MAIO

Makiristawu amudhidhi yole yahifwanyiwa dala ‘yapenle elabo yaatene.’ Mohaganyedha anamasogolela emudhi yahithuwathuwa vanlubale evedaga makalelo ojhiha emudhi yewa. Kubuwela makalelo dala ela yathuwathuwihiwa azombwe yerilena yothoma wihina edhowegeve yaparaga mabasa olaleya. Podi wera aliwa yowubuwela wahiya mabasa ala. Naarive kadda muthu awoonaga makathamiho ale mwa makalelo aye, makiristawu ale yahiveda makalelo owalemelela. Teto, aliwa obajha olaleya mwamakalelo yandiwa ni yahihagalala ogawa dhithu yanniwana ni makiristawu oJudeya. (Dho. 11:29, 30) Ale yaakaviheriwe ni dhithu dhomwilini yahoona pamadhene nikavihero na Yehova. (Mat. 6:31-33) Mwaha wa nikavihero nne yakeliwa, eyo yahaathukulela wawaddamela addibila. Ale yakavihere ni korowa obe ni dhithu dhimodha, yahoona ohagalala onadha mwaha wowakavihera athu amodha. — Dho. 20:35. Namasugwera 04/23 epaddi 16 ddima 12-13

Malabo mamodha, Yehova podi wawakula malobelo ehu wodhela walabihedha athu yahinamwebedha wihina anikavihere. Motajhiha, Yehova ahimweriha mwene Artaxerxi omweenya Neemiya ohogolowela oJeruzale wihina akavihere mabasa oomaga txinga. (Nee. 2:3-6) Peeno Yehova podi werana emodhave wodhela walabihedha athu yahinamwebedha wihina enikavihere. Malabo owinjhivene malobelo ehu kinakuliwa mwamakalelo najhehedhihu. Mbwenye dhowakula dha malobelo Yehova ananivahiye, sidhendhe nnahowelihu wihina ndidele okala ororomeleya wa oliye. Bumwahaya okalege mento wihina woone makalelo Yehova anawakuliye malobelo awo. Sapama waaja mudhidhi wihina nipendde makalelo Yehova anawakuliye malobelo ehu. (Sal. 66:19, 20) Iyo nnowoniha wi nihikanna nroromelo naalobelaga wa Yehova ni narumedhaga makalelo Yehova anawakuliye malobelo ehu naarive awakulaga mwamakalelo nahajhehedhihu. — Ebe. 11:6. Namasugwera 05/23 epaddi 11 ddima 13; epaddi 12 ddima 15-16

Niivelelaga wa Yehova, iyo nahimpaganya omulabela Oliyene baahi ni werana efunelo yaye egumihu yatene. Bumwahaya nnohowela wakwanihedha mpaganyo ola. Wakwanihedha dhatedhene nimpaganyilihu Yehova, kahi ethu yonyemela. Mweebaribarene, Yehova anipaddusile wihina neregena efunelo yaye. (Ovuhu. 4:11) Oliye anipaddusile ni efunelo yomunona ni yomulabela, teto anipaddusile nifwanafwaniho naaye. Bumwahaya nnowanda omwaddamela Yehova ni nnohagalala werana efunelo yaye. Ohiya eyo, neragana efunelo ya Yehova ni naamwiwelelaga mwanaye Yesu ‘murima dhehu dhinotodoleya.’ (Mat. 11:28-30) Bumwahaya odhowegeve wenjhedhedhaga odhivela onniwena ni Yehova, wodhela opendda dhithu dhatedhene dhapama uwereliye ni mareeliho owinjhiva anafuniye wuvaha osogolo. Odhivela onniwena ni Mulugu wenjhedhedheyaga, enerege wukweyela omwiwelela. (1 Juwa. 5:3) Yesu ahanda werana efunelo ya Yehova mwaha oolobela alobaga nikavihero ni awubuwela baahi mareeliho afuniye wawakela. (Ebe. 5:7; 12:2) Ndala ninga Yesu, olobele wa Yehova olobaga nikavihero wihina wubuwelegeve ejhehedhelo yawo yosogolo. Namasugwera 08/23 epaddi 27-28 ddima 4-5

