“ചെറിയ ആട്ടിൻകൂ​ട്ടമേ, ഭയപ്പെ​ട​രു​തു”

“ചെറിയ ആട്ടിൻകൂ​ട്ടമേ, ഭയപ്പെ​ട​രു​തു; നിങ്ങളു​ടെ പിതാവു രാജ്യം നിങ്ങൾക്കു നല്‌കു​വാൻ പ്രസാ​ദി​ച്ചി​രി​ക്കു​ന്നു.”—ലൂക്കൊസ്‌ 12:32.

1. “ചെറിയ ആട്ടിൻകൂ​ട്ടമേ, ഭയപ്പെ​ട​രു​തു” എന്ന വാക്കുകൾ യേശു പറഞ്ഞത്‌ ഏത്‌ അടിസ്ഥാ​ന​ത്തി​ലാണ്‌?

‘ദൈവ​രാ​ജ്യം അന്വേ​ഷി​ച്ചു​കൊ​ണ്ടേ ഇരിപ്പിൻ.’ (ലൂക്കോസ്‌ 12:31, NW) യേശു തന്റെ ശിഷ്യൻമാ​രോട്‌ ഈ വാക്കുകൾ പറഞ്ഞ​പ്പോൾ അവന്റെ നാളു​മു​തൽ ഇന്നോളം ക്രിസ്‌ത്യാ​നി​ക​ളു​ടെ ചിന്തയെ സ്വാധീ​നി​ച്ചി​രി​ക്കുന്ന ഒരു തത്ത്വം അവൻ പ്രകട​മാ​ക്കി. ദൈവ​ത്തി​ന്റെ രാജ്യം നമ്മുടെ ജീവി​ത​ത്തിൽ പ്രഥമ സ്ഥാനം വഹിക്കണം. (മത്തായി 6:33) എന്നിരു​ന്നാ​ലും, ലൂക്കോ​സി​ന്റെ വൃത്താ​ന്ത​ത്തിൽ യേശു ക്രിസ്‌ത്യാ​നി​ക​ളു​ടെ ഒരു പ്രത്യേക കൂട്ട​ത്തോട്‌ പ്രിയ​ങ്ക​ര​വും ഉറപ്പു നൽകു​ന്ന​തു​മായ വാക്കുകൾ തുടർന്നു പറയു​ക​യു​ണ്ടാ​യി. “ചെറിയ ആട്ടിൻകൂ​ട്ടമേ ഭയപ്പെ​ട​രു​തു; നിങ്ങളു​ടെ പിതാവു രാജ്യം നിങ്ങൾക്കു നൽകു​വാൻ പ്രസാ​ദി​ച്ചി​രി​ക്കു​ന്നു” എന്ന്‌ അവൻ പറഞ്ഞു. (ലൂക്കൊസ്‌ 12:32) നല്ല ഇടയ​നെ​ന്ന​നി​ല​യിൽ യേശു തന്റെ ശിഷ്യൻമാർക്കു ഭാവി​യിൽ പ്രക്ഷുബ്ധ കാലങ്ങൾ വരാനി​രി​ക്കു​ന്നു​വെന്ന്‌ അറിഞ്ഞി​രു​ന്നു. എന്നാൽ ദൈവ​രാ​ജ്യം അന്വേ​ഷി​ച്ചു​കൊ​ണ്ടേ ഇരിക്കു​ന്ന​പക്ഷം അവർക്കു ഭയപ്പെ​ടാൻ കാരണ​മേ​തും ഇല്ലായി​രു​ന്നു. തൻമൂലം യേശു​വി​ന്റെ വാക്കുകൾ ഒരു പരുഷ​മായ കല്‌പ​ന​യ​ല്ലാ​യി​രു​ന്നു, മറിച്ച്‌ ആത്മവി​ശ്വാ​സ​വും ധൈര്യ​വും പകരാ​നു​ത​കിയ പ്രീതി​ജ​ന​ക​മായ വാഗ്‌ദാ​ന​മാ​യി​രു​ന്നു അത്‌.

2. ചെറിയ ആട്ടിൻകൂ​ട്ട​ത്തിൽ ഉൾപ്പെ​ടു​ന്നവർ ആർ, അവർ വിശേഷ പദവി​യു​ള്ള​വ​രാ​യി​രി​ക്കു​ന്നത്‌ എന്തു​കൊണ്ട്‌?

² യേശു തന്റെ ശിഷ്യൻമാ​രോ​ടു സംസാ​രി​ക്കു​ക​യാ​യി​രു​ന്നു. അവൻ അവരെ ഒരു ‘ചെറിയ ആട്ടിൻകൂട്ടം’ എന്നു വിളിച്ചു. കൂടാതെ, യഹോവ ‘രാജ്യം നല്‌കു​വാ’നിരു​ന്ന​വ​രോ​ടാണ്‌ അവൻ സംസാ​രി​ച്ചത്‌. പിൽക്കാ​ല​ങ്ങ​ളിൽ യേശു​വി​നെ കൈ​ക്കൊ​ള്ളുന്ന വലിയ പുരു​ഷാ​ര​വു​മാ​യി താരത​മ്യം ചെയ്യു​മ്പോൾ ഈ കൂട്ടം വാസ്‌ത​വ​ത്തിൽ എണ്ണത്തിൽ ചുരു​ക്ക​മാ​യി​രു​ന്നു. രാജകീ​യ​സേ​വ​ന​ത്തിൽ ഉപയോ​ഗി​ക്ക​പ്പെ​ടു​ക​യെന്ന വിശി​ഷ്ട​മായ ഒരു ഭാവി​ക്കു​വേണ്ടി തിര​ഞ്ഞെ​ടു​ക്ക​പ്പെ​ട്ടവർ എന്നനി​ല​യിൽ അവർ വില​പ്പെ​ട്ട​വ​രാ​യും കരുത​പ്പെ​ട്ടി​രു​ന്നു. ക്രിസ്‌തു​വി​ന്റെ മിശി​ഹൈ​ക​രാ​ജ്യ​ത്തോ​ടുള്ള ബന്ധത്തിൽ ഒരു സ്വർഗീയ അവകാശം പ്രാപി​ക്കുക എന്ന ലക്ഷ്യത്തി​ലാണ്‌ ചെറിയ ആട്ടിൻകൂ​ട്ടത്തെ വലിയ ഇടയനായ യഹോ​വ​യെന്ന അവരുടെ പിതാവ്‌ വിളി​ച്ചി​രി​ക്കു​ന്നത്‌.

ചെറിയ ആട്ടിൻകൂ​ട്ടം

3. ചെറിയ ആട്ടിൻകൂ​ട്ട​ത്തി​ന്റെ എന്തു മഹത്തായ ദർശന​മാ​ണു യോഹ​ന്നാൻ കണ്ടത്‌?

