മൂപ്പൻമാർക്കും ശുശ്രൂ​ഷാ​ദാ​സൻമാർക്കു​മി​ട​യി​ലെ ഒരുമ നിലനിർത്തൽ

പൊതു​യു​ഗം 33-ലെ പെന്ത​ക്കോ​സ്‌ത്‌ ആചരണം കഴിഞ്ഞ​യു​ടനെ, പുതു​താ​യി രൂപീ​കൃ​ത​മായ ക്രിസ്‌തീയ സഭയിൽ ഒരു അടിയ​ന്തിര സ്ഥിതി​വി​ശേഷം സംജാ​ത​മാ​യി. ദരി​ദ്ര​രായ വിധവ​മാ​രെ പരിര​ക്ഷി​ക്കു​ന്ന​തി​നു​വേണ്ടി ഒരു ക്രമീ​ക​രണം ഏർപ്പെ​ടു​ത്തി​യി​രു​ന്നു. എന്നാൽ കുറച്ചു​നാൾ കഴിഞ്ഞ​പ്പോൾ, “പ്രതി​ദി​ന​മുള്ള സഹായ വിതര​ണ​ത്തിൽ തങ്ങളുടെ വിധവകൾ അവഗണി​ക്ക​പ്പെ​ടു​ന്നു​വെന്ന്‌ ഗ്രീക്കു​കാർ ഹെബ്രാ​യർക്കെ​തി​രേ പിറു​പി​റു​ത്തു.”—അപ്പ. പ്രവർത്ത​നങ്ങൾ 6:1, പി.ഒ.സി. ബൈബിൾ.

ഈ പരാതി​കൾ അപ്പോ​സ്‌ത​ലൻമാ​രു​ടെ കാതു​ക​ളി​ലെത്തി. “അതു​കൊണ്ട്‌, പന്ത്രണ്ടു പേർ ശിഷ്യ​രു​ടെ സമൂഹത്തെ ഒന്നിച്ചു​കൂ​ട്ടി​പ്പ​റഞ്ഞു: ഞങ്ങൾ ദൈവ​വചന ശുശ്രൂ​ഷ​യിൽ ഉപേക്ഷ കാണിച്ച്‌, ഭക്ഷണ​മേ​ശ​ക​ളിൽ ശുശ്രൂ​ഷി​ക്കു​ന്നതു ശരിയല്ല. അതിനാൽ സഹോ​ദ​രരേ, സുസമ്മ​ത​രും ആത്മാവും ജ്ഞാനവും കൊണ്ട്‌ നിറഞ്ഞ​വ​രു​മായ ഏഴു​പേരെ നിങ്ങളിൽനി​ന്നു കണ്ടുപി​ടി​ക്കു​വിൻ. ഞങ്ങൾ അവരെ ഈ ചുമതല ഏൽപ്പി​ക്കാം.”—അപ്പ. പ്രവർത്ത​നങ്ങൾ 6:2, 3, പി.ഒ.സി. ബൈ.

ഇതു ക്രിസ്‌തീയ സഭയ്‌ക്കു​ള്ളി​ലെ സംഘാ​ട​ന​ത്തി​ന്റെ ഒരു പ്രധാന തത്ത്വത്തെ ദൃഷ്ടാ​ന്തീ​ക​രി​ക്കു​ന്നു. ഉത്തരവാ​ദി​ത്വ​ബോ​ധ​മുള്ള ചില പുരു​ഷൻമാ​രെ അനുദിന സംഗതി​ക​ളു​ടെ ചുമതല ഏൽപ്പി​ക്കു​ന്നു. അതേസ​മയം, മററു​ചി​ലർ ഭാരിച്ച ആത്മീയ ഉത്തരവാ​ദി​ത്വ​ങ്ങൾ ഭരമേൽക്കു​ന്നു. ഇതിനു മുൻകീ​ഴ്‌വ​ഴ​ക്ക​മി​ല്ലാ​തില്ല. പുരാതന ഇസ്രാ​യേ​ലിൽ, ദൈവ​ത്തി​നുള്ള ബലിയർപ്പ​ണ​ത്തിൽ പുരോ​ഹി​തൻമാ​രാ​യി സേവി​ക്കാൻ അഹരോ​നും അദ്ദേഹ​ത്തി​ന്റെ പിൻഗാ​മി​ക​ളും നിയമി​ത​രാ​യി. എന്നിരു​ന്നാ​ലും, ‘സമാഗ​മ​ന​കൂ​ടാ​ര​ത്തി​ന്നുള്ള ഉപകര​ണ​ങ്ങ​ളൊ​ക്കെ​യും നോക്കി കൂടാരം സംബന്ധി​ച്ചുള്ള വേല ചെയ്‌തു​കൊണ്ട്‌’ ലേവ്യർ അവരെ സഹായി​ക്ക​ണ​മെന്ന്‌ യഹോവ നിർദേ​ശി​ച്ചു. (സംഖ്യാ​പു​സ്‌തകം 3:5-10) അതു​പോ​ലെ, ഇന്ന്‌ ശുശ്രൂ​ഷാ​ദാ​സൻമാർ മേൽവി​ചാ​ര​കൻമാ​രെ സഹായി​ക്കു​ന്നു.

