LESON 12
Ta na kai Adomi Oe Fasia Oko Studyim Baebol Do Anta ka A’i si Kwai’akura Mena?
Tei imole kera fulato’ona e a’i si kwai’akura uria keki studyim Baebol. Sui mena ana, si manga na kera studyim Baebol keka todaa si do le’a. Mada tei si manga, oe oko manta sulia e a’i si kwai’akura uria oki studyim Baebol. Sui uria ta studyim lana Baebol ka gwaunga’i? Ta na kai adomi oe fasia oko studyim Baebol do anta ka a’i si kwai’akura mena?
1. Uria ta studyim lana Baebol ka gwaunga’i?
“Ba’elana God e maruki bia ka to ana sukwa’ia.” (Hebrews 4:12) Baebol e gwaunga’i sula’ania e u’unu sulia mantana God bia to’omatafana la nia fana imole ki. Baebol thaito’omana kai adomi oe fasia oko to ana thaito’omedoa na mamana bia manto’ongadoa. Bia si do na gwaunga’i asia na’a, Baebol thaito’omana kai adomi oe fasia oko kwaimani bia Jehovah. Sula’ania Baebol e to ana sukwa’ia, si manga na o studyim nia thaito’omana kai adomi oe fasia oko to ana marukia na le’a.
2. Uria ta ka gwaunga’i uria kuki riki thaito’omana mamana la na to la Baebol?
Mamana la na to la Baebol e uria te’e si do na liu lana e baita. Adelana Baebol ka fa’arongo kulu si manga na kulu “usia na’a mamana la a’i kusi selem la’u.” (Proverbs 23:23) Si manga na kulu riki thaito’omana mamana la na to la Baebol, si do eri kai adomi kulu fasia kuka studyim Baebol do anta ka a’i si kwai’akura mena.—Te’emania Proverbs 2:4, 5.
3. Jehovah kai adomi ufita bo’o ani oe fasia oko studyim Baebol?
Sula’ania Jehovah nia te’e wane kwaimani le’a, nia ka thathamia kai adomi oe fasia oko to’odo suli nia. Nia kai falea “sukwa’ia bia to’omatafana la ura ilifa’i lana si do.” (Te’emania Philippians 2:13.) Jehovah thaito’omana kai adomi oe fasia oko abula sulia si do na o to’oa. Bia la’u bo’o Jehovah kai falea sukwa’ia famu fasia oko abula bia afeta’ia na o fulato’ona. Adelana si manga ki sui bana oko fo’a, oko gania Jehovah fasia ka adomi oe oko studyim Baebol.—1 Thessalonians 5:17.
TO’OA LA’U TEI SI DO
Kuki to’oa la’u si do na oki ilifania fasia oko studyim Baebol do anta a’i osi to mena ana si manga ura studyim lana, mada oko fulato’ona afeta’ia fasia ta ruana imole. Bia oki to’oa la’u bo’o Jehovah kai adomi ufita ani oe fasia oko studyim Baebol.
4. Alua studyim lana Baebol si do totolo na’o la marukia oe
Tei si manga si do oro ni bana kuki ilifania lalae a’i kusi to na’a an si manga ura studyim lana Baebol. Si ta na kuki ilifania fasia kuka to ana si manga ura studyim lana Baebol? Te’emania Philippians 1:10, sui u’unu kalia soeto’ona la ki:
An mantaa oe, ta bo’o na si do gwaunga’i la marukia kulu?
Fasia studyim lana Baebol ka gwaunga’i ani oe, si ta na oki ilifania?
Masa oko alua one la baketa sui oko alua kau fau, afeta’i ka tala’ana
Masa oko alua fau totolo na’o, sui oko alua kau one nia kai tala’ana. Uria la’u bo’o, masa oko ilifania si do na gwaunga’i totolo na’o, oe oki to ana si manga uria oki ilifania tei si do ki la’u
Studyim lana Baebol kai adomi kulu fasia kuka thaito’omana God bia kuka faarabaita an nia. Te’emania Matthew 5:3, sui u’unu kalia soeto’ona la:
Si manga na kulu alua studyim lana Baebol nia si do totolo na’o la marukia kulu, si ta le’a ni bo’o na kuki todaa?
