ഒരു ലക്ഷ്യ​ത്തോ​ടെ​യുള്ള വിദ്യാ​ഭ്യാ​സം

“നീതി​മാ​നെ ഉപദേ​ശിക്ക അവൻ വിദ്യാ​ഭി​വൃ​ദ്ധി പ്രാപി​ക്കും.”—സദൃശ​വാ​ക്യ​ങ്ങൾ 9:9.

1. അറിവി​ന്റെ കാര്യ​ത്തിൽ യഹോവ തന്റെ ദാസൻമാ​രിൽനിന്ന്‌ എന്താണു പ്രതീ​ക്ഷി​ക്കു​ന്നത്‌?

യഹോവ “ജ്ഞാനമുള്ള ദൈവ”മാകുന്നു. (1 ശമൂവേൽ 2:3) അവൻ തന്റെ ദാസൻമാ​രെ പഠിപ്പി​ക്കു​ന്നു. “ഈ ശ്രേഷ്‌ഠ ജാതി ജ്ഞാനവും വിവേ​ക​വും ഉള്ള ജനം തന്നേ” എന്നു സമകാ​ലീ​ന​രായ ജനങ്ങൾ ഇസ്ര​യേ​ലി​നെ​ക്കു​റി​ച്ചു പറയു​മെന്നു മോശ മുൻകൂ​ട്ടി​പ്പ​റഞ്ഞു. (ആവർത്തനം 4:6) സത്യ​ക്രി​സ്‌ത്യാ​നി​കൾ ഇതു​പോ​ലെ അറിവു​ള്ള​വ​രാ​യി​രി​ക്കണം. അവർ ദൈവ​വ​ച​ന​ത്തി​ന്റെ മികച്ച പഠിതാ​ക്ക​ളാ​യി​രി​ക്കേ​ണ്ട​യാ​വ​ശ്യ​മുണ്ട്‌. അത്തരം പഠനത്തി​ന്റെ ലക്ഷ്യം വ്യക്തമാ​ക്കി​ക്കൊണ്ട്‌ അപ്പൊ​സ്‌ത​ല​നായ പൗലോസ്‌ ഇങ്ങനെ എഴുതി: “ഞങ്ങൾ . . . നിങ്ങൾക്കു​വേണ്ടി ഇടവി​ടാ​തെ പ്രാർത്ഥി​ക്കു​ന്നു. നിങ്ങൾ പൂർണ്ണ​പ്ര​സാ​ദ​ത്തി​ന്നാ​യി കർത്താ​വി​ന്നു യോഗ്യ​മാ​കും​വണ്ണം നടന്നു, ആത്മിക​മായ സകല ജ്ഞാനത്തി​ലും വിവേ​ക​ത്തി​ലും അവന്റെ ഇഷ്ടത്തി​ന്റെ​പ​രി​ജ്ഞാ​നം കൊണ്ടു നിറഞ്ഞു​വ​രേണം എന്നും സകല സൽപ്ര​വൃ​ത്തി​യി​ലും ഫലം കായിച്ചു ദൈവ​ത്തെ​ക്കു​റി​ച്ചുള്ള പരിജ്ഞാ​ന​ത്തിൽ വളരേ​ണ​മെ​ന്നും . . . ” തന്നെ.—കൊ​ലൊ​സ്സ്യർ 1:9, 10.

2. (എ) ദൈവ​ത്തെ​ക്കു​റി​ച്ചു സൂക്ഷ്‌മ​പ​രി​ജ്ഞാ​നം സമ്പാദി​ക്കു​ന്ന​തിന്‌ എന്താണാ​വ​ശ്യ​മാ​യി​രി​ക്കു​ന്നത്‌? (ബി) ഇക്കാര്യം യഹോ​വ​യു​ടെ സാക്ഷി​ക​ളു​ടെ ഭരണസം​ഘം എങ്ങനെ​യാ​ണു കൈകാ​ര്യം ചെയ്‌തി​രി​ക്കു​ന്നത്‌?

² ദൈവ​ത്തെ​യും അവന്റെ ഉദ്ദേശ്യ​ങ്ങ​ളെ​യും കുറിച്ചു സൂക്ഷ്‌മ​പ​രി​ജ്ഞാ​നം സമ്പാദി​ക്ക​ണ​മെന്ന ലക്ഷ്യത്തി​ലുള്ള പഠനത്തി​നു കുറഞ്ഞ അളവി​ലുള്ള വിദ്യാ​ഭ്യാ​സ​മെ​ങ്കി​ലും ആവശ്യ​മാണ്‌. എന്നാൽ ദൈവ​വ​ച​ന​ത്തി​ലെ സത്യം പഠിക്കാ​നി​ട​യായ അനേകം​പേർ ശരിയായ ലൗകിക വിദ്യാ​ഭ്യാ​സം നേടാൻ ഒട്ടും​തന്നെ അവസര​മി​ല്ലാഞ്ഞ രാജ്യ​ങ്ങ​ളി​ലാണ്‌ ജീവി​ക്കു​ന്നത്‌. അവർക്ക്‌ അങ്ങനെ ഒരു കുറവു​ണ്ടാ​യി​രു​ന്നു. ഈ പ്രശ്‌നത്തെ തരണം​ചെ​യ്യു​ന്ന​തിന്‌, ആവശ്യ​മു​ള്ള​ടത്തു സഭകളിൽ സാക്ഷര​താ​ക്ലാ​സ്സു​കൾ സംഘടി​പ്പി​ക്ക​ണ​മെന്നു യഹോ​വ​യു​ടെ സാക്ഷി​ക​ളു​ടെ ഭരണസം​ഘം വളരെ വർഷങ്ങ​ളാ​യി നിർദ്ദേ​ശി​ച്ചി​രി​ക്കു​ക​യാണ്‌. മുപ്പതി​ല​ധി​കം വർഷങ്ങൾക്കു മുമ്പ്‌, “യഹോ​വ​യു​ടെ സാക്ഷികൾ നിരക്ഷ​ര​ത​ക്കെ​തി​രെ പോരാ​ടു​ന്നു” എന്ന തലക്കെ​ട്ടിൽ ബ്രസ്സീ​ലി​ലെ വർത്തമാ​ന​പ്പ​ത്ര​മായ ഡിയാ​റി​യോ ഡി മോഷി ഒരു ലേഖനം പ്രസി​ദ്ധീ​ക​രി​ച്ചു. അത്‌ ഇങ്ങനെ പ്രസ്‌താ​വി​ച്ചു: “യോഗ്യ​ത​യുള്ള ഒരു അദ്ധ്യാ​പകൻ എഴുതാ​നും വായി​ക്കാ​നും . . . മററു​ള്ള​വരെ ക്ഷമയോ​ടെ പഠിപ്പി​ച്ചു​തു​ട​ങ്ങു​ന്നു . . . ദൈവ​ത്തി​ന്റെ ശുശ്രൂ​ഷ​ക​രെന്ന നിലയിൽ തങ്ങളെ പ്രേരി​പ്പി​ക്കുന്ന സാഹച​ര്യ​ങ്ങൾനി​മി​ത്തം​തന്നെ വിദ്യാർത്ഥി​കൾ പ്രസം​ഗങ്ങൾ നടത്തു​ന്ന​തി​നു ഭാഷാ​പ​രി​ജ്ഞാ​നം വികസി​പ്പി​ച്ചെ​ടു​ക്കണം.” ലോക​മാ​സ​കലം ആയിര​ക്ക​ണ​ക്കി​നാ​ളു​കൾ ദൈവ​വ​ച​ന​ത്തി​ന്റെ നല്ല പഠിതാ​ക്ക​ളാ​യി​ത്തീ​രാൻ ഇപ്രകാ​രം സഹായി​ക്ക​പ്പെ​ട്ടി​ട്ടുണ്ട്‌. അവർ ഈ അടിസ്ഥാ​ന​വി​ദ്യാ​ഭ്യാ​സം ഒരു ഉത്‌കൃഷ്ട ലക്ഷ്യ​ത്തോ​ടെ​യാണ്‌ ഏറെറ​ടു​ത്തത്‌.

ഫലപ്ര​ദ​രായ ശുശ്രൂ​ഷ​ക​രാ​യി​രി​ക്കാ​നാ​വ​ശ്യ​മായ വൈദ​ഗ്‌ദ്ധ്യ​ങ്ങൾ

3, 4. (എ) സത്യ​ക്രി​സ്‌ത്യാ​നി​കൾ വിദ്യാ​ഭ്യാ​സ​ത്തിൽ തത്‌പ​ര​രാ​യി​രി​ക്കു​ന്നത്‌ എന്തു​കൊണ്ട്‌? (ബി) ഇസ്ര​യേ​ലി​ലെ സ്ഥിതി എന്തായി​രു​ന്നു, ഇന്നു നമ്മുടെ സഭകൾക്കു​ള്ളിൽ എന്ത്‌ അടിസ്ഥാന വിദ്യാ​ഭ്യാ​സം അത്യന്താ​പേ​ക്ഷി​ത​മാണ്‌?

