യാഥാർഥ്യങ്ങൾ × കെട്ടുകഥകൾ യേശുവിനെക്കുറിച്ചുള്ള വസ്‌തുതകൾ
നിങ്ങൾ എന്തു വിചാരിക്കുന്നു? പിൻവരുന്ന പ്രസ്‌താവനകൾ വസ്‌തുതകളോ കെട്ടുകഥകളോ?
യേശു ജനിച്ചത്‌ ഡിസംബർ 25-നാണ്‌.
കാലിത്തൊഴുത്തിൽ മൂന്നുജ്ഞാനികൾ യേശുവിനെ സന്ദർശിച്ചു.
മറിയയ്‌ക്ക്‌ യേശുവല്ലാതെ മറ്റു മക്കളില്ലായിരുന്നു.
യേശു ദൈവത്തിന്റെ അവതാരമായിരുന്നു.
യേശു ദൈവപുത്രനായിരുന്നു.
മേൽപ്പറഞ്ഞ പ്രസ്‌താവനകൾ എല്ലാം ശരിയാണെന്നു വിശ്വസിക്കുന്നവരാണ്‌ മിക്കവരും. ഇനി, സത്യാവസ്ഥ മനസ്സിലാക്കാൻ യാതൊരു മാർഗവുമില്ലെന്ന്‌ ചിന്തിക്കുന്നവരുമുണ്ട്‌. ‘യേശുവിൽ വിശ്വസിച്ചാൽ മതി; ഇതൊക്കെ തെറ്റാണോ ശരിയാണോ എന്നു പരിശോധിക്കേണ്ട കാര്യമൊന്നുമില്ല’ എന്നായിരിക്കാം അവർ കരുതുന്നത്‌.
എന്നാൽ ബൈബിളിന്റെ വീക്ഷണം തികച്ചും വ്യത്യസ്‌തമാണ്‌. “കർത്താവായ യേശുക്രിസ്‌തുവിനെക്കുറിച്ചുള്ള പരിജ്ഞാനം” നേടണമെന്നാണ്‌ അത്‌ നമ്മോടു പറയുന്നത്‌. (2 പത്രോസ്‌ 1:8) സുവിശേഷ വിവരണങ്ങൾ പരിശോധിച്ചാൽ നമുക്ക്‌ ആ പരിജ്ഞാനം നേടാനാകും. കാരണം അവയിൽ യേശുവിനെക്കുറിച്ചുള്ള സത്യമുണ്ട്‌. യാഥാർഥ്യങ്ങളും കെട്ടുകഥകളും വേർതിരിച്ചറിയാൻ ആ വിവരണങ്ങൾ നമ്മെ സഹായിക്കും. അതുകൊണ്ട്‌ സുവിശേഷങ്ങളുടെ വെളിച്ചത്തിൽ മേൽപ്പറഞ്ഞ വിശ്വാസങ്ങൾ നമുക്കൊന്നു വിലയിരുത്താം.
വിശ്വാസം: യേശു ജനിച്ചത്‌ ഡിസംബർ 25-നാണ്‌.
കെട്ടുകഥയോ യാഥാർഥ്യമോ? കെട്ടുകഥ.
യേശു ജനിച്ച മാസമോ തീയതിയോ ബൈബിൾ പറയുന്നില്ല. അപ്പോൾപ്പിന്നെ ഡിസംബർ 25 എങ്ങനെ യേശുവിന്റെ ജന്മദിനമായി? ക്രിസ്‌ത്യാനികളെന്ന്‌ അവകാശപ്പെട്ട ചിലർ, “ഈ ദിവസം തിരഞ്ഞെടുത്തത്‌ . . . സൂര്യന്റെ ദക്ഷിണായനവുമായി ബന്ധപ്പെടുത്തി പുറജാതിക്കാരായ റോമൻജനത ആഘോഷിച്ചിരുന്ന മകരസംക്രാന്തിയുമായി അതിനെ ഏകീഭവിപ്പിക്കാനായിരിക്കണം” എന്ന്‌ എൻസൈക്ലോപീഡിയ ബ്രിട്ടാനിക്ക പറയുന്നു. “ശിശിരത്തിലെ പുറജാതീയ കാർഷികോത്സവങ്ങളോടും സൂര്യോത്സവങ്ങളോടും” ബന്ധപ്പെട്ടു നടത്തിയിരുന്ന പല പരിപാടികളും പിന്നീട്‌ ക്രൈസ്‌തവർ കടമെടുത്ത്‌ ക്രിസ്‌തുമസ്സ്‌ ആഘോഷത്തിന്റെ ഭാഗമാക്കുകയായിരുന്നു എന്നും ഈ എൻസൈക്ലോപീഡിയ പറയുന്നു.
