നിങ്ങൾക്ക്‌ ആത്മീയ പുരോ​ഗതി കൈവ​രി​ക്കാ​നാ​കും

യഥാർഥ മൂല്യം തിരി​ച്ച​റി​യാൻ പ്രയാ​സ​മാണ്‌. വജ്രങ്ങ​ളു​ടെ കാര്യ​ത്തിൽ അതു ശരിയാണ്‌. മിനു​ക്കിയ വജ്രം വെട്ടി​ത്തി​ള​ങ്ങു​മെ​ങ്കി​ലും മിനു​ക്കാ​ത്ത​തി​ന്റെ തിളക്കം കുറഞ്ഞി​രി​ക്കും. എങ്കിലും, മിനു​ക്കാത്ത വജ്രത്തി​നു​ള്ളിൽ മനോ​ഹ​ര​മായ ഒരു രത്‌ന​ത്തി​നുള്ള എല്ലാ സാധ്യ​ത​ക​ളും ഒളിഞ്ഞി​രി​ക്കു​ന്നു.

പല വിധങ്ങ​ളി​ലും ക്രിസ്‌ത്യാ​നി​കൾ മിനു​ക്കാത്ത വജ്രങ്ങൾ പോ​ലെ​യാണ്‌. നാം പൂർണ​ത​യിൽനി​ന്നു ബഹുദൂ​രം അകലെ​യാ​ണെ​ങ്കി​ലും യഹോവ വിലമ​തി​ക്കുന്ന ഒരു അന്തഃസ്ഥിത മൂല്യം നമുക്കുണ്ട്‌. വജ്രങ്ങൾപോ​ലെ, നമു​ക്കെ​ല്ലാ​വർക്കും തനതായ ഗുണങ്ങ​ളുണ്ട്‌. ഹൃദയം​ഗ​മ​മായ ആഗ്രഹ​മു​ണ്ടെ​ങ്കിൽ കൂടു​ത​ലായ ആത്മീയ പുരോ​ഗതി കൈവ​രി​ക്കാൻ നമു​ക്കോ​രോ​രു​ത്തർക്കും സാധി​ക്കും. യഹോ​വ​യ്‌ക്കു കൂടുതൽ മഹത്ത്വം കരേറ്റുന്ന വിധത്തിൽ നമ്മുടെ വ്യക്തി​ത്വ​ങ്ങളെ മിനു​ക്കി​യെ​ടു​ക്കാൻ കഴിയും.—1 കൊരി​ന്ത്യർ 10:31.

ഒരു വജ്രം മുറി​ച്ചെ​ടുത്ത്‌ മിനു​ക്കി​ക്ക​ഴി​ഞ്ഞാൽ അതിന്റെ ഗുണങ്ങളെ കൂടു​ത​ലാ​യി പ്രതി​ഫ​ലി​പ്പി​ക്കുന്ന ഒരു പശ്ചാത്ത​ല​ത്തിൽ അതു വെക്കുന്നു. സമാന​മാ​യി, നാം ‘സത്യത്തി​ന്റെ ഫലമായ നീതി​യി​ലും വിശു​ദ്ധി​യി​ലും ദൈവാ​നു​രൂ​പ​മാ​യി സൃഷ്ടി​ക്ക​പ്പെട്ട പുതു​മ​നു​ഷ്യ​നെ ധരിച്ചാൽ’ വ്യത്യ​സ്‌ത​മായ പശ്ചാത്ത​ല​ങ്ങ​ളിൽ അഥവാ നിയമ​ന​ങ്ങ​ളിൽ യഹോ​വ​യ്‌ക്കു നമ്മെ ഉപയോ​ഗി​ക്കാ​നാ​കും.—എഫെസ്യർ 4:20-24.

അത്തരം ആത്മീയ പുരോ​ഗതി സ്വതവേ ഉണ്ടാകു​ന്നില്ല. ഒരു വജ്രം അതിന്റെ സ്വാഭാ​വി​കാ​വ​സ്ഥ​യിൽ ഒരു രത്‌നം​പോ​ലെ വെട്ടി​ത്തി​ള​ങ്ങു​ന്നി​ല്ല​ല്ലോ. നാം ദീർഘ​കാ​ല​മാ​യുള്ള ഒരു ദൗർബ​ല്യം പരിഹ​രി​ക്കു​ക​യോ ഉത്തരവാ​ദി​ത്വം സ്വീക​രി​ക്കു​ന്നതു സംബന്ധിച്ച്‌ മനോ​ഭാ​വ​ത്തിൽ മാറ്റം വരുത്തു​ക​യോ ആത്മീയ​മാ​യി ചടഞ്ഞ ഒരവസ്ഥ​യിൽനി​ന്നു പുറത്തു​വ​രാൻ കഠിന​ശ്രമം നടത്തു​ക​യോ​പോ​ലും ചെയ്യേ​ണ്ട​തു​ണ്ടാ​യി​രി​ക്കാം. എന്നാൽ യഥാർഥ ആഗ്രഹ​മു​ള്ള​പക്ഷം നമുക്കു പുരോ​ഗതി കൈവ​രി​ക്കാ​നാ​കും. എന്തെന്നാൽ നമുക്കു “സാധാ​ര​ണ​യിൽ കവിഞ്ഞ ശക്തി” നൽകാൻ യഹോ​വ​യാം ദൈവ​ത്തി​നു സാധി​ക്കും.—2 കൊരി​ന്ത്യർ 4:7, NW; ഫിലി​പ്പി​യർ 4:13.

