ത്തി​നു മൊത്തം അപമാ​ന​വും പേരു​ദോ​ഷ​വും വരുത്തി​വെച്ച സംഭവ​പ​ര​മ്പ​ര​കൾക്കു തുടക്കം​കു​റി​ച്ചു.—ഉൽപത്തി 34:7, 25-31; ഗലാത്യർ 6:7, 8.

15, 16. യഥാർഥ​ജ്ഞാ​നം നമുക്ക്‌ എങ്ങനെ നേടാം? (“ധ്യാനിക്കാനുള്ള തിരു​വെ​ഴു​ത്തു​കൾ” എന്ന ചതുര​വും കാണുക.)

¹⁵ ദീന ഒരു പാഠം പഠി​ച്ചെ​ങ്കിൽത്തന്നെ അതു കയ്‌പേ​റിയ അനുഭ​വ​ത്തി​ലൂ​ടെ​യാ​യി​രു​ന്നു. യഹോ​വയെ സ്‌നേ​ഹി​ക്കു​ക​യും അനുസ​രി​ക്കു​ക​യും ചെയ്യു​ന്നവർ ഈ വിധത്തിൽ പാഠങ്ങൾ പഠി​ക്കേ​ണ്ട​തില്ല. ദൈവത്തെ അനുസ​രി​ക്കുന്ന അവർ ‘ജ്ഞാനി​ക​ളു​ടെ​കൂ​ടെ നടക്കാ​നാ​യി​രി​ക്കും’ തീരു​മാ​നി​ക്കുക. (സുഭാ​ഷി​തങ്ങൾ 13:20എ) അങ്ങനെ അവർ “സകല സന്മാർഗ്ഗ​വും” തിരി​ച്ച​റി​യു​ക​യും അനാവ​ശ്യ​പ്ര​ശ്‌ന​ങ്ങ​ളും വേദന​ക​ളും ഒഴിവാ​ക്കു​ക​യും ചെയ്യും.—സുഭാ​ഷി​തങ്ങൾ 2:6-9; സങ്കീർത്തനം 1:1-3.

¹⁶ ദൈവി​ക​ജ്ഞാ​ന​ത്തി​നു​വേണ്ടി തീവ്ര​മാ​യി ആഗ്രഹി​ക്കുന്ന എല്ലാവർക്കും അതു ലഭ്യമാണ്‌. ദൈവ​വ​ച​ന​വും വിശ്വ​സ്‌ത​നും വിവേ​കി​യും ആയ അടിമ തരുന്ന പ്രസി​ദ്ധീ​ക​ര​ണ​ങ്ങ​ളും ക്രമമാ​യി പഠിക്കു​ക​യും പ്രാർഥ​ന​യിൽ ഉറ്റിരി​ക്കു​ക​യും ചെയ്‌തു​കൊണ്ട്‌ ആ ആഗ്രഹം തൃപ്‌തി​പ്പെ​ടു​ത്ത​ണ​മെ​ന്നു​മാ​ത്രം. (മത്തായി 24:45; യാക്കോബ്‌ 1:5) അതു​പോ​ലെ​തന്നെ പ്രധാ​ന​മാ​ണു താഴ്‌മ​യും. അതു​ണ്ടെ​ങ്കി​ലേ തിരു​വെ​ഴു​ത്തു​ബു​ദ്ധി​യു​പ​ദേശം അനുസ​രി​ക്കാ​നുള്ള മനസ്സു​ണ്ടാ​കൂ. (2 രാജാ​ക്ക​ന്മാർ 22:18, 19) ഉദാഹ​ര​ണ​ത്തിന്‌, തന്റെ ഹൃദയം വഞ്ചകവും സാഹസ​ത്തി​നു തുനി​യു​ന്ന​തും ആണെന്ന വസ്‌തുത ഒരു ക്രിസ്‌ത്യാ​നി അംഗീ​ക​രി​ച്ചേ​ക്കാം. (യിരെമ്യ 17:9) എന്നാൽ സ്‌നേ​ഹ​ത്തോ​ടെ തരുന്ന ബുദ്ധി​യു​പ​ദേ​ശ​വും സഹായ​വും സ്വീക​രി​ക്കേണ്ട ഒരു സാഹച​ര്യ​ത്തിൽ അദ്ദേഹം അതിനുള്ള താഴ്‌മ കാണി​ക്കു​മോ?