³ അപ്പോൾ, ഇത്ര വലിയ പദവി​യുള്ള ഈ ചെറിയ ആട്ടിൻകൂ​ട്ട​മാ​യി​ത്തീ​രു​ന്നത്‌ ആരാണ്‌? പരിശു​ദ്ധാ​ത്മാ​വി​നാൽ അഭി​ഷേകം ചെയ്യ​പ്പെ​ടുന്ന യേശു​ക്രി​സ്‌തു​വി​ന്റെ അനുഗാ​മി​കൾ. (പ്രവൃ​ത്തി​കൾ 2:1-4) കൈക​ളിൽ കിന്നര​വു​മാ​യി നില​കൊ​ള്ളുന്ന സ്വർഗീയ ഗായക​രാ​യി അവരെ കണ്ടശേഷം അപ്പോ​സ്‌ത​ല​നായ യോഹ​ന്നാൻ ഇങ്ങനെ എഴുതി: “ഞാൻ സീയോൻമ​ല​യിൽ കുഞ്ഞാ​ടും അവനോ​ടു​കൂ​ടെ നെററി​യിൽ അവന്റെ നാമവും പിതാ​വി​ന്റെ നാമവും എഴുതി​യി​രി​ക്കുന്ന നൂററി​നാ​ല്‌പ​ത്തി​നാ​ലാ​യി​രം പേരും നിൽക്കു​ന്നതു കണ്ടു. . . . അവർ കന്യക​മാ​രാ​ക​യാൽ സ്‌ത്രീ​ക​ളോ​ടു​കൂ​ടെ മാലി​ന്യ​പ്പെ​ടാ​ത്തവർ. കുഞ്ഞാടു പോകു​ന്നേ​ട​ത്തൊ​ക്കെ​യും അവർ അവനെ അനുഗ​മി​ക്കു​ന്നു; അവരെ ദൈവ​ത്തി​ന്നും കുഞ്ഞാ​ടി​ന്നും ആദ്യഫ​ല​മാ​യി മനുഷ്യ​രു​ടെ ഇടയിൽനി​ന്നു വീണ്ടെ​ടു​ത്തി​രി​ക്കു​ന്നു. ഭോഷ്‌കു അവരുടെ വായിൽ ഉണ്ടായി​രു​ന്നില്ല; അവർ കളങ്കമി​ല്ലാ​ത്തവർ തന്നേ.”—വെളി​പ്പാ​ടു 14:1, 4, 5.

4. ചെറിയ ആട്ടിൻകൂ​ട്ട​ത്തിന്‌ ഇന്നു ഭൂമി​യിൽ എന്തു പദവി​യാ​ണു​ള്ളത്‌?

⁴ അഭിഷി​ക്ത​രും ആത്മജനനം പ്രാപി​ച്ച​വ​രു​മായ ഇവർ പൊ.യു. (പൊതു​യു​ഗം) 33-ലെ പെന്തെ​ക്കോ​സ്‌തു മുതൽ ഭൂമി​യിൽ ക്രിസ്‌തു​വി​ന്റെ സ്ഥാനാ​പ​തി​ക​ളാ​യി സേവി​ച്ചി​രി​ക്കു​ന്നു. (2 കൊരി​ന്ത്യർ 5:20) ഇന്ന്‌, അവരുടെ ഒരു ശേഷി​പ്പു​മാ​ത്ര​മാ​ണു “വിശ്വ​സ്‌ത​നും വിവേ​കി​യു​മായ അടിമ”യെന്ന നിലയിൽ ഒത്തൊ​രു​മി​ച്ചു സേവി​ക്കു​ന്നത്‌. (മത്തായി 24:45, NW; വെളി​പ്പാ​ടു 12:17) വിശേ​ഷിച്ച്‌, 1935 എന്ന വർഷം​മു​തൽ ദശലക്ഷ​ങ്ങ​ളോ​ളം വരുന്ന ഭൗമിക പ്രത്യാ​ശ​യുള്ള ക്രിസ്‌ത്യാ​നി​ക​ളായ “വേറെ ആടുകൾ,” അവരോ​ടു ചേർന്നി​രി​ക്കു​ന്നു. സർവഭൂ​മി​യി​ലെ​യും സുവാർത്താ പ്രസം​ഗ​ത്തിന്‌ അവർ സഹായി​ക്കു​ന്നു.—യോഹ​ന്നാൻ 10:16.

5. ചെറിയ ആട്ടിൻകൂ​ട്ട​ത്തിൽപ്പെട്ട ശേഷി​ച്ച​വ​രു​ടെ മനോ​ഭാ​വ​മെന്ത്‌, അവർക്കു ഭയപ്പെ​ടേണ്ട ആവശ്യ​മി​ല്ലാ​ത്തത്‌ എന്തു​കൊണ്ട്‌?

⁵ ഈ ചെറിയ ആട്ടിൻകൂ​ട്ട​ത്തി​ലെ ഇപ്പോ​ഴും ഭൂമി​യി​ലുള്ള അംഗങ്ങ​ളു​ടെ മനോ​ഭാ​വം എന്താണ്‌? തങ്ങൾ ‘ഇളകാത്ത ഒരു രാജ്യം’ പ്രാപി​ക്കാ​നു​ള്ള​വ​രാ​ണെന്ന്‌ അറിഞ്ഞു​കൊണ്ട്‌ അവർ ദൈവ​ഭ​യ​ത്തോ​ടും ആദര​വോ​ടും​കൂ​ടെ വിശുദ്ധ സേവനം അർപ്പി​ക്കു​ന്നു. (എബ്രായർ 12:28) അതിരററ സന്തോ​ഷ​ത്തിൽ കലാശി​ക്കുന്ന അനർഘ പദവി​യാ​ണു തങ്ങളു​ടേ​തെന്ന്‌ അവർ മുഴു​ഹൃ​ദ​യ​ത്തോ​ടെ തിരി​ച്ച​റി​യു​ന്നു. രാജ്യ​ത്തെ​പ്പ​ററി സംസാ​രി​ച്ച​പ്പോൾ യേശു പരാമർശിച്ച “വില​യേ​റിയ ഒരു മുത്തു” അവർ കണ്ടെത്തി​യി​രി​ക്കു​ന്നു. (മത്തായി 13:46) മഹോ​പ​ദ്രവം സമീപി​ക്കവേ ദൈവ​ത്തി​ന്റെ അഭിഷി​ക്തർ നിർഭ​യ​രാ​യി നില​കൊ​ള്ളു​ക​യാണ്‌. ‘കർത്താ​വി​ന്റെ [“യഹോ​വ​യു​ടെ,” NW] വലുതും പ്രസി​ദ്ധ​വു​മായ നാളിൽ’ മനുഷ്യ​വർഗ​ലോ​ക​ത്തിൻമേൽ സംഭവി​ക്കാ​നി​രി​ക്കു​ന്നതു ഗണ്യമാ​ക്കാ​തെ അഭിഷിക്ത ശേഷി​പ്പിന്‌ ഭാവി​യെ​ക്കു​റിച്ച്‌ അനാ​രോ​ഗ്യ​ക​ര​മായ ഭയമില്ല. (പ്രവൃ​ത്തി​കൾ 2:19-21) അവർ എന്തിനു ഭയപ്പെ​ടണം?

