കടുക്‌ എരിവുള്ള ഒരു വിഷയം

ഫ്രാൻസിലെ ഉണരുക! ലേഖകൻ

“ഇറച്ചി കടുകു​ചേർക്കാ​തെ പൊരി​ച്ചു കഴി​ക്കേണ്ടി വരുന്നതു ലോക​ത്തി​ലെ ഏറ്റവും വലിയ സാമ്രാ​ജ്യ​ത്തി​ലെ പൗരൻമാ​രായ രണ്ട്‌ ഇംഗ്ലീഷ്‌ വനിത​കളെ സംബന്ധി​ച്ചി​ട​ത്തോ​ളം തികച്ചും അന്യാ​യ​മായ സംഗതി​യാണ്‌!” ഇവിടെ ഉദ്ധരി​ച്ചി​രി​ക്കുന്ന ഫ്രഞ്ച്‌ നോവ​ലി​ലെ നിരാ​ശ​രായ കഥാനാ​യി​ക​മാ​രോട്‌ ലോക​ത്തി​ലെ ഏറ്റവും വലിയ കടുകു തീറ്റി​ക്കാ​രിൽ പെടുന്ന ഡെൻമാർക്കു​കാർക്കു സഹതാപം തോന്നും.a

“കണ്ണിനു വിഷമ​മു​ള​വാ​ക്കു​ന്നത്‌” എന്നർഥ​മുള്ള സൈനാ​പ്പി എന്നാണു പുരാതന ഗ്രീക്കു​കാർ കടുകി​നെ വിളി​ച്ചി​രു​ന്നത്‌. കടുക്‌ വളരെ​യ​ധി​കം അകത്താ​ക്കി​യിട്ട്‌ കണ്ണിൽനി​ന്നു കണ്ണീർ കുടു​കു​ടെ ചാടുന്ന ഊണു​കാ​രൻ ആയിരി​ക്കാം ഒരുപക്ഷേ അവരുടെ മനസ്സി​ലു​ണ്ടാ​യി​രു​ന്നത്‌. കറിക്കൂ​ട്ടി​ലെ പുരാതന ചേരു​വ​ക​ളി​ലൊ​ന്നായ മുസ്റ്റു​മിൽ (പുളി​പ്പി​ക്കാത്ത മുന്തി​രി​ച്ചാർ) നിന്ന്‌ ഉരുത്തി​രി​ഞ്ഞ​താണ്‌ “മസ്റ്റർഡ്‌” എന്ന ഇംഗ്ലീഷ്‌ പദം. ആ പദത്തിനു ചെടി​യെ​യോ അതിന്റെ വിത്തു​ക​ളെ​യോ നിങ്ങളു​ടെ മുഖം നീറി​പ്പു​ക​യാൻ ഇടയാ​ക്കുന്ന കറിക്കൂ​ട്ടി​നെ​യോ പരാമർശി​ച്ചേ​ക്കാം.

ഉണങ്ങി​യി​രി​ക്കു​മ്പോൾ നിരു​പ​ദ്ര​വ​ക​ര​മാ​ണെ​ങ്കി​ലും വെള്ളം ചേർത്ത്‌ അരയ്‌ക്കു​മ്പോൾ ഈ വിത്ത്‌ അലൈൽ ഐസോ​ത​യോ​സൈ​നേറ്റ്‌ എന്നു വിളി​ക്ക​പ്പെ​ടുന്ന അസ്വാ​സ്ഥ്യ​മു​ള​വാ​ക്കുന്ന ഒരു പദാർഥം പുറ​പ്പെ​ടു​വി​ക്കു​ന്നു. കടുകി​ന്റെ എരിവി​നു കാരണ​മാ​യി​രി​ക്കുന്ന എരിവുള്ള ഈ ഗന്ധ​തൈലം ശ്ലേഷ്‌മ സ്‌തര​ങ്ങ​ളിൽ അസ്വാ​സ്ഥ്യ​മു​ള​വാ​ക്കു​ക​യും അങ്ങനെ ഭോജ​ന​പ്രി​യ​ന്റെ​യും കടുക്‌ ഉണ്ടാക്കു​ന്ന​യാ​ളു​ടെ​യും കണ്ണുകളെ ഈറന​ണി​യി​ക്കു​ക​യും ചെയ്യുന്നു. കടുക്‌ അൽപ്പം​പോ​ലും ഇല്ലാഞ്ഞി​ട്ടും ഒന്നാം ലോക​മ​ഹാ​യു​ദ്ധ​ത്തിൽ ഉപയോ​ഗിച്ച ഐപെ​റൈറ്റ്‌ എന്ന ഒരു രാസാ​യു​ധ​ത്തി​നു മസ്റ്റർഡ്‌ ഗ്യാസ്‌ എന്നു പേരു​വ​രാ​നുള്ള കാരണം ഇതു സംശയ​മെ​ന്യേ വിശദീ​ക​രി​ക്കു​ന്നു.

