Imole oro kesi fula naʼa ana foʼaa kera ki, sulaʼania e aʼi kesi fulatoʼona luʼu lana soe la gwauṉaʼi ki mado teisi baʼea na kai faʼasukwai kera. Uria taa na ka leʼa uria oki fula ana ofu la kera Jehovah’s Witness Ki? Si taa na oki fulatoʼona i la ofu la eki?

Oki seʼethathala sulaʼania o too i maʼalutana imole ki na kera liothau bia keka thai leʼa sulia imole. I la si maṉa aposol ki, Kristin ki kera ukali kera ura keki too ana figuteʼe Kristin ki. Keka too ana ofu la ki ura faʼabaita la ana tha God, toʼo lana Kekeda La Abu Ki, bia faʼasukwai lada la kwailiu. (Hebrew 10:24, 25) Si maṉa na kera ofu bia bare waidoʼorana ana teʼe faʼamamane la, keka toʼomatafana kera kwairoʼomi bia imole kwaimani leʼa ki na kera too ana liothaua. (2 Thessalonica 1:3; 3 John 14) Mili abula laʼu boʼo sulia ofu la na Kristin eki kera ilia ma mika fulatoʼona laʼu boʼo seʼethathala la.

Oki toʼoa abula la sulia kwaifamanataia ki i la Baebol ne kwaiadomi leʼa. I la ofu la kamiliʼa ki, wane ki, kini ki, bia wela ki, kera sui boʼo keki ofu kwaimani, e ʼuria laʼu boʼo ofu la ki na Baebol e uʼunu sulia. Toʼa na kera farana toʼodo la, kera arutoʼona Baebol ura adomi lamaliʼa la ura thaitoʼomana lana abula la sulia kwaifamanataia ki i la Baebol i la tolamaliʼa. (Deuteronomy 31:12; Nehemiah 8:8) I la ofu la eki, imole ki sui boʼo na kera fula mai, mili too asi maṉa ura uʼunu la sulia fitoʼoa kamiliʼa bia ṉuli lana teifa ṉuu ura taṉo la.—Hebrew 10:23.

Ofu la eki kai faʼasukwaʼia fitoʼoa oe ana tha God. Tha aposol Paul e ṉata una eri ura teʼe figuteʼe Kristin i la si maṉa nia: “Nau ku thathamia asia naʼa uria kwai riki kamaluʼa. . . . Ku thathamia kuki faʼasukwai kulu kwailiu. Fitoʼoa kamaluʼa kai faʼasukwai nau, ma fitoʼoa nau kai faʼasukwai kamaluʼa laʼu boʼo.” (Rome 1:11, 12) Kwairoʼomia bia bare waidoʼorana ana teʼe faʼamamane la, e faʼasukwaʼia fitoʼoa ma manatasukwaʼi la uria abula la sulia kwaifamanataia ki i lana Baebol.

Mili aluṉaʼi oe uria oki lae mai ana ofu la kamiliʼa fasia oko tala fulatoʼona amua leʼa la eki. ʼOsi usi boʼo ura fula la i la ofu la eki.

• Ofu la kamiliʼa ki e bobola ʼufita bia ofu la kera Kristin baaki i la si maṉa kera aposol ki?

• Kwaiadomia leʼa ʼufita na miki todaa asi maṉa na mili fula ana ofu la kamiliʼa ki?

Mili fula ana ofu la kamiliʼa ki asi maṉa ki sui bana, doʼanita dani ka ʼaru baita mena mado mika too daa fasia Kingdom Hall. Uria taa na Jehovah’s Witness Ki keka manatabaita ana kwairoʼomi la bi kera kwailiu, doʼanita keka fulatoʼona afetaʼia ki mado keka feda i buriana raa la sulia fa thato laulaʼu?

