തിരു​വെ​ഴു​ത്തു​ക​ളിൽനി​ന്നുള്ള പാഠങ്ങൾ: സെഫന്യാവ്‌ 1:1–3:20

യഹോ​വയെ അന്വേ​ഷി​ക്കു​ക​യും അവനെ പൂർണ്ണ​ഹൃ​ദ​യ​ത്തോ​ടെ സേവി​ക്കു​ക​യും ചെയ്യുക

ബാബി​ലോ​ന്യർ വിശ്വാ​സ​ത്യാ​ഗി​യായ യഹൂദയെ ശൂന്യ​മാ​ക്കു​ന്ന​തിന്‌ ഏതാണ്ട്‌ 50 വർഷം മുമ്പ്‌ “ഞാൻ കണിശ​മാ​യും ഭൂതല​ത്തിൽനിന്ന്‌ സകല​ത്തെ​യും നീക്കി​ക്ക​ള​യും” എന്ന്‌ യഹോവ തന്റെ പ്രവാ​ച​ക​നായ സെഫന്യാ​വു മുഖാ​ന്തരം പ്രഖ്യാ​പി​ച്ചു. (1:1, 2) എന്നാൽ ദൈവം സുരക്ഷി​ത​ത്വ​ത്തി​ലേ​ക്കുള്ള മാർഗ്ഗ​വും തന്റെ ജനത്തിന്‌ കാണി​ച്ചു​കൊ​ടു​ത്തു. (2:3; 3:9) ഈ കാര്യ​ത്തിൽ, “സർവശ​ക്ത​നായ ദൈവ​ത്തി​ന്റെ മഹാദി​വ​സ​ത്തി​ലെ യുദ്ധത്തെ” അഭിമു​ഖീ​ക​രി​ക്കുന്ന സകലർക്കു​മുള്ള വില​യേ​റിയ പാഠങ്ങൾ സെഫന്യാ​വി​ന്റെ പുസ്‌ത​ക​ത്തിൽ അടങ്ങി​യി​ട്ടുണ്ട്‌.—വെളി​പ്പാട്‌ 16:14.

യഹോ​വ​യു​ടെ ദിവസം അടുത്തി​രി​ക്കു​ന്നു

യഹോ​വ​യു​ടെ ദിവസം വളരെ അടുത്തി​രി​ക്കു​ന്ന​തു​കൊണ്ട്‌ ദൈവ​ത്തിൽനിന്ന്‌ അകന്നു​പോ​യി​രി​ക്കുന്ന ഏവനും പെട്ടെന്ന്‌ അവനി​ലേക്കു മടങ്ങി​വ​രണം. ദൈവം നീക്കി​ക്ക​ള​യു​ന്ന​വ​രിൽ “യഹോ​വയെ അനുഗ​മി​ക്കു​ന്ന​തിൽനി​ന്നു പിന്നോ​ട്ടു​പോ​കു​ന്നവർ” ഉൾപ്പെ​ടു​ന്നു. അവർ അകന്നു​പോ​യി​രി​ക്കു​ന്നു, മേലാൽ ദൈ​വേ​ഷ്ട​ത്തിൽ താൽപ​ര്യ​മെ​ടു​ക്കു​ന്നില്ല. എന്തോരു അപകട​ക​ര​മായ സാഹച​ര്യം! അതിനെ പെട്ടെന്ന്‌ തിരു​ത്തേ​ണ്ട​താണ്‌.—സെഫന്യാവ്‌ 1:3-11.

ഭൗതി​ക​ധ​ന​ത്തിന്‌ യഹോ​വ​യു​ടെ ദിവസ​ത്തിൽ സുരക്ഷി​ത​ത്വം പ്രദാ​നം​ചെ​യ്യാൻ കഴിയു​ക​യില്ല. യഹോ​വയെ സേവി​ക്കു​ന്ന​താ​യി അവകാ​ശ​പ്പെ​ടുന്ന ചിലർ ഒരു സുഖക​ര​മായ സ്ഥാനത്ത്‌ പററി​നി​ന്നു​കൊണ്ട്‌ ഭൗതി​ക​വ്യാ​പാ​ര​ങ്ങ​ളിൽ തിര​ക്കോ​ടെ ഏർപ്പെ​ടു​ന്നു. എന്നാൽ എന്തോരു ആത്മവഞ്ചന! “ആ ദിവസ”ത്തിൽ അവരുടെ ഭൗതി​ക​വ​സ്‌തു​ക്കൾ യാതൊ​രു സുരക്ഷി​ത​ത്വ​വും നൽകു​ക​യില്ല.—സെഫന്യാവ്‌ 1:12-18.

