കണ്ണാടി എന്തു വെളി​പ്പെ​ടു​ത്തു​ന്നു?

കണ്ണാടി​യി​ലൊ​ന്നു നോക്കുക. നിങ്ങൾ എന്തു കാണുന്നു? ചില​പ്പോൾ കണ്ണാടി​യി​ലൊ​ന്നു നോക്കു​മ്പോ​ഴാ​കാം നിങ്ങളു​ടെ ബാഹ്യ​പ്ര​കൃ​ത​ത്തിൽ അലോ​സ​ര​പ്പെ​ടു​ത്തുന്ന എന്തെങ്കി​ലു​മൊ​രു പിശകു കണ്ടെത്തുക. എന്നാൽ മറ്റുള്ളവർ കാണു​ന്ന​തി​നു​മുമ്പ്‌ അതു നീക്കാൻ നിങ്ങൾക്കു സന്തോ​ഷ​മേ​യു​ള്ളൂ.

ബൈബിൾ ഏതാണ്ട്‌ ഒരു കണ്ണാടി​പോ​ലെ​യാണ്‌. നമ്മെക്കു​റി​ച്ചു​തന്നെ സത്യസ​ന്ധ​മായ ഒരു കാഴ്‌ച​പ്പാ​ടു ലഭിക്കാൻ അതിനു നമ്മെ സഹായി​ക്കാ​നാ​വും. അതു ദൈവ​ദൃ​ഷ്ടി​ക​ളിൽ നമുക്കുള്ള വില​യെ​ക്കു​റിച്ച്‌ ആവശ്യ​ത്തി​ല​ധി​ക​മോ തീരെ കുറച്ചോ ചിന്തി​ക്കാ​തി​രി​ക്കാൻ സഹായി​ക്കും. (മത്തായി 10:29-31; റോമർ 12:3) അതിലു​പരി, നമ്മുടെ വാക്കു​ക​ളി​ലോ പ്രവൃ​ത്തി​ക​ളി​ലോ മനോ​ഭാ​വ​ങ്ങ​ളി​ലോ ഉള്ള, നാം തിരു​ത്തേ​ണ്ട​തായ പാളി​ച്ചകൾ ബൈബി​ളി​നു വെളി​പ്പെ​ടു​ത്താ​നാ​വും. ഇങ്ങനെ സംഭവി​ക്കു​മ്പോൾ, കണ്ണാടി വെളി​പ്പെ​ടു​ത്തു​ന്ന​തി​നെ നിങ്ങൾ അവഗണി​ക്കു​മോ?

“വചനം കേൾക്ക മാത്രം ചെയ്‌തു​കൊ​ണ്ടു തങ്ങളെ തന്നേ ചതിക്കാ​തെ അതിനെ ചെയ്യു​ന്ന​വ​രാ​യും ഇരിപ്പിൻ. ഒരുത്തൻ വചനം കേൾക്കു​ന്നവൻ എങ്കിലും ചെയ്യാ​ത്ത​വ​നാ​യി​രു​ന്നാൽ അവൻ തന്റെ സ്വാഭാ​വിക മുഖം കണ്ണാടി​യിൽ നോക്കുന്ന ആളോടു ഒക്കുന്നു. അവൻ തന്നെത്താൻ കണ്ടു പുറ​പ്പെട്ടു താൻ ഇന്ന രൂപം ആയിരു​ന്നു എന്നു ഉടനെ മറന്നു​പോ​കു​ന്നു,” ബൈബി​ളെ​ഴു​ത്തു​കാ​ര​നായ യാക്കോബ്‌ പറയുന്നു.—യാക്കോബ്‌ 1:23, 24.

അതിനു വിപരീ​ത​മാ​യി, “സ്വാത​ന്ത്ര്യ​ത്തി​ന്റെ തികഞ്ഞ ന്യായ​പ്ര​മാ​ണം ഉറ്റു​നോ​ക്കി അതിൽ നിലനിൽക്കുന്ന” മറ്റൊരു മനുഷ്യ​നെ യാക്കോബ്‌ വർണി​ക്കു​ന്നു. (യാക്കോബ്‌ 1:25) ‘ഉറ്റു​നോ​ക്കുക’ എന്നു പരിഭാ​ഷ​പ്പെ​ടു​ത്തി​യി​രി​ക്കുന്ന ഗ്രീക്കു പദത്തിന്റെ അർഥം സമീപ​ത്തേക്കു കുനി​യുക അഥവാ നോക്കാൻവേണ്ടി മുന്നോ​ട്ടു വളയുക എന്നാണ്‌. “പ്രസ്‌തുത പദത്തിന്‌ ഓടി​ച്ചുള്ള ഒരു നോട്ട​ത്തെ​ക്കാൾ അധികം അർഥമുണ്ട്‌,” തിയോ​ള​ജി​ക്കൽ ഡിക്‌ഷ്‌ണറി ഓഫ്‌ ദ ന്യൂ ടെസ്റ്റ​മെൻറ്‌ പറയുന്നു. ഒളിഞ്ഞി​രി​ക്കുന്ന ഒരു വസ്‌തു​വി​നു​വേ​ണ്ടി​യുള്ള ശ്രദ്ധാ​പൂർവ​മായ അന്വേ​ഷ​ണത്തെ സൂചി​പ്പി​ക്കു​ന്ന​താണ്‌ ആ പദം. “കാഴ്‌ച​ക്കാ​രനെ സംബന്ധി​ച്ചി​ട​ത്തോ​ളം കാണാ​നും ഉടൻതന്നെ സംഗതി​യു​ടെ അർഥം ഗ്രഹി​ക്കാ​നും ബുദ്ധി​മു​ട്ടാ​ണെ​ങ്കിൽപ്പോ​ലും അയാൾ കാണാൻ ആഗ്രഹി​ക്കുന്ന പ്രധാ​ന​പ്പെട്ട എന്തോ ഉണ്ട്‌,” ബൈബിൾ വ്യാഖ്യാ​താ​വായ ആർ. വി. ജി. റ്റസ്‌ക്കർ എഴുതു​ന്നു.

അങ്ങനെ ദൈവ​വ​ച​ന​മെന്ന കണ്ണാടി​യിൽ നിങ്ങൾ നിങ്ങ​ളെ​ത്തന്നെ സൂക്ഷ്‌മ​പ​രി​ശോ​ധന നടത്തു​മോ? യാക്കോബ്‌ ഇങ്ങനെ തുടർന്നു പറയുന്നു: “കേട്ടു മറക്കു​ന്ന​വനല്ല, എന്നാൽ പ്രവൃത്തി ചെയ്യു​ന്നവൻ [അതു] ചെയ്യു​ന്ന​തിൽ സന്തുഷ്ട​നാ​കും.”—യാക്കോബ്‌ 1:25, NW.