മൂപ്പൻമാ​രു​ടെ​യും ശുശ്രൂ​ഷാ​ദാ​സൻമാ​രു​ടെ​യും റോൾ

മൂപ്പൻമാർക്കും ശുശ്രൂ​ഷാ​ദാ​സൻമാർക്കും വേണ്ടി ഉയർന്ന യോഗ്യ​ത​ക​ളാണ്‌ തിരു​വെ​ഴു​ത്തു​കൾ വെക്കു​ന്നത്‌. (1 തിമൊ​ഥെ​യൊസ്‌ 3:1-10, 12, 13; തീത്തൊസ്‌ 1:6-9) അവർ മത്സരി​ക്കു​ന്നില്ല, പകരം സഭയെ പടുത്തു​യർത്തു​ക​യെന്ന ഒരേ ലക്ഷ്യത്തിൽ പ്രവർത്തി​ക്കു​ന്നു. (താരത​മ്യം ചെയ്യുക: എഫെസ്യർ 4:11-13.) എന്നുവ​രി​കി​ലും, അവർ സഭയിൽ നിർവ​ഹി​ക്കുന്ന വേലക​ളിൽ കുറച്ചു വ്യത്യാ​സ​മുണ്ട്‌. “നിങ്ങളെ ഏല്‌പി​ച്ചി​രി​ക്കുന്ന ദൈവ​ത്തി​ന്റെ അജഗണത്തെ പരിപാ​ലി​ക്കു​വിൻ. അതു നിർബ​ന്ധം​മൂ​ല​മാ​യി​രി​ക്ക​രുത്‌, ദൈവ​ത്തെ​പ്രതി സൻമന​സ്സോ​ടെ ആയിരി​ക്കണം; ലാഭേ​ച്ഛ​യോ​ടെ ആയിരി​ക്ക​രുത്‌, തീക്ഷ്‌ണ​ത​യോ​ടെ ആയിരി​ക്കണം” എന്ന്‌ 1 പത്രോസ്‌ 5:2 (പി.ഒ.സി. ബൈ.) മേൽവി​ചാ​ര​കൻമാ​രോ​ടാ​യി പറയുന്നു. തങ്ങളെ ഏൽപ്പി​ച്ചി​രി​ക്കുന്ന ഈ വിശുദ്ധ ഉത്തരവാ​ദി​ത്വം എങ്ങനെ നിർവ​ഹി​ക്കു​ന്നു എന്നതു​സം​ബ​ന്ധിച്ച്‌ ദൈവ​ത്തോ​ടു കണക്കു​ബോ​ധി​പ്പി​ക്കേ​ണ്ട​വ​രാ​ണവർ.—എബ്രായർ 13:17.

ശുശ്രൂ​ഷാ​ദാ​സൻമാ​രോ? പഠിപ്പി​ക്കാ​നുള്ള പ്രാപ്‌തി​യിൽ അത്ര യോഗ്യ​ത​യു​ള്ള​വ​രാ​യി​രി​ക്കേണം അവർ എന്നു തിരു​വെ​ഴു​ത്തു​കൾ ആവശ്യ​പ്പെ​ടു​ന്നില്ല. മൂപ്പൻമാ​രു​ടേ​തിൽനി​ന്നും കുറ​ച്ചൊ​ക്കെ വ്യത്യാ​സ​മു​ള്ള​താണ്‌ അവരുടെ കർത്തവ്യ​ങ്ങൾ. നിസ്സം​ശ​യ​മാ​യും ഒന്നാം നൂററാ​ണ്ടിൽ, ശ്രദ്ധയാ​വ​ശ്യ​മാ​യി​രുന്ന ഭൗതി​ക​മായ, പതിവാ​യി ചെയ്യുന്ന, അല്ലെങ്കിൽ യാന്ത്രിക സ്വഭാ​വ​മുള്ള പല സംഗതി​ക​ളു​ണ്ടാ​യി​രു​ന്നു. തിരു​വെ​ഴു​ത്തു​കൾ പകർത്തി​യെ​ഴു​തു​ന്ന​തി​നുള്ള സാമ​ഗ്രി​കൾ വാങ്ങു​ന്ന​തോ പകർത്തി​യെ​ഴു​തൽവേല തന്നെയോ അതിലുൾപ്പെ​ട്ടി​രു​ന്നി​രി​ക്കാം.

ഇന്ന്‌, സഭയിൽ ശുശ്രൂ​ഷാ​ദാ​സൻമാർ പ്രാധാ​ന്യ​മുള്ള അനേകം വേലകൾ നിർവ​ഹി​ക്കു​ന്നു. സഭാക​ണ​ക്കു​കൾ, പ്രദേ​ശങ്ങൾ എന്നിവ കൈകാ​ര്യം ചെയ്യൽ, മാസി​ക​ക​ളും പുസ്‌ത​ക​ങ്ങ​ളും വിതരണം ചെയ്യൽ, രാജ്യ​ഹാൾ സംരക്ഷണം എന്നിങ്ങ​നെ​യുള്ള പലതും അത്തരം വേലക​ളിൽപ്പെ​ടു​ന്ന​താണ്‌. പ്രാപ്‌തി​യുള്ള ചില ശുശ്രൂ​ഷാ​ദാ​സൻമാ​രെ ചില​പ്പോൾ പഠിപ്പി​ക്കാൻപോ​ലും നിയമി​ച്ചെ​ന്നി​രി​ക്കും. സഭാപു​സ്‌ത​കാ​ധ്യ​യന നിർവ​ഹണം, സേവന​യോഗ പരിപാ​ടി​കൾ കൈകാ​ര്യം ചെയ്യൽ, പരസ്യ​പ്ര​സംഗ നിർവ​ഹണം എന്നിവ​യൊ​ക്കെ അതിലുൾപ്പെ​ട്ടേ​ക്കാം.