രക്ഷ സാദ്ധ്യം

യഹോ​വ​യു​ടെ ദിവസ​ത്തിൽ മറയ്‌ക്ക​പ്പെ​ടു​ന്ന​തിന്‌ തിരു​വെ​ഴു​ത്തു​ക​ളു​ടെ ഉപരി​പ്ല​വ​മായ അറിവി​ല​ധി​കം ആവശ്യ​മാണ്‌. “അവന്റെ സ്വന്തം ന്യായ​ത്തീർപ്പു​കൾ ആചരി​ച്ചി​രി​ക്കുന്ന” “സൗമ്യ​ത​യു​ള്ളവർ” ‘യഹോ​വയെ അന്വേ​ഷി​ക്കാൻ, നീതി അന്വേ​ഷി​ക്കാൻ, സൗമ്യത അന്വേ​ഷി​ക്കാൻ,’ ബുദ്ധി​യു​പ​ദേ​ശി​ക്ക​പ്പെ​ട്ടി​രി​ക്കു​ന്നു. “അവസാ​ന​ത്തോ​ളം സഹിച്ചി​രി​ക്കു​ന്നവർ” മാത്ര​മാണ്‌ രക്ഷിക്ക​പ്പെ​ടു​ന്നത്‌.—സെഫന്യാവ്‌ 2:1-3; മത്തായി 24:13.

ഇന്ന്‌ യഹോ​വ​യു​ടെ ജനത്തെ ഞെരു​ക്കു​ന്നവർ നാശം അനുഭ​വി​ക്കും. അവർക്ക്‌ മോവാ​ബി​നും അമ്മോ​നും അസ്സീറി​യാ​യി​ക്കും യഹൂദക്കു ചുററു​മു​ണ്ടാ​യി​രുന്ന മററു ജനതകൾക്കും നേരിട്ട അതേ അനുഭവം ഉണ്ടാകും. മഹാബാ​ബി​ലോ​നും നാശം ഭവിക്കാ​നി​രി​ക്കു​ന്നു. (വെളി​പ്പാട്‌ 18:4-8) ഇത്‌ ദൈവ​ത്തി​ന്റെ ന്യായ​വി​ധി ഘോഷി​ക്കു​ന്ന​തിൽ മുന്നേ​റു​ന്ന​തിന്‌ നമ്മെ എങ്ങനെ പ്രോൽസാ​ഹി​പ്പി​ക്കു​ന്നു!—സെഫന്യാവ്‌ 2:4-15.

പുനഃ​സ്ഥി​തീ​ക​രി​ക്ക​പ്പെട്ട ഒരു ജനം

യഹോവ തന്റെ ജനത്തെ ഇപ്പോൾ അതിജീ​വ​ന​ത്തി​നു​വേണ്ടി ഒരുക്കു​ക​യാണ്‌. നിങ്ങൾ ബാബി​ലോ​ന്യാ​ശ​യങ്ങൾ ഉപേക്ഷി​ക്കു​ക​യും വിലപ്പെട്ട ബൈബിൾസ​ത്യ​മാ​കുന്ന “നിർമ്മ​ല​ഭാഷ” സംസാ​രി​ക്കാൻ തുടങ്ങു​ക​യും ചെയ്‌തി​രി​ക്കു​ന്നു​വോ? നിങ്ങ​ളെ​ത്തന്നെ യഹോ​വക്കു സമർപ്പി​ച്ചു​കൊണ്ട്‌ നിങ്ങൾ ‘യഹോ​വ​യു​ടെ നാമത്തെ വിളി​ച്ച​പേക്ഷി’ച്ചിരി​ക്കു​ന്നു​വോ? നിങ്ങൾ “അവന്റെ നാമത്തി​നു പരസ്യ​പ്ര​ഖ്യാ​പനം നടത്തുന്ന അധരഫല”മാകുന്ന ‘ഒരു വഴിപാ​ടു കൊണ്ടു​വ​രു​ന്നു’വോ? അതിജീ​വി​ക്കു​ന്ന​തിന്‌, നിങ്ങൾ യഹോ​വ​യു​ടെ സമർപ്പിത ജനത്തോട്‌ “തോ​ളോ​ടു തോൾ ചേർന്ന്‌” സേവി​ക്കേ​ണ്ട​താണ്‌.—സെഫന്യാവ്‌ 3:1-10; റോമർ 10:13-15; എബ്രായർ 13:15.