യഹോവ തന്റെ ദാസന്മാ​രെ ശക്തീക​രി​ക്കു​ന്നു

വജ്രം മുറിച്ച്‌ രൂപ​പ്പെ​ടു​ത്തി​യെ​ടു​ക്കാൻ സൂക്ഷ്‌മ​മായ അറിവിൽനിന്ന്‌ ഉളവാ​കുന്ന ആത്മവി​ശ്വാ​സം അനിവാ​ര്യ​മാണ്‌. കാരണം, മിനു​ക്കാത്ത വജ്രത്തിൽനിന്ന്‌ ഒരു ഭാഗം മുറി​ച്ചു​മാ​റ്റി​യാൽപ്പി​ന്നെ അത്‌ ഉപയോ​ഗി​ക്കാൻ കഴിയാ​താ​കും. വിലകൂ​ടിയ വജ്രക്കല്ല്‌ മനസ്സി​നി​ണ​ങ്ങുന്ന രൂപത്തിൽ ആക്കി​യെ​ടു​ക്കാൻ അതിന്റെ കുറെ ഭാഗം—ചില​പ്പോൾ മുറി​ക്കാത്ത കല്ലിന്റെ 50 ശതമാ​ന​ത്തോ​ളം പോലും—മുറി​ച്ചു​ക​ള​യേ​ണ്ടി​വ​രും. നമുക്കും വ്യക്തി​ത്വം രൂപ​പ്പെ​ടു​ത്താ​നും ആത്മീയ പുരോ​ഗതി പ്രാപി​ക്കാ​നും സൂക്ഷ്‌മ​പ​രി​ജ്ഞാ​ന​ത്തിൽനി​ന്നു ഉളവാ​കുന്ന ആത്മവി​ശ്വാ​സം ആവശ്യ​മാണ്‌. പ്രത്യേ​കി​ച്ചും യഹോവ നമ്മെ ശക്തീക​രി​ക്കു​മെന്ന ഉറപ്പു​ണ്ടാ​യി​രി​ക്കണം.

എങ്കിലും, നമുക്കു പ്രാപ്‌തി​യി​ല്ലെന്നു തോന്നി​യേ​ക്കാം, അല്ലെങ്കിൽ കൂടുതൽ ചെയ്യാൻ സാധി​ക്കി​ല്ലെന്നു നാം വിചാ​രി​ച്ചേ​ക്കാം. കഴിഞ്ഞ​കാല വിശ്വസ്‌ത ദൈവ​ദാ​സ​ന്മാർക്കും ചില​പ്പോ​ഴൊ​ക്കെ അങ്ങനെ തോന്നി​യി​രു​ന്നു. (പുറപ്പാ​ടു 3:11, 12; 1 രാജാ​ക്ക​ന്മാർ 19:1-4) “ജാതി​കൾക്കു പ്രവാ​ച​ക​നാ​യി” ദൈവ​ത്താൽ നിയോ​ഗി​ക്ക​പ്പെ​ട്ട​പ്പോൾ “എനിക്കു സംസാ​രി​പ്പാൻ അറിഞ്ഞു​കൂ​ടാ; ഞാൻ ബാലന​ല്ലോ” എന്ന്‌ യിരെ​മ്യാവ്‌ പറഞ്ഞു. (യിരെ​മ്യാ​വു 1:5, 6) മിതഭാ​ഷി​യെ​ങ്കി​ലും വിദ്വേ​ഷി​ക​ളായ ആളുകൾക്ക്‌ വളച്ചു​കെ​ട്ടി​ല്ലാത്ത സന്ദേശങ്ങൾ നൽകിയ ഒരു ധീര​പ്ര​വാ​ച​ക​നാ​യി​ത്തീർന്നു യിരെ​മ്യാവ്‌. അത്‌ എങ്ങനെ സാധിച്ചു? യഹോ​വ​യിൽ ആശ്രയി​ക്കാൻ അവൻ പഠിച്ചു. യിരെ​മ്യാവ്‌ പിന്നീട്‌ ഇങ്ങനെ എഴുതി: “യഹോ​വ​യിൽ ആശ്രയി​ക്ക​യും യഹോവ തന്നേ ആശ്രയ​മാ​യി​രി​ക്ക​യും ചെയ്യുന്ന മനുഷ്യൻ ഭാഗ്യ​വാൻ.”—യിരെ​മ്യാ​വു 17:7; 20:11.

സമാന​മാ​യി, തന്നിലാ​ശ്ര​യി​ക്കു​ന്ന​വരെ യഹോവ ഇന്നു ശക്തീക​രി​ക്കു​ന്നു. ആത്മീയ പുരോ​ഗതി വരുത്തു​ന്ന​തിൽ മാന്ദ്യ​മു​ള്ള​വ​നാ​യി​രുന്ന എഡ്വേർഡ്‌a അതു സത്യ​മെന്നു കണ്ടെത്തി. നാലു കുട്ടി​ക​ളു​ടെ പിതാ​വായ അദ്ദേഹം വിശദീ​ക​രി​ക്കു​ന്നു: “ഞാൻ യഹോ​വ​യു​ടെ സാക്ഷി​യാ​യിട്ട്‌ ഒമ്പതു വർഷം കഴിഞ്ഞി​രു​ന്നു. എന്നാൽ ആത്മീയ​മാ​യി പുരോ​ഗ​തി​യൊ​ന്നും വരുത്താ​ത്ത​തു​പോ​ലെ എനിക്കു തോന്നി. പ്രചോ​ദ​ന​വും ആത്മവി​ശ്വാ​സ​വും ഇല്ലാത്ത​താ​യി​രു​ന്നു പ്രശ്‌നം. സ്‌പെ​യി​നി​ലേക്കു താമസം മാറി​യ​പ്പോൾ ഒരു ചെറിയ സഭയോ​ടൊ​ത്താ​യി​രു​ന്നു ഞാൻ സഹവസി​ച്ചത്‌. അവിടെ ഒരു മൂപ്പനും ഒരു ശുശ്രൂ​ഷാ​ദാ​സ​നും മാത്ര​മാ​ണു​ണ്ടാ​യി​രു​ന്നത്‌. ആവശ്യ​മാ​യി വന്നതി​നാൽ പല നിയമ​ന​ങ്ങ​ളും കൈകാ​ര്യം ചെയ്യാൻ മൂപ്പൻ എന്നോട്‌ ആവശ്യ​പ്പെട്ടു. എന്റെ ആദ്യ പ്രസം​ഗ​ങ്ങ​ളും യോഗ​ഭാ​ഗ​ങ്ങ​ളും നടത്തി​യ​പ്പോൾ ഞാൻ വിറച്ചു​പോ​യി. എങ്കിലും, യഹോ​വ​യിൽ ആശ്രയി​ക്കാൻ ഞാൻ പഠിച്ചു. മൂപ്പൻ എപ്പോ​ഴും എന്നെ അഭിന​ന്ദി​ക്കു​ക​യും പുരോ​ഗതി വരുത്താൻ വേണ്ട നിർദേ​ശങ്ങൾ നയപൂർവം നൽകു​ക​യും ചെയ്യു​മാ​യി​രു​ന്നു.