മൂപ്പൻമാ​രും ശുശ്രൂ​ഷാ​ദാ​സൻമാ​രും ഒരുമ​യോ​ടെ പ്രവർത്തി​ക്കു​മ്പോൾ സഭയുടെ ആത്മീയ​വും സംഘട​നാ​പ​ര​വു​മായ ആവശ്യങ്ങൾ സമനി​ല​യിൽ നിർവഹിക്ക​പ്പെ​ടു​ന്നു. അപ്പോൾ, സഭാം​ഗങ്ങൾ ആഹ്ലാദ​ചി​ത്ത​രും ബലിഷ്‌ഠ​രും ആത്മീയ​മാ​യി ഫലോ​ത്‌പാ​ദ​ക​രു​മാ​യി​ത്തീ​രു​ന്നു. എഫേ​സോ​സി​ലെ അഭിഷി​ക്തർക്ക്‌ പൗലോസ്‌ എഴുതി​യത്‌ എന്തെന്ന്‌ അനുസ്‌മ​രി​ക്കുക: “ശരീരം മുഴു​വ​നും യുക്തമാ​യി ചേർന്നും ഏകീഭ​വി​ച്ചും ഓരോ അംഗത്തി​ന്റെ അതതു വ്യാപാ​ര​ത്തി​ന്നു ഒത്തവണ്ണം ഉതവി ലഭിപ്പാ​നുള്ള ഏതു സന്ധിയാ​ലും സ്‌നേ​ഹ​ത്തി​ലുള്ള വർദ്ധ​നെ​ക്കാ​യി അവനിൽനി​ന്നു വളർച്ച പ്രാപി​ക്കു​ന്നു.”—എഫെസ്യർ 4:16.

അതു​പോ​ലെ​യു​ള്ള ഒരുമ, അതായത്‌ യോജിപ്പ്‌, ഇണക്കം, സഹകരണം, ഐക്യം എന്നിവ വികസി​പ്പി​ച്ചെ​ടു​ക്കാൻ മൂപ്പൻമാ​രും ശുശ്രൂ​ഷാ​ദാ​സൻമാ​രും കഠിന​മാ​യി പരി​ശ്ര​മി​ക്കണം. എന്നിരു​ന്നാ​ലും, അത്തരം ഒരുമ സ്വതവേ വരുന്നില്ല. അതു നട്ടുവ​ളർത്തേ​ണ്ട​തും ശ്രദ്ധാ​പൂർവം കാത്തു​സൂ​ക്ഷി​ക്കേ​ണ്ട​തു​മാ​കു​ന്നു.

മൂപ്പൻമാർക്കു ചെയ്യാ​വു​ന്നത്‌

യജമാ​ന​നും അടിമ​യും തമ്മിലു​ള്ള​തോ മുതലാ​ളി​യും തൊഴി​ലാ​ളി​യും തമ്മിലു​ള്ള​തോ പോലുള്ള ഒരു ബന്ധമല്ല മൂപ്പനും ശുശ്രൂ​ഷാ​ദാ​സ​നും തമ്മിലു​ള്ളത്‌ എന്നു തിരി​ച്ച​റി​യു​ന്നത്‌ ഒരു സുപ്ര​ധാന സംഗതി​യാണ്‌. യഥാർഥ ഒരുമ​യു​ള്ളി​ടത്ത്‌ മൂപ്പൻമാർ ശുശ്രൂ​ഷാ​ദാ​സൻമാ​രെ ദൈവ​ത്തി​ന്റെ സഹശു​ശ്രൂ​ഷ​ക​രാ​യി വീക്ഷി​ക്കു​ന്നു. (താരത​മ്യം ചെയ്യുക: 1 കൊരി​ന്ത്യർ 3:6-9.) “ബഹുമാ​നി​ക്കു​ന്ന​തിൽ അന്യോ​ന്യം മുന്നി​ട്ടു​കൊൾവിൻ” എന്ന്‌ റോമർ 12:10 പറയുന്നു. അതു​കൊണ്ട്‌, തങ്ങളെ​ക്കാൾ താഴ്‌ന്ന​വ​രോ​ടാണ്‌ തങ്ങൾ ഇടപെ​ടു​ന്നത്‌ എന്ന പ്രതീ​തി​യു​ള​വാ​ക്കും​വി​ധം അല്ലെങ്കിൽ തരംതാ​ഴ്‌ത്തും​വി​ധം ശുശ്രൂ​ഷാ​ദാ​സൻമാ​രോട്‌ ഇടപെ​ടു​ന്നത്‌ മൂപ്പൻമാർ ഒഴിവാ​ക്കു​ന്നു. മുൻക​യ്യെ​ടു​ത്തു പ്രകട​മാ​ക്കുന്ന അവരുടെ ആരോ​ഗ്യ​ക​ര​മായ സ്വഭാ​വത്തെ തകർക്കു​ന്ന​തി​നു​പ​കരം അവർ അവരെ പ്രോ​ത്സാ​ഹി​പ്പി​ക്കു​ന്നു. ശുശ്രൂ​ഷാ​ദാ​സൻമാ​രോട്‌ ആദര​വോ​ടെ ഇടപെ​ടു​മ്പോൾ അത്‌ അവരിലെ ഏററവും നല്ല ഗുണഗ​ണ​ങ്ങളെ വളർത്തു​ക​യും സഭയിലെ അവരുടെ വേല ആസ്വദി​ക്കാൻ അവരെ സഹായി​ക്കു​ക​യും ചെയ്യുന്നു.

