തളർന്നു പിന്മാ​റ​രുത്‌!

“നന്മ ചെയ്‌ക​യിൽ നാം മടുത്തു​പോ​ക​രു​തു; തളർന്നു​പോ​കാ​ഞ്ഞാൽ തക്കസമ​യത്തു നാം കൊയ്യും.”—ഗലാത്യർ 6:9.

1, 2. (എ) ഒരു സിംഹം ഏതെല്ലാം വിധങ്ങ​ളി​ലാണ്‌ ഇരപി​ടി​ക്കു​ന്നത്‌? (ബി) പ്രത്യേ​കി​ച്ചും ആരെ ഇരയാ​ക്കു​ന്ന​തി​ലാ​ണു പിശാച്‌ തത്‌പ​ര​നാ​യി​രി​ക്കു​ന്നത്‌?

ഒരു സിംഹം നാനാ​വി​ധ​ങ്ങ​ളിൽ ഇരപി​ടി​ക്കു​ന്നു. ചില​പ്പോ​ഴൊ​ക്കെ അത്‌ വെള്ളം തളം​കെ​ട്ടി​ക്കി​ട​ക്കു​ന്നി​ട​ത്തോ നടപ്പാ​ത​കൾക്ക​രി​കി​ലോ പതിയി​രുന്ന്‌ ഇരയെ പിടി​ക്കു​ന്നു. എന്നാൽ മറ്റുചി​ല​പ്പോൾ ഒരു സിംഹം “കേവലം ഒരു സാഹച​ര്യ​ത്തെ മുത​ലെ​ടു​ക്കു​ന്നു—ഉദാഹ​ര​ണ​ത്തിന്‌, ഉറങ്ങി​ക്കി​ട​ക്കുന്ന ഒരു വരയൻകു​തി​ര​ക്കു​ട്ടി​യു​ടെ മേൽ ചാടി​വീ​ഴു​ന്നു” എന്ന്‌ പോർ​ട്ട്രേ​റ്റ്‌സ്‌ ഇൻ ദ വൈൽഡ്‌ എന്ന പുസ്‌തകം പറയുന്നു.

² നമ്മുടെ “പ്രതി​യോ​ഗി​യായ പിശാചു അലറുന്ന സിംഹം എന്നപോ​ലെ ആരെ വിഴു​ങ്ങേണ്ടു എന്നു തിരിഞ്ഞു ചുറ്റി​ന​ട​ക്കു​ന്നു” എന്ന്‌ അപ്പോ​സ്‌ത​ല​നായ പത്രോസ്‌ വിശദീ​ക​രി​ക്കു​ന്നു. (1 പത്രൊസ്‌ 5:8) അൽപ്പസ​മ​യമേ തനിക്ക്‌ അവശേ​ഷി​ക്കു​ന്നു​ള്ളൂ എന്നറി​ഞ്ഞു​കൊണ്ട്‌, യഹോ​വയെ സേവി​ക്കു​ന്ന​തിൽനി​ന്നു മനുഷ്യ​രെ അകറ്റാൻ സാത്താൻ അങ്ങേയറ്റം സമ്മർദം ചെലു​ത്തി​ക്കൊ​ണ്ടി​രി​ക്കു​ക​യാണ്‌. എന്നിരു​ന്നാ​ലും, ഈ “അലറുന്ന സിംഹം” യഹോ​വ​യു​ടെ ദാസരെ ഇരയാ​ക്കു​ന്ന​തിൽ പ്രത്യേ​കം തത്‌പ​ര​നാണ്‌. (വെളി​പ്പാ​ടു 12:12, 17) അവന്റെ ഇരപി​ടി​ക്കൽ രീതികൾ മൃഗ​ലോ​ക​ത്തുള്ള തന്റെ പ്രതി​രൂ​പ​ത്തി​നു സമാന​മാണ്‌. അതെങ്ങനെ?

3, 4. (എ) യഹോ​വ​യു​ടെ ദാസരെ ഇരയാ​ക്കു​ന്ന​തി​നു സാത്താൻ ഉപയോ​ഗി​ക്കുന്ന രീതികൾ ഏവ? (ബി) ഇത്‌ ഇടപെ​ടാൻ പ്രയാ​സ​മേ​റിയ “ദുർഘ​ട​സ​മയങ്ങ”ൾ ആയതി​നാൽ എന്തു ചോദ്യ​ങ്ങ​ളാണ്‌ ഉയർന്നു​വ​രു​ന്നത്‌?

³ നാം യഹോ​വയെ സേവി​ക്കു​ന്നതു നിർത്തി​ക്ക​ള​യു​ന്ന​തിന്‌, നമ്മുടെ നിർമ​ല​തയെ തകർക്കാ​നുള്ള ലക്ഷ്യത്തിൽ പീഡന​മോ എതിർപ്പോ ഇളക്കി​വി​ട്ടു​കൊണ്ട്‌, ചില​പ്പോ​ഴൊ​ക്കെ സാത്താൻ പതിയി​രു​ന്നു പിടി​ക്കാൻ ശ്രമി​ക്കു​ന്നു. (2 തിമൊ​ഥെ​യൊസ്‌ 3:12) എന്നാൽ മറ്റു സമയങ്ങ​ളിൽ പിശാച്‌ സിംഹ​ത്തെ​പ്പോ​ലെ കേവലം ഒരു സാഹച​ര്യ​ത്തെ മുത​ലെ​ടു​ക്കു​ന്നു. നാം നിരു​ത്സാ​ഹ​പ്പെ​ടു​ക​യോ തളരു​ക​യോ ചെയ്യു​ന്ന​തു​വരെ അവൻ കാത്തി​രി​ക്കു​ന്നു. എന്നിട്ട്‌, നാം തളർന്നു പിന്മാ​റ​ത്ത​ക്ക​വി​ധം നമ്മുടെ തകർന്ന വൈകാ​രിക അവസ്ഥയെ അവൻ മുത​ലെ​ടു​ക്കു​ന്നു. നാം എളുപ്പ​ത്തിൽ അവന്‌ ഇരയാ​കാൻ പാടില്ല!

⁴ എങ്കിലും, മുഴു മാനവ ചരി​ത്ര​ത്തി​ലെ​യും ഏറ്റവും ദുഷ്‌ക​ര​മായ കാലഘ​ട്ട​ത്തി​ലാ​ണു നാം ഇന്നു ജീവി​ക്കു​ന്നത്‌. ഇടപെ​ടാൻ പ്രയാ​സ​മേ​റിയ ഈ “ദുർഘ​ട​സ​മയങ്ങ”ളിൽ നമ്മില​നേ​കർക്കും ചില​പ്പോ​ഴൊ​ക്കെ നിരു​ത്സാ​ഹ​മോ വിഷാ​ദ​മോ അനുഭ​വ​പ്പെ​ട്ടെ​ന്നു​വ​രാം. (2 തിമൊ​ഥെ​യൊസ്‌ 3:1) അപ്പോൾ, പിശാ​ചിന്‌ എളുപ്പ​ത്തിൽ ഇരയാ​ക​ത്ത​ക്ക​വി​ധം ക്ഷീണി​ത​രാ​കു​ന്നതു നമു​ക്കെ​ങ്ങനെ ഒഴിവാ​ക്കാൻ കഴിയും? അതേ, “നന്മ ചെയ്‌ക​യിൽ നാം മടുത്തു​പോ​ക​രു​തു; തളർന്നു​പോ​കാ​ഞ്ഞാൽ തക്കസമ​യത്തു നാം കൊയ്യും” എന്ന പൗലോസ്‌ അപ്പോ​സ്‌ത​ലന്റെ നിശ്വസ്‌ത ബുദ്ധ്യു​പ​ദേശം നമു​ക്കെ​ങ്ങനെ പിൻപ​റ്റാൻ കഴിയും?—ഗലാത്യർ 6:9.

മറ്റുള്ളവർ നമ്മെ നിരാ​ശ​പ്പെ​ടു​ത്തു​മ്പോൾ

5. ദാവീ​ദി​നെ തളർന്നു​പോ​കാൻ ഇടയാ​ക്കി​യ​തെന്ത്‌, എന്നാൽ അവൻ എന്തു ചെയ്‌തില്ല?