³ സത്യ​ക്രി​സ്‌ത്യാ​നി​കൾ വിദ്യാ​ഭ്യാ​സ​ത്തിൽ തത്‌പ​ര​രാണ്‌, വെറും വിദ്യാ​ഭ്യാ​സ​ത്തി​നു​വേ​ണ്ടി​യല്ല, മറിച്ച്‌, യഹോ​വ​യു​ടെ ഏറെ ഫലപ്ര​ദ​രായ ശുശ്രൂ​ഷ​ക​രാ​യി​ത്തീ​രു​ന്ന​തി​നു​വേണ്ടി. “ഞാൻ നിങ്ങ​ളോ​ടു കല്‌പി​ച്ച​തൊ​ക്കെ​യും പ്രമാ​ണി​പ്പാൻ തക്കവണ്ണം ഉപദേ​ശി​ച്ചു​കൊ​ണ്ടു . . . സകലജാ​തി​ക​ളെ​യും ശിഷ്യ​രാ​ക്കാൻ” ഉള്ള നിയോ​ഗം ക്രിസ്‌തു സകല ക്രിസ്‌ത്യാ​നി​കൾക്കും നൽകി. (മത്തായി 28:19, 20) മററു​ള്ള​വരെ പഠിപ്പി​ക്കു​ന്ന​തിന്‌, അവർ തന്നെ ആദ്യം പഠിക്കണം. ഇതിനു നല്ല പഠനരീ​തി​കൾ ആവശ്യ​മാണ്‌. അവർക്കു തിരു​വെ​ഴു​ത്തു​കൾ ശ്രദ്ധാ​പൂർവം പരി​ശോ​ധി​ക്കു​ന്ന​തി​നുള്ള കഴിവു​ണ്ടാ​യി​രി​ക്കണം. (പ്രവൃ​ത്തി​കൾ 17:11) തങ്ങളുടെ നിയോ​ഗം നിവർത്തി​ക്കു​ന്ന​തിന്‌ ഒഴു​ക്കോ​ടെ വായി​ക്കാ​നും അവർക്കു കഴിയണം.—ഹബക്കൂക്ക്‌ 2:2; 1 തിമൊ​ഥെ​യൊസ്‌ 4:13 എന്നിവ കാണുക.

⁴ മുൻ ലേഖന​ത്തിൽ നാം കണ്ടതു​പോ​ലെ, പൊതു​വെ പുരാതന ഇസ്ര​യേ​ലി​ലെ കുട്ടി​കൾക്കു​പോ​ലും എഴുതാ​നും വായി​ക്കാ​നും അറിയാ​മാ​യി​രു​ന്നു​വെന്നു വിശ്വ​സി​ക്കു​ന്ന​തി​നു നല്ല കാരണ​മുണ്ട്‌. (ന്യായാ​ധി​പൻമാർ 8:14; യെശയ്യാ​വു 10:19) വീടു​തോ​റും സാക്ഷീ​ക​രി​ക്കു​മ്പോൾ ക്രിസ്‌തീയ ശുശ്രൂ​ഷകർ വൃത്തി​യുള്ള കുറി​പ്പു​കൾ ഉണ്ടാ​ക്കേ​ണ്ട​തുണ്ട്‌. അവർ കത്തുകൾ എഴുതു​ക​യും യോഗ​ങ്ങ​ളിൽ കുറി​പ്പു​കൾ ഉണ്ടാക്കു​ക​യും തങ്ങളുടെ അദ്ധ്യയ​ന​ഭാ​ഗ​ങ്ങ​ളിൽ വിശദീ​ക​ര​ണ​ക്കു​റി​പ്പു​കൾ എഴുതു​ക​യും ചെയ്യുന്നു. ഇതി​നെ​ല്ലാം വായി​ക്കത്തക്ക കയ്യക്ഷരം ആവശ്യ​മാണ്‌. ക്രിസ്‌തീയ സഭയിലെ രേഖക​ളു​ടെ സൂക്ഷിപ്പ്‌ ഗണിത​ശാ​സ്‌ത്ര​ത്തിൽ അടിസ്ഥാന പരിജ്ഞാ​ന​മെ​ങ്കി​ലും ഉണ്ടായി​രി​ക്കേ​ണ്ട​താ​വ​ശ്യ​മാ​ക്കി​ത്തീർക്കു​ന്നു.

ശരിയായ സ്‌കൂൾവി​ദ്യാ​ഭ്യാ​സ​ത്തി​ന്റെ പ്രയോ​ജ​ന​ങ്ങൾ

5. “സ്‌കൂൾ” എന്ന പദത്തിന്റെ ഉത്ഭവം എന്താണ്‌? (ബി) ചെറു​പ്പ​ക്കാർ ഏതവസരം പ്രയോ​ജ​ന​പ്പെ​ടു​ത്തണം?

⁵ രസാവ​ഹ​മാ​യി, “സ്‌കൂൾ” എന്ന പദം സ്‌കോ​ളെ എന്ന മൂല ഗ്രീക്കു​പ​ദ​ത്തിൽനി​ന്നു വരുന്ന​താണ്‌. ഇത്‌ ആദിയിൽ “ഒഴിവു​സമയ”ത്തെ അല്ലെങ്കിൽ പഠനം പോലെ ഗൗരവ​മുള്ള എന്തെങ്കി​ലും പ്രവർത്ത​ന​ത്തി​നാ​യി ഒഴിവു​സ​മയം ഉപയോ​ഗി​ക്കു​ന്ന​തി​നെ അർത്ഥമാ​ക്കി. അതു പിന്നീട്‌ ഇത്തരം പഠനം നടക്കുന്ന സ്ഥലത്തെ കുറി​ക്കു​ന്ന​തി​നാ​യി ഉപയോ​ഗി​ച്ചു. ഒരു കാലത്ത്‌ ഗ്രീസി​ലും മററു മിക്ക രാജ്യ​ങ്ങ​ളി​ലും ഉന്നതകു​ല​ജാ​തർക്കു മാത്രമേ പഠിക്കു​ന്ന​തി​നുള്ള ഒഴിവു​സ​മ​യ​മു​ണ്ടാ​യി​രു​ന്നു​ള്ളു എന്ന്‌ ഇതു സൂചി​പ്പി​ക്കു​ന്നു. തൊഴി​ലാ​ളി​വർഗ്ഗം പൊതു​വെ അജ്ഞരായി കഴിഞ്ഞു​കൂ​ടി. ഇന്ന്‌ മിക്ക രാജ്യ​ങ്ങ​ളി​ലും, കുട്ടി​കൾക്കും ചെറു​പ്പ​ക്കാർക്കും പഠിക്കു​ന്ന​തി​നുള്ള സമയം നൽക​പ്പെ​ടു​ന്നു. ചെറു​പ്പ​ക്കാ​രായ സാക്ഷികൾ യഹോ​വ​യു​ടെ, അറിവും കഴിവു​മുള്ള ദാസൻമാ​രാ​യി​ത്തീ​രു​ന്ന​തിന്‌ ഉചിത​മായ സമയം വിലയ്‌ക്കു വാങ്ങണം.—എഫെസ്യർ 5:15, 16.

6, 7. (എ) ശരിയായ സ്‌കൂൾവി​ദ്യാ​ഭ്യാ​സ​ത്തി​ന്റെ പ്രയോ​ജ​ന​ങ്ങ​ളിൽ ചിലത്‌ എന്തെല്ലാം? (ബി) ഒരു അന്യഭാഷ പഠിക്കു​ന്നത്‌ ഏതെല്ലാം വിധങ്ങ​ളിൽ പ്രയോ​ജനം കൈവ​രു​ത്തും? (സി) സ്‌കൂൾവി​ദ്യാ​ഭ്യാ​സം പൂർത്തി​യാ​ക്കു​മ്പോൾ ഇന്നത്തെ അനേകം ചെറു​പ്പ​ക്കാ​രു​ടെ​യി​ട​യി​ലെ സ്ഥിതി എന്താണ്‌?

