«Бурхнаас ирсэн сайн мэдээ» товхимлыг хэрэглэх нь
Давтан уулзалт хийх, Библийн хичээл эхлэхэд зориулсан шинэ товхимол
1. Давтан уулзалт хийх, Библийн хичээл эхлэхэд тустай ямар товхимол «Зүрхээ хамгаал!» гэсэн сэдэвтэй мужийн чуулганаар гарсан бэ?
1 «Зүрхээ хамгаал!» гэсэн сэдэвтэй мужийн чуулган дээр, давтан уулзалт хийх, Библийн хичээл эхлэхэд тустай шинэ товхимол аваад бид баярласан. «Бурхнаас ирсэн сайн мэдээ» товхимол «Шаарддаг» товхимлын оронд гарсан. Нэг хичээлээр үзэх юм нь цөөхөн байдгаараа шинэ товхимол хуучинтайгаа адилхан. Тийм болохоор уг товхимлоор айлын үүдэнд Библийн хичээл хийж болно. «Шаарддаг» товхимолд христиан хүний хангавал зохих шаардлагыг дурдсан байдаг тул шинэ суралцагчдын хувьд хүлээж авахад хэцүү байж болох юм. Харин шинэ товхимол Библид байдаг сайн мэдээг онцолдог (Үйлс 15:35).
2. «Сайн мэдээ» товхимлыг гаргасны учир юу вэ?
2 Энэ товхимлыг гаргах болсны учир юу вэ? Дэлхий дахинд буй ахан дүүс маань хүмүүсийг үнэн рүү татаж, Библийг заах гол багаж болох «Библийн сургаал» номоор хичээл эхлэхэд туслах энгийн багажтай болохыг хүсэж байсан. Ном хараад сүрддэг хүн товхимлоор Библийн хичээл хийх дуртай байж болох юм. Түүнээс гадна, товхимлыг олон хэлээр орчуулахад амар байдаг.
3. Шинэ товхимол Библийн хичээл хийхэд зориулсан бусад хэвлэлээс юугаараа ялгаатай вэ?
3 Уг товхимлын онцлог: Библийн хичээл хийхэд зориулсан олон хэвлэлийг маань хүмүүс ганцаараа уншсан ч ойлгодог. Харин энэ товхимлыг хэн нэгний тусламжтайгаар Библи судлахад зориулж гаргасан. Тийм учраас энэ товхимлыг хүнд өгөхдөө ганц хоёр догол мөрийг авч үзэх нь сайн байдаг. Догол мөрүүд нь богинохон учир айлын үүдэнд юм уу, ажлын газар ярилцах боломжтой. Ер нь 1-р хичээлээс эхлэх нь сайн боловч аль ч хичээлээс эхэлж болно.
4. Шууд Библиэс заахад шинэ товхимол хэрхэн туслах вэ?
4 Манай олон хэвлэл дэх асуултын хариуг догол мөрөөс нь олж болдог. Харин уг товхимол дахь асуултын хариу нь голдуу Библид байдаг. Ихэнх хүн манай ном хэвлэлийг биш, Библийг судлах хүсэлтэй байдаг. Тийм учраас Библийн ихэнх зүйлийг иш татаагүй байдаг нь Библиэс шууд уншуулах зорилготой. Библитэй тулгаж үзэхлээр суралцагч маань Бурхнаар заалгаж байгаагаа ойлгоно (Ис. 54:13).
5. Дэлгэрүүлэгч хичээл бүрдээ сайтар бэлдэх нь чухал гэхийн учир юу вэ?
5 Уг товхимол Библийн бүх зүйлийг тайлбарладаггүй. Ингэснээр суралцагчид асуулт тавих, багшид нь заах чадвараа ашиглан тайлбарлах боломж бүрддэг. Тийм учраас хичээл бүрдээ сайтар бэлдэх нь чухал. Нэг зүйлийг анхааръя. Хэтэрхий их ярихгүй байгаарай. Бид ер нь Библийн зүйлийг тайлбарлах дуртай. Гэхдээ тухайн Библийн зүйлийг юу гэж ойлгож байгааг суралцагчаараа тайлбарлуулбал илүү үр дүнтэй. Сайн бодож байгаад асуулт тавивал Библийн бүх зүйл ямар утгатайг эргэцүүлэн бодоход нь суралцагчдаа тусална (Үйлс 17:2).