⁵ ബൈബിൾ കാലങ്ങ​ളിൽ യഹോ​വ​യു​ടെ ഏറ്റവും വിശ്വസ്‌ത ദാസർക്കു​പോ​ലും ചില​പ്പോ​ഴൊ​ക്കെ ഹൃദയ​ഭാ​രം അനുഭ​വ​പ്പെ​ട്ടി​ട്ടു​ണ്ടാ​കാം. “എന്റെ ഞരക്കം​കൊ​ണ്ടു ഞാൻ തകർന്നി​രി​ക്കു​ന്നു; രാത്രി മുഴു​വ​നും എന്റെ കിടക്കയെ ഒഴുക്കു​ന്നു; കണ്ണുനീർകൊ​ണ്ടു ഞാൻ എന്റെ കട്ടിലി​നെ നനെക്കു​ന്നു. ദുഃഖം​കൊ​ണ്ടു എന്റെ കണ്ണു കുഴി​ഞ്ഞി​രി​ക്കു​ന്നു” എന്നു സങ്കീർത്ത​ന​ക്കാ​ര​നായ ദാവീദ്‌ എഴുതി. ദാവീ​ദിന്‌ അങ്ങനെ തോന്നി​യ​തെ​ന്തു​കൊ​ണ്ടാണ്‌? “എന്റെ സകല​വൈ​രി​ക​ളും ഹേതു​വാ​യി” എന്ന്‌ അവൻ വിശദീ​ക​രി​ച്ചു. മറ്റുള്ള​വ​രു​ടെ വേദനാ​ജ​ന​ക​മായ പ്രവൃ​ത്തി​കൾ ദാവീ​ദി​നു ഹൃദയ​വേദന വരുത്തി​യ​തു​കൊണ്ട്‌ അവന്റെ കണ്ണുനീർ തോരാ​തെ ഒഴുകി. എന്നിട്ടും, സഹമനു​ഷ്യർ തന്നോടു ചെയ്‌ത കാര്യങ്ങൾ നിമിത്തം ദാവീദ്‌ യഹോ​വയെ വിട്ടക​ന്നില്ല.—സങ്കീർത്തനം 6:6-9.

6. (എ) മറ്റുള്ള​വ​രു​ടെ വാക്കു​ക​ളും പ്രവൃ​ത്തി​ക​ളും നമ്മെ എങ്ങനെ ബാധി​ച്ചേ​ക്കാം? (ബി) ചിലർ തങ്ങളെ​ത്തന്നെ എളുപ്പ​ത്തിൽ പിശാ​ചിന്‌ ഇരയാ​ക്കു​ന്ന​തെ​ങ്ങനെ?

⁶ സമാന​മാ​യി, മറ്റുള്ള​വ​രു​ടെ വാക്കു​ക​ളും പ്രവൃ​ത്തി​ക​ളും അത്യന്തം ഹൃദയ​വേ​ദ​ന​യോ​ടെ നാം തളർന്നു​പോ​കാൻ ഇടവരു​ത്തി​യേ​ക്കാം. “വാളു​കൊ​ണ്ടു കുത്തും​പോ​ലെ മൂർച്ച​യാ​യി സംസാ​രി​ക്കു​ന്നവർ ഉണ്ടു” എന്നു സദൃശ​വാ​ക്യ​ങ്ങൾ 12:18 പറയുന്നു. ചിന്തയി​ല്ലാ​ത്ത​യാൾ ഒരു ക്രിസ്‌തീയ സഹോ​ദ​ര​നോ സഹോ​ദ​രി​യോ ആയിരി​ക്കു​മ്പോൾ ‘കുത്തു​മ്പോ​ഴത്തെ മുറിവ്‌’ ആഴമു​ള്ള​താ​യി​ത്തീർന്നേ​ക്കാം. ഒരുപക്ഷേ അമർഷം ഊട്ടി​വ​ളർത്തി, നീരസ​പ്പെ​ടു​ന്ന​തി​നാ​യി​രി​ക്കും മനുഷ്യൻ പ്രവണത കാട്ടുക. നിർദ​യ​മോ നീതി​ര​ഹി​ത​മോ ആയിട്ടു നമ്മോടു പെരു​മാ​റി​യ​താ​യി നമുക്കു തോന്നു​ന്ന​പക്ഷം അതു പ്രത്യേ​കി​ച്ചും സത്യമാണ്‌. തെറ്റു​ചെ​യ്‌ത​യാ​ളോ​ടു സംസാ​രി​ക്കാൻ നമുക്കു ബുദ്ധി​മു​ട്ടു തോന്നി​യേ​ക്കാം; നാം മനപ്പൂർവം അയാളെ അല്ലെങ്കിൽ അവളെ ഒഴിവാ​ക്കി​യെ​ന്നു​പോ​ലും വരാം. അമർഷ​ത്താ​ലു​ണ്ടാ​കുന്ന ഹൃദയ​ഭാ​ര​ത്താൽ ചിലർ തളർന്നു പിന്മാ​റു​ക​യും ക്രിസ്‌തീയ യോഗ​ങ്ങൾക്കു വരുന്നതു നിർത്തി​ക്ക​ള​യു​ക​യും ചെയ്‌തി​രി​ക്കു​ന്നു. തന്നിമി​ത്തം, തങ്ങളെ മുത​ലെ​ടു​ത്തു​കൊണ്ട്‌ എളുപ്പ​ത്തിൽ ഇരയാ​ക്കു​ന്ന​തിന്‌ അവർ “പിശാ​ചി​ന്നു ഇടം കൊടു”ക്കുകയാ​ണെ​ന്നതു ദുഃഖ​ക​രം​തന്നെ.—എഫെസ്യർ 4:27.

7. (എ) മറ്റുള്ളവർ നമ്മെ നിരാ​ശ​പ്പെ​ടു​ത്തു​ക​യോ വേദനി​പ്പി​ക്കു​ക​യോ ചെയ്യു​മ്പോൾ പിശാ​ചി​ന്റെ കൈക​ളി​ലെ കളിപ്പാ​ട്ട​ങ്ങ​ളാ​കു​ന്നതു നമു​ക്കെ​ങ്ങനെ ഒഴിവാ​ക്കാം? (ബി) നാം അമർഷം വെടി​യേ​ണ്ടത്‌ എന്തു​കൊണ്ട്‌?

⁷ മറ്റുള്ളവർ നമ്മെ നിരാ​ശ​പ്പെ​ടു​ത്തു​ക​യോ വേദനി​പ്പി​ക്കു​ക​യോ ചെയ്യു​മ്പോൾ പിശാ​ചി​ന്റെ കൈക​ളി​ലെ കളിപ്പാ​ട്ട​ങ്ങ​ളാ​കു​ന്നതു നമു​ക്കെ​ങ്ങനെ ഒഴിവാ​ക്കാം? അമർഷം ഊട്ടി​വ​ളർത്താ​തി​രി​ക്കാൻ നാം ശ്രമി​ക്കണം. അതിനു​പ​കരം, എത്രയും പെട്ടെന്നു സമാധാ​നം പുനഃ​സ്ഥാ​പി​ക്കു​ന്ന​തി​നോ കാര്യങ്ങൾ ഒത്തുതീർപ്പാ​ക്കു​ന്ന​തി​നോ മുൻക​യ്യെ​ടു​ക്കുക. (എഫെസ്യർ 4:26) “ആർക്കെ​ങ്കി​ലും മറ്റൊ​രു​വ​നോ​ടു പരാതി​ക്കു കാരണ​മു​ണ്ടെ​ങ്കിൽ സൗജന്യ​മാ​യി അന്യോ​ന്യം പൊറു​ക്കു​ന്ന​തിൽ . . . തുടരുക” എന്നു കൊ​ലോ​സ്യർ 3:13 [NW] നമ്മെ പ്രേരി​പ്പി​ക്കു​ന്നു. തെറ്റു​കാ​രൻ തന്റെ തെറ്റു സമ്മതി​ക്കു​ക​യും അതേപ്പറ്റി ഖേദി​ക്കു​ക​യും ചെയ്യു​മ്പോൾ ക്ഷമിക്കു​ന്നതു തികച്ചും ഉചിത​മാണ്‌. (സങ്കീർത്തനം 32:3-5-ഉം സദൃശ​വാ​ക്യ​ങ്ങൾ 28:13-ഉം താരത​മ്യം ചെയ്യുക.) എങ്കിലും, ക്ഷമിക്കു​ക​യെ​ന്നാൽ മറ്റുള്ള​വ​രു​ടെ തെറ്റു​കളെ അവഗണി​ക്കു​ക​യോ ലഘൂക​രി​ക്കു​ക​യോ ചെയ്യു​ക​യെന്നല്ല അർഥ​മെന്നു മനസ്സിൽ പിടി​ക്കു​ന്നതു നമുക്കു സഹായ​ക​മാ​യി​രി​ക്കും. അമർഷം വെടി​യു​ന്നതു ക്ഷമിക്കു​ന്ന​തിൽ ഉൾപ്പെ​ടു​ന്നു. അമർഷം ഒരു ഭാരിച്ച ചുമടാണ്‌. അതിനു നമ്മുടെ നിനവു​കളെ വിഴു​ങ്ങി​ക്ക​ള​യു​ന്ന​തി​നും സന്തോ​ഷത്തെ അപഹരി​ക്കു​ന്ന​തി​നും കഴിയും. അതു നമ്മുടെ ആരോ​ഗ്യ​ത്തെ​പ്പോ​ലും ബാധി​ച്ചേ​ക്കാം. നേരേ​മ​റിച്ച്‌, ഉചിത​മാ​യി​രി​ക്കു​ന്നി​ടത്തു ക്ഷമിക്കു​ന്നതു നമ്മുടെ പ്രയോ​ജ​ന​ത്തിൽ കലാശി​ക്കും. ദാവീ​ദി​നെ​പ്പോ​ലെ നമുക്കും, മറ്റുള്ളവർ നമ്മോടു പറയു​ക​യോ ചെയ്യു​ക​യോ ചെയ്‌തി​ട്ടുള്ള കാര്യ​ങ്ങ​ളു​ടെ പേരിൽ ഒരിക്ക​ലും തളർന്നു​പി​ന്മാ​റു​ക​യോ യഹോ​വയെ വിട്ടക​ലു​ക​യോ ചെയ്യാ​തി​രി​ക്കാം!