⁶ ചരിത്രം, ഭൂമി​ശാ​സ്‌ത്രം, സയൻസ്‌ എന്നിങ്ങ​നെ​യുള്ള വിഷയ​ങ്ങ​ളി​ലെ അടിസ്ഥാന പരിജ്ഞാ​നം ചെറു​പ്പ​ക്കാ​രായ സാക്ഷി​കളെ സന്തുലി​ത​രായ ശുശ്രൂ​ഷ​ക​രാ​യി​ത്തീ​രാൻ സഹായി​ക്കും. അവരുടെ സ്‌കൂൾപ​ഠനം, അവരെ അനേകം വിഷയങ്ങൾ മാത്രമല്ല, പഠന​പ്ര​ക്രി​യ​കൂ​ടി പഠിപ്പി​ക്കും. സ്‌കൂ​ളിൽനി​ന്നു പിരി​യു​മ്പോൾ സത്യ​ക്രി​സ്‌ത്യാ​നി​കൾ തങ്ങളുടെ പഠിത്ത​വും അദ്ധ്യയ​ന​വും അവസാ​നി​പ്പി​ക്കു​ന്നില്ല. ഏതായാ​ലും അവർക്കു തങ്ങളുടെ പഠിത്ത​ത്തിൽനി​ന്നു ലഭിക്കു​ന്നത്‌ എങ്ങനെ പഠിക്ക​ണ​മെന്ന അറിവി​നെ അതിയാ​യി ആശ്രയി​ച്ചി​രി​ക്കും. ലൗകി​ക​വും സഭാപ​ര​വു​മായ പഠിത്ത​ത്തിന്‌ അവരുടെ ചിന്താ​പ്രാ​പ്‌തി​കളെ വികസി​പ്പി​ക്കു​ന്ന​തിൽ സഹായി​ക്കാൻ കഴിയും. (സദൃശ​വാ​ക്യ​ങ്ങൾ 5:1, 2) വായി​ക്കു​മ്പോൾ, പ്രാധാ​ന്യ​മു​ള്ളത്‌ എന്ത്‌, ശ്രദ്ധി​ക്ക​യും ഓർത്തി​രി​ക്ക​യും ചെയ്യേ​ണ്ടത്‌ എന്ത്‌ എന്നു തിരി​ച്ച​റി​യാൻ അവർ ഏറെ പ്രാപ്‌ത​രാ​യി​രി​ക്കും.

⁷ ഉദാഹ​ര​ണ​ത്തിന്‌, ഒരു അന്യഭാഷ പഠിക്കു​ന്നതു ചെറു​പ്പ​ക്കാ​രു​ടെ മാനസിക കഴിവു​കളെ വികസി​പ്പി​ക്കുക മാത്രമല്ല, യഹോ​വ​യു​ടെ സ്ഥാപന​ത്തിൽ അവരെ കൂടുതൽ ഉപയോ​ഗ​മു​ള്ള​വ​രാ​ക്കു​ക​യും ചെയ്യും. വാച്ച്‌ ടവർ സൊ​സൈ​റ​റി​യു​ടെ ചില ബ്രാഞ്ചു​ക​ളിൽ, ഇംഗ്ലീഷ്‌ ഒഴു​ക്കോ​ടെ വായി​ക്കാ​നും എഴുതാ​നും കഴിവു​ള്ള​വ​രാ​യി​രി​ക്കു​ന്നതു പ്രയോ​ജ​ന​ക​ര​മാ​ണെന്ന്‌ അനേകം ചെറു​പ്പ​ക്കാർ കണ്ടെത്തി​യി​രി​ക്കു​ന്നു. കൂടാതെ, തങ്ങളുടെ മാതൃ​ഭാ​ഷ​യിൽ നിപു​ണ​രാ​യി​രി​ക്കാൻ എല്ലാ ക്രിസ്‌തീയ ശുശ്രൂ​ഷ​ക​രും ശ്രമി​ക്കേ​ണ്ട​താണ്‌. രാജ്യ​സു​വാർത്ത വ്യക്തമായ, വ്യാക​ര​ണ​പ​ര​മാ​യി ശരിയായ രീതി​യിൽ പ്രസ്‌താ​വി​ക്കേ​ണ്ട​താണ്‌. വസ്‌തു​തകൾ പ്രകട​മാ​ക്കു​ന്നത്‌, ഇന്നത്തെ ലോക​ത്തിൽ അനേകം ചെറു​പ്പ​ക്കാർക്ക്‌ സ്‌കൂൾപ​ഠനം പൂർത്തീ​ക​രി​ക്കു​മ്പോ​ഴും ശരിയാ​യി എഴുതു​ന്ന​തി​നും വായി​ക്കു​ന്ന​തി​നും ഏററവും ലളിത​മായ കണക്കുകൾ പോലും കൂട്ടു​ന്ന​തി​നും പ്രയാ​സ​മു​ണ്ടെ​ന്നാണ്‌; അവർക്കു ചരി​ത്ര​ത്തി​ലും ഭൂമി​ശാ​സ്‌ത്ര​ത്തി​ലും തീർത്തും അവ്യക്ത​മായ അറിവേ ഉള്ളു.

മതിയായ വിദ്യാ​ഭ്യാ​സം

8. ലൗകിക വിദ്യാ​ഭ്യാ​സം സംബന്ധി​ച്ചും തന്നേത്തന്നെ പോറ​റു​ന്ന​തി​നുള്ള ഒരു വ്യക്തി​യു​ടെ പ്രാപ്‌തി സംബന്ധി​ച്ചും പ്രസക്ത​മായ തിരു​വെ​ഴു​ത്തു​കൾ ഏവ?

⁸ അതു​കൊണ്ട്‌, ഇതു ലൗകിക വിദ്യാ​ഭ്യാ​സ​ത്തോ​ടുള്ള ഒരു ക്രിസ്‌ത്യാ​നി​യു​ടെ മനോ​ഭാ​വം പരി​ശോ​ധി​ക്കു​ന്ന​തി​നുള്ള ഉചിത​മായ സമയമാ​ണെന്നു തോന്നു​ന്നു. ഏതു ബൈബിൾ തത്ത്വങ്ങൾക്കാണ്‌ ഈ വിഷയ​ത്തിൽ പ്രസക്തി​യു​ള്ളത്‌? ഒന്നാമ​താ​യി, മിക്ക രാജ്യ​ങ്ങ​ളി​ലും “കൈസ”രോടുള്ള ഉചിത​മായ കീഴ്‌പെടൽ തങ്ങളുടെ കുട്ടി​കളെ സ്‌കൂ​ളിൽ വിടാൻ മാതാ​പി​താ​ക്ക​ളോട്‌ ആവശ്യ​പ്പെ​ടു​ന്നു. (മർക്കൊസ്‌ 12:17; തീത്തൊസ്‌ 3:1) ചെറു​പ്പ​ക്കാ​രായ സാക്ഷി​കളെ സംബന്ധി​ച്ച​ട​ത്തോ​ളം അവർ തങ്ങളുടെ സ്‌കൂൾവേ​ല​യിൽ “നിങ്ങൾ ചെയ്യു​ന്നതു ഒക്കെയും മനുഷ്യർക്കെന്നല്ല കർത്താ​വി​ന്നു എന്നപോ​ലെ മനസ്സോ​ടെ ചെയ്‌വിൻ” എന്നു പറയുന്ന കൊ​ലൊ​സ്സ്യർ 3:23 ഓർക്കേ​ണ്ട​തുണ്ട്‌. ഉൾപ്പെ​ട്ടി​രി​ക്കുന്ന രണ്ടാമത്തെ തത്ത്വം, മുഴു​സമയ പയനിയർ ശുശ്രൂ​ഷ​ക​രാ​യാൽപോ​ലും ക്രിസ്‌ത്യാ​നി​കൾ സ്വയം പോറ​റാൻ പ്രാപ്‌ത​രാ​യി​രി​ക്കണം എന്നതാണ്‌. (2 തെസ്സ​ലൊ​നീ​ക്യർ 3:10-12) വിവാ​ഹി​ത​നാ​ണെ​ങ്കിൽ ഒരു പുരുഷൻ തന്റെ ഭാര്യ​ക്കും ജനി​ച്ചേ​ക്കാ​വുന്ന കുട്ടി​കൾക്കും​വേണ്ടി യഥോ​ചി​തം കരുതാൻ കഴിവു​ള്ള​വ​നാ​യി​രി​ക്കണം. സഹായ​മാ​വ​ശ്യ​മു​ള്ള​വർക്കു നൽകു​ന്ന​തി​നും പ്രാ​ദേ​ശി​ക​വും ലോക​വ്യാ​പ​ക​വു​മായ പ്രസം​ഗ​വേ​ലയെ പിന്തു​ണ​യ്‌ക്കു​ന്ന​തി​നും അല്‌പം ബാക്കി​യു​ണ്ടാ​യി​രി​ക്ക​യും വേണം.—എഫെസ്യർ 4:28; 1 തിമൊ​ഥെ​യൊസ്‌ 5:8.

