യഥാർഥ സന്തുഷ്ടി​യു​ടെ ചേരു​വ​കൾ

രുചി​ക​ര​മായ ഭക്ഷണം തയ്യാറാ​ക്കാൻ ശരിയായ ചേരു​വ​ക​ളും സമർഥ​നായ ഒരു പാചക​ക്കാ​ര​നും ആവശ്യ​മാണ്‌! സന്തുഷ്ടി​യു​ടെ കാര്യ​വും അങ്ങനെ​ത​ന്നെ​യാണ്‌. ഒരൊറ്റ ഘടകമല്ല, മറിച്ച്‌ പല കാര്യങ്ങൾ കൂടി​ച്ചേർന്നാണ്‌ നമ്മുടെ ജീവിതം സന്തുഷ്ട​മാ​ക്കു​ന്നത്‌. തൊഴിൽ, വിനോ​ദം, കുടും​ബാം​ഗ​ങ്ങ​ളോ​ടും സുഹൃ​ത്തു​ക്ക​ളോ​ടു​മൊ​പ്പം ചെലവ​ഴി​ക്കുന്ന സമയം, ആത്മീയ പ്രവർത്ത​നങ്ങൾ എന്നിവ​യെ​ല്ലാം അതിൽ ഉൾപ്പെ​ടു​ന്നു. എന്നാൽ മനോ​ഭാ​വം, അഭിലാ​ഷങ്ങൾ, ജീവിത ലക്ഷ്യങ്ങൾ എന്നിങ്ങനെ അത്ര വ്യക്തമ​ല്ലാത്ത ഘടകങ്ങ​ളും പ്രധാ​ന​മാണ്‌.

സന്തോ​ഷ​ക​ര​മെ​ന്നു പറയട്ടെ, യഥാർഥ സന്തുഷ്ടി​ക്കുള്ള ചേരു​വകൾ നാം സ്വന്തമാ​യി അന്വേ​ഷി​ച്ചു കണ്ടുപി​ടി​ക്കേ​ണ്ട​തില്ല. എന്തു​കൊണ്ട്‌? എന്തു​കൊ​ണ്ടെ​ന്നാൽ, നമ്മുടെ സ്രഷ്ടാവ്‌ അത്യു​ത്ത​മ​മായ പ്രബോ​ധ​നങ്ങൾ അടങ്ങിയ ഒരു പുസ്‌തകം—ബൈബിൾ—നമുക്കു പ്രദാനം ചെയ്‌തി​ട്ടുണ്ട്‌. 2,377 ഭാഷക​ളി​ലും ഭാഷാ​ഭേ​ദ​ങ്ങ​ളി​ലു​മാ​യി മുഴു​വ​നാ​യോ ഭാഗി​ക​മാ​യോ അത്‌ ഇന്നു ലഭ്യമാണ്‌. ലോക​ത്തി​ലെ മറ്റൊരു പ്രസി​ദ്ധീ​ക​ര​ണ​വും ഇത്രയും പ്രചാരം നേടി​യി​ട്ടില്ല!

ഇതു പ്രതി​ഫ​ലി​പ്പി​ക്കു​ന്നത്‌ സകല മനുഷ്യ​രു​ടെ​യും സന്തുഷ്ടി​യി​ലും ആത്മീയ ക്ഷേമത്തി​ലു​മുള്ള ദൈവ​ത്തി​ന്റെ താത്‌പ​ര്യ​ത്തെ​യാണ്‌. (പ്രവൃ​ത്തി​കൾ 10:34, 35; 17:26, 27) ‘ശുഭക​ര​മാ​യി പ്രവർത്തി​ക്കാൻ നിന്നെ അഭ്യസി​പ്പി​ക്കു​ന്നവൻ ഞാൻ തന്നെ’ എന്നു ദൈവം പറയുന്നു. അവന്റെ കൽപ്പനകൾ അനുസ​രി​ക്കു​ന്ന​പക്ഷം, നമ്മുടെ സമാധാ​ന​വും ശാന്തി​യും “നദി​പോ​ലെ” ആയിത്തീ​രു​മെന്ന്‌ അവൻ വാഗ്‌ദാ​നം ചെയ്യുന്നു.—യെശയ്യാ​വു 48:17, 18.