നമുക്കു വീഴ്‌ച​ഭ​വി​ക്കു​മ്പോൾ

8. (എ) ചിലർക്കു ചില​പ്പോൾ വളരെ കുറ്റ​ബോ​ധം തോന്നാൻ കാരണ​മെന്ത്‌? (ബി) തളർന്നു​പി​ന്മാ​റ​ത്ത​ക്ക​വി​ധം കുറ്റ​ബോ​ധം നമ്മെ വിഴു​ങ്ങാൻ നാം ഇടനൽകു​ന്ന​തിൽ എന്ത്‌ അപകട​മാ​ണു​ള്ളത്‌?

⁸ “നാം എല്ലാവ​രും പലതി​ലും തെറ്റി​പ്പോ​കു​ന്നു” എന്നു യാക്കോബ്‌ 3:2 പറയുന്നു. തെറ്റി​പ്പോ​കു​മ്പോൾ കുറ്റ​ബോ​ധം തോന്നുക സ്വാഭാ​വി​കം മാത്ര​മാണ്‌. (സങ്കീർത്തനം 38:3-8) നാം ഒരു ജഡിക ബലഹീ​ന​ത​യോ​ടു പോരാ​ടു​ക​യും ഇടയ്‌ക്കി​ടെ തിരി​ച്ച​ടി​കൾ ഉണ്ടാകു​ക​യു​മാ​ണെ​ങ്കിൽ കുറ്റ​ബോ​ധം വളരെ ശക്തമാ​യി​രി​ക്കാം.a അത്തര​മൊ​രു പോരാ​ട്ടത്തെ അഭിമു​ഖീ​ക​രിച്ച ഒരു ക്രിസ്‌ത്യാ​നി ഇങ്ങനെ വിശദീ​ക​രി​ച്ചു: “പൊറു​ക്കാ​നാ​വാത്ത തെറ്റാ​ണോ ചെയ്‌തത്‌ എന്നു തിട്ടമി​ല്ലാ​തെ ജീവിതം തുടരാൻ ഞാൻ ആഗ്രഹി​ച്ചില്ല. ഒരുപക്ഷേ പ്രത്യാ​ശ​യ്‌ക്കു വകയി​ല്ലാ​ത​വണ്ണം ഏറെ വൈകി​പ്പോ​യി​രി​ക്കാ​മെ​ന്ന​തു​കൊണ്ട്‌ യഹോ​വ​യു​ടെ സേവന​ത്തിൽ ഇനി കഠിന​ശ്രമം ചെലു​ത്തേ​ണ്ട​തി​ല്ലെ​ന്നും എനിക്കു തോന്നി.” തളർന്നു​പി​ന്മാ​റ​ത്ത​ക്ക​വി​ധം കുറ്റ​ബോ​ധം നമ്മെ വിഴു​ങ്ങാൻ നാം അനുവ​ദി​ക്കു​മ്പോൾ പിശാ​ചിന്‌ അവസരം തുറന്നു​കൊ​ടു​ക്കു​ക​യാണ്‌. അവൻ ഉടനടി അവസരം മുത​ലെ​ടു​ത്തേ​ക്കാം! (2 കൊരി​ന്ത്യർ 2:5-7, 11) കുറ്റ​ബോ​ധം സംബന്ധി​ച്ചു കൂടുതൽ സന്തുലി​ത​മായ ഒരു വീക്ഷണ​മാ​യി​രി​ക്കാം വേണ്ടി​യി​രി​ക്കു​ന്നത്‌.

9. നമുക്ക്‌ ദൈവ​ത്തി​ന്റെ കരുണ​യിൽ ദൃഢവി​ശ്വാ​സം ഉണ്ടായി​രി​ക്കേ​ണ്ടത്‌ എന്തു​കൊണ്ട്‌?

⁹ തെറ്റു ചെയ്യു​മ്പോൾ ഒരള​വോ​ളം കുറ്റ​ബോ​ധം തോന്നു​ന്നത്‌ ഉചിത​മാണ്‌. എന്നാൽ ചില​പ്പോ​ഴൊ​ക്കെ ഒരു ക്രിസ്‌ത്യാ​നി താൻ ദൈവ​ക​രു​ണ​യ്‌ക്കു യോഗ്യ​ന​ല്ലെന്നു ചിന്തി​ക്കു​ന്നതു നിമിത്തം കുറ്റ​ബോ​ധം അയാളെ വിടാതെ പിടി​കൂ​ടു​ന്നു. എങ്കിലും, “നമ്മുടെ പാപങ്ങളെ ഏറ്റുപ​റ​യു​ന്നു എങ്കിൽ അവൻ നമ്മോടു പാപങ്ങളെ ക്ഷമിച്ചു സകല അനീതി​യും പോക്കി നമ്മെ ശുദ്ധീ​ക​രി​പ്പാൻ തക്കവണ്ണം വിശ്വ​സ്‌ത​നും നീതി​മാ​നും ആകുന്നു” എന്നു ബൈബിൾ നമുക്ക്‌ ഊഷ്‌മ​ള​മായ ഉറപ്പേ​കു​ന്നു. (1 യോഹ​ന്നാൻ 1:9) നമ്മുടെ കാര്യ​ത്തിൽ ദൈവം അതു ചെയ്യു​ക​യി​ല്ലെന്നു വിശ്വ​സി​ക്കാൻ എന്തെങ്കി​ലും ന്യായ​മായ കാരണ​മു​ണ്ടോ? താൻ “ക്ഷമിക്കുന്ന”വനാ​ണെന്നു യഹോവ തന്റെ വചനത്തിൽ പറയു​ന്നു​വെന്ന്‌ ഓർക്കുക. (സങ്കീർത്തനം 86:5; 130:3, 4) അവനു നുണപ​റ​യാൻ കഴിയു​ക​യി​ല്ലാ​ത്ത​തു​കൊണ്ട്‌, അനുതാ​പ​മുള്ള ഒരു ഹൃദയ​ത്തോ​ടെ നാം അവന്റെ മുമ്പാകെ വരുന്നു​വെ​ങ്കിൽ, തന്റെ വചനത്തിൽ വാഗ്‌ദാ​നം ചെയ്‌തി​രി​ക്കു​ന്ന​തു​പോ​ലെ അവൻ ചെയ്യും.—തീത്തൊസ്‌ 1:2.

10. ഒരു ജഡിക ബലഹീ​ന​ത​യോ​ടു പോരാ​ടു​ന്നതു സംബന്ധിച്ച്‌ ഹൃദ​യോ​ഷ്‌മ​ള​മായ എന്ത്‌ ഉറപ്പാണ്‌ ഒരു മുൻ വീക്ഷാ​ഗോ​പു​രം പ്രസി​ദ്ധീ​ക​രി​ച്ചത്‌?