6. Шинэ товхимлыг а) Бурхан болон Библид итгэдэггүй хүмүүстэй ярихдаа б) айлаар дэлгэрүүлэхдээ в) Библийн хичээл шууд эхлэхдээ г) давтан уулзалт хийхдээ хэрхэн ашиглаж болох вэ?
6 Библийн хичээл заахад зориулсан бусад хэвлэлийн адилаар шинэ товхимлыг тухайн сард ямар хэвлэл голлон тараахаас үл хамааран хэзээ ч тарааж болно. Олон дэлгэрүүлэгч энэ товхимлоор айлын үүдэнд Библийн хичээл шууд эхлэх байх. Түүнээс гадна, сонирхсон хүнтэй дахин уулзахдаа уг товхимлыг хэрэглэх нь үнэхээр үр дүнтэй (5–7-р хуудсан дахь хавсралтыг үзнэ үү).
7. Шинэ товхимлоор Библийн хичээл яаж хийх вэ?
7 Библийн хичээл хийх нь: Тод үсгээр бичиж дугаарласан асуултыг уншаад яриагаа эхэлж болно. Тэгээд догол мөр, налуу үсгээр бичсэн Библийн зүйлийг уншина. Уншсан Библийн зүйл ямар утгатайг айлын хүнд ойлгуулахын тулд ямар асуулт тавихаа сайн бодох хэрэгтэй. Дараагийн догол мөрийг үзэхээсээ өмнө тод үсгээр бичсэн асуултыг айлын хүнээс дахин асууж, ойлгосон эсэхийг нь магадлаарай. Эхний хэдэн уулзалтад тод үсгээр бичсэн асуултуудаас ганцыг л ярилцахад хангалттай байж болох юм. Яваандаа хичээлээ бүгдийг нь үздэг болж болно.
8. Библийн зүйлийг уншихдаа юу гэж хэлбэл сайн бэ? Яагаад?
8 «Уншина уу» гэж тэмдэглэсэн Библийн зүйлүүд тод үсгээр бичсэн асуултын гол хариу болдог. Библийн зүйлийг уншихдаа «Элч Паул ингэж хэлсэн» гэх юм уу, «Зөнч Иеремиагийн хэлснийг үзвэл» гэж битгий хэлээрэй. Ингэж хэлбэл хүний хэлсэн үгийг уншиж байна гэж айлын хүн бодно. Харин «Бурхны Үгэнд ингэж бичсэн байна» гэх юм уу, «Библид юу гэж зөгнөснийг үзье» гэж хэлэх нь илүү сайн.
9. Дурдсан Библийн зүйлүүдийг бүгдийг нь унших ёстой юу?
9 Дурдсан Библийн зүйлүүдийг бүгдийг нь унших уу, эсвэл зөвхөн «уншина уу» гэснийг нь унших уу? Байдлаасаа шалтгаална. Тухайн санааг Библийн хаана бичсэн байдгийг л харуулах зорилгоор Библийн зүйлүүдийг дурдаагүй. Зүйл бүрд ярилцвал зохих санаа бий. Гэхдээ суралцагч тань юм уншихдаа тааруу, зав муутай эсвэл нэг их сонирхдоггүй бол «уншина уу» гэснийг л уншиж болох юм.
10. «Библийн сургаал» номыг хэзээ үзэж эхлэх вэ?
