Madhu Yaalebiwe Vasirini

Nuuvira mudhidhi, Belsazari okala mwene ooBabiloniya. Labo dhaala mahiyu, oliye wegeredha mathanga ni wawithana athu aatene athima ooBabiloniya. Nuwindo, Belsazari waruma anamalabaye wihina edhena kopo dha woru mwene Nabukodonozori aathukunliye mutempulu mwa Yehova. Belsazari naathu aatene awithaniliye vamathangani yanna ong’wela kopo ndhe dha woru wula yavuwihaga amulugu ewa. Morurumusa okumelela nlada na muthu! Nlada nne waleba vasirini madhu yahandiwa wawonelamo.

Vano, Belsazari wambela ogurumela mwaha woova. Oliye wawithana alobwana athotho a mumweneni mwaaye ni owoga egi: ‘Anaande watapulela madhu ala, anakale muthu athima anatharu mumweneni mwaaga!’ Alobwana aatene athotho oxixa watapulela madhu ale mbwenye kaavo andile. Vano, musano owoga ni Belsazari egi: ‘Ohukalawo mulobwana dhaala anithaniwa Daniyeli atapulelesa dhoroha dha Nabukodonozori. Oliye aneere wanda watapulela madhu ayo eli vasirini.’

Daniyeli odhowa owoga ni mwene. Vano Belsazari owoga egi: ‘Daniyeli, wanda wileri ni watapulela madhu ala ginere wuvaha kolare na woru ni onere okala muthu anatharu athima mumweneni mwaaga.’ Daniyeli wakula egi: ‘Nabwiya miyo kaginafuna, mbwenye naarive dhigaali ndo ginere watapulela madhu ala. Baabinyu, Nabukodonozori, aali muthu owithukula, mbwenye Yehova omusinyusa. Naarive muganonne dhithu dhaatedhene dhimpadduwele, nyu mwene muhuthukula kopo dha mutempulu ong’welaga. Mwaha wa yeyo, Yehova ohuthabwa otakaleliwa. Bumwahaya adhe alebege vasirini madhu ala owi: Mene, Mene, Tekel ni Parsim. Madhu ala enatapulela wihina mwene ooMedu ni ooPersiya anere omugujhula Babiloniya, vano nyu kamunakale mwene.’

Luwani yoBabiloniya yahikanna txinga enlubale ni yapeliwe ni muhinjhe wooddiha. Bumwahaya athu aatene yubuwela wi kaavo ande omugujhula Babiloniya. Mbwenye, emahiyu yeele anyakoddo oMedu ni oPersiya omurijha Babiloniya. Mwene ooPersiya iithaniwa Siru wahabusa manjhe, ndo yaali yokweya anyakoddo aaye waabuwa. Aliwa nuufiya yafwanyile musiwo dha luwani dhigaali dhofuguwadhene! Vano anyakoddo ovolowa muluwani ele, ogonjhiha ni ompa Belsazari vamodha ni anyakoddo aye. Nuwindo Siru okala mwene ooBabiloniya.

Nuuvira yaka modha, Siru owoga ni athu aatene egi: ‘Yehova ohugiruma ovenyihedha tempulu yaye oJeruzale. Ginere wahiya maJudewu aatene enna efunelo yowakavihera mabasa ayo wi edhowe.’ Nuuvira yaka 70 Jeruzale agagujhuliwe, wakwanela mpaganyo wa Yehova wowihina maJudewu owinjhiva yere ohogolowela oJeruzale. Siru ohogolosela oJeruzale kopo dha woru, dha parata ni dhithu dhaatedhene mwene Nabukodonozori aathukunliye mutempulu. Onowoona makalelo Yehova amulabihedhe Siru wihina aakavihere maJudewu?