1-3. മരണ​ത്തെ​ക്കു​റിച്ച്‌ ആളുകൾ ഏതു ചോദ്യ​ങ്ങൾ ചോദി​ക്കു​ന്നു? ചില മതങ്ങൾ അവയ്‌ക്ക്‌ എന്ത്‌ ഉത്തരം നൽകുന്നു?

‘മരണം ഉണ്ടായി​രി​ക്കി​ല്ലാത്ത’ ഒരു കാലം വരു​മെന്നു ബൈബിൾ ഉറപ്പു തരുന്നു. (വെളി​പാട്‌ 21:4) മോച​ന​വില എന്ന ക്രമീ​ക​ര​ണ​ത്തി​ലൂ​ടെ നമുക്കു നിത്യം ജീവി​ക്കാ​നുള്ള അവസരം തുറന്നു​കി​ട്ടി​യെന്ന്‌ 5-ാം അധ്യാ​യ​ത്തിൽ നമ്മൾ പഠിച്ചു. പക്ഷേ ആളുകൾ ഇപ്പോ​ഴും മരിക്കു​ന്നുണ്ട്‌. (സഭാ​പ്ര​സം​ഗകൻ 9:5) അതു​കൊണ്ട്‌ നമ്മുടെ മനസ്സിൽ വരുന്ന ഒരു പ്രധാ​ന​പ്പെട്ട ചോദ്യ​മാണ്‌, ‘മരിക്കു​മ്പോൾ നമുക്ക്‌ എന്തു സംഭവി​ക്കു​ന്നു’ എന്നത്‌.

² നമ്മുടെ പ്രിയ​പ്പെട്ട ആരെങ്കി​ലും മരിക്കു​മ്പോൾ ഈ ചോദ്യ​ത്തിന്‌ ഉത്തരം കിട്ടാൻ നമ്മൾ ആഗ്രഹി​ക്കും. നമ്മൾ ഇങ്ങനെ​യൊ​ക്കെ ചിന്തി​ച്ചേ​ക്കാം: ‘മരിച്ച​യാൾ ഇപ്പോൾ എവി​ടെ​യാണ്‌? അയാൾ നമ്മളെ കാണു​ന്നു​ണ്ടോ? അയാൾക്കു നമ്മളെ സഹായി​ക്കാ​നാ​കു​മോ? നമുക്ക്‌ അയാളെ വീണ്ടും കാണാൻ പറ്റുമോ?’

³ ആ ചോദ്യ​ങ്ങൾക്കു പലപല ഉത്തരങ്ങ​ളാ​ണു മതങ്ങൾ നൽകു​ന്നത്‌. ഒരു നല്ല മനുഷ്യ​നാ​ണെ​ങ്കിൽ നിങ്ങൾ സ്വർഗ​ത്തിൽ പോകു​മെ​ന്നും ചീത്തയാ​ളാ​ണെ​ങ്കിൽ നരകത്തി​ലെ തീയിൽ ദണ്ഡിപ്പി​ക്ക​പ്പെ​ടു​മെ​ന്നും ചില മതങ്ങൾ പഠിപ്പി​ക്കു​ന്നു. മറ്റു ചിലർ പറയു​ന്നതു മരണ​ശേഷം നിങ്ങൾ ഒരു ആത്മാവാ​യി​ത്തീ​രു​മെ​ന്നും മരിച്ചു​പോയ കുടും​ബാം​ഗ​ങ്ങ​ളു​ടെ​കൂ​ടെ ജീവി​ക്കു​മെ​ന്നും ആണ്‌. ഇനി വേറെ ചിലർ പറയു​ന്നതു മരിച്ച്‌ കഴിഞ്ഞ്‌ നിങ്ങളെ ന്യായം വിധി​ക്കു​മെ​ന്നും അതിനു ശേഷം നിങ്ങൾക്ക്‌ ഒരു പുനർജ​ന്മ​മു​ണ്ടെ​ന്നും, അതായത്‌ മറ്റൊരു ശരീര​ത്തോ​ടെ നിങ്ങൾ ജീവനി​ലേക്കു തിരി​ച്ചു​വ​രു​മെ​ന്നും, ആണ്‌. അത്‌ ഒരുപക്ഷേ മറ്റൊരു വ്യക്തി​യാ​യി​ട്ടോ ഒരു മൃഗമാ​യി​ട്ടു​പോ​ലു​മോ ആകാം.

4. മരണ​ത്തെ​ക്കു​റിച്ച്‌ മതങ്ങൾ ഏത്‌ അടിസ്ഥാ​ന​പ​ര​മായ ആശയമാ​ണു പഠിപ്പി​ക്കു​ന്നത്‌?

⁴ ഓരോ മതവും പഠിപ്പി​ക്കു​ന്നത്‌ പരസ്‌പ​ര​ബ​ന്ധ​മി​ല്ലാത്ത കാര്യ​ങ്ങ​ളാ​ണെന്നു തോന്നും. എന്നാൽ മിക്കവാ​റും എല്ലാ മതങ്ങളും പഠിപ്പി​ക്കു​ന്നത്‌ അടിസ്ഥാ​ന​പ​ര​മാ​യി ഒരു ആശയമാണ്‌: ഒരു മനുഷ്യൻ മരിക്കു​മ്പോൾ അയാളി​ലെ ഒരു ഭാഗം തുടർന്നും ജീവി​ക്കു​ന്നു. അതു ശരിയാ​ണോ?

മരിച്ചവർ എവി​ടെ​യാണ്‌?

5, 6. മരിക്കു​മ്പോൾ നമുക്ക്‌ എന്തു സംഭവി​ക്കു​ന്നു?

⁵ മരിക്കു​മ്പോൾ നമുക്ക്‌ എന്തു സംഭവി​ക്കു​മെന്ന്‌ യഹോ​വയ്‌ക്ക്‌ അറിയാം. ഒരാൾ മരിക്കു​മ്പോൾ അയാളു​ടെ ജീവൻ അവസാ​നി​ക്കു​ന്നു എന്ന്‌ യഹോവ പറഞ്ഞി​രി​ക്കു​ന്നു. ജീവന്റെ നേർവി​പ​രീ​ത​മാ​ണു മരണം. അതു​കൊണ്ട്‌ ആരെങ്കി​ലും മരിക്കു​മ്പോൾ അതോടെ അയാളു​ടെ ചിന്തക​ളും ഓർമ​ക​ളും നശിക്കു​ന്നു, പിന്നീട്‌ മറ്റെവി​ടെ​യെ​ങ്കി​ലും ജീവി​ക്കു​ന്നില്ല.a മരിച്ചു​ക​ഴി​ഞ്ഞാൽ പിന്നെ നമുക്ക്‌ ഒന്നും കാണാ​നോ കേൾക്കാ​നോ ചിന്തി​ക്കാ​നോ കഴിയില്ല.

⁶ “മരിച്ചവർ ഒന്നും അറിയു​ന്നില്ല” എന്നു ശലോ​മോൻ രാജാവ്‌ എഴുതി. മരിച്ച​വർക്കു സ്‌നേ​ഹി​ക്കാ​നോ വെറു​ക്കാ​നോ കഴിയില്ല. “ശവക്കു​ഴി​യിൽ പ്രവൃ​ത്തി​യും ആസൂ​ത്ര​ണ​വും അറിവും ജ്ഞാനവും ഒന്നുമില്ല.” (സഭാ​പ്ര​സം​ഗകൻ 9:5, 6, 10 വായി​ക്കുക.) സങ്കീർത്തനം 146:4-ൽ ഒരാൾ മരിക്കു​മ്പോൾ അയാളു​ടെ ‘ചിന്തക​ളും’ മരിക്കു​ന്നെന്ന്‌ ബൈബിൾ പറയുന്നു.

മരണ​ത്തെ​ക്കു​റിച്ച്‌ യേശു പറഞ്ഞത്‌

7. മരണ​ത്തെ​ക്കു​റിച്ച്‌ യേശു എന്താണു പറഞ്ഞത്‌?

⁷ ഉറ്റ സ്‌നേ​ഹി​ത​നായ ലാസർ മരിച്ച സമയത്ത്‌ യേശു ശിഷ്യ​ന്മാ​രോ​ടു പറഞ്ഞു: “നമ്മുടെ കൂട്ടു​കാ​ര​നായ ലാസർ ഉറങ്ങു​ക​യാണ്‌.” ലാസർ വിശ്ര​മി​ക്കു​ക​യാ​ണെന്നല്ല യേശു ഉദ്ദേശി​ച്ചത്‌. കാരണം “ലാസർ മരിച്ചു​പോ​യി” എന്ന്‌ യേശു തുടർന്ന്‌ പറഞ്ഞു. (യോഹ​ന്നാൻ 11:11-14) യേശു ഇവിടെ മരണത്തെ ഉറക്ക​ത്തോ​ടാണ്‌ ഉപമി​ച്ചത്‌. ലാസർ സ്വർഗ​ത്തി​ലാ​ണെ​ന്നോ മരിച്ചു​പോയ കുടും​ബാം​ഗ​ങ്ങ​ളു​ടെ​കൂ​ടെ​യാ​ണെ​ന്നോ അതുമ​ല്ലെ​ങ്കിൽ ലാസർ നരകത്തിൽ യാതന അനുഭ​വി​ക്കു​ക​യാ​ണെ​ന്നോ മറ്റൊരു മനുഷ്യ​നോ മൃഗമോ ആയി പുനർജ​നി​ച്ചെ​ന്നോ ഒന്നും യേശു പറഞ്ഞില്ല. പകരം ഒരാൾ നല്ല ഉറക്കത്തി​ലാ​യി​രു​ന്നാൽ എങ്ങനെ​യാ​ണോ അതു​പോ​ലെ​യാ​യി​രു​ന്നു ലാസർ. മറ്റു തിരു​വെ​ഴു​ത്തു​ക​ളും മരണത്തെ ഉറക്ക​ത്തോട്‌ ഉപമി​ച്ചി​ട്ടുണ്ട്‌. സ്‌തെ​ഫാ​നൊ​സി​ന്റെ മരണ​ത്തെ​ക്കു​റിച്ച്‌ ബൈബിൾ പറയു​ന്നത്‌ “സ്‌തെ​ഫാ​നൊസ്‌ ഉറങ്ങി” എന്നാണ്‌. (പ്രവൃ​ത്തി​കൾ 7:60, അടിക്കു​റിപ്പ്‌) മരിച്ചു​പോയ ചില ക്രിസ്‌ത്യാ​നി​ക​ളെ​ക്കു​റിച്ച്‌ എഴുതി​യ​പ്പോൾ പൗലോസ്‌ അപ്പോസ്‌ത​ല​നും ‘അവർ ഉറങ്ങി’ എന്നു പറഞ്ഞു.—1 കൊരി​ന്ത്യർ 15:6, അടിക്കു​റിപ്പ്‌.