17. കുടും​ബ​ത്തിൽ ഉണ്ടാ​യേ​ക്കാ​വുന്ന ഒരു സാഹച​ര്യം വിവരി​ക്കുക, തത്ത്വങ്ങ​ളു​ടെ അടിസ്ഥാ​ന​ത്തിൽ ചിന്തി​ക്കാൻ ഒരു അപ്പനു മകളെ എങ്ങനെ സഹായി​ക്കാ​മെന്നു വിശദീ​ക​രി​ക്കുക.

¹⁷ ഒരു കുടും​ബ​ത്തി​ലെ പിൻവ​രുന്ന സാഹച​ര്യം മനസ്സിൽ കാണുക. ഒരു യുവസ​ഹോ​ദ​ര​നോ​ടൊ​പ്പം തനിച്ചു പുറത്ത്‌ പോകാൻ ഒരു അപ്പൻ തന്റെ മകളെ അനുവ​ദി​ക്കു​ന്നില്ല. “ഡാഡിക്ക്‌ എന്താ എന്നെ വിശ്വാ​സ​മി​ല്ലേ? ഞങ്ങൾ അരുതാ​ത്തത്‌ എന്തെങ്കി​ലും ചെയ്യു​മെന്നു ഡാഡിക്കു തോന്നു​ന്നു​ണ്ടോ?” പെൺകു​ട്ടി ചോദി​ക്കു​ന്നു. അവൾക്കു തെറ്റായ ഉദ്ദേശ്യ​മൊ​ന്നു​മില്ല, യഹോ​വ​യോ​ടു സ്‌നേ​ഹ​മു​ണ്ടു​താ​നും. എങ്കിലും അവൾ ദൈവിക“ജ്ഞാന​ത്തോ​ടെ നടക്കു”കയാ​ണെന്നു പറയാ​നാ​കു​മോ? അവൾ ‘അധാർമി​ക​പ്ര​വൃ​ത്തി​ക​ളിൽനിന്ന്‌ ഓടി​യ​ക​ലു​ക​യാ​ണോ,’ അതോ “സ്വന്തഹൃ​ദ​യത്തെ ആശ്രയി”ച്ചുകൊണ്ട്‌ ബുദ്ധി​മോ​ശം കാണി​ക്കു​ക​യാ​ണോ? (സുഭാ​ഷി​തങ്ങൾ 28:26) ഈ സാഹച​ര്യ​ത്തി​ലാ​യി​രി​ക്കുന്ന ഒരു അപ്പനെ​യും മകളെ​യും, നല്ല തീരു​മാ​ന​മെ​ടു​ക്കാൻ സഹായി​ക്കുന്ന മറ്റു തത്ത്വങ്ങ​ളെ​ക്കു​റിച്ച്‌ ഒരുപക്ഷേ നിങ്ങൾക്കു ചിന്തി​ക്കാ​നാ​കും.—സുഭാ​ഷി​തങ്ങൾ 22:3; മത്തായി 6:13; 26:41 എന്നിവ കാണുക.

ലൈം​ഗിക അധാർമി​ക​ത​യിൽനിന്ന്‌ ഓടി​യകന്ന യോ​സേഫ്‌

18, 19. യോ​സേ​ഫിന്‌ ഏതു പ്രലോ​ഭനം നേരിട്ടു, യോ​സേഫ്‌ അതു കൈകാ​ര്യം ചെയ്‌തത്‌ എങ്ങനെ?

