Ганцаардал гэгч тулгамдсан асуудал—Библид юу гэж байдаг вэ?

Олон улсад явуулсан саяхны судалгаагаарa 4 хүн тутмын нэг нь ганцаардаж байгаа гэсэн тооцоо гарчээ.

• «Нийгмийн харилцаа дутагдах асуудал хэнийг ч тойрдоггүй. Нас хүйс, хаана амьдардгаас үл шалтгаалан бусдаас холдож хөндийрч болох юм»—Дэлхийн Эрүүл Мэндийн Байгууллагын Нийгмийн Харилцааны комиссын дарга Чидо Мпемба.

Зөвхөн ахимаг насны эсвэл ганцаараа амьдардаг хүмүүс ганцаарддаг гэж зарим хүн боддог. Гэвч үнэндээ залуу насны, эрүүл чийрэг, амжилттай яваа, бүр гэр бүлтэй хүмүүс ч ганцаарддаг. Нийгмийн харилцаа дутагдах, ганцаардах нь бие махбодын болон сэтгэцийн эрүүл мэндэд их хортой.

• «Ганцаардах гэдгээр зүгээр л уйтгарлаж гуниглахыг хэлдэггүй» гэж АНУ-ын анагаах ухааны тэргүүлэх мэргэжилтэн, доктор Вивек Мурти хэлжээ. Мөн тэрбээр: «Бусдаас холдож хөндийрч, ганцаардах нь хүний эрүүл мэнд, амь насанд асар их хортой. Өдөрт 15 ширхэг тамхи татдаг хүнтэй адилхан эрсдэлд оруулдаг» гэжээ.

Библид юу гэж байдаг вэ?

Бүтээгч маань биднийг ганцаардаасай гэж хүсдэггүй. Бурхан хүмүүсийг анх бүтээхдээ нэг нэгэнтэйгээ дотно, жаргалтай байгаасай гэж санаж зорьсон. Тэр санаа зорилго нь өөрчлөгдөөгүй.

• Библийн зарчим: «Бурхан: “Хүн ганцаараа амьдрах нь сайн биш” гэж хэлжээ» (Эхлэл 2:18).

Бурхан биднийг өөртэй нь дотно болоосой гэж хүсдэг. Өөрт нь ойртон дотносохыг хичээвэл бидэнд ч гэсэн ойртон дотносно гэж амладаг (Яаков 4:8).

• Библийн зарчим: «Бурхны тухай мэдэх хэрэгтэйгээ ухамсарладаг хүн жаргалтай. Учир нь тэнгэрийн Хаант төр тийм хүнийх» (Матай 5:3).

Бусадтай хамт өөрийг нь шүтээсэй гэж Бурхан хүсдэг. Тэгдэг хүн илүү өөдрөг, жаргалтай болдог.

• Библийн зарчим: «Сайн юм хийдэг, хайрладаг болоход нь туслахын тулд нэг нэгэндээ санаа тавьж, ... үргэлж цуглаж, бие биеэ урамшуулан зоригжуулж байя» (Еврей 10:24, 25).

Ганцаардалтай яагаад тэмцэх хэрэгтэйг дэлгэрэнгүй бичсэн «Харилцаа холбоо хөгжсөн нийгэм дэх ганцаардал» (англи) гэсэн өгүүллийг уншаарай.