ശക്തിമ​ത്തായ തീരെ ചെറിയ ഒരു വസ്‌തു

ഉഗ്ര​രോ​ഷം ഉള്ളി​ലൊ​തു​ക്കി​ക്കൊ​ണ്ടു നിഷ്‌ക​ള​ങ്ക​മാ​യി കാണ​പ്പെ​ടുന്ന ആ മഞ്ഞ പുഷ്‌പം കണ്ടാൽ അത്‌ റേപ്പ്‌വി​ത്തോ കോൾസാ​യോ ആണെന്ന്‌ എളുപ്പ​ത്തിൽ തെറ്റി​ദ്ധ​രി​ച്ചു​പോ​യേ​ക്കാം. 4,000 വർഗങ്ങൾ ഉൾക്കൊ​ള്ളു​ന്ന​താ​യി പറയ​പ്പെ​ടുന്ന—അവയിൽ 40-ഓളം എണ്ണം കടുകു​ക​ളാണ്‌—ക്രൂസി​ഫെറെ കുലത്തിൽ പെടു​ന്ന​വ​യാ​ണു കടുകും റേപ്പ്‌വി​ത്തും. ത്വക്കിൽ പൊള്ള​ലു​കൾ ഉളവാ​ക്കാൻ കഴിയുന്ന, വിശേ​ഷാൽ വീര്യ​മേ​റിയ ഒരു സത്ത്‌ ഉത്‌പാ​ദി​പ്പി​ക്കുന്ന വെൺക​ടുക്‌ (ബ്രാസിക്ക ഹിർത്ത), ഇന്ത്യൻ കടുക്‌ അഥവാ തവിട്ടു​നി​റ​മുള്ള കടുക്‌ (ബ്രാസിക്ക ജുൺസിയ), കരിങ്ക​ടുക്‌ (ബ്രാസിക്ക നൈഗ്ര) എന്നിവ​യാണ്‌ ഏറ്റവും വ്യാപ​ക​മാ​യി ഉപയോ​ഗി​ക്ക​പ്പെ​ടുന്ന കടുകു​കൾ.

തനിയെ വളരുന്ന കരിങ്ക​ടുക്‌ ആഫ്രി​ക്ക​യി​ലെ​യും ഇന്ത്യയി​ലെ​യും യൂറോ​പ്പി​ലെ​യും കൽപ്ര​ദേ​ശ​ങ്ങ​ളി​ലും പാതക​ളു​ടെ​യും പുഴക​ളു​ടെ​യും ഓരത്തും തഴച്ചു​വ​ള​രു​ന്നു. ഇസ്രാ​യേ​ലി​ലെ ഗലീല കടലിന്റെ പച്ചപുതച്ച മലയോ​ര​ങ്ങ​ളി​ലും അതു സമൃദ്ധ​മാ​യി വളരു​ന്നുണ്ട്‌. ശരിയായ രീതി​യിൽ കൃഷി​ചെ​യ്യു​മ്പോൾ അതു വേഗം പക്വമാ​കു​ക​യും “പൗരസ്‌ത്യ​നാ​ടു​ക​ളി​ലും ചില​പ്പോൾ ഫ്രാൻസി​ന്റെ തെക്കു ഭാഗത്തും നമ്മുടെ ഫലവൃ​ക്ഷ​ങ്ങ​ളു​ടെ​യത്ര ഉയരം” വയ്‌ക്കു​ക​യും ചെയ്യുന്നു.—വിഗൂ​റൂ​വി​ന്റെ ഡിക്‌സ്യൊ​നർ ഡെ ലാ ബിബ്‌ൾ.