E adomi kamiliʼa mika too leʼa bia mika seʼethathala. Tha Paul e ṉata una eri sulia doʼora ki na kuki kwairoʼomi ṉado i la figuteʼe Kristin: “Kuki onotoʼokaluʼa kwailiu.” (Hebrew 10:24) Si baʼea eri e toʼolaṉania, “kuki thaitoʼomakaluʼa leʼa kwailiu.” Adelana boʼo, tha Paul ka faʼasukwai kulu ura onotoʼona lana ruana laʼu imole fasia kuka adomi nia. Si maṉa na kulu thaitoʼomana leʼa ana waidoʼorana ki i la figuteʼe Kristin kulu ki, teisi maṉa kuka riki thaitoʼomana afetaʼia ki na kera fulatoʼona e ʼuria laʼu boʼo afetaʼia kulu ki. Ma si taa na kera ilia na keka sitatha kai adomi kulu laʼu boʼo.

E faʼasukwaia kwaimania kamiliʼa. Bare waidoʼorana na miki fula ṉado i la ofu la kamiliʼa ki, mili thaitoʼmamalia leʼa kwailiu. Mika too laʼu boʼo ana si maṉa ura ofu kwaimani la. Kwaiadomia ʼufita na miki fulatoʼona fasia kwairoʼomi leʼa la eri? E adomi kamiliʼa mika manatabaita ana figuteʼe Kristin na miki ofu ṉado, ne faʼasukwaia liothaua na mili too ania i maʼalutamiliʼa. Adelana boʼo, asi maṉa na doʼoramaliʼa ki keka tatha i la afetaʼia ki, mika aliʼali ura adomilada la, sulaʼania mili kwaimani leʼa sui naʼa. (Proverbs 17:17) Kwairoʼomi leʼa la bia doʼora ki ana figuteʼe Kristin kamiliʼa e fatania mili “onotoʼomaliʼa kwailiu.”—1 Corinth 12:25, 26.

Mili aluṉaʼi oe uria oki kwairoʼomi bia imole ki na kera abula sulia thathami la tha God. Oki fulatoʼona imole eki i maʼalutana Jehovah’s Witness Ki. ʼOsi alabatania tesi do si suʼusi oe fasia kwairoʼomi la bi kamiliʼa.

• Uria taa na Kwairoʼomia i la ofu la kamiliʼa ki ka kwaiadomi leʼa?

• Si maṉa taa no thathami lae mai ana ofu la kamiliʼa fasia oko thaitoʼomamaliʼa leʼa?

I la si maṉa aposol ki, kera ṉulia fa ṉuu ki, keka foʼa, teʼemania ma keka uʼunu kalia Kekeda La Abu Ki i la ofu la kera ki. (1 Corinth 14:26) Oki rikia i la ofu la kamiliʼa ki mena e una eri laʼu boʼo.

Uʼunua kamiliʼa ki e ṉado ana Baebol bia ka kwaiadomi. Ana susui lana uiki, teʼe figuteʼe Kristin keki ofu ura roṉo lana teʼe ṉataa fasia Baebol, na kai lae sulia 30 miniti. Ṉataa eri kai infitaa abula la sulia Baebol i la tolamaliʼa bia si maṉa na kulu too iei i taraʼena. Miki lio sulia i la Baebol kamiliʼa ki asi maṉa ni teʼemaʼi lana skrifsa ki. I la teʼe aoa i buriana ṉataa eri, miki too laʼu boʼo ura toʼo lana Wastaoa. Waidoʼorana eki na kera figu, keki uʼunu ofu kakalia teʼe uʼunua i lana Wastaoa eri. Si abula la eri e adomi kamiliʼa ura lae la sulia kwaifamanataia ki ne lae mai fasia Baebol i la too lamaliʼa. E talua 110,000 figuteʼe Kristin ki i la fanua nei iano rerebaʼa kera toʼoa laʼu boʼo teʼe Wastaoa eri bana.