എണ്ണം കുറയു​ന്നു

6, 7. (എ) ഇപ്പോ​ഴും ഭൂമി​യി​ലാ​യി​രി​ക്കുന്ന ചെറിയ ആട്ടിൻകൂ​ട്ട​ത്തിൽപ്പെ​ട്ട​വ​രു​ടെ എണ്ണം ഇന്നു കുറഞ്ഞി​രി​ക്കു​ന്ന​തി​നു കാരണ​മെന്ത്‌? (ബി) തനിക്കുള്ള പ്രത്യാ​ശയെ ഓരോ വ്യക്തി​യും എങ്ങനെ വീക്ഷി​ക്കണം?

⁶ സമീപ​വർഷ​ങ്ങ​ളിൽ ഇപ്പോ​ഴും ഭൂമി​യി​ലുള്ള ചെറിയ ആട്ടിൻകൂ​ട്ട​ത്തിൽപ്പെ​ട്ട​വ​രു​ടെ എണ്ണം ചെറു​താ​യി​രി​ക്കു​ന്നു. 1994-ലെ സ്‌മാരക റിപ്പോർട്ടിൽനിന്ന്‌ ഇതു പ്രകട​മാ​യി​രു​ന്നു. ലോക​വ്യാ​പ​ക​മാ​യുള്ള യഹോ​വ​യു​ടെ ജനത്തിന്റെ ഏതാണ്ട്‌ 75,000 സഭകളിൽ ശേഷി​പ്പി​ന്റെ അംഗങ്ങ​ളാ​ണെന്ന്‌ അവകാ​ശ​പ്പെട്ട 8,617 പേർ മാത്രമേ ചിഹ്നങ്ങ​ളിൽ പങ്കുപ​റ​റി​യു​ള്ളൂ. (മത്തായി 26:26-30) നേരേ​മ​റിച്ച്‌, മൊത്തം ഹാജർ 1,22,88,917 ആയിരു​ന്നു. അത്‌ പ്രതീ​ക്ഷി​ക്കേ​ണ്ട​താ​ണെന്ന്‌ അഭിഷിക്ത ക്രിസ്‌ത്യാ​നി​കൾ അറിയു​ന്നു. ചെറിയ ആട്ടിൻകൂ​ട്ട​ത്തി​ന്റെ സംഖ്യ 1,44,000-മായി യഹോവ പരിമി​ത​പ്പെ​ടു​ത്തി​യി​രി​ക്കു​ന്നു, അവൻ പൊ.യു. 33-ലെ പെന്ത​ക്കോ​സ്‌തു മുതൽ അവരെ കൂട്ടി​ച്ചേർത്തു​വ​രു​ന്നു. ന്യായ​യു​ക്ത​മാ​യും, ചെറിയ ആട്ടിൻകൂ​ട്ട​ത്തിൽപ്പെ​ട്ട​വ​രു​ടെ എണ്ണം പൂർത്തി​യാ​കു​മ്പോൾ അവരുടെ വിളി അവസാ​നി​ക്കു​മാ​യി​രു​ന്നു. പ്രത്യേ​കം അനുഗൃ​ഹീ​ത​രായ ഇവരുടെ കൂട്ടി​ച്ചേർക്കൽ 1935-ൽ അവസാ​നി​ച്ചു​വെ​ന്നാ​ണു തെളി​യി​ക്ക​പ്പെ​ടു​ന്നത്‌. എന്നുവ​രി​കി​ലും, വേറെ ആടുകൾ അന്ത്യകാ​ലത്ത്‌, “സകല ജാതി​ക​ളി​ലും ഗോ​ത്ര​ങ്ങ​ളി​ലും വംശങ്ങ​ളി​ലും ഭാഷക​ളി​ലും​നി​ന്നു ഉള്ളതായി ആർക്കും എണ്ണിക്കൂ​ടാത്ത ഒരു മഹാപു​രു​ഷാ​രം” ആയി വളരു​മെന്നു പ്രവചി​ക്ക​പ്പെ​ട്ടി​രു​ന്നു. 1935 മുതൽ യഹോവ നടത്തുന്ന പൊതു കൂട്ടി​ച്ചേർപ്പ്‌ മഹാപുരുഷാ​ര​മാ​യി​ത്തീ​രാ​നു​ള്ള​വ​രു​ടേ​താണ്‌. അവരുടെ പ്രത്യാശ ഒരു പറുദീ​സാ​ഭൂ​മി​യി​ലെ നിത്യ​ജീ​വ​നാണ്‌.—വെളി​പ്പാ​ടു 7:9; 14:15, 16; സങ്കീർത്തനം 37:29.

⁷ ഭൂമി​യിൽ അവശേ​ഷി​ച്ചി​രി​ക്കുന്ന ചെറിയ ആട്ടിൻകൂ​ട്ട​ത്തിൽപ്പെ​ട്ട​വ​രിൽ മിക്കവ​രും അവരുടെ 70-കളിലും 80-കളിലും 90-കളിലു​മാ​ണി​പ്പോൾ. ഏതാനും ചിലർ അവരുടെ 100-ാം വയസ്സ്‌ പിന്നി​ട്ടി​രി​ക്കു​ന്നു. തങ്ങളുടെ വയസ്സ്‌ എത്രതന്നെ ആണേലും ഒടുവിൽ ഒരു സ്വർഗീയ പുനരു​ത്ഥാ​ന​ത്തി​ലൂ​ടെ തങ്ങൾ യേശു​ക്രി​സ്‌തു​വി​നോ​ടു ചേരു​മെ​ന്നും അവന്റെ മഹത്ത്വ​മുള്ള രാജ്യ​ത്തിൽ അവനോ​ടു​കൂ​ടെ ഭരിക്കു​മെ​ന്നും അവരോ​രു​ത്ത​രും അറിയു​ന്നു. മഹാപു​രു​ഷാ​ര​ത്തിൽപ്പെ​ട്ടവർ രാജാ​വായ ക്രിസ്‌തു​വി​ന്റെ ഭൗമിക പ്രജക​ളാണ്‌. തന്നെ സ്‌നേ​ഹി​ക്കു​ന്ന​വർക്കാ​യി യഹോവ കരുതി​യി​രി​ക്കു​ന്ന​തിൽ ഓരോ​രു​ത്ത​രും സന്തോ​ഷി​ക്കട്ടെ. ഏതു പ്രത്യാ​ശ​യാ​ണു പുലർത്തേ​ണ്ട​തെന്നു നിശ്ചയി​ക്കു​ന്നതു നാമല്ല. അതു നിശ്ചയി​ക്കു​ന്നതു യഹോ​വ​യാണ്‌. അതു​കൊണ്ട്‌, ആ പ്രത്യാശ സ്വർഗീയ രാജ്യ​മാ​ണേ​ലും ശരി ആ രാജ്യ​ത്തിൻ കീഴിൽ ഒരു ഭൗമിക പറുദീ​സ​യാ​ണേ​ലും ശരി, ഇരു കൂട്ടർക്കും തങ്ങളുടെ സന്തുഷ്ട ഭാവി​പ്ര​ത്യാ​ശ​യിൽ പുളകി​ത​രാ​കാൻ കഴിയും.—യോഹ​ന്നാൻ 6:44, 65; എഫെസ്യർ 1:17, 18.

8. 1,44,000-ത്തിന്റെ മുദ്ര​യി​ടീൽ എത്ര​ത്തോ​ളം എത്തിയി​രി​ക്കു​ന്നു, അതു പൂർത്തി​യാ​കു​മ്പോൾ എന്തു സംഭവി​ക്കും?

