Нас барахынхаа өмнө хэлсэн Иаковын зөгнөл сургамжтай (II хэсэг)

1. Бид энэ өгүүллээр юуны тухай үзэх вэ?

ИАКОВЫН хөвгүүд эцгийнхээ хажууд цуглараад хэлэх үгийг нь анхааралтай сонсоно. Өмнөх өгүүлэлд үзсэнээр Реубен Симеон Леви Иуда нарт хэлсэн үг хүүхдүүдийнх нь сонирхлыг татаж, бүр гайхшруулсан байх. Удаах 8 хөвгүүн нь «Надад юу хэлэх бол?» гэж бодсон нь лавтай. Одоо Зебулун Иссахар Дан Гад Ашер Нафтали Иосеф Бениамин нарт хэлсэн үг бидэнд ямар сургамжтайг ярилцъя.a

ЗЕБУЛУН

2. Иаков Зебулунд юу гэж хэлсэн бэ? Энэ үг хэрхэн биелсэн бэ? (Эхлэл 49:13). (Бас хавсралтыг үзээрэй).

² Эхлэл 49:13-ыг уншина. Иаков Зебулуны үр удмыг Амласан газрын хойд зүгт далайн эрэг хавиар нутаглана гэжээ. Зебулунчууд 200 гаруй жилийн дараа Галил нуур болон Газрын дундад тэнгисийн хоорондох газар нутгийг өв болгон авсан. Мосе: «Зебулун аа, гарч явахдаа баярлагтун!» гэж зөгнөсөн байдаг (Д.хууль 33:18, ШЕ). Энэ нь Зебулун овгийнхон хоёр усны дунд нутаглаж, худалдаа арилжаа хийх таатай нөхцөл бүрдэхийг хэлсэн байж болох юм. Ямар ч байсан Зебулуны үр удамд баяр жаргалтай байх шалтгаан байжээ.

3. Бид яавал сэтгэл хангалуун байх вэ?

³ Ямар сургамжтай вэ? Бид хаана, ямар нөхцөлд амьдардгаас үл хамааран аз жаргалтай байх шалтгаан бий. Жаргалтай байя гэвэл байгаа юмандаа сэтгэл хангалуун байх хэрэгтэй (Дуу. 16:6; 24:5). Бид өөрсдөдөө байгаа сайн сайхан юмыг гэхээс илүү байхгүй юмаа анхаарах гээд байдаг. Тиймээс сайныг анхаарч өөдрөг байхыг хичээгээрэй (Гал. 6:4).

ИССАХАР

4. Иаков Иссахарт юу гэж хэлсэн бэ? Энэ үг хэрхэн биелсэн бэ? (Эхлэл 49:14, 15). (Бас хавсралтыг үзээрэй).

⁴ Эхлэл 49:14, 15-ыг уншина. Иаков Иссахарыг хүнд ачаа үүрдэг яс сайтай илжигтэй зүйрлэн хүч тэнхээтэйг нь онцолж, ажилсгийг нь магтжээ. Мөн сайхан газар нутаг эзэмшихийг нь хэлсэн. Энэ үг биелж Иссахарын үр удам Иордан гол дагуух үржил шимтэй, ургац арвинтай газар нутгийг өвлөсөн (Иош. 19:22). Тэд газраа боловсруулахын тулд нөр их хөдөлмөрлөдөг байсан нь эргэлзээгүй. Харин бас бусдын сайн сайхны төлөө хичээл зүтгэл гаргаж байв (Х.дээд 4:7, 17). Жишээлбэл шүүгч Барак болон зөнч Дебора нарыг тусламж хүсэхэд тэд дайснуудын эсрэг мөр зэрэгцэн тулалдсан. Ийнхүү тусалсан нь ганцаар тогтоогүй юм (Шүү. 5:15).

5. Иссахар овгийнхныг хэрхэн дуурайх вэ? Яагаад?

⁵ Ямар сургамжтай вэ? Ехова Иссахар овгийнхны нөр их хөдөлмөрийг үнэлсэн шиг биднийхийг ч үнэлнэ (Ном. 2:24). Жишээ нь хурлынхандаа санаа тавихын тулд хичээнгүйлэн ажилладаг эрчүүдийн тухай бодъё (1 Тим. 3:1). Тэд шууд утгаар дайн тулаанд оролцдоггүй ч Еховатай тогтоосон харьцаанд нь сэв суулгах бүхнээс ах дүүсээ хамгаалахын тулд чадах бүхнээ хийдэг (1 Кор. 5:1, 5; Юуд. 17–23). Мөн ихэд мэрийн илтгэл бэлдэн тавьж хурлынхандаа урам хайрладаг (1 Тим. 5:17).