Mili fulatoʼona kwaiadomia ura miki thaitoʼomana leʼa ana toʼodo la. Teʼesi maṉa i la uiki, mika too laʼu boʼo ana ulu ofu la. Ofu la i totolenaʼo, nia na ṉa toʼo lana uʼunua ki fasia Baebol na kai lae sulia 30-miniti. I la ofu la eri keki soetoʼona soe la ki na miki uʼunu kakalia ne adomi kamiliʼa ura maʼalutai leʼa la ana kwaifamanataia ki bia uʼurodo lana Baebol. I buriana, mika too laʼu ana sukulu ne toʼoa toʼo lana Baebol na kai lae laʼu boʼo sulia ta 30-miniti. Ofu la eri kai thafali ana uʼunu la kakalia tei safta ki i la Baebol na mili teʼemania mai i totolenaʼo. Sui tei imole ki na kera olotoʼoda ura ṉali lana ṉataa i la sukulu eri, keka falea ṉata kukuru ki. Sui wane ne lio sulia sukulu eri ka falea si baʼea ni kwaiadomi la ki na kai adomi kamiliʼa ura teʼemaʼi leʼa la bia toʼodo leʼa la. (1 Timothy 4:13) Ofu la iʼisi nia na ṉa ofu la ne toʼoa ili lana raa tha God . Ofu la eri kai lae laʼu boʼo sulia 30-miniti maka too ana tei ṉataa ki, fataʼi lana toʼodo la, ma soetalafana la ki. Si do eki ne adomi kamiliʼa ura toʼo lana Baebol i sana tei imole ki.

Asi maṉa no fula mai ana ofu la kamiliʼa eki, oki todaa toʼodo la ne leʼa maka ṉado ana Baebol.—Isaiah 54:13.

• Si taa ki boʼo na oki roṉoa i la ofu la kera Jehovah’s Witness Ki?

• Ofu la taa ni boʼo ana ofu la eki no thathami fula mai ania?

Si maṉa na o rikia pikisa eki i la buka naʼi, e ʼufita, o rikia Jehovah’s Witness Ki kera ʼafi leʼa ura i la ofu la kera ki? Uria taa na mika manatabaita ura thaʼosi lamaliʼa la bia ʼafi leʼa la?

E fatania farebaita la i fana God kamiliʼa. E mamana, tha God e lio ura ruruʼido maka aʼi si lio gwauṉaʼi ura bali ana seʼedo. (1 Samuel 16:7) Mena ana, asi maṉa na miki ofu ura faʼabaita la ana tha God, mili thathamia asia naʼa fasia ruruʼumaliʼa ura farebaita la ani nia bia waidoʼorana na mili foʼa ofu. Masa kuki takwe i naʼo fana ta Kiṉi, kulu thathamia ura kuki fatania farebaita la ana bali ana ʼafi la sulaʼania gwauṉaʼia eri ne too ania. ʼUria laʼu boʼo, ʼafi la ura i la ofu la kamiliʼa ki kai fatania farebaita la i fana “Kiṉi eri ne tooladoa,” tha Jehovah God, bia si kula eri na miki foʼa iei.—1 Timothy 1:17.

E fatania mili abula sulia taa na ṉa Baebol e soreʼa. Baebol e faʼaroṉo ana Kristin ki uria keki ʼafisia si maku ne “marabibi bia keki too ana manateʼedo ni seʼenonia.” (1 Timothy 2:9, 10) ʼAfi la ne “marabibi” e toʼolaṉania si maku na kuki ʼafisia e aʼi si fafakaʼo kulu, e adea imole ki kesi manata garo, mado e aʼi si fatania seʼena imole. “Manateʼedo ni seʼenonia” e adomi kulu ura fili lana si maku ne fatania farebaita la ma ka aʼi si faʼaseʼesula. Kwaifamanataia eki e adomi kulu asi maṉa na kuki filia si maku eʼeta kwailiu ki. Asi maṉa na kulu thaʼosi leʼa ani kulu bia kuka ʼafi leʼa, si do eri e adea “imole ki ura keki manatabaita ana toʼodo lana God eri ne faʼamaruki kulu” bia keki ‘fareʼinoto ani nia.’ (Titus 2:10; 1 Peter 2:12) Asi maṉa na mili ʼafi leʼa ura i la ofu la kamiliʼa ki, si do eri e adomia imole ki ura too la ana manateʼedo ne kokoto sulia faʼabaita la ana tha Jehovah.

Osi alabatania maku ni bana ura kai suʼusi oe fasia fula la ana ofu la kamiliʼa ki i la Kingdom Hall. ʼAfisia bamuʼa tesi maku ne talaʼana maka faalu.

• Uria taa na ka gwauṉaʼi ura kuki ʼafi leʼa asi maṉa na kuki faʼabaitaa tha God?

