Гэрлэх ёслолыг Бурхан болон хүмүүсийн өмнө ёс төртэй үйлдэгтүн
«Кана хотод нэгэн хурим болоход... Есүс болон шавь нар нь бас хуримд уригдсан байлаа» (ИОХАН 2:1, 2).
1. Иохан 2:1–11-ийг үзвэл Бурхны үйлчлэгчид ямар ёслол үйлддэг вэ?
ГЭРЛЭХ ЁСЛОЛЫГ ёс төртэй үйлдэх нь Бурхны үйлчлэгчдэд хэчнээн их баяр хөөр авчирдгийг Есүс болон түүний эх, бас зарим шавь нь нүдээрээ үзжээ. Нэгэн хурим дээр Есүс Библид бичигдсэн анхны гайхамшгаа үйлдэж, хурсан олны сэтгэлийг баясгажээ (Иохан 2:1–11). Гал голомтоо асааж, Еховад хамтдаа баяр хөөртэй үйлчлэхийг хүсдэг христиануудын хуримд та лав очиж байсан байх. Эсвэл та өөрөө ч гэрлэх гэж байгаа юм уу гэрлэхээр зэхэж буй найздаа туслах гэж байж болох юм. Гэрлэх ёслолыг ёс төртэй үйлдэхийн тулд яах хэрэгтэй вэ?
2. Гэрлэх ёслолын талаар Библиэс юу мэдэж болох вэ?
2 Бурхны онгод оруулан бичүүлсэн Үг гэрлэх гэж байгаа хүмүүст үнэхээр ашигтай зөвлөгөө өгдгийг христианууд мэддэг (2 Тимот 3:16, 17). Гэхдээ гэрлэх ёслол үйлдэх нарийвчилсан заавар Библид байдаггүй. Энэ нь ч ойлгомжтой. Учир нь, газар газрын ёс заншил, хуулийн заалтууд харилцан адилгүй байдаг бөгөөд цаг үеэ даган өөрчлөгддөг. Жишээ нь, эртний Израильд хуримын өдөр болоход сүйт залуу сүйт бүсгүйгээ олны өмнө гэртээ юм уу эцгийнхээ гэрт авчирдаг байжээ (Эхлэл 24:67; Исаиа 61:10). Ийнхүү албан ёсоор гэр бүл болдог байсан бөгөөд өнөөдөр олон улс оронд түгээмэл болсон ёслол үйлддэггүй байв.
3. Есүс Кана хотод болсон ямар үйл явдалд оролцсон бэ?
3 Сүйт бүсгүйг олны өмнө гэртээ авчрах нь израильчуудын хувьд хууль ёсоор гэрлэсэн хэрэг байжээ. Гэрлэх ёслол үйлдсэнийхээ дараа, Иохан 2:1-д бичсэн шиг, хурим найр хийдэг байсан бололтой (Матай 22:2–10; 25:10; Лук 14:8). Есүс тэр хуримд очсон бөгөөд хуримыг олны сэтгэлд нийцтэй сайхан болгоход хувь нэмэр оруулсныг Библид бичсэн байдаг. Гэхдээ одоо ихэнх оронд гэрлэх ёслол тэр үеийнхээс өөр болжээ.
4. Зарим христиан гэрлэлтээ хэрхэн бүртгүүлж, хуримаа яаж хийдэг вэ?
4 Өнөөдөр олон оронд хүмүүс гэр бүл болохоосоо өмнө хуульд заасан тодорхой шаардлага хангах ёстой байдаг. Шаардлага хангасан нөхцөлд албан ёсоор гэрлэх эрх эдэлдэг. Тухайлбал, засаг захиргааны байгууллагын эрх бүхий шүүгч, түшмэлээр гэрлэлтээ батлуулж, багахан хэмжээний энгийн ёслол үйлддэг. Түүнчлэн, зарим оронд Еховагийн Гэрчүүдийн байгууллага гишүүдийнхээ гэрлэлтийг батлах эрх эдэлдэг. Зарим христиан энэ журмаар гэрлэлтээ бүртгүүлэхдээ хамаатан садан, дотнын найз нөхдөөсөө цөөн тооны хүнийг гэрчээр байлцуулж, амьдралынхаа баярт мөчийг хуваалцдаг (Иеремиа 33:11; Иохан 3:29). Бас зарим нь хурим найраа зардал ихтэй, сүржин явдал болголгүй, дотнын хүмүүсийнхээ хамтаар цомхон хийдэг. Ер нь, иймэрхүү асуудлыг хэрхэн шийдэх нь хувийн хэрэг боловч бусад христианууд өөр санал бодолтой байж болохыг хүлээн зөвшөөрөх хэрэгтэй (Ром 14:3, 4).