ആ വാഗ്‌ദാ​നം, മുൻ ലേഖന​ത്തിൽ ഉദ്ധരിച്ച, യേശു​വി​ന്റെ വാക്കുകൾ നമ്മുടെ മനസ്സി​ലേക്കു കൊണ്ടു​വ​രു​ന്നു: “ആത്മീയ ആവശ്യ​ങ്ങ​ളെ​ക്കു​റി​ച്ചു ബോധ​മു​ള്ളവർ സന്തുഷ്ടർ.” (മത്തായി 5:3, NW) ഇവിടെ പറയ​പ്പെ​ട്ടി​രി​ക്കുന്ന ആത്മീയത ഭക്തിയു​ടെ വെറു​മൊ​രു പുറം​പൂ​ച്ചല്ല. മറിച്ച്‌ അതു നമ്മുടെ ജീവി​തത്തെ സമഗ്ര​മാ​യി സ്വാധീ​നി​ക്കു​ന്നു. നമുക്കു നമ്മെക്കു​റിച്ച്‌ അറിയാ​വു​ന്ന​തി​നെ​ക്കാൾ വളരെ മെച്ചമാ​യി ദൈവ​ത്തി​നു നമ്മെ അറിയാ​മെന്നു തിരി​ച്ച​റി​ഞ്ഞു​കൊണ്ട്‌ അവനെ ശ്രദ്ധി​ക്കാ​നും അവനാൽ പഠിപ്പി​ക്ക​പ്പെ​ടാ​നു​മുള്ള മനസ്സൊ​രു​ക്ക​മാണ്‌ ഇവിടെ നിഴലി​ക്കു​ന്നത്‌. 50-ലധികം വർഷമാ​യി ബൈബിൾ പഠിക്കുന്ന എറൽ ഇങ്ങനെ പറയുന്നു: “ബൈബിൾ ദൈവ​ത്തിൽനി​ന്നുള്ള ഒരു ഗ്രന്ഥമാ​ണെന്ന്‌ എന്നെ ഏറ്റവു​മ​ധി​ക​മാ​യി ബോധ്യ​പ്പെ​ടു​ത്തുന്ന വസ്‌തുത അതിന്റെ പ്രബോ​ധ​ന​ങ്ങ​ളു​ടെ ഫലപ്ര​ദ​ത്വ​മാണ്‌.” ഉദാഹ​ര​ണ​ത്തിന്‌, ധനവും ഉല്ലാസ​വും തേടു​ന്ന​തു​പോ​ലുള്ള കാര്യങ്ങൾ സംബന്ധിച്ച്‌ ബൈബിൾ നൽകുന്ന മികച്ച ബുദ്ധി​യു​പ​ദേശം പരിചി​ന്തി​ക്കുക.

പണം സംബന്ധിച്ച ജ്ഞാനപൂർവ​ക​മായ മാർഗ​നിർദേ​ശം

“ഒരുത്തന്നു സമൃദ്ധി ഉണ്ടായാ​ലും അവന്റെ വസ്‌തു​വ​കയല്ല അവന്റെ ജീവന്നു ആധാര​മാ​യി​രി​ക്കു​ന്നത്‌,” യേശു പറഞ്ഞു. (ലൂക്കൊസ്‌ 12:15) അതേ, ഒരു വ്യക്തി എന്ന നിലയി​ലുള്ള നിങ്ങളു​ടെ യഥാർഥ മൂല്യ​ത്തിന്‌ നിങ്ങളു​ടെ ബാങ്കു നിക്ഷേ​പ​വു​മാ​യി യാതൊ​രു ബന്ധവു​മില്ല, പ്രത്യേ​കിച്ച്‌ ദൈവ​ത്തി​ന്റെ വീക്ഷണ​ത്തിൽ. ധനസമ്പാ​ദനം മിക്ക​പ്പോ​ഴും ഉത്‌ക​ണ്‌ഠകൾ വർധി​പ്പി​ക്കു​ന്നു എന്നതാണ്‌ യാഥാർഥ്യം. അതു നമ്മുടെ സന്തോ​ഷ​വും ഏറെ പ്രധാ​ന​പ്പെട്ട കാര്യ​ങ്ങൾക്കു ചെലവ​ഴി​ക്കേണ്ട സമയവും കവർന്നെ​ടു​ക്കു​ന്നു.—മർക്കൊസ്‌ 10:25; 1 തിമൊ​ഥെ​യൊസ്‌ 6:10.

