ശരിക്കും നരകമുണ്ടോ? നരകം എന്നതുകൊണ്ട്‌ ബൈബിൾ എന്താണ്‌ ഉദ്ദേശിക്കുന്നത്‌?
ബൈബിളിന്റെ ഉത്തരം
പല ബൈബിൾ ഭാഷാന്തരങ്ങളും, ചില വാക്യങ്ങളിൽ “നരകം” അല്ലെങ്കിൽ “പാതാളം” എന്നീ വാക്കുകൾ ഉപയോഗിച്ചിട്ടുണ്ട്‌. (സങ്കീർത്തനം 16:10; മത്തായി 5:30, സത്യവേദപുസ്‌തകം) ദുഷ്ടന്മാരെ നിത്യാഗ്നിയിലിട്ട്‌ ശിക്ഷിക്കുന്ന ഒരു സ്ഥലമാണു നരകം അഥവാ പാതാളം എന്നു പലരും വിശ്വസിക്കുന്നു. ഈ മതവിശ്വാസത്തെ അടിസ്ഥാനമാക്കിയുള്ള ചിത്രമാണ്‌ തുടക്കത്തിൽ കാണുന്നത്‌. എന്നാൽ അതാണോ ബൈബിൾ പഠിപ്പിക്കുന്നത്‌?
ഈ ലേഖനത്തിൽ
ധനവാനെയും ലാസറിനെയും കുറിച്ചുള്ള യേശുവിന്റെ കഥയുടെ അർഥമെന്താണ്‌?
മനുഷ്യൻ ദൈവത്തിൽനിന്ന്‌ അകന്നുകഴിയുന്ന ഒരു സ്ഥലമാണോ നരകം?
നരകത്തെക്കുറിച്ചോ ശവക്കുഴിയെക്കുറിച്ചോ പറയുന്ന ബൈബിൾവാക്യങ്ങൾ
ആളുകളെ നിത്യം ദണ്ഡിപ്പിക്കുന്ന ഒരു സ്ഥലമാണോ നരകം?
അല്ല. ചില പഴയ ബൈബിൾ ഭാഷാന്തരങ്ങളിൽ “നരകം” എന്നോ “പാതാളം” എന്നോ പരിഭാഷപ്പെടുത്തിയിരിക്കുന്ന മൂലപദത്തിന്റെ (എബ്രായയിൽ “ഷീയോൾ;” ഗ്രീക്കിൽ “ഹേഡിസ്‌”) യഥാർഥ അർഥം “ശവക്കുഴി,” അതായത്‌ മുഴുമനുഷ്യരുടെയും “പൊതുശവക്കുഴി” എന്നാണ്‌. ബൈബിൾ പറയുന്നതനുസരിച്ച്‌ ശവക്കുഴിയിലായിരിക്കുന്ന ആളുകൾ ജീവനോടെയില്ല.
മരിച്ചവർക്കു ബോധമില്ല, അവർക്കു വേദന അറിയാൻ കഴിയില്ല. നീ ചെല്ലുന്ന “പാതാളത്തിൽ പ്രവൃത്തിയോ സൂത്രമോ, അറിവോ, ജ്ഞാനമോ ഒന്നും ഇല്ല.” (സഭാപ്രസംഗകൻ 9:10, സത്യവേദപുസ്‌തകം) വേദനിച്ച്‌ പുളയുന്നവരുടെ നിലവിളി ശബ്ദം നിറഞ്ഞ ഒരു സ്ഥലമല്ല നരകം. പകരം ബൈബിൾ പറയുന്നു: “ദുഷ്ടന്മാർ നിരാശിതരാകും. അവർ നിശ്ശബ്ദമായ നരകത്തിലേക്കു പോകും.”—സങ്കീർത്തനം 31:17, പരിശുദ്ധ ബൈബിൾ, ഈസി-റ്റു-റീഡ്‌ വേർഷൻ; സങ്കീർത്തനം 115:17.