8. മരിക്കാൻവേ​ണ്ടി​യല്ല ദൈവം മനുഷ്യ​നെ സൃഷ്ടി​ച്ച​തെന്നു നമുക്ക്‌ എങ്ങനെ അറിയാം?

⁸ കുറച്ചു​കാ​ലം ജീവി​ച്ചിട്ട്‌ മരിക്കാ​നാ​ണോ ദൈവം ആദാമി​നെ​യും ഹവ്വയെ​യും സൃഷ്ടി​ച്ചത്‌? അല്ല. ഒരു രോഗ​വു​മി​ല്ലാ​തെ നല്ല ആരോ​ഗ്യ​ത്തോ​ടെ എന്നും ജീവി​ച്ചി​രി​ക്കാ​നാണ്‌ യഹോവ അവരെ സൃഷ്ടി​ച്ചത്‌. യഹോവ മനുഷ്യ​നെ സൃഷ്ടി​ച്ച​പ്പോൾ നിത്യ​മാ​യി ജീവി​ക്കാ​നുള്ള ആഗ്രഹ​വും അവർക്കു കൊടു​ത്തു. (സഭാ​പ്ര​സം​ഗകൻ 3:11) മക്കൾ വാർധ​ക്യം ചെല്ലു​ന്ന​തോ മരിക്കു​ന്ന​തോ കാണാൻ ഒരു അപ്പനും അമ്മയും ആഗ്രഹി​ക്കില്ല. അതേ വികാ​ര​മാ​ണു നമ്മളെ​ക്കു​റിച്ച്‌ യഹോ​വയ്‌ക്കു​മു​ള്ളത്‌. എന്നെന്നും ജീവി​ക്കാൻവേ​ണ്ടി​യാ​ണു ദൈവം നമ്മളെ സൃഷ്ടി​ച്ച​തെ​ങ്കിൽ പിന്നെ എന്തു​കൊ​ണ്ടാ​ണു നമ്മൾ മരിക്കു​ന്നത്‌?

എന്തു​കൊ​ണ്ടാ​ണു നമ്മൾ മരിക്കു​ന്നത്‌?

9. യഹോവ ആദാമി​നും ഹവ്വയ്‌ക്കും കൊടുത്ത കല്‌പന ന്യായ​മാ​യി​രു​ന്നത്‌ എന്തു​കൊണ്ട്‌?

⁹ ഏദെൻ തോട്ട​ത്തിൽവെച്ച്‌ യഹോവ ആദാമി​നോ​ടു പറഞ്ഞു: “തോട്ട​ത്തി​ലെ എല്ലാ മരങ്ങളിൽനി​ന്നും തൃപ്‌തി​യാ​കു​വോ​ളം നിനക്കു തിന്നാം. എന്നാൽ ശരി​തെ​റ്റു​ക​ളെ​ക്കു​റി​ച്ചുള്ള അറിവി​ന്റെ മരത്തിൽനിന്ന്‌ തിന്നരുത്‌, അതിൽനിന്ന്‌ തിന്നുന്ന ദിവസം നീ നിശ്ചയ​മാ​യും മരിക്കും.” (ഉൽപത്തി 2:9, 16, 17) ആ വ്യക്തമായ കല്‌പന അനുസ​രി​ക്കാൻ ഒരു പ്രയാ​സ​വു​മി​ല്ലാ​യി​രു​ന്നു. ശരിയും തെറ്റും എന്താ​ണെന്ന്‌ ആദാമി​നോ​ടും ഹവ്വയോ​ടും പറയാ​നുള്ള അവകാ​ശ​വും യഹോ​വയ്‌ക്കു​ണ്ടാ​യി​രു​ന്നു. അത്‌ അനുസ​രി​ച്ചു​കൊണ്ട്‌ യഹോ​വ​യു​ടെ അധികാ​രത്തെ മാനി​ക്കു​ന്നെന്നു കാണി​ക്കാൻ അവർക്കു കഴിയു​മാ​യി​രു​ന്നു. കൂടാതെ ദൈവം അവർക്കു കൊടുത്ത എല്ലാത്തി​നും നന്ദിയു​ള്ള​വ​രാ​ണെന്നു കാണി​ക്കാ​നുള്ള ഒരു മാർഗ​വു​മാ​യി​രു​ന്നു അത്‌.

10, 11. (എ) ആദാമി​നെ​യും ഹവ്വയെ​യും സാത്താൻ വഴി​തെ​റ്റി​ച്ചത്‌ എങ്ങനെ? (ബി) ആദാമും ഹവ്വയും ചെയ്‌ത​തിന്‌ ഒരു ഒഴിക​ഴി​വും പറയാ​നി​ല്ലാ​ത്തത്‌ എന്തു​കൊണ്ട്‌?

¹⁰ സങ്കടക​ര​മെന്നു പറയട്ടെ, ആദാമും ഹവ്വയും യഹോ​വ​യോട്‌ അനുസ​ര​ണ​ക്കേടു കാണി​ക്കാൻ തീരു​മാ​നി​ച്ചു. സാത്താൻ ഹവ്വയോ​ടു ചോദി​ച്ചു: “തോട്ട​ത്തി​ലെ എല്ലാ മരങ്ങളിൽനി​ന്നും നിങ്ങൾ തിന്നരു​തെന്നു ദൈവം ശരിക്കും പറഞ്ഞി​ട്ടു​ണ്ടോ?” ഹവ്വ പറഞ്ഞു: “തോട്ട​ത്തി​ലെ മരങ്ങളു​ടെ പഴം ഞങ്ങൾക്കു തിന്നാം. എന്നാൽ തോട്ട​ത്തി​നു നടുവി​ലുള്ള മരത്തിലെ പഴത്തെ​ക്കു​റിച്ച്‌ ദൈവം ഇങ്ങനെ പറഞ്ഞി​ട്ടുണ്ട്‌: ‘നിങ്ങൾ അതിൽനിന്ന്‌ തിന്നരുത്‌, അതു തൊടാൻപോ​ലും പാടില്ല. അങ്ങനെ ചെയ്‌താൽ നിങ്ങൾ മരിക്കും.’”—ഉൽപത്തി 3:1-3.

¹¹ അപ്പോൾ സാത്താൻ പറഞ്ഞു: “നിങ്ങൾ മരിക്കില്ല, ഉറപ്പ്‌! അതിൽനിന്ന്‌ തിന്നുന്ന ആ ദിവസം​തന്നെ നിങ്ങളു​ടെ കണ്ണുകൾ തുറക്കു​മെ​ന്നും നിങ്ങൾ ശരിയും തെറ്റും അറിയു​ന്ന​വ​രാ​യി ദൈവ​ത്തെ​പ്പോ​ലെ​യാ​കു​മെ​ന്നും ദൈവ​ത്തിന്‌ അറിയാം.” (ഉൽപത്തി 3:4-6) ശരി​യേത്‌, തെറ്റേത്‌ എന്ന്‌ ഹവ്വയ്‌ക്കു​തന്നെ തീരു​മാ​നി​ക്കാ​നാ​കു​മെന്നു വിശ്വ​സി​പ്പി​ക്കു​ക​യാ​യി​രു​ന്നു സാത്താന്റെ ലക്ഷ്യം. അതോ​ടൊ​പ്പം, അനുസ​ര​ണ​ക്കേടു കാണി​ച്ചാൽ സംഭവി​ക്കാൻ പോകു​ന്ന​തി​നെ​ക്കു​റിച്ച്‌ സാത്താൻ ഹവ്വയോ​ടു പച്ചക്കള്ള​വും പറഞ്ഞു. ഹവ്വ മരിക്കി​ല്ലെന്നു സാത്താൻ പറഞ്ഞു. അതു​കൊണ്ട്‌ ഹവ്വ പഴം പറിച്ച്‌ തിന്നു. ഒരു പങ്ക്‌ ഭർത്താ​വി​നും കൊടു​ത്തു. ആ പഴം തിന്നരു​തെന്ന്‌ യഹോവ പറഞ്ഞത്‌ അറിയാ​മാ​യി​രു​ന്നി​ട്ടും അവർ അതു തിന്നു. അങ്ങനെ, യഹോവ കൊടുത്ത വ്യക്തവും ന്യായ​വും ആയ കല്‌പന ധിക്കരി​ക്കാൻ അവർ തീരു​മാ​നി​ച്ചു. തങ്ങളുടെ സ്‌നേ​ഹ​വാ​നായ സ്വർഗീ​യ​പി​താ​വി​നെ മാനി​ക്കു​ന്നി​ല്ലെ​ന്നും അവർ കാണിച്ചു. അവർ ആ ചെയ്‌ത​തിന്‌ ഒരു ഒഴിക​ഴി​വും പറയാ​നി​ല്ലാ​യി​രു​ന്നു!