¹⁰ ഒരു ബലഹീ​ന​ത​യു​മാ​യി മല്ലിടു​ക​യും അതി​ലേക്കു വീണ്ടും വഴുതി​വീ​ഴു​ക​യും ചെയ്യു​ന്നെ​ങ്കിൽ നിങ്ങൾ എന്തു ചെയ്യണം? തളർന്നു പിന്മാ​റ​രുത്‌! ഒരിക്കൽ വഴുതി​വീ​ണെന്നു കരുതി നിങ്ങൾ ഇതി​നോ​ടകം വരുത്തിയ പുരോ​ഗതി നഷ്ടമാ​ക​ണ​മെന്നു നിർബ​ന്ധ​മില്ല. ഈ പത്രി​ക​യു​ടെ 1954 ഫെബ്രു​വരി 15 ലക്കം (ഇംഗ്ലീഷ്‌) ഈ ഹൃദ​യോ​ഷ്‌മ​ള​മായ ഉറപ്പേകി: “നമ്മുടെ മുൻജീ​വി​ത​രീ​തി​യിൽ നാം തിരി​ച്ച​റി​ഞ്ഞി​രു​ന്ന​തി​ല​ധി​കം ആഴത്തിൽ വേരൂ​ന്നി​യി​രുന്ന ഏതെങ്കി​ലും മോശ​മായ ശീല​ത്തെ​ക്കു​റിച്ച്‌ ഓർത്തോർത്ത്‌ അനേകം തവണ ഇടറി വീഴു​ന്ന​താ​യി നാം കണ്ടെത്തി​യേ​ക്കാം. . . . നിരാ​ശ​പ്പെ​ട​രുത്‌. പൊറു​ക്കാ​നാ​വാത്ത പാപം ചെയ്‌തു​വെന്ന നിഗമ​ന​ത്തി​ലെ​ത്ത​രുത്‌. നിങ്ങൾ അങ്ങനെ ന്യായ​വാ​ദം ചെയ്യാൻ തന്നെയാ​ണു സാത്താൻ ആഗ്രഹി​ക്കു​ന്നത്‌. നിങ്ങൾക്കു ദുഃഖ​വും ബുദ്ധി​മു​ട്ടും അനുഭ​വ​പ്പെ​ടു​ന്നു​വെന്ന വസ്‌തു​ത​തന്നെ നിങ്ങൾ അങ്ങേയറ്റം പോയി​ട്ടി​ല്ലെ​ന്ന​തി​ന്റെ തെളി​വാണ്‌. താഴ്‌മ​യോ​ടും ആത്മാർഥ​ത​യോ​ടും കൂടെ ദൈവ​ത്തി​ങ്ക​ലേക്കു തിരിഞ്ഞ്‌ അവന്റെ ക്ഷമയും ശുദ്ധീ​ക​ര​ണ​വും സഹായ​വും തേടു​ന്ന​തിൽ മടുത്തു​പോ​ക​രുത്‌. ബുദ്ധി​മു​ട്ട​നു​ഭ​വ​പ്പെ​ടു​മ്പോൾ ഒരു കുട്ടി പിതാ​വി​നെ സമീപി​ക്കു​ന്ന​തു​പോ​ലെ അവനെ സമീപി​ക്കുക. ഒരേ ബലഹീനത സംബന്ധിച്ച്‌ എത്ര കൂടെ​ക്കൂ​ടെ യഹോ​വയെ സമീപി​ച്ചാ​ലും തന്റെ അനർഹദയ നിമിത്തം അവൻ കൃപാ​പൂർവം നിങ്ങളെ സഹായി​ക്കും. നിങ്ങൾ ആത്മാർഥ​ത​യു​ള്ള​വ​നാ​ണെ​ങ്കിൽ ഒരു ശുദ്ധമ​നഃ​സാ​ക്ഷി ലഭിച്ചി​രി​ക്കു​ന്ന​താ​യി നിങ്ങൾ തിരി​ച്ച​റി​യാൻ അവൻ ഇടയാ​ക്കു​ക​യും ചെയ്യും.”

നാം വേണ്ടു​വോ​ളം ചെയ്യു​ന്നി​ല്ലെന്നു നമുക്കു തോന്നു​മ്പോൾ

11. (എ) രാജ്യ​പ്ര​സം​ഗ​വേ​ല​യിൽ പങ്കെടു​ക്കു​ന്നതു സംബന്ധി​ച്ചു നമുക്ക്‌ എങ്ങനെ തോ​ന്നേ​ണ്ട​തുണ്ട്‌? (ബി) ശുശ്രൂ​ഷ​യിൽ പങ്കെടു​ക്കു​ന്നതു സംബന്ധിച്ച എന്തു മനോ​ഗ​ത​വു​മാ​യാ​ണു ചില ക്രിസ്‌ത്യാ​നി​കൾ പോരാ​ടു​ന്നത്‌?

¹¹ രാജ്യ​പ്ര​സംഗ വേല ഒരു ക്രിസ്‌ത്യാ​നി​യു​ടെ ജീവി​ത​ത്തിൽ പ്രമുഖ പങ്കുവ​ഹി​ക്കു​ന്നു. അതിൽ പങ്കുപ​റ്റു​ന്നതു സന്തുഷ്ടി കൈവ​രു​ത്തു​ന്നു. (സങ്കീർത്തനം 40:8) എങ്കിലും, ശുശ്രൂ​ഷ​യിൽ അധികം ചെയ്യാൻ കഴിയാ​ത്ത​തു​കൊ​ണ്ടു ചില ക്രിസ്‌ത്യാ​നി​കൾക്കു വളരെ കുറ്റ​ബോ​ധം തോന്നു​ന്നു. അത്തരം കുറ്റ​ബോ​ധ​ത്തി​നു നമ്മുടെ സന്തോ​ഷത്തെ കവർന്നു​ക​ള​യാൻ കഴിയും. നാം ഒരിക്ക​ലും വേണ്ടു​വോ​ളം ചെയ്യു​ന്നി​ല്ലെന്നു യഹോ​വക്കു തോന്നു​ന്ന​താ​യി വിഭാ​വനം ചെയ്‌തു​കൊ​ണ്ടു തളർന്നു പിന്മാ​റാൻ ഇടയാ​ക്കു​ന്ന​തി​നു​പോ​ലും അതിനു കഴിയും. ചിലർക്കു പോരാ​ട്ട​മുള്ള തോന്ന​ലു​കൾ പരിചി​ന്തി​ക്കുക.

ഭർത്താവോടൊപ്പം മൂന്നു കുട്ടി​കളെ വളർത്തുന്ന ഒരു ക്രിസ്‌തീയ സഹോ​ദരി ഇങ്ങനെ എഴുതി: “ദാരി​ദ്ര്യം എത്രമാ​ത്രം സമയം കവർന്നു​ക​ള​യു​ന്നു​വെന്നു നിങ്ങൾക്ക​റി​യാ​മോ? ലുബ്ധി​ക്കാൻ കഴിയു​ന്നി​ട​ത്തോ​ളം ഞാൻ അങ്ങനെ ചെയ്യേ​ണ്ടി​യി​രി​ക്കു​ന്നു. രണ്ടാം​കിട സാധനങ്ങൾ ലഭിക്കുന്ന കടകളും പഴയ സാമാ​നങ്ങൾ കുറഞ്ഞ​വി​ല​യ്‌ക്കു വിൽക്കുന്ന കടകളും അരിച്ചു​പെ​റു​ക്കു​ക​യോ തുണികൾ തയ്‌ക്കു​ക​യോ ചെയ്‌തു​കൊ​ണ്ടു സമയം ചെലവി​ട​ണ​മെ​ന്നാണ്‌ അതി​ന്റെ​യർഥം. കൂടാതെ, [ഭക്ഷ്യവ​സ്‌തു​ക്കൾ ഇളവിൽ കിട്ടു​ന്ന​തി​നുള്ള] കൂപ്പണു​കൾ കീറി, മിനു​ക്കി​യെ​ടു​ത്തു വിൽക്കുന്ന തൊഴി​ലി​ലും ഒന്നോ രണ്ടോ മണിക്കൂർ ആഴ്‌ച​തോ​റും ഞാൻ ചെലവ​ഴി​ക്കു​ന്നു. ഈ ജോലി​ക​ളി​ലേർപ്പെ​ടുന്ന സമയ​മെ​ല്ലാം വയൽസേ​വ​ന​ത്തി​നു ചെലവി​ടേ​ണ്ട​താ​ണ​ല്ലോ എന്നു ചിന്തിച്ചു ചില​പ്പോ​ഴൊ​ക്കെ എനിക്കു വളരെ​യ​ധി​കം കുറ്റ​ബോ​ധം തോന്നാ​റുണ്ട്‌.”

