«Сайн дураараа зүтгэлээ харуулж» Еховаг алдаршуулъя

1, 2. а) Елифаз Билдад хоёр Иовд юу ойлгуулахыг оролдсон бэ? б) Ехова үйлчлэгчдээ өчүүхэн гэж үздэггүй нь юунаас харагддаг вэ?

«ХҮН Бурханд ашиглагдахаар байж чадах уу? Эсвэл мэргэн хүн өөртөө ашигтай байж чадах уу? Чи шударга байдаг гээд Төгс хүчит Нэгэнд ямар нэгэн таалал өгөх үү? Эсвэл чи замаа төгс болгодог гээд түүнд ашиг өгөх үү?» (Иов 22:1–3). Теман хүн Елифаз Иовоос ингэж асуухдаа үгүй гэсэн хариу сонсоно гэдэгтээ итгэл төгс байлаа. Елифазын найз шух хүн Билдад: «Хүн хэрхэн Бурханы хувьд зөвт байж чадах вэ?» хэмээн нэмж хэлжээ (Иов 25:4-ийг уншина).

² Елифаз Билдад хоёр Иовд юу ойлгуулах гэсэн бэ? Еховад үйлчлэхийн тулд ямар ч хичээл зүтгэл гаргаад нэмэргүй, Бурхан хүнийг дэнгийн эрвээхий, өт, авгалдай шиг л үздэг гэж итгүүлэхийг оролджээ (Иов 4:19; 25:6). Өнгөц харвал ямар даруу хүмүүс вэ гэж бодогдмоор (Иов 22:29). Үнэхээр ч Ехова хамгийн агуу Нэгэн, харин хүн дэргэд нь өчүүхэн билээ. Өндөр уулын оройгоос эсвэл онгоцны цонхоор харвал үүнийг сайн ойлгоно. Тэгвэл Ехова тэнгэрээс дэлхий рүү харахдаа Хаанчлалын төлөө хичээл зүтгэлтэй үйлчилдэг биднийг өчүүхэн гэж үздэг хэрэг үү? Огтхон ч үгүй. Энэ нь дараах явдлаас харагддаг. Тэрээр Елифаз Билдад Зофар гурвыг худал хэллээ хэмээн зэмлэдэг. Харин Иовоор бахархаж «Миний зарц» гэсэн (Иов 42:7, 8). Тэгэхлээр төгс бус хүн ч Бурханд хэрэгтэй байх нь ээ.

«ЧИ ... ТҮҮНД ЮУ ӨГДӨГ» ВЭ?

3. Бидний хичээл зүтгэлийн талаар Елиху юу гэж хэлсэн бэ? Энэ нь ямар утгатай байсан бэ?

³ «Чи шударга зөв бол Түүнд [Бурханд] юу өгч, эсвэл Тэрээр чиний гараас юу авдаг вэ?» хэмээн Елихуг асуухад Ехова түүнийг зэмлээгүй (Иов 35:7). Бурхны төлөө хийдэг бүхэн маань үр ашиггүй гэж Елиху хэлсэн үү? Яалаа гэж! Бид Еховаг шүтэхгүй байлаа ч Ехова биднээр дутахгүй гэсэн утгаар хэлжээ. Үнэндээ Ехова юугаар ч дутдаггүй. Хүмүүс Еховаг баян чинээлэг, хүч чадалтай болгож чадахгүй. Нарийн яривал бидэнд байгаа авьяас чадвар, хүч чадал, сайн сайхан бүхнийг Ехова өгсөн. Эдгээрийг хэрхэн ашиглахыг маань тэрээр харж байдаг.

4. Бусдад сайн үйлс хийвэл Ехова юу гэж үздэг вэ?

⁴ Хэрэв бид итгэл нэгтнүүдээ үнэнчээр хайрладгаа үйл хэргээрээ харуулбал Ехова Өөрт нь хийлээ гэж үздэг. Сургаалт үгс 19:17-д «Ядуу хүнд харамгүйгээр өгөгч хүн ЭЗЭНд зээлүүлж байгаа хэрэг. Тэр хүний сайн үйлийнх нь төлөө ЭЗЭН буцааж төлнө» гэж байдаг. Бусдад сайхан сэтгэлийн үйл хийх бүрд маань Ехова харж байдаг гэж ойлгож болох уу? Ехова орчлонт ертөнцийг бүтээсэн Бүтээгч атлаа өөрийгөө жирийн нэг хүнд өртэй гэж боддог хэрэг үү? Тэгээд сайн үйлсийнх нь хариуд янз бүрээр ивээдэг гэж дүгнэж болох уу? Болно. Үүнийг Хүү Есүс нь баталсан (Лук 14:13, 14-ийг уншина).

5. Энэ өгүүллээр ямар асуултыг ярилцах вэ?