കറുത്ത “കടുകു​മണി” തീർത്തും ചെറു​താ​ണെ​ന്നതു വിസ്‌മ​യാ​വ​ഹ​മാണ്‌. യേശു​വി​ന്റെ നാളു​ക​ളിൽ ഇസ്രാ​യേ​ലിൽ സാധാ​ര​ണ​മാ​യി വിതച്ചി​രുന്ന വിത്തു​ക​ളിൽവച്ച്‌ ഏറ്റവും ചെറു​താ​യി​രു​ന്നു അത്‌. (മർക്കൊസ്‌ 4:31) അതിന്റെ വ്യാസം ഒരു ഇഞ്ചിന്റെ ഏതാണ്ട്‌ ഇരുപ​തി​ലൊ​ന്നാണ്‌. അളവിന്റെ ഏറ്റവും ചെറിയ യൂണിറ്റ്‌ എന്ന നിലയി​ലുള്ള തൽമൂ​ദി​ലെ അതിന്റെ ഉപയോ​ഗത്തെ ഇതു ന്യായീ​ക​രി​ക്കു​ന്നു.—ബെരാ​ഖോട്ട്‌ 31എ.

തീരെ ചെറിയ കടുകു​മ​ണി​യും പൂർണ വളർച്ച​യെ​ത്തിയ വലിയ ചെടി​യും തമ്മിലുള്ള വൻ വ്യത്യാ​സം, ആകാശ​ത്തി​ലെ പക്ഷികൾക്കു വാസസ്ഥാ​നം പ്രദാനം ചെയ്യത്ത​ക്ക​വി​ധം വളർന്ന “സ്വർഗ്ഗ​രാ​ജ്യ”ത്തിന്റെ വളർച്ച​യെ​ക്കു​റി​ച്ചുള്ള ക്രിസ്‌തു​വി​ന്റെ പഠിപ്പി​ക്കൽ സംബന്ധി​ച്ചു കൂടുതൽ അർഥം പ്രദാനം ചെയ്‌തു. (മത്തായി 13:31, 32; ലൂക്കൊസ്‌ 13:19) വിശ്വാ​സ​ത്തി​ന്റെ ഒരു ചെറിയ അളവിന്‌ എത്രയ​ധി​കം നിർവ​ഹി​ക്കാൻ കഴിയു​മെന്നു പ്രദീ​പ്‌ത​മാ​ക്കാ​നും ക്രിസ്‌തു പ്രചോ​ദ​നാ​ത്മ​ക​മായ ഒരു ദൃഷ്ടാന്തം ഉപയോ​ഗി​ച്ചു. അവൻ ഇപ്രകാ​രം പറഞ്ഞു: ‘നിങ്ങൾക്കു കടുകു​മ​ണി​യോ​ളം വിശ്വാ​സ​മു​ണ്ടെ​ങ്കിൽ ഒന്നും അസാദ്ധ്യ​മാ​ക​യില്ല എന്നു ഞാൻ സത്യമാ​യി​ട്ടു നിങ്ങ​ളോ​ടു പറയുന്നു.’—മത്തായി 17:21; ലൂക്കൊസ്‌ 17:6.