⁸ 1,44,000 പേരട​ങ്ങുന്ന ചെറിയ ആട്ടിൻകൂ​ട്ടം “ദൈവ​ത്തി​ന്റെ ഇസ്രാ​യേൽ” ആണ്‌, അതു ദൈ​വോ​ദ്ദേ​ശ്യ​ങ്ങ​ളിൽ സ്വാഭാ​വിക ഇസ്രാ​യേ​ല്യ​രു​ടെ സ്ഥാനത്തു വന്നിരി​ക്കു​ക​യാണ്‌. (ഗലാത്യർ 6:16) അതു​കൊണ്ട്‌, ശേഷിപ്പ്‌ ഇപ്പോ​ഴും ഭൂമി​യിൽ ദൈവ​ത്തി​ന്റെ ആത്മീയ ഇസ്രാ​യേ​ലിൽ ശേഷി​ച്ചി​രി​ക്കു​ന്ന​വ​രാണ്‌. ശേഷി​ച്ചി​രി​ക്കുന്ന അത്തരക്കാർ യഹോ​വ​യു​ടെ അന്തിമ അംഗീ​കാ​ര​ത്തി​നു​വേണ്ടി മുദ്ര​യി​ട​പ്പെ​ട്ടു​കൊ​ണ്ടി​രി​ക്കുക​യാണ്‌. അപ്പോ​സ്‌ത​ല​നായ യോഹ​ന്നാൻ ഒരു ദർശന​ത്തിൽ ഇങ്ങനെ സംഭവി​ക്കു​ന്നതു കണ്ടു: “മറെറാ​രു ദൂതൻ ജീവനുള്ള ദൈവ​ത്തി​ന്റെ മുദ്ര​യു​മാ​യി കിഴക്കു​നി​ന്നു കയറു​ന്ന​തും കണ്ടു. അവൻ ഭൂമി​ക്കും സമു​ദ്ര​ത്തി​ന്നും വൃക്ഷങ്ങൾക്കും കേടു​വ​രു​ത്തു​വാൻ അധികാ​രം ലഭിച്ച നാലു ദൂതൻമാ​രോ​ടു: നമ്മുടെ ദൈവ​ത്തി​ന്റെ ദാസൻമാ​രു​ടെ നെററി​യിൽ ഞങ്ങൾ മുദ്ര​യി​ട്ടു കഴിയു​വോ​ളം ഭൂമി​ക്കും സമു​ദ്ര​ത്തി​ന്നും വൃക്ഷങ്ങൾക്കും കേടു​വ​രു​ത്ത​രു​തു എന്നു ഉറക്കെ വിളി​ച്ചു​പ​റഞ്ഞു. മുദ്ര​യേ​റ​റ​വ​രു​ടെ എണ്ണവും ഞാൻ കേട്ടു; [ആത്മീയ] യിസ്രാ​യേൽ മക്കളുടെ സകല ഗോ​ത്ര​ത്തി​ലും നിന്നും മുദ്ര​യേ​റ​റവർ നൂററി​നാ​ല്‌പ​ത്തി​നാ​ലാ​യി​രം പേർ” എന്ന്‌ അവൻ റിപ്പോർട്ടു ചെയ്യുന്നു. (വെളി​പ്പാ​ടു 7:2-4) ആത്മീയ ഇസ്രാ​യേ​ലി​ന്റെ ഈ മുദ്ര​യി​ടീൽവേല ഇപ്പോൾ വളരെ പുരോ​ഗ​മി​ച്ചി​രി​ക്കു​ക​യാണ്‌, ആവേശ​ജ​ന​ക​മായ സംഭവങ്ങൾ പെട്ടെന്നു സംഭവി​ക്കു​മെ​ന്നും അതു സൂചി​പ്പി​ക്കു​ന്നു. നാലു ദൂതൻമാർ ഭൂമി​മേൽ നാശത്തി​ന്റെ നാലു കാററു​കൾ അഴിച്ചു​വി​ടുന്ന ‘മഹോ​പ​ദ്രവം’ വളരെ അടു​ത്തെ​ത്തി​യി​രി​ക്കും.—വെളി​പാട്‌ 7:14, NW.

9. മഹാപു​രു​ഷാ​ര​ത്തി​ന്റെ വർധി​ച്ചു​വ​രുന്ന സംഖ്യയെ ചെറിയ ആട്ടിൻകൂ​ട്ടം എങ്ങനെ​യാ​ണു വീക്ഷി​ക്കു​ന്നത്‌?

⁹ ഇപ്പോൾത്തന്നെ കൂട്ടി​ച്ചേർക്ക​പ്പെ​ട്ടി​രി​ക്കുന്ന മഹാപു​രു​ഷാ​ര​ത്തിൽപ്പെ​ട്ട​വ​രു​ടെ എണ്ണം ദശലക്ഷങ്ങൾ വരും. ഇതു ശേഷി​പ്പി​ന്റെ ഹൃദയത്തെ എത്ര ഊഷ്‌മ​ള​മാ​ക്കു​ന്നു! ഇപ്പോ​ഴും ഭൂമി​യി​ലുള്ള, ചെറിയ ആട്ടിൻകൂ​ട്ട​ത്തിൽപ്പെ​ട്ടവർ തുടർച്ച​യാ​യി എണ്ണത്തിൽ കുറഞ്ഞു​വ​രു​ക​യാ​ണെ​ങ്കി​ലും ദൈവ​ത്തി​ന്റെ വികസി​ച്ചു​കൊ​ണ്ടി​രി​ക്കുന്ന ഭൗമി​ക​സ്ഥാ​പ​ന​ത്തോ​ടുള്ള ബന്ധത്തിൽ ഉത്തരവാ​ദി​ത്വ​ങ്ങൾ കയ്യേൽക്കാൻ മഹാപു​രു​ഷാ​ര​ത്തിൽപ്പെട്ട യോഗ്യ​ത​യുള്ള പുരു​ഷൻമാ​രെ അവർ പരിശീ​ലി​പ്പി​ക്കു​ക​യും ഒരുക്കു​ക​യും ചെയ്‌തി​ട്ടുണ്ട്‌. (യെശയ്യാ​വു 61:5) യേശു സൂചി​പ്പി​ച്ച​തു​പോ​ലെ മഹോ​പ​ദ്ര​വത്തെ അതിജീ​വി​ക്കു​ന്നവർ ഉണ്ടായി​രി​ക്കും.—മത്തായി 24:22.

“ഭയപ്പെ​ട​രു​തു”

10. (എ) ദൈവ​ജ​ന​ത്തിൻമേൽ എന്താ​ക്ര​മ​ണ​മാ​ണു സംഭവി​ക്കാ​നി​രി​ക്കു​ന്നത്‌, അത്‌ എന്തി​ലേക്കു നയിക്കും? (ബി) നാം ഓരോ​രു​ത്ത​രെ​യും​കു​റിച്ച്‌ എന്തു ചോദ്യ​ങ്ങ​ളാണ്‌ ഉന്നയി​ച്ചി​രി​ക്കു​ന്നത്‌?