5. Олон христиан гэрлэхдээ яагаад илтгэл сонсохыг хүсдэг вэ? Илтгэлийн үндэс, зорилго юу вэ? (Зүүлтийг үзнэ үү).
5 Ихэнх христиан гэрлэхдээ Библид үндэслэсэн илтгэл сонсохыг хүсдэг.a Тэд Еховаг гэр бүлийг Санаачлагч хэмээн үзэж, Үгээрээ өгдөг зөвлөгөө нь айл гэрийг жаргалтай байлгахад ач холбогдолтой гэж итгэдэг (Эхлэл 2:22–24; Марк 10:6–9; Ефес 5:22–33). Бас энэ чухал үйл явдалд хамаатан садан, найз нөхдөө урьдаг. Гэрлэх ёслолыг ёс төртэй үйлдэхийн тулд хуулийн ямар ямар шаардлага хангаж, нутгийн ёс заншилд хэрхэн хандах хэрэгтэйг энэ өгүүллээр ярилцъя. Энд дурдах нөхцлүүд танай улсын хууль, ёс заншлаас эрс өөр байж болох юм. Гэхдээ өгүүллийг судлах явцдаа Бурхны бүх үйлчлэгчийн баримталбал зохих Библийн үндсэн зарчмуудыг олж харахыг хичээгээрэй.
Ёс төртэй гэрлэх ба хуулийн шаардлага хангах
6, 7. Гэр бүл болохын тулд хуулийн шаардлагыг яагаад биелүүлэх хэрэгтэй вэ? Хэрхэн биелүүлэх вэ?
6 Гэр бүлийг Санаачлагч нь Ехова мөн боловч төр засаг гэрлэж буй хүмүүст зохих шаардлага тавих эрхтэй. Есүс: «Цезарийн юмыг Цезарьт өг. Бурхны юмыг Бурханд өг» хэмээсэн байдаг тул төр засгийн шаардлагыг биелүүлэх нь зүйтэй (Марк 12:17). Элч Паул ч мөн адил: «Дээд эрх мэдлүүдэд хүн бүхэн захирагд. Учир нь Бурхнаар тогтоогдсоноос өөр эрх мэдэл гэж байхгүй. Оршин байгаа нь Бурхнаар тогтоогдсон юм» гэж бичжээ (Ром 13:1; Тит 3:1).
7 Ихэнх оронд «Цезарь» буюу төр засгийн эрх мэдэлтнүүд ямар хүмүүс гэрлэх эрхтэйг хуулиар тодорхойлдог. Тийм учраас, Библийн зарчмаар гэрлэх эрх бүхий христиан хүн улсынхаа хуульд захирагдах ёстой. Тухайлбал, засаг захиргааны байгууллагын эрх бүхий түшмэлээр гэрлэлтээ батлуулах, гэрчилгээ авах, бүртгүүлэх гэх зэргийн шаардлагыг биелүүлэх учиртай. Жишээ нь, МЭ І зуунд Ромын эзэн хаан Цезарь Август хүн амын тооллого явуулах тухай зарлиг гаргахад Мариа Иосеф хоёр «бүртгүүлэхээр» Бетлехем рүү явдаг (Лук 2:1–5).
8. Ехова ямар гэрлэлтийг хүчин төгөлдөр гэж үздэг вэ? Христианууд Еховагийн үзэл бодлыг ойлгодог учир юунаас зайлсхийдэг вэ?