12. ആദാമും ഹവ്വയും യഹോ​വ​യോ​ടു അനുസ​ര​ണ​ക്കേടു കാണി​ച്ചത്‌ ഇത്ര മോശ​മാ​യി​രു​ന്നത്‌ എന്തു​കൊണ്ട്‌?

¹² നമ്മുടെ ആദ്യമാ​താ​പി​താ​ക്കൾ അവരുടെ സ്രഷ്ടാ​വി​നോട്‌ ഇങ്ങനെ​യൊ​രു അനാദ​രവ്‌ കാണി​ച്ചത്‌ എത്ര മോശ​മാ​യി​പ്പോ​യി! ഒന്നു ചിന്തിച്ചേ: വളരെ കഷ്ടപ്പെട്ട്‌ വളർത്തിയ മകനും മകളും ധിക്കാ​ര​ത്തോ​ടെ നിങ്ങൾ പറഞ്ഞതി​നു നേർവി​പ​രീ​ത​മാ​യി പ്രവർത്തി​ക്കു​ന്നെ​ങ്കിൽ എന്തു തോന്നും? നിങ്ങളു​ടെ ഹൃദയം തകർന്നു​പോ​കി​ല്ലേ?

13. “പൊടി​യി​ലേക്കു തിരികെ ചേരും” എന്നു പറഞ്ഞ​പ്പോൾ യഹോവ എന്താണ്‌ അർഥമാ​ക്കി​യത്‌?

¹³ അനുസ​ര​ണ​ക്കേടു കാണി​ച്ച​പ്പോൾ ആദാമി​നും ഹവ്വയ്‌ക്കും എന്നും ജീവി​ക്കാ​നുള്ള അവസരം നഷ്ടമായി. “നീ പൊടി​യാണ്‌, പൊടി​യി​ലേക്കു തിരികെ ചേരും” എന്ന്‌ യഹോവ ആദാമി​നോ​ടു പറഞ്ഞി​രു​ന്നു. (ഉൽപത്തി 3:19 വായി​ക്കുക.) അതിന്റെ അർഥം ആദാം വീണ്ടും പൊടി​യാ​യി​ത്തീ​രും എന്നാണ്‌, ഒരിക്ക​ലും സൃഷ്ടി​ക്ക​പ്പെ​ടാ​ത്ത​തു​പോ​ലെ. (ഉൽപത്തി 2:7) പാപം ചെയ്‌ത ആദാം മരിച്ചു; പിന്നെ ആദാം എങ്ങും ജീവി​ച്ചി​രി​പ്പി​ല്ലാ​യി​രു​ന്നു.

14. നമ്മൾ മരിക്കു​ന്നത്‌ എന്തു​കൊണ്ട്‌?

¹⁴ ദൈവത്തെ അനുസ​രി​ച്ചി​രു​ന്നെ​ങ്കിൽ ആദാമും ഹവ്വയും ഇന്നും ജീവ​നോ​ടെ കാണു​മാ​യി​രു​ന്നു. എന്നാൽ അവർ അനുസ​ര​ണ​ക്കേടു കാണിച്ചു. അങ്ങനെ പാപം ചെയ്‌തു. ഒടുവിൽ അവർ മരിച്ചു. ആദ്യമാ​താ​പി​താ​ക്ക​ളിൽനിന്ന്‌ പാരമ്പ​ര്യ​മാ​യി കിട്ടിയ ഒരു മാരക​രോ​ഗം​പോ​ലെ​യാ​ണു പാപം. നമ്മളെ​ല്ലാം പാപി​ക​ളാ​യി ജനിക്കു​ന്നു, അതു​കൊ​ണ്ടു മരിക്കു​ന്നു. (റോമർ 5:12) എന്നാൽ മനുഷ്യ​രെ​ക്കു​റി​ച്ചുള്ള ദൈവ​ത്തി​ന്റെ ഉദ്ദേശ്യം അതല്ല. മനുഷ്യൻ മരിക്കാൻ ദൈവം ഒരിക്ക​ലും ആഗ്രഹി​ക്കു​ന്നില്ല. മരണത്തെ ബൈബിൾ “ശത്രു” എന്നാണു വിളി​ക്കു​ന്നത്‌.—1 കൊരി​ന്ത്യർ 15:26.

സത്യം നമ്മളെ സ്വത​ന്ത്ര​രാ​ക്കു​ന്നു

15. മരിച്ച​വ​രെ​ക്കു​റി​ച്ചുള്ള സത്യം അറിയു​ന്നത്‌ നമ്മളെ സ്വത​ന്ത്ര​രാ​ക്കു​ന്നത്‌ എങ്ങനെ?

¹⁵ മരിച്ച​വ​രെ​ക്കു​റി​ച്ചുള്ള സത്യം അറിയു​ന്നത്‌ തെറ്റായ പല വിശ്വാ​സ​ങ്ങ​ളിൽനി​ന്നും നമ്മളെ സ്വത​ന്ത്ര​രാ​ക്കു​ന്നു. മരിച്ചവർ വേദന അനുഭ​വി​ക്കു​ക​യോ സങ്കട​പ്പെ​ടു​ക​യോ ചെയ്യു​ന്നി​ല്ലെന്നു ബൈബിൾ പഠിപ്പി​ക്കു​ന്നു. നമുക്ക്‌ അവരോ​ടു സംസാ​രി​ക്കാ​നാ​കില്ല, അവർക്കു നമ്മളോ​ടും. നമുക്ക്‌ അവരെ സഹായി​ക്കാ​നാ​കില്ല, അവർക്കു നമ്മളെ​യും. മരിച്ച​വർക്കു നമ്മളെ ദ്രോ​ഹി​ക്കാ​നാ​കില്ല. അതു​കൊണ്ട്‌ നമ്മൾ അവരെ പേടി​ക്കേ​ണ്ട​തില്ല. എങ്കിലും പല മതങ്ങളും പഠിപ്പി​ക്കു​ന്നത്‌, മരിച്ചവർ എവി​ടെ​യോ ജീവി​ച്ചി​രി​പ്പു​ണ്ടെ​ന്നും പുരോ​ഹി​ത​ന്മാർക്കോ മതകർമങ്ങൾ ചെയ്യു​ന്ന​വർക്കോ പണം കൊടു​ത്തു​കൊണ്ട്‌ മരിച്ച​വരെ സഹായി​ക്കാ​നാ​കു​മെ​ന്നും ആണ്‌. പക്ഷേ മരിച്ച​വ​രെ​ക്കു​റി​ച്ചുള്ള സത്യം അറിയു​മ്പോൾ അത്തരം നുണക​ളാൽ നമ്മൾ വഞ്ചിക്ക​പ്പെ​ടില്ല.

16. അനേകം മതങ്ങളും മരിച്ച​വ​രെ​ക്കു​റിച്ച്‌ എന്തു നുണ പഠിപ്പി​ക്കു​ന്നു?

¹⁶ നമ്മളോ​ടു നുണകൾ പറയാ​നും മരിച്ചു​പോ​യവർ ഇപ്പോ​ഴും ജീവ​നോ​ടെ​യു​ണ്ടെന്നു നമ്മളെ വിശ്വ​സി​പ്പി​ക്കാ​നും സാത്താൻ വ്യാജ​മ​ത​ങ്ങളെ ഉപയോ​ഗി​ക്കു​ന്നു. ഉദാഹ​ര​ണ​ത്തിന്‌ ചില മതങ്ങൾ പഠിപ്പി​ക്കു​ന്നത്‌ മരിക്കു​മ്പോൾ നമ്മളിലെ ഏതോ ഒരു ഭാഗം വേറെ എവി​ടെ​യോ തുടർന്നും ജീവി​ക്കു​ന്നു​ണ്ടെ​ന്നാണ്‌. നിങ്ങളു​ടെ മതം അങ്ങനെ​യാ​ണോ പഠിപ്പി​ക്കു​ന്നത്‌? അതോ മരിച്ച​വ​രെ​ക്കു​റിച്ച്‌ ബൈബിൾ പറയു​ന്ന​താ​ണോ പഠിപ്പി​ക്കു​ന്നത്‌? യഹോ​വ​യിൽനിന്ന്‌ ആളുകളെ അകറ്റാൻ സാത്താൻ നുണകൾ ഉപയോ​ഗി​ക്കു​ന്നു.

17. ആളുകളെ നരകത്തി​ലെ തീയി​ലിട്ട്‌ ദണ്ഡിപ്പി​ക്കു​മെന്ന പഠിപ്പി​ക്കൽ യഹോ​വയെ അപമാ​നി​ക്കു​ന്നത്‌ എങ്ങനെ?