“അതേസ​മയം ഞാൻ എന്റെ വയൽസേവന പ്രവർത്തനം വർധി​പ്പി​ച്ചു. കുടും​ബ​ത്തിൽ മെച്ചമായ ആത്മീയ നേതൃ​ത്വം വഹിച്ചു. തത്‌ഫ​ല​മാ​യി, കുടും​ബ​ത്തി​ലുള്ള സകലർക്കും സത്യം ഏറെ അർഥവ​ത്താ​യി​ത്തീർന്നു. എനിക്കു വളരെ​യ​ധി​കം സംതൃ​പ്‌തി തോന്നി. ഇപ്പോൾ ഞാനൊ​രു ശുശ്രൂ​ഷാ​ദാ​സ​നാണ്‌. ഒരു ക്രിസ്‌തീയ മേൽവി​ചാ​ര​കനു വേണ്ട ഗുണങ്ങൾ വളർത്തി​യെ​ടു​ക്കാൻ ഞാനി​പ്പോൾ കഠിന​മാ​യി ശ്രമി​ക്കു​ന്നു.”

‘പഴയ വ്യക്തി​ത്വം ഉരിഞ്ഞു​ക​ള​യുക’

എഡ്വേർഡ്‌ തിരി​ച്ച​റി​ഞ്ഞ​തു​പോ​ലെ, ആത്മീയ പുരോ​ഗ​തിക്ക്‌ യഹോ​വ​യി​ലുള്ള ആശ്രയം അനിവാ​ര്യ​മാണ്‌. ക്രിസ്‌തു​സ​മാ​ന​മായ “പുതിയ വ്യക്തി​ത്വം” വളർത്തി​യെ​ടു​ക്കു​ന്ന​തും പ്രധാ​ന​മാണ്‌. അതെങ്ങനെ ചെയ്യാ​നാ​കും? പഴയ വ്യക്തി​ത്വ​ത്തി​ന്റെ ഭാഗമായ പ്രവണ​തകൾ ഉരിഞ്ഞു​ക​ള​യുക എന്നതാണ്‌ ആദ്യ പടി. (കൊ​ലൊ​സ്സ്യർ 3:9, 10, NW) ഒരു വജ്രം വെട്ടി​ത്തി​ള​ങ്ങുന്ന ഒരു രത്‌ന​മാ​ക്കി മാറ്റാൻ അതിൽനിന്ന്‌ അനാവശ്യ വസ്‌തു​ക്കൾ നീക്കം ചെയ്യേ​ണ്ട​തു​ള്ള​തു​പോ​ലെ, നമ്മുടെ പുതിയ വ്യക്തി​ത്വം തിളക്ക​മു​ള്ള​താ​ക്കാൻ “ലോക​ത്തി​ന്റെ” മനോ​ഭാ​വങ്ങൾ ഉപേക്ഷി​ക്കേ​ണ്ട​തുണ്ട്‌.—ഗലാത്യർ 4:3.

തങ്ങളിൽനി​ന്നു വളരെ​യ​ധി​കം ആവശ്യ​പ്പെ​ടു​മെന്ന ഭയം നിമിത്തം ഉത്തരവാ​ദി​ത്വം സ്വീക​രി​ക്കാ​നുള്ള മടി അത്തര​മൊ​രു മനോ​ഭാ​വ​മാണ്‌. ഉത്തരവാ​ദി​ത്വം നിർവ​ഹി​ക്കു​ന്ന​തിൽ പ്രവൃത്തി ഉൾപ്പെ​ട്ടി​രി​ക്കു​ന്നു​വെ​ന്നതു സത്യമാണ്‌. എന്നാൽ അതു സംതൃ​പ്‌തി​ദാ​യ​ക​മാണ്‌. (പ്രവൃ​ത്തി​കൾ 20:35 താരത​മ്യം ചെയ്യുക.) ‘അദ്ധ്വാ​നി​ക്കാ​നും പോരാ​ടാ​നും [“തീവ്ര​ശ്രമം ചെയ്യാ​നും,” NW]’ ദൈവ​ഭക്തി നിഷ്‌കർഷി​ക്കു​ന്നു​വെന്ന്‌ പൗലൊസ്‌ സമ്മതിച്ചു. നാം അതു സസന്തോ​ഷം ചെയ്യു​ന്നത്‌ ‘ജീവനുള്ള ദൈവ​ത്തിൽ ആശ വെക്കു​ന്നതു’ നിമി​ത്ത​മാ​ണെന്ന്‌ അവൻ പറഞ്ഞു. സഹക്രി​സ്‌ത്യാ​നി​ക​ളെ​യും മറ്റുള്ള​വ​രെ​യും പ്രതി നാം ചെയ്യുന്ന പ്രവൃത്തി ഒരിക്ക​ലും മറന്നു​ക​ള​യാ​ത്ത​വ​നാണ്‌ ദൈവം.—1 തിമൊ​ഥെ​യൊസ്‌ 4:9, 10; എബ്രായർ 6:10.

ചില വജ്രങ്ങൾ “ഉന്നതമർദം” ഉള്ളവയാണ്‌. അവ രൂപം​കൊണ്ട സമയത്ത്‌ ഉണ്ടായ​താ​ണത്‌. തന്മൂലം ശ്രദ്ധ​യോ​ടെ വേണം അവ കൈകാ​ര്യം ചെയ്യാൻ. എങ്കിലും പോളാ​രി​സ്‌കോപ്‌ എന്ന ഉപകര​ണ​ത്തി​ന്റെ സഹായ​ത്താൽ, വജ്രം മിനു​ക്കു​ന്ന​യാൾക്ക്‌ ഈ ഉന്നതമർദ ഭാഗങ്ങൾ കണ്ടെത്താ​നും ആ കല്ല്‌ വിജയ​ക​ര​മാ​യി രൂപ​പ്പെ​ടു​ത്തി​യെ​ടു​ക്കാ​നും സാധി​ക്കും. നമുക്കും ആന്തരിക ഉന്നതമർദം അല്ലെങ്കിൽ വ്യക്തി​ത്വ​വൈ​ക​ല്യം കണ്ടേക്കാം. നമ്മുടെ പശ്ചാത്ത​ല​മോ വ്രണ​പ്പെ​ടു​ത്തുന്ന എന്തെങ്കി​ലും അനുഭ​വ​മോ ആയിരി​ക്കാം അതിനു കാരണം. നമുക്ക്‌ എന്തു ചെയ്യാൻ കഴിയും? ഒന്നാമ​താ​യി, നാംതന്നെ പ്രശ്‌ന​മെ​ന്തെന്ന്‌ മനസ്സി​ലാ​ക്കി സാധ്യ​മാ​കു​ന്നി​ട​ത്തോ​ളം അതു പരിഹ​രി​ക്കാൻ ദൃഢനി​ശ്ചയം ചെയ്യണം. പ്രാർഥ​ന​യിൽ യഹോ​വ​യു​ടെ മുമ്പാകെ നാം നമ്മുടെ ഭാരങ്ങൾ ഇറക്കി​വെ​ക്കേ​ണ്ട​തുണ്ട്‌. ഒപ്പം ഒരു ക്രിസ്‌തീയ മൂപ്പന്റെ ആത്മീയ സഹായ​വും തേടാ​വു​ന്ന​താണ്‌.—സങ്കീർത്തനം 55:22; യാക്കോബ്‌ 5:14, 15.