ДАН

6. Дан овгийнхон ямар даалгавар хүлээж авсан бэ? (Эхлэл 49:17, 18). (Бас хавсралтыг үзээрэй).

⁶ Эхлэл 49:17, 18-ыг уншина. Иаков Даныг байлдааны морь зэрэг өөрөөс нь хамаагүй том биетэй амьтныг хатгах могойтой зүйрлэжээ. Данчууд эр зоригтой бөгөөд Израйл үндэстний дайснуудтай тулалдахад хэзээд бэлэн байсан. Израйлчуудыг Амласан газар луу явах замд хамгаалалт болж «араас нь бүлэг бүлгээрээ хөдөлдөг» байв (Тоол. 10:25, ШЕ). Тэдний хийсэн бүхэн бусдад нь харагдаагүй ч их чухал даалгавар биелүүлж байжээ.

7. Еховад үйлчлэхдээ хүлээж авсан даалгавар болгоноо ямар сэтгэлээр биелүүлэх ёстой вэ?

⁷ Ямар сургамжтай вэ? Та бусдын хараанд өртөхөөргүй даалгавар биелүүлж байсан уу? Жишээ нь цуглааны танхим цэвэрлэж, арчилж тордох юм уу чуулганы ажилд сайн дураараа оролцож байсан байх. Тийм бол та үнэхээр магтуулах зохистой! Ехова өөрийнх нь төлөө таны хийдэг бүхнийг анзаарч, үнэлдгийг үргэлж санаарай. Ялангуяа бусдаар магтуулахын тулд бус, харин өөрийг нь чин сэтгэлээсээ хайрласандаа үйлчилдгийг тань Ехова өндөр үнэлдэг (Мат. 6:1–4).

ГАД

8. Гадчууд халдлагад амархан өртөх эрсдэлтэй байсны учир юу вэ? (Эхлэл 49:19). (Бас хавсралтыг үзээрэй).

⁸ Эхлэл 49:19-ийг уншина. Иаков Гад руу дээрэмчдийн бүлэг довтолно гэж зөгнөсөн. 200 гаруй жилийн дараа Гад овгийнхон Иордан голын зүүн тал дахь нутгийг өвлөн авсан. Энэ нь дайсагнадаг улсуудтай нь хиллэдэг тул хэзээ л бол хэзээ халдлагад өртөхөөр байв. Гэхдээ бэлчээр сайтай, мал сүрэгт нь тохирох газар учир тэнд суурьшихыг хүсжээ (Тоол. 32:1, 5). Тэд их зоригтой хүмүүс байсан нь илэрхий. Түүнчлэн өөрсдийнх нь газар нутгийг ямар ч дээрэмчдээс хамгаалахад Бурхан тусална гэдэгт итгэж байв. Тэд Иорданы баруун талын Амласан газрын үлдсэн хэсгийг эзэлж авахад бусад овогтоо туслах зорилгоор цэргүүдээ хэдэн жилийн турш явуулж байжээ (Тоол. 32:16–19). Эрчүүдийг эзгүй хойгуур эхнэр, хүүхдүүдийг нь Ехова хамгаална гэдэгт итгэж байв. Хэцүү үед бусдадаа тусалсан, эр зоригтой тэднийг Ехова ивээсэн (Иош. 22:1–4).

9. Еховад итгэж найддаг хүн яадаг вэ?

⁹ Ямар сургамжтай вэ? Бид бэрхшээл тулгарсан үед Еховадаа үйлчлэхийн тулд түүнд үргэлж итгэж найдах ёстой (Дуу. 37:3). Өнөөдөр олон хүн эрх ашгаа хойш нь тавьж байгууллагын барилгын ажилд оролцож, дэлгэрүүлэгчийн хэрэгцээ ихтэй газарт үйлчилж, өөр янз бүрийн үүрэг даалгавар биелүүлэн Еховад итгэдгээ харуулдаг. Тэд Ехова өөрсдөд нь ямагт санаа тавина гэдэгт итгэдэг тул ийнхүү үйлчилдэг (Дуу. 23:1).

АШЕР

10. Ашерчууд юу хийгээгүй вэ? (Эхлэл 49:20). (Бас хавсралтыг үзээрэй).