നാലു മക്കളും അവിശ്വാ​സി​യായ ഭർത്താ​വു​മുള്ള ഒരു സഹോ​ദരി എഴുതി: “ഞാൻ യഹോ​വയെ വേണ്ടത്ര സ്‌നേ​ഹി​ക്കു​ന്നി​ല്ലെന്നു ധരിച്ചു. തന്മൂലം ഞാൻ യഹോ​വ​ക്കുള്ള എന്റെ സേവന​ത്തിൽ വളരെ പാടു​പെട്ടു. വാസ്‌ത​വ​ത്തിൽ ഞാൻ കഠിന​മാ​യി ശ്രമിച്ചു, എന്നാൽ അത്രയും മതി​യെന്ന്‌ എനിക്ക്‌ ഒരിക്ക​ലും തോന്നി​യില്ല. നിങ്ങൾക്ക​റി​യാ​മോ, എനിക്ക്‌ ഒട്ടും ആത്മമൂ​ല്യം തോന്നി​യില്ല. തന്മൂലം യഹോ​വ​യ്‌ക്കെ​ങ്ങനെ എന്റെ സേവനം എന്നെങ്കി​ലും സ്വീക​രി​ക്കാ​നാ​വു​മെന്ന്‌ എനിക്ക്‌ ഊഹി​ക്കാ​നും കഴിഞ്ഞില്ല.”

മുഴുസമയ സേവനം നിർത്തേ​ണ്ടത്‌ അത്യാ​വ​ശ്യ​മെന്നു കണ്ടെത്തിയ ഒരു ക്രിസ്‌ത്യാ​നി ഇങ്ങനെ പറഞ്ഞു: “യഹോ​വയെ മുഴു​സ​മയം സേവി​ക്കാ​നുള്ള എന്റെ പ്രതി​ബ​ദ്ധ​ത​യിൽ പരാജ​യ​പ്പെ​ടു​ക​യാ​ണെ​ന്നുള്ള ആശയം എനിക്ക്‌ ഉൾക്കൊ​ള്ളാൻ കഴിഞ്ഞില്ല. എത്ര നിരു​ത്‌സാ​ഹി​ത​യാ​യി​രു​ന്നു ഞാനെന്നു നിങ്ങൾക്കു വിഭാ​വനം ചെയ്യാ​നാ​വില്ല! അതോർത്തു ഞാനി​പ്പോൾ കരയു​ക​യാണ്‌.”

12. ശുശ്രൂ​ഷ​യിൽ തങ്ങൾക്കു കൂടുതൽ ചെയ്യാൻ കഴിയാ​ത്ത​തി​നാൽ ചില ക്രിസ്‌ത്യാ​നി​കൾക്കു വളരെ കുറ്റ​ബോ​ധം തോന്നു​ന്ന​തെ​ന്തു​കൊണ്ട്‌?

¹² കഴിയു​ന്ന​തി​ന്റെ പരമാ​വധി യഹോ​വയെ സേവി​ക്കാ​നുള്ള ആഗ്രഹം സ്വാഭാ​വി​കം മാത്ര​മാണ്‌. (സങ്കീർത്തനം 86:12) എങ്കിലും, അധികം ചെയ്യാൻ കഴിയാ​തെ​വ​രു​മ്പോൾ ചിലർക്കു കുറ്റ​ബോ​ധം തോന്നു​ന്ന​തെ​ന്തു​കൊ​ണ്ടാണ്‌? ചിലരെ സംബന്ധി​ച്ചി​ട​ത്തോ​ളം അത്‌ ജീവി​ത​ത്തി​ലു​ണ്ടായ കയ്‌പേ​റിയ അനുഭ​വ​ങ്ങ​ളു​ടെ ഫലമായി, തന്നെ ഒന്നിനും​കൊ​ള്ളു​ക​യി​ല്ലെന്ന പൊതു ധാരണ​യോ​ടു ബന്ധപ്പെ​ട്ടി​രി​ക്കാം. മറ്റു ചില​പ്പോൾ അനുചി​ത​മായ കുറ്റ​ബോ​ധ​ത്തി​നു കാരണം യഹോവ നമ്മിൽനി​ന്നു പ്രതീ​ക്ഷി​ക്കു​ന്ന​തെ​ന്താ​ണെ​ന്നതു സംബന്ധിച്ച അയഥാർഥ വീക്ഷണ​മാ​യി​രു​ന്നേ​ക്കാം. “ക്ഷീണി​ച്ച​വ​ശ​യാ​കു​ന്ന​തു​വരെ പ്രവർത്തി​ക്കാ​ത്ത​പക്ഷം ഞാൻ വേണ്ടത്ര ചെയ്യു​ന്നി​ല്ലെ​ന്നാ​യി​രു​ന്നു എന്റെ ധാരണ” എന്ന്‌ ഒരു ക്രിസ്‌ത്യാ​നി സമ്മതി​ച്ചു​പ​റഞ്ഞു. തന്മൂലം, അവൾ തന്റെ കാര്യ​ത്തിൽ അത്യധി​കം ഉയർന്ന നിലവാ​രം വച്ചു. എന്നിട്ട്‌, അത്‌ എത്തിപ്പി​ടി​ക്കാൻ കഴിയാ​തെ​വ​ന്ന​പ്പോൾ അവൾക്ക്‌ അങ്ങേയറ്റം കുറ്റ​ബോ​ധം തോന്നി.

13. യഹോവ നമ്മിൽനിന്ന്‌ എന്താണു പ്രതീ​ക്ഷി​ക്കു​ന്നത്‌?

¹³ യഹോവ നമ്മിൽനിന്ന്‌ എന്താണു പ്രതീ​ക്ഷി​ക്കു​ന്നത്‌? ലളിത​മാ​യി പറഞ്ഞാൽ, സാഹച​ര്യം അനുവ​ദി​ക്കു​ന്ന​തു​പോ​ലെ നാം യഹോ​വയെ മുഴു ദേഹി​യോ​ടെ സേവി​ക്കാൻ അവൻ പ്രതീ​ക്ഷി​ക്കു​ന്നു. (കൊ​ലൊ​സ്സ്യർ 3:23) എന്നിരു​ന്നാ​ലും, നാം ചെയ്യാൻ ഇഷ്ടപ്പെ​ടു​ന്ന​തും നമുക്കു വാസ്‌ത​വ​ത്തിൽ ചെയ്യാൻ കഴിയു​ന്ന​തും തമ്മിൽ വലിയ അന്തരം ഉണ്ടായി​രു​ന്നേ​ക്കാം. പ്രായം, ആരോ​ഗ്യം, ശാരീ​രിക ബലം, കുടുംബ ഉത്തരവാ​ദി​ത്വ​ങ്ങൾ എന്നിങ്ങ​നെ​യുള്ള ഘടകങ്ങ​ളാൽ നാം പരിമി​ത​രാ​ണെ​ന്നു​വ​രാം. എന്നുവ​രി​കി​ലും, നമ്മളാ​ലാ​കു​ന്ന​തെ​ല്ലാം ചെയ്യു​മ്പോൾ യഹോ​വ​യ്‌ക്കുള്ള നമ്മുടെ സേവനം മുഴു ദേഹി​യോ​ടെ​യു​ള്ള​താ​ണെന്നു നമുക്ക്‌ ഉറപ്പു​ണ്ടാ​യി​രി​ക്കാ​വു​ന്ന​താണ്‌. അത്‌ മുഴു​സമയ ശുശ്രൂ​ഷ​യി​ലാ​യി​രി​ക്കാൻ ആരോ​ഗ്യ​വും സാഹച​ര്യ​വും അനുവ​ദി​ക്കുന്ന ഒരുവന്റെ സേവന​ത്തെ​ക്കാൾ കൂടിയ അല്ലെങ്കിൽ കുറഞ്ഞ അളവി​ലുള്ള മുഴു ദേഹി​യോ​ടെ​യുള്ള സേവന​മാ​യി​രി​ക്കു​ന്നില്ല.—മത്തായി 13:18-23.