അത്തരം ആന്തരിക ഉന്നതമർദം നിക്കൊ​ളാ​സി​നെ ബാധിച്ചു. അദ്ദേഹം വിശദീ​ക​രി​ക്കു​ന്നു: “എന്റെ പിതാവ്‌ ഒരു മദ്യപ​നാ​യി​രു​ന്നു. അദ്ദേഹം എനിക്കും പെങ്ങൾക്കും കുഴപ്പ​ങ്ങ​ളു​ണ്ടാ​ക്കി. . . . വിദ്യാ​ഭ്യാ​സാ​ന​ന്തരം ഞാൻ സൈന്യ​ത്തിൽ ചേർന്നു. എന്നാൽ എന്റെ മത്സരസ്വ​ഭാ​വം പെട്ടെ​ന്നു​തന്നെ എന്നെ കുഴപ്പ​ത്തിൽ ചാടിച്ചു. മയക്കു​മ​രുന്ന്‌ വിറ്റതി​നു സൈനി​കാ​ധി​കൃ​തർ എന്നെ ജയിലി​ലാ​ക്കി. മറ്റൊരു സന്ദർഭ​ത്തിൽ ഞാൻ സൈന്യ​ത്തിൽനിന്ന്‌ ഒളി​ച്ചോ​ടി. ഒടുവിൽ ഞാൻ സൈന്യ​ത്തിൽനി​ന്നു പോ​ന്നെ​ങ്കി​ലും അപ്പോ​ഴും എനിക്കു പ്രശ്‌ന​ങ്ങ​ളു​ണ്ടാ​യി​രു​ന്നു. മയക്കു​മ​രുന്ന്‌ ദുരു​പ​യോ​ഗ​വും മുഴു​ക്കു​ടി​യും നിമിത്തം എന്റെ ജീവിതം ആകെ കുഴഞ്ഞു​മ​റിഞ്ഞ അവസ്ഥയി​ലാ​യി​രു​ന്നു. എങ്കിലും, എനിക്കു ബൈബി​ളിൽ താത്‌പ​ര്യ​മു​ണ്ടാ​യി​രു​ന്നു, ജീവി​ത​ത്തിൽ ഒരു ഉദ്ദേശ്യ​മു​ണ്ടാ​യി​രി​ക്കാ​നും ഞാൻ വാഞ്‌ഛി​ച്ചു. കുറെ കാലത്തി​നു​ശേഷം യഹോ​വ​യു​ടെ സാക്ഷി​ക​ളു​മാ​യി സമ്പർക്ക​ത്തിൽ വന്ന ഞാൻ ജീവി​ത​രീ​തി​ക്കു മാറ്റം വരുത്തി​ക്കൊണ്ട്‌ സത്യം സ്വീക​രി​ച്ചു.

“എന്നിരു​ന്നാ​ലും, എന്റെ വ്യക്തി​ത്വ​ത്തി​ലെ ഒരു അപാകത തിരി​ച്ച​റിഞ്ഞ്‌ അതു പരിഹ​രി​ക്കാൻ വർഷങ്ങൾതന്നെ വേണ്ടി​വന്നു. അധികാ​ര​ത്തോട്‌ എനിക്കു പുച്ഛമാ​യി​രു​ന്നു. ആരെങ്കി​ലും എന്നെ ബുദ്ധ്യു​പ​ദേ​ശി​ക്കു​ക​യാ​ണെ​ങ്കിൽ ഞാൻ അതി​നോ​ടു മറുക്കു​മാ​യി​രു​ന്നു. യഹോ​വ​യാൽ പൂർണ​മാ​യി ഉപയോ​ഗി​ക്ക​പ്പെ​ടാൻ ഞാൻ ആഗ്രഹി​ച്ചെ​ങ്കി​ലും ഈ ദൗർബ​ല്യം എന്നെ തളച്ചു​നിർത്തി. ഒടുവിൽ, സഹാനു​ഭൂ​തി കാട്ടിയ രണ്ടു മൂപ്പന്മാ​രു​ടെ സഹായ​ത്താൽ എന്റെ പ്രശ്‌നം തിരി​ച്ച​റിഞ്ഞ ഞാൻ അവരുടെ സ്‌നേ​ഹ​പു​ര​സ്സ​ര​മായ തിരു​വെ​ഴു​ത്തു ബുദ്ധ്യു​പ​ദേശം ബാധക​മാ​ക്കാൻ തുടങ്ങി. ഇടയ്‌ക്കൊ​ക്കെ കുറച്ച്‌ നീരസം തലപൊ​ക്കാ​റു​ണ്ടെ​ങ്കി​ലും, എന്റെ മത്സരസ്വ​ഭാ​വത്തെ ഞാൻ നിയ​ന്ത്രി​ച്ചി​രി​ക്കു​ന്നു. യഹോവ എന്നോടു ക്ഷമ കാട്ടി​യ​തി​ലും മൂപ്പന്മാർ സ്‌നേ​ഹ​പു​ര​സ്സരം സഹായി​ച്ച​തി​ലും ഞാൻ നന്ദിയു​ള്ള​വ​നാണ്‌. ഞാൻ കൈവ​രിച്ച ആത്മീയ പുരോ​ഗതി ഹേതു​വാ​യി അടുത്ത​യി​ടെ ഞാനൊ​രു ശുശ്രൂ​ഷാ​ദാ​സ​നാ​യി നിയമി​ക്ക​പ്പെട്ടു.”