പാപത്തിന്റെ ശിക്ഷയായി ദൈവം വെച്ചിരിക്കുന്നതു മരണമാണ്‌, അല്ലാതെ തീനരകത്തിലെ ദണ്ഡനമല്ല. ദൈവനിയമം ലംഘിച്ചാൽ മരണമായിരിക്കും ശിക്ഷയെന്ന്‌ ആദ്യ മനുഷ്യനായ ആദാമിനോടു ദൈവം പറഞ്ഞിരുന്നു. (ഉൽപത്തി 2:17) അല്ലാതെ നരകത്തിലിട്ട്‌ നിത്യം ശിക്ഷിക്കുമെന്നൊന്നും ദൈവം പറഞ്ഞില്ല. പിന്നീട്‌ ആദാം തെറ്റു ചെയ്‌ത്‌ കഴിഞ്ഞും ദൈവം ശിക്ഷയായി പറഞ്ഞത്‌ ഇതായിരുന്നു: “നീ പൊടിയാണ്‌, പൊടിയിലേക്കു തിരികെ ചേരും.” (ഉൽപത്തി 3:19) ആദാം പിന്നെ ഉണ്ടായിരിക്കില്ല എന്നായിരുന്നു അതിന്റെ അർഥം. ആദാമിനെ തീനരകത്തിലേക്ക്‌ അയയ്‌ക്കുമായിരുന്നെങ്കിൽ ദൈവം ഉറപ്പായും അതെക്കുറിച്ച്‌ പറഞ്ഞേനേ. തന്റെ നിയമങ്ങൾ ലംഘിച്ചാലുള്ള ശിക്ഷയിൽ ദൈവം മാറ്റമൊന്നും വരുത്തിയിട്ടില്ല. കാരണം ആദാം തെറ്റു ചെയ്‌ത്‌ കുറെ വർഷങ്ങൾ കഴിഞ്ഞും ഒരു ബൈബിളെഴുത്തുകാരനെ ഇങ്ങനെ എഴുതാൻ ദൈവം പ്രേരിപ്പിച്ചു: “പാപം തരുന്ന ശമ്പളം മരണം.” (റോമർ 6:23) പിന്നെ ആ വ്യക്തിക്കു കൂടുതലായ ശിക്ഷയുടെ ആവശ്യമില്ല. കാരണം “മരിച്ചയാൾ പാപത്തിൽനിന്ന്‌ മോചിതനായല്ലോ.”—റോമർ 6:7.
നിത്യമായി ദണ്ഡിപ്പിക്കുക എന്ന ആശയം ദൈവത്തിനു വെറുപ്പാണ്‌. (യിരെമ്യ 32:35) നരകത്തെക്കുറിച്ചുള്ള പഠിപ്പിക്കലുകൾ “ദൈവം സ്‌നേഹമാണ്‌” എന്നു ബൈബിൾ പറയുന്ന കാര്യത്തിനു നേർവിപരീതമാണ്‌. (1 യോഹന്നാൻ 4:8) നിത്യം ദണ്ഡിപ്പിക്കുമെന്ന പേടി കാരണമല്ല, തന്നോടുള്ള സ്‌നേഹം കാരണം മനുഷ്യർ തന്നെ ആരാധിക്കാനാണു ദൈവം ആഗ്രഹിക്കുന്നത്‌.—മത്തായി 22:36-38.
നല്ല ആളുകൾ നരകത്തിൽ പോയിട്ടുണ്ട്‌. “നരകം” അല്ലെങ്കിൽ “പാതാളം” എന്ന പദങ്ങൾ ഉപയോഗിച്ചിരിക്കുന്ന ബൈബിളുകൾ വായിക്കുമ്പോൾ, യാക്കോബിനെയും ഇയ്യോബിനെയും പോലുള്ള വിശ്വസ്‌ത മനുഷ്യർ നരകത്തിൽ പോകുമെന്ന്‌ പ്രതീക്ഷിച്ചിരുന്നതായി കാണാം. (ഉൽപത്തി 37:35; ഇയ്യോബ്‌ 14:13) ചില പരിഭാഷകളിൽ, മരണത്തിനും പുനരുത്ഥാനത്തിനും ഇടയിലുള്ള സമയം യേശുക്രിസ്‌തുപോലും പാതാളത്തിലായിരുന്നതായി പറയുന്നു. (പ്രവൃത്തികൾ 2:27, 31, 32, സത്യവേദപുസ്‌തകംa) അതുകൊണ്ട്‌ ഈ ബൈബിളുകളിൽ “നരകം” അല്ലെങ്കിൽ “പാതാളം” എന്നീ വാക്കുകൾ ഉപയോഗിച്ചിരിക്കുന്നതു ശവക്കുഴി എന്ന അർഥത്തിൽ മാത്രമാണെന്നു വ്യക്തമാണ്‌.b
ധനവാനെയും ലാസറിനെയും കുറിച്ചുള്ള യേശുവിന്റെ കഥയുടെ അർഥമെന്താണ്‌?
യേശു പറഞ്ഞ ഈ കഥ ലൂക്കോസ്‌ 16:19-31-ൽ കാണാം. ഇത്തരം കഥകൾ നല്ല പാഠങ്ങളും ആത്മീയസത്യങ്ങളും നമ്മളെ പഠിപ്പിക്കാൻ വേണ്ടിയുള്ള ദൃഷ്ടാന്തങ്ങൾ മാത്രമാണ്‌. ധനവാനെയും ലാസറിനെയും കുറിച്ചുള്ള കഥയും അത്തരത്തിൽ ഒന്നാണ്‌; ശരിക്കും നടന്ന ഒരു സംഭവമല്ല. (മത്തായി 13:34) ആ കഥയെക്കുറിച്ച്‌ കൂടുതൽ അറിയാൻ “ആരായിരുന്നു ധനവാനും ലാസറും” എന്ന ലേഖനം കാണുക.