8 Христианууд хуулийн шаардлагыг биелүүлэн, улсдаа хүлээн зөвшөөрөгддөг ёсоор гэрлэхэд Ехова Бурхан гэрлэлтийг нь хүчин төгөлдөр гэж үздэг. Тиймээс, Еховагийн Гэрчүүд гэрлэх ёслолыг давтан үйлддэггүй бөгөөд гэр бүл болсны 25, 50 жилийн ойгоор гэрлэлтийн тангараг дахин өргөдөггүй (Матай 5:37). Зарим оронд шашны байгууллага засаг захиргааны байгууллагаар батлуулсан гэрлэлтийг хүчинтэйд тооцдоггүй бөгөөд өөрийнх нь байгууллагын төлөөлөгч гэр бүл бологчдыг нөхөр эхнэр болгон зарлах буюу адисласан нөхцөлд л гэрлэлт хүчин төгөлдөр болдог гэж үздэг. Олон оронд Еховагийн Гэрчүүдийн байгууллага гишүүдийнхээ гэрлэлтийг батлах хууль ёсны эрх эдэлдэг. Тийм оронд Гэрчүүд голдуу Хаанчлалын танхимд гэрлэх ёслол үйлдэж, Библид үндэслэсэн илтгэл сонсдог. Хаанчлалын танхим нь гэр бүлийг Санаачлагч Ехова Бурхныг шүтэх зорилгоор цугладаг газар тул гэрлэх ёслолд зориулсан илтгэл тавихад тохирсон газар юм.
9. а) Гэрлэлтээ бүртгүүлснийхээ дараа олон христиан Хаанчлалын танхимд ямар арга хэмжээ авдаг вэ? б) Ахлагчид ямар үүрэгтэй вэ?
9 Зарим оронд гэрлэх ёслолын ордон гэх мэт төрийн харьяа албан газар гэрлэлтээ бүртгүүлэхийг хуульд заасан байдаг. Христианууд тэр шаардлагыг биелүүлж, гэрлэлтээ бүртгүүлээд, тэр өдөртөө юм уу маргааш нь Хаанчлалын танхимд илтгэл сонсдог. Илтгэлийг гэрлэлтээ бүртгүүлснээс хойш олон өдрөөр хойшлуулахгүй байх нь зүйтэй. Учир нь Ехова болон хүмүүс, тэр дундаа итгэл нэгтнүүд нь, тэднийг нэгэнт гэр бүл болсон гэж тооцно. Гэрлэх хос Хаанчлалын танхимд илтгэл сонсохыг хүсэж байгаа бол хурлынхаа үйлчлэлийн хорооны ахлагчдаас урьдчилж зөвшөөрөл авах хэрэгтэй. Танхимд илтгэл сонсохын тулд итгэл нэгтнүүдийнхээ дунд нэр хүндтэй байхын зэрэгцээ тухайн танхимд явуулдаг алив арга хэмжээнд саад учруулах ёсгүй (1 Коринт 14:33, 40). Бас ахлагчид Хаанчлалын танхимыг хэрхэн бэлдэхийг хосоос лавлаж, илтгэл тавих тухай зарлах эсэхийг шийднэ.
10. Гэрлэж буй хос Хаанчлалын танхимд очихоосоо өмнө гэрлэлтээ бүртгүүлсэн бол илтгэгч юуг онцлон тэмдэглэх вэ? Тангараг өргөх бол яах нь зүйтэй вэ?
10 Илтгэл тавих ахлагч сонсогчдодоо хүндэтгэлтэй хандан, чин сэтгэлээсээ ярьж, сүнслэг ач холбогдолтой үг хэлэх хэрэгтэй. Хэрэв гэрлэж буй хос илтгэл сонсохоосоо өмнө гэрлэлтээ бүртгүүлсэн бол илтгэгч тэднийг «Цезарийн» хуулийн дагуу хэдийн гэр бүл болсныг тодорхой хэлнэ. Гэрлэж буй хос гэрлэх ёслолын ордонд бие биедээ тангараг өргөөгүй бол Хаанчлалын танхимд тангараг өргөж болох юм.b Гэхдээ гэрлэлтээ бүртгүүлэхдээ тангараг өргөсөн ч гэлээ Ехова Бурхан болон итгэл нэгтнүүдийнхээ өмнө дахин тангараг өргөхийг хүсвэл Бурхан тэднийг аль хэдийн «хамтад нь нийлүүлснийг» харуулахын тулд тангаргийг бага зэрэг өөрчлөн, «...тангараглаж байна» гэдгийн оронд «...тангарагласнаа мэдэгдэж байна» гэж хэлэх нь зүйтэй (Матай 19:6; 22:21).