9, 10. (എ) അനേകം ദേശങ്ങ​ളി​ലുള്ള ഒരു പ്രവണത എന്താ​ണെന്നു കാണ​പ്പെ​ടു​ന്നു? (ബി) ഒരു പയനിയർ ശുശ്രൂ​ഷ​കനു മതിയായ ശമ്പളമാ​യി എന്തിനെ കണക്കാ​ക്കാം?

⁹ ഈ ബൈബിൾത​ത്ത്വ​ങ്ങളെ മാനി​ക്കു​ന്ന​തി​നും തന്റെ ക്രിസ്‌തീയ ഉത്തരവാ​ദി​ത്വ​ങ്ങൾ നിറ​വേ​റ​റു​ന്ന​തി​നും ഒരു യുവ​ക്രി​സ്‌ത്യാ​നിക്ക്‌ എന്തു വിദ്യാ​ഭ്യാ​സം ആവശ്യ​മാണ്‌? ഇതു രാജ്യ​ങ്ങൾതോ​റും വ്യത്യ​സ്‌ത​മാ​യി​രി​ക്കും. എന്നിരു​ന്നാ​ലും, അനേകം ദേശങ്ങ​ളി​ലെ​യും പൊതു​പ്ര​വണത മാന്യ​മായ ശമ്പളം വാങ്ങു​ന്ന​തിന്‌ ഇന്നാവ​ശ്യ​മായ സ്‌കൂൾവി​ദ്യാ​ഭ്യാ​സം ഏതാനും വർഷങ്ങൾ മുമ്പ​ത്തേ​തി​നെ​ക്കാൾ ഉയർന്ന​താ​ണെന്നു തോന്നു​ന്നു. ലോക​ത്തി​ന്റെ വിവിധ ഭാഗങ്ങ​ളി​ലുള്ള വാച്ച്‌ ടവർ സൊ​സൈ​റ​റി​യു​ടെ ബ്രാഞ്ചു​ക​ളിൽനി​ന്നു ലഭിക്കുന്ന റിപ്പോർട്ടു​കൾ സൂചി​പ്പി​ക്കു​ന്നത്‌ അനേകം സ്ഥലങ്ങളിൽ നിയമം ആവശ്യ​പ്പെ​ടുന്ന ഏററവും കുറഞ്ഞ സ്‌കൂൾവി​ദ്യാ​ഭ്യാ​സം പൂർത്തി​യാ​ക്കി​യ​ശേ​ഷ​മോ ചില രാജ്യ​ങ്ങ​ളിൽ സെക്കൻഡറി സ്‌കൂൾ അഥവാ ഹൈസ്‌കൂൾ പൂർത്തീ​ക​രി​ച്ച​തി​നു​ശേ​ഷം​പോലു​മോ മാന്യ​മായ ശമ്പളമുള്ള ജോലി കണ്ടെത്താൻ പ്രയാ​സ​മാ​ണെ​ന്നാണ്‌.

¹⁰ “മാന്യ​മായ ശമ്പളം” എന്നതി​നാൽ എന്താണ്‌ അർത്ഥമാ​ക്കു​ന്നത്‌? അതു വലിയ ശമ്പളമുള്ള ജോലി​കളെ സൂചി​പ്പി​ക്കു​ന്നില്ല. വെബ്‌സ്‌റേ​റ​ഴ്‌സ്‌ ഡിക്‌ഷ്‌നറി “ഡീസൻറ്‌” (മാന്യ​മായ) എന്ന ഇംഗ്ലീ​ഷ്‌പ​ദ​ത്തി​നു കൊടു​ക്കുന്ന നിർവ​ചനം ഈ സംബന്ധ​ത്തിൽ “പര്യാ​പ്‌ത​മായ, തൃപ്‌തി​ക​ര​മായ” എന്നാണ്‌. ഉദാഹ​ര​ണ​ത്തിന്‌, സുവാർത്ത​യു​ടെ പയനിയർ ശുശ്രൂ​ഷ​ക​രാ​യി​രി​ക്കാൻ ആഗ്രഹി​ക്കു​ന്ന​വർക്ക്‌ എന്തി​നെ​യാണ്‌ “പര്യാ​പ്‌ത​മായ”ത്‌ എന്നു വിളി​ക്കാ​വു​ന്നത്‌? തങ്ങളുടെ സഹോ​ദ​രൻമാർക്കോ കുടും​ബ​ത്തി​നോ “ഭാരമാ​യി​ത്തീ​രു​ന്നത്‌” ഒഴിവാ​ക്കാൻ ഇത്തരം ആളുകൾക്കു പൊതു​വെ അംശകാല ജോലി ആവശ്യ​മാണ്‌. (1 തെസ്സ​ലൊ​നീ​ക്യർ 2:9) അവർ സമ്പാദി​ക്കു​ന്നതു തങ്ങളുടെ ക്രിസ്‌തീയ ശുശ്രൂഷ നിറ​വേ​റ​റാ​നാ​വ​ശ്യ​മായ സമയവും ആരോ​ഗ്യ​വും ഉണ്ടായി​രി​ക്കെ​ത്തന്നെ അവരെ മാന്യ​മാ​യി ജീവി​ക്കാൻ അനുവ​ദി​ക്കു​ന്നെ​ങ്കിൽ അവരുടെ ശമ്പള​ത്തെ​ക്കു​റി​ച്ചു “പര്യാ​പ്‌ത​മാ​യത്‌, തൃപ്‌തി​ക​ര​മാ​യത്‌” എന്നു പറയാൻ കഴിയും.

11. ചില ചെറു​പ്പ​ക്കാർ പയനി​യർസേ​വനം ഉപേക്ഷി​ച്ചു​ക​ള​ഞ്ഞത്‌ എന്തു​കൊണ്ട്‌, ഏതു ചോദ്യം ഉദിക്കു​ന്നു?

¹¹ ഇന്നു മിക്ക​പ്പോ​ഴും സ്ഥിതി എന്താണ്‌? ചില രാജ്യ​ങ്ങ​ളിൽ സദു​ദ്ദേ​ശ്യ​മുള്ള അനേകം ചെറു​പ്പ​ക്കാർ ആവശ്യ​മായ ഏററവും കുറഞ്ഞ സ്‌കൂൾവി​ദ്യാ​ഭ്യാ​സം പൂർത്തി​യാ​ക്കി​യ​ശേഷം പയനി​യർമാ​രാ​കു​ന്ന​തി​നു സ്‌കൂൾ വിട്ടി​രി​ക്കു​ന്നു എന്നു റിപ്പോർട്ടു ചെയ്യ​പ്പെ​ട്ടി​രി​ക്കു​ന്നു. അവർക്കു തൊഴിൽപ​ര​മോ ലൗകി​ക​മോ ആയ യോഗ്യ​ത​ക​ളി​ല്ലാ​യി​രു​ന്നു. തങ്ങളുടെ മാതാ​പി​താ​ക്കൾ സഹായി​ച്ചി​ല്ലെ​ങ്കിൽ അവർ അംശകാ​ല​ജോ​ലി കണ്ടെ​ത്തേ​ണ്ടി​യി​രു​ന്നു. ഉപജീ​വനം കഴിക്കാൻ വേണ്ടത്ര പണം ഉണ്ടായി​രി​ക്കു​ന്ന​തിന്‌ അവർക്കു വളരെ മണിക്കൂ​റു​കൾ പണി​യെ​ടു​ക്കേണ്ട ജോലി​കൾ സ്വീക​രി​ക്കേ​ണ്ടി​വ​ന്നി​ട്ടുണ്ട്‌. ശാരീ​രി​ക​മാ​യി തളർന്നു​പോ​യ​തി​നാൽ അവർ പയനിയർ ശുശ്രൂഷ ഉപേക്ഷി​ച്ചു. ഇത്തരക്കാർക്കു തങ്ങളേ​ത്തന്നെ പോറ​റു​ന്ന​തി​നും പയനിയർ സേവന​ത്തി​ലേക്കു തിരികെ വരുന്ന​തി​നും എന്തു ചെയ്യാൻ കഴിയും?

വിദ്യാ​ഭ്യാ​സം സംബന്ധിച്ച ഒരു സന്തുലി​ത​മായ വീക്ഷണം

12. (എ) വിദ്യാ​ഭ്യാ​സ​ത്തി​ന്റെ സംഗതി​യിൽ ഒരു ക്രിസ്‌ത്യാ​നി ഒഴിവാ​ക്കേണ്ട അങ്ങേയ​റ​റത്തെ രണ്ടു വീക്ഷണങ്ങൾ ഏവ? (ബി) യഹോ​വ​യു​ടെ സമർപ്പിത സാക്ഷി​കൾക്കും അവരുടെ മക്കൾക്കും വിദ്യാ​ഭ്യാ​സം എന്തു​ദ്ദേ​ശ്യം സാധി​ക്കേ​ണ്ട​താണ്‌?