¹⁷ പേടി​പ്പി​ക്കുന്ന കാര്യ​ങ്ങ​ളാ​ണു പല മതങ്ങളും പഠിപ്പി​ക്കു​ന്നത്‌. ഉദാഹ​ര​ണ​ത്തിന്‌ ചീത്തയാ​ളു​കളെ നരകത്തി​ലെ തീയി​ലിട്ട്‌ എന്നും ദണ്ഡിപ്പി​ക്കു​മെന്നു ചില മതങ്ങൾ പഠിപ്പി​ക്കു​ന്നു. ആ നുണ യഹോ​വയെ അപമാ​നി​ക്കു​ന്ന​താണ്‌. കാരണം ആളുകൾ അങ്ങനെ യാതന അനുഭ​വി​ക്കാൻ യഹോവ ഒരിക്ക​ലും സമ്മതി​ക്കില്ല. (1 യോഹ​ന്നാൻ 4:8 വായി​ക്കുക.) ഒരു കുട്ടിയെ ശിക്ഷി​ക്കാൻ അവന്റെ കൈകൾ തീയിൽവെച്ച്‌ പൊള്ളി​ക്കുന്ന ഒരാ​ളെ​ക്കു​റിച്ച്‌ നിങ്ങൾക്ക്‌ എന്തു തോന്നും? അയാൾ മഹാ​ക്രൂ​ര​നാ​ണെന്നു നിങ്ങൾ പറയില്ലേ? അത്തരം ഒരാ​ളോട്‌ അടുക്കാൻ നിങ്ങൾ ആഗ്രഹി​ക്കില്ല, ശരിയല്ലേ? യഹോ​വ​യെ​ക്കു​റിച്ച്‌ നമുക്ക്‌ അങ്ങനെ​യൊ​ക്കെ തോന്നാ​നാ​ണു സാത്താൻ ആഗ്രഹി​ക്കു​ന്നത്‌!

18. മരിച്ച​വരെ നമ്മൾ പേടി​ക്കേ​ണ്ട​തി​ല്ലാ​ത്തത്‌ എന്തു​കൊണ്ട്‌?

¹⁸ ചില മതങ്ങൾ പറയു​ന്നത്‌ ആളുകൾ മരിക്കു​മ്പോൾ അവർ ആത്മാക്ക​ളാ​യി​ത്തീ​രു​ന്നു എന്നാണ്‌. മരിച്ച​വ​രു​ടെ ആത്മാക്കളെ ആദരി​ക്ക​ണ​മെ​ന്നും അവയെ പേടി​ക്ക​ണ​മെ​ന്നും ഈ മതങ്ങൾ പഠിപ്പി​ക്കു​ന്നു; കാരണം സഹായി​ക്കാൻ ശക്തിയുള്ള സ്‌നേ​ഹി​ത​രോ കൊടിയ ശത്രു​ക്ക​ളോ ആകാൻ അവർക്കാ​കു​മ​ത്രേ. അനേക​മാ​ളു​ക​ളും ആ നുണ വിശ്വ​സി​ക്കു​ന്നു. മരിച്ച​വരെ ഭയക്കു​ക​യും യഹോ​വയ്‌ക്കു പകരം അവരെ ആരാധി​ക്കു​ക​യും ചെയ്യുന്നു. എന്നാൽ ഓർക്കുക, മരിച്ചു​പോ​യവർ ഒന്നും അറിയു​ന്നില്ല. അവർക്കു വികാ​ര​ങ്ങ​ളോ ചിന്തക​ളോ ഇല്ല. അതു​കൊണ്ട്‌ നമ്മൾ മരിച്ച​വരെ പേടി​ക്കേ​ണ്ട​തില്ല. യഹോ​വ​യാ​ണു നമ്മുടെ സ്രഷ്ടാവ്‌, സത്യ​ദൈവം! അതു​കൊണ്ട്‌ യഹോ​വയെ മാത്രമേ നമ്മൾ ആരാധി​ക്കാ​വൂ.—വെളി​പാട്‌ 4:11.

19. മരിച്ച​വ​രെ​ക്കു​റി​ച്ചുള്ള സത്യം അറിയു​ന്നതു നമ്മളെ സഹായി​ക്കു​ന്നത്‌ എങ്ങനെ?

¹⁹ മരിച്ച​വ​രെ​ക്കു​റി​ച്ചുള്ള സത്യം അറിയു​മ്പോൾ മതങ്ങൾ പഠിപ്പി​ക്കുന്ന നുണക​ളിൽനിന്ന്‌ നമ്മൾ സ്വത​ന്ത്ര​രാ​കു​ന്നു. നമ്മുടെ ജീവി​ത​ത്തെ​യും ഭാവി​യെ​യും കുറിച്ച്‌ യഹോവ നൽകി​യി​രി​ക്കുന്ന മഹത്തായ വാഗ്‌ദാ​നങ്ങൾ മനസ്സി​ലാ​ക്കാൻ ഈ സത്യം നമ്മളെ സഹായി​ക്കു​ന്നു.

20. അടുത്ത അധ്യാ​യ​ത്തിൽ നമ്മൾ എന്തു പഠിക്കും?

²⁰ വളരെ​ക്കാ​ലം മുമ്പ്‌, ദൈവ​ത്തി​ന്റെ ഒരു ദാസനായ ഇയ്യോബ്‌ ചോദി​ച്ചു: “മനുഷ്യൻ മരിച്ചു​പോ​യാൽ, അവനു വീണ്ടും ജീവി​ക്കാ​നാ​കു​മോ?” (ഇയ്യോബ്‌ 14:14) മരിച്ചു​പോയ ഒരാൾക്കു വീണ്ടും ജീവി​ക്കാൻ ശരിക്കും പറ്റുമോ? ബൈബി​ളി​ലൂ​ടെ ദൈവം തരുന്ന ഉത്തരം നമ്മളെ കോരി​ത്ത​രി​പ്പി​ക്കും. അടുത്ത അധ്യാ​യ​ത്തിൽ നമുക്ക്‌ അതു നോക്കാം.

1-3. നമ്മളെ​ല്ലാം ഏതു തടവറ​യി​ലാണ്‌? യഹോവ നമ്മളെ എങ്ങനെ മോചി​പ്പി​ക്കും?

ചെയ്യാത്ത കുറ്റത്തി​നു നിങ്ങളെ ജീവപ​ര്യ​ന്തം ജയിലിൽ അടച്ചി​രി​ക്കു​ക​യാ​ണെന്നു വിചാ​രി​ക്കുക. ജയിലിൽനിന്ന്‌ മോചി​ത​നാ​കാ​നുള്ള ഒരു സാധ്യ​ത​യും കാണു​ന്നില്ല. ഭാവി ഇരുള​ട​ഞ്ഞ​താ​യി തോന്നു​ന്നു. ഇനി ഒന്നും ചെയ്യാ​നില്ല. എല്ലാ പ്രതീ​ക്ഷ​യും അസ്‌ത​മി​ച്ചു. അപ്പോൾ അതാ, നിങ്ങളെ മോചി​പ്പി​ക്കാൻ അധികാ​ര​മുള്ള ഒരാൾ നിങ്ങളെ വിട്ടയയ്‌ക്കാ​മെന്നു വാക്കു തരുന്നു! നിങ്ങൾക്ക്‌ എന്തു തോന്നും?

² നമ്മളെ​ല്ലാം മരണത്തി​ന്റെ തടവറ​യി​ലാണ്‌. എന്തൊക്കെ ചെയ്‌താ​ലും രക്ഷപ്പെ​ടാൻ ഒരു വഴിയു​മില്ല. എന്നാൽ മരണത്തിൽനിന്ന്‌ മോചി​പ്പി​ക്കാ​നുള്ള ശക്തിയും അധികാ​ര​വും യഹോ​വയ്‌ക്കുണ്ട്‌. ‘അവസാ​നത്തെ ശത്രു​വാ​യി മരണത്തെ നീക്കം ചെയ്യും’ എന്ന്‌ യഹോവ വാക്കു തന്നിരി​ക്കു​ന്നു.—1 കൊരി​ന്ത്യർ 15:26.

³ മരിച്ചു​പോ​കു​മെന്ന പേടി​യി​ല്ലാ​തെ ജീവി​ക്കു​ന്ന​തി​നെ​ക്കു​റിച്ച്‌ ഒന്നു ചിന്തി​ച്ചു​നോ​ക്കൂ. എന്തൊരു ആശ്വാസം, അല്ലേ? യഹോവ ചെയ്യാൻപോ​കു​ന്ന​തും അതാണ്‌: മരണത്തെ ഇല്ലാതാ​ക്കും. അതു മാത്രമല്ല മരിച്ചു​പോ​യ​വരെ വീണ്ടും ജീവനി​ലേക്കു കൊണ്ടു​വ​രു​ക​യും ചെയ്യും. നിങ്ങളു​ടെ ജീവി​ത​ത്തിൽ അത്‌ എത്ര വലി​യൊ​രു കാര്യ​മാ​യി​രി​ക്കു​മെന്ന്‌ ഓർത്തു​നോ​ക്കൂ! മരിച്ചവർ വീണ്ടും ജീവി​ക്കു​മെന്ന്‌ യഹോവ ഉറപ്പു​ത​രു​ന്നു. (യശയ്യ 26:19) ഇതി​നെ​യാ​ണു ബൈബി​ളിൽ പുനരു​ത്ഥാ​നം എന്നു വിളി​ക്കു​ന്നത്‌.

പ്രിയ​പ്പെ​ട്ടവർ മരിക്കു​മ്പോൾ

4. (എ) ഒരു കുടും​ബാം​ഗ​മോ ഉറ്റ സുഹൃ​ത്തോ മരിക്കു​മ്പോൾ എവി​ടെ​നിന്ന്‌ ആശ്വാസം കിട്ടും? (ബി) യേശു​വി​ന്റെ ചില അടുത്ത കൂട്ടു​കാർ ആരായി​രു​ന്നു?