ഫ്രാൻസി​ലെ കടുക്‌ ഉത്‌പാ​ദ​നം

പ്രിയ​ങ്ക​ര​മായ ഫ്രഞ്ച്‌ കരിങ്ക​ടുക്‌ കിഴക്കൻ ഫ്രാൻസി​ലെ അൽസാ​സി​ലും കൃഷി​ചെ​യ്യ​പ്പെ​ട്ടി​രു​ന്നു​വെ​ങ്കി​ലും ഫ്രാൻസി​ലെ കടുകു തലസ്ഥാനം എന്ന്‌ അറിയ​പ്പെ​ടാ​നി​ട​യാ​യത്‌ ബർഗു​ണ്ടി​യി​ലെ ഡിഷോൺ എന്ന നഗരമാണ്‌. അവിടെ മരക്കരി ഉത്‌പാ​ദ​ന​ത്താൽ ക്രമമാ​യി സമ്പുഷ്ട​മാ​ക്ക​പ്പെട്ട മണ്ണിലാണ്‌ കടുകു വളർത്തി​യി​രു​ന്നത്‌. അതിന്റെ ഫലമായി ഭൂമി​യി​ലു​ണ്ടായ പൊട്ടാഷ്‌ പ്രത്യേക വീര്യ​മുള്ള കടുകു​കളെ ഉത്‌പാ​ദി​പ്പി​ച്ചു.

രണ്ടാം ലോക​മ​ഹാ​യു​ദ്ധ​ത്തി​നു​ശേഷം, മാറി​ക്കൊ​ണ്ടി​രി​ക്കുന്ന കാർഷിക രീതി​ക​ളെ​യും കടുത്ത അന്തർദേ​ശീയ മത്സര​ത്തെ​യും നേരിട്ട കടുകു​കൃ​ഷി ബർഗു​ണ്ടി​യിൽ സാവധാ​നം കുറഞ്ഞു വന്നു, കോൾസാ ജനപ്രീ​തി​യാർജി​ക്കു​ക​യും ചെയ്‌തു. ഇന്ന്‌, ഫ്രാൻസിന്‌ ആവശ്യ​മായ കടുകു​മ​ണി​ക​ളു​ടെ 95 ശതമാനം അത്‌ ഇറക്കു​മതി ചെയ്യു​ക​യാണ്‌, അതിന്റെ 80 ശതമാനം വരുന്നതു കാനഡ​യിൽനി​ന്നാണ്‌. ഡിഷോൺ കടുക്‌ എന്ന പേര്‌ അതിന്റെ ഉത്ഭവസ്ഥ​ല​ത്തി​നു​പ​കരം ഉത്‌പാ​ദ​ന​പ്ര​ക്രി​യയെ സൂചി​പ്പി​ക്കു​ന്നു​വെ​ങ്കി​ലും ഫ്രാൻസി​ലെ കറിക്കൂ​ട്ടു വ്യവസാ​യ​ത്തി​ന്റെ 70 ശതമാ​ന​വും ഇപ്പോ​ഴും ഡിഷോ​ണി​ലാ​ണു കേന്ദ്രീ​ക​രി​ച്ചി​രി​ക്കു​ന്നത്‌. ബർഗു​ണ്ടി​യിൽ വീണ്ടും കടുകു കൃഷി​ചെ​യ്യാൻ അടുത്ത​കാ​ലത്തു ശ്രമം നടത്തി​യി​ട്ടുണ്ട്‌.