തങ്ങളുടെ പരിപാ​ല​ന​യി​ലുള്ള ദൈവ​ത്തി​ന്റെ ആട്ടിൻകൂ​ട്ടത്തെ മേയി​ക്കാൻ നിയമി​ത​രായ മൂപ്പൻമാർ ഒരു സംഗതി മനസ്സിൽപ്പി​ടി​ക്കേ​ണ്ട​താണ്‌, തങ്ങളുടെ ഈ നിയോ​ഗ​ത്തിൻകീ​ഴിൽ ശുശ്രൂ​ഷാ​ദാ​സൻമാ​രാ​യി സേവി​ക്കുന്ന സഹോ​ദ​രൻമാ​രും ഉൾപ്പെ​ടു​ന്നുണ്ട്‌ എന്ന്‌. ശുശ്രൂ​ഷാ​ദാ​സൻമാർ പക്വത​യുള്ള ക്രിസ്‌ത്യാ​നി​ക​ളാ​യി​രി​ക്കണം എന്നതു ശരിതന്നെ. എങ്കിലും, ആടുക​ളിൽ ശേഷി​ക്കു​ന്ന​വ​രെ​പ്പോ​ലെ, കാലാ​കാ​ല​ങ്ങ​ളിൽ ഇവർക്കും വ്യക്തി​പ​ര​മായ ശ്രദ്ധ ലഭി​ക്കേ​ണ്ട​യാ​വ​ശ്യ​മുണ്ട്‌. അവരുടെ ആത്മീയ പുരോ​ഗ​തി​യിൽ മൂപ്പൻമാർക്ക്‌ ആഴമായ താത്‌പ​ര്യ​മു​ണ്ടാ​യി​രി​ക്കണം.

ഉദാഹ​ര​ണ​ത്തിന്‌, അപ്പോ​സ്‌ത​ല​നായ പൗലോസ്‌ യുവാ​വായ തിമോ​ത്തി​യെ കണ്ടമാ​ത്ര​യിൽത്തന്നെ തിമോ​ത്തി​യു​ടെ കഴിവു കണക്കാ​ക്കു​ക​യും “അവൻ തന്നോ​ടു​കൂ​ടെ പോ​രേണം എന്നു പൌ​ലോസ്‌ ഇച്ഛി”ക്കുകയും ചെയ്‌തു. (പ്രവൃ​ത്തി​കൾ 16:3) പൗലോ​സി​ന്റെ സഹയാ​ത്രി​ക​നാ​യി സേവിച്ച തിമോ​ത്തിക്ക്‌ വിലമ​തി​ക്കാ​നാ​വാത്ത പരിശീ​ലനം ലഭിക്കു​ക​യു​ണ്ടാ​യി. വർഷങ്ങൾ കഴിഞ്ഞ്‌ പൗലോസ്‌ കൊരിന്തിലെ ക്രിസ്‌ത്യാ​നി​കൾക്ക്‌ എഴുതി: “കർത്താ​വിൽ വിശ്വ​സ്‌ത​നും എന്റെ പ്രിയ മകനു​മായ തിമൊ​ഥെ​യൊ​സി​നെ നിങ്ങളു​ടെ അടുക്കൽ അയച്ചി​രി​ക്കു​ന്നു. ഞാൻ എങ്ങും ഏതു സഭയി​ലും ഉപദേ​ശി​ക്കു​ന്ന​തു​പോ​ലെ ക്രിസ്‌തു​വി​ലുള്ള എന്റെ വഴികൾ അവൻ നിങ്ങളെ ഓർപ്പി​ക്കും.”—1 കൊരി​ന്ത്യർ 4:17.

മൂപ്പൻമാ​രേ, നിങ്ങൾ നിങ്ങളു​ടെ സഭയിലെ ശുശ്രൂ​ഷാ​ദാ​സൻമാ​രു​ടെ മുഴു പ്രാപ്‌തി​ക​ളും ഉപയോ​ഗ​പ്പെ​ടു​ത്താൻ തുടങ്ങി​യി​ട്ടു​ണ്ടോ? പരസ്യ​പ്ര​സം​ഗ​ത്തി​ലും ബൈബിൾ ഗവേഷ​ണ​ത്തി​ലും വ്യക്തി​പ​ര​മായ പരിശീ​ലനം നൽകി​ക്കൊണ്ട്‌ പുരോ​ഗതി പ്രാപി​ക്കാൻ നിങ്ങൾ അവരെ സഹായി​ക്കു​ന്നു​ണ്ടോ? ഇടയസ​ന്ദർശ​നങ്ങൾ നടത്തു​മ്പോൾ നിങ്ങ​ളോ​ടൊ​പ്പം പോരാൻ യോഗ്യ​ത​യു​ള്ള​വരെ നിങ്ങൾ ക്ഷണിച്ചി​ട്ടു​ണ്ടോ? വയൽസേ​വ​ന​ത്തിൽ നിങ്ങൾ അവരോ​ടൊ​ത്തു പ്രവർത്തി​ക്കാ​റു​ണ്ടോ? “കൊള്ളാം, നല്ലവനും വിശ്വ​സ്‌ത​നു​മായ ദാസനേ!” എന്നാണ്‌ യേശു​വി​ന്റെ താലന്തു​ക​ളു​ടെ ഉപമയി​ലെ യജമാനൻ തന്റെ ദാസൻമാ​രോട്‌ പറഞ്ഞത്‌. (മത്തായി 25:23, NW) അതു​പോ​ലെ, താഴ്‌മ​യോ​ടെ നിയമ​നങ്ങൾ നന്നായി നിർവ​ഹി​ക്കുന്ന ശുശ്രൂ​ഷാ​ദാ​സൻമാ​രെ നിങ്ങളും കലവറ​യി​ല്ലാ​തെ പ്രശം​സി​ക്കു​ക​യും അഭിന​ന്ദി​ക്കു​ക​യും ചെയ്യാ​റു​ണ്ടോ? (താരത​മ്യം ചെയ്യുക: സദൃശ​വാ​ക്യ​ങ്ങൾ 3:27.) അല്ലാത്ത​പക്ഷം, തങ്ങളുടെ വേലയെ വിലമ​തി​ക്കു​ന്നു​ണ്ടെന്ന്‌ അവർ എങ്ങനെ അറിയും?