11. Зарим оронд гэрлэлтийг хэрхэн бүртгэдэг вэ? Илтгэл тавих ах юу анхаарах хэрэгтэй вэ? Тангараг өргөх бол яах вэ?
11 Зарим оронд гэрлэлтээ бүртгүүлэхийн тулд ямар нэг ёслол үйлдэх шаардлагагүй боловч гэрлэх хос гэр бүл болох хүсэлтээ илэрхийлэн өргөдөл бичиж, гарын үсэг зураад, эрх бүхий түшмэлд өгөх шаардлагатай байдаг бөгөөд өргөдөлд үндэслэн гэрлэлтийг нь бүртгэдэг. Ийнхүү уг хос хууль ёсоор нөхөр эхнэр болж, тэр өдөр нь гэрлэсэн өдөр нь болдог байна. Дээр тэмдэглэснээр, ингэж гэрлэлтээ бүртгүүлсэн хос тэр даруйдаа Хаанчлалын танхимд илтгэл сонсож болдог. Илтгэл тавих ах тэднийг гэрлэлтээ бүртгүүлж, хууль ёсны нөхөр эхнэр болсон гэдгийг сонсогчдод мэдэгдэнэ. Гэрлэж буй хос тангараг өргөхийг хүсвэл 10-р догол мөр болон зүүлтэд бичсэн зааврыг мөрдөнө. Танхимд ирсэн бүх хүн шинэ гэр бүлийн хамт баярлахын зэрэгцээ Библийн зөвлөгөөнд үндэслэсэн, ач холбогдолтой илтгэл сонсдог (Соломоны дуун 3:11).
Уламжлалт ёсоор гэрлэх ба албан ёсоор бүртгүүлж гэрлэх
12. Уламжлалт гэрлэлт гэж юу вэ? Уламжлалт ёсоор гэрлэсэн хүмүүст яах нь зүйтэй вэ?
12 Зарим оронд хүмүүс одоо ч уламжлалт ёсоор гэрлэдэг. Уламжлалт гэрлэлт гэдэг нь зүгээр хамтран амьдрах юм уу хууль ёсоор гэрлээгүй атлаа өөрсдийгөө нөхөр эхнэр гэж үзэхийг хэлж байгаа хэрэг биш ээ.c Харин энэ нь тухайн нутаг орон, овог аймгийн ёс заншлаар албан ёсны гэж тооцогддог гэрлэлт юм. Жишээ нь, сүйт залуугийн талаас инжийг бүрэн төлж, сүйт бүсгүйн тал үүнийг хүлээн авахад тэдний гэрлэлт хуулийн болон Библийн дагуу хүчинтэй болдог. Засаг захиргааны байгууллага ч уламжлалт гэрлэлтийг хүлээн зөвшөөрч, албан ёсны, хүчин төгөлдөр гэж тооцдог. Тиймээс, уламжлалт ёсоор гэр бүл болсон хүмүүс дараа нь гэрлэлтээ бүртгүүлэх буюу батлуулж, гэрчилгээ авч болдог байна. Гэрлэлтээ бүртгүүлэх нь тухайн гэр бүлийн хуульд заасан эрхээ эдлэхэд, мөн эхнэр нь бэлэвсэрсэн нөхцөлд болон ирээдүйд хүүхдүүдийнх нь эрх ашгийг хамгаалахад ач холбогдолтой байдаг. Хурлын ахлагчид уламжлалт ёсоор гэрлэсэн хүмүүст гэрлэлтээ аль болох хурдан албан ёсоор бүртгүүлэхийг уриалдаг. Мосегийн хуулийн дагуу, израильчууд ч гэсэн гэрлэсэн хүмүүс болон шинэ төрсөн хүүхдийг угийн бичигтээ бичдэг байжээ (Матай 1:1–16).
13. Христиан хос уламжлалт ёсоор гэрлэж байгаа нөхцөлд илтгэгч юуг онцлон тэмдэглэх хэрэгтэй вэ?