¹⁸ ദൈവ​ത്തോ​ടു സ്‌നേ​ഹ​മു​ണ്ടാ​യി​രുന്ന, ലൈം​ഗിക അധാർമി​ക​ത​യിൽനിന്ന്‌ ഓടി​യകന്ന ഒരു നല്ല യുവാ​വാ​യി​രു​ന്നു ദീനയു​ടെ അർധസ​ഹോ​ദ​ര​നായ യോ​സേഫ്‌. (ഉൽപത്തി 30:20-24) തന്റെ സഹോ​ദരി കാണിച്ച ബുദ്ധി​മോ​ശ​ത്തി​ന്റെ ഭവിഷ്യ​ത്തു​കൾ കുട്ടി​ക്കാ​ലത്ത്‌ നേരിൽ കണ്ടിരു​ന്നു യോ​സേഫ്‌. ആ ഓർമ​ക​ളും ദൈവ​സ്‌നേ​ഹ​ത്തിൽ നിലനിൽക്കാ​നുള്ള ആഗ്രഹ​വും ആണ്‌, വർഷങ്ങൾക്കു ശേഷം ഈജി​പ്‌തിൽവെച്ച്‌ തന്നെ വശീക​രി​ക്കാൻ യജമാ​നന്റെ ഭാര്യ “എല്ലാ ദിവസ​വും” ശ്രമി​ച്ച​പ്പോൾ യോ​സേ​ഫി​നു സംരക്ഷ​ണ​മാ​യത്‌ എന്നതിനു സംശയ​മില്ല. അടിമ​യാ​യ​തു​കൊണ്ട്‌ ജോലി ഉപേക്ഷി​ച്ചു​പോ​കാൻ യോ​സേ​ഫി​നു കഴിയി​ല്ലാ​യി​രു​ന്നു; ജ്ഞാന​ത്തോ​ടെ​യും ധൈര്യ​ത്തോ​ടെ​യും കൈകാ​ര്യം ചെയ്യേണ്ട സാഹച​ര്യ​മാ​യി​രു​ന്നു അത്‌. പോത്തി​ഫ​റി​ന്റെ ഭാര്യ​യു​ടെ ആഗ്രഹം ആവർത്തിച്ച്‌ നിരാ​ക​രി​ച്ചു​കൊ​ണ്ടും ഒടുവിൽ അവളിൽനിന്ന്‌ ഓടി​യ​ക​ന്നു​കൊ​ണ്ടും അവൻ അതു ചെയ്‌തു.—ഉൽപത്തി 39:7-12 വായി​ക്കുക.

¹⁹ ഒന്ന്‌ ആലോ​ചി​ച്ചു​നോ​ക്കൂ: പോത്തി​ഫ​റി​ന്റെ ഭാര്യ​യെ​യും ലൈം​ഗി​ക​കാ​ര്യ​ങ്ങ​ളെ​യും കുറിച്ച്‌ ദിവാ​സ്വ​പ്‌നം കണ്ടു​കൊ​ണ്ടി​രു​ന്നെ​ങ്കിൽ നിഷ്‌ക​ളങ്കത കൈവി​ടാ​തി​രി​ക്കാൻ യോ​സേ​ഫി​നു കഴിയു​മാ​യി​രു​ന്നോ? സാധ്യ​ത​യ​നു​സ​രിച്ച്‌ ഇല്ല. തെറ്റായ ചിന്തകളെ താലോ​ലി​ക്കു​ന്ന​തി​നു പകരം യഹോ​വ​യു​മാ​യുള്ള ബന്ധത്തിനു യോ​സേഫ്‌ വിലക​ല്‌പി​ച്ചു. പോത്തി​ഫ​റി​ന്റെ ഭാര്യ​യോ​ടുള്ള അവന്റെ വാക്കു​ക​ളിൽനിന്ന്‌ അതു വ്യക്തമാണ്‌: “നിങ്ങൾ യജമാ​നന്റെ ഭാര്യ​യാ​യ​തി​നാൽ നിങ്ങ​ളെ​യ​ല്ലാ​തെ മറ്റൊ​ന്നും (യജമാനൻ) എനിക്കു വിലക്കി​യി​ട്ടു​മില്ല. ആ സ്ഥിതിക്ക്‌, ഇത്ര വലി​യൊ​രു തെറ്റു ചെയ്‌ത്‌ ഞാൻ ദൈവ​ത്തോ​ടു പാപം ചെയ്യു​ന്നത്‌ എങ്ങനെ?”—ഉൽപത്തി 39:8, 9.

20. യോ​സേ​ഫി​ന്റെ കാര്യ​ത്തിൽ യഹോവ കാര്യ​ങ്ങളെ നയിച്ചത്‌ എങ്ങനെ?