⁴ ഒരു കുടും​ബാം​ഗ​മോ ഉറ്റ സുഹൃ​ത്തോ മരിക്കു​മ്പോ​ഴു​ണ്ടാ​കുന്ന വേദന​യും ദുഃഖ​വും നമുക്കു താങ്ങാ​നാ​കില്ല. നിസ്സഹാ​യ​രാ​യി നോക്കി​നിൽക്കാ​നേ നമുക്കു പറ്റൂ. ആ വ്യക്തിയെ ജീവനി​ലേക്കു തിരികെ കൊണ്ടു​വ​രാൻ നമുക്ക്‌ ഒന്നും ചെയ്യാൻ പറ്റില്ല. എന്നാൽ നമുക്ക്‌ ആവശ്യ​മായ ആശ്വാസം ബൈബിൾ തരുന്നു. (2 കൊരി​ന്ത്യർ 1:3, 4 വായി​ക്കുക.) നമ്മുടെ പ്രിയ​പ്പെ​ട്ട​വരെ ജീവനി​ലേക്കു കൊണ്ടു​വ​രാൻ യഹോ​വ​യും യേശു​വും എത്രമാ​ത്രം ആഗ്രഹി​ക്കു​ന്നെന്നു കാണി​ക്കുന്ന ഒരു ഉദാഹ​രണം നമുക്കു നോക്കാം. ഭൂമി​യി​ലാ​യി​രു​ന്ന​പ്പോൾ യേശു ലാസറി​നെ​യും പെങ്ങന്മാ​രായ മാർത്ത​യെ​യും മറിയ​യെ​യും കൂടെ​ക്കൂ​ടെ സന്ദർശി​ച്ചി​രു​ന്നു. ഈ മൂന്നു പേരും യേശു​വി​ന്റെ അടുത്ത കൂട്ടു​കാ​രാ​യി​രു​ന്നു. “യേശു മാർത്ത​യെ​യും അവളുടെ സഹോ​ദ​രി​യെ​യും ലാസറി​നെ​യും സ്‌നേ​ഹി​ച്ചി​രു​ന്നു” എന്ന്‌ ബൈബിൾ പറയുന്നു. അങ്ങനെ​യി​രി​ക്കെ ഒരു ദിവസം ലാസർ മരിച്ചു.—യോഹ​ന്നാൻ 11:3-5.

5, 6. (എ) ലാസറി​ന്റെ കുടും​ബാം​ഗ​ങ്ങ​ളും സ്‌നേ​ഹി​ത​രും സങ്കട​പ്പെ​ടു​ന്നതു കണ്ടപ്പോൾ യേശു എന്തു ചെയ്‌തു? (ബി) മരണ​ത്തെ​ക്കു​റിച്ച്‌ യേശു​വി​നു​ണ്ടായ വികാരം നമ്മളെ ആശ്വസി​പ്പി​ക്കു​ന്നത്‌ എങ്ങനെ?

⁵ മാർത്ത​യെ​യും മറിയ​യെ​യും ആശ്വസി​പ്പി​ക്കാൻ യേശു അങ്ങോട്ടു പോയി. യേശു വരു​ന്നെന്നു കേട്ട മാർത്ത യേശു​വി​നെ സ്വീക​രി​ക്കാൻ നഗരത്തി​നു വെളി​യി​ലേക്കു ചെന്നു. യേശു​വി​നെ കണ്ടപ്പോൾ മാർത്ത​യ്‌ക്കു സന്തോഷം തോന്നി. എങ്കിലും മാർത്ത പറഞ്ഞു: “അങ്ങ്‌ ഇവി​ടെ​യു​ണ്ടാ​യി​രു​ന്നെ​ങ്കിൽ എന്റെ ആങ്ങള മരിക്കി​ല്ലാ​യി​രു​ന്നു.” യേശു വരാൻ വളരെ വൈകി​പ്പോ​യെന്നു മാർത്ത​യ്‌ക്കു തോന്നി. മാർത്ത​യു​ടെ സഹോ​ദ​രി​യായ മറിയ കരയു​ന്ന​തും യേശു കണ്ടു. അവരുടെ സങ്കടം കണ്ടപ്പോൾ യേശു​വി​നു വേദന തോന്നി; യേശു​വും കരഞ്ഞു. (യോഹ​ന്നാൻ 11:21, 33, 35) പ്രിയ​പ്പെ​ട്ടവർ മരിക്കു​മ്പോൾ നമുക്കു​ണ്ടാ​കുന്ന ആഴമായ ദുഃഖം യേശു അനുഭ​വിച്ച്‌ അറിഞ്ഞു.

⁶ മരണ​ത്തെ​ക്കു​റിച്ച്‌ നമുക്കുള്ള അതേ വികാ​രം​ത​ന്നെ​യാ​ണു യേശു​വി​നു​മു​ള്ള​തെന്ന്‌ അറിയു​ന്നതു നമ്മളെ ആശ്വസി​പ്പി​ക്കു​ന്നു. ഇക്കാര്യ​ത്തിൽ യേശു തന്റെ പിതാ​വി​നെ​പ്പോ​ലെ​ത​ന്നെ​യാണ്‌. (യോഹ​ന്നാൻ 14:9) മരണത്തെ എന്നെ​ന്നേ​ക്കു​മാ​യി ഇല്ലായ്‌മ ചെയ്യാ​നുള്ള ശക്തിയും അധികാ​ര​വും യഹോ​വയ്‌ക്കുണ്ട്‌. യഹോവ ഉടൻതന്നെ അതു ചെയ്യും.

“ലാസറേ, പുറത്ത്‌ വരൂ!”

7, 8. ലാസറി​ന്റെ കല്ലറയു​ടെ വാതിൽക്കലെ കല്ലു മാറ്റാൻ മാർത്ത ആഗ്രഹി​ക്കാ​തി​രു​ന്നത്‌ എന്തു​കൊണ്ട്‌? പക്ഷേ യേശു എന്തു ചെയ്‌തു?

⁷ ലാസറി​ന്റെ ശരീരം വെച്ചി​രുന്ന കല്ലറയ്‌ക്കൽ യേശു വന്നു. കല്ലറയു​ടെ വാതിൽ ഒരു വലിയ കല്ലു​കൊണ്ട്‌ അടച്ചി​രു​ന്നു. “ഈ കല്ല്‌ എടുത്തു​മാറ്റ്‌” എന്നു യേശു പറഞ്ഞു. എന്നാൽ അതു മാറ്റാൻ മാർത്ത ആഗ്രഹി​ച്ചില്ല. കാരണം ലാസറി​ന്റെ ശരീരം കല്ലറയിൽ വെച്ചിട്ട്‌ നാലു ദിവസം കഴിഞ്ഞി​രു​ന്നു. (യോഹ​ന്നാൻ 11:39) തന്റെ ആങ്ങളയു​ടെ കാര്യ​ത്തിൽ യേശു എന്താണു ചെയ്യാൻപോ​കു​ന്ന​തെന്നു മാർത്ത​യ്‌ക്ക്‌ അറിയി​ല്ലാ​യി​രു​ന്നു.

⁸ യേശു ലാസറി​നോട്‌, “പുറത്ത്‌ വരൂ!” എന്നു പറഞ്ഞു. മാർത്ത​യും മറിയ​യും അടുത്ത​താ​യി കണ്ടത്‌ അതിശ​യി​പ്പി​ക്കുന്ന കാഴ്‌ച​യാ​യി​രു​ന്നു. “മരിച്ച​യാൾ പുറത്ത്‌ വന്നു. അയാളു​ടെ കൈകാ​ലു​കൾ തുണി​കൊണ്ട്‌ ചുറ്റി​യി​രു​ന്നു.” (യോഹ​ന്നാൻ 11:43, 44) ലാസർ ജീവനി​ലേക്കു തിരി​ച്ചു​വന്നു! കുടും​ബാം​ഗ​ങ്ങൾക്കും സുഹൃ​ത്തു​ക്കൾക്കും ലാസറി​നെ തിരികെ കിട്ടി. അവർക്കു ലാസറി​നെ തൊടാ​മാ​യി​രു​ന്നു, കെട്ടി​പ്പി​ടി​ക്കാ​മാ​യി​രു​ന്നു, ലാസറി​നോ​ടു വർത്തമാ​നം പറയാ​മാ​യി​രു​ന്നു. എന്തൊരു അത്ഭുതം! അതെ, യേശു ലാസറി​നെ പുനരു​ത്ഥാ​ന​പ്പെ​ടു​ത്തി!

“മോളേ, ഞാൻ നിന്നോ​ടു പറയുന്നു: എഴു​ന്നേൽക്ക്‌!”

9, 10. (എ) മരിച്ച​വരെ ഉയിർപ്പി​ക്കാ​നുള്ള ശക്തി യേശു​വി​നു കൊടു​ത്തത്‌ ആരാണ്‌? (ബി) പുനരു​ത്ഥാ​ന​വി​വ​ര​ണങ്ങൾ നമുക്കു പ്രയോ​ജ​ന​പ്പെ​ടു​ന്നത്‌ എങ്ങനെ?