അതു​പോ​ലെ​ത​ന്നെ മർമ​പ്ര​ധാ​ന​മാണ്‌ ആശയവി​നി​മയം. സ്വര​ചേർച്ച​യോ​ടു​കൂ​ടി​യുള്ള നല്ല ബന്ധമു​ണ്ടാ​ക​ണ​മെ​ങ്കിൽ അതു കൂടിയേ തീരൂ. (താരത​മ്യം ചെയ്യുക: സദൃശ​വാ​ക്യ​ങ്ങൾ 15:22.) തോന്നി​യ​പോ​ലെ​യോ നിർദേ​ശ​ങ്ങ​ളൊ​ന്നും കൊടു​ക്കാ​തെ​യോ ചുമത​ലകൾ ഏൽപ്പി​ക്കു​ക​യോ എടുത്തു​മാ​റ​റു​ക​യോ ചെയ്യരുത്‌. സഭയിൽ ഒരു സഹോ​ദ​രന്റെ പ്രാപ്‌തി​കളെ ഏററവും നന്നായി എങ്ങനെ ഉപയോ​ഗി​ക്കാ​മെന്ന്‌ മൂപ്പൻമാർ പ്രാർഥ​നാ​പൂർവം ചർച്ച​ചെ​യ്യണം. (താരത​മ്യം ചെയ്യുക: മത്തായി 25:15.) ഒരു നിയമനം ഏൽപ്പി​ച്ചു​കൊ​ടു​ക്കു​മ്പോൾ, കൃത്യ​മാ​യി എന്തെല്ലാം ചെയ്യണം എന്നതു സംബന്ധിച്ച്‌ വിശദ​മായ നിർദേ​ശങ്ങൾ അദ്ദേഹ​ത്തി​നു നൽകി​യി​രി​ക്കണം. “വിദഗ്‌ധ​മായ നിർദേ​ശ​മി​ല്ലാ​ത്ത​പ്പോൾ ആളുകൾ വീണു​പോ​കു​ന്നു” എന്ന്‌ സദൃശ​വാ​ക്യ​ങ്ങൾ 11:14 [NW] മുന്നറി​യി​പ്പു നൽകുന്നു.

കണക്കുകൾ, മാസി​കകൾ, അല്ലെങ്കിൽ സാഹി​ത്യം എന്നീ വിഭാ​ഗ​ങ്ങ​ളു​ടെ ചുമത​ലകൾ ഏറെറ​ടു​ത്തു​കൊ​ള്ളൂ എന്ന്‌ വെറു​തെ​യങ്ങ്‌ ഒരു സഹോ​ദ​ര​നോ​ടു പറഞ്ഞാൽ പോരാ. ചില​പ്പോൾ പുതു​താ​യി നിയമി​ത​നായ ഒരു സഹോ​ദ​രനു ലഭിക്കു​ന്നത്‌ കൃത്യ​മ​ല്ലാത്ത അല്ലെങ്കിൽ പൂർത്തീ​ക​രി​ക്കാത്ത ഒരു കൂട്ടം രേഖക​ളാ​യി​രി​ക്കും. എന്തൊരു മനംമ​ടു​പ്പാ​യി​രി​ക്കും അതുള​വാ​ക്കുക! “സകല കാര്യ​ങ്ങ​ളും യോഗ്യ​മാ​യും ക്രമീ​ക​ര​ണ​പ്ര​കാ​ര​വും നടക്കട്ടെ” എന്നാണ്‌ 1 കൊരി​ന്ത്യർ 14:40-ലെ [NW] നിർദേശം. സഭാപ​ര​മായ നടപടി​ക്ര​മ​ങ്ങ​ളു​മാ​യി പരിച​യ​പ്പെ​ടാൻ അവർക്ക്‌ അവസരം നൽകി​ക്കൊ​ണ്ടും അത്തരം നടപടി​ക്ര​മങ്ങൾ പിൻപ​റ​റു​ന്ന​തിൽ തങ്ങൾതന്നെ മാതൃക വെച്ചു​കൊ​ണ്ടും സഹോ​ദ​രൻമാ​രെ പരിശീ​ലി​പ്പി​ക്കാൻ മൂപ്പൻമാർ മുൻക​യ്യെ​ടു​ക്കണം. ഉദാഹ​ര​ണ​ത്തിന്‌, മൂന്നു മാസം കൂടു​മ്പോൾ സഭാക​ണ​ക്കു​കൾ ഓഡി​ററ്‌ ചെയ്യാൻ മൂപ്പൻമാർ ക്രമീ​ക​രണം ചെയ്യേ​ണ്ട​താണ്‌. അത്തരം ഒരു പ്രധാന ക്രമീ​ക​ര​ണത്തെ അവഗണി​ച്ചാൽ അതുമു​ഖാ​ന്തരം പ്രശ്‌നങ്ങൾ പൊന്തി​വ​രു​ക​യും സംഘട​നാ​പ​ര​മായ നിർദേ​ശ​ങ്ങ​ളോ​ടു ശുശ്രൂ​ഷാ​ദാ​സൻമാർക്കുള്ള ആദരവി​നു കോട്ടം​ത​ട്ടു​ക​യും ചെയ്യും.