¹² വിദ്യാ​ഭ്യാ​സം സംബന്ധിച്ച ഒരു സന്തുലി​ത​മായ വീക്ഷണ​ത്തി​നു സഹായി​ക്കാൻ കഴിയും. ലോക​ത്തി​ലെ അനേകം ചെറു​പ്പ​ക്കാർക്കു വിദ്യാ​ഭ്യാ​സം അന്തസ്സിന്റെ ഒരു അടയാ​ള​മാണ്‌, സാമൂ​ഹി​ക​മായ ഒരു ഉന്നതസ്ഥാ​ന​ത്തേക്കു ചവിട്ടി​ക്ക​യ​റു​ന്ന​തി​നു സഹായി​ക്കുന്ന ഒന്നാണ്‌, സമ്പൽസ​മൃ​ദ്ധ​മായ ഭൗതിക ജീവി​ത​രീ​തി​യു​ടെ താക്കോൽ തന്നെ. മററു ചിലർക്ക്‌, സ്‌കൂൾവി​ദ്യാ​ഭ്യാ​സം, എത്രയും പെട്ടെന്നു പൂർത്തി​യാ​ക്കേണ്ട ഒരു കഠിന​ജോ​ലി​യാണ്‌. സത്യ​ക്രി​സ്‌ത്യാ​നി​കൾക്ക്‌ ഇതിൽ ഒരു വീക്ഷണ​വും ഉചിതമല്ല. എങ്കിൽപ്പി​ന്നെ “ഒരു സന്തുലി​ത​മായ വീക്ഷണ”മെന്നു എന്തിനെ വിളി​ക്കാൻ കഴിയും? ലക്ഷ്യഫ​ല​പ്രാ​പ്‌തി​ക്കുള്ള ഒരു മാർഗ്ഗ​മാ​യി​ട്ടു വേണം ക്രിസ്‌ത്യാ​നി​കൾ വിദ്യാ​ഭ്യാ​സത്തെ വീക്ഷി​ക്കാൻ. ഈ അന്ത്യനാ​ളു​ക​ളിൽ, സാദ്ധ്യ​മാ​കു​ന്നത്ര അളവി​ലും ഫലപ്ര​ദ​മാ​യും യഹോ​വയെ സേവി​ക്കുക എന്നതാണ്‌ അവരുടെ ഉദ്ദേശ്യം. അവർ ജീവി​ക്കുന്ന രാജ്യത്ത്‌ ഏററവും കുറഞ്ഞ​തോ ഹൈസ്‌കൂ​ളി​ലെ​യോ വിദ്യാ​ഭ്യാ​സം, പയനി​യർമാ​രെ​ന്ന​നി​ല​യിൽ ജീവി​ക്കു​ന്ന​തിന്‌ അപര്യാ​പ്‌ത​മായ വരുമാ​ന​മുള്ള ജോലി കണ്ടെത്താ​നേ അനുവ​ദി​ക്കു​ക​യു​ള്ളു​വെ​ങ്കിൽ അനുബന്ധ വിദ്യാ​ഭ്യാ​സ​മോ പരിശീ​ല​ന​മോ നേടുന്ന കാര്യം പരിഗ​ണി​ക്കാ​വു​ന്ന​താണ്‌. ഇതു മുഴു​സമയ ശുശ്രൂ​ഷ​യെന്ന പ്രത്യേക ലാക്കി​ലാ​യി​രി​ക്കും.

13. (എ) തന്റെ കുടുംബ ഉത്തരവാ​ദി​ത്വ​ങ്ങൾ നിറ​വേ​റ​റവെ, പയനി​യർസേ​വ​ന​ത്തിൽ തുടരാൻ ഫിലി​പ്പീൻസി​ലെ ഒരു സഹോ​ദ​രി​ക്കു കഴിഞ്ഞത്‌ എങ്ങനെ? (ബി) ഏതു മുന്നറി​യി​പ്പു സമയോ​ചി​ത​മാണ്‌?

¹³ ചിലർ, മുഴു​സമയ ശുശ്രൂ​ഷ​യി​ലേർപ്പെ​ടാ​നോ അതു പുനരാ​രം​ഭി​ക്കാ​നോ സഹായി​ക്കുന്ന ജോലി​ക്കുള്ള അവസരങ്ങൾ തുറന്നു​കൊ​ടു​ത്തി​ട്ടുള്ള പരിശീ​ലന കോഴ്‌സു​ക​ളിൽ ചേർന്നി​ട്ടുണ്ട്‌. ഫിലി​പ്പീൻസിൽ ഒരു സഹോ​ദ​രി​യാ​യി​രു​ന്നു കുടും​ബ​ത്തിൽ ഉപജീ​വ​ന​മാർഗ്ഗം തേടി​യി​രു​ന്നത്‌. എന്നാൽ അവൾ പയനി​യ​റിംഗ്‌ ചെയ്യാ​നാ​ഗ്ര​ഹി​ച്ചു. അവിടത്തെ ബ്രാഞ്ച്‌ റിപ്പോർട്ടു ചെയ്യുന്നു: “അവൾക്കി​തു ചെയ്യാൻ കഴിഞ്ഞത്‌ ഒരു സർട്ടി​ഫൈഡ്‌ പബ്ലിക്ക്‌ അക്കൗണ്ടൻറ്‌ എന്ന നിലയിൽ യോഗ്യത സമ്പാദി​ക്കു​ന്ന​തി​നു കൂടു​ത​ലായ വിദ്യാ​ഭ്യാ​സം ലഭിച്ച​തി​നാ​ലാണ്‌.” അതേ ബ്രാഞ്ച്‌റി​പ്പോർട്ട്‌ ഇങ്ങനെ പ്രസ്‌താ​വി​ച്ചു: “പഠിച്ചു​കൊ​ണ്ടി​രി​ക്കെ​ത്തന്നെ പയനി​യ​റിംഗ്‌ ചെയ്യു​ന്ന​തി​നു പട്ടികകൾ ക്രമീ​ക​രി​ക്കാൻ കഴിഞ്ഞ അനേകർ ഞങ്ങൾക്കുണ്ട്‌. പഠനത്തിൽ ശുഷ്‌കാ​ന്തി​യു​ള്ള​വ​രാ​ക​യാൽ, ലോക​ത്തി​ന്റെ അനുധാ​വ​ന​ങ്ങ​ളിൽ അതി​മോ​ഹ​മു​ള്ള​വ​രാ​യി​ത്തീ​രു​ന്നി​ല്ലെ​ങ്കിൽ, പൊതു​വെ അവർ മെച്ചപ്പെട്ട പ്രസാ​ധ​ക​രാ​യി​ത്തീ​രു​ന്നു.” ഒടുവിൽപറഞ്ഞ ഈ കാര്യം ചിന്തി​ക്കാൻ നമുക്കു കാരണം നൽകുന്നു. ആവശ്യ​മാ​ണെന്നു തോന്നു​മ്പോൾ കൂടു​ത​ലാ​യി നടത്തുന്ന വിദ്യാ​ഭ്യാ​സ​ത്തി​ന്റെ ഉദ്ദേശ്യം നാം മറന്നു​പോ​കു​ക​യോ ഭൗതി​കത്വ ലക്ഷ്യത്തി​ലേക്കു തിരി​ഞ്ഞു​പോ​കു​ക​യോ ചെയ്യരുത്‌.

14, 15. (എ) വിദ്യാ​ഭ്യാ​സ​ത്തി​ന്റെ സംഗതി​യിൽ കർക്കശ​മായ നിയമങ്ങൾ വെക്കരു​താ​ത്തത്‌ എന്തു​കൊണ്ട്‌? (ബി) ഉത്തരവാ​ദി​ത്വ​മുള്ള ചില സഹോ​ദ​ര​ങ്ങൾക്ക്‌ എന്തു ലൗകിക വിദ്യാ​ഭ്യാ​സം ഉണ്ടായി​രു​ന്നു, ഇതിന്റെ കുറവു പരിഹ​രി​ച്ചി​രി​ക്കു​ന്നത്‌ എന്താണ്‌?