• Kwaifamanataia ʼufita ki boʼo na kai adomi kulu asi maṉa na kuki thaʼosi kulu bia kuki ʼafisia tesi maku?

Masa ta Jehovah’s Witness e toʼodo bi oe i la Baebol, mado oki kwaimaʼakwali mai sui feteʼi moko toʼodo. Masa oko ilia laʼu boʼo si do eri sui feteʼi oko fula ana ofu la eki, nia kai adomi oe ura oki todaa kwaiadomia ne leʼa ka tatha. Asi maṉa na kulu birafafia si abula la eri, kuki fulatoʼona leʼa la.

Olotoʼona si kula bia si maṉa ura stadi la. Si maṉa taa na ʼosi ʼoga ma ka talaʼana leʼa uria oki stadi? ʼUfita, i uʼusuṉedi sui oko lae ana raa, mado i thaʼulefi i buriana wela ki kera biiṉa? Doʼanita o stadi ka aʼi si lae tekwa mena, olotoʼona ta fita si maṉa na kai talaʼana, bia ʼosi alabatania tesi do ura kai faʼaʼogaa si maṉa eri. Lio uria si kula ne enenoa, ma oko fonoa si do ki sui bana na kai faʼaʼoga oe fasia stadi la, mala radio, television, bia mobile. Foʼa la sui oko stadi kai adomi oe fasia manatamu si ʼoga asi maṉa na oki lalome sulia Baʼelana tha God.—Philippi 4:6, 7.

Kwaimaʼakwali asi kula na oki kwaisafui iei i la uʼunua eri. Thafali ana manatakali lana si manataa ne too i la uʼunua laulaʼu eri. Manatakalia gwauṉaʼia baita ana uʼunua eri mado safta eri, bia adeʼufita na gwauṉaʼia faʼekwa eki ka lae totoʼo bia gwauṉaʼia baita eri. Oko manatakalia tei pikisa bia tei soe la ne alu lalaʼa ana si do gwauṉaʼi ki ana uʼunua eri. Sui oko teʼemania paragraf eki, bia oko lio ura luʼu lana soela la ana paragraf eki. Teʼemania skrifsa eki na kera olotoʼona ma oko manatakalia adeʼufita boʼo na skrifsa eki keka faʼaṉadoa uʼunua eri. (Acts 17:11) Asi maṉa no rikia luʼu lana soela eri, oko olotoʼona teisi baʼea i la paragraf eri fasia ka adomi oe ura oki manatoʼona luʼu la eri i la si maṉa ana ofu la. Sui i la ofu la, tafoa abamu masa oki luʼua ta soetoʼona la, sui oko arutoʼona si baʼea oe ki asi maṉa na oki ṉata.

Kwaimaʼakwali la ana uʼunua eʼeta kwailiu ki na keki uʼunu kakalia i la ofu la eki na kai tatha i la uiki kai faʼatagwasua thaitoʼomeʼedoa oe sulia Baebol.—Matthew 13:51, 52.

• Si taa ni boʼo na oki ilia fasia oko birafafia kwaimaʼakwali leʼa la uria ofu la ki?

• Oki kwaimaʼakwali ʼufita fasia oko kwaisafui asi maṉa ana ofu la?

I ta u boʼo mai i naʼo, tha Jehovah e thathamia toaa ki sui boʼo keki too asi maṉa ura keki ofu ura faʼasukwai lana kwaimania kera bi Nia bia ni kera i talaʼada. (Deuteronomy 6:6, 7) Adelana boʼo Jehovah’s Witness Ki keka olotoʼona si maṉa i la uiki ni sui boʼo ura faʼabaita la i la toaa kera ki. Maka mado thaina bia wela ki keki uʼunu ofu fafia teisi do na kera atoʼia ura faʼasukwai lana kwaimania kera bia tha Jehovah. Doʼanita oko too talifili oe, oki arutoʼona leʼa asi maṉa una eri i fana tha God ura toʼo lana ta uʼunua no filia fasia Baebol.