ഒരു നീണ്ട ചരിത്രം

കുരു​മു​ള​കു​പോ​ലെ പൊടി​രൂ​പ​ത്തി​ലോ കറിക്കൂ​ട്ടി​ന്റെ രൂപത്തി​ലോ ഉപയോ​ഗി​ച്ചി​രുന്ന കടുക്‌ പുരാതന കാലങ്ങ​ളിൽത്തന്നെ വിശപ്പു​ണർത്തി​യി​രു​ന്നു. ഗാറും (അയലയു​ടെ കുടലും തലയും ഉപ്പിലി​ട്ടത്‌), മുറിയ (ടൂണമ​ത്സ്യം ഉപ്പിലി​ട്ടത്‌) എന്നിങ്ങനെ എരിവുള്ള സോസു​ക​ളിൽ റോമാ​ക്കാർ സ്വാദി​നു​വേണ്ടി കടുകു ചേർത്തി​രു​ന്നു. ആപിക്കി​യുസ്‌ എന്നു പേരുള്ള റോമാ​ക്കാ​ര​നായ ഒരു അമിത​ഭോ​ജ​ന​പ്രി​യൻ കടുകു​മ​ണി​കൾ, ഉപ്പ്‌, വിന്നാ​ഗി​രി, തേൻ എന്നിവ​യുൾപ്പെ​ടുന്ന ഒരു പാചക​വി​ധി സ്വന്തമാ​യി തയ്യാറാ​ക്കി, സദ്യയ്‌ക്കു​വേണ്ടി തയ്യാറാ​ക്കു​മ്പോൾ ഇതിൽ ബദാം പരിപ്പും പൈൻ പരിപ്പു​ക​ളും ചേർത്തി​രു​ന്നു.

മധ്യയു​ഗ​ങ്ങൾ തുടങ്ങി 19-ാം നൂറ്റാ​ണ്ടു​വ​രെ​യുള്ള കാലയ​ള​വിൽ, കടുക്‌ വീടു​ക​ളിൽ ഉണ്ടാക്കുന്ന രീതി മാറി അത്‌ ഒരു കുടിൽ വ്യവസാ​യ​മാ​യി​ത്തീർന്നു. ഫ്രാൻസിൽ കടുക്‌-വിന്നാ​ഗി​രി ഉത്‌പാ​ദ​ക​രു​ടെ സഹകരണ സംഘം പാചക​വി​ധി​കൾ തയ്യാറാ​ക്കു​ക​യും ശരിയായ ശുചി​ത്വം ഉറപ്പു​വ​രു​ത്തു​ക​യും വിപണി​യെ നിയ​ന്ത്രി​ക്കു​ക​യും എതിരാ​ളി​ക​ളിൽ പിഴകൾ ചുമത്തു​ക​യും ചെയ്‌തു. ദ്രവരൂ​പ​ത്തി​ലോ വിന്നാ​ഗി​രി​യിൽ ലയിപ്പി​ക്കേണ്ട ഗുളി​ക​ക​ളാ​യോ വിൽക്ക​പ്പെ​ട്ടി​രുന്ന കടുക്‌ ഇറച്ചി​യി​ലെ​ന്ന​പോ​ലെ മീനി​ലും പൂരക​മാ​യി ഉപയോ​ഗി​ച്ചി​രു​ന്നു. 19-ാം നൂറ്റാ​ണ്ടിൽ, ഒരു ഇംഗ്ലീ​ഷു​കാ​ര​നായ ജെരെ​മായ കോൾമൻ തന്റെ കടുകു​പൊ​ടി ഉപയോ​ഗി​ക്കാൻ വിസ്‌തൃ​ത​മായ ബ്രിട്ടീഷ്‌ സാമ്രാ​ജ്യ​ത്തെ സ്വാധീ​നി​ച്ചു. ഭക്ഷണ​വേ​ള​ക​ളിൽ അതു വെള്ളത്തി​ലും പാലി​ലും ബിയറി​ലും മറ്റും കലർത്തി ഉപയോ​ഗി​ച്ചി​രു​ന്നു.

ക്രമേണ, ഉത്‌പാ​ദനം ഗണ്യമായ തോതിൽ വർധി​പ്പി​ച്ചു​കൊണ്ട്‌ കുടിൽ വ്യവസാ​യ​ത്തി​നു പകരം ഫാക്ടറി ഉത്‌പാ​ദനം നിലവിൽവന്നു. 1990-ൽ, യൂറോ​പ്പി​ലെ ഏറ്റവും വലിയ ഉത്‌പാ​ദക രാജ്യ​മായ ഫ്രാൻസ്‌ ഏതാണ്ട്‌ 70,000 ടൺ കടുകും 2,000 ടൺ മറ്റുപല കറിക്കൂ​ട്ടു​ക​ളും ഉണ്ടാക്കി.