⁹ സ്വന്തം ശക്തി​കൊ​ണ്ടാ​ണോ യേശു ആളുകളെ ഉയിർപ്പി​ച്ചത്‌? അല്ല. ലാസറി​നെ ഉയിർപ്പി​ക്കു​ന്ന​തി​നു മുമ്പ്‌ യേശു യഹോ​വ​യോ​ടു പ്രാർഥി​ച്ച​പ്പോൾ യഹോ​വ​യാണ്‌ ഉയിർപ്പി​ക്കാ​നുള്ള ശക്തി കൊടു​ത്തത്‌. (യോഹ​ന്നാൻ 11:41, 42 വായി​ക്കുക.) ലാസർ മാത്രമല്ല ഉയിർപ്പി​ക്ക​പ്പെ​ട്ടി​ട്ടു​ള്ളത്‌. കഠിന​മായ രോഗം​വന്ന ഒരു 12 വയസ്സു​കാ​രി​യെ​ക്കു​റിച്ച്‌ ബൈബിൾ പറയു​ന്നുണ്ട്‌. എങ്ങനെ​യെ​ങ്കി​ലും മകളുടെ അസുഖ​മൊ​ന്നു മാറണ​മെന്നേ ഉണ്ടായി​രു​ന്നു​ള്ളൂ അവളുടെ അപ്പനായ യായീ​റൊ​സിന്‌. മകളെ സുഖ​പ്പെ​ടു​ത്ത​ണ​മെന്നു യായീ​റൊസ്‌ യേശു​വി​നോട്‌ അപേക്ഷി​ച്ചു. യായീ​റൊ​സി​ന്റെ ഒരേ​യൊ​രു മകളാ​യി​രു​ന്നു അവൾ. അദ്ദേഹം യേശു​വി​നോ​ടു സംസാ​രി​ച്ചു​കൊ​ണ്ടി​രി​ക്കു​മ്പോൾ ചിലർ വന്ന്‌ പറഞ്ഞു: “മോൾ മരിച്ചു​പോ​യി. ഇനി എന്തിനാ​ണു ഗുരു​വി​നെ ബുദ്ധി​മു​ട്ടി​ക്കു​ന്നത്‌?” എന്നാൽ യേശു യായീ​റൊ​സി​നോ​ടു പറഞ്ഞു: “പേടി​ക്കേണ്ടാ, വിശ്വ​സി​ച്ചാൽ മാത്രം മതി. അവൾ രക്ഷപ്പെ​ടും.” എന്നിട്ട്‌ യേശു യായീ​റൊ​സി​ന്റെ​കൂ​ടെ അദ്ദേഹ​ത്തി​ന്റെ വീട്ടി​ലേക്കു പോയി. അവർ വീട്ടിൽ എത്തിയ​പ്പോൾ ആളുകൾ കരയു​ന്നതു യേശു കണ്ടു. യേശു അവരോ​ടു പറഞ്ഞു: “കരയേണ്ടാ! അവൾ മരിച്ചി​ട്ടില്ല, ഉറങ്ങു​ക​യാണ്‌.” യേശു എന്താണ്‌ ഈ പറയു​ന്ന​തെന്ന്‌ അവളുടെ അപ്പനും അമ്മയും വിചാ​രി​ച്ചി​ട്ടു​ണ്ടാ​കണം. എല്ലാവ​രോ​ടും പുറ​ത്തേക്ക്‌ ഇറങ്ങാൻ പറഞ്ഞിട്ട്‌ യേശു അപ്പനെ​യും അമ്മയെ​യും കൂട്ടി​ക്കൊണ്ട്‌ അവൾ കിടന്നി​രുന്ന മുറി​യി​ലേക്കു ചെന്നു. യേശു മെല്ലെ അവളുടെ കൈപി​ടിച്ച്‌ ഇങ്ങനെ പറഞ്ഞു: “മോളേ, ഞാൻ നിന്നോ​ടു പറയുന്നു: ‘എഴു​ന്നേൽക്ക്‌!’ ഉടൻതന്നെ അവൾ എഴു​ന്നേറ്റ്‌ നടന്നു. ആ അപ്പനും അമ്മയ്‌ക്കും ഉണ്ടായ സന്തോഷം ഒന്ന്‌ ഓർത്തു​നോ​ക്കൂ! അതെ, യേശു അവരുടെ മകളെ ഉയിർപ്പി​ച്ചു! (മർക്കോസ്‌ 5:22-24, 35-42; ലൂക്കോസ്‌ 8:49-56) ആ നിമി​ഷം​മു​തൽ, മോളെ കാണു​മ്പോ​ഴെ​ല്ലാം യഹോവ യേശു​വി​ലൂ​ടെ തങ്ങൾക്കു​വേണ്ടി ചെയ്‌തത്‌ അവർ ഓർമി​ച്ചി​രി​ക്കണം.a

¹⁰ യേശു ജീവനി​ലേക്കു തിരികെ കൊണ്ടു​വ​ന്നവർ പിന്നീടു വീണ്ടും മരിച്ചു. എങ്കിലും അവരെ​ക്കു​റിച്ച്‌ വായി​ച്ച​റി​യു​ന്നതു നമുക്കു പ്രയോ​ജനം ചെയ്യും. അതു നമുക്ക്‌ യഥാർഥ​പ്ര​ത്യാ​ശ പകരും. മരിച്ച​വരെ ഉയിർപ്പി​ക്കാൻ യഹോവ ആഗ്രഹി​ക്കു​ന്നു. യഹോവ ഉറപ്പാ​യും അതു ചെയ്യും.

പുനരു​ത്ഥാ​ന​വി​വ​ര​ണങ്ങൾ നമ്മളെ പഠിപ്പി​ക്കു​ന്നത്‌

11. സഭാപ്രസംഗകൻ 9:5 ലാസറിന്റെ കാര്യത്തിൽ സത്യമാ​യി​രു​ന്നത്‌ എങ്ങനെ?

¹¹ “മരിച്ചവർ ഒന്നും അറിയു​ന്നില്ല” എന്ന്‌ ബൈബിൾ വ്യക്തമാ​യി പറയുന്നു. ലാസറി​ന്റെ കാര്യ​ത്തിൽ അതു സത്യമാ​യി​രു​ന്നു. (സഭാ​പ്ര​സം​ഗകൻ 9:5) മരിച്ച​പ്പോൾ ലാസർ ഉറങ്ങു​ന്ന​തു​പോ​ലെ​യാ​യി​രു​ന്നു. അതുത​ന്നെ​യാ​ണ​ല്ലോ യേശു പറഞ്ഞതും. (യോഹ​ന്നാൻ 11:11) കല്ലറയി​ലാ​യി​രു​ന്ന​പ്പോൾ ലാസർ ‘ഒന്നും അറിഞ്ഞില്ല.’

12. ലാസറി​ന്റെ പുനരു​ത്ഥാ​നം ശരിക്കും നടന്നെന്നു നമുക്ക്‌ എങ്ങനെ അറിയാം?

¹² യേശു ലാസറി​നെ ഉയിർപ്പി​ച്ചത്‌ അനേക​മാ​ളു​കൾ കണ്ടു. യേശു ഇങ്ങനെ​യൊ​രു അത്ഭുതം ചെയ്‌തെന്ന്‌ ശത്രു​ക്കൾക്കും അറിയാ​മാ​യി​രു​ന്നു. കാരണം ലാസർ അപ്പോൾ ജീവി​ച്ചി​രി​പ്പു​ണ്ടാ​യി​രു​ന്നു. പുനരു​ത്ഥാ​നം ശരിക്കും നടന്നു എന്നതിന്റെ തെളി​വാ​യി​രു​ന്നു അത്‌. (യോഹ​ന്നാൻ 11:47) ലാസറി​നെ കാണാൻ ഒരുപാ​ടു പേർ ചെന്നു. ദൈവ​മാ​ണു യേശു​വി​നെ അയച്ച​തെന്ന്‌ അവരും വിശ്വ​സി​ച്ചു. യേശു​വി​ന്റെ ശത്രു​ക്കൾക്ക്‌ അത്‌ ഇഷ്ടപ്പെ​ട്ടില്ല. അതു​കൊണ്ട്‌ യേശു​വി​നെ​യും ലാസറി​നെ​യും കൊല്ലാൻ അവർ തീരു​മാ​നി​ച്ചു.—യോഹ​ന്നാൻ 11:53; 12:9-11.

13. മരിച്ച​വരെ ഉയിർപ്പി​ക്കാൻ യഹോ​വയ്‌ക്കാ​കു​മെന്നു നമുക്ക്‌ ഉറപ്പു​ള്ളത്‌ എന്തു​കൊണ്ട്‌?

¹³ ‘സ്‌മാ​ര​ക​ക്ക​ല്ല​റ​ക​ളി​ലുള്ള എല്ലാവ​രെ​യും’ ഉയിർപ്പി​ക്കു​മെന്നു യേശു പറഞ്ഞു. (യോഹ​ന്നാൻ 5:28) അതിന്‌ അർഥം യഹോവ തന്റെ സ്‌മര​ണ​യിൽ അഥവാ ഓർമ​യിൽ വെച്ചി​രി​ക്കുന്ന എല്ലാവ​രെ​യും ജീവനി​ലേക്കു തിരി​ച്ചു​കൊ​ണ്ടു​വ​രും എന്നാണ്‌. എന്നാൽ ഒരാളെ ഉയിർപ്പി​ക്കു​ന്ന​തിന്‌ ആ വ്യക്തി​യെ​ക്കു​റി​ച്ചുള്ള എല്ലാ വിവര​ങ്ങ​ളും യഹോവ ഓർക്കേ​ണ്ട​തുണ്ട്‌. അതു സാധി​ക്കു​മോ? പ്രപഞ്ച​ത്തിൽ കോടാ​നു​കോ​ടി നക്ഷത്ര​ങ്ങ​ളുണ്ട്‌. അവയിൽ ഓരോ​ന്നി​ന്റെ​യും പേര്‌ യഹോ​വയ്‌ക്ക്‌ അറിയാ​മെന്നു ബൈബിൾ പറയുന്നു. (യശയ്യ 40:26 വായി​ക്കുക.) ഇത്രയ​ധി​കം നക്ഷത്ര​ങ്ങ​ളു​ടെ പേര്‌ ഓർക്കാ​നാ​കു​മെ​ങ്കിൽ, ജീവനി​ലേക്കു കൊണ്ടു​വ​രാൻപോ​കുന്ന ഓരോ​രു​ത്ത​രെ​ക്കു​റി​ച്ചു​മുള്ള എല്ലാ വിവര​ങ്ങ​ളും ഓർക്കാൻ യഹോ​വയ്‌ക്ക്‌ ഒരു ബുദ്ധി​മു​ട്ടു​മു​ണ്ടാ​കില്ല. അതു മാത്രമല്ല, യഹോ​വ​യാണ്‌ എല്ലാം സൃഷ്ടി​ച്ചത്‌. അതു​കൊണ്ട്‌ മരിച്ച​വരെ ജീവനി​ലേക്കു കൊണ്ടു​വ​രാ​നുള്ള ശക്തിയും യഹോ​വയ്‌ക്കുണ്ട്‌.

