Дайн дажин хэрхэн үгүй болох вэ?

БУРХАН ХҮНИЙ ЗАСАГЛАЛД ЦЭГ ТАВИНА

Бурхан хүний засгийн газруудыг Хармагедон гэдэг дайнаар устгахыг Библид бичжээ (Илчлэл 16:16).a Тэр үед дэлхий дахины «хаад» буюу захирагчдыг «Төгс хүчит Бурхны агуу өдөр болох дайнд» цуглуулна (Илчлэл 16:14). Бурхны хийх энэ дайнаас хойш дахин хэзээ ч дайн дажин гарахгүй.

Бурхан хүний бүх засаглалыг халж, өөрийнхөө байгуулсан засгийн газар буюу тэнгэрээс захирах, хэзээ ч устгагдахгүй Хаант төрөөр солино (Даниел 2:44). Тэрбээр Хүү Есүс Христээ сонгож Хаанаар нь томилсон (Исаиа 9:6, 7; Матай 28:18). Есүс дагалдагчдадаа Хаант төрийнb төлөө залбирч байхыг захижээ (Матай 6:9, 10). Дэлхийг бүхэлд нь захирах Есүс тэргүүтэй засаглал дор бүх хүн төрөлхтөн нэгдэнэ.

Есүс хүмүүн удирдагчид шиг эрх мэдлээ өөрийн ашиг сонирхлын төлөө хэрэгжүүлэхгүй. Тэрбээр шударга, алагчлах үзэлгүй. Тиймээс арьс өнгө, иргэний харьяалал, үндэс угсаагаар ялгаварлана гэж хэн ч санаа зовохгүй (Исаиа 11:3, 4). Мөн өөрийн эрх ашгийн төлөө тэмцэх шаардлагагүй болно. Яагаад? Есүс хүн нэг бүрийн сайн сайхныг бодож удирдана. «Тэрбээр тусламж гуйн хашхирах ядуусыг, туслагчгүй дорд нэгнийг аварна. ... Хүчирхийлэл, дарлалаас тэднийг аварна» (Дуулал 72:12–14, ШЕ).

Бурхны Хаант төр хөнөөлт зэвсгийг үгүй хийнэ (Мика 4:3). Дайтахаа болихгүй, бусдын амар тайван байдлыг эвддэг хорон муу хүмүүсийг ч устгана (Дуулал 37:9, 10). Дэлхийн хаана ч байсан эрэгтэй, эмэгтэй, хүүхэд гээд бүх хүн аюул осолгүй байна (Езекиел 34:28).

Бурхны засаглал хүмүүсийг төгс төгөлдөр орчинд сайхан амьдруулна. Ядуурал, өлсгөлөн, гэр оронгүй байх зэрэг одоо хүмүүсийн шийдэж чадахгүй байгаа тулгамдсан асуудлыг бүрэн шийдвэрлэнэ. Хүн бүр шим тэжээлтэй хоол хүнсээр элбэг дэлбэг, тав тухтай орон гэртэй байна (Дуулал 72:16; Исаиа 65:21–23).

Бурхны Хаант төр дайны бүх хор уршгийг арилгана. Жишээ нь бие махбодын шарх төдийгүй дайны үеийн харгис хэрцгий явдлаас улбаалсан сэтгэлийн шарх, сэтгэцийн өвчинг эдгээнэ. Бүр нас барагсдыг дэлхий дээр амилуулна (Исаиа 25:8; 26:19; 35:5, 6). Тэгээд бүх гэр бүл элэг бүтэн амьдарна. «Өмнөх юмс өнгөрөн одох» тул дайны аймшигт дурсамж арилна (Илчлэл 21:4).

БУРХАН ХҮМҮҮСИЙГ НҮГЛЭЭС ЧӨЛӨӨЛНӨ

Бурхны Хаант төр дэлхийг захирах үед хүн бүр «хайр ба амар тайвны», цорын ганц жинхэнэ Бурхан Еховагc шүтнэ (2 Коринт 13:11). Хүмүүс эв нэгдэлтэй амьдарч сурна (Исаиа 2:3, 4; 11:9). Бурханд дуулгавартай хүмүүс нүглээс чөлөөлөгдөж, төгс болно (Ром 8:20, 21).

БУРХАН САТАН БОЛОН ЧӨТГӨРҮҮДИЙГ УСТГАНА

Хүмүүсийг турхирч дайтахад хүргэдэг Сатан болон чөтгөрүүдийг Бурхны Хаант төр устгана (Илчлэл 20:1–3, 10). Ийнхүү тэдний муу нөлөө байхгүй, «амар тайван арвин их байх» болно (Дуулал 72:7, ШЕ).

Дайн дажин, зэвсэгт мөргөлдөөнийг үгүй хийнэ гэсэн Бурхны амлалт биелнэ гэдэгт та итгээрэй. Түүнд амлалтаа биелүүлэх чадвар ч бий, хүсэл ч бий.

• Бурхан дайн, хүчирхийллийг зогсоох мэргэн ухаантай, хүч чадалтай (Иов 9:4). Түүнд боломжгүй юм гэж байхгүй (Иов 42:2).

• Хүмүүсийн зовохыг харах Бурханд үнэхээр хэцүү санагддаг (Исаиа 63:9). Бас тэрбээр «хүчирхийлэлд дурлагчийг үзэн яддаг» (Дуулал 11:5, ШЕ).

• Бурхан хэлснээ үргэлж биелүүлдэг, хэзээ ч худал хэлдэггүй (Исаиа 55:10, 11; Тит 1:2).