¹⁴ ചുരുക്കം ചില രാജ്യ​ങ്ങ​ളിൽ, സെക്കൻഡറി സ്‌കൂ​ളു​കൾ ബിരു​ദ​സ​മ്പാ​ദ​ന​ത്തി​ന്റെ സമയമാ​കു​മ്പോ​ഴേ​ക്കും ഏതെങ്കി​ലും തൊഴി​ലിന്‌ ഒരു യുവ​ക്രി​സ്‌ത്യാ​നി​യെ ഒരുക്കാൻ കഴിയുന്ന തൊഴിൽപ​രി​ശീ​ലനം നൽകു​ന്നുണ്ട്‌. വാസ്‌ത​വ​സ്ഥി​തി ഇതല്ലാ​ത്ത​പ്പോൾപോ​ലും ചില രാജ്യ​ങ്ങ​ളിൽ അടിസ്ഥാ​ന​വി​ദ്യാ​ഭ്യാ​സം മാത്ര​മുള്ള പരി​ശ്ര​മ​ശാ​ലി​ക​ളായ യുവാക്കൾ പയനി​യ​റിംഗ്‌ ചെയ്യു​ന്ന​തി​നാ​വ​ശ്യ​മാ​യതു സമ്പാദി​ക്കാൻ സഹായി​ക്കുന്ന അംശകാ​ല​ജോ​ലി കണ്ടെത്തു​ക​തന്നെ ചെയ്യു​ന്നുണ്ട്‌. അതു​കൊണ്ട്‌, കൂടു​ത​ലായ വിദ്യാ​ഭ്യാ​സ​ത്തിന്‌ അനുകൂ​ല​മാ​യോ പ്രതി​കൂ​ല​മാ​യോ യാതൊ​രു കർശന​നി​യ​മ​വും ഉണ്ടാക്ക​രുത്‌.

¹⁵ ഇപ്പോൾ സഞ്ചാര​മേൽവി​ചാ​ര​കൻമാ​രാ​യോ, സൊ​സൈ​റ​റി​യു​ടെ മുഖ്യ ആസ്ഥാന​ത്തോ, ഏതെങ്കി​ലു​മൊ​രു ബ്രാഞ്ചി​ലോ ഉത്തരവാ​ദി​ത്വ​സ്ഥാ​നത്തു സേവി​ക്കുന്ന അനേകർക്കു വെറും അടിസ്ഥാന വിദ്യാ​ഭ്യാ​സമേ ഉണ്ടായി​രു​ന്നു​ള്ളു. അവർ വിശ്വ​സ്‌ത​രായ പയനി​യർമാ​രാ​യി​രു​ന്നു, അവർ പഠനം ഒരിക്ക​ലും നിർത്തി​യില്ല, അവർ പരിശീ​ലനം നേടി. അവരെ കൂടുതൽ ഉത്തരവാ​ദി​ത്വ​ങ്ങൾ ഭരമേ​ല്‌പി​ച്ചു. അവർക്കു ഖേദമില്ല. മറിച്ച്‌, അവരുടെ സമകാ​ലി​ക​രിൽ ചിലർ ഒരു സർവക​ലാ​ശാ​ലാ​വി​ദ്യാ​ഭ്യാ​സം നേടാൻ തീരു​മാ​നി​ക്കു​ക​യും വിശ്വാ​സ​നഷ്ടം വരുത്തുന്ന തത്ത്വശാ​സ്‌ത്ര​ങ്ങ​ളു​ടെ​യും “ഈ ലോക​ത്തി​ന്റെ ജ്ഞാന”ത്തിന്റെ​യും വശീക​ര​ണ​ത്തിൽപ്പെട്ടു തങ്ങളുടെ ആത്മീയ പുരോ​ഗതി നിർത്തു​ക​യും ചെയ്‌തു.—1 കൊരി​ന്ത്യർ 1:19-21; 3:19, 20; കൊ​ലൊ​സ്സ്യർ 2:8.

ചെലവു കണക്കാക്കൽ

16. (എ) കൂടു​ത​ലായ വിദ്യാ​ഭ്യാ​സം അഭില​ഷ​ണീ​യ​മോ എന്ന്‌ ആരാണു തീരു​മാ​നി​ക്കേ​ണ്ടത്‌, എന്താണു മനസ്സിൽ പ്രമു​ഖ​മാ​യി നിർത്തേ​ണ്ടത്‌? (ബി) എന്തു പരിഗ​ണി​ക്കേ​ണ്ട​താണ്‌?

¹⁶ ഒരു യുവ​ക്രി​സ്‌ത്യാ​നി കൂടു​ത​ലായ വിദ്യാ​ഭ്യാ​സ​മോ പരിശീ​ല​ന​മോ നേടണ​മോ എന്ന്‌ ആരാണു തീരു​മാ​നി​ക്കേ​ണ്ടത്‌? ശിരഃ​സ്ഥാ​ന​ത്തി​ന്റെ ബൈബിൾ തത്ത്വം ഇവിടെ ബാധക​മാ​കു​ന്നു. (1 കൊരി​ന്ത്യർ 11:3; എഫെസ്യർ 6:1) ഇതിന്റെ അടിസ്ഥാ​ന​ത്തിൽ തങ്ങളുടെ മക്കളുടെ തൊഴി​ലി​ന്റെ​യോ ജീവി​ത​വൃ​ത്തി​യു​ടെ​യോ കാര്യ​ത്തി​ലും അതിനാ​വ​ശ്യ​മായ വിദ്യാ​ഭ്യാ​സ​ത്തി​ന്റെ അളവിന്റെ കാര്യ​ത്തി​ലും മാതാ​പി​താ​ക്കൾ തീർച്ച​യാ​യും മക്കൾക്കു മാർഗ്ഗ​നിർദ്ദേശം നൽകാ​നാ​ഗ്ര​ഹി​ക്കും. അനേക രാജ്യ​ങ്ങ​ളി​ലും വിദ്യാ​ഭ്യാ​സം സംബന്ധി​ച്ചും തൊഴിൽ സംബന്ധി​ച്ചും ഉള്ള തീരു​മാ​നങ്ങൾ നേരത്തെ, സെക്കൻഡറി വിദ്യാ​ഭ്യാ​സ​കാ​ല​ത്തു​തന്നെ എടു​ക്കേ​ണ്ടി​യി​രി​ക്കു​ന്നു. അതാണു രാജ്യ​താ​ല്‌പ​ര്യ​ങ്ങൾ മനസ്സിൽ പ്രമു​ഖ​മാ​യി നിർത്തി​ക്കൊ​ണ്ടു ക്രിസ്‌തീയ മാതാ​പി​താ​ക്ക​ളും യുവാ​ക്ക​ളും ഒരു ജ്ഞാനപൂർവ​ക​മായ തീരു​മാ​നം എടുക്കു​ന്ന​തി​നു യഹോ​വ​യു​ടെ മാർഗ്ഗ​നിർദേശം തേടേണ്ട സമയം. ചെറു​പ്പ​ക്കാർക്കു വ്യത്യസ്‌ത വാസന​ക​ളും അഭിരു​ചി​ക​ളും ഉണ്ട്‌. ജ്ഞാനി​ക​ളായ മാതാ​പി​താ​ക്കൾ ഇവ പരിഗ​ണി​ക്കും. നീല​ക്കോ​ളർ ജോലി​യോ വെള്ള​ക്കോ​ളർ ജോലി​യോ ഏതായി​രു​ന്നാ​ലും സത്യസ​ന്ധ​മായ എല്ലാ ജോലി​ക​ളും മാന്യ​മാണ്‌. ലോകം ഓഫീ​സു​ജോ​ലി​കളെ പൊക്കി​പ്പ​റ​യു​ക​യും കായി​കാ​ദ്ധ്വാ​നത്തെ ഇടിച്ചു​താ​ഴ്‌ത്തു​ക​യും ചെയ്യു​മ്പോൾ ബൈബിൾ തീർച്ച​യാ​യും അങ്ങനെ ചെയ്യു​ന്നില്ല. (പ്രവൃ​ത്തി​കൾ 18:3) അതു​കൊണ്ട്‌, അനുകൂ​ല​വും പ്രതി​കൂ​ല​വു​മായ ന്യായങ്ങൾ ശ്രദ്ധാ​പൂർവ​വും പ്രാർത്ഥ​നാ​പൂർവ​വും തൂക്കി​നോ​ക്കി​യി​ട്ടു സെക്കൻഡ​റി​ക്കു​ശേ​ഷ​മുള്ള പഠനങ്ങൾക്ക്‌ അനുകൂ​ല​മാ​യോ പ്രതി​കൂ​ല​മാ​യോ മാതാ​പി​താ​ക്ക​ളും യുവ​ക്രി​സ്‌ത്യാ​നി​ക​ളും തീരു​മാ​ന​മെ​ടു​ക്കു​മ്പോൾ സഭയിലെ മററു​ള്ളവർ അവരെ വിമർശി​ക്ക​രുത്‌.

17. തങ്ങളുടെ കുട്ടി​കൾക്കു​വേണ്ടി ചില മാതാ​പി​താ​ക്കൾ എന്തു തിര​ഞ്ഞെ​ടു​ക്കു​ന്നു?