ഡിസംബർ 25 തന്റെ ജന്മദിനമായി കൊണ്ടാടുന്നതിനെ യേശു എങ്ങനെയായിരിക്കും വീക്ഷിക്കുന്നത്‌? പിൻവരുന്ന വസ്‌തുതകളെക്കുറിച്ച്‌ ചിന്തിക്കുക: യേശുവിന്റെ ജനനത്തീയതി അജ്ഞാതമാണ്‌. യേശുവിന്റെ ജന്മദിനം ആഘോഷിക്കാൻ ബൈബിളിൽ ഒരിടത്തും പറയുന്നില്ല. ആദ്യകാല ക്രിസ്‌ത്യാനികൾ അത്‌ ആഘോഷിച്ചിരുന്നു എന്നതിനുള്ള യാതൊരു തെളിവുകളും ബൈബിളിലില്ല. എന്നാൽ യേശുവിന്റെ മരണത്തീയതി ബൈബിളിൽ കൃത്യമായി രേഖപ്പെടുത്തിയിട്ടുണ്ട്‌. ആ ദിനത്തിന്റെ ഓർമ ആചരിക്കാൻ യേശു തന്റെ അനുഗാമികളോട്‌ കൽപ്പിക്കുകയും ചെയ്‌തിട്ടുണ്ട്‌.a (ലൂക്കോസ്‌ 22:19) ക്രിസ്‌ത്യാനികൾ തന്റെ ജനനത്തിനല്ല, തന്റെ ബലിമരണത്തിന്‌ പ്രാധാന്യം നൽകാനാണ്‌ യേശു ആഗ്രഹിച്ചതെന്നു വ്യക്തം.—മത്തായി 20:28.
വിശ്വാസം: കാലിത്തൊഴുത്തിൽ മൂന്നുജ്ഞാനികൾ (മൂന്നുരാജാക്കന്മാർ എന്നും വിശ്വാസമുണ്ട്‌) യേശുവിനെ സന്ദർശിച്ചു.
കെട്ടുകഥയോ യാഥാർഥ്യമോ? കെട്ടുകഥ.
പുൽത്തൊട്ടിയിൽ കിടക്കുന്ന ഉണ്ണിയേശുവിനെയും സമ്മാനങ്ങളുമായി അവനെ കാണാനെത്തിയ മൂന്നുരാജാക്കന്മാരെയും ചിത്രീകരിക്കുന്ന ‘തിരുപ്പിറവി’ ദൃശ്യങ്ങൾ നിങ്ങൾ കണ്ടിട്ടുണ്ടാകണം. ഈ ദൃശ്യങ്ങൾക്കു പക്ഷേ യാഥാർഥ്യവുമായി യാതൊരു ബന്ധവുമില്ല എന്നതാണ്‌ സത്യം.
കിഴക്കുനിന്നുള്ള കുറെപ്പേർ യേശുവിനെ വണങ്ങാനായി ചെന്നിരുന്നു എന്നതു സത്യമാണ്‌. എന്നാൽ അവർ രാജാക്കന്മാരായിരുന്നില്ല, ജ്യോതിഷക്കാരായിരുന്നു. (മത്തായി 2:1) പുൽക്കൂട്ടിൽ കിടക്കുന്ന യേശുവിനെയാണോ അവർ കണ്ടത്‌? അല്ല. അവർ കാണുമ്പോൾ യേശു ഒരു വീട്ടിലായിരുന്നു. യേശു ജനിച്ച്‌ ഏതാനും മാസങ്ങൾക്കുശേഷമാണ്‌ അവർ അവനെ കണ്ടതെന്ന്‌ തെളിവുകൾ സൂചിപ്പിക്കുന്നു.—മത്തായി 2:9-11.