Si maṉa ura faʼasukwai lana kwaimania kera bia tha Jehovah. “Kwaimani leʼa bia tha God, ma ni nia kai kwaimani leʼa bi kamaluʼa.” (James 4:8) Asi maṉa na kulu toʼodo sulia biraṉana tha Jehovah bia abula lana i lana Baebol, kuki thaitoʼomana leʼa ani nia. Teʼesi tatha la ne kwaiakori ura thafali lana faʼabaita la i la toaa, nia na bareʼe wela keki teʼemaʼi ofu ana Baebol, mado keki teʼemaʼi sulia sedolo ana ṉa sukulu ne toʼoa toʼo lana Baebol. Keki ukalia teʼemaʼia eri i maʼalutada, sui keka uʼunu kakalia si do na kera toʼodaki fasia teʼemaʼia eri.

Si maṉa ura faʼasukwai lana kwaimania kera i maʼalutada kwailiu. Roo waikwaina bia maka mado thaina ma wela ki, keki faʼasukwaʼia kwaimania kera i maʼalutada kwailiu asi maṉa na kera toʼo ofu ana Baebol. Fuliṉana sa si maṉa eri, ni kera sui boʼo keki seʼethathala ura lio la maʼasia. Maka mado thaina na kai filia uʼunua taa ne talaʼana wela ki fasia ta Wastaoa bia tei buka ki laʼu ne talaʼada mado fasia Web site eri, jw.org. Muki uʼunu kakalia tesi afetaʼia na wela ki kera fulatoʼona i la sukulu bia ta abula la ʼufita na keki abula ania. Mado muki ṉulia teifa ṉuu na kera olotoʼona uria i la ofu la ki. Masa ka talaʼana, i buriana faʼabaita la kamaluʼa i la toaa, muka arutoʼona ta kasi rereʼe.

Si maṉa eri na mulu arutoʼona ura faʼabaita ofu la ana tha Jehovah i la uiki ni sui bana kai adomi kamaluʼa teʼefau ura muki seʼethathala ura toʼo lana Baebol ma muki todaa mamanaa fasia tha God.—Psalm 1:1-3.

• Uria taa na kuki olotoʼona si maṉa ura faʼabaita la i la toaa?

• Si taa ni boʼo na maka mado thaina ana toaa kai ilia fasia ni kera sui boʼo keki seʼethathala i la si maṉa eri?

Uria taa na imole eki keka seʼethathala? Kera fula i la teʼe ofu la ana ofu la baita kamiliʼa ki. I naʼo mai, tha Jehovah e faʼaroṉo ana imole nia ki, ulu si maṉa i la teʼefa ṉali keki fula ana ofu la baita ki. Kamiliʼa mena mili lio maʼakwali ura miki fulatoʼomaliʼa i la ofu la baita una eki. (Deuteronomy 16:16) Fa ṉali ki sui bana mili too ana ulu ofu la baita. Roo ofu la, ofu la baita ni teʼefa thato, ma uula ofu la, ofu la baita ni ulu fa thato. Kwaiadomia ʼufita ni boʼo na miki fulatoʼona fasia ofu la eki?

Ofu la eki e faʼasukwaʼia liothaua i maʼalutana waidoʼorana na mili too ana teʼe fitoʼoa. I naʼo mai, kuleʼe wane baaki i Israel kera seʼethathala ura taṉo lana tha Jehovah “i la ofu la baita ki.” Kamiliʼa mili seʼethathala laʼu boʼo asi maṉa na mili ofu ana ofu la una eki ura faʼabaita lana tha Jehovah. (Psalm 26:12, footnote; 111:1) Ofu la eki e falea si tatha la ura miki kwairoʼomi bia Witness ki fasia kokomua eʼeta ki bia figuteʼe Kristin eʼeta kwailiu ki. Mika too asi maṉa ura kwairoʼomi la bia waidoʼorana eki sui bana asi maṉa ana faṉa la, i initoʼona fa thato. (Acts 2:42) I la ofu la baita eki mika tala rikia i talaʼamiliʼa liothaua ne ofua “bare waidoʼorana eki sui boʼo” i la fanua nei iano.—1 Peter 2:17.