⁵ Ехова зөнч Исаиад санал тавьж төлөөлөгчөө болгохыг хүсжээ. Ийнхүү санаа зорилгоо биелүүлэхдээ үнэнч хүмүүстэй хамтран ажиллах хүсэлтэйгээ илэрхийлсэн (Ис. 6:8–10). Исаиа хариуд нь «Би энд байна. Намайг явуулаач» хэмээн хэлж саналыг нь дуртайяа хүлээн авчээ. Яг ийм сэтгэлтэй мянга мянган хүн өнөөдөр Еховагийн төлөө ярвигтай даалгаврыг хүлээн авахад бэлэн байдаг. Харин зарим хүн: «Би ч Еховагийн төлөө сайн дураараа үйлчлэх дуртай л байна. Гэхдээ миний хувь нэмэр гэж байна уу? Еховагийн ажил надтай надгүй урагшлах юм биш үү?» гэж бодож болох юм. Дебора Барак нарын үед болсон явдлыг үзэж эдгээр асуултын хариуг мэдэж авъя.

АЙДАС НЬ ЭР ЗОРИГООР СОЛИГДСОН НЬ

6. Израильчууд ба Иабины арми юугаараа ялгаатай байсан бэ?

⁶ Канааны хаан Иабин израильчуудыг 20 жил «харгислан дарлажээ». Тосгонд амьдардаг израильчууд гэрээсээ гарахаас ч айна. Цэрэг хүний нүдээр харвал израильчууд дайтах зэр зэвсэг ч үгүй, хамгаалах хуяг дуулга ч үгүй, цэрэг дайны ямар ч бэлтгэлгүй байжээ. Гэтэл Иабины арми 900 төмөр тэрэгтэй байлааa (Шүү. 4:1–3, 13; 5:6–8).

7, 8. а) Ехова Баракт ямар тушаал өгсөн бэ? б) Израильчууд дайснаа хэрхэн дарсан бэ? (Өгүүллийн эхний зургийг үзээрэй).

⁷ Израильчууд Иабины армитай тулалдана гэж санах ч хэрэггүй байв! Гэтэл Ехова зөнч эмэгтэй Деборагаар дамжуулан Баракт нэгэн хачирхалтай тушаал өгчээ. «Яв, Табор ууланд гар. Өөртэйгөө хамт Нафтали болон Зебулуны хөвгүүдээс арван мянган эрсийг дагуул. Би Иабины цэргийн жанжин Сисераг тэрэгнүүдтэй нь болон олон цэрэгтэй нь хамт Кишон голын зүг та нар уруу явуулж, та нарын гарт тушаана» (Шүү. 4:4–7).

⁸ Энэ тушаалыг сонсоод сайн дураараа тулалдах хүмүүс Табор ууланд цугларчээ. Барак тэднийг аваад Таанах гэдэг газар луу явав (Шүүгчид 4:14–16-г уншина). Тэнд тулалдаж байтал гэнэт аадар бороо асгарч шавар шалбааг болох нь тэр. Барак Сисерагийн армийг нэхэн хөөсөөр Харошет-хагоим хүртэл 24 километр замыг туулжээ. Сисера шаварт суусан тэргээ орхиод Кедешийн ойролцоо байдаг Заананним руу явган зугтжээ. Тэгж явсаар кен хүн Хеберийн эхнэр Иаелын майханд ирэв. Иаел түүнийг угтан авч майхандаа орууллаа. Сисера эцэж ядарсан тул унтаж орхижээ. Тэр хооронд Иаел зориг гарган түүнийг алав (Шүү. 4:17–21). Ехова израильчуудад дайснаа дарахад нь ийнхүү тусалсан юм!

ХАР АМИА БОДОГСОД

9. Израильчууд дайсантайгаа хэрхэн тулалдсан талаар Шүүгчид 5:20, 21-ээс юу мэдэж болох вэ?

⁹ «Шүүгчид» номын 4, 5 дугаар бүлгийг хамтад нь судлах хэрэгтэй. Яагаад гэвэл 4 дүгээр бүлэгт дүрсэлсэн үйл явдлыг 5 дугаар бүлгээс дэлгэрэнгүй мэдэж болно. Жишээлбэл Шүүгчид 5:20, 21-д «Тэнгэрээс одод тулалдан, өөрсдийн тойргуудаасаа тэд Сисерагийн эсрэг тулалдав. Кишон голын өнө эртний урсгал тэднийг урсган авав» гэжээ. Тэнгэрийн элчүүд израильчуудад тусалсан хэрэг үү? Эсвэл солирын бороо орсон юм болов уу? Хариу нь тодорхойгүй. Гэхдээ Ехова тохиромжтой газар, хэрэгтэй үед нь аадар бороо оруулж дайсны 900 тэргийг шаварт суулгасан нь тодорхой. Израиль ялсан нь Еховагийн ач гавьяа гэдгийг Шүүгчид 4:14, 15-д гурван удаа дурдсан байдаг. Сайн дураараа тулалдсан 10 000 хүний нэг нь ч өөрөөрөө сайрхах эрхгүй байлаа.