14. നിങ്ങളിൽനിന്ന്‌ ഉചിത​മാ​യി എന്തു പ്രതീ​ക്ഷി​ക്ക​ണ​മെന്നു നിർണ​യി​ക്കാൻ സഹായം ആവശ്യ​മു​ണ്ടെ​ങ്കിൽ നിങ്ങൾക്കെന്തു ചെയ്യാ​വു​ന്ന​താണ്‌?

¹⁴ അപ്പോൾപ്പി​ന്നെ, നിങ്ങളിൽനിന്ന്‌ ഉചിത​മാ​യി എന്തു പ്രതീ​ക്ഷി​ക്ക​ണ​മെന്നു നിങ്ങൾക്കെ​ങ്ങനെ നിർണ​യി​ക്കാൻ കഴിയും? നിങ്ങളു​ടെ പ്രാപ്‌തി​ക​ളും പരിമി​തി​ക​ളും കുടുംബ ഉത്തരവാ​ദി​ത്വ​ങ്ങ​ളും സംബന്ധിച്ച്‌ അറിയാ​വുന്ന, വിശ്വാ​സ​മർപ്പി​ക്കാ​വുന്ന പക്വമ​തി​യായ ഒരു ക്രിസ്‌തീയ സുഹൃ​ത്തു​മാ​യി കാര്യങ്ങൾ ചർച്ച​ചെ​യ്യാൻ നിങ്ങൾ ആഗ്രഹി​ച്ചെ​ന്നു​വ​രാം. ഒരുപക്ഷേ അത്‌ ഒരു മൂപ്പനോ അനുഭ​വ​പ​രി​ച​യ​മുള്ള ഒരു സഹോ​ദ​രി​യോ ആയിരു​ന്നേ​ക്കാം. (സദൃശ​വാ​ക്യ​ങ്ങൾ 15:22) ദൈവ​ദൃ​ഷ്ടി​യിൽ നിങ്ങളു​ടെ മൂല്യം നിർണ​യി​ക്ക​പ്പെ​ടു​ന്നത്‌ ഒരു വ്യക്തി​യെന്ന നിലയിൽ നിങ്ങൾ വയൽശു​ശ്രൂ​ഷ​യിൽ എത്രമാ​ത്രം ചെയ്യുന്നു എന്നതിന്റെ അടിസ്ഥാ​ന​ത്തി​ല​ല്ലെ​ന്നത്‌ ഓർക്കുക. യഹോ​വ​യു​ടെ എല്ലാ ദാസരും അവനു വില​യേ​റി​യ​വ​രാണ്‌. (ഹഗ്ഗായി 2:7; മലാഖി 3:16, 17) നിങ്ങൾ പ്രസം​ഗ​വേ​ല​യിൽ ചെയ്യു​ന്നത്‌ മറ്റുള്ളവർ ചെയ്യു​ന്ന​തി​നെ​ക്കാൾ കൂടു​ത​ലോ കുറവോ ആണെന്നു​വ​രാം. എന്നാൽ അതു നിങ്ങളു​ടെ പരമാ​വധി ആയിരി​ക്കു​ന്നി​ട​ത്തോ​ളം കാലം യഹോവ അതിൽ സന്തുഷ്ട​നാണ്‌. നിങ്ങൾക്കു കുറ്റ​ബോ​ധം തോന്നേണ്ട യാതൊ​രു കാര്യ​വു​മില്ല.—ഗലാത്യർ 6:4.

നമ്മിൽനിന്ന്‌ അധികം ആവശ്യ​പ്പെ​ടു​മ്പോൾ

15. ഏതു വിധങ്ങ​ളി​ലാ​ണു സഭാമൂ​പ്പ​ന്മാ​രിൽനിന്ന്‌ അധികം ആവശ്യ​പ്പെ​ട്ടി​രി​ക്കു​ന്നത്‌?

¹⁵ “അധികം ലഭിച്ച​വ​നിൽനിന്ന്‌ അധികം ആവശ്യ​പ്പെ​ടും” എന്ന്‌ യേശു പറഞ്ഞു. (ലൂക്കാ 12:48, പി.ഒ.സി. ബൈബിൾ) സഭാമൂ​പ്പ​ന്മാ​രാ​യി സേവി​ക്കു​ന്ന​വ​രിൽനി​ന്നു തീർച്ച​യാ​യും ‘അധികം ആവശ്യ​പ്പെ​ടു​ന്നു.’ പൗലോ​സി​നെ​പ്പോ​ലെ, അവർ സഭയ്‌ക്കു​വേണ്ടി തങ്ങളെ​ത്തന്നെ വിനി​യോ​ഗി​ക്കു​ന്നു. (2 കൊരി​ന്ത്യർ 12:15) അവർ പ്രസം​ഗങ്ങൾ തയ്യാറാ​ക്കണം, ഇടയസ​ന്ദർശനം നടത്തണം, നീതി​ന്യാ​യ കേസുകൾ കൈകാ​ര്യം ചെയ്യണം. തങ്ങളുടെ കുടും​ബ​ങ്ങളെ അവഗണി​ക്കാ​തെ​വേണം ഇതെല്ലാം ചെയ്യാൻ. (1 തിമൊ​ഥെ​യൊസ്‌ 3:4, 5) ചില മൂപ്പന്മാർ, രാജ്യ​ഹാ​ളു​ക​ളു​ടെ നിർമാ​ണ​ത്തിൽ സഹായി​ക്കു​ന്ന​തി​ലും ആശുപ​ത്രി ഏകോപന സമിതി​യിൽ സേവി​ക്കു​ന്ന​തി​ലും സമ്മേള​ന​ങ്ങ​ളി​ലും കൺ​വെൻ​ഷ​നു​ക​ളി​ലും സന്നദ്ധ​സേ​വ​ക​രാ​യി പ്രവർത്തി​ക്കു​ന്ന​തി​ലും തിരക്കു​ള്ള​വ​രാണ്‌. അത്തരം ഉത്തരവാ​ദി​ത്വ​ങ്ങ​ളു​ടെ ഭാരത്താൽ തളർന്നു​പോ​കാ​തി​രി​ക്കാൻ കഠിനാ​ധ്വാ​നി​ക​ളായ ഈ അർപ്പിത പുരു​ഷ​ന്മാർക്ക്‌ എങ്ങനെ കഴിയും?

16. (എ) യിത്രോ മോശ​യ്‌ക്ക്‌ എന്തു പ്രാ​യോ​ഗിക പരിഹാ​ര​മാ​ണു നിർദേ​ശി​ച്ചത്‌? (ബി) ഉചിത​മായ ഉത്തരവാ​ദി​ത്വ​ങ്ങൾ മറ്റുള്ള​വ​രു​മാ​യി പങ്കിടു​ന്ന​തി​നു മൂപ്പന്മാ​രെ പ്രാപ്‌ത​രാ​ക്കുന്ന ഗുണ​മെന്ത്‌?

¹⁶ വിനയ​വും താഴ്‌മ​യു​മുള്ള ഒരു വ്യക്തി​യാ​യി​രുന്ന മോശ മറ്റുള്ള​വ​രു​ടെ പ്രശ്‌നങ്ങൾ കൈകാ​ര്യം ചെയ്‌തു​ചെ​യ്‌തു തളരവേ അവന്റെ അമ്മായി​യപ്പൻ യിത്രോ ഒരു പ്രാ​യോ​ഗിക പരിഹാ​രം നിർദേ​ശി​ച്ചു: യോഗ്യ​രായ മറ്റുള്ള​വ​രു​മാ​യി ചില ഉത്തരവാ​ദി​ത്വ​ങ്ങൾ പങ്കിടുക. (പുറപ്പാ​ടു 18:17-26; സംഖ്യാ​പു​സ്‌തകം 12:3) “താഴ്‌മ​യു​ള്ള​വ​രു​ടെ [“വിനയ​മു​ള്ള​വ​രു​ടെ,” NW] പക്കലോ ജ്ഞാനമു​ണ്ടു” എന്നു സദൃശ​വാ​ക്യ​ങ്ങൾ 11:2 പറയുന്നു. വിനയ​മു​ള്ള​വ​രാ​യി​രി​ക്കുക എന്നാൽ പരിമി​തി​കൾ തിരി​ച്ച​റി​യു​ക​യും അംഗീ​ക​രി​ക്കു​ക​യും ചെയ്യുക എന്നർഥം. മറ്റുള്ള​വരെ ചുമത​ല​യേൽപ്പി​ക്കു​ന്ന​തി​നു വിനയ​മുള്ള ഒരുവനു മടിയില്ല. യോഗ്യ​ത​യുള്ള മറ്റു പുരു​ഷ​ന്മാ​രു​മാ​യി ഉചിത​മായ ഉത്തരവാ​ദി​ത്വ​ങ്ങൾ പങ്കിടു​ന്ന​തു​കൊണ്ട്‌ ഏതെങ്കി​ലും വിധത്തിൽ തനിക്കു നിയ​ന്ത്രണം നഷ്ടമാ​കു​മെന്ന ഭയവും അയാൾക്കില്ല.b (സംഖ്യാ​പു​സ്‌തകം 11:16, 17, 26-29) അതിനു​പ​കരം, പുരോ​ഗ​മി​ക്കു​ന്ന​തി​നു മറ്റുള്ള​വരെ സഹായി​ക്കാൻ അയാൾ ഉത്സുക​നാണ്‌.—1 തിമൊ​ഥെ​യൊസ്‌ 4:15.