രക്ഷക്കു​വേ​ണ്ടി നാം യഹോ​വയെ അന്വേ​ഷി​ക്കു​ക​യും അവന്റെ വിശു​ദ്ധ​നാ​മത്തെ ഉയർത്തി​പ്പി​ടി​ക്കു​ക​യും വേണം. അഹങ്കാ​ര​ത്തി​നും അനീതി​ക്കും നുണകൾക്കും അവന്റെ ജനത്തിന്റെ ഇടയിൽ സ്ഥാനമില്ല. (എഫേസ്യർ 4:25-32) അവൻ തന്റെ വിശു​ദ്ധ​നാ​മത്തെ വിശു​ദ്ധീ​ക​രി​ക്കു​മ്പോൾ “താഴ്‌മ​യും എളിമ​യു​മു​ള്ളവർ” മാത്രമേ രക്ഷിക്ക​പ്പെ​ടു​ക​യു​ള്ളു.—സെഫന്യാവ്‌ 3:11-20.

തിരു​വെ​ഴു​ത്തു​ക​ളിൽനി​ന്നുള്ള പാഠങ്ങൾ: ഹഗ്ഗായി 1:1–2:23

ഹഗ്ഗായി​യു​ടെ പുസ്‌തകം ഒരു യഹൂദ​ശേ​ഷിപ്പ്‌ യഹോ​വ​യു​ടെ ആലയം പുനർനിർമ്മി​ക്കാൻ യരൂശ​ലേ​മി​ലേക്ക്‌ മടങ്ങി​പ്പോ​യ​ശേഷം 17 വർഷം കഴിഞ്ഞ്‌ ക്രി.മു. 520-ലേക്ക്‌ നമ്മെ കൊണ്ടു​പോ​കു​ന്നു. (ഹഗ്ഗായി 1:1) അത്‌ എല്ലാവ​രും ദൈവ​വേ​ല​യിൽ ഹൃദയം പതിപ്പി​ക്കാ​നുള്ള സമയമാ​യി​രു​ന്നു. എന്നിരു​ന്നാ​ലും, തന്റെ ജനത്തിന്റെ കടപ്പാട്‌ ഓർപ്പി​ക്കാൻ അവരുടെ അടുക്ക​ലേക്ക്‌ ഹഗ്ഗായി പ്രവാ​ച​കനെ അയക്കേ​ണ്ട​താ​വ​ശ്യ​മാ​ണെന്ന്‌ യഹോവ കണ്ടെത്തി. ഇതിൽ നമുക്കു​വേ​ണ്ടി​യുള്ള പാഠമു​ണ്ടോ?