അവർ എത്ര പേരുണ്ടായിരുന്നു? രണ്ട്‌? മൂന്ന്‌? മുപ്പത്‌? അതേക്കുറിച്ച്‌ ബൈബിൾ ഒന്നും പറയുന്നില്ല. അവർ മൂന്നുതരം സമ്മാനങ്ങൾ കാഴ്‌ചവെച്ചു എന്നതായിരിക്കാം സന്ദർശകർ മൂന്നുപേരുണ്ടായിരുന്നു എന്ന വിശ്വാസത്തിന്‌ ആധാരം.b (മത്തായി 2:11) ഈ മൂന്നുപുരുഷന്മാർ മൂന്നുവർഗക്കാരെ പ്രതിനിധാനം ചെയ്യുന്നു എന്നു വിശ്വസിക്കുന്നവരുമുണ്ട്‌. എന്നാൽ അങ്ങനെയൊരു ആശയം തിരുവെഴുത്തുകളിലില്ല. ഈ കെട്ടുകഥ “എട്ടാം നൂറ്റാണ്ടിൽ ജീവിച്ചിരുന്ന ഒരു ചരിത്രകാരന്റെ ഭാവനാസൃഷ്ടി”യാണെന്നാണ്‌ ഒരു സുവിശേഷ വ്യാഖ്യാനഗ്രന്ഥം പറയുന്നത്‌.
വിശ്വാസം: മറിയയ്‌ക്ക്‌ യേശുവല്ലാതെ മറ്റു മക്കളില്ലായിരുന്നു.
കെട്ടുകഥയോ യാഥാർഥ്യമോ? കെട്ടുകഥ.
യേശുവിന്‌ കൂടെപ്പിറപ്പുകൾ ഉണ്ടായിരുന്നെന്ന്‌ സുവിശേഷങ്ങൾ സൂചിപ്പിക്കുന്നു. ലൂക്കോസിന്റെ സുവിശേഷത്തിൽ യേശുവിനെ മറിയയുടെ “കടിഞ്ഞൂൽപുത്രൻ” എന്നു വിളിച്ചിരിക്കുന്നു; മറിയയ്‌ക്ക്‌ യേശുവിനെക്കൂടാതെ വേറെയും മക്കൾ ജനിച്ചു എന്നാണ്‌ അതു സൂചിപ്പിക്കുന്നത്‌.c (ലൂക്കോസ്‌ 2:7, പി.ഒ.സി. ബൈബിൾ) നസറെത്ത്‌ പട്ടണത്തിലുള്ള ചിലർ യേശുവിന്റെ കൂടെപ്പിറപ്പുകളെക്കുറിച്ച്‌ പരാമർശിച്ച ഒരു സന്ദർഭം മർക്കോസ്‌ രേഖപ്പെടുത്തുന്നു: ‘ഇവൻ യാക്കോബ്‌, യോസേഫ്‌, യൂദാ, ശിമോൻ എന്നിവരുടെ സഹോദരനല്ലയോ? ഇവന്റെ സഹോദരിമാരും ഇവിടെ നമ്മോടുകൂടെയില്ലയോ?’—മർക്കോസ്‌ 6:3; മത്തായി 12:46; യോഹന്നാൻ 7:5.
സുവിശേഷങ്ങളിൽ ഇങ്ങനെ പറയുന്നുണ്ടെങ്കിലും പല ദൈവശാസ്‌ത്രജ്ഞരും വിശ്വസിക്കുന്നത്‌ യേശു മറിയയുടെ ഏകപുത്രനാണെന്നാണ്‌. യേശുവിന്റെ സഹോദരീസഹോദരന്മാരെന്നു പറഞ്ഞിരിക്കുന്നത്‌ മറിയയുടെയോ യോസേഫിന്റെയോ സഹോദരങ്ങളുടെ മക്കളെക്കുറിച്ചാണെന്ന്‌ ചിലർ അഭിപ്രായപ്പെടുന്നു.d യോസേഫിന്‌ മറ്റൊരു സ്‌ത്രീയിൽ ജനിച്ച മക്കളാണ്‌ അവരെന്ന്‌ കരുതുന്നവരുമുണ്ട്‌. എന്നാൽ മറിയയ്‌ക്ക്‌ യേശുവിനെക്കൂടാതെ മറ്റു മക്കൾ ഇല്ലായിരുന്നെങ്കിൽ, ആ നസറെത്തുകാർ അങ്ങനെ പറയുമായിരുന്നോ? മറിയ ആ കുട്ടികളെ ഗർഭംധരിച്ചിരിക്കുന്ന സമയത്ത്‌ അവരിൽ ചിലർ അവളെ കണ്ടിട്ടുപോലുമുണ്ടാകാം. മറിയയുടെ മക്കളിൽ ഒരാൾമാത്രമാണ്‌ യേശുവെന്ന്‌ ആ പട്ടണവാസികൾക്ക്‌ അറിയാമായിരുന്നു.