²⁰ കുടും​ബാം​ഗ​ങ്ങ​ളിൽനിന്ന്‌ അകലെ കഴിയുന്ന യുവാ​വായ യോ​സേഫ്‌ ഓരോ ദിവസ​വും നിഷ്‌ക​ളങ്കത കൈവി​ടാ​തെ ജീവി​ക്കു​ന്നതു കണ്ടപ്പോൾ യഹോ​വ​യ്‌ക്ക്‌ എന്തുമാ​ത്രം സന്തോഷം തോന്നി​ക്കാ​ണു​മെന്നു ചിന്തി​ച്ചു​നോ​ക്കൂ. (സുഭാ​ഷി​തങ്ങൾ 27:11) തുടർന്ന്‌ യഹോവ കാര്യ​ങ്ങളെ നയിച്ചു. അതിന്റെ ഫലമായി, യോ​സേഫ്‌ തടവറ​യിൽനിന്ന്‌ മോചി​ത​നാ​യെന്നു മാത്രമല്ല ഈജി​പ്‌തി​ന്റെ പ്രധാ​ന​മ​ന്ത്രി​യും ഭക്ഷ്യ​മേൽവി​ചാ​ര​ക​നും ആയിത്തീ​രു​ക​യും ചെയ്‌തു! (ഉൽപത്തി 41:39-49) “യഹോ​വയെ സ്‌നേ​ഹി​ക്കു​ന്ന​വരേ, മോശ​മാ​യ​തെ​ല്ലാം വെറുക്കൂ! തന്റെ വിശ്വ​സ്‌ത​രു​ടെ ജീവനെ ദൈവം കാത്തു​ര​ക്ഷി​ക്കു​ന്നു; ദുഷ്ടന്റെ കൈയിൽനിന്ന്‌ അവരെ മോചി​പ്പി​ക്കു​ന്നു” എന്ന സങ്കീർത്തനം 97:10-ലെ വാക്കുകൾ എത്ര സത്യമാണ്‌!

21. ആഫ്രി​ക്ക​യി​ലുള്ള ഒരു യുവസ​ഹോ​ദരൻ നിഷ്‌ക​ളങ്കത കൈവി​ടാ​തി​രു​ന്നത്‌ എങ്ങനെ?

²¹ യോ​സേ​ഫി​നെ​പ്പോ​ലെ “മോശ​മാ​യതു വെറുത്ത്‌ നല്ലതിനെ സ്‌നേ​ഹി​ക്കു”ന്ന അനേകം ദൈവ​ദാ​സ​ന്മാർ ഇന്നുമുണ്ട്‌. (ആമോസ്‌ 5:15) ഒരു ആഫ്രി​ക്കൻരാ​ജ്യ​ത്തുള്ള ഒരു യുവസ​ഹോ​ദ​രന്റെ കാര്യ​മെ​ടു​ക്കുക. കണക്കു​പ​രീ​ക്ഷ​യ്‌ക്കു സഹായി​ച്ചാൽ താനു​മാ​യി ലൈം​ഗി​ക​ബ​ന്ധ​ത്തിൽ ഏർപ്പെ​ടാൻ അനുവ​ദി​ക്കാ​മെന്നു ക്ലാസ്സിലെ ഒരു പെൺകു​ട്ടി പറഞ്ഞതാ​യി അദ്ദേഹം ഓർക്കു​ന്നു. ആ സഹോ​ദരൻ പറയുന്നു: “ഞാൻ അപ്പോൾത്തന്നെ അതു നിരാ​ക​രി​ച്ചു. നിഷ്‌ക​ളങ്കത കൈവി​ടാ​തി​രു​ന്ന​തു​കൊണ്ട്‌ സ്വർണ​ത്തെ​ക്കാ​ളും വെള്ളി​യെ​ക്കാ​ളും വില​യേ​റിയ എന്റെ അന്തസ്സും ആത്മാഭി​മാ​ന​വും കാത്തു​സൂ​ക്ഷി​ക്കാൻ എനിക്കാ​യി.” പാപം ‘താത്‌കാ​ലി​ക​മായ സുഖം’ തന്നേക്കാ​മെ​ങ്കി​ലും അതു പലപ്പോ​ഴും വലിയ ദുഃഖ​ത്തി​നു കാരണ​മാ​കും. (എബ്രായർ 11:25) മാത്രമല്ല, യഹോ​വയെ അനുസ​രി​ക്കു​ന്ന​തി​ലൂ​ടെ ലഭിക്കുന്ന ശാശ്വ​ത​സ​ന്തോ​ഷ​ത്തോ​ടുള്ള താരത​മ്യ​ത്തിൽ അത്‌ ഒന്നുമല്ല!—സുഭാ​ഷി​തങ്ങൾ 10:22.