യഹോ​വ​യു​ടെ വേലയെ ഒന്നാമതു കരുതുക

ഒരിക്ക​ലും ഭൗതി​ക​താൽപ​ര്യ​ങ്ങളെ ആത്‌മീ​യ​ക​ട​മ​കൾക്കു​പരി കരുത​രുത്‌. തങ്ങളുടെ സ്വദേ​ശ​ത്തേക്കു മടങ്ങിയ യഹൂദൻമാർക്ക്‌ സാമ്പത്തിക അനിശ്ചി​ത​ത്വ​ങ്ങ​ളി​ലും വിരോ​ധി​ക​ളായ അയൽക്കാ​രി​ലും മററും ഉൽക്കണ്‌ഠ​പ്പെ​ടു​ന്ന​തിന്‌ കാരണ​മു​ണ്ടാ​യി​രു​ന്നു. എന്നാൽ അവരുടെ ആഡംബ​ര​പൂർവ​ക​മായ ജീവി​താ​വ​സ്ഥ​ക​ളു​ടെ വീക്ഷണ​ത്തിൽ അവരുടെ ഉദാസീ​ന​ത​യു​ടെ കാരണങ്ങൾ ഇവയാ​യി​രു​ന്നില്ല. ഹഗ്ഗായി​യാൽ ഉണർത്ത​പ്പെ​ട്ട​ശേഷം മാത്രമേ അവർ ആലയം​പണി തുടങ്ങി​യു​ള്ളു. അതു​പോ​ലെ ഇന്നും നാം ‘നമ്മുടെ വഴിക​ളിൽ നമ്മുടെ ഹൃദയം പതിപ്പി​ക്കുക’യും സാദ്ധ്യ​മാ​കു​ന്ന​ട​ത്തോ​ളം പൂർണ്ണ​മായ അളവിൽ നാം ദൈവ​വേ​ലയെ പിന്താ​ങ്ങു​ന്നു​ണ്ടെന്ന്‌ ഉറപ്പു​വ​രു​ത്തു​ക​യും ചെയ്യേ​ണ്ട​തുണ്ട്‌.—ഹഗ്ഗായി 1:2-15.

തന്റെ വേല മുഴു​ഹൃ​ദ​യ​ത്തോ​ടെ ചെയ്യു​ന്ന​വരെ യഹോവ അനു​ഗ്ര​ഹി​ക്കു​ന്നു. ആലയം പൂർത്തീ​ക​രി​ക്കു​ന്ന​തിൽ സെരു​ബ്ബാ​ബേ​ലി​ന്റെ​യും മററു യഹൂദൻമാ​രു​ടെ​യും വേലയെ ദൈവം അനു​ഗ്ര​ഹി​ക്കും. അതിന്റെ മഹത്വം മുൻ ആലയത്തി​ന്റേ​തി​നെ​ക്കാൾ കവിയും. “ഒരു മഹാപു​രു​ഷാ​രം” ഇന്ന്‌ രാജ്യ​സ​ന്ദേ​ശ​ത്തിന്‌ ചെവി​കൊ​ടു​ക്കു​ന്ന​തി​നാൽ “സകല ജനതക​ളി​ലെ​യും അഭികാ​മ്യർ” യഹോ​വ​യു​ടെ ആത്മീയാ​ല​യ​ത്തി​ലേക്കു വരുന്നുണ്ട്‌, അവൻ ‘തന്റെ ആലയത്തെ മഹത്വം​കൊ​ണ്ടു നിറക്കു​ക​യാണ്‌.’—ഹഗ്ഗായി 2:1-9; വെളിപ്പാട്‌7:9.