¹⁷ തങ്ങളുടെ മക്കൾക്കു ഹൈസ്‌കൂ​ളി​നു​ശേഷം കൂടു​ത​ലായ വിദ്യാ​ഭ്യാ​സം നൽകാൻ ക്രിസ്‌തീ​യ​മാ​താ​പി​താ​ക്കൾ ഉത്തരവാ​ദി​ത്വ​പൂർവം തീരു​മാ​ന​മെ​ടു​ക്കു​ന്നെ​ങ്കിൽ അത്‌ അവരുടെ പ്രത്യേക അവകാ​ശ​മാണ്‌. ഈ പഠനങ്ങ​ളു​ടെ കാലയ​ളവ്‌, തിര​ഞ്ഞെ​ടുത്ത തൊഴി​ലിന്‌ അനുസൃ​ത​മാ​യി വ്യത്യ​സ്‌ത​മാ​യി​രി​ക്കും. സാമ്പത്തിക കാരണ​ങ്ങ​ളാ​ലും കഴിയു​ന്ന​തും വേഗത്തിൽ മുഴു​സമയ സേവന​ത്തിൽ പ്രവേ​ശി​ക്കാൻ തങ്ങളുടെ മക്കളെ സഹായി​ക്കു​ന്ന​തി​നും അനേകം മാതാ​പി​താ​ക്കൾ അവർക്കു​വേണ്ടി തൊഴിൽപ​ര​മോ സാങ്കേ​തി​ക​മോ ആയ സ്‌കൂ​ളു​ക​ളിൽ ഹ്രസ്വ​കാല പഠനപ​ദ്ധ​തി​കൾ തിര​ഞ്ഞെ​ടു​ത്തി​ട്ടുണ്ട്‌. ചില കേസു​ക​ളിൽ, യുവാ​ക്കൾക്ക്‌ ഏതെങ്കി​ലും തൊഴിൽ ചെയ്‌തു​പ​രി​ശീ​ലി​ക്കേണ്ട ആവശ്യ​മു​ണ്ടാ​യി​ട്ടുണ്ട്‌, എന്നാൽ എല്ലായ്‌പോ​ഴും യഹോ​വ​യു​ടെ സേവന​ത്തിൽ മുഴു​ജീ​വി​ത​വും എന്ന ലക്ഷ്യത്തിൽ ആയിരി​ക്കണം അത്‌.

18. കൂടു​ത​ലായ കോഴ്‌സു​ക​ളിൽ ചേരു​ന്നെ​ങ്കിൽ എന്തു മനസ്സിൽ പിടി​ക്കേ​ണ്ട​താണ്‌?

¹⁸ കൂടു​ത​ലായ കോഴ്‌സു​കൾക്കു പോകു​ന്നെ​ങ്കിൽ അതിന്റെ ഉദ്ദേശ്യം ഒരിക്ക​ലും പാണ്ഡി​ത്യ​പ്ര​ക​ട​ന​പ​ര​മാ​യി തിളങ്ങു​ക​യെ​ന്ന​തോ പ്രശസ്‌ത​മായ ഒരു ലൗകിക ജീവി​ത​വൃ​ത്തി നേടി​യെ​ടു​ക്കു​ക​യെ​ന്ന​തോ ആയിരി​ക്ക​രുത്‌. കോഴ്‌സു​കൾ തിര​ഞ്ഞെ​ടു​ക്കു​ന്നതു ശ്രദ്ധാ​പൂർവം വേണം. ഈ മാസിക ഉപരി​പ​ഠ​ന​ത്തി​ന്റെ അപകട​ത്തിന്‌ ഊന്നൽ നൽകി​യി​ട്ടുണ്ട്‌. ഉന്നതവി​ദ്യാ​ഭ്യാ​സ​ത്തി​ല​ധി​ക​വും ബൈബി​ളി​ലെ “ആരോ​ഗ്യാ​വ​ഹ​മായ പഠിപ്പിക്ക”ലുകളെ എതിർക്കു​ന്ന​തു​കൊണ്ട്‌ അതു ന്യായീ​ക​രി​ക്കാ​വു​ന്ന​തു​മാണ്‌. (തീത്തൊസ്‌ 2:1, NW; 1 തിമൊ​ഥെ​യൊസ്‌ 6:20, 21) കൂടു​ത​ലാ​യി, 1960-കൾ മുതൽ പുരോ​ഗ​മിച്ച പഠനത്തി​നുള്ള അനേകം സ്‌കൂ​ളു​കൾ നിയമ​രാ​ഹി​ത്യ​ത്തി​ന്റെ​യും അധാർമ്മി​ക​ത​യു​ടെ​യും വിളനി​ല​മാ​യി​ത്തീർന്നി​ട്ടുണ്ട്‌. അത്തരം സാഹച​ര്യ​ങ്ങ​ളിൽ പ്രവേ​ശി​ക്കു​ന്ന​തി​നെ “വിശ്വ​സ്‌ത​നും വിവേ​കി​യു​മായ അടിമ” ശക്തമായി നിരു​ത്സാ​ഹ​പ്പെ​ടു​ത്തി​യി​ട്ടുണ്ട്‌. (മത്തായി 24:12, 45) എന്നിരു​ന്നാ​ലും, ഇന്നു ചെറു​പ്പ​ക്കാർ ഇതേ അപകട​ങ്ങളെ ഹൈസ്‌കൂ​ളു​ക​ളി​ലും സാങ്കേ​തിക കോള​ജു​ക​ളി​ലും ജോലി​സ്ഥ​ല​ത്തു​പോ​ലും നേരി​ടു​ന്നു​ണ്ടെന്നു സമ്മതി​ക്കേ​ണ്ടി​യി​രി​ക്കു​ന്നു.—1 യോഹ​ന്നാൻ 5:19.a

19. (എ) അനുബന്ധ കോഴ്‌സു​ക​ളിൽ ചേരാൻ തീരു​മാ​നി​ക്കു​ന്നവർ എന്തു മുൻക​രു​ത​ലു​കൾ എടു​ക്കേ​ണ്ട​താണ്‌? (ബി) ചിലർ തങ്ങളുടെ വിദ്യാ​ഭ്യാ​സത്തെ വളരെ പ്രയോ​ജ​ന​ക​ര​മാ​യി ഉപയോ​ഗി​ച്ചി​രി​ക്കു​ന്നത്‌ എങ്ങനെ?

¹⁹ ഒരു യുവസാ​ക്ഷി അനുബ​ന്ധ​വി​ദ്യാ​ഭ്യാ​സം നേടാൻ തീരു​മാ​നി​ക്കു​ന്നെ​ങ്കിൽ, എന്തെങ്കി​ലും സാദ്ധ്യ​ത​യു​ണ്ടെ​ങ്കിൽ ഈ വിദ്യാ​ഭ്യാ​സം വീട്ടിൽ താമസി​ച്ചു​കൊ​ണ്ടു നടത്തു​ന്നതു ബുദ്ധി​യാ​യി​രി​ക്കും, അങ്ങനെ സാധാ​ര​ണ​യുള്ള ക്രിസ്‌തീയ പഠനസ്വ​ഭാ​വ​ങ്ങ​ളും, യോഗ​ങ്ങ​ളിൽ ഹാജരാ​ക​ലും പ്രസം​ഗ​പ്ര​വർത്ത​ന​വും നിലനിർത്താൻ കഴിയും. തുടക്ക​ത്തിൽത്തന്നെ ബൈബിൾത​ത്ത്വ​ങ്ങൾ സംബന്ധി​ച്ചു ശരിയായ ഒരു നിലപാ​ടു സ്വീക​രി​ക്കണം. ദാനി​യേ​ലും അവന്റെ മൂന്ന്‌ എബ്രായ കൂട്ടു​കാ​രും ബാബി​ലോ​നിൽ ഉപരി​പ​ഠ​നങ്ങൾ നടത്താൻ ബാദ്ധ്യ​സ്ഥ​രാ​യി​രു​ന്ന​പ്പോൾ അവർ പ്രവാ​സ​ത്തി​ലാ​യി​രുന്ന ബന്ദിക​ളാ​യി​രു​ന്നു​വെന്ന്‌ ഓർക്കേ​ണ്ട​താണ്‌, എന്നിട്ടും അവർ സ്ഥിരമാ​യി തങ്ങളുടെ നിർമ്മലത കാത്തു. (ദാനീ​യേൽ, ഒന്നാം അദ്ധ്യായം) ആത്മീയ താത്‌പ​ര്യ​ങ്ങൾ ഒന്നാമതു വച്ചു​കൊ​ണ്ടു​തന്നെ, അനേകം രാജ്യ​ങ്ങ​ളിൽ യുവ​ക്രി​സ്‌ത്യാ​നി​കൾ അക്കൗണ്ടൻറു​മാ​രാ​യോ, തൊഴി​ലാ​ളി​ക​ളാ​യോ അദ്ധ്യാ​പ​ക​രാ​യോ, പരിഭാ​ഷ​ക്കാ​രാ​യോ, ദ്വിഭാ​ഷി​ക​ളാ​യോ ഉള്ള അംശകാ​ല​ജോ​ലി​ക്കോ തങ്ങളുടെ മുഖ്യ ജീവി​ത​വൃ​ത്തി​യായ പയനി​യ​റിം​ഗിൽ വേണ്ടവി​ധം പിന്തു​ണ​യേ​കിയ മററു തൊഴി​ലു​കൾക്കോ സജ്ജരാ​ക്കു​ന്ന​തി​നുള്ള കോഴ്‌സു​കൾ സ്വീക​രി​ച്ചി​ട്ടുണ്ട്‌. (മത്തായി 6:33) ഈ യുവാ​ക്ക​ളി​ല​നേ​ക​രും പിന്നീടു സഞ്ചാര​മേൽവി​ചാ​ര​കൻമാ​രോ ബെഥേൽ സന്നദ്ധ​സേ​വ​ക​രോ ആയിത്തീർന്നി​ട്ടുണ്ട്‌.

