Dhilebiwe ni Lukaji

3 Yaka ya neekumi neetanu ya othonga wa Tiberiyu Sezare, Ponsiyu Pilatu aali musadoro ooJudeya, Erodi* aali musadoro eelabo* yoGalileya, ddibileya Filipi aali musadoro eelabo ya murudda woItureya ni woTarakoniti mbwenye Lizaniya aali musadoro eelabo yoAbileni. 2 Malabo a namakutha munlubale Anaji ni Kayifaji, Juwawu mwaana Zakariya wawiwa madhu a Mulugu agaali mwiddeddereni.

3 Malabo yaale Juwawu weedda murudda waatene woJordawu, alaleyaga obaddiziwa watonyihedha othwaruwa ni oleveleliwa wa dhoothega, 4 mowiwanana ni madhu elebiwe livuru na namavuhulela Izayiya, nihikala ndhu nnithana mwiddeddereni negihina: “Mmwegeredhele Yehova* dila! Mogolele dila dhaye. 5 Muliddi dhaatedhene dhivuheleliwe, teto mwango ni dhipwatapwatadha dhipwesiwe; dila dhokoromana dhogoliwe, dila dhokwakwathusa dhikale musalasala; 6 yindo aatene* enere woona ovulusa wa Mulugu.”

7 Juwawu nuwoona muthithi waathu waddamelaga mburo yoole wihina obaddiziwe, oliye oowoga naliwa egihina: “Nyu odhuulu weevili, baani uwaddenleni wihina munere wanda othawa owali wa Mulugu onafuna odha? 8 Mowindo, mweregena dhithu dhinoniha wihina muhuthwaruwa. Kamwilekethege mwaannya mwegihina: ‘Iyo nili ahima Aabaraawu.’ Mwebaribarene miyo ginowuwaddelani wihina Mulugu afuna podi wasaddula mabwe ala wihina ekale ahima Aabaraawu. 9 Mwebaribarene maxadu ohumala opanihiwa wihina agwadde musisi dha muthanko, mwaha muthanko ohunavaha dhowima dhapama onere ogwaddiwa ovokedhiwe vamoothoni.”

10 Muthithi waathu womukoha wegihina: “Ki vano iyo nere ddi?” 11 Oliye wawakula egihina: “Ole anna malaya menli, mamodha anvahe mukwaye, ole anna yoojha erena emodhave.” 12 Naanamakukusaya musoko, yofiya wihina ebaddiziwe, ni yomukoha yegihina: “Namahudhiha, ki iyo nere ddi?” 13 Oliye owawakula egihina: “Mwakukusaga musoko, kamulupege nlamulona.” 14 Ohiya eyo, naatoropaya yomukoha yegihina: “Ki iyo nere ddi?” Oliye owawakula egihina: “Kamwawiyelege* athu newene kamwawinkedhege ethu yaheriliwana, mbwenye muhagalalege niile munaakelinyu.”

15 Woona wihina nlogo noojhehedha odha wa Kiristu, aatene wambela omwanganyedha Juwawu mmurimani mwewa yegihina, “Nerege Kiristuya di yola?” 16 Juwawu wawakula aatene egihina: “Miyo ginubaddizani ni manjhe, mbwenye ole anadha mundduli mwaaga, dakopolo ogikwaranya miyo, newene kaginafwanelela otapula sandaliya dhaye. Oliye aneere wubaddizani ni muzimu wotxena vamodha ni mootho. 17 Oliye ohukanna paya* mmadani oonvethana tirigu ni aneere oxela mburo amuugeliyevo tirigu, amala aneere omugela vasasarani,* mbwenye makataya aneere wapaha vamoothoni ohunadha othima.”

18 Ohiya eyo, Juwawu waakongomedhave dhithu dhimodha dhowinjhiva ni odidelave walaleya athu muthenga dhapama. 19 Mbwenye oliye oomusumulula Erodi, musadoro a murudda mwaha wa Erodiya mwadha ddibile, ni mwaha dhithu dhaatedhene dhabure eeriyena, 20 mwaha wa yeyo, Erodi omwerela dhithu dhimodha dhabure wodhela onvokedha mukambura Juwawu.

21 Vano nlogo naatenene nigamanle obaddiziwa, Yesu odhowa obaddiziwa. Mudhidhi alobelaga odhulu ofuguwa, 22 muzimu wotxena omukitela, woneyaga ninga kangayiwa, ni okuma ndhu odhulu nawoga negihina: “We oli mwanaga ginudhivelimi; miyo ginowurumedha.”