¹⁰ സാത്താ​നും അവന്റെ ഭൂതങ്ങ​ളും ഭൂമി​യു​ടെ പരിസ​ര​ങ്ങ​ളി​ലേക്കു താഴ്‌ത്ത​പ്പെ​ട്ടി​രി​ക്കു​ക​യാണ്‌. അവനും അവന്റെ സൈന്യ​ങ്ങ​ളും യഹോ​വ​യു​ടെ ജനത്തിൻമേ​ലുള്ള അവരുടെ സമഗ്ര​മായ ആക്രമണം നടത്താൻ തന്ത്രപ​ര​മാ​യി ആസൂ​ത്രണം ചെയ്യു​ക​യാണ്‌. ബൈബി​ളിൽ മുൻകൂ​ട്ടി​പ്പ​റ​ഞ്ഞി​രി​ക്കുന്ന ഈ ആക്രമ​ണത്തെ വർണി​ക്കു​ന്നത്‌ മാഗോ​ഗി​ലെ ഗോഗി​ന്റെ ആക്രമ​ണ​മാ​യി​ട്ടാണ്‌. ആരു​ടെ​മേ​ലാ​ണു പിശാച്‌ തന്റെ ആക്രമണം കേന്ദ്രീ​ക​രി​ക്കു​ന്നത്‌? അതു സമാധാ​ന​പൂർവം “ഭൂമി​യു​ടെ മദ്ധ്യേ വസി”ക്കുന്ന ദൈവ​ത്തി​ന്റെ ആത്മീയ ഇസ്രാ​യേ​ലാ​കുന്ന ചെറിയ ആട്ടിൻകൂ​ട്ട​ത്തി​ലെ അംഗങ്ങ​ളു​ടെ മേലല്ലേ? (യെഹെ​സ്‌കേൽ 38:1-12) അതേ, എന്നാൽ സാത്താന്റെ ആക്രമണം ഹേതു​വാ​യി യഹോ​വ​യു​ടെ പക്ഷത്തു​നി​ന്നുള്ള ഒരു നാടകീയ പ്രതി​ക​രണം നടപ്പിൽവ​രു​ത്തു​ന്നതു വിശ്വസ്‌ത അഭിഷിക്ത വർഗത്തി​ന്റെ ശേഷി​പ്പും ഒപ്പം അവരുടെ വിശ്വസ്‌ത കൂട്ടാ​ളി​ക​ളും നേരിൽ കാണും. അവൻ തന്റെ ജനത്തിന്റെ രക്ഷക്കായി ഇടപെ​ടും. ഇത്‌ “യഹോ​വ​യു​ടെ വലുതും ഭയങ്കര​വു​മാ​യുള്ള ദിവസ”ത്തിന്റെ പൊട്ടി​പ്പു​റ​പ്പെ​ട​ലി​നു വഴിമ​രു​ന്നി​ടും. (യോവേൽ 2:31) ഇന്ന്‌, വിശ്വ​സ്‌ത​നും വിവേ​കി​യു​മായ അടിമ യഹോ​വ​യു​ടെ കൈക​ട​ത്ത​ലി​നെ​ക്കു​റി​ച്ചു മുന്നറി​യി​പ്പു നൽകിക്കൊണ്ട്‌ മർമ​പ്ര​ധാ​ന​മായ, ജീവര​ക്ഷാ​ക​ര​മായ സേവനം അനുഷ്‌ഠി​ക്കു​ക​യാണ്‌. (മലാഖി 4:5; 1 തിമൊ​ഥെ​യൊസ്‌ 4:16) യഹോ​വ​യു​ടെ രാജ്യ​ത്തി​ന്റെ സുവാർത്ത സംബന്ധിച്ച പ്രസം​ഗ​വേ​ല​യിൽ പങ്കെടു​ത്തു​കൊ​ണ്ടു നിങ്ങൾ സജീവ​മാ​യി ആ സേവനത്തെ പിന്താ​ങ്ങു​ന്നു​ണ്ടോ? നിർഭയ രാജ്യ​പ്ര​ഘോ​ഷ​ക​രെന്ന നിലയിൽ അതു ചെയ്യു​ന്ന​തിൽ നിങ്ങൾ സധൈ​ര്യം തുടരു​മോ?

11. ധൈര്യ​പൂർവ​ക​മായ മനോ​ഭാ​വം ഇന്ന്‌ ജീവത്‌പ്ര​ധാ​ന​മാ​യി​രി​ക്കു​ന്നത്‌ എന്തു​കൊണ്ട്‌?

¹¹ ഇപ്പോ​ഴത്തെ ലോകാ​വ​സ്ഥ​യു​ടെ വീക്ഷണ​ത്തിൽ, യേശു തങ്ങളെ അഭിസം​ബോ​ധന ചെയ്‌തു​കൊ​ണ്ടു “ചെറിയ ആട്ടിൻകൂ​ട്ടമേ, ഭയപ്പെ​ട​രു​തു” എന്നു പറഞ്ഞ വാക്കുകൾ അനുസ​രി​ക്കു​ന്നത്‌ ചെറിയ ആട്ടിൻകൂ​ട്ടത്തെ സംബന്ധി​ച്ചി​ട​ത്തോ​ളം എത്ര കാലോ​ചി​ത​മാണ്‌! യഹോ​വ​യു​ടെ ഉദ്ദേശ്യ​പ്ര​കാ​രം ഇപ്പോൾ സംഭവി​ച്ചു​കൊ​ണ്ടി​രി​ക്കുന്ന എല്ലാറ​റി​ന്റെ​യും വീക്ഷണ​ത്തിൽ അങ്ങനെ​യുള്ള ഒരു മനോ​ഭാ​വം അത്യന്താ​പേ​ക്ഷി​ത​മാണ്‌. വ്യക്തി​പ​ര​മാ​യി, ചെറിയ ആട്ടിൻകൂ​ട്ട​ത്തിൽപ്പെട്ട ഓരോ​രു​ത്ത​രും അവസാ​ന​ത്തോ​ളം സഹിച്ചു​നിൽക്കേ​ണ്ട​തി​ന്റെ ആവശ്യകത തിരി​ച്ച​റി​യു​ന്നുണ്ട്‌. (ലൂക്കൊസ്‌ 21:19) ചെറിയ ആട്ടിൻകൂ​ട്ട​ത്തി​ന്റെ കർത്താ​വും യജമാ​ന​നു​മായ യേശു​ക്രി​സ്‌തു തന്റെ ഭൗമിക ജീവി​ത​ത്തി​ന്റെ പൂർത്തീ​ക​ര​ണം​വരെ സഹിച്ചു​നിൽക്കു​ക​യും വിശ്വ​സ്‌തത തെളി​യി​ക്കു​ക​യും ചെയ്‌ത​തു​പോ​ലെ, ശേഷി​പ്പിൽപ്പെട്ട ഓരോ​രു​ത്ത​രും സഹിച്ചു​നിൽക്കു​ക​യും വിശ്വ​സ്‌തത തെളി​യി​ക്കു​ക​യും വേണം.—എബ്രായർ 12:1, 2.

12. യേശു​വി​നെ​പ്പോ​ലെ പൗലോസ്‌ ഭയപ്പെ​ട​രുത്‌ എന്ന്‌ അഭിഷിക്ത ക്രിസ്‌ത്യാ​നി​കളെ എങ്ങനെ​യാണ്‌ ഉദ്‌ബോ​ധി​പ്പി​ക്കു​ന്നത്‌?