14, 15. പുനരു​ത്ഥാ​ന​ത്തെ​ക്കു​റി​ച്ചുള്ള ഇയ്യോ​ബി​ന്റെ വാക്കുകൾ നമ്മളെ എന്തു പഠിപ്പി​ക്കു​ന്നു?

¹⁴ ദൈവ​ത്തി​ന്റെ വിശ്വസ്‌ത​ദാ​സ​നായ ഇയ്യോബ്‌ പുനരു​ത്ഥാ​ന​ത്തിൽ വിശ്വ​സി​ച്ചി​രു​ന്നു. ഇയ്യോബ്‌ ചോദി​ച്ചു: “മനുഷ്യൻ മരിച്ചു​പോ​യാൽ, അവനു വീണ്ടും ജീവി​ക്കാ​നാ​കു​മോ?” എന്നിട്ട്‌ യഹോ​വ​യോ​ടു പറഞ്ഞു: “അങ്ങ്‌ വിളി​ക്കും, ഞാൻ വിളി കേൾക്കും. അങ്ങയുടെ കൈകൾ രൂപം നൽകി​യ​വയെ കാണാൻ അങ്ങയ്‌ക്കു കൊതി തോന്നും.” അതെ, മരിച്ചു​പോ​യ​വരെ പുനരു​ത്ഥാ​ന​ത്തിൽ കൊണ്ടു​വ​രാ​നുള്ള സമയത്തി​നാ​യി യഹോവ കാത്തി​രി​ക്കു​ക​യാ​ണെന്ന്‌ ഇയ്യോ​ബിന്‌ അറിയാ​മാ​യി​രു​ന്നു.—ഇയ്യോബ്‌ 14:13-15.

¹⁵ പുനരു​ത്ഥാ​ന​പ്ര​ത്യാ​ശ​യെ​ക്കു​റിച്ച്‌ നിങ്ങൾക്ക്‌ എന്തു തോന്നു​ന്നു? ഒരുപക്ഷേ നിങ്ങൾ ചോദി​ച്ചേ​ക്കാം, ‘മരിച്ചു​പോയ എന്റെ കുടും​ബാം​ഗ​ങ്ങ​ളു​ടെ​യും കൂട്ടു​കാ​രു​ടെ​യും കാര്യ​മോ, അവരും പുനരു​ത്ഥാ​ന​ത്തിൽ വരുമോ?’ മരിച്ച​വരെ ജീവനി​ലേക്കു കൊണ്ടു​വ​രാൻ യഹോവ ആഗ്രഹി​ക്കു​ന്നെന്ന്‌ അറിയു​ന്നത്‌ എത്ര ആശ്വാ​സ​മാണ്‌! ആരെല്ലാം ജീവനി​ലേക്കു തിരി​ച്ചു​വ​രും, അവർ എവിടെ ജീവി​ക്കും എന്നതി​നെ​ക്കു​റി​ച്ചെ​ല്ലാം ബൈബിൾ എന്തു പറയു​ന്നെന്നു നമുക്കു നോക്കാം.

അവർ ‘അവന്റെ ശബ്ദം കേട്ട്‌ പുറത്ത്‌ വരും’

16. ഭൂമി​യിൽ വീണ്ടും ജീവനി​ലേക്കു വരുന്ന​വ​രു​ടെ ജീവിതം എങ്ങനെ​യു​ള്ള​താ​യി​രി​ക്കും?

¹⁶ മുമ്പ്‌ പുനരു​ത്ഥാ​ന​പ്പെ​ട്ടവർ അവരുടെ കുടും​ബാം​ഗ​ങ്ങ​ളു​ടെ​യും സ്‌നേ​ഹി​ത​രു​ടെ​യും കൂടെ ഭൂമി​യിൽ ജീവിച്ചു. ഇതുത​ന്നെ​യാ​യി​രി​ക്കും ഭാവി​യി​ലും നടക്കാൻപോ​കു​ന്നത്‌. ഭാവി​യി​ലെ ആ പുനരു​ത്ഥാ​നം കൂടുതൽ മികച്ച​താ​യി​രി​ക്കും. എന്തു​കൊണ്ട്‌? കാരണം വീണ്ടും ജീവനി​ലേക്കു വരുന്ന​വർക്ക്‌ ഭൂമി​യിൽ എന്നെന്നും ജീവി​ക്കാ​നാ​കും; പിന്നെ അവർ മരിക്കില്ല. ഇന്നു നമ്മൾ ജീവി​ക്കു​ന്ന​തിൽനിന്ന്‌ വളരെ വ്യത്യസ്‌ത​മായ ഒരു ലോക​ത്താ​യി​രി​ക്കും അവർ ജീവി​ക്കു​ന്നത്‌. അന്നു യുദ്ധമോ കുറ്റകൃ​ത്യ​മോ രോഗ​മോ ഒന്നുമു​ണ്ടാ​യി​രി​ക്കില്ല.

17. ആരെല്ലാം ഉയിർപ്പി​ക്ക​പ്പെ​ടും?

¹⁷ ആരെല്ലാം ഉയിർപ്പി​ക്ക​പ്പെ​ടും? “സ്‌മാ​ര​ക​ക്ക​ല്ല​റ​ക​ളി​ലുള്ള എല്ലാവ​രും അവന്റെ ശബ്ദം കേട്ട്‌ പുറത്ത്‌ വരു”മെന്ന്‌ യേശു പറഞ്ഞു. (യോഹ​ന്നാൻ 5:28, 29) അതു​പോ​ലെ വെളി​പാട്‌ 20:13 പറയുന്നു: “കടൽ അതിലുള്ള മരിച്ച​വരെ വിട്ടു​കൊ​ടു​ത്തു. മരണവും ശവക്കു​ഴി​യും അവയി​ലുള്ള മരിച്ച​വരെ വിട്ടു​കൊ​ടു​ത്തു.” അതെ, കോടി​ക്ക​ണ​ക്കിന്‌ ആളുകൾ വീണ്ടും ജീവി​ക്കും! “നീതി​മാ​ന്മാ​രു​ടെ​യും നീതി​കെ​ട്ട​വ​രു​ടെ​യും പുനരു​ത്ഥാ​നം ഉണ്ടാകു”മെന്നു പൗലോസ്‌ അപ്പോസ്‌ത​ല​നും പറഞ്ഞു. (പ്രവൃ​ത്തി​കൾ 24:15 വായി​ക്കുക.) എന്താണ്‌ അതിന്റെ അർഥം?

18. ഉയിർപ്പി​ക്ക​പ്പെ​ടുന്ന ‘നീതി​മാ​ന്മാർ’ ആരാണ്‌?

¹⁸ യേശു ഭൂമി​യി​ലേക്കു വരുന്ന​തി​നു മുമ്പ്‌ ജീവി​ച്ചി​രുന്ന, യഹോ​വ​യു​ടെ വിശ്വസ്‌ത​ദാ​സ​ന്മാർ ‘നീതി​മാ​ന്മാ​രിൽ’ ഉൾപ്പെ​ടും. നോഹ, അബ്രാ​ഹാം, സാറ, മോശ, രൂത്ത്‌, എസ്ഥേർ എന്നിവർ ഭൂമി​യി​ലേക്കു വീണ്ടും ഉയിർപ്പി​ക്ക​പ്പെ​ടും. എബ്രായർ 11-ാം അധ്യാ​യ​ത്തിൽ അവരിൽ ചില​രെ​ക്കു​റിച്ച്‌ നിങ്ങൾക്കു വായി​ക്കാം. യഹോ​വ​യു​ടെ വിശ്വസ്‌ത​ദാ​സ​ന്മാ​രിൽ ഇക്കാലത്ത്‌ മരിക്കു​ന്ന​വ​രു​ടെ കാര്യ​മോ? അവരും ‘നീതി​മാ​ന്മാ​രാണ്‌.’ അവർക്കും പുനരു​ത്ഥാ​ന​മു​ണ്ടാ​കും.

19. ‘നീതി​കെ​ട്ടവർ’ ആരാണ്‌? യഹോവ അവർക്ക്‌ എന്തിനുള്ള അവസരം കൊടു​ക്കും?

¹⁹ ‘നീതി​കെ​ട്ട​വ​രിൽ,’ യഹോ​വയെ അറിയാൻ അവസരം കിട്ടാത്ത കോടി​ക്ക​ണ​ക്കിന്‌ ആളുകൾ ഉൾപ്പെ​ടും. അവർ മരിച്ചു​പോ​യെ​ങ്കി​ലും യഹോവ അവരെ മറന്നു​ക​ള​ഞ്ഞി​ട്ടില്ല. യഹോവ അവരെ ജീവനി​ലേക്കു കൊണ്ടു​വ​രും. അങ്ങനെ അവർക്ക്‌ യഹോ​വ​യെ​ക്കു​റിച്ച്‌ പഠിക്കാ​നും യഹോ​വയെ സേവി​ക്കാ​നും ഉള്ള അവസരം കിട്ടും.