13 Уламжлалт ёсоор гэрлэсэн христианууд хууль ёсны нөхөр эхнэр болдог. Дээр бичсэнээр, өөрсдөө хүсвэл Хаанчлалын танхимд илтгэл сонсож, гэрлэлтийн тангараг өргөж болно. Илтгэгч тэднийг «Цезарийн» хуулиар хэдийн гэр бүл болсныг онцлон тэмдэглэнэ. Уламжлалт гэрлэлт ч гэсэн албан ёсны гэрлэлт мөн тул Ехова Бурхан хүчин төгөлдөрт тооцдог. Тиймээс гэрлэх ёслолд зориулсан илтгэлийг ганц удаа тавина. Болж өгвөл, нэг өдөр гэрлэх ёслолоо үйлдэж, илтгэл сонсох нь зүйтэй. Ингэвэл гэрлэлт Бурхан болон хүмүүсийн өмнө ёс төртэй байх болно.
14. Уламжлалт ёсоор гэрлэх болон албан ёсоор бүртгүүлж гэрлэх боломжтой нөхцөлд христиан хос ямар шийдвэр гаргаж болох вэ?
14 Уламжлалт гэрлэлтийг хууль ёсны гэж үздэг зарим оронд албан ёсоор бүртгүүлж гэрлэхийг ч бас хүчинтэйд тооцдог. Албан ёсоор бүртгүүлэхдээ эрх бүхий түшмэлээр гэрлэлтээ батлуулж, тангараг өргөж, гарын үсэг зурах ёслол үйлддэг байна. Зарим христиан уламжлалт ёсоор бус, албан ёсоор бүртгүүлж гэрлэхийг илүүд үздэг. Гэхдээ аль аль нь хуулиар хүчинтэй тул алийг нь ч сонгож болно. Илтгэл сонсох болон тангараг өргөх эсэхээ шийдэхдээ 9, 10-р догол мөрд бичсэн зарчмыг баримтлах нь зүйтэй. Хамгийн гол нь, гэрлэх ёслолоо Бурхан болон хүмүүсийн өмнө ёс төртэй үйлдэх нь чухал (Лук 20:25; 1 Петр 2:13, 14).
Гэрлэлтийг хүндэтгэх нь
15, 16. Гэрлэлтийг хүндэтгээ яаж харуулах вэ?
15 Персийн хааны хатныг зохисгүй авирлахад шадар түшмэл Мемукан хаанд нэг зөвлөгөө өгсөнд хаан «бүх эмэгтэй нөхрүүдээ... хүндлэх» ёстой хэмээсэн зарлиг гаргадаг (Естер 1:20). Христиан гэр бүлд ийм зарлиг тушаал хэрэггүй байдаг. Учир нь, христиан эхнэрүүд нөхрөө чин сэтгэлээсээ хүндэтгэдэг. Христиан нөхрүүд ч мөн адил эхнэрээ хүндэтгэж, магтан сайшаадаг (Сургаалт үгс 31:11, 30; 1 Петр 3:7). Гэрлэлтийг хүндэтгэх нь гэрлэсэн өдрөөсөө л, хойшлуулалгүй хийх алхам юм.
16 Гэрлэх ёслол үйлдэж, хурим хийх өдөр нөхөр эхнэр хоёроос гадна илтгэл тавих христиан ахлагч ч бас гэрлэлтийг хүндэтгээ харуулах учиртай. Илтгэл тавихдаа, гол нь, гэрлэж буй хосод хандах бөгөөд тэднийг хүндэтгэн, олны дунд яригддаг егөө үг хэлэхгүй байх хэрэгтэй. Бас гэрлэж буй хосын талаар дэндүү хувийн чанартай юм ярих нь тэднийг болон сонсогчдыг эвгүй байдалд оруулж мэднэ. Тиймээс, бүх хүнд сүнслэг ач холбогдолтой илтгэл тавьж, чин сэтгэлээсээ ярьж, гэр бүлийг Санаачлагч хэн болохыг, ямар ашигтай зөвлөгөө өгдгийг нь онцлон тэмдэглэх нь зүйтэй. Гэрлэх ёслолыг Ехова Бурхны өмнө ёс төртэй үйлдэхэд илтгэл чухал үүрэгтэй.
17. Христианууд гэр бүл болохдоо хуулийн шаардлагыг хангах ёстойн учир юу вэ?