വിശ്വാസം: യേശു ദൈവത്തിന്റെ അവതാരമായിരുന്നു.
കെട്ടുകഥയോ യാഥാർഥ്യമോ? കെട്ടുകഥ.
മനുഷ്യാവതാരം ചെയ്‌ത ദൈവമാണ്‌ യേശു എന്ന വിശ്വാസമാണ്‌ ത്രിത്വോപദേശത്തിന്‌ ആധാരം. ഇത്‌ കാലങ്ങളായി നിലനിൽക്കുന്ന ഒരു വിശ്വാസമാണ്‌. എന്നാൽ യേശുവിന്റെ കാലത്ത്‌ ആരും അങ്ങനെ വിശ്വസിച്ചിരുന്നില്ല. എൻസൈക്ലോപീഡിയ ബ്രിട്ടാനിക്ക പറയുന്നു: “ത്രിത്വം എന്ന വാക്കോ ആശയമോ പുതിയനിയമത്തിൽ ഇല്ല. . . . പല വിവാദങ്ങളിലൂടെ കടന്നുപോയിട്ടുള്ള ഈ ഉപദേശം നൂറ്റാണ്ടുകൾകൊണ്ട്‌ രൂപപ്പെട്ടതാണ്‌.”
മനുഷ്യാവതാരമെടുത്ത ദൈവമാണ്‌ യേശു എന്നു പഠിപ്പിക്കുമ്പോൾ മതങ്ങൾ വാസ്‌തവത്തിൽ യേശുവിനെ നിന്ദിക്കുകയാണ്‌.e എങ്ങനെ? ഒരു ഉദാഹരണം കാണുക. കുറെ ജോലിക്കാർ തങ്ങളുടെ സൂപ്പർവൈസറോട്‌ ഒരു അഭ്യർഥന നടത്തുന്നു. എന്നാൽ തനിക്ക്‌ അതിനുള്ള അധികാരമില്ലെന്ന്‌ അദ്ദേഹം അവരോടു പറയുന്നു. അദ്ദേഹം പറഞ്ഞതു സത്യമാണെങ്കിൽ, തന്റെ പരിമിതികൾ മനസ്സിലാക്കി പ്രവർത്തിക്കുന്ന ഒരു നല്ല മനുഷ്യനാണ്‌ അദ്ദേഹം. പറഞ്ഞതു സത്യമല്ലെങ്കിലോ? ആ അഭ്യർഥന നിറവേറ്റിക്കൊടുക്കാൻ അധികാരമുണ്ടെന്നിരിക്കെ, തനിക്ക്‌ ആ അധികാരമില്ലെന്ന്‌ അദ്ദേഹം പറയുന്നത്‌ നുണയായിരിക്കും. അതെ, ആ സൂപ്പർവൈസർ വഞ്ചകനാണെന്നുവരും.