ഭൗതിക വസ്‌തു​വ​ക​ക​ളു​ടെ സഹായ​ത്താൽ സംതൃ​പ്‌തി കണ്ടെത്താൻ ആളുകൾ എത്ര​ത്തോ​ളം ശ്രമി​ക്കു​ന്നു​വോ അത്രകണ്ട്‌ അവർക്കത്‌ കൈവി​ട്ടു​പോ​കു​ന്നു​വെന്ന്‌ ഐക്യ​നാ​ടു​ക​ളി​ലെ മനഃശാ​സ്‌ത്ര പ്രൊ​ഫ​സ​റായ റിച്ചർഡ്‌ റൈയൻ അഭി​പ്രാ​യ​പ്പെ​ടു​ന്നു. അതു സംബന്ധിച്ച്‌, ബൈബി​ളെ​ഴു​ത്തു​കാ​ര​നായ ശലോ​മോൻ ഇങ്ങനെ പറഞ്ഞു: “പണത്തെ സ്‌നേ​ഹി​ക്കു​ന്ന​വന്‌ ഒരിക്ക​ലും മതിയാ​വോ​ളം പണം ഉണ്ടാകു​ന്നില്ല; സമ്പത്തിനെ സ്‌നേ​ഹി​ക്കു​ന്നവൻ അവന്റെ വരുമാ​നം​കൊണ്ട്‌ ഒരിക്ക​ലും തൃപ്‌ത​നാ​കു​ന്നു​മില്ല.” (സഭാ​പ്ര​സം​ഗി 5:10, ന്യൂ ഇൻഡ്യ ബൈബിൾ ഭാഷാ​ന്തരം) ഈ സാഹച​ര്യ​ത്തെ കൊതു​കു കുത്തു​മ്പോ​ഴു​ണ്ടാ​കുന്ന ചൊറി​ച്ചി​ലി​നോ​ടു താരത​മ്യ​പ്പെ​ടു​ത്താ​വു​ന്ന​താണ്‌—ചൊറി​യു​ന്തോ​റും ചൊറി​ച്ചിൽ കൂടി​വ​രു​ക​യും ഒടുവിൽ അവിടം ഒരു വ്രണമാ​യി​ത്തീ​രു​ക​യും ചെയ്യുന്നു.

കഠിനാ​ധ്വാ​നം ചെയ്‌ത്‌ അതിന്റെ ഫലം ആസ്വദി​ക്കാൻ ബൈബിൾ നമ്മെ പ്രോ​ത്സാ​ഹി​പ്പി​ക്കു​ന്നു. (സഭാ​പ്ര​സം​ഗി 3:12, 13) സന്തുഷ്ടി​യു​ടെ മറ്റൊരു സുപ്ര​ധാന ചേരു​വ​യായ ആത്മാഭി​മാ​നം വർധി​ച്ചു​വ​രാൻ അത്‌ ഇടയാ​ക്കും. പരിപു​ഷ്ടി​പ്പെ​ടു​ത്തുന്ന ചില ഉല്ലാസങ്ങൾ ആസ്വദി​ക്കു​ന്നത്‌ ഉൾപ്പെ​ടെ​യുള്ള ജീവിത ആവശ്യ​ങ്ങൾക്കാ​യി പണം സമ്പാദി​ക്കു​ന്ന​തിൽ തെറ്റൊ​ന്നു​മില്ല. എന്നാൽ ധനസമ്പാ​ദനം ജീവി​ത​ല​ക്ഷ്യ​മാ​ക്കു​ന്നത്‌ തികച്ചും വ്യത്യ​സ്‌ത​മായ ഒരു സംഗതി​യാണ്‌.

ഉല്ലാസ​ങ്ങളെ അതിന്റെ സ്ഥാനത്തു നിറു​ത്തു​ക

ജീവി​ത​ത്തിൽ ആത്മീയ കാര്യ​ങ്ങൾക്കുള്ള മൂല്യം തിരി​ച്ച​റി​യു​ന്നത്‌ വിനോ​ദങ്ങൾ, നേര​മ്പോക്ക്‌, മറ്റ്‌ ഉല്ലാസങ്ങൾ എന്നിവ​യിൽനി​ന്നു പരമാ​വധി പ്രയോ​ജനം നേടാൻ നമ്മെ സഹായി​ക്കും. ഭക്ഷണ പാനീ​യങ്ങൾ വിളമ്പി​യി​രുന്ന ഉല്ലാസ​ക​ര​മായ കൂടി​വ​ര​വു​ക​ളിൽ യേശു സംബന്ധി​ച്ചി​ട്ടുണ്ട്‌. (ലൂക്കൊസ്‌ 5:29; യോഹ​ന്നാൻ 2:1-10) എന്നാൽ തീർച്ച​യാ​യും അത്തരം കാര്യങ്ങൾ ആയിരു​ന്നില്ല അവന്റെ സന്തോ​ഷ​ത്തി​ന്റെ മുഖ്യ​കാ​രണം. മറിച്ച്‌, ദൈവ​ത്തെ​യും മനുഷ്യ​വർഗത്തെ സംബന്ധിച്ച അവന്റെ ഉദ്ദേശ്യ​ത്തെ​യും കുറിച്ചു പഠിക്കാൻ മറ്റുള്ള​വരെ സഹായി​ക്കു​ന്നത്‌ ഉൾപ്പെ​ടെ​യുള്ള ആത്മീയ പ്രവർത്ത​ന​ങ്ങ​ളാണ്‌ അവന്‌ ഏറ്റവു​മ​ധി​കം സന്തോഷം പകർന്നത്‌.—യോഹ​ന്നാൻ 4:34.