എന്നാൽ, ഒരു സഹോ​ദരൻ ഒരു പ്രത്യേക നിയമനം നിർവ​ഹി​ക്കുന്ന കാര്യ​ത്തിൽ അനാസ്ഥ കാട്ടു​ന്നെ​ങ്കി​ലോ? എടുപി​ടീന്ന്‌ അദ്ദേഹത്തെ നിയമ​ന​ത്തിൽനി​ന്നു മാററു​കയല്ല വേണ്ടത്‌. പകരം, പ്രസ്‌തുത സംഗതി സംബന്ധിച്ച്‌ അദ്ദേഹ​വു​മാ​യി സംസാ​രി​ക്കണം. ചില​പ്പോൾ പരിശീ​ല​ന​ത്തി​ന്റെ കുറവാ​യി​രി​ക്കാം പ്രശ്‌നം. തന്റെ നിയമനം നിർവ​ഹി​ക്കുന്ന കാര്യ​ത്തിൽ ആ സഹോ​ദ​രനു പിന്നെ​യും ബുദ്ധി​മുട്ട്‌ അനുഭ​വ​പ്പെ​ടു​ന്നെ​ങ്കിൽ, ഒരുപക്ഷേ അദ്ദേഹം മറെറാ​രു നിയമ​ന​ത്തിൽ ശോഭി​ച്ചേ​ക്കാം.

താഴ്‌മ പ്രകട​മാ​ക്കി​ക്കൊ​ണ്ടും മൂപ്പൻമാർക്ക്‌ ഒരുമ ഊട്ടി​വ​ളർത്താ​നാ​വും. “ശാഠ്യ​ത്താ​ലോ ദുരഭി​മാ​ന​ത്താ​ലോ ഒന്നും ചെയ്യാതെ താഴ്‌മ​യോ​ടെ ഓരോ​രു​ത്തൻ മററു​ള്ള​വനെ തന്നെക്കാൾ ശ്രേഷ്‌ഠൻ എന്നു എണ്ണി​ക്കൊൾവിൻ” എന്നു ഫിലി​പ്പി​യർ 2:3 ക്രിസ്‌ത്യാ​നി​കളെ പ്രോ​ത്സാ​ഹി​പ്പി​ക്കു​ന്നു. ഹാളിൽവെച്ച്‌ സേവകൻ ഒരു മൂപ്പ​നോ​ടു മറെറാ​രു സീററി​ലേക്കു മാറി​യി​രി​ക്കാൻ ആവശ്യ​പ്പെ​ടു​മ്പോൾ അദ്ദേഹം അതി​നോ​ടു സഹകരി​ക്കാൻ ശ്രമി​ക്കണം. പകരം, താൻ മൂപ്പനാണ്‌, അതു​കൊണ്ട്‌ അനുസ​രി​ക്കേ​ണ്ട​യാ​വ​ശ്യ​മില്ല എന്നു ന്യായ​വാ​ദം ചെയ്യരുത്‌. ഒരുപക്ഷേ, ഹാളിന്റെ വിവിധ ഭാഗങ്ങ​ളിൽ ഇരുത്താ​നുള്ള നിർദേശം ലഭിച്ച​ത​നു​സ​രിച്ച്‌ പ്രവർത്തി​ക്കുക മാത്ര​മാ​യി​രി​ക്കും സേവകൻ ചെയ്‌തത്‌. എന്നാൽ സകലരും അങ്ങനെ​തന്നെ ചെയ്‌തു​കൊ​ള്ളണം എന്നൊരു നിയമ​മില്ല എന്ന സംഗതി അദ്ദേഹം ഓർക്കണം.a ഒരു ശുശ്രൂ​ഷാ​ദാ​സനെ ഏൽപ്പി​ച്ചി​രി​ക്കുന്ന സംഗതി​ക​ളു​മാ​യി ബന്ധപ്പെട്ട നടപടി​ക്ര​മങ്ങൾ അനാവ​ശ്യ​മാ​യി അവഗണി​ക്കു​ന്നത്‌ ഒരു മൂപ്പൻ ഒഴിവാ​ക്കും.

ഒരുമ​യ്‌ക്കു​വേണ്ടി പ്രവർത്തി​ക്കുന്ന ശുശ്രൂ​ഷാ​ദാ​സൻമാർ

“അതു​പോ​ലെ​തന്നെ ശുശ്രൂ​ഷാ​ദാ​സൻമാർ ഗൗരവ​മു​ള്ള​വ​രാ​യി​രി​ക്കണം,” എന്ന്‌ അപ്പോ​സ്‌ത​ല​നായ പൗലോസ്‌ എഴുതി. (1 തിമോ​ത്തി 3:8, NW) നിയമ​ന​ങ്ങളെ തങ്ങളുടെ വിശു​ദ്ധ​സേ​വ​ന​ത്തി​ന്റെ ഭാഗമാ​യി ഗൗരവ​ത്തോ​ടെ വീക്ഷി​ക്കുക. അങ്ങനെ​യാ​കു​മ്പോൾ പിരി​മു​റു​ക്ക​ങ്ങ​ളു​ണ്ടാ​കു​ന്നതു തടയാൻ അതു വളരെ​യ​ധി​കം സഹായി​ക്കും. നിങ്ങൾ ഒരു ശുശ്രൂഷാദാസനാണെ​ങ്കിൽ, നിങ്ങൾ നിങ്ങളു​ടെ കർത്തവ്യ​ങ്ങൾ ഉത്സാഹ​ത്തോ​ടെ നിവർത്തി​ക്കു​ന്നു​ണ്ടോ? (റോമർ 12:7, 8) നിങ്ങളു​ടെ കർത്തവ്യ​നിർവ​ഹ​ണ​ത്തിൽ പ്രാവീ​ണ്യ​മു​ള്ള​വ​രാ​യി​ത്തീ​രാൻ തക്കവണ്ണം നിങ്ങൾ ആത്മാർഥ​മാ​യി പ്രവർത്തി​ച്ചി​ട്ടു​ണ്ടോ? വിശ്വ​സി​ക്കാ​വു​ന്ന​വ​നും ആശ്രയി​ക്കാ​വു​ന്ന​വ​നു​മാ​ണോ നിങ്ങൾ? നിയമ​ന​ത്തി​ന്റെ കാര്യ​ത്തിൽ മനസ്സൊ​രു​ക്ക​ത്തി​ന്റേ​തായ ഒരു ആത്മാവ്‌ നിങ്ങൾ പ്രകടി​പ്പി​ക്കു​ന്നു​വോ? ഒരു ആഫ്രിക്കൻ രാജ്യത്തെ ഒരു ശുശ്രൂ​ഷാ​ദാ​സൻ സഭയിൽ മൂന്നു വ്യത്യസ്‌ത നിയമ​നങ്ങൾ കൈകാ​ര്യം ചെയ്യുന്നു. അദ്ദേഹ​ത്തി​ന്റെ മനോ​ഭാ​വ​മോ? “അതിനർഥം കൂടുതൽ കഠിന​വേ​ല​യെ​ന്നേ​യു​ള്ളൂ, കഠിന​വേല നിങ്ങളു​ടെ കഥ കഴിക്കു​ക​യൊ​ന്നു​മില്ല” എന്നാണ്‌ അദ്ദേഹം പറയു​ന്നത്‌. തീർച്ച​യാ​യും, അർപ്പി​ത​മായ വിധത്തിൽ വേല​ചെ​യ്യു​ന്ന​വർക്ക്‌ അങ്ങേയ​ററം സന്തുഷ്ടി ലഭിക്കു​ന്നു.—പ്രവൃ​ത്തി​കൾ 20:35.