¹⁰ Эхлэл 49:20-ийг уншина. Ашер овгийнхон хөгжин цэцэглэнэ гэж Иаковын зөгнөсөн нь яг таг биелсэн. Тэд Израйлын бүх газар нутгийн хамгийн үржил шимтэйг өвлөж авсан (Д.хууль 33:24). Энэ нутаг нь Газрын дундад тэнгистэй хиллэдэг бөгөөд тэнд Сидон гэдэг арилжаа наймааны төв болсон том боомт байв. Гэхдээ ашерчууд канаанчуудыг тэр нутгаас хөөж гаргаагүй юм (Шүү. 1:31, 32). Баян тансаг байдал болон канаанчуудын муу нөлөөнөөс болж цэвэр шүтлэгийн төлөөх хичээл зүтгэл нь суларсан байж болох юм. Жишээ нь израйлчууд канаанчуудын эсрэг дайтахаар болж шүүгч Баракийг тусламж хүсэхэд ашерчууд нүдэн балай чихэн дүлий өнгөрөөжээ. Тиймээс «Мегиддогийн усны дэргэдэх» гайхамшигтай ялалтыг байгуулахад тэд хувь нэмэр оруулах боломжоо алдсан (Шүү. 5:19–21). Тэд Барак Дебора нарын «Ашер нь далайн эрэгт суужээ» гэж дуулахыг сонсоод ичсэн нь лавтай (Шүү. 5:17).

11. Бид яагаад мөнгөний талаар зөв үзэлтэй байх ёстой вэ?

¹¹ Ямар сургамжтай вэ? Бид Еховад хамгийн сайныгаа өгөхийг хүсдэг. Ингэхийн тулд мөнгө болон эд юмыг чухалчилдаг хүмүүс шиг болохоос болгоомжлох ёстой (Сур. 18:11). Мөнгө хэрэгтэй нь үнэн ч, их мөнгөтэй болохыг Бурханд үйлчлэхээс илүү чухал гэж үздэггүй (Ном. 7:12; Евр. 13:5). Зайлшгүй чухал биш юмны төлөө цаг хүчээ үрдэггүй. Харин Еховагийн төлөө чадах бүхнээ хийдэг. Учир нь үргэлж үнэнч байвал Ехова шагнаж шинэ ертөнцөд сайхан амьдруулна гэдгийг мэддэг (Дуу. 4:8).

НАФТАЛИ

12. Нафталийн тухай хэлсэн үг хэрхэн биелсэн бэ? (Эхлэл 49:21). (Бас хавсралтыг үзээрэй).

¹² Эхлэл 49:21-ийг уншина. Иаков Нафталийг «яруу сайхан ярьдаг» гэжээ. Энэ нь Бурхны тухай Есүсийн хэрхэн ярихыг хэлсэн бололтой. Есүс чадварлаг багш гэдгээрээ алдартай байв. Тэрбээр Нафтали овгийн нутаг дэвсгэр дэх Капернаум хотод олон удаа ирж суурин амьдарч байсан тул өөрийн хот гэж үздэг байжээ (Мат. 4:13; 9:1; Ёох. 7:46). Исаиа түүний тухай зөгнөхдөө Зебулун, Нафтали овгийнхон «агуу их гэрлийг» үзнэ гэжээ (Ис. 9:1, 2). Есүс хүмүүст сургаалаа зааж «бүх хүнийг гэрэлтүүлэх жинхэнэ гэрэл» болсон (Ёох. 1:9).

13. Еховад таалагдахын тулд хэрхэн ярих вэ?

¹³ Ямар сургамжтай вэ? Бидний юу, хэрхэн ярьж байгааг Ехова анхааран сонсдог. Тэгвэл Еховад таалагдахын тулд хэрхэн «яруу сайхан ярих» вэ? Юуны түрүүнд үнэнийг ярих хэрэгтэй (Дуу. 15:1, 2). Бас шүүмжилж, гомдоллохын оронд сайныг нь хараад магтдаг бол нэг нэгнийхээ урмыг сэргээнэ (Эф. 4:29). Мөн бусдад сайтар гэрчлэхийн тулд яриа эхлэх чадвараа сайжруулахыг хичээгээрэй.

ИОСЕФ

14. Иосефын тухай зөгнөл хэрхэн биелсэн бэ? (Эхлэл 49:22, 26). (Бас хавсралтыг үзээрэй).

¹⁴ Эхлэл 49:22, 26-г уншина. «Ах дүүгийнхээ дундаас тодрон гарсан» хүү Иосефоороо Иаков маш их бахархдаг байсан нь лавтай. Иаков түүнийг «үр жимстэй модны мөчир» гэжээ. Тэрбээр өөрөө мод, Иосеф тэр модны мөчир. Иосеф хайртай эхнэр Рахелынх нь ууган хүү билээ. Иаковын нөгөө эхнэр Леагийн анхны хүүхэд Реубен ууган хүүгийн эрхээ алдсан. Тиймээс Иосеф энэ эрхийг авч ах дүүгээсээ хоёр дахин их өв өвлөхийг Иаков хэлжээ (Эх. 48:5, 6; Ш.дээд 5:1, 2). Энэ зөгнөл биелж Иосефын хөвгүүд Ефраим Манассе нар тус тусдаа овог болж, аль аль нь газар нутаг өвлөсөн (Эх. 49:25; Иош. 14:4).