17. (എ) സഭാം​ഗ​ങ്ങൾക്കു മൂപ്പന്മാ​രു​ടെ ചുമട്‌ എങ്ങനെ ലഘൂക​രി​ക്കാ​വു​ന്ന​താണ്‌? (ബി) മൂപ്പന്മാ​രു​ടെ ഭാര്യ​മാർ ചെയ്യുന്ന ത്യാഗങ്ങൾ ഏവ, നാം അവ നിസ്സാ​ര​മാ​യെ​ടു​ക്കു​ന്നി​ല്ലെന്നു നമു​ക്കെ​ങ്ങനെ അവരെ കാണി​ക്കാം?

¹⁷ മൂപ്പന്മാ​രു​ടെ ചുമടു ലഘുവാ​ക്കു​ന്ന​തി​നു സഭാം​ഗ​ങ്ങൾക്കു ധാരാളം കാര്യങ്ങൾ ചെയ്യാൻ കഴിയും. മൂപ്പന്മാർക്കു സ്വന്തം കുടും​ബത്തെ പരിപാ​ലി​ക്കേ​ണ്ട​തു​ണ്ടെന്നു തിരി​ച്ച​റി​ഞ്ഞു​കൊണ്ട്‌ അവർ മൂപ്പന്മാ​രു​ടെ സമയവും ശ്രദ്ധയും അനാവ​ശ്യ​മാ​യി ആവശ്യ​പ്പെ​ടു​ക​യില്ല. ഭർത്താ​ക്ക​ന്മാ​രു​ടെ സമയം സഭയുടെ ആവശ്യ​ത്തി​നാ​യി വിനി​യോ​ഗി​ക്കു​ന്ന​തി​നു നിസ്വാർഥ​താ​പൂർവം, മനസ്സൊ​രു​ക്ക​ത്തോ​ടെ വിട്ടു​കൊ​ടു​ക്കുന്ന മൂപ്പന്മാ​രു​ടെ ഭാര്യ​മാ​രു​ടെ ത്യാഗ​ത്തെ​യും അവർ നിസ്സാ​ര​മാ​യി കരുതു​ക​യില്ല. ഭർത്താവു മൂപ്പനാ​യി സേവി​ക്കുന്ന, മൂന്നു മക്കളുടെ അമ്മ ഇങ്ങനെ വിശദീ​ക​രി​ച്ചു: “ഭർത്താ​വിന്‌ ഒരു മൂപ്പനെന്ന നിലയിൽ സേവന​മ​നു​ഷ്‌ഠി​ക്കാൻ കഴി​യേ​ണ്ട​തി​നു കൂടു​ത​ലായ കുടും​ബ​ജോ​ലി​കൾ മനസ്സൊ​രു​ക്ക​ത്തോ​ടെ​യും പരാതി​കൂ​ടാ​തെ​യും ഞാൻ ചെയ്യുന്നു. അതേപ്പറ്റി ഞാൻ ഒരിക്ക​ലും പരാതി​പ്പെ​ടാ​റില്ല. അദ്ദേഹ​ത്തി​ന്റെ സേവന​ഫ​ല​മാ​യി യഹോ​വ​യു​ടെ സമൃദ്ധ​മായ അനു​ഗ്രഹം ഞങ്ങളുടെ കുടും​ബ​ത്തി​ന്മേ​ലു​ണ്ടെന്ന്‌ എനിക്ക​റി​യാം. അദ്ദേഹം നൽകുന്ന സമയത്തിൽ ഞാൻ അതൃപ്‌തി കാണി​ക്കാ​റില്ല. മിക്ക​പ്പോ​ഴും വീടിനു പുറത്തുള്ള വേലയി​ലും കുട്ടി​കൾക്കു ശിക്ഷണം നൽകു​ന്ന​തി​ലും ഞാൻ അധിക​പങ്കു ചെയ്യേ​ണ്ടി​വ​രു​ന്നു. ഭർത്താ​വി​നു തിരക്കി​ല്ലാ​യി​രു​ന്നെ​ങ്കിൽ ഞാൻ അത്ര​ത്തോ​ളം ചെയ്യേ​ണ്ട​തി​ല്ലാ​യി​രു​ന്നു.” ആ സഹോ​ദ​രി​യു​ടെ കൂടു​ത​ലായ ചുമടി​നെ വിലമ​തി​ക്കു​ന്ന​തി​നു പകരം ചിലർ “നിങ്ങ​ളെന്താ പയനി​യ​റിങ്‌ ചെയ്യാ​ത്തത്‌?” എന്നതു​പോ​ലുള്ള ബുദ്ധി​ശൂ​ന്യ​മായ അഭി​പ്രാ​യ​പ്ര​ക​ട​നങ്ങൾ നടത്തി​യ​താ​യി അവർ കണ്ടെത്തി​യെ​ന്നതു ദുഃഖ​ക​ര​മാണ്‌. (സദൃശ​വാ​ക്യ​ങ്ങൾ 12:18) മറ്റുള്ളവർ ചെയ്യു​ന്ന​തി​നെ വിലമ​തി​ക്കു​ന്നത്‌ അവർ ചെയ്യാ​ത്ത​തി​നെ വിമർശി​ക്കു​ന്ന​തി​നെ​ക്കാൾ എത്രയോ മെച്ചമാണ്‌!—സദൃശ​വാ​ക്യ​ങ്ങൾ 16:24; 25:11.

ഇതുവരെ അവസാനം വന്നെത്തി​യി​ട്ടി​ല്ലാ​ത്ത​തി​നാൽ

18, 19. (എ) ഇതു നിത്യ​ജീ​വ​നു​വേ​ണ്ടി​യുള്ള ഓട്ടം നിർത്താ​നുള്ള സമയമ​ല്ലാ​ത്തത്‌ എന്തു​കൊണ്ട്‌? (ബി) യെരു​ശ​ലേ​മി​ലുള്ള ക്രിസ്‌ത്യാ​നി​കൾക്ക്‌ അപ്പോ​സ്‌ത​ല​നായ പൗലോസ്‌ കാലോ​ചി​ത​മായ എന്തു ബുദ്ധ്യു​പ​ദേ​ശ​മാ​ണു നൽകി​യത്‌?

¹⁸ തന്റെ ദീർഘ​ദൂര ഓട്ടം അവസാ​നി​ക്കാ​റാ​യെന്ന്‌ ഒരു ഓട്ടക്കാ​രൻ തിരി​ച്ച​റി​യു​മ്പോൾ അവൻ തളർന്നു പിന്മാ​റു​ന്നില്ല. അവന്റെ ശരീരം ക്ഷീണി​ച്ചു​ത​ളർന്ന്‌, അത്യന്തം ഉഷ്‌ണിച്ച്‌, ജലാം​ശം​വറ്റി, സഹിഷ്‌ണു​ത​യു​ടെ വക്കി​ലെ​ത്തി​യി​രി​ക്കാം. എന്നാൽ ഫിനി​ഷിങ്‌ ലൈനി​നോട്‌ അടുത്ത​തു​കൊണ്ട്‌ അത്‌ ഓട്ടം നിർത്താ​നുള്ള സമയമല്ല. സമാന​മാ​യി, ക്രിസ്‌ത്യാ​നി​കൾ എന്നനി​ല​യിൽ നാം ജീവനു​വേ​ണ്ടി​യുള്ള ഒരു ഓട്ടത്തി​ലാണ്‌, ഫിനി​ഷിങ്‌ ലൈനി​നോ​ടു വളരെ അടുത്തു​മാണ്‌. നാം ഓട്ടം നിർത്താ​നുള്ള സമയമ​ല്ലിത്‌!—1 കൊരി​ന്ത്യർ 9:24; ഫിലി​പ്പി​യർ 2:16; 3:13, 14.