ആധുനിക ഉത്‌പാ​ദന രീതികൾ

കടുകി​ന്റെ വീര്യം ചേരു​വ​ക​ളെ​പ്പോ​ലെ​തന്നെ അതിന്റെ ഉത്‌പാ​ദന രീതി​ക​ളെ​യും ആശ്രയി​ച്ചാ​ണി​രി​ക്കു​ന്നത്‌. വിത്തുകൾ തരംതി​രി​ക്കു​ക​യും കഴുകി​യു​ണ​ക്കു​ക​യും തീർത്തും രഹസ്യ​മാ​യി സൂക്ഷി​ച്ചി​രി​ക്കുന്ന അനുപാ​ത​ങ്ങ​ളിൽ കൂട്ടി​ക്ക​ലർത്തു​ക​യും ചെയ്യുന്നു. ചില​പ്പോൾ കടുകു​മ​ണി​കൾ ആപ്പിൾമ​ദ്യ​ത്തി​ലോ വിന്നാ​ഗി​രി​യി​ലോ വെർജ്യൂ​സി​ലോ (പുളി​യുള്ള മുന്തി​രി​ച്ചാറ്‌) 24 മണിക്കൂർവരെ കുതിർത്തു വയ്‌ക്കു​ന്ന​തി​നു മുമ്പ്‌ പൊടി​ക്കു​ന്നു. വയലറ്റ്‌ നിറമുള്ള കടുകു​കൾ ഉണ്ടാക്കു​ന്ന​തി​നു കറുത്ത മുന്തി​രി​യു​ടെ മട്ട്‌ ഉപയോ​ഗി​ക്കു​ന്നു. ചേരു​വ​ക​ളെ​ല്ലാം ചതയ്‌ക്കു​ക​യും—പരമ്പരാ​ഗ​ത​മാ​യി ഉപയോ​ഗി​ച്ചു​വ​രുന്ന കടുകു​മ​ണി​കൾ ലഘുവാ​യി—തോടു​കൾ നീക്കം​ചെ​യ്യു​ന്ന​തി​നും ബാഷ്‌പ​ശീ​ല​മുള്ള എണ്ണയുടെ ഗാഢത വർധി​പ്പി​ക്കു​ന്ന​തി​നു​മാ​യി സെൻട്രി​ഫ്യൂ​ജി​ലി​ട്ടു വേർതി​രി​ക്കു​ക​യും ചെയ്യുന്നു. അതു വീര്യം​കൂ​ടി​യ​താ​യി​രി​ക്കു​മോ വീര്യം​കു​റ​ഞ്ഞ​താ​യി​രി​ക്കു​മോ എന്നുള്ളത്‌ കുഴമ്പ്‌ എത്ര നന്നായി അരി​ച്ചെ​ടു​ക്കു​ന്നു എന്നതിനെ ആശ്രയി​ച്ചി​രി​ക്കു​ന്നു.