Iyo aatene nnowariiha athu enanda ojheha ethu-sithu ehinyanyuwile, teto sapama okala naathu enanivilelana naarive niviriganihaga. Ohiya eyo, nnomutamalela muthu anihudhihile Bibiliya mwaha onivilelana mudhidhi niilibihedhaga wihina nihudhere orumedha ni oparihedha mabasa ndhe nnahudherihu mBibiliyani. Teto yathimaya, iyo nnomutamalela vanlubale Yehova mwaha onivilelana ofiyedha peeno. Ebaribari wihina iyo nnomutikina muthu oovilela, mbwenye podi wera winonirusa okala athu oovilela. Motajhiha, podi ohikala ethu yokweya ojheha nuuvilela vasimaforuni wula naaguvaga. Teto podi okala ethu yorusa okala oovilela naaligiwaga. Malabo mamodha, ojheha nuuvilela mpaganyo wa Yehova wodhela elabo exa podi ohikala ethu yokweya. Mbwenye nohowela ovilela. Namasugwera 08/23 epaddi 20 ddima 1-2

Kubuwela ethu Yehova amurumiliye Jideyawu. Oliye ohowela wavugula anyakoddo aye. Podi wera Jideyawu ahubuwela egi: ‘Eyo enohoweleya? Gerege dhaaga dhinere ogeddela pama?’ Naarive dhigaali ndo, Jideyawu ahiiwelela. Peeno anamaholela mulogo enohara yotajhiha ya Jideyawu wodhela oparihedha mabasa masadduwo enadhela munikuruni mwa Yehova. (Ebe. 13:17) Jideyawu ahimwiwelela Yehova naarive oovaga ni anonaga wi eere weeka egumaye vang’ovini. (Juí. 9:17) Mbwenye nulibihiwa ni Yehova, Jideyawu ahikanna ebaribari wihina Yehova eere omukavihera obarela nlogo naaye. Anamaholela mulogo enakala murudda mabasa ehu enakoddihiwiwa, enohara yotajhiha ya Jideyawu. Nuuliba murima, aliwa enowasogolela mabasa olaleya ni wegeredha mutugumano, naarive enonaga wi aliwa podi ovokedhiwa mukambura, okohiwa ni anamathonga, wayelela mabasa obe ofwanyiwa makathamiho bi makathamiho. Muwari mwa ohoseya winlubale, anamaholela mulogo enere ohowela oliba murima wihina yande wiwelela dhoholela enakeliwa naarive egaali yowopiha ohara dhoholeladha. Namasugwera 06/23 epaddi 5-6 ddima 12-13

Yehova ohupweha yopadduwa ya Jeyoyada mBibiliyani wihina iyo nihudhere nuliye. (Rom. 15:4) Teto Jeyoyada nuukwa, Oliye ahikanna ofuru wookoyiwa ‘Luwani ya Davidi, mmasiye yakoyiwa mamwene, mwaha wi oliye aherana dhithu dhapama wIzarayeli mowiwanana ni efunelo ya Yehova ni nyumba yaye.’ (2 Cró. 24:15, 16) Thalako ya Jeyoyada podi onikavihera wenjhedhedha omoova wehu Yehova. Anamaholela mulogo podi omutajhiha Jeyoyada wodhela osayela makalelo oobarela mulogo. (Dho. 20:28) Anakalaba podi ohudhera ni yotajhiha ya Jeyoyada wodhela omoova Yehova ni okalave oororomeleya. Teto azombwe podi ohudhera ni yotajhiha ya Yehova wodhela waariha ni waweddiha pama ale eli apogo, ndala ninga Yehova eriliyena ni Jeyoyada, thabwa-thabwa ale enamulabela Yehova yaka dhowinjhivadhene. (Pro. 16:31) Nnere wakavihera ale enaniholela wodhela wawiwelela ni murima wehu waatene. — Ebe. 13:17. Namasugwera 06/23 epaddi 17 ddima 14-15