മുഴു​ഹൃ​ദ​യ​ത്തോ​ടു​കൂ​ടിയ സേവനം ആവശ്യം

നമ്മൾ നിർമ്മ​ല​രാ​യി ശുദ്ധമായ ആന്തരങ്ങ​ളോ​ടെ പൂർണ്ണ​ഹൃ​ദ​യ​ത്തോ​ടെ യഹോ​വയെ സേവി​ക്കു​ന്നു​വെ​ങ്കിൽ മാത്രമേ നമ്മുടെ ആരാധന മൂല്യ​വ​ത്താ​യി​രി​ക്ക​യു​ള്ളു. യഹോ​വ​യു​ടെ ആലയത്തെ അവഗണി​ച്ചത്‌ യഹൂദൻമാ​രെ അശുദ്ധ​രാ​ക്കി, എന്നാൽ ആലയം​പണി തുടങ്ങി​യാ​ലു​ടനെ അവൻ അവരെ അനു​ഗ്ര​ഹി​ക്കു​മാ​യി​രു​ന്നു. അതു​കൊണ്ട്‌ നാം യഹോ​വ​യു​ടെ അനു​ഗ്രഹം ആസ്വദി​ക്ക​ണ​മെ​ങ്കിൽ ശ്രദ്ധ ആവശ്യ​മുള്ള എന്തി​നെ​യും നാം ക്രമ​പ്പെ​ടു​ത്തു​ക​യും നമ്മുടെ ഹൃദയത്തെ അവന്റെ വേലയിൽ പതിപ്പി​ക്കു​ക​യും വേണം. (സംഖ്യാ​പു​സ്‌തകം 19:11-13 താരത​മ്യ​പ്പെ​ടു​ത്തുക.) ദൈവം രാജ്യ​ങ്ങളെ മറിച്ചി​ട്ടു​കൊണ്ട്‌ ആകാശ​ങ്ങ​ളെ​യും ഭൂമി​യെ​യും ഇളക്കാൻ കാത്തി​രി​ക്കു​മ്പോൾ നമുക്ക്‌ പ്രതി​മാ​തൃ​ക​യി​ലെ സെരു​ബ്ബാ​ബേ​ലായ യേശു​ക്രി​സ്‌തു​വി​നെ അനുക​രി​ക്കു​ക​യും യഹോ​വ​യു​ടെ വേലയിൽ മുഴു​ഹൃ​ദ​യ​ത്തോ​ടെ പങ്കെടു​ക്കു​ക​യും ചെയ്യാം.—ഹഗ്ഗായി 2:10-23. (w89 6/1)

[29-ാം പേജിലെ ചതുരം]

ബൈബിൾവാക്യങ്ങൾ പരി​ശോ​ധി​ക്ക​പ്പെ​ടു​ന്നു

● സെഫന്യാവ്‌ 1:5—അമ്മോന്യരുടെ മുഖ്യ വ്യാജ​ദൈവം മാൽക്കം ആയിരു​ന്നു, അവൻ മിൽക്കോ​മോ മോല​ക്കോ മോ​ലോ​ക്കോ തന്നെ ആയിരി​ക്കാ​നി​ട​യുണ്ട്‌. (1രാജാക്കൻമാർ 11:5, 7) മോ​ലേ​ക്കി​ന്റെ ആരാധ​ന​യിൽ അറയ്‌ക്കത്തക്ക ശിശു​ബലി ഉൾപ്പെ​ട്ടി​രു​ന്നു. അതു ന്യായ​പ്ര​മാ​ണ​ത്താൽ കുററം​വി​ധി​ക്ക​പ്പെ​ട്ടി​രു​ന്നു.ലേവ്യ​പു​സ്‌തകം 20:2-5; പ്രവൃ​ത്തി​കൾ 7:42, 43.

● സെഫന്യാവ്‌ 2:14—മുൻകൂട്ടിപ്പറഞ്ഞിരുന്നതുപോലെ, ശൂന്യ​മാ​ക്ക​പ്പെട്ട നിന​വേ​യു​ടെ മറിഞ്ഞു​വീണ തൂണു​ക​ളും അവയുടെ മുകൾഭാ​ഗ​ങ്ങ​ളും പക്ഷികൾക്കും ജന്തുക്കൾക്കു​മുള്ള സ്ഥലമാ​യി​ത്തീർന്നു. പക്ഷികൾ, ഒരുപക്ഷേ കാററ്‌, ത്യജി​ക്ക​പ്പെട്ട ജനാല​ക​ളിൽ ‘ഗാനമു​തിർത്തു.’ വാതി​ലു​ക​ളും കൊട്ടാ​ര​ത്തി​ന്റെ അന്തർഭാ​ഗ​ങ്ങ​ളും പോലും ശൂന്യ​മാ​ക്ക​പ്പെട്ടു.