10, 11. Мероз гэж юу байсан байж болох вэ? Яагаад хараагдсан бэ?

¹⁰ Дебора Барак хоёр гайхамшигт ялалт байгуулсан Еховаг магтан дуулжээ. Тэр дууны дунд ийм үг бий. «“Мерозыг хараагтун. Түүний оршин суугчдыг бүрмөсөн хараагтун. Учир нь тэд ЭЗЭНд туслахаар ирсэнгүй, хүчтэний эсрэг ЭЗЭНд туслахаар ирсэнгүй” гэж ЭЗЭНий тэнгэр элч өгүүлэв» (Шүү. 5:23).

¹¹ Мероз үнэхээр хараагдсан учраас чухам юу гэдгийг нь өнөөдөр бид мэдэх аргагүй болжээ. Хот байсан гэвэл оршин суугчид нь Баракт туслахаар ирээгүй юм болов уу? 10 000 хүн канаанчуудтай сайн дураараа тулалдахаар цугларсныг Мерозын оршин суугчид сонсоогүй өнгөрнө гэж байх уу? Эсвэл тэд зугтаж яваа Сисераг хотоор нь дайран өнгөрөхөд Баракт хүлээлгэн өгч болоогүй юм болов уу? Харгис догшин энэ дайчин хотынх нь гудамжаар ганцаархнаа, аргаа барчихсан явааг хараад барьж авах боломж байсан л байж таарна. Еховаг санаа зорилгоо биелүүлэхэд нь хувь нэмрээ оруулах хосгүй завшаан Мерозын оршин суугчдад ийнхүү олдсон байж болох юм. Харамсалтай нь тэд Еховагийн төлөө зүтгэх энэ сайхан боломжоо ашиглаагүй ажээ. Хэрэв ашигласан бол Еховагийн ивээлийг хүртэх байсан биз ээ. Тэд зоригт бүсгүй Иаелээс тэс өөр байв (Шүү. 5:24–27).

12. Шүүгчид 5:9, 10-ыг үзвэл хүмүүсийн хандлага ямар ялгаатай байсан бэ? Бид яах ёстой вэ?

¹² Сайн дураараа тулалдахаар ирсэн хүмүүс болон ирээгүй хүмүүсийн хандлага эрс ялгаатай байсныг Шүүгчид 5:9, 10-аас мэдэж болно. Ардуудтай хамт сайн дураараа ирсэн «Израилийн захирагчдыг» Дебора Барак хоёр магтсан. Гэтэл «цагаан илжиг унагч» бардам зантай хүмүүс, ая тухтай амьдрахыг чухалчилдаг «тансаг хивсэн дээр суугчид» болон «замаар аялагчид» тэс өөр байлаа! Тэд Баракийг дагасан сайн дурынхан шиг Табор уулын хад асгаар бүдчиж, Кишоны хөндийн намаг шалбаагийг туулж очоод тулалдахын оронд амар хялбар амьдарсан нь дээр гэж үзжээ. «Дуулах» буюу тунгаан бодохыг Барак Дебора хоёр тэдэнд уриалжээ. Тэд Еховагийн төлөө хувь нэмэр оруулах ямар сайхан боломжийг алдсанаа эргэцүүлэн бодох ёстой байв. Еховагийн төлөө бүх хүч чадлаа дайчлахаас хойш сууж буй хүн бүр үүнийг бодох учиртай.

13. Реубен, Дан, Ашер овгийнхон Зебулун, Нафтали овгийнхноос ямар ялгаатай байсан бэ?

¹³ Хэмжээгүй эрхт Эзэн Еховагийн агуу үйлсийг нүдээр үзэх завшаан сайн дурын 10 000 дайчинд олджээ. Тийм учраас тэд «ЭЗЭНий зөв үйлсийн» талаар ярих юмтай болсон (Шүү. 5:11). Гэтэл Реубен, Дан, Ашер овгийнхон хувийн эрх ашгаа л голлон анхаарчээ. Тэдний хувьд мал сүрэг, усан онгоц, далайн боомтууд нь Еховагийн ажлаас илүү чухал байв (Шүү. 5:15–17). Израилийн бусад овог тэдэн шиг байсан гэсэн үг биш. Зебулун, Нафтали овгийнхон «амь өрсөн» байж Дебора Барак нарыг дэмжсэн (Шүү. 5:18). Еховагийн үйл хэрэгт сайн дураараа оролцох талаар хүмүүс ийнхүү өөр өөр хандлагатай байсан нь бидэнд сургамжтай.