Ofu la eki e faʼatagwasua kwaimania kamiliʼa bia tha God. Kuleʼe wane baaki i Israel kera fulatoʼona laʼu boʼo kwaiadomia asi maṉa na kera “maʼalutaʼi leʼa ana si baʼea ki” i la Kekeda La Abu Ki na kera infitaa i sada. (Nehemiah 8:8, 12) Kamiliʼa mena mika manatabaita ana kwaifamanataia ki fasia Baebol na mili roṉoa i la ofu la baita kamiliʼa ki. Ofu la baita eki sui boʼo e too ana gwauṉaʼia eʼeta kwailiu ki ne lae mai fasia ta skrifsa i lana Baebol. Mili fulatoʼona kwaiadomia ura ili lana thathami la tha God fasia ṉataa ki bia ilifeʼi lana sitatha la ana teisi afetaʼia ki na kai tataʼe mai i la marukia kulu. Roṉo lana uʼunua tei doʼora ki sulia si do na kera ilia ura faʼabaita la ana tha God doʼanita keka fulatoʼona afetaʼia e faʼasukwai kamiliʼa ura takwe ṉado la. I la ofu la baita ni ulu fa thato, miki fulatoʼona kwaiadomia leʼa ki fasia Baebol drama na keki ilifenia. I la ulu ofu la baita eki sui boʼo, imole ki na kera thauṉaʼi mantaa sui naʼa ura fale lana marukia kera teʼefau i fana tha God keki babataesi.

• Uria taa na ofu la baita eki ka faʼasethathala?

• Si do leʼa ʼufita na oki todaa masa oko fula ana ta ofu la ana ofu la baita eki?

Si maṉa na e kwaikarafi naʼa ura tha Jesus kai mae, nia ka soreʼa: “Toʼa na kera lae i burieku keki ṉata sulia si faʼaroṉoa leʼa sulia Inotoa i la fanua nei iano laulaʼu fasia imole ki ana fanua ni sui keka roṉoa si faʼaroṉoa leʼa eri, sui feteʼi susui la ka biʼi fula.” (Matthew 24:14) E adeʼufita fasia raa eri ura ṉata la sulia si faʼaroṉoa leʼa ka fula i la fanua nei iano laulaʼu? Keki lae sulia abula la natha Jesus e fatania asi maṉa ne too i fanua nei iano.—Luke 8:1.

Mili ili bonaʼa uria miki uʼunu bia imole ki i maʼafera kera ki. Tha Jesus e toʼoa i sana toʼa nia ki na kera lae i buriana uria keki ṉata sulia si faʼaroṉoa leʼa i maʼafera ki sui bana. (Matthew 10:11-13; Acts 5:42; 20:20) Toʼa eki na kera ṉata sulia si faʼaroṉoa leʼa i la si maṉa kera aposol ki kera ilia si raa eri i la fanua ki na kera ʼolotoʼona ura keki raa iei. (Matthew 10:5, 6) I taraʼena kera ʼolosi leʼa laʼu boʼo asi raa eri ura ṉata la sulia si faʼaroṉoa leʼa, bia keka ʼolotoʼona tafoloa ki na figuteʼe Kristin ki keki raa iei. Si abula la eri e adomi kamiliʼa mika fulatoʼona imole oro eʼeta ki asi maṉa na mili raa taliṉaʼi ura faʼamamane lana si baʼea gwauṉaʼi natha Jesus e soreʼa ura “ṉata la sulia si faʼaroṉoa leʼa i sana imole ki.”—Acts 10:42.

Mili ili bonaʼa uria miki fulatoʼona imole ki sui bana i fei bana na kera too iei. Tha Jesus e fatania si tatha la uria uʼunu la bia imole ki asi kula eʼeta kwailiu ki, mala i sula amali, mado i maana malauʼi kafo na maʼe toaa ki keki arutoʼona. (Mark 4:1; John 4:5-15) Mili uʼunu laʼu boʼo bia imole ki sulia Baebol i fei bana na mili toda kera iei. I sula tale, kula ni raa malefo la, maana uafa, maana usia, mado i la telefon. Mika uʼunu laʼu boʼo bia imole ki na mili too kwaikaraṉi, raa ofu, sukulu bi kera, bia inalamaliʼa ki asi maṉa ne talaʼana. Si abula la eki ne adomia moleʼe imole ki i la fanua nei iano rerebaʼa ura keki roṉoa ‘si faʼaroṉoa leʼa na kai falea marukia.’—Psalm 96:2.