20. എല്ലാവർക്കും പുനരു​ത്ഥാ​നം ലഭിക്കി​ല്ലാ​ത്തത്‌ എന്തു​കൊണ്ട്‌?

²⁰ അതിന്‌ അർഥം മരിച്ചു​പോയ എല്ലാവ​രും ഉയിർപ്പി​ക്ക​പ്പെ​ടും എന്നാണോ? അല്ല. ചിലരെ ജീവനി​ലേക്കു തിരികെ കൊണ്ടു​വ​രില്ല എന്നു യേശു പറഞ്ഞു. (ലൂക്കോസ്‌ 12:5) ഒരു വ്യക്തിയെ ജീവനി​ലേക്കു തിരികെ കൊണ്ടു​വ​ര​ണോ വേണ്ടയോ എന്നു തീരു​മാ​നി​ക്കു​ന്നത്‌ ആരാണ്‌? യഹോ​വ​യാണ്‌ അന്തിമ​ന്യാ​യാ​ധി​പൻ. എന്നാൽ “ജീവി​ച്ചി​രി​ക്കു​ന്ന​വർക്കും മരിച്ച​വർക്കും ന്യായാ​ധി​പ​നാ​യി” യേശു​വി​നെ​യും യഹോവ അധികാ​ര​പ്പെ​ടു​ത്തി​യി​രി​ക്കു​ന്നു. (പ്രവൃ​ത്തി​കൾ 10:42) ദുഷ്ടനാ​യി വിധി​ക്ക​പ്പെ​ടു​ക​യും മാറ്റം വരുത്താൻ വിസ്സമ​തി​ക്കു​ക​യും ചെയ്യുന്ന ആർക്കും പുനരു​ത്ഥാ​നം ലഭിക്കില്ല.—പിൻകു​റിപ്പ്‌ 19 കാണുക.

സ്വർഗ​ത്തി​ലേ​ക്കുള്ള പുനരു​ത്ഥാ​നം

21, 22. (എ) സ്വർഗ​ത്തി​ലേ​ക്കുള്ള പുനരു​ത്ഥാ​നം എന്നാൽ എന്താണ്‌ അർഥം? (ബി) സ്വർഗ​ത്തിൽ ജീവി​ക്കാ​നാ​യി പുനരു​ത്ഥാ​ന​പ്പെട്ട ആദ്യവ്യ​ക്തി ആരായി​രു​ന്നു?

²¹ ചിലയാ​ളു​കൾ സ്വർഗ​ത്തിൽ ജീവി​ക്കു​മെ​ന്നും ബൈബിൾ പറയുന്നു. ഭൂമി​യിൽ ജീവി​ക്കാ​നുള്ള ഒരു മനുഷ്യ​ശ​രീ​ര​ത്തോ​ടെയല്ല ആത്മവ്യ​ക്തി​ക​ളാ​യി​ട്ടാ​യി​രി​ക്കും അവർ ഉയിർപ്പി​ക്ക​പ്പെ​ടു​ന്നത്‌.

²² ഈ വിധത്തിൽ സ്വർഗ​ത്തി​ലേ​ക്കുള്ള പുനരു​ത്ഥാ​നം പ്രാപിച്ച ആദ്യവ്യ​ക്തി യേശു​വാണ്‌. (യോഹ​ന്നാൻ 3:13) കൊല്ല​പ്പെട്ട്‌ മൂന്നാം ദിവസം യേശു​വി​നെ യഹോവ ഉയിർപ്പി​ച്ചു. (സങ്കീർത്തനം 16:10; പ്രവൃ​ത്തി​കൾ 13:34, 35) ഒരു മനുഷ്യ​ശ​രീ​ര​ത്തോ​ടെയല്ല യേശു​വി​നെ ഉയിർപ്പി​ച്ചത്‌. പത്രോസ്‌ അപ്പോ​സ്‌തലൻ യേശു​വി​നെ​ക്കു​റിച്ച്‌ “മനുഷ്യ​നാ​യി മരണശിക്ഷ ഏൽക്കു​ക​യും ആത്മവ്യ​ക്തി​യാ​യി ജീവനി​ലേക്കു വരുക​യും ചെയ്‌തു” എന്നു പറഞ്ഞു. (1 പത്രോസ്‌ 3:18) ശക്തനായ ഒരു ആത്മവ്യ​ക്തി​യാ​യി ദൈവം യേശു​വി​നെ ജീവനി​ലേക്കു കൊണ്ടു​വന്നു. (1 കൊരി​ന്ത്യർ 15:3-6) എന്നാൽ യേശു മാത്ര​മാ​യി​രി​ക്കില്ല ഈ രീതി​യിൽ പുനരു​ത്ഥാ​ന​പ്പെ​ടു​ന്ന​തെ​ന്നും ബൈബിൾ പറയുന്നു.

23, 24. യേശു പറഞ്ഞ ‘ചെറിയ ആട്ടിൻകൂ​ട്ടം’ ആരാണ്‌? അതിൽ എത്ര പേർ ഉണ്ട്‌?

²³ മരിക്കു​ന്ന​തി​നു തൊട്ടു​മുമ്പ്‌ യേശു വിശ്വസ്‌ത​രായ ശിഷ്യ​ന്മാ​രോ​ടു പറഞ്ഞു: “ഞാൻ നിങ്ങൾക്കു സ്ഥലം ഒരുക്കാ​നാ​ണു പോകു​ന്നത്‌.” (യോഹ​ന്നാൻ 14:2) അതിന്‌ അർഥം യേശു​വി​ന്റെ അനുഗാ​മി​ക​ളിൽ ചിലർ പുനരു​ത്ഥാ​ന​പ്പെട്ട്‌ യേശു​വി​നോ​ടൊ​പ്പം സ്വർഗ​ത്തിൽ ജീവി​ക്കു​മെ​ന്നാണ്‌. എത്ര പേർ? യേശു പറഞ്ഞതു കുറച്ച്‌ പേർ, ഒരു ‘ചെറിയ ആട്ടിൻകൂ​ട്ടം,’ എന്നാണ്‌. (ലൂക്കോസ്‌ 12:32) യോഹ​ന്നാൻ അപ്പോ​സ്‌തലൻ അവരുടെ കൃത്യം എണ്ണം പറഞ്ഞു. സ്വർഗീയ ‘സീയോൻ പർവത​ത്തിൽ 1,44,000 പേർ യേശു​വി​നോ​ടൊ​പ്പം നിൽക്കു​ന്നതു’ കണ്ടു എന്നാണു യോഹ​ന്നാൻ പറഞ്ഞത്‌.—വെളി​പാട്‌ 14:1.

²⁴ എപ്പോ​ഴാ​യി​രി​ക്കും 1,44,000 ക്രിസ്‌ത്യാ​നി​കൾ പുനരു​ത്ഥാ​ന​പ്പെ​ടു​ന്നത്‌? ക്രിസ്‌തു സ്വർഗ​ത്തിൽ ഭരണം തുടങ്ങി​യ​ശേ​ഷ​മാ​യി​രി​ക്കും അതു സംഭവി​ക്കു​ന്ന​തെന്നു ബൈബിൾ പറയുന്നു. (1 കൊരി​ന്ത്യർ 15:23) നമ്മൾ ഇപ്പോൾ ജീവി​ക്കു​ന്നത്‌ ആ സമയത്താണ്‌. 1,44,000 പേരിൽ മിക്കവ​രും സ്വർഗ​ത്തി​ലേക്കു പുനരു​ത്ഥാ​ന​പ്പെ​ട്ടു​ക​ഴി​ഞ്ഞു. എന്നാൽ 1,44,000 പേരിൽ ഭൂമി​യിൽ ശേഷി​ച്ചി​രി​ക്കു​ന്നവർ, മരിക്കുന്ന ഉടൻതന്നെ സ്വർഗ​ത്തി​ലേക്കു പുനരു​ത്ഥാ​ന​പ്പെ​ടും. പക്ഷേ ഭൂരി​പക്ഷം മനുഷ്യ​രും ഉയിർപ്പി​ക്ക​പ്പെ​ടു​ന്നത്‌ ഭൂമി​യി​ലെ പറുദീ​സ​യിൽ ജീവി​ക്കാ​നാ​യി​രി​ക്കും.

25. അടുത്ത അധ്യാ​യ​ത്തിൽ നമ്മൾ എന്തു പഠിക്കും?

²⁵ പെട്ടെ​ന്നു​തന്നെ യഹോവ എല്ലാ മനുഷ്യ​രെ​യും മരണത്തിൽനിന്ന്‌ വിടു​വി​ക്കും. മരണത്തെ എന്നെ​ന്നേ​ക്കു​മാ​യി ഇല്ലാതാ​ക്കും! (യശയ്യ 25:8 വായി​ക്കുക.) എന്നാൽ സ്വർഗ​ത്തിൽ പോകു​ന്നവർ അവിടെ എന്തു ചെയ്യും? അവർ ഒരു സ്വർഗീ​യ​ഗ​വൺമെ​ന്റി​ന്റെ ഭാഗമാ​യി യേശു​വി​ന്റെ​കൂ​ടെ ഭരിക്കു​മെന്നു ബൈബിൾ വിശദീ​ക​രി​ക്കു​ന്നു. ആ ഗവൺമെ​ന്റി​നെ​ക്കു​റിച്ച്‌ അടുത്ത അധ്യാ​യ​ത്തിൽ നമ്മൾ കൂടു​ത​ലാ​യി പഠിക്കും.