കരുണാ​മ​യ​നായ ദൈവ​ത്തി​ന്റെ സഹായം സ്വീക​രി​ക്കു​ക

22, 23. (എ) ഗുരു​ത​ര​മായ പാപം ചെയ്‌തു​പോയ ഒരു ക്രിസ്‌ത്യാ​നി​യു​ടെ സാഹച​ര്യം ആശയറ്റ​ത​ല്ലാ​ത്തത്‌ എന്തു​കൊണ്ട്‌? (ബി) തെറ്റു ചെയ്‌ത വ്യക്തിക്ക്‌ എന്തു സഹായം ലഭ്യമാണ്‌?

²² അപൂർണ​രാ​യ​തു​കൊണ്ട്‌ ജഡിക​മായ ആഗ്രഹ​ങ്ങളെ കീഴട​ക്കാ​നും ദൈവ​മു​മ്പാ​കെ ശരിയാ​യതു ചെയ്യാ​നും നമുക്കു തീവ്ര​ശ്രമം ചെയ്യേ​ണ്ടി​വ​രു​ന്നു. (റോമർ 7:21-25) യഹോ​വ​യ്‌ക്ക്‌ അത്‌ അറിയാം; “നാം പൊടി​യെന്നു ദൈവം ഓർക്കു​ന്നു.” (സങ്കീർത്തനം 103:14) ചില​പ്പോൾ ഒരു ക്രിസ്‌ത്യാ​നി ഗുരു​ത​ര​മായ പാപം ചെയ്‌തെ​ന്നു​വ​രാം. അയാളു​ടെ സാഹച​ര്യം ആശയറ്റ​താ​ണോ? ഒരിക്ക​ലു​മല്ല! ദാവീ​ദി​ന്റെ കാര്യ​ത്തിൽ സംഭവി​ച്ച​തു​പോ​ലെ, പാപത്തി​ന്റെ ഭവിഷ്യ​ത്തു​കൾ അദ്ദേഹം അനുഭ​വി​ക്കേ​ണ്ടി​വ​രും. എന്നാൽ ആത്മാർഥ​മായ പശ്‌ചാ​ത്താ​പ​ത്തോ​ടെ പാപങ്ങൾ ‘ഏറ്റുപ​റ​യു​ന്ന​വ​രോ​ടു’ “ക്ഷമിക്കാൻ” സദാ സന്നദ്ധനാ​ണു ദൈവം.—യാക്കോബ്‌ 5:16; സങ്കീർത്തനം 86:5; സുഭാ​ഷി​തങ്ങൾ 28:13 വായി​ക്കുക.

²³ കൂടാതെ, നമ്മളെ സഹായി​ക്കാൻ യോഗ്യ​രും സന്നദ്ധരും ആയ ‘സമ്മാന​ങ്ങ​ളായ മനുഷ്യ​രെ,’ അതായത്‌ പക്വത​യുള്ള ആത്മീയ​യി​ട​യ​ന്മാ​രെ, ദൈവം കരുണാ​പൂർവം ക്രിസ്‌തീ​യ​സ​ഭ​യിൽ നിയമി​ച്ചി​രി​ക്കു​ന്നു. (എഫെസ്യർ 4:8, 12; യാക്കോബ്‌ 5:14, 15) തെറ്റു ചെയ്‌ത വ്യക്തിയെ ദൈവ​വു​മാ​യുള്ള ബന്ധത്തി​ലേക്കു തിരി​ച്ചു​വ​രാൻ സഹായി​ക്കുക എന്നതാണ്‌ അവരുടെ ലക്ഷ്യം. ജ്ഞാനി​യായ ശലോ​മോ​ന്റെ വാക്കു​ക​ളിൽ പറഞ്ഞാൽ, തെറ്റ്‌ ആവർത്തി​ക്കാ​തി​രി​ക്കേ​ണ്ട​തിന്‌ “വകതി​രിവ്‌” നേടാൻ അദ്ദേഹത്തെ സഹായി​ക്കാ​നാണ്‌ അവർ ശ്രമി​ക്കു​ന്നത്‌.—സുഭാ​ഷി​തങ്ങൾ 15:32.