ʼOsi onotoʼona boʼo tei imole no thathamia oki uʼunu sulia si faʼaroṉoa leʼa sulia Inotoa tha God i sada? Si taa leʼa ni boʼo na toto keki fulatoʼona i nunufana Inotoa eri? ʼOsi raʼu fafia si faʼaroṉoa leʼa eri ne falea manatatoʼoṉadoa ma e leʼa uria oki uʼunutania i sada.

• Si faʼaroṉoa leʼa ʼufita ni boʼo na kuki uʼunu tatalo sulia?

• Jehovah’s Witness Ki kera lae ʼufita boʼo sulia tha Jesus ura ṉata la sulia si faʼaroṉoa leʼa?

Si baʼea eri ṉa “pioneer” e takwe uria ta imole ne fula i totolenaʼo i la ta fanua maka kwaʼia tala uria imole ki keki lae sulia. Tha Jesus e ʼuria ta pioneer sulaʼania tha God e arasi nia mai i fanua nei iano ura raa la ura adomi lana imole ki ma ka kwaʼia tala ura fulatoʼona lana marukia. (Matthew 20:28) I taraʼena mena, imole ki na kera lae i buriana kera falea si maṉa ura toʼo lana Baebol i sana imole ki. (Matthew 28:19, 20) Tei imole ki iada keka ilia si raa eri na mili alaṉia ana pioneer la.

Ṉa pioneer e falea si maṉa oro ura ṉata la sulia si faʼaroṉoa leʼa. Jehovah’s Witness Ki sui boʼo kera uʼunutania si faʼaroṉoa leʼa. Ka una eri mena, tei imole ki iada kera ʼolosia too la kera ki, fasia keki arutoʼona 70 aoa i la teʼefa madami ura ṉata la sulia si faʼaroṉoa leʼa. Mika alaṉi kera ana regular pioneer ki. Tei imole ki kera akwasia raa kera ki ura malefo ma keka ilia bada si raa na kai falea si maṉa ura ili lana si raa eri. Tei imole ki laʼu keka filida ura raa la teisi kula na kwaiatoʼia ura ṉata la sulia Inotoa tha God e tataʼe mai iei. I la teʼefa madami keki arutoʼona 130 aoa mado ka talua. Mika alaṉi kera ana spesol pioneer ki. Pioneer eki kera kelowaneʼa bada, ma keka manataṉado ana tha Jehovah na kai falea si taa na kera atoʼia i la too la kera. (Matthew 6:31-33; 1 Timothy 6:6-8) Tei imole ki laʼu kera arutoʼona 30 mado 50 aoa i la teifa madami ki na kera manatatoʼona keki duʼaa laʼu si maṉa kera i la raa eri ura ṉata la sulia si faʼaroṉoa leʼa. Mika alaṉi kera ana auxiliary pioneer ki.

Liothau la ana tha God bia imole ki ne faʼasukwaia pioneer ki. Malaʼana tha Jesus, mili riki thaitoʼomana imole oro i taraʼena kera atoʼia asia naʼa ura keki thaitoʼomana tha God bia mantaa nia ki. (Mark 6:34) Kamiliʼa mili too ana si thaitoʼomana la ki na kai adomi kera i taraʼena ura fale lana manatatoʼoṉadoa i fada ura si maṉa ne ni u mai. Liothaua na ṉa pioneer ki kera too ania i fana imole ki e faʼasukwai kera ma keka seʼethathala ura fale lana si maṉa ura adomi lana tei imole ki laʼu ura roṉo lana si faʼaroṉoa leʼa sulia tha God. (Matthew 22:39; 1 Thessalonica 2:8) I nunufana si abula la eri, fitoʼoa kera ka sukwai, keka kwaimani leʼa bia tha God, ma keka seʼethathala faʼamaʼu.—Acts 20:35.

• Oki toʼoloṉaʼi ʼufita boʼo ana ṉa pioneer?

• Si taa ni boʼo ne faʼasukwaia tei imole ki uria fale lana si maṉa kera ura pioneer la?