മിശ്ര​ണ​ത്തി​ന്റെ ഫലമായി കുഴമ്പി​നെ ഓക്‌സീ​ക​രണം ചെയ്‌തേ​ക്കാ​വുന്ന വായു കുമി​ളകൾ നീക്കം ചെയ്യ​പ്പെ​ടു​ന്നു. പിന്നെ 48 മണിക്കൂ​റോ​ളം വാറ്റിൽ കിടന്ന്‌ അതിനു പതംവ​രു​ന്നു. അവി​ടെ​വച്ച്‌ അതു സ്വാഭാ​വി​ക​മാ​യും കൂടുതൽ എരിവു​ള്ള​താ​യി​ത്തീ​രു​ക​യും അതിന്റെ കയ്‌പ്‌ നഷ്ടമാ​കു​ക​യും ചെയ്യുന്നു. നിറമോ മാവോ മസാല​യോ ചേർക്കു​മ്പോൾ അതിന്റെ വീര്യം കുറയു​ക​യോ കൂടു​ക​യോ ചെയ്യുന്നു. പിന്നെ അതിൽ നല്ല വാസന​യുള്ള പല ഫ്‌ളേ​വ​റു​ക​ളും ചേർക്കു​ന്നു: പരമ്പരാ​ഗതം (റോ​ക്വെ​ഫോർട്ട്‌, റ്ററാ​ഗോൺ), വിദേ​ശീ​യം (ഏത്തപ്പഴം, കറി), അല്ലെങ്കിൽ ആധുനി​കം (കോണ്യാക്‌, ഷാം​പെയ്‌ൻ). മിയവു​ക്‌സ്‌ കടുകി​ന്റെ ആസ്വാ​ദ്യ​മായ സുഗന്ധം 11-ൽ ഒട്ടും​കു​റ​യാ​തെ​യുള്ള വാസന​ക​ളു​ടെ ഫലമാണ്‌.

കുഴമ്പി​നെ വായു തവിട്ടു​നി​റ​മു​ള്ള​താ​ക്കു​ക​യും ചൂട്‌ ബാഷ്‌പ​ശീ​ല​മുള്ള എണ്ണ ആവിയാ​യി​പ്പോ​കാൻ ഇടയാ​ക്കു​ക​യും ചെയ്യു​ന്ന​തു​കൊണ്ട്‌ നിർമാ​ണ​പ്ര​ക്രിയ പൂർത്തി​യാ​ക്കു​ന്ന​തി​നു പായ്‌ക്കു ചെയ്യേ​ണ്ടത്‌ അനിവാ​ര്യ​മാണ്‌. അതു​കൊണ്ട്‌ കടുക്‌ തണുപ്പും ഇരുട്ടു​മുള്ള ഒരു സ്ഥലത്തു വയ്‌ക്കു​ന്ന​താണ്‌ എല്ലായ്‌പോ​ഴും ഏറ്റവും നല്ലത്‌. ഇപ്പോൾ മുഖ്യ​മാ​യും കാഴ്‌ച​ബം​ഗ്ലാ​വു​ക​ളി​ലെ പ്രദർശന വസ്‌തു​ക്ക​ളു​ടെ കൂട്ടത്തി​ലും സ്വകാര്യ ശേഖര​ങ്ങ​ളി​ലും കണ്ടുവ​രുന്ന, പണ്ടത്തെ നേർമ​യേ​റിയ കൽപ്പാ​ത്ര​ങ്ങൾക്കും മൺപാ​ത്ര​ങ്ങൾക്കും പോർസ്‌ലിൻ കലങ്ങൾക്കും പകരം പ്രത്യേ​ക​മാ​യി ഡി​സൈൻചെയ്‌ത ലേബലു​കൾകൊ​ണ്ടു പലപ്പോ​ഴും അലങ്കരിച്ച പ്ലാസ്റ്റി​ക്കു​കൊ​ണ്ടോ ഗ്ലാസ്സു​കൊ​ണ്ടോ ഉള്ള കടുകു ജാറുകൾ ഉപയോ​ഗി​ക്കു​ന്നു. “ഒറ്റനോ​ട്ട​ത്തിൽ അവയെ തിരി​ച്ച​റി​യാൻ സഹായി​ച്ചി​രുന്ന” ആരംഭ​കാ​ലത്തെ ഡി​സൈ​നു​ക​ളു​ണ്ടാ​ക്കാ​നുള്ള ലക്ഷ്യത്തിൽ ശിൽപ്പ​ക​ലാ​വി​ദ​ഗ്‌ധർ അവരുടെ കലങ്ങളു​ടെ ബാഹ്യാ​കാ​ര​ത്തി​നു വലിയ ശ്രദ്ധ കൊടു​ത്തു.

