Estere Anovulusa Nlogo Naye

Estere aali mwana namwali a nlogo na maJudewu mbwenye akala oSuza, luwani yoPersiya. Oliye akala oSuza mwaha yaka dhowinjhivadhene mundduli mwene Nabukodonozori eere wathukula amudhaaye yakala oJeruzale waadhowana oSuza. Estere aaleliwe ni pirimwaye Mordekayi. Mordekayi aali mudhaari a Asuwero, mwene ooPersiya.

Mwene Asuwero anfuna musano muxa mumweneni mwaaye. Vano adhaari aye, wathukula anamwali aatene oowoma vamodha ni Estereya wihina amusakulevo musanoya. Ohumunona namwali aasakuliwe ni mwene? Aali Estere! Mbwenye Mordekayi omwaaddela Estere wihina anaamwaddele muthu wi aali a nlogo na maJudewu.

Mumweneni mune, ahikalamo mulobwana dhaala owithukula ithaniwa Ama. Oliye aali namasogolela aalobwana aatene athima ni afuna wi athu aatene emukokorelege. Mbwenye Mordekayi kaamukokorela. Eyo yomutakalela vanlubale Ama bumwahaya oliye ofunaga ompa! Teto, oliye nuunona wihina Mordekayi aali muJudewu osayela makalelo wihina aape maJudewu aatene. Oliye owoga ni mwene egi: ‘Majudewu athu owoopiha! Bumwahaya musayele makalelo wihina epiwe.’ Mwene Asuwero nuuwiwa, omweenya Ama wi akumihe nlamulo nawoga wihina labo na 13 mweri wa Adar maJudewu aatene epiwe. Mbwenye Yehova anna woona dhithu ndhe dhapadduwa.

Estere kaanonne wodhela nlamulo nne naakumihiwe. Bumwahaya Mordekayi, ovahedhela nlamulo nne wihina inkeleliwe Estere ni owoga wihina asayele makalelo oowoga ni mwene. Vano Estere waakula egi: ‘Muthu di muthu anadhowa owoga ni mwene ahiithaniwe podi opiwa. Teto onoovira mweri wantero mwene ahigithanenle vamentoni vaye! Mbwenye gihiiwa, ginere odhowa. Mwene agitonya ni muddooddo waye kaginapiwe. Mbwenye aahigitonya ginere opiwa.’

Vano Estere odhowa vathaddo va mwene. Mwene nuumona Estere, omutonya ni muddooddo waye. Vano oliye ovolowa ofiya vaali mwene, Asuwero, omukoha egi: ‘Musano Estere onafuna ddi?’ Estere waakula egi: ‘Ginafuna gulobeni nyu vamodha ni Ama wihina mudhe nijantari vaade.’ Mudhidhi ejhaga, Estere wawithanela jantari mmodhaya. Vano labo nanabili mudhidhi ejhaga, mwene omukoha Estere ethu afuniye. Oliye waakula egi: ‘Ohukalawo muthu anafuna otolosa nlogo naaga ni anafuna ogipa ni miyoya! Kamwerena, nivuluseni mwene!’ Mwene okoha egi: ‘Baani anafuna wupani?’ Nuwindo Estere waakula egi: ‘Di mulobwana ola abure, Ama!’ Mwene otakaleliwa vanlubale mudhidhi mmodhave oruma wihina Ama apiwe.

Mudhidhi yoole akudda Persiya kiyaasaddula malamulo, bumwahaya newene mwene Asuwero kaande osaddula nlamulo aakumihile Ama. Nuwindo, mwene Asuwero omuthoma Mordekayi wihina akale namasogolela aalobwana aatene athima ni oruma wihina Mordekayi akumihe nlamulo nimodha. Nlamulo nna nixa nawoga wihina maJudewu yohowela wibarela yarijhiwa ni amwiddani ewa. Mowindala, labo na 13 mweri wa Adar, maJudewu wagonjhiha amwiddani ewa. Nuwindo, kadda yaka maJudewu yowajha mathanga yubuwelaga labo nne yavulusiwiwa.