¹² അഭിഷി​ക്ത​രായ എല്ലാവർക്കും അപ്പോ​സ്‌ത​ല​നായ പൗലോ​സി​ന്റെ അതേ വീക്ഷണം ഉണ്ടായി​രി​ക്കണം. പുനരു​ത്ഥാ​ന​ത്തി​ന്റെ ഒരു അഭിഷിക്ത പരസ്യ​ഘോ​ഷ​ക​നെന്ന നിലയിൽ അപ്പോ​സ്‌ത​ല​നായ പൗലോ​സി​ന്റെ വാക്കുകൾ, ഭയപ്പെ​ടാ​തി​രി​ക്കാ​നുള്ള യേശു​ക്രി​സ്‌തു​വി​ന്റെ ഉദ്‌ബോ​ധ​ന​വു​മാ​യി എത്ര ചേർച്ച​യി​ലാ​ണെന്നു ശ്രദ്ധിക്കൂ. “ദാവീ​ദി​ന്റെ സന്തതി​യാ​യി ജനിച്ചു മരിച്ചി​ട്ടു ഉയർത്തെ​ഴു​ന്നേ​റ​റി​രി​ക്കുന്ന യേശു​ക്രി​സ്‌തു​വി​നെ ഓർത്തു​കൊൾക. അതു ആകുന്നു എന്റെ സുവി​ശേഷം. അതു അറിയി​ക്കു​ന്ന​തിൽ ഞാൻ ദുഷ്‌പ്ര​വൃ​ത്തി​ക്കാ​രൻ എന്നപോ​ലെ, ചങ്ങല ധരിച്ചു കഷ്ടം സഹിക്കു​ന്നു; ദൈവ​വ​ച​ന​ത്തി​ന്നോ ബന്ധനം ഇല്ല. അതു​കൊ​ണ്ടു ക്രിസ്‌തു​യേ​ശു​വി​ലുള്ള രക്ഷ നിത്യ​തേ​ജ​സ്സോ​ടു​കൂ​ടെ വൃതൻമാർക്കു കിട്ടേ​ണ്ട​തി​ന്നു ഞാൻ അവർക്കാ​യി സകലവും സഹിക്കു​ന്നു. നാം അവനോ​ടു​കൂ​ടെ മരിച്ചു എങ്കിൽ കൂടെ ജീവി​ക്കും; സഹിക്കു​ന്നു എങ്കിൽ കൂടെ വാഴും; നാം തള്ളിപ്പ​റ​യും എങ്കിൽ അവൻ നമ്മെയും തള്ളിപ്പ​റ​യും. നാം അവിശ്വ​സ്‌ത​രാ​യി​ത്തീർന്നാ​ലും അവൻ വിശ്വ​സ്‌ത​നാ​യി പാർക്കു​ന്നു; തന്റെ സ്വഭാവം ത്യജി​പ്പാൻ അവന്നു കഴിക​യി​ല്ല​ല്ലോ.”—2 തിമൊ​ഥെ​യൊസ്‌ 2:8-13.

13. ചെറിയ ആട്ടിൻകൂ​ട്ട​ത്തി​ലെ അംഗങ്ങൾക്കുള്ള ഉറച്ച ബോധ്യ​ങ്ങൾ ഏവ, ഇത്‌ എന്തു​ചെ​യ്യാൻ അവരെ പ്രേരി​പ്പി​ക്കു​ന്നു?

¹³ അപ്പോ​സ്‌ത​ല​നായ പൗലോ​സി​നെ​പ്പോ​ലെ, അഭിഷി​ക്ത​രായ ചെറിയ ആട്ടിൻകൂ​ട്ട​ത്തിൽ ശേഷി​ച്ചി​രി​ക്കുന്ന അംഗങ്ങൾ ദൈവ​വ​ച​ന​ത്തിൽ വിവരി​ച്ചി​രി​ക്കുന്ന ശക്തമായ സന്ദേശം പ്രഘോ​ഷി​ക്കവേ കഷ്ടപ്പാടു സഹിക്കാൻ സന്നദ്ധരാണ്‌. രക്ഷയുടെ ദിവ്യ​വാ​ഗ്‌ദ​ത്ത​ങ്ങ​ളും തങ്ങൾ മരണ​ത്തോ​ളം വിശ്വ​സ്‌ത​രെന്നു തെളി​യി​ക്കു​ന്നു​വെ​ങ്കിൽ “ജീവ കിരീടം” നൽക​പ്പെ​ടു​മെ​ന്നുള്ള വാഗ്‌ദ​ത്ത​വും മുറു​കെ​പ്പി​ടി​ക്കു​ന്ന​തു​മൂ​ലം അവരുടെ വിശ്വാ​സം ആഴത്തിൽ വേരൂ​ന്നി​യ​താണ്‌. (വെളി​പ്പാ​ടു 2:10) അവർ തൽക്ഷണ​മുള്ള ഒരു പുനരു​ത്ഥാ​ന​വും മാററ​വും അനുഭ​വി​ക്കുക വഴി രാജാ​ക്കൻമാ​രെന്ന നിലയിൽ ക്രിസ്‌തു​വി​നോ​ടു​കൂ​ടെ വാഴു​ന്ന​തിന്‌ അവനോ​ടുള്ള ഐക്യ​ത്തിൽ വരുത്ത​പ്പെ​ടും. ലോക​ജേ​താ​ക്ക​ളെന്ന നിലയി​ലുള്ള അവരുടെ നിർമ​ല​താ​പാ​ലന ഗതിക്ക്‌ എന്തോരു വിജയം!—1 യോഹ​ന്നാൻ 5:3, 4.

ഒരു അനുപമ പ്രത്യാശ

14, 15. ചെറിയ ആട്ടിൻകൂ​ട്ട​ത്തി​ന്റെ പുനരു​ത്ഥാന പ്രത്യാശ അനുപ​മ​മാ​യി​രി​ക്കു​ന്നത്‌ എങ്ങനെ?

