Oki Fulato’ona Ufita Ana To’odoa Ne Mamana

Masa o thathamia oki wane kwaimani tha God, oki lae sulia to’odoa na tha God e alafafia. Jesus e sorea “to’a na keki fo’a mamana” keki fa’abaita tha God ana “mamanala.” (John 4:23, 24, NW) Te’e si tatha la bo’o ne kokoto uria fa’abaita lana tha God. (Ephesians 4:4-6) To’odoa ne mamana e kwaitalai uria marukia tatha, ma to’odoa ne ai si mamana e kwaitalai uria susuila.—Matthew 7:13, 14.

Oki riki thaito’omana ana to’odoa ne mamana asi man̄a na o bubun̄ia abula lana imole ki na kera lae sulia. Sulia tha Jehovah nia wane lea, imole na kera fo’a mamana i sana kera to’a lea ki lau bo’o. Uria lau bo’o ai na e lea fofoana kai lea lau bo’o, to’odoa ne mamana imole nia ki kera lea lau bo’o.—Matthew 7:15-20.

To’a kwaimani tha Jehovah kera farebaita ana Baebol. Kera thaito’omana Baebol e lae mai fasi tha God. Keka alabatania ta na nia e sorea kai kokotoa to lada, afetai la ki, bia ka adomi kera uria keki to’odo sulia tha God. (2 Timothy 3:16) Keka ili to’ona ili la uria si ta na kera fa’aron̄o ania.

To’a kwaimani tha Jehovah ki kera fatania liothaua uri kera kwailiu. Jesus e fatania liothaua i fana imole ki asi man̄a e to’odo i sada sulia tha God, nia ka fa’asuia mataia fasi imole na kera matai. Imole na kera lae sulia to’odoa ne mamana kera fatania liothaua uri kera kwailiu. Mala tha Jesus, e ai kesi manata faekwa ana to’a na kesi rikido mada ta kule’e to’a e’eta. Jesus e sorea imole ki keki riki thaito’omana disaepol nia ki ura na kera fatania liothaua uri kera kwailiu.—John 13:35.

To’a kwaimani tha God ki kera farebaita ana thatana tha God, Jehovah. Masa ta wane e lalakwa ’ai ana thatamu, nia wane kwaimani oe neri? E ai! Si man̄a na kulu to ana wane kwaimani kuki aruto’ona thatana bia kuka n̄ata sulia si do lea ki sulia wane kwaimani eri i sana tei imole ki. Imole na kera thathamia keki wane kwaimani tha God keki aruto’ona thatana bia keka u’unu sulinia sana tei imole ki. Jehovah e thathamia kuki ilia si do eri.—Matthew 6:9; Romans 10:13, 14.

Mala tha Jesus, wane kwaimani tha God ki kera to’odo i sana imole ki sulia Intoa tha God. Intoa tha God na e ni mai i thalo kai thaun̄ania fanua nei ano ura fanua falu. Imole kwaimani tha God ki kera u’unu bia tei imole ki ana si fa’aron̄oa lea sulia Intoa tha God.—Matthew 24:14.

Witinis tha Jehovah ki kera ili uria kwaimani la bia tha God. Kera farebaita ana Baebol bia keka liothau kwailiu ani kera kwailiu. Kera aruto’ona lau bo’o bia keka farebaita ana thatana tha God bia keka to’odo i sana imole ki sulia Intoa tha God. Witinis tha Jehovah ki kera abula sulia to’odoa ne mamana i fafona fanua nei ano i taraena.