10 «Библийн сургаал» номыг хэзээ үзэж эхлэх вэ?: Библийн хичээл тогтмол хийдэг болбол «Библийн сургаал» номоос үзэж эхлэх юм уу, «Сайн мэдээ» товхимлоо дуустал нь үзэж болох юм. «Библийн сургаал» номыг хэзээ үзэж эхлэхээ дэлгэрүүлэгч өөрөө шийдэж болно. Уг номыг эхнээс нь үзэх ёстой юу? Суралцагч бүр өөр өөр байдаг болохоор заавал тэгэх шаардлагагүй. Гэхдээ товхимлоос үзэж байгаа зүйлтэй адилхан сэдвийг «Библийн сургаал» номоос илүү дэлгэрэнгүй үзвэл ихэнх суралцагчийн хувьд ач тустай байдаг.
11. Шинэ товхимлоо сайтар ашиглах ёстойн учир юу вэ?
11 Сайн юм дуулдахаа больсон энэ ертөнцөд, Бурхны Хаанчлал захирч байна, удахгүй зөвт байдал оршдог шинэ ертөнц бий болно гэсэн хамгийн сайн мэдээг бид тунхаглах агуу завшаантай билээ! (Мат. 24:14; 2 Петр 3:13). Энэ мэдээг сонссон олон хүн «Энх амгаланг тунхаглаж, аз жаргалын сайн мэдээг авчран, авралыг зарлаж: „Чиний Бурхан хаанчилна“ гэж Сионд өгүүлэх сайн мэдээг дэлгэрүүлэгчийн хөл нь уулсын дээр ямар үзэсгэлэнтэй вэ!» гэсэн үгийн үнэнийг ойлгоно (Ис. 52:7). Шинэ товхимлоо ашиглан, үнэнийг хайдаг хүмүүст Бурхнаас ирсэн сайн мэдээг хүргэцгээе!
[5-р хуудасны хавсралт]
Бурхан болон Библид итгэдэггүй хүмүүстэй ярихдаа:
● Зарим газар хүмүүс «Бурхан», «Библи» гэдэг үгийг сонсоод яриа тасалдаг. Анх уулзахдаа ихэвчлэн хэсгийнхээ хүмүүсийн сонирхдог сэдвээр, тухайлбал, сайн төр засаг хэрэгтэй байгаа тухай, гэр бүлд тустай зөвлөгөө хаанаас авах тухай, биднийг ямар ирээдүй хүлээж байгаа тухай ярилцвал хамгийн сайн байдаг. Хэд хэдэн удаа уулзаж, Библид итгэхийн учрыг, Бурхан байдгийг хаанаас мэдэж болохыг ярилцсаны дараа «Сайн мэдээ» товхимлоо үзүүлж болох юм.
[6-р хуудасны хавсралт]
Айлаар дэлгэрүүлэхдээ:
● «Хүн төрөлхтний ирээдүйн талаар Бурхан ямар санаа зорилготойг хаанаас мэдэж болохыг танд үзүүлэх гэсэн юм. Бурхан биднийг зовлонгоос ангижруулах болов уу гэж та бодож байсан уу? [Хариулахыг нь хүлээнэ.] Энэ асуултын хариуг Библийн хаана бичсэн байдгийг уг товхимлоос мэдэж аваарай. [Гэрийн эзэнд товхимлоо өгөөд 1-р хичээлийн эхний догол мөр, Иеремиа 29:11-ийг уншина.] Бурхан биднийг ирээдүйд сайн сайхан амьдруулахыг хүсдэг нь эндээс харагдаж байгаа биз? [Хариулахыг нь хүлээнэ.] Танд энэ товхимлыг өгье. Дараагийн удаа хоёрдугаар догол мөрийг ярилцаж, „Бурхан биднийг зовлонгоос яаж ангижруулах вэ?“ гэсэн асуултын хариуг Библиэс мэдэж авъя». Анх уулзахад гэрийн эзэн завтай байвал хоёр дахь догол мөрийг, тэнд дурдсан Библийн гурван зүйлийг уншиж ярилцана. Дахин уулзахдаа хоёрдугаар асуултыг ярилцахаар тохирно.
