Daniyeli Agavokedhiwe Munikolani na Apoddogoma

Mwene mmodha ooBabiloniya ithaniwa Dariyu, aali ooMedu. Oliye ahinona wihina Daniyeli aali muthu athima. Bumwahaya adhe amuthomege Daniyeli wi akale namasogolela aalobwana aatene athima ooBabiloniya. Mbwenye alobwana ale yomukalela nrima Daniyeli ni yafuna empe. Aliwa yahinona wihina Daniyeli oolobela wa Yehova dila tharu kadda labo. Nuwindo, aliwa odhowa owoga ni mwene yegi: ‘Mwene Dariyu, mwasinari nlamulo nna nnawoga wi athu aatene elobelege wa nyu baahi. Anaalobele wa mulugu mmodhaya, avokedhiwe munikolani naapoddogoma.’ Mwene Dariyu orumedha ni wasinari nlamulo nne.

Daniyeli nuunona odhowa vaade vaye. Nuufiya, oliye odhowa vajanelani vaye, ofugula nuwindo okokora ni wambela olobela wa Yehova. Vano mudhidhi alobelaga amwiddani ale ovolowa ni onfwanya alobelaga. Nuumala, aliwa odhowa omwaddela Dariyu yegi: ‘Mwene, Daniyeli kuwiweleleni! Oliye analobela wa Mulugu aaye dila thaaru malabo aamatene.’ Mwene Dariyu oomudhivela vanlubale Daniyeli ni kaafuna wihina akwe. Dariyu omala labo nantero ubuwelaga makalelo onvulusa Daniyeli. Mbwenye kadhandeyile. Mwaha oliye ahasinari nlamulo naharumedha muthu osaddula yothoma yaye. Vano, oliye waruma alobwanaye wihina envokedhe Daniyeli munikolani na apoddogoma.

Labo nenne, Dariyu othuwathuwa vanlubale ofiyedha ohanda ogona. Mambesene, oliye othamagela onikolani wule ni okuwa egi: ‘Daniyeli, Mulugwawo uhanda wuvulusa?’

Motikiniha, Daniyeli wakula egi: ‘Hee, nabwiya! Mungero a Yehova ohufuga mulomo dhaatedhene dha apoddogoma!’ Dariyu ohagalala vanlubale ni waloba alobwana aye wihina emukumihemo Daniyeli munikolani mune. Daniyeli newene kawagiwe naapoddogoma! Vano mwene oruma wihina alobwana ale yamukalela nrima Daniyeli evokedhiwe munikolani mune. Alobwana ale yatxiwe ehinafiye vati.

Nuumala, Dariyu okumiha nlamulo nawoga negihina: ‘Athu aatene emwebedhege Mulugu a Daniyeli. Oliye keenyile wihina apoddogoma emutakune Daniyeli.’

Onoonamo aavi omutajhiha Daniyeli wodhela olobela wa Yehova malabo aamatene?