¹⁴ ചെറിയ ആട്ടിൻകൂ​ട്ടം വെച്ചു​പു​ലർത്തുന്ന പുനരു​ത്ഥാ​ന​പ്ര​ത്യാ​ശ അനുപ​മ​മാണ്‌. ഏതു വിധങ്ങ​ളിൽ? ഒരു സംഗതി, അതു “നീതി​മാൻമാ​രു​ടെ​യും നീതി​കെ​ട്ട​വ​രു​ടെ​യും” പൊതു പുനരു​ത്ഥാ​ന​ത്തി​നു മുമ്പ്‌ നടക്കുന്നു എന്നുള്ള​താണ്‌. (പ്രവൃ​ത്തി​കൾ 24:15) യഥാർഥ​ത്തിൽ, അഭിഷി​ക്ത​രു​ടെ പുനരു​ത്ഥാ​ന​ത്തി​നു പ്രാധാ​ന്യ​മ​നു​സ​രി​ച്ചുള്ള ഒരു നിശ്ചിത ക്രമമുണ്ട്‌, അതാണ്‌ 1 കൊരി​ന്ത്യർ 15:20, 23-ലെ ഈ വാക്കുകൾ വ്യക്തമാ​യി തെളി​യി​ക്കു​ന്നത്‌: “ക്രിസ്‌തു നിദ്ര​കൊ​ണ്ട​വ​രിൽ ആദ്യഫ​ല​മാ​യി മരിച്ച​വ​രു​ടെ ഇടയിൽനി​ന്നു ഉയിർത്തി​രി​ക്കു​ന്നു. . . . ഓരോ​രു​ത്ത​നും താന്താന്റെ നിരയി​ല​ത്രേ; ആദ്യഫലം ക്രിസ്‌തു; പിന്നെ ക്രിസ്‌തു​വി​ന്നു​ള്ളവർ അവന്റെ വരവിങ്കൽ.” യേശു പ്രകട​മാ​ക്കിയ തരം സഹിഷ്‌ണു​ത​യും വിശ്വാ​സ​വും ഉള്ളതി​നാൽ, വിശേ​ഷാൽ യഥാർഥ കർത്താവു തന്റെ ആലയത്തി​ലേക്ക്‌ 1918-ൽ വന്നതു മുതൽ, തങ്ങളുടെ ഭൗമി​ക​ഗതി അവസാ​നി​ക്കു​മ്പോൾ തങ്ങൾക്കു​വേണ്ടി എന്തു കരുതി​യി​രി​ക്കു​ന്നു​വെന്നു ചെറിയ ആട്ടിൻകൂ​ട്ട​ത്തിന്‌ അറിയാം.—മലാഖി 3:1.

¹⁵ ഈ പുനരു​ത്ഥാ​നത്തെ അനുപ​മ​മെന്നു വീക്ഷി​ക്കാൻ പൗലോസ്‌ നമുക്കു കൂടു​ത​ലായ ഒരു കാരണം നൽകുന്നു. 1 കൊരി​ന്ത്യർ 15:51-53-ൽ രേഖ​പ്പെ​ടു​ത്തി​യി​രി​ക്കുന്ന പ്രകാരം അവൻ ഇങ്ങനെ എഴുതി: “ഞാൻ ഒരു മർമ്മം നിങ്ങ​ളോ​ടു പറയാം: നാം എല്ലാവ​രും നിദ്ര​കൊ​ള്ളു​ക​യില്ല; എന്നാൽ അന്ത്യകാ​ഹ​ള​നാ​ദ​ത്തി​ങ്കൽ പെട്ടെന്നു കണ്ണി​മെ​ക്കു​ന്നി​ട​യിൽ നാം എല്ലാവ​രും രൂപാ​ന്ത​ര​പ്പെ​ടും. . . . ഈ ദ്രവത്വ​മു​ള്ളതു അദ്രവ​ത്വ​ത്തെ​യും ഈ മർത്യ​മാ​യതു അമർത്യ​ത്വ​ത്തെ​യും ധരി”ക്കണം. ഈ വാക്കുകൾ, ക്രിസ്‌തു​വി​ന്റെ സാന്നി​ധ്യ​കാ​ലത്തു മരിക്കുന്ന ചെറിയ ആട്ടിൻകൂ​ട്ട​ത്തിൽപ്പെ​ട്ട​വർക്കു ബാധക​മാണ്‌. മരണത്തിൽ ഒരു നീണ്ട കാലഘ​ട്ട​ത്തേക്ക്‌ ഉറങ്ങേ​ണ്ട​തി​ല്ലാ​തെ അവർ അമർത്ത്യത ധരിക്കു​ന്നു, “പെട്ടെന്നു, കണ്ണി​മെ​ക്കു​ന്നി​ട​യിൽ.”

16, 17. പുനരു​ത്ഥാ​നം സംബന്ധിച്ച തങ്ങളുടെ പ്രത്യാ​ശ​യിൽ അഭിഷിക്ത ക്രിസ്‌ത്യാ​നി​കൾ എങ്ങനെ​യാ​ണു പ്രത്യേ​കി​ച്ചും അനുഗൃ​ഹീ​ത​രാ​യി​രി​ക്കു​ന്നത്‌?

¹⁶ ഈ ഗ്രാഹ്യ​ത്തി​ന്റെ വെളി​ച്ച​ത്തിൽ, നമുക്കു വെളി​പ്പാ​ടു 14:12, 13-ൽ കണ്ടെത്തുന്ന അപ്പോ​സ്‌ത​ല​നായ യോഹ​ന്നാ​ന്റെ വാക്കു​ക​ളു​ടെ അർഥം മനസ്സി​ലാ​ക്കാൻ കഴിയും. “ദൈവ​ക​ല്‌പ​ന​യും യേശു​വി​ങ്ക​ലുള്ള വിശ്വാ​സ​വും കാത്തു​കൊ​ള്ളുന്ന വിശു​ദ്ധൻമാ​രു​ടെ സഹിഷ്‌ണു​ത​കൊ​ണ്ടു ഇവിടെ ആവശ്യം. ഞാൻ സ്വർഗ്ഗ​ത്തിൽനി​ന്നു ഒരു ശബ്ദം കേട്ടു; അതു പറഞ്ഞതു: എഴുതുക: ഇന്നുമു​തൽ കർത്താ​വിൽ മരിക്കുന്ന മൃതൻമാർ ഭാഗ്യ​വാൻമാർ; അതേ, അവർ തങ്ങളുടെ പ്രയത്‌ന​ങ്ങ​ളിൽനി​ന്നു വിശ്ര​മി​ക്കേ​ണ്ട​താ​കു​ന്നു; അവരുടെ പ്രവൃത്തി അവരെ പിന്തു​ട​രു​ന്നു എന്നു ആത്മാവു പറയുന്നു” എന്ന്‌ അവൻ എഴുതി.

¹⁷ ചെറിയ ആട്ടിൻകൂ​ട്ട​ത്തി​ന്റെ ശേഷി​പ്പിന്‌ എന്തൊ​ര​നു​പ​മ​മായ പ്രതി​ഫ​ല​മാ​ണു കരുതി​വെ​ച്ചി​രി​ക്കു​ന്നത്‌! അവരുടെ പുനരു​ത്ഥാ​നം പെട്ടെന്ന്‌, അവർ മരണത്തിൽ നിദ്ര​കൊ​ള്ളുന്ന ഉടൻതന്നെ, സംഭവി​ക്കു​ന്നു. ആത്മമണ്ഡ​ല​ത്തിൽ തങ്ങളുടെ നിയമനം ഏറെറ​ടു​ക്കു​മ്പോൾ എത്ര അസാധാ​ര​ണ​മായ മാററ​മാണ്‌ അവർ അനുഭ​വി​ക്കുക! ഇപ്പോൾത്തന്നെ ചെറിയ ആട്ടിൻകൂ​ട്ട​ത്തി​ന്റെ അത്തരം മഹത്ത്വീ​ക​രണം നടന്നു​കൊ​ണ്ടി​രി​ക്കു​ക​യും മുഖ്യ ബൈബിൾ പ്രവച​ന​ങ്ങ​ളു​ടെ പൂർത്തീ​ക​രണം സമീപി​ച്ചി​രി​ക്കു​ക​യും ചെയ്‌തി​രി​ക്കെ, ചെറിയ ആട്ടിൻകൂ​ട്ട​ത്തിൽ ശേഷി​ച്ചി​രി​ക്കുന്ന അവസാ​നത്തെ അംഗങ്ങൾക്കു യഥാർഥ​ത്തിൽ ‘ഭയപ്പെ​ടേണ്ട’ ആവശ്യ​മില്ല. അവരുടെ നിർഭ​യ​ത്വം മഹാപു​രു​ഷാ​ര​ത്തിൽപ്പെ​ട്ട​വരെ പ്രോ​ത്സാ​ഹി​പ്പി​ക്കാൻ ഉതകുന്നു. ഭൂമി​യിൽ അറിയ​പ്പെ​ട്ടി​ട്ടു​ള്ള​തി​ലേ​ക്കും ഏററവും വലിയ കുഴപ്പ​ത്തി​ന്റെ കാലത്തു വിടുതൽ പ്രതീ​ക്ഷി​ക്കു​ന്ന​തു​കൊണ്ട്‌ അവരും നിർഭ​യ​ത്വ​ത്തി​ന്റെ ഒരു മനോ​ഭാ​വം നട്ടുവ​ളർത്തണം.