സന്തുഷ്ടി​ക്കു​ള്ള താക്കോൽ ജീവി​തോ​ല്ലാ​സങ്ങൾ ആണോ​യെ​ന്ന​റി​യാൻ ശലോ​മോൻ രാജാവ്‌ ഒരു പരീക്ഷ​ണം​തന്നെ നടത്തി. “സുഖ​ഭോ​ഗ​ങ്ങ​ളിൽ ഞാൻ മുഴു​കും; ഞാൻ അതിന്റെ ആസ്വാ​ദ്യത പരീക്ഷി​ക്കും” എന്ന്‌ അവൻ പറഞ്ഞു. അതേ, യാതൊ​രു മടിയോ സങ്കോ​ച​മോ കൂടാതെ ശലോ​മോൻ സുഖ​ലോ​ലു​പ​ത​യിൽ മുഴുകി! പിന്നീട്‌ അതു സംബന്ധിച്ച്‌ അവന്‌ എന്തു തോന്നി? “ഇതും മിഥ്യ തന്നെ!” അവൻ എഴുതി.—സഭാ​പ്ര​സം​ഗി 2:1,പി.ഒ.സി. ബൈബിൾ.

ശൂന്യ​താ​ബോ​ധ​വും അസംതൃ​പ്‌തി​യും—അതാണ്‌ മിക്ക​പ്പോ​ഴും ഉല്ലാസ​പ്രേ​മി​ക​ളു​ടെ അനുഭവം. അർഥവ​ത്തായ വേല, ആത്മീയ പ്രവർത്ത​നങ്ങൾ, കുടും​ബാം​ഗ​ങ്ങ​ളു​മൊ​ത്തുള്ള സഹവാസം, ഉല്ലാസങ്ങൾ എന്നിവ​യെ​ക്കു​റി​ച്ചെ​ല്ലാം ഗവേഷകർ പഠനം നടത്തി​യി​ട്ടുണ്ട്‌. എന്തായി​രു​ന്നു ഫലം? പഠനത്തി​നു വിധേ​യ​രാ​യ​വ​രു​ടെ മൊത്ത​ത്തി​ലുള്ള സന്തുഷ്ടി​യെ സ്വാധീ​നിച്ച കാര്യ​ങ്ങ​ളിൽ ഉല്ലാസ​ങ്ങ​ളു​ടെ സ്ഥാനം ഏറ്റവും ഒടുവി​ലാ​യി​രു​ന്നു.

ഉദാര​മ​തി​ക​ളും കൃതജ്ഞ​രും ആയിരി​ക്കു​ക

സ്വാർഥ​രാ​യി​രി​ക്കു​ന്ന​തി​നു പകരം സന്തുഷ്ട​രായ വ്യക്തികൾ, പൊതു​വേ ഉദാര​മ​തി​ക​ളും മറ്റുള്ള​വ​രു​ടെ ക്ഷേമത്തിൽ തത്‌പ​ര​രും ആയിരി​ക്കും. “വാങ്ങു​ന്ന​തി​നെ​ക്കാൾ കൊടു​ക്കു​ന്നതു ഭാഗ്യം” അഥവാ സന്തോ​ഷ​പ്രദം എന്ന്‌ യേശു പറഞ്ഞു. (പ്രവൃ​ത്തി​കൾ 20:35) ഭൗതിക വസ്‌തു​വ​കകൾ പങ്കു​വെ​ക്കു​ന്ന​തി​നു​പു​റമേ, മറ്റുള്ള​വർക്കാ​യി സമയവും ഊർജ​വും ചെലവ​ഴി​ക്കാൻ നമുക്കാ​കും. മറ്റുള്ളവർ, പ്രത്യേ​കി​ച്ചു കുടും​ബാം​ഗങ്ങൾ അതിനെ ഏറെ വിലമ​തി​ക്കാൻ സാധ്യ​ത​യുണ്ട്‌. വിവാ​ഹ​ബന്ധം ശക്തവും സന്തുഷ്ട​വു​മാ​ക്കി നിലനി​റു​ത്തു​ന്ന​തിന്‌ ഭാര്യാ​ഭർത്താ​ക്ക​ന്മാർ ഒന്നിച്ചാ​യി​രി​ക്കാൻ സമയം കണ്ടെ​ത്തേ​ണ്ട​തുണ്ട്‌. കൂടാതെ, മക്കളോ​ടു സംസാ​രി​ക്കാ​നും വാത്സല്യം പ്രകടി​പ്പി​ക്കാ​നും അവരെ പഠിപ്പി​ക്കാ​നും മാതാ​പി​താ​ക്കൾ ധാരാളം സമയം ചെലവ​ഴി​ക്കണം. ഈ വിധങ്ങ​ളി​ലെ​ല്ലാം കുടും​ബാം​ഗങ്ങൾ കൊടു​ക്കൽ മനോ​ഭാ​വം പ്രകട​മാ​ക്കു​മ്പോൾ അവർ വൃക്ഷങ്ങ​ളെ​പ്പോ​ലെ തഴയ്‌ക്കു​ക​യും കുടും​ബം, സന്തോഷം കളിയാ​ടുന്ന ഒരു പറുദീ​സ​യാ​യി​ത്തീ​രു​ക​യും ചെയ്യും.