മൂപ്പൻമാ​രു​മാ​യി പൂർണ​മാ​യി സഹകരി​ച്ചു​കൊണ്ട്‌ ഒരുമ ഊട്ടി​വ​ളർത്തുന്ന കാര്യ​ത്തിൽ നിങ്ങൾക്കു വളരെ​യ​ധി​കം ചെയ്യാ​നാ​വും. “നിങ്ങളെ നടത്തു​ന്ന​വരെ അനുസ​രി​ച്ചു കീഴട​ങ്ങി​യി​രി​പ്പിൻ; അവർ കണക്കു ബോധി​പ്പി​ക്കേ​ണ്ടു​ന്ന​വ​രാ​ക​യാൽ നിങ്ങളു​ടെ ആത്മാക്കൾക്കു​വേണ്ടി ജാഗരി​ച്ചി​രി​ക്കു​ന്നു; ഇതു അവർ ഞരങ്ങി​ക്കൊ​ണ്ടല്ല സന്തോ​ഷ​ത്തോ​ടെ ചെയ്‌വാൻ ഇടവരു​ത്തു​വിൻ; അല്ലാഞ്ഞാൽ നിങ്ങൾക്കു നന്നല്ല” എന്നു എബ്രായർ 13:17 പറയുന്നു. മൂപ്പൻമാർ അപൂർണ​രാണ്‌ എന്നതു ശരിതന്നെ, അവരിൽ കുററം കണ്ടുപി​ടി​ക്കുക എളുപ്പ​മാ​യി​രു​ന്നേ​ക്കാം. എങ്കിലും, വിമർശ​നാ​ത്മ​ക​മായ മനോ​ഭാ​വം വിശ്വാ​സ​മി​ല്ലായ്‌മ വളർത്തും. അതിനു നിങ്ങളു​ടെ സന്തോ​ഷത്തെ കെടു​ത്തി​ക്ക​ള​യാ​നും സഭയിലെ മററു​ള്ള​വരെ പ്രതി​കൂ​ല​മാ​യി ബാധി​ക്കാ​നും കഴിയും. അതു​കൊണ്ട്‌, അപ്പോ​സ്‌ത​ല​നായ പത്രോസ്‌ ഈ ഉപദേശം കൊടു​ത്തു: “അവ്വണ്ണം ഇളയവരേ, മൂപ്പൻമാർക്കു കീഴട​ങ്ങു​വിൻ. എല്ലാവ​രും തമ്മിൽ തമ്മിൽ കീഴടങ്ങി താഴ്‌മ ധരിച്ചു​കൊൾവിൻ . . . അതു​കൊണ്ട്‌ അവൻ തക്കസമ​യത്തു നിങ്ങളെ ഉയർത്തു​വാൻ ദൈവ​ത്തി​ന്റെ ബലമുള്ള കൈക്കീ​ഴു താണി​രി​പ്പിൻ.”—1 പത്രൊസ്‌ 5:5, 6.

ചില സേവന​പ​ദ​വി​കൾ നൽകാതെ നിങ്ങളെ തഴഞ്ഞി​രി​ക്കു​ന്നു എന്നു നിങ്ങൾക്കു തോന്നു​ന്നെ​ങ്കിൽ അത്തരം ബുദ്ധ്യു​പ​ദേശം വിശേ​ഷാൽ സമയോ​ചി​ത​മാണ്‌. നിങ്ങൾ ഒരുപക്ഷേ “മേൽവി​ചാ​ര​കന്റെ പദവി എത്തിപ്പി​ടി​ക്കു”കയായി​രു​ന്നി​രി​ക്കാം, പക്ഷേ ഇതുവരെ നിയമ​ന​മൊ​ന്നു​മു​ണ്ടാ​യി​ല്ലാ​യിരി​ക്കാം. (1 തിമോ​ത്തി 3:1, NW) “ഒരു കാത്തി​രി​പ്പിൻ മനോ​ഭാ​വം” കാത്തു​സൂ​ക്ഷി​ക്കാൻ താഴ്‌മ നിങ്ങളെ സഹായി​ക്കും. (വിലാ​പങ്ങൾ 3:24, NW) മൂപ്പൻമാ​രോട്‌ അമർഷം തോന്ന​രുത്‌. അതു തീർച്ച​യാ​യും നിങ്ങൾക്കി​ട​യി​ലെ നല്ല ബന്ധത്തെ തകരാ​റി​ലാ​ക്കും. അതിനു​പ​കരം, നിങ്ങൾ പുരോ​ഗതി വരുത്തേണ്ട വശങ്ങളു​ണ്ടോ എന്ന്‌ അവരോ​ടു ചോദി​ക്കുക. ബുദ്ധ്യു​പ​ദേശം സ്വീക​രിച്ച്‌ അതു ബാധക​മാ​ക്കാ​നുള്ള നിങ്ങളു​ടെ യഥാർഥ മനസ്സൊ​രു​ക്കത്തെ നിസ്സം​ശ​യ​മാ​യും ആത്മീയ പുരോ​ഗ​തി​യു​ടെ തെളി​വാ​യി വീക്ഷി​ക്കും.