‘വകതി​രിവ്‌ നേടുക’

24, 25. (എ) സുഭാ​ഷി​തങ്ങൾ 7:6-23-ൽ പരാമർശി​ച്ചി​രി​ക്കുന്ന യുവാവ്‌ ‘സാമാ​ന്യ​ബോ​ധ​മി​ല്ലാ​ത്ത​വ​നാ​ണെന്ന്‌’ തെളി​യി​ച്ചത്‌ എങ്ങനെ? (ബി) നമുക്ക്‌ എങ്ങനെ ‘വകതി​രിവ്‌ നേടാം?’

²⁴ ‘സാമാ​ന്യ​ബോ​ധ​മി​ല്ലാ​ത്ത​വരെ’ക്കുറി​ച്ചും ‘വകതി​രിവ്‌ നേടു​ന്ന​വരെ’ക്കുറി​ച്ചും ബൈബിൾ പറയു​ന്നുണ്ട്‌. (സുഭാ​ഷി​തങ്ങൾ 7:7) ആത്മീയ​പ​ക്വ​ത​യോ ദൈവ​സേ​വ​ന​ത്തി​ലെ അനുഭ​വ​പ​രി​ച​യ​മോ ഇല്ലാത്ത​തു​കൊണ്ട്‌, ‘സാമാ​ന്യ​ബോ​ധ​മി​ല്ലാത്ത’ ഒരു വ്യക്തിക്കു ശരിയായ തീരു​മാ​ന​മെ​ടു​ക്കാൻ കഴിയാ​തെ​പോ​യേ​ക്കാം. സുഭാ​ഷി​തങ്ങൾ 7:6-23-ൽ വിവരി​ച്ചി​രി​ക്കുന്ന ചെറു​പ്പ​ക്കാ​ര​നെ​പ്പോ​ലെ അയാൾ ഗുരു​ത​ര​മായ പാപത്തിൽ എളുപ്പം വീണു​പോ​കാ​നി​ട​യുണ്ട്‌. എന്നാൽ ‘വകതി​രിവ്‌ നേടുന്ന’ ഒരു വ്യക്തി പ്രാർഥ​നാ​പൂർവം, നിരന്തരം ദൈവ​വ​ചനം പഠിച്ചു​കൊണ്ട്‌ തന്റെ ആന്തരി​ക​വ്യ​ക്തി​ത്വ​ത്തി​നു നല്ല ശ്രദ്ധ കൊടു​ക്കു​ന്നു. അപൂർണ​നെ​ങ്കി​ലും തന്റെ ചിന്തക​ളും ആഗ്രഹ​ങ്ങ​ളും വികാ​ര​ങ്ങ​ളും ലക്ഷ്യങ്ങ​ളും ദൈവത്തെ പ്രസാ​ദി​പ്പി​ക്കുന്ന വിധത്തി​ലാ​ക്കാൻ അദ്ദേഹം പരമാ​വധി ശ്രമി​ക്കും. അതിലൂ​ടെ ആ വ്യക്തി “സ്വന്തം ജീവനെ സ്‌നേ​ഹി​ക്കു”കയായി​രി​ക്കും ചെയ്യുക; അദ്ദേഹം “വിജയി​ക്കു”കയും ചെയ്യും.—സുഭാ​ഷി​തങ്ങൾ 19:8.

