Mpaganyo Wathima

Nuuvira mweri minli, amwaana Ezarayeli nuwabuwa Niya Yoofila aliwa ofiya omwangoni Sinayi ni okala wewule mwanamudhidhene. Yehova omuruma Moyizeji wihina agwele omwangoni Sinayi ni owoga egi: ‘Miyo giivulusa nlogo naamwaana Ezarayeli. Yerana dhithu dhaatedhene ginaarumimi, enere okala nlogo naaga nathima.’ Moyizeji okita omwangoni wule wawaddela amwaana Ezarayeli dhithu Yehova aamwaddeliye. Ohunona yaakunliwa? Aliwa wera: ‘Iyo nnere werana dhithu dhaatedhene Yehova anaanirumiye.’

Moyizeji ogwela dila yanabili omwangoni Sinayi. Vano Yehova owoga nuliye egi: ‘Yavira malabo mararu ginere owoga naamwaana Ezarayeli. Wawaddele wihina ehigwele mwango wo Sinayi.’ Moyizeji okita ni wawaddela amwaana Ezarayeli wihina yiwegeredhe mwaha Yehova eere owoga ethu yathima.

Nuuvira malabo mararu, amwaana Ezarayeli woona ojerima ni murabo wooriba vadhulu va mwango Sinayi. Teto yahiwa oruma wa dari ni oruma wa buzina. Nuwindo woona mootho okitaga vamwangoni. Amwaana Ezarayeli obajha woova. Mwangoya odhaaleliwa mwiisi, wambela oddiginyeya teto oruma wa buzina othabwaga. Vano vaari va mootho, amwaana Ezarayeli wiwa ndhu na Mulugu negi: ‘Miyo gili Yehova. Kammwebedhe mulugu mmodhaya.’

Moyizeji ogwelave omwangoni wule woSinayi, vano Yehova onvaha malamulo wihina amwaana Ezarayeli yaharege. Malamuloya yawoga makalelo amwaana Ezarayeli yaamulabelegiwa Mulugu. Yowoga ethu yahoweliwa werana ni yahahoweliwa werana. Moyizeji waleba malamuloya ni wawilerela amwaana Ezarayeli. Vano amwaana Ezarayeli ompaganya Mulugu yegi: ‘Yehova, nnere werana dhaatedhene munaaniruminyu.’ Nerege yahakwanihedha mpaganyo wewa?