നിക്കൊ​ളാസ്‌ മനസ്സി​ലാ​ക്കി​യ​തു​പോ​ലെ, ആഴത്തിൽ വേരോ​ടി​യി​രി​ക്കുന്ന മനോ​ഭാ​വങ്ങൾ പിഴു​തു​ക​ള​യുക എളുപ്പമല്ല. സമാന​മായ വെല്ലു​വി​ളി നാമും അഭിമു​ഖീ​ക​രി​ച്ചേ​ക്കാം. ഒരുപക്ഷേ നാം തൊട്ടാ​വാ​ടി​ക​ളാ​യി​രി​ക്കാം. എന്തെങ്കി​ലും അസ്വാ​സ്ഥ്യം മനസ്സി​ലു​ണ്ടാ​യി​രി​ക്കാം, അല്ലെങ്കിൽ നാം സ്വാത​ന്ത്ര്യ​ത്തിന്‌ അമിത പ്രാധാ​ന്യം നൽകു​ന്നു​ണ്ടാ​യി​രി​ക്കാം. തന്മൂലം നാം കാര്യ​മാ​യി ക്രിസ്‌തീയ പുരോ​ഗതി കൈവ​രി​ക്കു​ന്നി​ല്ലെ​ന്നു​വ​രാം. നാറ്റ്‌സ്‌ എന്നു വിളി​ക്കുന്ന കല്ലുക​ളു​ടെ കാര്യ​ത്തിൽ വജ്രം മിനു​ക്കു​ന്ന​വർക്കു സമാന​മായ ഒരനു​ഭ​വ​മാ​ണു​ള്ളത്‌. വജ്ര രൂപവ​ത്‌കരണ സമയത്ത്‌ രണ്ടു കല്ലുകൾ ഉരുകി ഒന്നായി​ത്തീർന്നാണ്‌ ഇവ ഉണ്ടാകു​ന്നത്‌. തത്‌ഫ​ല​മാ​യി, നാറ്റ്‌സു​കൾ വിരു​ദ്ധ​മായ രണ്ടു വളർച്ച​യ​ടു​ക്കു​കൾ ഉള്ളവയാണ്‌. അതു​കൊണ്ട്‌ അവയുടെ അടുക്കു​കൾപ്ര​കാ​രം മുറി​ക്കു​ന്നത്‌ വളരെ ബുദ്ധി​മു​ട്ടാണ്‌. നമ്മുടെ കാര്യ​ത്തിൽ, ഒരുക്ക​മുള്ള മനസ്സിന്റെ “അടുക്കു​കൾ” അഥവാ ചായ്‌വു​കൾ അപൂർണ ജഡത്തിന്റെ “അടുക്കുക”ളുമായി പോരാ​ട്ട​ത്തി​ലാണ്‌. (മത്തായി 26:41; ഗലാത്യർ 5:17) നമ്മുടെ വ്യക്തി​ത്വ​ത്തി​ലെ കുറവു​കൾ പ്രസക്തമല്ല എന്നു വിചാ​രി​ച്ചു​കൊണ്ട്‌ ചില​പ്പോൾ ശ്രമം പാടേ ഉപേക്ഷി​ക്കാൻ നമുക്കു ചായ്‌വു തോന്നി​യേ​ക്കാം. ‘എന്തൊ​ക്കെ​യാ​ണെ​ങ്കി​ലും, കുടും​ബാം​ഗ​ങ്ങ​ളും സുഹൃ​ത്തു​ക്ക​ളും എന്നെ ഇപ്പോ​ഴും സ്‌നേ​ഹി​ക്കു​ന്നു​ണ്ട​ല്ലോ’ എന്നു നാം പറഞ്ഞേ​ക്കാം.

എന്നിരു​ന്നാ​ലും, നാം സഹോ​ദ​ര​ങ്ങളെ സേവി​ക്കു​ക​യും നമ്മുടെ സ്വർഗീയ പിതാ​വി​നെ മഹത്ത്വ​പ്പെ​ടു​ത്തു​ക​യും ചെയ്യണ​മെ​ങ്കിൽ പുതിയ വ്യക്തി​ത്വം ധരിച്ചു​കൊണ്ട്‌ ‘ഉള്ളിലെ ആത്മാവു സംബന്ധ​മാ​യി പുതുക്കം പ്രാപി​ക്കണം.’ ശ്രമം മൂല്യ​വ​ത്താണ്‌. നിക്കൊ​ളാ​സി​നും മറ്റ്‌ നിരവധി പേർക്കും അതു സാക്ഷ്യ​പ്പെ​ടു​ത്താൻ കഴിയും. ഒരു പാഴ്‌വ​സ്‌തു മതി ഒരു വജ്രത്തെ കളങ്കമു​ള്ള​താ​ക്കാ​നെന്ന്‌ വജ്രം മിനു​ക്കു​ന്ന​യാൾക്ക​റി​യാം. സമാന​മാ​യി, നമ്മുടെ വ്യക്തി​ത്വ​ത്തി​ന്റെ ഒരു ബലഹീന വശം അവഗണി​ച്ചാൽ അതു നമ്മുടെ ആത്മീയ ആകാരത്തെ വികൃ​ത​മാ​ക്കും. ഗുരു​ത​ര​മായ ഒരു ബലഹീനത നമ്മുടെ ആത്മീയ പതനത്തി​ലേക്കു നയി​ച്ചേ​ക്കാ​മെ​ന്നത്‌ അതിലും എത്രയോ മോശ​മാണ്‌.—സദൃശ​വാ​ക്യ​ങ്ങൾ 8:33.