ഇനി, ഇതു ചിന്തിക്കുക: യേശുവിന്റെ രണ്ട്‌ അപ്പൊസ്‌തലന്മാർ, യേശുവിന്റെ രാജ്യത്തിൽ തങ്ങൾക്ക്‌ പ്രമുഖ സ്ഥാനം നൽകണമെന്ന അഭ്യർഥനയുമായി അവനെ സമീപിച്ചപ്പോൾ അവൻ എങ്ങനെയാണ്‌ പ്രതികരിച്ചത്‌? അവൻ അവരോട്‌ ഇപ്രകാരം പറഞ്ഞു: “എന്റെ വലത്തോ ഇടത്തോ ഇരുത്തുന്നതു ഞാനല്ല. ആ സ്ഥാനങ്ങൾ എന്റെ പിതാവ്‌ ആർക്കുവേണ്ടി ഒരുക്കിയിരിക്കുന്നുവോ അവർക്കുള്ളതാണ്‌.” (മത്തായി 20:23) യേശു ശരിക്കും ദൈവമായിരുന്നെങ്കിൽ അവൻ നുണപറയുകയായിരുന്നു എന്നു വരില്ലേ? വാസ്‌തവത്തിൽ, തന്റെ പിതാവിന്റെ അധികാരത്തിനു കീഴ്‌പെട്ടുകൊണ്ട്‌ യേശു എളിമ കാണിക്കുകയായിരുന്നു. അതെ, താൻ ദൈവത്തോടു സമനല്ലെന്ന്‌ അവൻ വ്യക്തമാക്കി.
വിശ്വാസം: യേശു ദൈവപുത്രനായിരുന്നു.
കെട്ടുകഥയോ യാഥാർഥ്യമോ? യാഥാർഥ്യം.
താൻ ആരാണെന്ന്‌ യേശുതന്നെ വ്യക്തമാക്കുകയുണ്ടായി. “ഞാൻ ദൈവത്തിന്റെ പുത്രൻ” എന്ന്‌ അവൻ പറഞ്ഞു. (യോഹന്നാൻ 10:36) ആർക്കുവേണമെങ്കിലും ദൈവത്തിന്റെ പുത്രനാണെന്ന്‌ അവകാശപ്പെടാനാകും എന്നതു ശരിതന്നെ. പക്ഷേ യേശുവിന്റെ അവകാശവാദം തെറ്റായിരുന്നെങ്കിൽ അതിന്റെ അർഥമെന്താണ്‌? അവൻ വലിയൊരു വഞ്ചകനാണെന്നല്ലേ?
യേശു ദൈവപുത്രനാണെന്ന്‌ ദൈവംതന്നെ സാക്ഷ്യപ്പെടുത്തിയിട്ടുണ്ട്‌. “ഇവൻ എന്റെ പ്രിയപുത്രൻ” എന്ന്‌ രണ്ടു സന്ദർഭങ്ങളിൽ ദൈവം പറഞ്ഞു. (മത്തായി 3:17; 17:5) ദൈവം നേരിട്ടു സംസാരിച്ച അപൂർവം സന്ദർഭങ്ങളേ തിരുവെഴുത്തുകൾ രേഖപ്പെടുത്തുന്നുള്ളൂ. അതിൽ രണ്ടെണ്ണവും യേശുവിനെ തന്റെ പുത്രനായി അംഗീകരിച്ചുകൊണ്ടുള്ള ദൈവത്തിന്റെ പ്രസ്‌താവനയാണ്‌! യേശു ദൈവപുത്രനാണ്‌ എന്നുള്ളതിന്‌ ഇതിനെക്കാൾ വലിയ എന്തു തെളിവാണ്‌ വേണ്ടത്‌?
യേശുവിനെക്കുറിച്ചുള്ള നിങ്ങളുടെ ഏതെങ്കിലും ധാരണ ഈ ലേഖനം തിരുത്തിക്കുറിക്കുകയുണ്ടായോ? എങ്കിൽ, സുവിശേഷങ്ങൾ കൂടുതലായി പരിശോധിക്കാൻ ഒരു ശ്രമം ചെയ്യുക. അത്‌ രസകരമായിരിക്കും എന്നു മാത്രമല്ല, പ്രയോജനകരവുമായിരിക്കും. തന്നെയും പിതാവിനെയും കുറിച്ചുള്ള സത്യം മനസ്സിലാക്കുന്നത്‌ “നിത്യജീവൻ” നേടിത്തരുമെന്ന്‌ യേശുതന്നെ പറഞ്ഞിട്ടുണ്ട്‌.—യോഹന്നാൻ 17:3.