ഇനി, മറ്റുള്ളവർ അവരുടെ സമയവും ഊർജ​വും ചെലവ​ഴി​ച്ചു​കൊ​ണ്ടോ മറ്റു വിധങ്ങ​ളി​ലോ നിങ്ങൾക്കു​വേണ്ടി എന്തെങ്കി​ലും ചെയ്യു​മ്പോൾ നിങ്ങൾ ‘നന്ദി ഉള്ളവർ’ ആണെന്നു പ്രകട​മാ​ക്കു​ന്നു​ണ്ടോ? (കൊ​ലൊ​സ്സ്യർ 3:15) ഈ ബുദ്ധി​യു​പ​ദേ​ശ​ത്തി​നു ചേർച്ച​യിൽ നന്ദിപൂർവം പ്രതി​ക​രി​ക്കു​ന്നത്‌, മറ്റുള്ള​വ​രു​മാ​യുള്ള ബന്ധം അരക്കി​ട്ടു​റ​പ്പി​ക്കാ​നും നമ്മു​ടെ​തന്നെ സന്തോഷം വലിയ അളവിൽ വർധി​പ്പി​ക്കാ​നും സഹായി​ക്കും. മറ്റാ​രെ​ങ്കി​ലും നിങ്ങ​ളോ​ടു ഹൃദയം​ഗ​മ​മാ​യി നന്ദി പ്രകടി​പ്പി​ക്കു​മ്പോൾ അതു നിങ്ങളെ ആഴത്തിൽ സ്‌പർശി​ക്കാ​റി​ല്ലേ?

കൃതജ്ഞതാ മനോ​ഭാ​വ​മു​ള്ളവർ ആണെങ്കിൽ, ജീവി​ത​ത്തി​ലു​ണ്ടാ​കുന്ന നല്ല കാര്യങ്ങൾ തിരി​ച്ച​റി​യാൻ നാം ചായ്‌വു​ള്ള​വ​രാ​യി​രി​ക്കും. യു.എസ്‌.എ.-യിലെ റിവർ​സൈ​ഡി​ലുള്ള കാലി​ഫോർണിയ യൂണി​വേ​ഴ്‌സി​റ്റി​യി​ലെ ഒരു മനഃശാ​സ്‌ത്രജ്ഞ നടത്തിയ ശ്രദ്ധേ​യ​മായ ഒരു പരീക്ഷ​ണ​ത്തിൽ, പങ്കെടു​ത്ത​വ​രോ​ടെ​ല്ലാം ഒരു “കൃതജ്ഞതാ പത്രം” എഴുതി സൂക്ഷി​ക്കാൻ അവർ ആവശ്യ​പ്പെട്ടു. ഏതെല്ലാം കാര്യ​ങ്ങ​ളെ​പ്രതി അവർ നന്ദിയു​ള്ള​വ​രാ​ണോ അതെല്ലാം അവർ ആ ഡയറി​യിൽ കുറി​ച്ചു​വെ​ക്ക​ണ​മാ​യി​രു​ന്നു. ആശ്ചര്യ​ക​ര​മെന്നു പറയട്ടെ, ആറ്‌ ആഴ്‌ച കഴിഞ്ഞ​പ്പോ​ഴേ​ക്കും അവരെ​ല്ലാ​വ​രും ജീവി​ത​ത്തിൽ ശ്രദ്ധേ​യ​മാം​വി​ധം സംതൃ​പ്‌തർ ആയിത്തീർന്നു.