നമുക്കു​ള്ളിൽ ഒരു “ജ്വാല” പോലെ

വജ്രം മിനു​ക്കു​ന്ന​യാൾ അതിനു​ള്ളി​ലെ ജ്വാല (തിളക്കം) നിലനിർത്താൻ ശ്രമി​ക്കും. മഴവി​ല്ലി​ന്റെ പ്രതീതി ജനിപ്പി​ക്കുന്ന വിധത്തിൽ പാർശ്വ​ങ്ങൾ ക്രമീ​ക​രി​ച്ചു​കൊ​ണ്ടാണ്‌ അങ്ങനെ ചെയ്യു​ന്നത്‌. വജ്രത്തി​നു​ള്ളിൽ ബഹുവർണ പ്രകാശം തലങ്ങും വിലങ്ങും പ്രതി​ഫ​ലി​ക്കു​ന്നു, അങ്ങനെ വജ്രങ്ങൾ വെട്ടി​ത്തി​ള​ങ്ങും വിധത്തി​ലുള്ള ജ്വാല ഉളവാ​കു​ന്നു. സമാന​മാ​യി, ദൈവാ​ത്മാ​വി​നു നമ്മുടെ ഉള്ളിൽ ഒരു “ജ്വാല” പോലെ ആയിരി​ക്കാൻ കഴിയും.—1 തെസ്സ​ലൊ​നീ​ക്യർ 5:19, NW; പ്രവൃ​ത്തി​കൾ 18:25; റോമർ 12:11.

എന്നാൽ ആത്മീയ പ്രചോ​ദ​ന​ത്തി​ന്റെ ആവശ്യം നമുക്കു തോന്നു​ന്നെ​ങ്കി​ലോ? ആത്മീയ​മാ​യി പ്രചോ​ദി​ത​രാ​യി​ത്തീ​രാൻ എങ്ങനെ കഴിയും? നാം നമ്മുടെ ‘വഴികൾ’ പരിചി​ന്തി​ക്കേ​ണ്ട​തുണ്ട്‌. (സങ്കീർത്തനം 119:59, 60) നമ്മിൽ ആത്മീയ മാന്ദ്യം ഉളവാ​ക്കുന്ന സംഗതി​കൾ തിരി​ച്ച​റി​യു​ന്ന​തും ഏതു ദിവ്യാ​ധി​പത്യ പ്രവർത്ത​ന​ങ്ങ​ളി​ലാണ്‌ നാം സജീവ​മാ​യി പങ്കുപ​റ്റേ​ണ്ട​തെന്നു നിർണ​യി​ക്കു​ന്ന​തും അതിൽ ഉൾപ്പെ​ടു​ന്നു. നിരന്ത​ര​മായ വ്യക്തിഗത പഠനത്തി​ലൂ​ടെ​യും മുട്ടി​പ്പാ​യുള്ള പ്രാർഥ​ന​യി​ലൂ​ടെ​യും ആത്മീയ വിലമ​തിപ്പ്‌ വർധി​പ്പി​ക്കാൻ സാധി​ക്കും. (സങ്കീർത്തനം 119:18, 32; 143:1, 5, 8, 10) തന്നെയു​മല്ല, വിശ്വാ​സ​ത്തിൽ കഠിനാ​ധ്വാ​നം ചെയ്യു​ന്ന​വ​രോ​ടു കൂടെ സഹവസി​ക്കു​ന്ന​തി​നാൽ യഹോ​വയെ തീക്ഷ്‌ണ​മാ​യി സേവി​ക്കാ​നുള്ള നമ്മുടെ തീരു​മാ​നം ബലിഷ്‌ഠ​മാ​ക്ക​പ്പെ​ടും.—തീത്തൊസ്‌ 2:14.

ലോവിസ്‌ എന്ന ക്രിസ്‌തീയ യുവതി ഇങ്ങനെ സമ്മതി​ച്ചു​പ​റഞ്ഞു: “ഒരു പയനി​യ​റാ​യി അഥവാ മുഴു​സമയ രാജ്യ​ഘോ​ഷ​ക​യാ​യി പേർ ചാർത്തു​ന്ന​തി​നു മുമ്പ്‌ രണ്ടു വർഷ​ത്തോ​ളം ഞാൻ അതേക്കു​റി​ച്ചു പരിചി​ന്തി​ച്ചു. യാതൊ​ന്നും എനിക്കു പ്രതി​ബ​ന്ധ​മാ​യി ഉണ്ടായി​രു​ന്നില്ല. എന്റേത്‌ തീർത്തും അനായാ​സ​ക​ര​മായ ഒരു പട്ടിക​യാ​യി​രു​ന്നു. അതിൽനി​ന്നു പുറത്തു​ക​ട​ക്കാൻ ഞാൻ ശ്രമി​ച്ചില്ല. അങ്ങനെ​യി​രി​ക്കെ പെട്ടെ​ന്നാ​യി​രു​ന്നു ഡാഡി​യു​ടെ മരണം. ജീവൻ എത്ര ലോല​മാ​ണെന്നു ഞാൻ മനസ്സി​ലാ​ക്കി. സമയം ഞാൻ നന്നായി വിനി​യോ​ഗി​ക്കു​ന്നി​ല്ല​ല്ലോ​യെ​ന്നും തിരി​ച്ച​റി​ഞ്ഞു. അതു​കൊണ്ട്‌ എന്റെ ആത്മീയ വീക്ഷണ​ത്തി​നു ഞാൻ മാറ്റം വരുത്തി, സേവനം വർധി​പ്പി​ച്ചു, അങ്ങനെ ഒരു നിരന്തര പയനി​യ​റാ​യി​ത്തീർന്നു. എന്റെ ആത്മീയ സഹോ​ദ​രീ​സ​ഹോ​ദ​ര​ന്മാർ വയൽസേവന ക്രമീ​ക​ര​ണ​ങ്ങളെ പിന്തു​ണ​യ്‌ക്കു​ക​യും ശുശ്രൂ​ഷ​യിൽ എന്നോ​ടൊ​പ്പം പതിവാ​യി പോരു​ക​യും ചെയ്‌തത്‌ ഇക്കാര്യ​ത്തിൽ പ്രത്യേ​കി​ച്ചും സഹായ​മാ​യി. നമ്മു​ടെ​യും നമ്മുടെ സഹകാ​രി​ക​ളു​ടെ​യും മൂല്യ​ങ്ങ​ളും ലക്ഷ്യങ്ങ​ളും നല്ലതോ മോശ​മോ ആയിരു​ന്നാ​ലും ഒന്നു തന്നെയാ​ണെന്ന്‌ ഞാൻ മനസ്സി​ലാ​ക്കി​യി​രി​ക്കു​ന്നു.”