Wubuwele pama wahinavenyihe moono. Wavenyiha moono dila dhowinjhivadhene podi omuthukulela nameeddiha epaddi ele wutonyaga weyeneve baahi, naarive egaaliwo addibila ehandile wakula. Eyo podi wathukulela addibila amodha ohufunaga ovenyiha moono. (Ecl. 3:7) Addibila owinjhiva yavenyihaga moono, podi okala yorusa ovaha dhowakula dhehu ninga mwafunelihu. Malabo mamodha nameeddiha epaddi ele kanande onitoonya newene dila modha. Eyo podi onuukula. Mbwenye kanitakaleliwe mwaha ohutonyiwa nubuwelaga wihina ddibila ole anikoyenle ntxiga. (Ecl. 7:9) Wahanda wakula ninga mwafuneliwe, ononamo aavi opwasedha ovuruwana dhowakula dhaaddibila amodha windo watamalele mutugumano dhamala? Addibila podi okala oolibene mwaha watamalela mwamakalelo mamodhave walibihiwe ni dhowakula dhawo. Namasugwera 04/23 epaddi 23-24 ddima 14-16

Wahudherege ni wapenddege Madhu a Mulugu. Muthanko onathabwa okala wooliba wakanna musisi dhinathabwa odhowa vati. Nimakalelo mamodhave naathabwaga wahudhera Madhu a Mulugu, nroromelo nehu nnakala nooliba. Ndo iyo nnere wanda okalave txithi. Nahudheraga ni naapenddaga Madhu a Mulugu nnokanna ebaribari wihina ndhe Yehova ananilobiye sapama. (Kol. 2:6, 7) Openddege makalelo dhoholela dha Yehova ni dholaga dhaye dhakaviheriwa adhaari aye akale. Motajhiha, yowoona anna Ezekiyeli oliye ahipwasedha omusugwa pamadhene mungero dhaala apimaga tempulu. Yowoona ele yahimulibiha Ezekiyeli, ni enonihudhiha makalelo oobarela ni owawiwelela malagano a Yehova wihina nimwebedhe mwamakalelo apama. (Eze. 40:1-4; 43:10-12) Ni iyoya, nnopurelamo nadhuheraga ni naapenddaga dhopadduwa dhendha ni dhithu dhoviteya dhinafwanyeya mBibiliyani. Nerana ndo, nnokanna murima woliba, naathabwaga namuroromela Yehova ni murima wehu waatene. — Sal. 112:7. Namasugwera 07/23 epaddi 18 ddima 15-16

Bibiliya ohukanna dhotajhiha dhowinjhiva azombwe enahoweliwa ohara. Dhotajhiha ndha dha mBibiliyani saalobwana yamudhivela Yehova ni yandile wakwanihedha mutholo dhohiyanahiyana wihina esamalele nlogo na Yehova. Teto we podi ofwanya dhotajhiha dhapama ni makiristawu owithwelavo epaddi yomuzimuni vemudhini vawo ni mmulogoni. (Ebe. 13:7) Teto we podi ohara yotajhiha yapama ya Yesu Kiristu. (1 Ped. 2:21) Wahudheraga dhotajhiha ndha, opwasedhe woona dhikalelo dhapama athu ala yonihiliwa. (Ebe. 12:1, 2) Wamala, osayele makalelo owatajhiha alobwana ala. Mulobwana anonne opendda anowabiha wubuwela ahinerena ethu-sithu. Bumwahaya wilibihedhe wihina okanne ni onone olabihedha ekalelo ela yopendda. We podi okanna ekalelo ela wodhela obajha wahudhera malagano a mBibiliyani ni wubuwela makalelo malagano ayo enukaviheriwa mwigumini mwawo. Wamala, walabihedhe malagano ayo weragana yothoma si yothoma enafuna omuhagalasa Yehova. (Sal. 119:9) Eyo ethu yathima vanlubale enafuna wukavihera okala mukiristawu owithwelavo epaddi yomuzimuni. — Pro. 2:11, 12; Ebe. 5:14. Namasugwera 12/23 epaddi 24-25 ddima 4-5