«ЭЗЭНИЙГ МАГТЪЯ»

14. Еховагийн хэмжээгүй эрх мэдлийг хэрхэн дэмжих вэ?

¹⁴ Өнөөдөр бид Еховагийн эрх мэдлийг дэмжихийн тулд дайнд оролцох шаардлагагүй. Гэхдээ дэлгэрүүлэх ажлыг зоригтой, идэвхтэй хийх учиртай. Еховагийн байгууллагад сайн дураараа ажиллах хүмүүс урьдынхаасаа илүү их хэрэгтэй байна. Сая сая итгэл нэгтэн маань эхлэгч, бетелчин, цуглааны танхимын барилгачин зэргээр бүрэн цагаар үйлчилж байна. Бас хөгшин залуу гэлтгүй чуулганы ажилд сайн дураараа оролцдог. Зарим ахлагч Эмнэлэгтэй хамтран ажиллах хорооны гишүүн байхад зарим нь чуулган зохион байгуулах ярвигтай даалгавар биелүүлдэг. Гал халуун сэтгэлээр үйлчилдэг таныг Ехова өндөр үнэлдэг. Таны зүтгэлийг хэзээ ч мартахгүй (Евр. 6:10).

15. Еховагийн үйл хэрэгт хэрхэн хандаж байгаагаа яаж мэдэх вэ?

¹⁵ Бид Еховад сайн дураараа үйлчлэх талаар ямар хандлагатайгаа дор бүрнээ шалгах хэрэгтэй. «Би ажлынхаа ихэнхийг бусдаар хийлгэдэг юм биш биз? Еховад үйлчлэхээсээ илүү мөнгө төгрөг, эд зүйлийг л голлон анхаардаг юм биш биз? Барак, Дебора, Иаел болон 10 000 дайчин Еховагийн өгсөн тодорхой тушаалыг биелүүлэхийн тулд бүхнээ зориулах итгэл, зоригтой байсан. Би тийм хүн мөн үү? Өөр хот юм уу гадаадад очиж мөнгө олох тухай бодож байна уу? Нүүлээ гэхэд гэрийнхэнд маань, хуралд яаж нөлөөлөхийг залбирч байгаад бодож байна уу?».b

16. Биднийг яавал Ехова баярлах вэ?

¹⁶ Ехова бидэнд хэмжээгүй эрх мэдлийг нь дэмжих хосгүй боломж олгосон билээ. Диавол өнөөдөр ч хүмүүсийг өөрийнхөө талд зогсоохыг оролддог. Хэрэв та Еховагийн хэмжээгүй эрх мэдлийг дэмждэг бол Диаволын талд биш гэдгээ батална. Бурханд итгэдэг үнэнч хүн Хаанчлалын үйл хэрэгт сайн дураараа оролцох оргилуун хүсэлтэй байдаг. Үүгээрээ Еховаг баярлуулдаг (Сур. 23:15, 16). Бас Сатанд хариу барихад нь Еховад тус дөхөм болдог (Сур. 27:11). Таныг дуулгавартай байвал Ехова үнэтэй юмаа өгч байна гэж үзээд баярладаг.

17. Шүүгчид 5:31-ээс ирээдүйн талаар юу мэдэж болох вэ?

¹⁷ Дэлхийн бүх хүн Еховагийн хэмжээгүй эрх мэдлийг дэмждэг болох цаг ойрхон байна. Тэр цагийг бид тэсэн ядан хүлээдэг! Дебора Барак нар: «ЭЗЭН минь, бүх дайснуудаа ийнхүү устгаж, харин Түүнийг хайрлагчид өөрсдийн дунд мандах нар мэт байлгаач» хэмээн дуулсан. Бид ч бас ийм хүсэлтэй (Шүү. 5:31). Ехова Сатаны бузар муу ертөнцийг газартай тэгшилж энэ хүслийг маань биелүүлж өгнө. Хармагедон эхлэхэд бид дайснуудтай сайн дураараа тулалдах шаардлагагүй. Харин зогсоод «ЭЗЭНий авралыг» харна (Ш.дэд 20:17). Тэр болтол зоригтой, идэвхтэй байж Еховагийн хэмжээгүй эрх мэдлийг дэмжих боломж бүрийг ашиглая.

18. Хэрэв та Еховаг магтахын төлөө бүхнээ зориулдаг бол бусдад яаж нөлөөлөх вэ?

¹⁸ Дебора Барак нар ялалтын дуугаа эхлүүлж «Ардууд сайн дураараа зүтгэлээ харуулсанд ЭЗЭНийг магтъя» хэмээн дуулсан. Ийнхүү хүнийг бус, Хамгийн Дээд Нэгэн Еховаг магтжээ (Шүү. 5:1, 2). Тэднийг дуурайн Еховаг магтахын төлөө бүхнээ зориулдаг таныг бусад хүн даган дуурайх болтугай!