● സെഫന്യാവ്‌ 3:9—ഒരേ ഭാഷ സംസാ​രി​ക്കുന്ന ജനങ്ങൾ തമ്മിൽ നടക്കുന്ന യുദ്ധങ്ങ​ളാൽ പ്രകട​മാ​ക്ക​പ്പെ​ടു​ന്ന​തു​പോ​ലെ ഒരു പൊതു മനുഷ്യ​ഭാഷ ഐക്യ​ത്തിന്‌ ഉറപ്പു​നൽകു​ന്നില്ല. “നിർമ്മ​ല​ഭാഷ” തിരു​വെ​ഴു​ത്തു​സ​ത്യ​മാണ്‌, “ആരോ​ഗ്യാ​വ​ഹ​മായ വചനങ്ങ​ളു​ടെ മാതൃക”. (2 തിമൊ​ഥെ​യോസ്‌ 1:13) അത്‌ അഹങ്കാ​രത്തെ വെല്ലു​ക​യും ദൈവത്തെ മഹത്വീ​ക​രി​ക്കു​ക​യും അത്‌ സംസാ​രി​ക്കുന്ന എല്ലാവ​രെ​യും ഏകീഭ​വി​പ്പി​ക്കു​ക​യും​ചെ​യ്യു​ന്നു.

● ഹഗ്ഗായി 1:6—യഹൂദൻമാർ യഹോ​വ​യു​ടെ ആലയത്തെ അവഗണി​ക്കു​ക​യാ​യി​രു​ന്ന​തു​കൊണ്ട്‌ അവർക്ക്‌ അവന്റെ അനു​ഗ്ര​ഹ​മി​ല്ലാ​യി​രു​ന്നു. അതു​കൊണ്ട്‌, അവർ അധികം വിത​ച്ചെ​ങ്കി​ലും കുറച്ചു വിളവേ ലഭിച്ചു​ള്ളു. അവരുടെ ആവശ്യങ്ങൾ നിറ​വേ​റ​റു​ന്ന​തിന്‌ വേണ്ടത്ര ഭക്ഷ്യപാ​നീ​യങ്ങൾ ഇല്ലായി​രു​ന്നു. അവരുടെ വസ്‌ത്രം അവർക്ക്‌ ചൂടേ​കാൻതക്ക ഗുണമോ അളവോ ഇല്ലാത്ത​വ​യാ​യി​രു​ന്നു. ശമ്പളക്കാർ ദ്വാരങ്ങൾ നിറഞ്ഞ ഒരു സഞ്ചിയിൽ പണമി​ടു​ന്ന​തു​പോ​ലെ തോന്നി. ആ യഹൂദൻമാ​രിൽനി​ന്നു വ്യത്യ​സ്‌ത​മാ​യി നമുക്ക്‌ ഒരിക്ക​ലും ദിവ്യ​താൽപ​ര്യ​ങ്ങളെ അവഗണി​ക്കാ​തി​രി​ക്കാം.—സദൃശ​വാ​ക്യ​ങ്ങൾ 10:22; നെഹെ​മ്യാവ്‌ 10:39.

● ഹഗ്ഗായി 2:9—ശലോ​മോൻ പണിക​ഴി​പ്പിച്ച “മുൻ” ആലയം 420 വർഷം നിന്ന​പ്പോൾ “പിൽക്കാ​ലത്തെ” ആലയം 584 വർഷം ( ക്രി.മു. 515-ക്രി.വ. 70) ഉപയോ​ഗി​ക്ക​പ്പെട്ടു. അതു​കൊണ്ട്‌ രണ്ടാമത്തെ ആലയമാണ്‌ കൂടുതൽ നിലനി​ന്നത്‌. ക്രി.വ. 33-ലെ പെന്തെ​ക്കോ​സ്‌തി​ലേ​തു​പോ​ലെ കൂടുതൽ ആരാധകർ അതി​ലേക്കു തടിച്ചു​കൂ​ടി, അന്ന്‌ യഹൂദ്യ​ക്കു വെളി​യിൽനി​ന്നും യഹൂദൻമാ​രും യഹൂദ​മ​താ​നു​സാ​രി​ക​ളും അതിൽ കൂടി​വന്നു. മാത്ര​വു​മല്ല, മശിഹാ​യായ യേശു​ക്രി​സ്‌തു “പിൽക്കാ​ലത്തെ ആലയ”ത്തിൽ പഠിപ്പി​ച്ചു. ഈ വസ്‌തു​തകൾ അതിന്‌ ഏറിയ മതമഹ​ത്വം കൊടു​ത്തു.