ഒരു ഏകീകൃത, അഭ്യസ്‌ത​വി​ദ്യ​രായ ജനം

20. ലോകം കണക്കാ​ക്കുന്ന ഏതു വ്യത്യാ​സ​ത്തി​നാ​ണു യഹോ​വ​യു​ടെ ജനത്തി​നി​ട​യിൽ സ്ഥാനമി​ല്ലാ​ത്തത്‌?

²⁰ യഹോ​വ​യു​ടെ ജനത്തി​നി​ട​യിൽ ഒരുവന്റെ തൊഴിൽ വെള്ള​ക്കോ​ള​റോ, നീല​ക്കോ​ള​റോ, കൃഷി​യോ, സേവന​ങ്ങ​ളോ എന്തായി​രു​ന്നാ​ലും എല്ലാവ​രും ബൈബി​ളി​ന്റെ നല്ല പഠിതാ​ക്ക​ളും കഴിവുള്ള ഉപദേ​ഷ്ടാ​ക്ക​ളും ആയിരി​ക്കേ​ണ്ട​താ​വ​ശ്യ​മാണ്‌. വായന, പഠനം, പഠിപ്പി​ക്കൽ എന്നിവ​യി​ലൂ​ടെ എല്ലാവ​രും ആർജ്ജി​ക്കുന്ന വൈദ​ഗ്‌ദ്ധ്യ​ങ്ങൾ കായി​കാ​ദ്ധ്വാ​നി​കൾക്കും ഓഫീ​സ്‌ജോ​ലി​ക്കാർക്കു​മി​ട​യിൽ ലോകം കല്‌പി​ക്കുന്ന അന്തരത്തെ അകററാൻ ഉതകുന്നു. ഇത്‌ ആത്മീയ ഗുണങ്ങൾ സർവ​പ്ര​ധാ​ന​മാ​യി​രി​ക്കു​ന്ന​തും എല്ലാവ​രിൽനി​ന്നും ആവശ്യ​പ്പെ​ടു​ന്ന​തു​മായ, ബെഥേൽ ഭവനങ്ങ​ളി​ലും വാച്ച്‌ടവർ സൊ​സൈ​റ​റി​യു​ടെ നിർമ്മാ​ണ​സ്ഥ​ല​ങ്ങ​ളി​ലും ഉള്ള സ്വമേ​ധ​യാ​സേ​വ​ക​രു​ടെ ഇടയി​ലുള്ള ഐക്യ​ത്തി​ലും പരസ്‌പര ബഹുമാ​ന​ത്തി​ലും കലാശി​ച്ചി​രി​ക്കു​ന്നു. ഇവിടെ പരിച​യ​സ​മ്പ​ന്ന​രായ ഓഫീ​സു​ജോ​ലി​ക്കാർ വിദഗ്‌ദ്ധ കൈ​വേ​ല​ക്കാ​രോ​ടൊ​പ്പം സന്തോ​ഷ​ത്തോ​ടെ വേല​ചെ​യ്യു​ന്നു, വിലമ​തി​പ്പോ​ടെ​യുള്ള പരസ്‌പ​ര​സ്‌നേഹം എല്ലാവ​രും പ്രകട​മാ​ക്കി​ക്കൊ​ണ്ടു​തന്നെ.—യോഹ​ന്നാൻ 13:34, 35; ഫിലി​പ്പി​യർ 2:1-4.

21. യുവാ​ക്ക​ളായ ക്രിസ്‌ത്യാ​നി​ക​ളു​ടെ ലക്ഷ്യം എന്തായി​രി​ക്കണം?

²¹ മാതാ​പി​താ​ക്കളേ, നിങ്ങളു​ടെ മക്കളെ പുതി​യ​ലോ​ക​സ​മു​ദാ​യ​ത്തി​ലെ പ്രയോ​ജ​ന​പ്ര​ദ​രായ അംഗങ്ങ​ളാ​യി​ത്തീ​രു​ക​യെന്ന ലക്ഷ്യത്തി​ലേക്കു നയിക്കൂ! യുവാ​ക്ക​ളായ ക്രിസ്‌ത്യാ​നി​കളേ, വിദ്യാ​ഭ്യാ​സ​ത്തി​നുള്ള നിങ്ങളു​ടെ അവസര​ങ്ങളെ യഹോ​വയെ സേവി​ക്കു​ന്ന​തി​നുള്ള നിങ്ങളു​ടെ പദവി​കളെ കൂടുതൽ പൂർണ്ണ​മാ​യി പിടി​ച്ചു​കൊ​ള്ളാൻ യോഗ്യ​രാ​ക്കുന്ന ഒരു ഉപാധി​യാ​യി ഉപയോ​ഗി​ക്കൂ! പഠിപ്പി​ക്ക​പ്പെ​ട്ട​വ​രെന്ന നിലയിൽ, നിങ്ങ​ളെ​ല്ലാ​വ​രും ഇപ്പോ​ഴും ദൈവ​ത്തി​ന്റെ വാഗ്‌ദ​ത്തം​ചെ​യ്യ​പ്പെട്ട “പുതിയ ഭൂമി”യിൽ നിത്യ​മാ​യും ദിവ്യാ​ധി​പത്യ സമുദാ​യ​ത്തി​ലെ സുസജ്ജ​രായ അംഗങ്ങ​ളാ​ണെന്നു തെളി​യട്ടെ.—2 പത്രൊസ്‌ 3:13; യെശയ്യാ​വു 50:4; 54:13; 1 കൊരി​ന്ത്യർ 2:13.

[അടിക്കു​റിപ്പ്‌]

നിങ്ങളു​ടെ ഓർമ്മ പരി​ശോ​ധി​ക്കു​ക

◻ സത്യ​ക്രി​സ്‌ത്യാ​നി​കൾ വിദ്യാ​ഭ്യാ​സ​ത്തിൽ തത്‌പ​ര​രാ​യി​രി​ക്കു​ന്നത്‌ എന്തു​കൊണ്ട്‌?

◻ വിദ്യാ​ഭ്യാ​സം സംബന്ധിച്ച അങ്ങേയ​റ​റത്തെ ഏതു വീക്ഷണങ്ങൾ ക്രിസ്‌ത്യാ​നി​കൾ ഒഴിവാ​ക്കും?

◻ കൂടു​ത​ലായ വിദ്യാ​ഭ്യാ​സം സംബന്ധിച്ച ഏതപക​ടങ്ങൾ കണക്കി​ലെ​ടു​ക്കേ​ണ്ട​താണ്‌, ഏതു മുൻക​രു​ത​ലു​കൾ സ്വീക​രി​ക്കണം?

◻ ലോക​ത്തി​ലെ ഏതു വ്യത്യാ​സ​ത്തി​നു യഹോ​വ​യു​ടെ ജനത്തി​നി​ട​യിൽ സ്ഥാനമില്ല?

[16-ാം പേജിലെ ചിത്രം]

ഉത്സാഹപൂർവം പഠിക്കു​ന്ന​തി​നാൽ യുവാ​ക്ക​ളായ ക്രിസ്‌ത്യാ​നി​കൾക്കു പുതി​യ​ലോക സമുദാ​യ​ത്തി​ലെ ഏറെ പ്രയോ​ജ​ന​പ്ര​ദ​രായ അംഗങ്ങ​ളാ​യി​ത്തീ​രാൻ കഴിയും

[19-ാം പേജിലെ ചിത്രം]

കൂടുതലായ വിദ്യാ​ഭ്യാ​സം തിര​ഞ്ഞെ​ടു​ക്കു​ന്നു​വെ​ങ്കിൽ യഹോ​വയെ ഏറെ നന്നായി സേവി​ക്കാ​നുള്ള അഭിലാ​ഷ​ത്താൽ വേണം പ്രേരി​ത​രാ​കാൻ