ഒരു ശുശ്രൂ​ഷാ​ദാ​സന്‌ അസാധാ​ര​ണ​മായ പ്രാപ്‌തി​ക​ളോ വിദ്യാ​ഭ്യാ​സ​പ​ര​വും സാമൂ​ഹി​ക​വു​മായ പദവി​ക​ളോ ഉണ്ടെങ്കിൽ അദ്ദേഹം സമനില പാലി​ക്കണം. ഇതു ചെയ്യാൻ ദൈവി​ക​മായ താഴ്‌മ​യും എളിമ​യും അദ്ദേഹത്തെ സഹായി​ക്കും. മൂപ്പൻമാ​രെ കടത്തി​വെ​ട്ടു​ന്ന​തി​നു​വേണ്ടി ശ്രമി​ക്കാ​നോ തന്റെ കഴിവു​ക​ളി​ലേക്കു ശ്രദ്ധ ക്ഷണിക്കാ​നോ ഒക്കെ അദ്ദേഹ​ത്തിന്‌ എന്തൊരു കടുത്ത പ്രേര​ണ​യാ​വും ഉണ്ടാവുക! ‘താഴ്‌മ​യു​ള്ള​വ​രു​ടെ പക്കൽ ജ്ഞാനമുണ്ട്‌’ എന്ന്‌ സദൃശ​വാ​ക്യ​ങ്ങൾ 11:2 നമ്മെ അനുസ്‌മ​രി​പ്പി​ക്കു​ന്നു. താഴ്‌മ​യുള്ള ഒരു സഹോ​ദ​രനു തന്റെ പരിമി​തി​കളെ സംബന്ധി​ച്ചു ബോധ​മു​ണ്ടാ​യി​രി​ക്കും. അണിയ​റ​യിൽ ശാന്തമാ​യി പ്രവർത്തി​ക്കാ​നും തന്റെ പ്രാപ്‌തി​കൾ മൂപ്പൻമാ​രെ പിന്തു​ണ​ക്കു​ന്ന​തി​നാ​യി ഉപയോ​ഗി​ക്കാ​നും അദ്ദേഹ​ത്തി​നു മനസ്സൊ​രു​ക്ക​മു​ണ്ടാ​യി​രി​ക്കും. ലൗകി​ക​മായ വിധത്തിൽ കാര്യ​മായ അറിവു തനിക്കു​ണ്ടെ​ങ്കി​ലും ആത്മീയ ജ്ഞാനത്തി​ന്റെ​യും വിവേ​ച​ന​യു​ടെ​യും പ്രധാന വശങ്ങളിൽ താനി​പ്പോ​ഴും കുറവു​ള്ള​വ​നാണ്‌ എന്നു തിരി​ച്ച​റി​യാൻ അദ്ദേഹത്തെ താഴ്‌മ സഹായി​ക്കും. എന്നാൽ അത്തരം ഗുണങ്ങ​ളിൽ മൂപ്പൻമാർ സമ്പന്നരാ​ണു​താ​നും.—1 കൊരി​ന്ത്യർ 1:26–2:13; ഫിലി​പ്പി​യർ 1:9.

വ്യക്തമാ​യും മൂപ്പൻമാ​രും ശുശ്രൂ​ഷാ​ദാ​സൻമാ​രും മർമ​പ്ര​ധാ​ന​മായ റോളു​ക​ളാ​ണു നിർവ​ഹി​ക്കു​ന്നത്‌. അവർ ഒരുമി​ച്ചാൽ സഭയിലെ എല്ലാവ​രെ​യും കെട്ടു​പ​ണി​ചെ​യ്യുന്ന ലക്ഷ്യത്തിൽ വളരെ​യ​ധി​കം ചെയ്യാ​നാ​വും. പക്ഷേ, അങ്ങനെ ചെയ്യാൻ അവർ കൂട്ടായി ഒരുമ​യോ​ടെ പ്രവർത്തി​ക്കണം. ഒപ്പം, “പൂർണ​വി​ന​യ​ത്തോ​ടും സൌമ്യ​ത​യോ​ടും ദീർഘ​ക്ഷ​മ​യോ​ടും​കൂ​ടെ നടക്കയും സ്‌നേ​ഹ​ത്തിൽ അന്യോ​ന്യം പൊറു​ക്ക​യും ആത്മാവി​ന്റെ ഐക്യത സമാധാ​ന​ബ​ന്ധ​ത്തിൽ കാപ്പാൻ ശ്രമി​ക്ക​യും” വേണം.—എഫെസ്യർ 4:2, 3.

[അടിക്കു​റിപ്പ്‌]

[27-ാം പേജിലെ ചിത്രം]

മൂപ്പൻമാർ ശുശ്രൂ​ഷാ​ദാ​സൻമാ​രെ വീക്ഷി​ക്കു​ന്നത്‌ ദൈവ​ത്തി​ന്റെ സഹശു​ശ്രൂ​ഷ​ക​രാ​യി​ട്ടാണ്‌, അല്ലാതെ കീഴ്‌ജോ​ലി​ക്കാ​രാ​യി​ട്ടല്ല