E Gwaun̄ai Uria Ni Oe Oki To’odo Sulia Tha God

Fesi oko kwaimani bia tha God, e gwaun̄ai uria ni oe oki to’odo sulia nia. Wane kwaimani oe ki kera thaito’omana thatamu bia keka aruto’ona? Kera aruto’ona. God e thathamia lau bo’o oki thaito’omana bia oki aruto’ona thatana. Thatana tha God na tha Jehovah. (Psalm 83:18; Matthew 6:9) E gwaun̄ai uria oki thaito’omana sita natha God e thathamia bia sita na nia e ai si thathamia. E gwaun̄ai uria oki thaito’omana ni tei kera na wane kwaimani nia bia ma’alimae nia ki. E n̄alia si man̄a uria oki thaito’omana lea ana wane. Baebol e sorea nia e lea uria oki alua si man̄a ura to’ola sulia tha Jehovah.—Ephesians 5:15, 16.

Wane kwaimani tha God ki kera ilia si do tha God e se’ethathala sulia. Manata fesi sulia wane kwaimani oe ki. Masa osi abula lea bi kera bia oko ilia si do na kera lalakwatania, e talana keki kwaimani bi oe? E ai bona’a! Nia e una eri lau bo’o, masa o thathamia kwaimani la bia tha God, e gwaun̄ai uria oki ilia si do na nia e se’ethathala sulia.—John 4:24.

To’odoa oro ki kesi kwaimani bia tha God. Jesus, wane kwaimani lea tha God, e n̄ata sulia ro tala. Te’e tala e rereba maka fun̄u ana imole oro. Tala eri e lae uria susuila. Ruana tala e sisikofi bia an̄e’e imole bo’o na kera lae sulia. Tala eri e lae uria marukia tatha. Nia e fatania masa o thathamia oki kwaimani bia tha God, oki to’o uria fo’a la ne kokoto i na’ofana.—Matthew 7:13, 14.