പാഠം 24
ദൂതന്മാർ ആരാണ്‌? അവർ എന്തു ചെയ്യുന്നു?
യഹോവയുടെ സ്വർഗീയ കുടുംബത്തെക്കുറിച്ച്‌ നമ്മൾ അറിയാൻ യഹോവ ആഗ്രഹിക്കുന്നു. ഈ കുടുംബത്തിലെ അംഗങ്ങളാണ്‌ “ദൈവപുത്രന്മാർ” എന്നു ബൈബിൾ വിളിക്കുന്ന ദൂതന്മാർ. (ഇയ്യോബ്‌ 38:6) ദൂതന്മാരെക്കുറിച്ച്‌ ബൈബിൾ എന്താണ്‌ പറയുന്നത്‌? അവർ എന്താണ്‌ ചെയ്യുന്നത്‌? എല്ലാ ദൂതന്മാരും ദൈവകുടുംബത്തിന്റെ ഭാഗമാണോ?
1. ആരാണ്‌ ദൂതന്മാർ?
ഭൂമി സൃഷ്ടിക്കുന്നതിനുമുമ്പേ യഹോവ ദൂതന്മാരെ സൃഷ്ടിച്ചു. ദൈവത്തെപ്പോലെ അവരെയും നമുക്കു കാണാൻ കഴിയില്ല. അവർ സ്വർഗത്തിൽ ജീവിക്കുന്ന ആത്മവ്യക്തികളാണ്‌. (എബ്രായർ 1:14) ഇങ്ങനെ ലക്ഷക്കണക്കിന്‌ ദൂതന്മാരുണ്ട്‌, അവർക്ക്‌ ഓരോരുത്തർക്കും അവരുടേതായ വ്യക്തിത്വവും ഉണ്ട്‌. (വെളിപാട്‌ 5:11) ഈ ദൂതന്മാർ യഹോവയുടെ ‘വാക്കു കേട്ടനുസരിച്ച്‌ അതു നടപ്പിലാക്കുന്നു.’ (സങ്കീർത്തനം 103:20) മുൻകാലങ്ങളിൽ യഹോവ ദൂതന്മാരെ സന്ദേശങ്ങൾ അറിയിക്കാനും തന്റെ ജനത്തെ സഹായിക്കാനും സംരക്ഷിക്കാനും വേണ്ടി ഉപയോഗിച്ചിട്ടുണ്ട്‌. ദൈവത്തെക്കുറിച്ച്‌ അറിയാൻ ആഗ്രഹിക്കുന്നവരുടെ അടുത്തേക്ക്‌ തന്റെ ദാസന്മാരെ നയിക്കാൻ ഇന്നും ദൈവം ദൂതന്മാരെ ഉപയോഗിക്കുന്നു.
2. സാത്താനും അവന്റെ ഭൂതങ്ങളും ആരാണ്‌?
ചില ദൂതന്മാർ യഹോവയോട്‌ അനുസരണക്കേടു കാണിച്ചു. ഇങ്ങനെ ദൈവത്തോടു ധിക്കാരം കാണിച്ച ആദ്യത്തെ ദൂതൻ ആരായിരുന്നു? “ഭൂലോകത്തെ മുഴുവൻ വഴിതെറ്റിക്കുന്ന” ഈ ദൂതനെ “പിശാച്‌ എന്നും സാത്താൻ എന്നും” ബൈബിൾ വിളിക്കുന്നു. (വെളിപാട്‌ 12:9) മറ്റുള്ളവരെ ഭരിക്കാനായിരുന്നു സാത്താന്റെ ആഗ്രഹം. അതുകൊണ്ട്‌ ആദ്യം അവൻ ആദാമിനെയും ഹവ്വയെയും തന്റെ വശത്താക്കി, പിന്നീട്‌ കുറെ ദൂതന്മാരെയും! ധിക്കാരികളായ ഈ ദൂതന്മാരെയാണ്‌ ഭൂതങ്ങൾ എന്നു വിളിക്കുന്നത്‌. യഹോവ അവരെ സ്വർഗത്തിൽനിന്ന്‌ പുറത്താക്കി ഭൂമിയിലേക്ക്‌ വലിച്ചെറിഞ്ഞു. ഭാവിയിൽ ദൈവം അവരെ നശിപ്പിക്കും.—വെളിപാട്‌ 12:9, 12 വായിക്കുക.