ഇതെന്താ​ണു ചൂണ്ടി​ക്കാ​ട്ടു​ന്നത്‌? നിങ്ങളു​ടെ സാഹച​ര്യം എന്തുതന്നെ ആയിരു​ന്നാ​ലും, ജീവി​ത​ത്തിൽ നിങ്ങൾ അനുഭ​വി​ക്കുന്ന നന്മകൾ തിരി​ച്ച​റി​യാൻ പഠിക്കുക. വാസ്‌ത​വ​ത്തിൽ, അപ്രകാ​രം ചെയ്യാൻ ബൈബിൾ നിങ്ങളെ പ്രോ​ത്സാ​ഹി​പ്പി​ക്കു​ന്നു. “എപ്പോ​ഴും സന്തോ​ഷ​ത്തോ​ടെ​യി​രി​ക്കു​വിൻ . . . എല്ലാക്കാ​ര്യ​ങ്ങ​ളി​ലും നന്ദി പ്രകാ​ശി​പ്പി​ക്കു​വിൻ” എന്ന്‌ അത്‌ ഉദ്‌ബോ​ധി​പ്പി​ക്കു​ന്നു. (1 തെസ്സ​ലൊ​നീ​ക്യർ 5:16, 18, പി.ഒ.സി.) അതിനാ​യി, നാം അനുഭ​വി​ക്കുന്ന നന്മകൾ ഓർമി​ക്കാൻ ബോധ​പൂർവം ശ്രമം ചെയ്യേ​ണ്ട​തുണ്ട്‌. നിങ്ങൾ അങ്ങനെ ചെയ്യു​മോ?

സ്‌നേ​ഹ​വും പ്രത്യാ​ശ​യും—സന്തുഷ്ടിക്ക്‌ അനിവാ​ര്യം

ചൊട്ട​മു​തൽ ചുടല​വരെ മനുഷ്യൻ സ്‌നേ​ഹ​ത്തി​നാ​യി കാംക്ഷി​ക്കു​ന്നു. അതെത്ര ശരിയാണ്‌! അതിന്റെ അഭാവ​ത്തിൽ ആളുകൾ വാടി​ത്ത​ള​രു​ന്നു. എന്നാൽ യഥാർഥ​ത്തിൽ സ്‌നേഹം എന്താണ്‌? സ്‌നേഹം ഇന്നു പല വിധങ്ങ​ളിൽ വ്യാഖ്യാ​നി​ക്ക​പ്പെ​ടു​ന്നു​ണ്ടെ​ങ്കി​ലും, ബൈബിൾ ഈ ഗുണത്തെ പിൻവ​രുന്ന പ്രകാരം മനോ​ഹ​ര​മാ​യി വർണി​ക്കു​ന്നു: “സ്‌നേഹം ദീർഘ​മാ​യി ക്ഷമിക്ക​യും ദയ കാണി​ക്ക​യും ചെയ്യുന്നു; സ്‌നേഹം സ്‌പർദ്ധി​ക്കു​ന്നില്ല. സ്‌നേഹം നിഗളി​ക്കു​ന്നില്ല. ചീർക്കു​ന്നില്ല; അയോ​ഗ്യ​മാ​യി നടക്കു​ന്നില്ല സ്വാർത്ഥം അന്വേ​ഷി​ക്കു​ന്നില്ല, ദ്വേഷ്യ​പ്പെ​ടു​ന്നില്ല, ദോഷം കണക്കി​ടു​ന്നില്ല; അനീതി​യിൽ സന്തോ​ഷി​ക്കാ​തെ സത്യത്തിൽ സന്തോ​ഷി​ക്കു​ന്നു: എല്ലാം പൊറു​ക്കു​ന്നു, എല്ലാം വിശ്വ​സി​ക്കു​ന്നു, എല്ലാം പ്രത്യാ​ശി​ക്കു​ന്നു, എല്ലാം സഹിക്കു​ന്നു.”—1 കൊരി​ന്ത്യർ 13:4-8.

യഥാർഥ സ്‌നേഹം എത്ര നിസ്സ്വാർഥ​മാണ്‌! “സ്വാർത്ഥം അന്വേ​ഷി​ക്കു​ന്നില്ല” എന്നതി​നാൽ അതു സ്വന്തം സന്തോ​ഷ​ത്തെ​ക്കാൾ മറ്റുള്ള​വ​രു​ടേ​തി​നു പ്രാധാ​ന്യം കൽപ്പി​ക്കു​ന്നു. സങ്കടക​ര​മെന്നു പറയട്ടെ, അത്തരം സ്‌നേഹം ഇന്നു വിരള​മാ​യി​ക്കൊ​ണ്ടി​രി​ക്കു​ക​യാണ്‌. എന്തിന്‌, ഈ വ്യവസ്ഥി​തി​യു​ടെ സമാപനം സംബന്ധിച്ച പ്രവച​ന​ത്തിൽ “അനേക​രു​ടെ സ്‌നേഹം തണുത്തു​പോ​കും” എന്ന്‌ യേശു പറയു​ക​യു​ണ്ടാ​യി.—മത്തായി 24:3, 12; 2 തിമൊ​ഥെ​യൊസ്‌ 3:1-5.