ഇരുമ്പി​നാ​ലെ​ന്ന​പോ​ലെ മൂർച്ച കൂട്ടുന്നു

ഭൂമി​യിൽ സ്വാഭാ​വി​ക​മാ​യുള്ള പദാർഥ​ങ്ങ​ളിൽ ഏറ്റവും കടുപ്പ​മു​ള്ളത്‌ വജ്രത്തി​നാണ്‌. അതു​കൊണ്ട്‌ ഒരു വജ്രം മുറി​ക്ക​ണ​മെ​ങ്കിൽ മറ്റൊരു വജ്രം ആവശ്യ​മാണ്‌. ഇത്‌, “ഇരിമ്പു ഇരിമ്പി​ന്നു മൂർച്ച​കൂ​ട്ടു​ന്നു; മനുഷ്യൻ മനുഷ്യ​ന്നു മൂർച്ച​കൂ​ട്ടു​ന്നു” എന്ന സദൃശ​വാ​ക്യം ബൈബിൾ വിദ്യാർഥി​ക​ളു​ടെ മനസ്സി​ലേക്കു കൊണ്ടു​വ​ന്നേ​ക്കാം. (സദൃശ​വാ​ക്യ​ങ്ങൾ 27:17) ഒരു മമനു​ഷ്യ​ന്റെ ‘മൂർച്ച​കൂ​ട്ടാൻ’ കഴിയു​ന്നത്‌ എങ്ങനെ​യാണ്‌? ഒരു കഷണം ഇരുമ്പു​കൊണ്ട്‌ അതേ ലോഹ​ത്തിൽ തീർത്ത ഒരു കത്തി മൂർച്ച​യു​ള്ള​താ​ക്കാൻ കഴിയു​ന്ന​തു​പോ​ലെ, ഒരു വ്യക്തി​യു​ടെ ബൗദ്ധി​ക​വും ആത്മീയ​വു​മായ അവസ്ഥ മൂർച്ച​യു​ള്ള​താ​ക്കാൻ മറ്റൊ​രാൾക്കു കഴി​ഞ്ഞേ​ക്കാം. ഉദാഹ​ര​ണ​ത്തിന്‌, നിരാശ നിമിത്തം വിഷാദം അനുഭ​വ​പ്പെ​ടു​ക​യാ​ണെ​ങ്കിൽ മറ്റൊരു വ്യക്തി​യു​ടെ പ്രോ​ത്സാ​ഹ​ന​വാ​ക്കു​കൾ ഫലം ചെയ്‌തേ​ക്കാം. വിഷാദം മാറി നമ്മുടെ മുഖത്ത്‌ പ്രസരിപ്പ്‌ പരന്നേ​ക്കാം. തീക്ഷ്‌ണ​ത​യുള്ള പുതിയ പ്രവർത്ത​ന​ങ്ങൾക്കാ​യി നമുക്ക്‌ ഉത്സാഹ​മു​ള്ള​വ​രാ​യി​രി​ക്കാൻ സാധി​ക്കും. (സദൃശ​വാ​ക്യ​ങ്ങൾ 13:12) പുരോ​ഗതി വരുത്താ​നാ​വ​ശ്യ​മായ തിരു​വെ​ഴു​ത്തു പ്രോ​ത്സാ​ഹ​ന​വും ബുദ്ധ്യു​പ​ദേ​ശ​വും നൽകി​ക്കൊണ്ട്‌ സഭാമൂ​പ്പ​ന്മാർക്കു വിശേ​ഷാൽ സഹായി​ക്കാൻ സാധി​ക്കും. ശലോ​മോൻ പ്രസ്‌താ​വിച്ച തത്ത്വം അവർ പിൻപ​റ്റു​ന്നു: “ജ്ഞാനിയെ പ്രബോ​ധി​പ്പിക്ക, അവന്റെ ജ്ഞാനം വർദ്ധി​ക്കും; നീതി​മാ​നെ ഉപദേ​ശിക്ക അവൻ വിദ്യാ​ഭി​വൃ​ദ്ധി പ്രാപി​ക്കും.”—സദൃശ​വാ​ക്യ​ങ്ങൾ 9:9.

തീർച്ച​യാ​യും, ആത്മീയ പരിശീ​ല​ന​ത്തി​നു സമയമാ​വ​ശ്യ​മാണ്‌. അപ്പോ​സ്‌ത​ല​നായ പൗലൊസ്‌ പത്തില​ധി​കം വർഷം തന്റെ അനുഭ​വ​പ​രി​ച​യ​വും പഠിപ്പി​ക്കൽ രീതി​ക​ളും തിമൊ​ഥെ​യൊ​സു​മാ​യി പങ്കു​വെച്ചു. (1 കൊരി​ന്ത്യർ 4:17; 1 തിമൊ​ഥെ​യൊസ്‌ 4:6, 16) മോശ 40-വർഷ കാലയ​ള​വിൽ യോശു​വ​യ്‌ക്കു നൽകിയ പരിശീ​ലനം വളരെ​ക്കാ​ലം ഇസ്രാ​യേൽ ജനത്തിനു പ്രയോ​ജനം ചെയ്‌തു. (യോശുവ 1:1, 2; 24:29, 31) പ്രവാ​ച​ക​നായ ഏലീയാ​വി​ന്റെ കൂടെ ഒരുപക്ഷേ 6 വർഷ​ത്തോ​ളം ഉണ്ടായി​രു​ന്നത്‌ എലീശാ​യു​ടെ 60 വർഷ​ത്തോ​ളം നീണ്ടു​നിന്ന ശുശ്രൂ​ഷ​യ്‌ക്ക്‌ ഒരു നല്ല അടിസ്ഥാ​ന​മാ​യി ഉതകി. (1 രാജാ​ക്ക​ന്മാർ 19:21; 2 രാജാ​ക്ക​ന്മാർ 3:11) ക്ഷമാപൂർവം തുടർച്ച​യായ പരിശീ​ലനം നൽകി​ക്കൊണ്ട്‌ മൂപ്പന്മാർ പൗലൊ​സി​ന്റെ​യും മോശ​യു​ടെ​യും ഏലീയാ​വി​ന്റെ​യും മാതൃക പിൻപ​റ്റു​ന്നു.