15. Ах нараа шударга бус хандахад Иосеф яасан бэ?

¹⁵ Иаков мөн Иосефын тухай дараахыг хэлсэн. «Харваачид түүнийг үзэн ядаж, хайр найргүй дайрсаар харвав» (Эх. 49:23, ШЕ). Харваачид гэдэг нь Иосефт атаархаж, шударга бусаар хандан улмаар олон зовлон амсахад хүргэсэн ах нар нь юм. Гэхдээ үүнээс болж ах нараа үзэн ядаагүй, Еховаг ч буруутгаагүй. Иаковын зөгнөснөөр «[Иосефын] нум байрандаа байлаа. Гар нь хүчтэй, шалмаг байсан» (Эх. 49:24, ШЕ). Сорилт тулгарахад Иосеф Еховад найдаж, бас ах нараа уучлаад зогсохгүй тэдэндээ энэрэнгүй ханджээ (Эх. 47:11, 12). Тэрбээр сорилтыг тэвчиж илүү сайн хүн болсон юм (Дуу. 105:17–19). Тиймээс ч Ехова Иосефоор агуу зүйлсийг хийлгэсэн.

16. Сорилт тулгарах үед Иосефыг хэрхэн дуурайх вэ?

¹⁶ Ямар сургамжтай вэ? Сорилт тулгарах үед бид Ехова болон ах дүүсээсээ хэзээ ч холдох учиргүй. Ехова биднийг ийм үед ч сургадгийг бүү мартаарай (Евр. 12:7, зүүлт). Үүний үр дүнд энэрэнгүй, ууч сэтгэл зэрэг Христийн дагалдагч хүний сайхан зан чанаруудыг хөгжүүлж, илүү сайн хүн болно (Евр. 12:11). Хэрэв бид сорилтыг тэвчвэл Ехова Иосефыг шагнасан шиг биднийг ч шагнана.

БЕНИАМИН

17. Бениамины тухай хэлсэн зөгнөл хэрхэн биелсэн бэ? (Эхлэл 49:27). (Бас хавсралтыг үзээрэй).

¹⁷ Эхлэл 49:27-г уншина. Иаков бениаминчуудыг чонотой зүйрлэм гарамгай дайчид гэжээ (Шүү. 20:15, 16; Ш.дээд 12:2). «Өглөө нь» буюу Израйлын Хаант улс анх байгуулагдахад Бениамин овгийн Саул анхны хаан нь болсон. Тэрбээр филистчүүдтэй эр зоригтой дайтдаг байв (1 Сам. 9:15–17, 21). Харин Израйлын Хаант засаглалын «орой нь» буюу Персийн эзэнт гүрний үед Бениамин овгоос гаралтай Естер хатан болон ерөнхий сайд Мордехаи израйлчуудыг хоморголон устгагдахаас аварсан (Ест. 2:5–7; 8:3; 10:3).

18. Еховагийн арга хэмжээг үнэнчээр дэмжсэн бениаминчуудыг хэрхэн дуурайх вэ?

¹⁸ Ямар сургамжтай вэ? Бениаминчууд өөрсдийнх нь овгийн Саулыг хаан болоход их баярласан нь тодорхой. Гэхдээ дараа нь Ехова Иуда овгийн Давидыг хаанаар томилоход тэд яваандаа энэ өөрчлөлтийг хүлээн зөвшөөрсөн (2 Сам. 3:17–19). Олон жилийн дараа арван овгийнхныг босоход бениаминчууд Иуда овогт болон Давидын удмаас гарсан хаанд үнэнч байсан (Х.дээд 11:31, 32; 12:19, 21). Өнөөдөр ч ард түмнээ удирдуулахаар Еховагийн томилсон хүмүүсийг бид үнэнчээр дэмжих учиртай (1 Тес. 5:12).

19. Нас барахынхаа өмнө Иаковын хэлсэн зөгнөл бидэнд ямар тустай вэ?

¹⁹ Нас барахынхаа өмнө Иаковын хэлсэн зөгнөл бидэнд тустай. Тэдгээр нь хэрхэн биелснийг ярилцаад Еховагийн бусад зөгнөл ч баараггүй биелнэ гэдэгт итгэх итгэл батажлаа. Мөн Иаковын хөвгүүд хэрхэн ивээгдсэнийг эргэцүүлэн бодоод яавал Еховагийн таалалд нийцэхээ улам сайн ойлгож авлаа.