[അടിക്കുറിപ്പുകൾ]
a യഹൂദ കലണ്ടറനുസരിച്ച്‌ പെസഹാദിനമായ നീസാൻ 14-നാണ്‌ യേശു മരിച്ചത്‌.—മത്തായി 26:2.
b യേശുവിനെ കാണാനെത്തിയവർ “നിക്ഷേപപാത്രങ്ങൾ തുറന്ന്‌ പൊന്നും കുന്തിരിക്കവും മീറയും അവനു കാഴ്‌ചവെച്ചു” എന്ന്‌ സുവിശേഷകാരനായ മത്തായി രേഖപ്പെടുത്തുന്നു. യേശുവിന്റെ പാവപ്പെട്ട കുടുംബത്തെ സംബന്ധിച്ചിടത്തോളം വിലപിടിപ്പുള്ള ഈ സമ്മാനങ്ങൾ തക്കസമയത്ത്‌ വന്നുചേർന്ന ഒരു സഹായമായിരുന്നു. കാരണം, താമസിയാതെതന്നെ അവർക്ക്‌ അഭയാർഥികളായി ഒരു അന്യദേശത്തേക്കു പോകേണ്ടിവരുമായിരുന്നു.—മത്തായി 2:11-15.
c മറിയ യേശുവിനെ ഗർഭംധരിച്ചത്‌ ദൈവത്തിന്റെ പരിശുദ്ധാത്മാവിനാലായിരുന്നു. എന്നാൽ മറിയയുടെ മറ്റു കുട്ടികൾ ഭർത്താവായ യോസേഫിൽനിന്ന്‌ അവൾക്ക്‌ ജനിച്ചവരാണ്‌.—മത്തായി 1:25.
d എ.ഡി. 383-ൽ പണ്ഡിതനായ ജെറോം ആണ്‌ ഇങ്ങനെയൊരു ആശയം കൊണ്ടുവന്നത്‌. മറിയ നിത്യകന്യകയാണെന്ന്‌ വിശ്വസിക്കുന്നവർ ഈ ആശയം ശരിയാണെന്നു കരുതുന്നവരാണ്‌. തന്റെ ഈ സിദ്ധാന്തം അബദ്ധമായിരുന്നോ എന്ന്‌ ജെറോംതന്നെ പിന്നീട്‌ സംശയം പ്രകടിപ്പിച്ചു. പക്ഷേ അപ്പോഴേക്കും പലരുടെയും മനസ്സിൽ ആ വിശ്വാസം വേരുറച്ചുപോയിരുന്നു. കത്തോലിക്കസഭയാകട്ടെ, അതിനെ ഒരു ഔദ്യോഗിക ഉപദേശമായി സ്വീകരിച്ചിരിക്കുകയാണ്‌.
e ത്രിത്വോപദേശത്തെക്കുറിച്ചുള്ള കൂടുതൽ വിവരങ്ങൾക്ക്‌ യഹോവയുടെ സാക്ഷികൾ പ്രസിദ്ധീകരിച്ച നിങ്ങൾ ത്രിത്വത്തിൽ വിശ്വസിക്കണമോ? എന്ന ലഘുപത്രിക കാണുക.
[14-ാം പേജിലെ ചതുരം/ചിത്രം]
ഈ വിവരങ്ങൾ നിങ്ങൾക്ക്‌ അറിയാമോ?
യേശു എങ്ങനെയുള്ള ഒരു വ്യക്തിയായിരുന്നു? നിർവികാരനായ, ആരോടും അടുക്കാത്ത, എല്ലാറ്റിനെയും ഒരുതരം വിരക്തിയോടെ കണ്ടിരുന്ന ഒരാളായിരുന്നോ? ആയിരുന്നെന്നു ചിലർ പറയുന്നു. യേശുവിനെക്കുറിച്ചുള്ള പിൻവരുന്ന വിവരങ്ങൾ അവരെ അതിശയിപ്പിച്ചേക്കാം:
• യേശു വിരുന്നുകളിൽ പങ്കെടുത്തു.—യോഹന്നാൻ 2:1-11.
• മറ്റുള്ളവരെ അനുമോദിച്ചു.—മർക്കോസ്‌ 14:6-9.
• കുട്ടികളോടൊത്ത്‌ സമയം ചെലവിട്ടു.—മർക്കോസ്‌ 10:13, 14.
• കണ്ണുനീർ വാർത്തു.—യോഹന്നാൻ 11:35.
• അനുകമ്പ കാണിച്ചു.—മർക്കോസ്‌ 1:40, 41.