5. A’i osi manta fedaa si manga na o fulato’ona afeta’ia
Si manga na o studyim Baebol, tei si manga tei imole keki sorea tei si ba’ea na adea oko manta fedaa. Rikia si do na fulato’ona tha Francesco. Fatania VIDEO, sui u’unu kalia soeto’ona la ki.
Uria na kulu rikia la video, si manga na Francesco studyim Baebol si ta na wane kwaimani nia bia family nia kera ilifania?
Sulia Francesco a’i si manta fedaa si ta le’a ni bo’o nia e todaa?
Te’emania 2 Timothy 2:24, 25, sui u’unu kalia soeto’ona la ki:
Ta na to’omatafana la family oe bia imole kwaimani oe ki si manga na o studyim Baebol?
Uria verse eri e u’unu sulia, ta bo’o na oki ilifania si manga na tei imole a’i kesi se’ethathala sulia o studyim Baebol?
6. Mantangado ana Jehovah uria kai adomi oe
Si manga kulu kwaimani bia Jehovah, kulu kuki thathami ilifania si do na nia e se’ethathala sulia. Sui mena ana, tei si manga a’i si kwai’akura uria kuki talaa tei si biiranga na kulu to ania fasia kuka ilifania si do na Jehovah kai se’ethathala sulia. Masa oko fulato’ona si do eri, a’i osi manta fedaa Jehovah kai adomi oe. Fatania VIDEO, sui u’unu kalia soeto’ona la ki.
Uria na kulu rikia la video, ta bo’o na tei si biiranga na Jim e talaa fasia ka ilifania si do na Jehovah e se’ethathala sulia?
Ta bo’o na o to’oa fasia u’unua eri tha Jim?
Te’emania Hebrews 11:6, sui u’unu kalia soeto’ona la ki:
Ta na Jehovah kai ilifania fana imole na kera ili uria keki to’odo suli nia, bia keka ilifania si do na nia e se’ethathala sulia?
To’omatafana la Jehovah e ufita bo’o si manga nia e rikia o falea sukwa’ia oe ura studyim lana Baebol?
TEI IMOLE KEKI SOETO’ONA: “Uria ta oko studyim Baebol?”
Oki lu’u ufita bo’o an nia?
SI DO NA KULU TO’OA
Studyim lana Baebol kai adomi oe fasia oko todaa marukia le’a na toto si sui. Do anta ka a’i si kwai’akura mena, si manga o mantangado ana Jehovah, nia kai adomi oe.
Reviu
Uria ta ka gwaunga’i uria kuki thaito’omana mamana la na to la Baebol?
Si manga na o riki thaito’omana studyim lana Baebol e gwaunga’i ta na oko ilifania?
Uria ta ka le’a oki gania Jehovah fasia ka adomi oe oko studyim Baebol?
TEI SI DO KI LA’U
Te’emai sulia 4-fala si do na adomia sui na’a imole oro fasia keka aruto’ona le’a ana si manga kera.
Rikia si do na Jehovah e ilifania fasia ka adomia te’e kini na ara’i nia a’i si se’ethathala suli nia, si manga na nia e ilifania si do na Jehovah e thathamia.
Rikia si do le’a na te’e wane e fulato’ona si manga na kuke’e nia a’i si manta fedaa ura faarabaita la ana Jehovah.
Tei imole kera sorea Jehovah’s Witness ki kera imole ura fale lana afeta’ia fana family. Sui ufita si do eri e mamana?
“Waswe, Olketa Jehovah’s Witness Divaedem Olketa Famili or Strongim Olketa?” (Article la jw.org)