ഏതായാ​ലും ഈ സ്ഥിതി​വി​ശേഷം എന്നേക്കും തുടരു​ക​യില്ല, കാരണം സ്‌നേ​ഹ​ത്തി​ന്റെ മൂർത്തി​മ​ദ്‌ഭാ​വ​മായ സ്രഷ്ടാ​വിന്‌ അതൊരു അപമാ​ന​മാണ്‌. (1 യോഹ​ന്നാൻ 4:8) വിദ്വേ​ഷി​ക​ളും അത്യാ​ഗ്ര​ഹി​ക​ളു​മാ​യ​വരെ ദൈവം ഭൂമി​യിൽനിന്ന്‌ പെട്ടെ​ന്നു​തന്നെ തുടച്ചു​നീ​ക്കും. മുകളിൽ പരാമർശി​ച്ച​തു​പോ​ലുള്ള സ്‌നേഹം നട്ടുവ​ളർത്താൻ ശ്രമി​ക്കു​ന്ന​വർക്കു​മാ​ത്രമേ അതിജീ​വി​ക്കാ​നാ​കൂ. അങ്ങനെ സമാധാ​ന​വും സന്തോ​ഷ​വും ഭൂമി​യി​ലെ​ങ്ങും നിറയും. “കുറ​ഞ്ഞോ​ന്നു കഴിഞ്ഞി​ട്ടു ദുഷ്ടൻ ഇല്ല; നീ അവന്റെ ഇടം സൂക്ഷി​ച്ചു​നോ​ക്കും; അവനെ കാണു​ക​യില്ല. എന്നാൽ സൌമ്യ​ത​യു​ള്ളവർ ഭൂമിയെ കൈവ​ശ​മാ​ക്കും; സമാധാ​ന​സ​മൃ​ദ്ധി​യിൽ അവർ ആനന്ദി​ക്കും” എന്ന ബൈബിൾ പ്രവചനം നിശ്ചയ​മാ​യും നിവൃ​ത്തി​യേ​റും.—സങ്കീർത്തനം 37:10, 11.

‘ആനന്ദം’ കളിയാ​ടുന്ന ഒരവസ്ഥ​യിൽ എന്നെന്നും ജീവി​ക്കു​ന്നത്‌ ഒന്നു വിഭാവന ചെയ്യൂ! “ആശയിൽ സന്തോ​ഷി​പ്പിൻ” എന്നു ബൈബിൾ പറയു​ന്ന​തിൽ എന്തെങ്കി​ലും അതിശ​യി​ക്കാ​നു​ണ്ടോ? (റോമർ 12:12) അനുസ​ര​ണ​മുള്ള മനുഷ്യ​വർഗ​ത്തി​നാ​യി ദൈവം കരുതി​യി​രി​ക്കുന്ന അത്ഭുത​ക​ര​മായ പ്രത്യാ​ശ​യെ​ക്കു​റിച്ച്‌ അറിയാൻ നിങ്ങൾക്ക്‌ ആഗ്രഹ​മു​ണ്ടോ? ദയവായി അടുത്ത ലേഖനം വായി​ക്കുക.

[7-ാം പേജിലെ ആകർഷക വാക്യം]

‘വാങ്ങു​ന്ന​തി​നെ​ക്കാൾ കൊടു​ക്കു​ന്നതു സന്തോ​ഷ​പ്രദം.’ —പ്രവൃ​ത്തി​കൾ 20:35

[5-ാം പേജിലെ ചതുരം/ചിത്രം]

വിജയകഥകളും യാഥാർഥ്യ​വും

കഷ്ടപ്പാ​ടും ദുരി​ത​വും നിറഞ്ഞ കുടും​ബ​ങ്ങ​ളിൽ വളർന്ന്‌ പർവത സമാന​മായ പ്രതി​സ​ന്ധി​കൾ തരണം ചെയ്‌ത്‌ ഒടുവിൽ അതിസ​മ്പ​ന്ന​രാ​യി​ത്തീർന്ന​വ​രെ​ക്കു​റി​ച്ചുള്ള വീരക​ഥകൾ ചില​പ്പോ​ഴൊ​ക്കെ നാം കേൾക്കാ​റുണ്ട്‌. എന്നാൽ, സന്തുഷ്ടി​യെ​ക്കു​റി​ച്ചുള്ള ഒരു സാൻ ഫ്രാൻസി​സ്‌കോ ക്രോ​ണി​ക്കിൾ റിപ്പോർട്ട്‌ ഇങ്ങനെ വിശദീ​ക​രി​ക്കു​ന്നു: “ബാല്യ​കാ​ലം അസന്തു​ഷ്ട​മാ​യി​രു​ന്നി​ട്ടും . . . എല്ലാവിധ പ്രതി​കൂല സാഹച​ര്യ​ങ്ങ​ളും സമർഥ​മാ​യി തരണം ചെയ്‌ത്‌ വിജയ​ച​രി​ത്ര​മെ​ഴു​തി​യ​വ​രു​ടെ ദൃഷ്ടാ​ന്ത​മാ​യി അത്തരം കഥകൾ ചില​രൊ​ക്കെ ചൂണ്ടി​ക്കാ​ട്ടു​ന്നു. എന്നാൽ ഇതിൽ ഒരു കുഴപ്പ​മുണ്ട്‌, കാരണം അത്തരം കഥാപാ​ത്രങ്ങൾ എല്ലാ അർഥത്തി​ലും ജീവി​ത​ത്തിൽ വിജയം​വ​രി​ച്ച​താ​യി പറയാൻ കഴിയി​ല്ലെന്ന്‌ ഗവേഷണം തെളി​യി​ക്കു​ന്നു. അവർ സമ്പന്നരാ​യി​ത്തീർന്നു എന്നു മാത്രമേ ഉള്ളൂ.”