3. സാത്താനും ഭൂതങ്ങളും നമ്മളെ വഴിതെറ്റിക്കുന്നത്‌ എങ്ങനെ?
സാത്താനും ഭൂതങ്ങളും ആളുകളെ വഴിതെറ്റിക്കുന്നതിനുവേണ്ടി ആത്മവിദ്യ അഥവാ ഭൂതവിദ്യ ഉപയോഗിക്കുന്നു. ഭൂതങ്ങളോട്‌ ആശയവിനിമയം നടത്താൻ ശ്രമിക്കുന്ന തെറ്റായ പ്രവൃത്തിയാണ്‌ ഭൂതവിദ്യ. പലരും ഈ യാഥാർഥ്യം തിരിച്ചറിയാതെയാണ്‌ ഇതിൽ ഉൾപ്പെടുന്നത്‌. ഉദാഹരണത്തിന്‌, ചിലർ ജ്യോതിഷക്കാരെയും ഭാവിഫലം പറയുന്നവരെയും മന്ത്രവാദികളെയും മന്ത്രശക്തി ഉപയോഗിച്ച്‌ രോഗങ്ങൾ സൗഖ്യമാക്കുന്നവരെയും സമീപിക്കുന്നു. ഇനി മറ്റു ചിലർ ഭൂതവിദ്യ ഉൾപ്പെട്ട ചികിത്സാരീതികൾ സ്വീകരിക്കുന്നു. മരിച്ചവരോടു സംസാരിക്കാൻപോലും കഴിയുമെന്നാണ്‌ പലരെയും പറഞ്ഞു വിശ്വസിപ്പിച്ചിരിക്കുന്നത്‌. ‘ആത്മാക്കളുടെ ഉപദേശം തേടുന്നവരിലേക്കോ ഭാവി പറയുന്നവരിലേക്കോ തിരിയരുത്‌’ എന്ന്‌ ബൈബിൾ പറയുന്നു. (ലേവ്യ 19:31) സാത്താന്റെയും ഭൂതങ്ങളുടെയും കെണിയിൽപ്പെടാതെ നമ്മളെ സംരക്ഷിക്കാനാണ്‌ യഹോവ ഈ മുന്നറിയിപ്പ്‌ തന്നിരിക്കുന്നത്‌. അവർ ദൈവത്തിന്റെ ശത്രുക്കളാണ്‌. നമുക്കു ദോഷം വരുത്തുക എന്നതാണ്‌ അവരുടെ ആഗ്രഹം.
ആഴത്തിൽ പഠിക്കാൻ
ദൂതന്മാർ ചെയ്യുന്ന നല്ല കാര്യങ്ങളെക്കുറിച്ച്‌ പഠിക്കാം. ഭൂതവിദ്യയുടെ അപകടങ്ങളെക്കുറിച്ച്‌ മനസ്സിലാക്കാം. നമുക്കു സാത്താന്റെയും ഭൂതങ്ങളുടെയും കെണിയിൽ വീഴാതിരിക്കാൻ എങ്ങനെ കഴിയും എന്നും നോക്കാം.
4. യഹോവയെക്കുറിച്ച്‌ മനസ്സിലാക്കാൻ ദൂതന്മാർ ആളുകളെ സഹായിക്കുന്നു
ദൈവത്തിന്റെ ദൂതന്മാർ സന്തോഷവാർത്ത നേരിട്ട്‌ ആളുകളെ അറിയിക്കുന്നില്ല. എന്നാൽ ദൈവത്തെക്കുറിച്ച്‌ അറിയാൻ ആഗ്രഹിക്കുന്നവരുടെ അടുത്തേക്ക്‌ അവർ ദൈവദാസരെ വഴിനയിച്ചേക്കാം. വെളിപാട്‌ 14:6, 7 വായിക്കുക. എന്നിട്ട്‌ ഈ ചോദ്യങ്ങൾ ചർച്ച ചെയ്യുക:
സന്തോഷവാർത്ത പ്രസംഗിക്കാൻ നമുക്കു ദൂതന്മാരുടെ സഹായം വേണ്ടത്‌ എന്തുകൊണ്ടാണ്‌?