¹⁹ ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​കൾ സമാന​മായ സാഹച​ര്യ​ത്തെ അഭിമു​ഖീ​ക​രി​ച്ചു. ഏതാണ്ട്‌ പൊ.യു. (പൊതു​യു​ഗം) 61-ൽ അപ്പോ​സ്‌ത​ല​നായ പൗലോസ്‌ യെരു​ശ​ലേ​മി​ലുള്ള ക്രിസ്‌ത്യാ​നി​കൾക്ക്‌ എഴുതി. സമയം തീർന്നു​കൊ​ണ്ടി​രി​ക്കു​ക​യാ​യി​രു​ന്നു. വിശ്വാ​സ​ത്യാ​ഗം ഭവിച്ച യഹൂദ വ്യവസ്ഥി​തി​യു​ടെ ദുഷ്ട “തലമുറ” ഏതാണ്ട്‌ ‘ഒഴിഞ്ഞു​പോ​കു’ന്നതിനുള്ള സമയമാ​യി​രു​ന്നു അത്‌. യെരു​ശ​ലേ​മി​ലുള്ള ക്രിസ്‌ത്യാ​നി​കൾ പ്രത്യേ​കി​ച്ചും ജാഗ്ര​ത​യും വിശ്വ​സ്‌ത​ത​യും ഉള്ളവരാ​യി​രി​ക്ക​ണ​മാ​യി​രു​ന്നു; സൈന്യ​ങ്ങൾ പട്ടണത്തെ വളഞ്ഞി​രി​ക്കു​ന്നതു കാണു​മ്പോൾ അവർ അവി​ടെ​നി​ന്നു പലായനം ചെയ്യണ​മാ​യി​രു​ന്നു. (ലൂക്കൊസ്‌ 21:20-24, 32) അപ്പോൾ, ‘മനോ​ധൈ​ര്യം അസ്‌ത​മിച്ച്‌ നിങ്ങൾ തളർന്നു​പോ​കാ​തി​രി​ക്കു’വിൻ എന്ന പൗലോ​സി​ന്റെ നിശ്വസ്‌ത ബുദ്ധ്യു​പ​ദേശം കാലോ​ചി​ത​മാ​യി​രു​ന്നു. (ഹെബ്രാ​യർ 12:3, പി.ഒ.സി. ബൈബിൾ) “മനോ​ധൈ​ര്യം അസ്‌ത​മിച്ച്‌,” (കാമ്‌നോ) ‘തളർന്നു​പോ​കുക’ (എക്ലി​യോ​മായ്‌) എന്നിങ്ങനെ സുവ്യ​ക്ത​മായ രണ്ടു ക്രിയാ​പ​ദങ്ങൾ അപ്പോ​സ്‌ത​ല​നായ പൗലോസ്‌ ഇവിടെ ഉപയോ​ഗി​ച്ചു. ബൈബിൾ പണ്ഡിത​ന്മാർ പറയു​ന്ന​ത​നു​സ​രിച്ച്‌, ഈ ഗ്രീക്കു പദങ്ങൾ “ഫിനി​ഷിങ്‌ ലൈൻ കടന്ന​ശേഷം വിശ്ര​മി​ക്കു​ക​യോ തളർന്നു​വീ​ഴു​ക​യോ ചെയ്യുന്ന ഓട്ടക്കാ​രെ സൂചി​പ്പി​ക്കാൻ അരി​സ്റ്റോ​ട്ടിൽ ഉപയോ​ഗി​ച്ചി​രു​ന്ന​വ​യാണ്‌. [പൗലോ​സി​ന്റെ ലേഖന​ത്തി​ന്റെ] വായന​ക്കാർ അപ്പോ​ഴും ഓട്ടത്തി​ലാ​യി​രു​ന്നു. അവർ ഇടക്കാ​ലത്തു തളർന്നു പിന്മാ​റ​രുത്‌. ക്ഷീണം നിമിത്തം ബോധം​കെട്ടു വീഴു​ന്ന​തിന്‌ അവർ തങ്ങളെ അനുവ​ദി​ക്ക​രുത്‌. ബുദ്ധി​മു​ട്ടു​കൾക്കു മധ്യേ​യും സ്ഥിരോ​ത്സാ​ഹം കാണി​ക്കേ​ണ്ട​യാ​വ​ശ്യ​മുണ്ട്‌.”

20. പൗലോ​സി​ന്റെ ബുദ്ധ്യു​പ​ദേശം നമുക്കി​ന്നു കാലോ​ചി​ത​മാ​യി​രി​ക്കു​ന്നത്‌ എന്തു​കൊണ്ട്‌?

²⁰ പൗലോ​സി​ന്റെ ബുദ്ധ്യു​പ​ദേശം നമുക്കിന്ന്‌ എത്ര കാലോ​ചി​ത​മാണ്‌! വർധി​ച്ചു​വ​രുന്ന സമ്മർദ​ങ്ങൾക്കി​ട​യിൽ, കാലുകൾ കുഴഞ്ഞു തളർന്നു​വീ​ഴു​മെന്നു തോന്നുന്ന ഓട്ടക്കാ​ര​നെ​പ്പോ​ലെ നമുക്കും തോന്നി​യെ​ന്നു​വ​രാം. എന്നാൽ ഫിനിഷ്‌ ലൈനി​ന്റെ തൊട്ട​ടു​ത്തെ​ത്തിയ നാം തളർന്നു പിന്മാ​റ​രുത്‌! (2 ദിനവൃ​ത്താ​ന്തം 29:11) നാം അങ്ങനെ ചെയ്യണ​മെ​ന്നു​ത​ന്നെ​യാ​ണു നമ്മുടെ പ്രതി​യോ​ഗി​യായ “അലറുന്ന സിംഹം” ആഗ്രഹി​ക്കു​ന്ന​തും. ‘ക്ഷീണി​ച്ചി​രി​ക്കു​ന്ന​വന്നു ശക്തി നൽകാൻ’ യഹോവ കരുതൽ ചെയ്‌തി​രി​ക്കു​ന്ന​തിൽ നമുക്ക്‌ നന്ദിയു​ള്ള​വ​രാ​യി​രി​ക്കാം. (യെശയ്യാ​വു 40:29) ആ കരുത​ലു​കൾ എന്താ​ണെ​ന്നും നമുക്ക്‌ അവ എങ്ങനെ പ്രയോ​ജ​ന​പ്പെ​ടു​ത്താ​മെ​ന്നും അടുത്ത ലേഖന​ത്തിൽ ചർച്ച​ചെ​യ്യു​ന്ന​താണ്‌.

[അടിക്കു​റി​പ്പു​കൾ]

നിങ്ങളു​ടെ ഉത്തരം എന്താണ്‌?

◻ മറ്റുള്ളവർ നമ്മെ നിരാ​ശ​പ്പെ​ടു​ത്തു​ക​യോ വേദനി​പ്പി​ക്കു​ക​യോ ചെയ്യു​മ്പോൾ തളർന്നു​പി​ന്മാ​റു​ന്നത്‌ നമു​ക്കെ​ങ്ങനെ ഒഴിവാ​ക്കാം?

◻ കുറ്റ​ബോ​ധം സംബന്ധിച്ച എന്തു സന്തുലിത വീക്ഷണം തളർന്നു​പി​ന്മാ​റു​ന്ന​തിൽനി​ന്നു നമ്മെ പിന്തി​രി​പ്പി​ക്കും?

◻ യഹോവ നമ്മിൽനിന്ന്‌ എന്താണു പ്രതീ​ക്ഷി​ക്കു​ന്നത്‌?

◻ തളർന്നു പിന്മാ​റാ​തി​രി​ക്കാൻ മൂപ്പന്മാ​രെ വിനയം എങ്ങനെ സഹായി​ച്ചേ​ക്കാം?

◻ എബ്രായർ 12:3-ൽ പൗലോസ്‌ നൽകി​യി​രി​ക്കുന്ന ബുദ്ധ്യു​പ​ദേശം നമുക്കി​ന്നു കാലോ​ചി​ത​മാ​യി​രി​ക്കു​ന്നത്‌ എന്തു​കൊണ്ട്‌?