ബഹുമു​ഖോ​പ​യോ​ഗ​ങ്ങ​ളുള്ള ഒരു സാധാരണ സസ്യം

ഒരുകാ​ലത്ത്‌ ഔഷധ​ശാ​ല​കളെ അലങ്കരി​ച്ചി​രുന്ന ആകർഷ​ക​മായ ആ കലങ്ങളിൽ ചികി​ത്സോ​പ​യോ​ഗ​ത്തി​നുള്ള കടുകു​പൊ​ടി അടങ്ങി​യി​രു​ന്നു. സ്‌കർവി​യെ പ്രതി​രോ​ധി​ക്കു​ന്ന​തി​നുള്ള അതിന്റെ ഗുണങ്ങ​ളു​ടെ വെളി​ച്ച​ത്തിൽ, ഒരു ഡച്ചു കപ്പൽപോ​ലും ചരക്കറ​യിൽ കുറച്ചു കടുകു കരുതാ​തെ യാത്ര​പു​റ​പ്പെ​ടു​മാ​യി​രു​ന്നില്ല. കുളി​ക്കു​മ്പോ​ഴും വ്രണമ​രു​ന്നാ​യും കടുക്‌ ഉപയോ​ഗി​ച്ചി​രു​ന്നു.

സാലഡു​ക​ളി​ലി​ട്ടു കഴിക്കുന്ന വെൺക​ടു​കു ചെടി​യു​ടെ ഇലകൾ ഇപ്പോ​ഴും കന്നുകാ​ലി​ത്തീറ്റ ഉണ്ടാക്കു​ന്ന​തിന്‌ ഉപയോ​ഗി​ക്കു​ന്നു. വിത്തു​ക​ളിൽനി​ന്നു വേർതി​രി​ച്ചെ​ടു​ക്കുന്ന ഭക്ഷ്യ​യോ​ഗ്യ​മായ എണ്ണ എളുപ്പം കനച്ചു​പോ​കു​ന്നില്ല. ഏഷ്യയിൽ വിള​ക്കെ​ണ്ണ​യാ​യി ഉപയോ​ഗി​ക്ക​പ്പെ​ടുന്ന അത്‌ വ്യവസാ​യ​ത്തിന്‌ അനുപൂ​ര​ക​മാ​യി വർത്തി​ക്കു​ക​യും അനേകം ഭക്ഷണ സാധന​ങ്ങൾക്കു സ്വാദു വരുത്തു​ക​യും ചെയ്യുന്നു.

ഈ നിസ്സാ​ര​മായ നാട്ടു​പു​ഷ്‌പം പല പഴഞ്ചൊ​ല്ലു​ക​ളി​ലും പരാമർശി​ക്ക​പ്പെ​ട്ടി​ട്ടുണ്ട്‌. നേപ്പാ​ളി​ലും ഇന്ത്യയി​ലും “കടുകു പുഷ്‌പങ്ങൾ കാണുക” എന്നു പറഞ്ഞാൽ ഞെട്ടി​പ്പോ​കുക എന്നാണ്‌ അർഥം. ഫ്രാൻസിൽ “കടുകു മൂക്കോ​ള​മെ​ത്തി​ക്കുക” എന്നുപ​റ​ഞ്ഞാൽ ദേഷ്യ​പ്പെ​ടുക എന്നും. അത്‌ ഏതുരൂ​പ​ത്തി​ലാ​യാ​ലും—പൂവോ കറിക്കൂ​ട്ടോ വിത്തോ എണ്ണയോ പൊടി​യോ—കടുകി​നു നിങ്ങളു​ടെ ജീവി​തത്തെ കൂടുതൽ രസകര​മാ​ക്കി​ത്തീർക്കാൻ കഴിയും.

[അടിക്കു​റിപ്പ്‌]

[23-ാം പേജിലെ ചിത്രം]

കടുക്‌ അനേകം വൈവി​ധ്യ​ങ്ങ​ളിൽ