അനു​മോ​ദ​നം പരിശീ​ല​ന​ത്തി​ന്റെ ഒരു പ്രധാന ഭാഗമാണ്‌. നന്നായി നിർവ​ഹി​ക്കുന്ന നിയമ​ന​ങ്ങ​ളെ​യോ സ്‌തു​ത്യർഹ​മായ പ്രവൃ​ത്തി​ക​ളെ​യോ പ്രതി​യുള്ള ഹൃദയം​ഗ​മ​മായ വിലമ​തി​പ്പിൻ വാക്കുകൾ ദൈവത്തെ കൂടുതൽ തിക​വോ​ടെ സേവി​ക്കാൻ മറ്റുള്ള​വരെ പ്രേരി​പ്പി​ച്ചേ​ക്കാം. അനു​മോ​ദനം ആത്മവി​ശ്വാ​സം വർധി​പ്പി​ക്കു​ന്നു. ക്രമത്തിൽ അത്‌ ദൗർബ​ല്യ​ങ്ങൾ പരിഹ​രി​ക്കു​ന്ന​തി​നു പ്രചോ​ദി​പ്പി​ക്കു​ന്നു. (1 കൊരി​ന്ത്യർ 11:2 താരത​മ്യം ചെയ്യുക.) രാജ്യ​പ്ര​സം​ഗ​വേ​ല​യി​ലും സഭാപ​ര​മായ മറ്റു പ്രവർത്ത​ന​ങ്ങ​ളി​ലും ഉത്സാഹ​ത്തോ​ടെ വ്യാപ​രി​ക്കു​ന്ന​തി​നാ​ലും സത്യത്തിൽ പുരോ​ഗതി വരുത്താ​നുള്ള പ്രോ​ത്സാ​ഹനം ലഭിക്കു​ന്നു. (പ്രവൃ​ത്തി​കൾ 18:5) ആത്മീയ പുരോ​ഗ​തിക്ക്‌ അനുസൃ​ത​മാ​യി മൂപ്പന്മാർ സഹോ​ദ​ര​ന്മാ​രെ ഉത്തരവാ​ദി​ത്വം ഏൽപ്പി​ക്കു​മ്പോൾ അതവർക്ക്‌ വില​യേ​റിയ അനുഭ​വ​ജ്ഞാ​നം നൽകു​ക​യും ആത്മീയ​മാ​യി പുരോ​ഗ​മി​ച്ചു​കൊ​ണ്ടി​രി​ക്കാ​നുള്ള അവരുടെ ആഗ്രഹത്തെ ശക്തീക​രി​ക്കു​ക​യും ചെയ്യും.—ഫിലി​പ്പി​യർ 1:8, 9.

ആത്മീയ പുരോ​ഗതി കൈവ​രി​ക്കു​ന്ന​തി​നുള്ള നല്ല കാരണം

വജ്രങ്ങൾ അമൂല്യ​മാ​യി കരുത​പ്പെ​ടു​ന്നു. യഹോ​വ​യു​ടെ ആരാധ​ക​രു​ടെ ലോക​വ്യാ​പക കുടും​ബ​ത്തോ​ടൊ​പ്പം ഇപ്പോൾ സഹവസി​ച്ചു​കൊ​ണ്ടി​രി​ക്കു​ന്ന​വ​രു​ടെ കാര്യ​ത്തി​ലും അതു സത്യമാണ്‌. വാസ്‌ത​വ​ത്തിൽ, ദൈവം​തന്നെ അവരെ “അഭികാ​മ്യ”മായ അഥവാ “വിലപ്പെട്ട” വസ്‌തു​ക്കൾ എന്നു വിളി​ക്കു​ന്നു. (ഹഗ്ഗായി 2:7, NW അടിക്കു​റിപ്പ്‌) കഴിഞ്ഞ വർഷം 3,75,923 പേർ സ്‌നാ​പ​ന​മേറ്റ്‌ യഹോ​വ​യു​ടെ സാക്ഷി​ക​ളാ​യി​ത്തീർന്നു. ഈ വളർച്ച​യ്‌ക്കൊത്ത്‌ ‘കൂടാരം വിശാ​ലമാ’ക്കേണ്ടതുണ്ട്‌. ക്രിസ്‌തീയ സേവന​പ​ദ​വി​കൾ എത്തിപ്പി​ടി​ച്ചു​കൊണ്ട്‌ ആത്മീയ​മാ​യി പുരോ​ഗതി പ്രാപി​ക്കു​ന്ന​തി​ലൂ​ടെ ഈ വികസ​ന​ത്തി​നാ​യി കരുതു​ന്ന​തിൽ ഒരു പങ്കുണ്ടാ​യി​രി​ക്കാൻ സാധി​ക്കും.—യെശയ്യാ​വു 54:2; 60:22.

ബാങ്കിലെ ലോക്ക​റു​കൾക്കു​ള്ളിൽ ആരും കാണാതെ ഭദ്രമാ​യി വെച്ചി​രി​ക്കുന്ന അനേകം വജ്രങ്ങ​ളിൽനി​ന്നു വ്യത്യ​സ്‌ത​മാ​യി, നമ്മുടെ ആത്മീയ മൂല്യ​ത്തിന്‌ ഉജ്ജ്വല​മാ​യി പ്രശോ​ഭി​ക്കാൻ കഴിയും. നമ്മുടെ ക്രിസ്‌തീയ ഗുണങ്ങൾ പതിവാ​യി മിനു​ക്കി​യെ​ടുത്ത്‌ പ്രദർശി​പ്പി​ക്കു​മ്പോൾ നാം യഹോ​വ​യെ​യാ​യി​രി​ക്കും മഹത്ത്വ​പ്പെ​ടു​ത്തു​ന്നത്‌. യേശു തന്റെ അനുഗാ​മി​കളെ ഇങ്ങനെ ഉദ്‌ബോ​ധി​പ്പി​ച്ചു: “മനുഷ്യർ നിങ്ങളു​ടെ നല്ല പ്രവൃ​ത്തി​കളെ കണ്ടു, സ്വർഗ്ഗ​സ്ഥ​നായ നിങ്ങളു​ടെ പിതാ​വി​നെ മഹത്വ​പ്പെ​ടു​ത്തേ​ണ്ട​തി​ന്നു നിങ്ങളു​ടെ വെളിച്ചം അവരുടെ മുമ്പിൽ പ്രകാ​ശി​ക്കട്ടെ.” (മത്തായി 5:16) തീർച്ച​യാ​യും, ആത്മീയ പുരോ​ഗതി കൈവ​രി​ക്കു​ന്ന​തി​നുള്ള ഈടുറ്റ കാരണ​മാ​ണത്‌.

[അടിക്കു​റിപ്പ്‌]