[6-ാം പേജിലെ ചതുരം/ചിത്രം]

സന്തുഷ്ടിയും നിങ്ങളു​ടെ ആരോ​ഗ്യ​വും

സന്തുഷ്ട​മായ മനസ്സ്‌ നല്ലൊരു ഔഷധ​മാണ്‌. “സന്തുഷ്ടി​യോ പ്രത്യാ​ശ​യും ശുഭാ​പ്‌തി​വി​ശ്വാ​സ​വും സംതൃ​പ്‌തി​യും നിറഞ്ഞ സമാന​മായ മാനസി​കാ​വ​സ്ഥ​ക​ളോ ഹൃദയ-ധമനീ​രോ​ഗം, ശ്വാസ​കോശ രോഗം, പ്രമേഹം, ഉയർന്ന രക്തസമ്മർദം, ജലദോ​ഷം, ശ്വസന​വ്യ​വ​സ്ഥ​യു​ടെ മേൽഭാ​ഗ​ങ്ങ​ളി​ലു​ണ്ടാ​കുന്ന അണുബാധ എന്നിവ​യ്‌ക്കുള്ള സാധ്യത കുറയ്‌ക്കു​ക​യോ അത്തരം രോഗങ്ങൾ മൂർച്ഛി​ക്കാ​തെ തടയു​ക​യോ ചെയ്യു​ന്ന​താ​യി കാണ​പ്പെ​ടു​ന്നു” എന്ന്‌ ടൈം വാരി​ക​യി​ലെ ഒരു റിപ്പോർട്ട്‌ പ്രസ്‌താ​വി​ക്കു​ന്നു. കൂടാതെ, സന്തുഷ്ട​വും ക്രിയാ​ത്മ​ക​വു​മായ മാനസി​കാ​വസ്ഥ പ്രായം​ചെന്ന രോഗി​കൾക്കി​ട​യി​ലെ മരണനി​രക്ക്‌ ഒമ്പതു വർഷക്കാ​ല​ത്തി​നു​ള്ളിൽ 50 ശതമാ​ന​മാ​യി വെട്ടി​ക്കു​റ​ച്ചു​വെന്ന്‌ ഹോള​ണ്ടിൽ നടന്ന ഒരു പഠനം വെളി​പ്പെ​ടു​ത്തി!

മാനസി​കാ​വസ്ഥ എങ്ങനെ​യാണ്‌ ശരീരത്തെ സ്വാധീ​നി​ക്കു​ന്നത്‌ എന്നത്‌ ഇന്നും വ്യക്തമല്ല. എന്നിരു​ന്നാ​ലും, പ്രസന്ന​രും ശുഭാ​പ്‌തി​വി​ശ്വാ​സ​മു​ള്ള​വ​രു​മാ​യ​വ​രിൽ പ്രതി​രോധ വ്യവസ്ഥ​യ്‌ക്കു ഹാനി​വ​രു​ത്തു​ന്ന​തും സമ്മർദം വർധി​പ്പി​ക്കു​ന്ന​തു​മായ കോർട്ടി​സോൾ എന്ന ഹോർമോ​ണി​ന്റെ അളവ്‌ കുറവാ​ണെന്ന്‌ ഗവേഷണം തെളി​യി​ച്ചി​രി​ക്കു​ന്നു.

[4, 5 പേജു​ക​ളി​ലെ ചിത്രം]

നല്ല ചേരു​വകൾ ഉപയോ​ഗി​ക്കു​മ്പോൾ ഭക്ഷണം രുചി​ക​ര​മാ​യി​ത്തീ​രു​ന്ന​തു​പോ​ലെ, ദിവ്യ മാർഗ​നിർദേശം പിൻപ​റ്റു​ന്നത്‌ സന്തുഷ്ടി​യിൽ കലാശി​ക്കു​ന്നു