17 Бид энэ өгүүллээр гэр бүл болохын тулд хуулийн шаардлага хангах учиртайг ярилцлаа. Ярилцсан зүйлийн маань зарим нь танай нутагт мөрддөг хуульд тохирохгүй байж болох юм. Гэхдээ гэрлэх ёслол үйлдэхдээ «Цезарийн» хууль буюу нутаг орныхоо хуулийг хүндэтгэдгээ харуулах нь Еховагийн Гэрчүүдийн хувьд туйлын чухал гэдгийг ойлгох хэрэгтэй (Лук 20:25). Паул: «Бүгдэд өгөх ёстойгоо өг. Татвар авах ёстой хүнд татвараа, гаалийн татвар авах ёстой хүнд гаалийн татвараа төл, ...хүндэтгэл хүлээх ёстой хүнийг хүндэл» гэж уриалсан (Ром 13:7). Тийм ээ, христианууд гэр бүл болохдоо Бурхны тогтоосон журам буюу төр засгийн эрх мэдлийг хүндэтгэх учиртай.
18. Олон христиан гэрлэх ёслолынхоо дараа юу хийдэг вэ? Дараагийн өгүүллээр юуны тухай үзэх вэ?
18 Олон христиан гэрлэх ёслолынхоо дараа хурим найр хийдэг. Нэг удаа Есүс хуримд очиж байсныг өгүүллийн эхэнд дурдсан. Бурхны өмнө ёс төртэй, итгэл нэгтнүүдээ баярлуулсан, сэтгэлдээ нийцсэн сайхан хурим найр хийхийн тулд Библийн ямар зөвлөгөөг дагах хэрэгтэй вэ? Дараагийн өгүүллээр энэ асуултыг ярилцъя.d
[Зүүлт]
a Еховагийн Гэрчүүд «Бурхны өмнө ёс төртэй гэрлэх нь» гэсэн гарчигтай 30 минутын илтгэлийг гэрлэж буй хүмүүст зориулж тавьдаг. Уг илтгэл нь Еховагийн Гэрчүүдийн хэвлэл, тухайлбал, «Гэр бүлийн аз жаргалын нууц» гэдэг номд үндэслэдэг бөгөөд илтгэлийн зорилго нь гэрлэж байгаа хос болон гэрлэх ёслолд хүрэлцэн ирсэн бүх хүнд ач тустай Библийн зөвлөгөө өгөхөд оршдог.
b Тухайн улсад хуулиар заасан гэрлэлтийн тангараг байхгүй бол христианууд дараах тангаргийг өргөж болно. Сүйт залуугийн тангараг: «[Овог нэр] миний бие нь [сүйт бүсгүйн овог нэр] чамайг гэргийгээ болгож, Библид бичсэн, христиан нөхөрт зориулсан, Бурхны хуулийн дагуу чамайгаа насан туршдаа хайрлаж, халамжилж байхаа тангараглаж байна». Сүйт бүсгүйн тангараг: «[Овог нэр] миний бие нь [сүйт залуугийн овог нэр] чамайг эр нөхрөө болгож, Библид бичсэн, христиан эхнэрт зориулсан, Бурхны хуулийн дагуу чамайгаа насан туршдаа хайрлаж, халамжилж байхаа тангараглаж байна».
c «Харуулын цамхаг» сэтгүүлийн 1962 оны 5-р сарын 1-ний дугаарын 287-р хуудаснаас дэлгэрэнгүй тайлбар үзнэ үү (англи).
d «Харуулын цамхаг» сэтгүүлийн 2006 оны 10-р сарын 15-ны дугаарын 28-р хуудсанд байгаа «Гэрлэх ёслолоо баяр хөөртэй, ёс төртэй үйлдэгтүн» гарчигтай өгүүлэл үзнэ үү (англи).
Давтах асуулт
• Гэрлэх ёслол үйлдэхдээ Библийн зарчим баримтлахын зэрэгцээ хуулийн шаардлага хангах ёстойн учир юу вэ?
• Христианууд гэрлэлтээ бүртгүүлсэн даруйдаа Хаанчлалын танхимд ямар арга хэмжээ авдаг вэ?
• Ямар учраас гэрлэх ёслолд зориулж илтгэл тавьдаг вэ?