ബൈബിളിനെക്കുറിച്ച്‌ അറിയാൻ ആഗ്രഹിക്കുന്നവരുടെ അടുത്തേക്ക്‌ നമ്മളെ വഴിനയിക്കാൻ ദൂതന്മാർക്കു കഴിയും. അത്‌ അറിഞ്ഞപ്പോൾ നിങ്ങൾക്കു എന്താണു തോന്നിയത്‌? എന്തുകൊണ്ട്‌?
5. ഭൂതവിദ്യ ഒഴിവാക്കണം
സാത്താനും ഭൂതങ്ങളും യഹോവയുടെ ശത്രുക്കളാണ്‌. അവർ നമ്മുടെയും ശത്രുക്കളാണ്‌. ലൂക്കോസ്‌ 9:38-42 വായിക്കുക. എന്നിട്ട്‌ ഈ ചോദ്യം ചർച്ച ചെയ്യുക:
ആളുകളോട്‌ എങ്ങനെയാണു ഭൂതങ്ങൾ പെരുമാറുന്നത്‌?
ഭൂതങ്ങളെ നമ്മുടെ ജീവിതത്തിലേക്ക്‌ വിളിച്ചുവരുത്താൻ നമ്മളാരും ആഗ്രഹിക്കില്ല. ആവർത്തനം 18:10-12 വായിക്കുക. എന്നിട്ട്‌ ഈ ചോദ്യങ്ങൾ ചർച്ച ചെയ്യുക:
ഏതൊക്കെ വിധങ്ങളിലാണ്‌ ഭൂതങ്ങൾ നമ്മളെ വഴിതെറ്റിക്കാനും നമ്മളോട്‌ ആശയവിനിമയം നടത്താനും ശ്രമിക്കുന്നത്‌? ഇതുപോലുള്ള എന്തൊക്കെ രീതികളാണ്‌ നമ്മുടെ പ്രദേശത്തുള്ളത്‌?
ഭൂതവിദ്യയോടു ബന്ധപ്പെട്ട കാര്യങ്ങൾ ഒഴിവാക്കണമെന്ന്‌ യഹോവ പറഞ്ഞിരിക്കുന്നതു നമ്മുടെ പ്രയോജനത്തിനാണെന്നു തോന്നുന്നുണ്ടോ? എന്തുകൊണ്ട്‌?
വീഡിയോ കാണുക. അതിനു ശേഷം ഈ ചോദ്യങ്ങൾ ചർച്ച ചെയ്യുക:
പലേസയുടെ മകളുടെ കൈയിൽ കെട്ടിയിരുന്ന ചരട്‌, ദോഷം ചെയ്യുന്നതാണെന്ന്‌ നിങ്ങൾക്കു തോന്നുന്നുണ്ടോ? എന്തുകൊണ്ട്‌?
ഭൂതങ്ങളുടെ ഉപദ്രവത്തിൽനിന്ന്‌ സംരക്ഷണം നേടാൻ പലേസ എന്തു ചെയ്യണമായിരുന്നു?
യഥാർഥ ക്രിസ്‌ത്യാനികൾ എല്ലാകാലത്തും ഭൂതങ്ങളോട്‌ എതിർത്തുനിന്നിട്ടുണ്ട്‌. പ്രവൃത്തികൾ 19:19; 1 കൊരിന്ത്യർ 10:21 എന്നീ വാക്യങ്ങൾ വായിക്കുക. എന്നിട്ട്‌ ഈ ചോദ്യം ചർച്ച ചെയ്യുക:
ഭൂതവിദ്യയുമായി ബന്ധപ്പെട്ട എന്തെങ്കിലും കൈവശം ഉണ്ടെങ്കിൽ അതു പൂർണമായും നശിപ്പിച്ചുകളയേണ്ടത്‌ എന്തുകൊണ്ട്‌?