● «Олон хүн Бурханд залбирдаг. Хэцүү үедээ бүр ч их залбирдаг. Та залбирдаг уу? [Хариулахыг нь хүлээнэ.] Бурхан бүх залбирлыг сонсдог уу, эсвэл таалалд нь нийцдэггүй залбирал гэж байдаг болов уу? [Хариулахыг нь хүлээнэ.] Энэ асуултын хариуг Библийн хаана бичсэн байдгийг уг товхимлоос мэдэж аваарай. [Товхимлоо өгөөд 12-р хичээлийн эхний догол мөр, «уншина уу» гэсэн Библийн зүйлийг ярилцана.] Бурхан залбирлыг маань чих тавин сонсдог байх нь. Гэхдээ залбирлынхаа хариуг авъя гэвэл Бурхныг сайн мэдэх хэрэгтэй. [2-р хичээлийг гаргаад жижиг гарчгуудыг онцолно.] Танд энэ товхимлыг өгье. Дараагийн удаа эдгээр сонирхолтой асуултын хариуг Библиэс мэдэж авцгаая».
● «Ирээдүйд юу болох бол гэж хүмүүс санаа зовдог. Таны бодлоор байдал сайжрах болов уу? [Хариулахыг нь хүлээнэ.] Найдвар төрүүлдэг сайхан мэдээ Библид бичсэн байдгийг мэдээд олон хүн гайхдаг. Библид эдгээр асуултын хариу бий». Товхимлоо өгч хамгийн арын хуудсан дахь асуултуудаас алийг нь сонирхож байгааг нь асууна. Тэгээд сонгосон хичээлийг нь гаргаад Библийн хичээл яаж хийдгийг үзүүлнэ. Тухайн хичээлийн дараагийнх нь асуултыг ярилцахаар тохирно.
[7-р хуудасны хавсралт]
Библийн хичээл шууд эхлээрэй:
● «Библийн хичээл хийхэд зориулсан шинэ товхимлыг танилцуулж явна. Энэ товхимол олон чухал асуултын хариуг Библийн хаанаас олж болохыг заасан 15 хичээлтэй. [Товхимлын нүүр болон арын хуудсыг үзүүлнэ.] Та Библи судалж үзсэн үү? [Хариулахыг нь хүлээнэ.] Энэ товхимлын хичээл нь энгийн, ойлгомжтой. [3-р хичээлийн 3-р асуултын эхний догол мөрийг ярилцаж, Илчлэлт 21:4, 5-ыг уншина. Тохиромжтой гэж үзвэл дараагийн догол мөр болон «уншина уу» гэсэн Библийн зүйлийг ярилцана.] Энэ товхимлыг танд өгье. Та энэ товхимлоор ганцхан удаа Библийн хичээл хийгээд үзээрэй. Тэгээд цааш нь үргэлжлүүлэх эсэхээ өөрөө шийдээрэй. Дараа уулзахдаа эхний энэ ганцхан хуудас хичээлийг үзье».
[7-р хуудасны хавсралт]
Давтан уулзалт хийхдээ шинэ товхимлоос ярилцаарай:
● Сонирхсон хүнтэй давтан уулзалт хийхдээ «Тантай дахин уулзсандаа баяртай байна. Танд ийм товхимол авчирлаа. Хүмүүсийн сонирхдог олон асуултад Библи юу гэж хариулдгийг энд бичсэн. [Товхимлоо өгөөд арын хуудсыг үзүүлнэ.] Та аль сэдвийг нь сонирхож байна вэ? [Хариулахыг нь хүлээнэ. Сонгосон хичээлийг нь гаргана.] Энэ товхимлын тусламжтайгаар сонирхсон асуултынхаа хариуг Библиэс яаж олохыг танд үзүүлье» гэж хэлж болно. Ганц хоёр догол мөр болон «уншина уу» гэсэн Библийн зүйлийг ярилцан Библийн хичээл яаж явуулдгийг үзүүлнэ. Ингээд Библийн хичээл эхэллээ гэсэн үг! Айлын хүнд товхимлоо өгч дахин уулзахаар тохироорой. Тухайн хичээлээ үзэж дуусаад айлын хүнээр өөр хичээл сонгуулж үзэх юм уу, эхнээс нь үзэж болно.