²⁵ നിങ്ങ​ളോ​ടു​തന്നെ ചോദി​ക്കുക: ‘ദൈവ​ത്തി​ന്റെ നിലവാ​രങ്ങൾ ശരിയാ​ണെന്ന്‌ എനിക്കു പൂർണ​ബോ​ധ്യ​മു​ണ്ടോ? അവയോ​ടു പറ്റിനിൽക്കു​ന്ന​തി​ലും വലിയ സന്തോഷം കിട്ടാ​നി​ല്ലെന്നു ഞാൻ ഉറച്ചു​വി​ശ്വ​സി​ക്കു​ന്നു​ണ്ടോ?’ (സങ്കീർത്തനം 19:7-10; യശയ്യ 48:17, 18) ഇക്കാര്യ​ത്തിൽ അൽപ്പം സംശയ​മു​ണ്ടെ​ങ്കിൽപ്പോ​ലും വേണ്ട നടപടി​കൾ സ്വീക​രി​ക്കുക. ദൈവ​നി​യ​മങ്ങൾ അവഗണി​ക്കു​ന്ന​തി​ന്റെ പരിണ​ത​ഫ​ല​ങ്ങ​ളെ​ക്കു​റിച്ച്‌ ചിന്തി​ക്കുക. കൂടാതെ, ദിവ്യ​സ​ത്യ​ങ്ങൾക്കു ചേർച്ച​യിൽ ജീവി​ക്കു​ക​യും, സത്യമാ​യ​തും നീതി​നി​ഷ്‌ഠ​മാ​യ​തും നിർമ​ല​മാ​യ​തും സ്‌നേഹം ജനിപ്പി​ക്കു​ന്ന​തും അത്യു​ത്ത​മ​മാ​യ​തും ആയ കാര്യ​ങ്ങ​ളാൽ മനസ്സു നിറയ്‌ക്കു​ക​യും ചെയ്‌തു​കൊണ്ട്‌ ‘യഹോവ നല്ലവ​നെന്നു രുചി​ച്ച​റി​യുക.’ (സങ്കീർത്തനം 34:8; ഫിലി​പ്പി​യർ 4:8, 9) അങ്ങനെ ചെയ്യു​മ്പോൾ, ദൈവ​ത്തോ​ടും ദൈവം പ്രിയ​പ്പെ​ടുന്ന കാര്യ​ങ്ങ​ളോ​ടും ഉള്ള നിങ്ങളു​ടെ സ്‌നേ​ഹ​വും ദൈവം വെറു​ക്കുന്ന കാര്യ​ങ്ങ​ളോ​ടുള്ള നിങ്ങളു​ടെ വെറു​പ്പും വർധി​ച്ചു​വ​രും എന്നതു തീർച്ച. യോ​സേഫ്‌ അമാനു​ഷ​ന​ല്ലാ​യി​രു​ന്നു. എന്നിട്ടും, ‘അധാർമി​ക​പ്ര​വൃ​ത്തി​ക​ളിൽനിന്ന്‌ ഓടി​യ​ക​ലാൻ’ യോ​സേ​ഫി​നു സാധിച്ചു. കാരണം, വർഷങ്ങ​ളി​ലൂ​ടെ തന്നെ രൂപ​പ്പെ​ടു​ത്താൻ യോ​സേഫ്‌ യഹോ​വയെ അനുവ​ദി​ച്ചി​രു​ന്നു. അതു​കൊണ്ട്‌ യോ​സേഫ്‌ വകതി​രിവ്‌ നേടി. നിങ്ങളു​ടെ കാര്യ​ത്തി​ലും അതു സത്യമാ​യി​ത്തീ​രട്ടെ.—യശയ്യ 64:8.

26. അടുത്ത​താ​യി നമ്മൾ ഏതു സുപ്ര​ധാ​ന​വി​ഷയം പഠിക്കും?

²⁶ സ്രഷ്ടാവ്‌ പുനരു​ത്‌പാ​ദ​ത്തി​നുള്ള അവയവങ്ങൾ തന്നതു വെറും ഭോഗാ​സക്തി തൃപ്‌തി​പ്പെ​ടു​ത്താ​നുള്ള ഒരു ഉപാധി​യെന്ന നിലയി​ലല്ല, മറിച്ച്‌ മക്കളെ ജനിപ്പി​ക്കാ​നും ദാമ്പത്യ​ത്തിൽ ആസ്വാ​ദനം കണ്ടെത്താ​നും ആണ്‌. (സുഭാ​ഷി​തങ്ങൾ 5:18) വിവാഹം സംബന്ധിച്ച ദൈവ​ത്തി​ന്റെ വീക്ഷണം എന്താ​ണെന്നു തുടർന്ന്‌ വരുന്ന രണ്ട്‌ അധ്യാ​യങ്ങൾ ചർച്ച ചെയ്യും.