18, 19. (എ) നാം ജീവി​ക്കുന്ന സമയം അടിയ​ന്തി​ര​മാ​യി​രി​ക്കു​ന്നത്‌ എന്തു​കൊണ്ട്‌? (ബി) അഭിഷി​ക്ത​രും വേറെ ആടുക​ളും ഭയപ്പെ​ടാ​തി​രി​ക്കേ​ണ്ടത്‌ എന്തു​കൊണ്ട്‌?

¹⁸ ചെറിയ ആട്ടിൻകൂ​ട്ട​ത്തി​ന്റെ പ്രവർത്ത​നങ്ങൾ വിശദ​മാ​യി വർണി​ക്കു​ന്നത്‌ സത്യ​ദൈ​വത്തെ ഭയപ്പെ​ട്ടു​കൊ​ണ്ടി​രി​ക്കാൻ അവരെ​യും മഹാപു​രു​ഷാ​ര​ത്തെ​യും പ്രാപ്‌ത​രാ​ക്കു​ന്നു. അവനാ​ലുള്ള ന്യായ​വി​ധി​യു​ടെ നാഴിക വന്നെത്തി​യി​രി​ക്കു​ന്നു, ഇപ്പോൾ അവശേ​ഷി​ച്ചി​രി​ക്കുന്ന അനുകൂല കാലം വില​പ്പെ​ട്ട​താണ്‌. മററു​ള്ള​വർക്കു പ്രവർത്തി​ക്കു​ന്ന​തി​നുള്ള സമയം തീർച്ച​യാ​യും പരിമി​ത​മാണ്‌. എന്നിരു​ന്നാ​ലും, നമ്മേ സംബന്ധി​ച്ച​ട​ത്തോ​ളം, ദൈ​വോ​ദ്ദേ​ശ്യം പരാജ​യ​പ്പെ​ടു​മെന്നു നാം ഭയപ്പെ​ടു​ന്നില്ല. അതു തീർച്ച​യാ​യും വിജയി​ക്കും!

¹⁹ ഇപ്പോൾത്തന്നെ, ഉച്ചത്തി​ലുള്ള സ്വർഗീ​യ​ശ​ബ്ദങ്ങൾ, “ലോക​രാ​ജ​ത്വം നമ്മുടെ കർത്താ​വി​ന്നും അവന്റെ ക്രിസ്‌തു​വി​ന്നും ആയിത്തീർന്നി​രി​ക്കു​ന്നു; അവൻ എന്നെ​ന്നേ​ക്കും വാഴും” എന്നു പറയു​ന്നതു കേട്ടി​രി​ക്കു​ന്നു. (വെളി​പ്പാ​ടു 11:15) തീർച്ച​യാ​യും, വലിയ ഇടയനായ യഹോവ തന്റെ സകല ആടുക​ളെ​യും ‘തിരു​നാ​മം നിമിത്തം നീതി​പാ​ത​ക​ളിൽ നടത്തി​ക്കൊ​ണ്ടി​രി​ക്കു​ക​യാണ്‌.’ (സങ്കീർത്തനം 23:3) ചെറിയ ആട്ടിൻകൂ​ട്ടം അവരുടെ സ്വർഗീ​യ​പ്ര​തി​ഫ​ല​ത്തി​ലേക്കു ലാക്കു​തെ​റ​റാ​തെ നയിക്ക​പ്പെ​ടു​ക​യാണ്‌. വേറെ ആടുകൾ ക്രിസ്‌തു​യേ​ശു​വി​ന്റെ ഭരണത്തിൻകീ​ഴിൽ ദൈവ​ത്തി​ന്റെ മഹത്ത്വ​മാർന്ന രാജ്യ​ത്തി​ന്റെ ഭൗമി​ക​മ​ണ്ഡ​ല​ത്തിൽ നിത്യ​ജീ​വൻ ആസ്വദി​ക്കു​ന്ന​തി​നു മഹോ​പ​ദ്ര​വ​ത്തിൽ സുരക്ഷി​ത​മാ​യി വിടു​വി​ക്ക​പ്പെ​ടും. തൻമൂലം, യേശു​വി​ന്റെ വാക്കുകൾ ചെറിയ ആട്ടിൻകൂ​ട്ടത്തെ അഭിസം​ബോ​ധന ചെയ്‌തു​കൊ​ണ്ടു​ള്ള​താ​ണെന്നു വരികി​ലും ഭൂമി​യി​ലുള്ള എല്ലാ ദൈവ​ദാ​സൻമാർക്കും തീർച്ച​യാ​യും “ഭയപ്പെ​ട​രു​തു” എന്ന വാക്കു ശ്രദ്ധി​ക്കാൻ തക്ക കാരണ​മുണ്ട്‌.

നിങ്ങൾക്കു വിശദീ​ക​രി​ക്കാ​മോ?

◻ ചെറിയ ആട്ടിൻകൂ​ട്ട​ത്തിൽപ്പെട്ട ശേഷി​ച്ച​വ​രു​ടെ എണ്ണം കുറയാൻ നാം എന്തു​കൊ​ണ്ടു പ്രതീ​ക്ഷി​ക്കണം?

◻ അഭിഷിക്ത ശേഷി​പ്പി​ന്റെ ഇപ്പോ​ഴത്തെ അവസ്ഥ​യെന്ത്‌?

◻ മാഗോ​ഗി​ലെ ഗോഗി​ന്റെ ആക്രമണം സമീപി​ക്കു​മ്പോ​ഴും ക്രിസ്‌ത്യാ​നി​കൾ ഭയപ്പെ​ടേ​ണ്ട​തി​ല്ലാ​ത്തത്‌ എന്തു​കൊണ്ട്‌?

◻ 1,44,000 പേരുടെ പുനരു​ത്ഥാന പ്രത്യാശ വിശേ​ഷി​ച്ചും ഇന്ന്‌ അനുപ​മ​മാ​യി​രി​ക്കു​ന്നത്‌ എന്തു​കൊണ്ട്‌?