Ita u na mai, sukulu ki ne lae mai fasia tha Jehovah e adea Jehovah Witness Ki keka talimate asia naʼa. Imole ki na kera falea si maṉa oro ura ili lana raa ura ṉata la sulia Inotoa, keki fulatoʼona sukulu ki na kai adomi kera ura ‘ili leʼa la ana raa eri.’—2 Timothy 4:5.

Pioneer Sukulu. I buriana ṉa regular pioneer e faʼadaṉaa fa ṉali totolenaʼo ne ilia raa ura pioneer la, nia kai lae i la teʼe sukulu ni ono fa thato na mado kai tatha i la ta Kingdom Hall ne too kwaikaraṉi. Sukulu eri kai adomia pioneer eri ura kwaimani leʼa la bia tha Jehovah, ili leʼa la ana raa ki sui boʼo ura ṉata la sulia si faʼaroṉoa leʼa, bia ka faʼasukwai nia ura mamana la fafia raa eri.

Sukulu i fana toʼa ni ṉata la sulia Inotoa. Sukulu eri na kai lae sulia roofa madami kera olotoʼona ura fale lana kwaiadomia i fana pioneer ki na kera ilia raa eri ka tau na mai, na kera kwaialami ura akwasi lana fanu kera ura pioneer la tesi kula bana ne atoʼia pioneer eki. Keka soreʼa laʼu boʼo: “Ni nau neʼe! Fale nau!” Kera lae sulia tha Jesus Christ, ne talua bonaʼa wane ki sui bana na kera ṉata sulia Inotoa i fanua nei iano. (Isaiah 6:8; John 7:29) Mado keki thauṉania teisi tatala la i la tei fanua daa ki na keki lae uria sulaʼania bali ana too la e eʼeta bonaʼa. Mado fanu eki ka aʼako mado ka gwagwarila, ma bibiraṉa bia faṉa kera ki mena mado ka eʼeta bonaʼa, mado ṉata la eʼeta ni mena keki toʼoa laʼu boʼo. Doʼora ki ma waiwaena ki na kera tofeʼe too bia roo waikwaina ki na fa ṉali kera ki e ita ana 23 lae ka fula ana 65 na keki lae i la sukulu eri. Sukulu eri e adomi kera ura faʼatagwasu lana biraṉaa ki na Kristin kai too ania na kera atoʼia asi maṉa na keki ilia raa eri. Thaitoʼomeʼedoa na kera todaa e adomi kera ura ili lana teisi raa ki laʼu i fana tha Jehovah bia organization nia.

Gilead Baebol Sukulu. Si baʼea eri “Gilead,” ana ṉata la i Hebrew, e toʼolaṉania “Faʼamamane Lana Si Do.” ʼIta mai asi maṉa na sukulu eri e thafali ana 1943, e talua 8,000 missionary na kera fulatoʼona sui naʼa sukulu eri. Ni kera keka lae ura faʼamamane lana Inotoa tha God “i la si kula ki sui bana i la fanua nei iano,” ma keka sitatha ana ili lana si raa eri. (Acts 13:47) Si maṉa na tei missionary kera fula i Peru, misi too u boʼo ana ta figuteʼe Kristin i la fanu eri. I taraʼena e talua 1,000 figuteʼe Kristin ki na kera too i la fanu eri. Asi maṉa na missionary kamiliʼa ki kera thafali fula i Japan, Witness ki na kera too e aʼi si fula fafia akwaleʼe wane. I taraʼena, e talua 200,000 Witness ki na kera too iei. I la sukulu eri na kai lae sulia lima fa madami, keki toʼodo taliṉaʼi sulia Baʼelana tha God. Spesol pioneer ki, missionary ki, bethelite ki, bia circuit overseer ki na kera farana, na keki lae i la sukulu eri. Keki lae ura toʼodo taliṉaʼi la fasia keka kwaiadomi ura faʼasukwai lana raa kamiliʼa ki i la fanua nei iano rerebaʼa.

• Pioneer Sukulu kai adomi ʼufita ana pioneer ki?

• Ni tei kera na kera farana lae la ura i la sukulu i fana toʼa ni ṉata la sulia Inotoa?