Muthanko Munlubale

Emahiyu dhaala, mwene Nabukodonozori ahiroha ethu emodhaya yamuthukulele woova vanlubale. Oliye waloba alobwana athotho wihina emwaddele yotapulela ya ethu aarohiliye. Mbwenye kaavo andile otapulela yoroha ele. Vano mwene omwithana Daniyeli ni owoga nuliye egi:

‘Miyo girohile muthanko munlubale. Muthankoya wahithabwa otaama ni wofiya odhulu. Teto muthankoya wowoneya elabo yaatene. Ohiya eyo, muthankoya wahikanna matakuru ooriya ni wahikanna dhowima dhowinjhiva. Anenyama yodhiveliwa withuwa vamurintini va muthanko ole. Teto balame dhoomagamo dhithunjhi dhewa. Nuwindo ofiya mungero dhaala adheela odhulu ni owoga egi: “Mmothihe muthankoya ni mugwadde mujhinddadha. Mbwenye nigoddona muhiye venvo vamodha ni musisidha, mwindo muwarihe kara ya mujhila ni ya kobere. Murima waaye ohiye okala murima wa muthu, vano avahiwe murima wa mwanenyama. Wihina athu aatene enone wi Namadhuludhulu dili namathonga aathu aatene ni wihina oliye ananvaha omwene ole ananfuniyena.”’

Nuwindo, Yehova omwaddela Daniyeli yotapulela ya yoroha ele aana mwene Nabukodonozori. Vano Daniyeli nuunona yotapulelaya oliye wambela woova. Daniyeli owoga ni mwene egi: ‘Miyo gubuwela wihina yoroha ela yawagana amwiddani enyu, mbwenye yorohaya enawoga wodhela nyu nabwiya. Nyu nabwiya dili muthanko munlubale omothihiwe. Nabwiya, nyu munere waakiwa omwene weenyu ni munerege otakuna mpidda ninga mwanenyama. Mbwenye woona wihina mungero ole awogile wihina nihiiwe nigoddona ni musisidha, wavira mwana mudhidhi nyu munere ohogolowela okala mwene.’

Nuuvira yaka modha, mwene Nabukodonozori eeddaga vadhulu va nyumba ya palasiyu yaye ni atikinaga luwani yoBabiloniya, oliye owoga egi: ‘Kasugwa makalelo ewomile luwani ela gimagilimi. Miyo dili mwene apama wapitha amwene aatene!’ Numala wawoga madhu ala mwene Nabukodonozori wiwa ndhu nadhela odhulu negi: ‘Nabukodonozori! Vano we ohuyelela omwene wawo.’

Obajha mudhidhi yoole, mwene Nabukodonozori otaduwa okalaga ninga mwanenyama. Mwaha wa yeyo, oliye ovenyawo opalasiyu ni odhowa okalaga ni anenyama mukokolani. Mathithi a mwene Nabukodonozori wunnuwa ofiyedha okalaga ninga mooya a pangwe. Teto kata dhaaye olapa ninga dha pangwe.

Nuuvira yaka 7, mwene Nabukodonozori ohogolowela emuthu yaye ninga kale. Nuwindo Yehova omuhiya Nabukodonozori wi ahogolowele okala mwene ooBabiloniya. Vano Mwene Nabukodonozori owoga egi: ‘Odhulu waatewene kawo mwene ahili Yehova, Oliye onofwanelela webedhiwa. Vano gihikanna ebaribari wi Yehova Namathonga. Oliye onowahudhiha athu owithukula okala owiyeviha ni ononvaha omwene ole ananfuniyena.’