6. സാത്താനെയും ഭൂതങ്ങളെയും തോൽപ്പിക്കാൻ കഴിയും
സാത്താനാണ്‌ ഭൂതങ്ങളെ ഭരിക്കുന്നത്‌. എന്നാൽ വിശ്വസ്‌തരായ ദൂതന്മാരെ നയിക്കുന്നതു മുഖ്യദൂതനായ മീഖായേലാണ്‌. യേശുവിനുള്ള മറ്റൊരു പേരാണ്‌ ഇത്‌. മീഖായേൽ എത്ര ശക്തനാണ്‌? വെളിപാട്‌ 12:7-9 വായിക്കുക. എന്നിട്ട്‌ ഈ ചോദ്യങ്ങൾ ചർച്ച ചെയ്യുക:
കൂടുതൽ ശക്തർ ആരാണ്‌, മീഖായേലും ദൂതന്മാരും ആണോ അതോ സാത്താനും ഭൂതങ്ങളും ആണോ?
യേശുവിന്റെ അനുഗാമികൾ സാത്താനെയും ഭൂതങ്ങളെയും പേടിക്കേണ്ടതുണ്ടോ? നിങ്ങൾക്ക്‌ എന്തു തോന്നുന്നു?
സാത്താനോടും ഭൂതങ്ങളോടും ഉള്ള പോരാട്ടത്തിൽ നിങ്ങൾക്ക്‌ വിജയിക്കാൻ കഴിയും. യാക്കോബ്‌ 4:7 വായിക്കുക. എന്നിട്ട്‌ ഈ ചോദ്യം ചർച്ച ചെയ്യുക:
സാത്താന്റെയും ഭൂതങ്ങളുടെയും ആക്രമണങ്ങളിൽനിന്ന്‌ സംരക്ഷണം നേടാൻ നിങ്ങൾ എന്തു ചെയ്യണം?
ആരെങ്കിലും ഇങ്ങനെ പറഞ്ഞാൽ: “പ്രേതസിനിമ കാണുന്നതും അതുപോലുള്ള ഗെയിം കളിക്കുന്നതും അത്ര വലിയ കുഴപ്പമുള്ള കാര്യമൊന്നുമല്ല. അതൊക്കെ ഒരു രസമല്ലേ?”
അങ്ങനെ ചിന്തിക്കുന്നതിന്റെ അപകടം എന്താണ്‌?
ചുരുക്കത്തിൽ
വിശ്വസ്‌തരായ ദൂതന്മാർ നമ്മളെ സഹായിക്കുന്നു. എന്നാൽ സാത്താനും ഭൂതങ്ങളും യഹോവയുടെ ശത്രുക്കളാണ്‌. ഭൂതവിദ്യ ഉപയോഗിച്ച്‌ അവർ ഇന്ന്‌ ആളുകളെ വഴിതെറ്റിക്കുന്നു.
ഓർക്കുന്നുണ്ടോ?
യഹോവയെക്കുറിച്ച്‌ പഠിക്കാൻ ദൂതന്മാർ എങ്ങനെയാണ്‌ ആളുകളെ സഹായിക്കുന്നത്‌?
സാത്താനും അവന്റെ ഭൂതങ്ങളും ആരാണ്‌?
ഭൂതവിദ്യയുമായി ബന്ധപ്പെട്ട ഒരു കാര്യവും നമ്മൾ ചെയ്യരുതെന്ന്‌ പറയുന്നത്‌ എന്തുകൊണ്ട്‌?
കൂടുതൽ മനസ്സിലാക്കാൻ
യേശുവാണ്‌ മുഖ്യദൂതനായ മീഖായേൽ എന്നതിനുള്ള തെളിവു നോക്കുക.
പിശാച്‌ നമ്മുടെ ഉള്ളിലെ തിന്മയോ ഏതെങ്കിലും ദുർഗുണമോ അല്ലെന്നു പറയുന്നത്‌ എന്തുകൊണ്ട്‌?
എങ്ങനെയാണ്‌ ഭൂതങ്ങളുടെ പിടിയിൽനിന്ന് ഒരു സ്‌ത്രീ വിട്ടുപോന്നത്?
“അവൾ ജീവിതത്തിന്റെ ഉദ്ദേശ്യം കണ്ടെത്തി” (വീക്ഷാഗോപുരം 1993 ജൂലൈ 1)
ആളുകളെ വിഡ്ഢികളാക്കാൻ സാത്താൻ ഭൂതവിദ്യ ഉപയോഗിക്കുന്നത് എങ്ങനെയാണെന്നു നോക്കുക.