മനുഷ്യൻ ദൈവത്തിൽനിന്ന്‌ അകന്നുകഴിയുന്ന ഒരു സ്ഥലമാണോ നരകം?
അല്ല. നരകത്തിലായിരിക്കുന്നവർക്കു തങ്ങൾ ദൈവത്തിൽനിന്ന്‌ അകന്നിരിക്കുകയാണെന്ന്‌ അറിയാം എന്ന പഠിപ്പിക്കലിനോടു ബൈബിൾ യോജിക്കുന്നില്ല. കാരണം മരിച്ചവർ ഒന്നും അറിയുന്നില്ലെന്നു ബൈബിൾ വ്യക്തമായി പറയുന്നുണ്ട്‌.—സങ്കീർത്തനം 146:3, 4; സഭാപ്രസംഗകൻ 9:5.
നരകത്തിൽനിന്ന്‌ ആരെയെങ്കിലും വിട്ടയച്ചിട്ടുണ്ടോ?
ഉണ്ട്‌. ശവക്കുഴിയിലേക്ക്‌ (ചില ബൈബിളുകളിൽ “നരകം” എന്നോ “പാതാളം” എന്നോ പരിഭാഷപ്പെടുത്തിയിരിക്കുന്നു.) പോകുകയും പിന്നീടു ജീവനിലേക്ക്‌ ഉയിർപ്പിക്കപ്പെടുകയും ചെയ്‌ത ഒൻപതു വ്യക്തികളെക്കുറിച്ചുള്ള വിവരണം ബൈബിളിലുണ്ട്‌.c നരകത്തിലായിരുന്ന സമയത്ത്‌ ചുറ്റും നടക്കുന്ന കാര്യങ്ങൾ അവർക്ക്‌ അറിയാൻ പറ്റിയിരുന്നെങ്കിൽ ജീവനിലേക്കു വന്നശേഷം തീർച്ചയായും അവർ അതെക്കുറിച്ച്‌ പറഞ്ഞേനേ. എന്നാൽ അവരിൽ ഒരാൾപ്പോലും ഏതെങ്കിലും രീതിയിലുള്ള കഷ്ടത അനുഭവിച്ചതായോ അവർക്ക്‌ എന്തെങ്കിലും അറിയാൻ കഴിഞ്ഞതായോ പറഞ്ഞിട്ടില്ല. എന്തുകൊണ്ടായിരിക്കും അത്‌? കാരണം ബൈബിൾ ആവർത്തിച്ച്‌ പറയുന്നതുപോലെ അവർ ഗാഢമായ ‘ഉറക്കത്തിൽ,’ തീർത്തും അബോധാവസ്ഥയിൽ ആയിരുന്നു.—യോഹന്നാൻ 11:11-14; 1 കൊരിന്ത്യർ 15:3-6.
a പല ആധുനിക പരിഭാഷകളിലും പ്രവൃത്തികൾ 2:27, 31 വാക്യങ്ങളിൽ “നരകം,” “പാതാളം” എന്നീ വാക്കുകൾ ഉപയോഗിച്ചിട്ടില്ല. അതിനു പകരം അവിടെ കാണുന്ന ചില പദപ്രയോഗങ്ങളാണ്‌, “ശവക്കുഴി,” [ന്യൂ സെഞ്ച്വറി വേർഷൻ (ഇംഗ്ലീഷ്‌)]; “മരിച്ചവരുടെ ലോകം,” (സത്യവേദപുസ്‌തകം ആധുനിക വിവർത്തനം); “മരിച്ചവരുടെ രാജ്യം” (ഈസി-റ്റു-റീഡ്‌) എന്നിവയൊക്കെ. മറ്റു ചില ഭാഷാന്തരങ്ങളിൽ “ഹേഡിസ്‌ ” എന്ന ഗ്രീക്ക്‌ വാക്ക്‌ പരിഭാഷ ചെയ്യുന്നതിനു പകരം അങ്ങനെതന്നെ ലിപി മാറ്റി എഴുതിയിരിക്കുകയാണ്‌.—ഹോൾമാൻ ക്രിസ്‌ത്യൻ സ്റ്റാൻഡേർഡ്‌ ബൈബിൾ (ഇംഗ്ലീഷ്‌), നെറ്റ്‌ ബൈബിൾ (ഇംഗ്ലീഷ്‌), പുതിയ അമേരിക്കൻ പ്രമാണ ബൈബിൾ (ഇംഗ്ലീഷ്‌), ഇംഗ്ലീഷ്‌ പ്രമാണഭാഷാന്തരം.
b “എബ്രായ-ഗ്രീക്ക്‌ ഭാഷകളിൽ ഉപയോഗിച്ച പദങ്ങൾ” എന്ന ചതുരം കാണുക.