Abaabi podi wakavihera aniwa onona wakula ni makalelo oopwaseya muthu aakoha wodhela dhithu enarumedhiwa. (Tiya. 3:13) Abaabi amodha enowaxagiha aniwa mudhidhi wa ohudhera weemudhi. Aliwa enosakula muselu enonniwa wihina aniwa podi okohiwa yakala oskola ni enowegeredha pamadhene makalelo oowakula. Teto enowahudhiha aniwa makalelo oowoga nupwaseya ni odahinya murima wa ale enaavuruwana. Waxagiha azombwe podi wakavihera aliwa otapulela pamadhene dhithu enarumedhiiwa ni okanna ebaribari wihina dhinawoga Bibiliya sebaribari. Seriye “Os Jovens Perguntam,” enafwanyeya musayitini jw.org enodhana kwaduru dhinaakavihera azombwe. Kwaduru ndho dhinegeredhiwa wihina dhakavihere azombwe olibiha nroromelo newa wodhela dhithu enarumedhiwa ni onona wakula ni madhu eeweene. Emudhi yahudheraga dhipaddi ndha vamodha, enowakavihera athu aatene vamuralani ovaha dhowakula dhopwaseya ni dhinadahinya murima wa ale enaavuruwana. Namasugwera 09/23 epaddi 17 ddima 10; epaddi 18 ddima 15-16

Onokannaga yoluba yomuzimuni yurusile wakwanihedha? Onone wihina kuli wekawo. Motajhiha, Filipi wonelamo wi ohowela olobela dila dhowinjhivadhene ni owomihedha makalelo aye oolobela, mbwenye yomurusa ofwanya mudhidhi wihina alobele wa Yehova. Vano Erika yoluba yaye yaali ofiya mambeseene omutugumanoni wa mmalaleyelo, mbwenye malabo aamateene afiyesa vosavene. Akala we onna wilibihedha wihina wakwanihedhe yoluba mbwenye kunaakwanihedhe, kuwukuwe wubuwelaga wihina kunande. Wakwanihedha yoluba naarive egaali eng’ono enohoweleya mudhidhi ni wilibihedha. Teto, woona wi onna wilibihedha eyo enowoniha wi onovaha thima wandana wawo ni Yehova ni onofuna omulabela nuviheya. Kudduwale wi Yehova onovaha thima wilibihedha wawo. Ebaribari wihina Yehova kanajheha wihina nerana ndhe nahinandihu. (Sal. 103:14; Miq. 6:8) Bumwahaya waasakulaga yoluba yawo, ekale yowedheya ni okanne ebaribari wi onere wakwanihedha. Namasugwera 05/23 epaddi 26 ddima 1-2

Daniyeli aali muzombwe ooliba murima. Oliye oohudhera dhovuhulela dhalebiwe, ninga motajhiha yovuhulela ya Jeremiya. Wodhela ohudhera wula Daniyeli ahifiyedha wonelamo wihina mudhidhi amwaana Ezarayeli yafuniwa okala oBabiloniya ninga adhaari, weere ofiya omakuthulo mohilegela. (Dan. 9:2) Woona dhovuhulela dha mBibiliyani dhakwanelaga, mwebaribarene dhahilibiha nroromelo na Daniyeli ni Yehova. Ole anamuroromela Yehova ni murima waye wamutene, anowoniha oliba murima mwamakalelo ootikiniha. (Omusugwe Romanos 8:31, 32, 37-39.) Yathimaya, Daniyeli kaaselele olobela. (Dan. 6:10) Oliye ooloba nikurumuwelo mwaha dhotheega dhaye ni oonfugulela Yehova murima waye. Teto Daniyeli ooloba nikavihero. (Dan. 9:4, 5, 19) Daniyeli aali muthu ninga iyo, oliye kaabaliwe ni ekalelo ela yoliba murima. Mbwenye oliye ahanda okanna ekalelo ela mwaha wa ohudhera, olobela ni omuroromela Yehova. Namasugwera 08/23 epaddi 3 ddima 4; epaddi 4 ddima 7

Wawiwelela anamathonga winonikavihera ni winowakavihera athu amodha. Nimakalelo baani? Ethu yobajha iyo kannasinyusiwa ninga athu amodhaya yahinawiwela malamulo. (Rom. 13:1, 4) Teto wiwelela wehu podi osaddula monelo wanamathonga wodhela Anamoona a Yehova ninga nikuru. Motajhiha, yaka dhowinjhivadhene mundduli elabo yoNijeriya, anyakoddo yahivolowa munyumbani yOmwene mudhidhi wa mutugumano, yavedaga athu yakodda oliva musoko. Mbwenye komandanti aaholela anyakoddo ale, waloba wihina anyakoddo aatene evenyemo munyumbani mune ni owoga egi: “Anamoona a Yehova enoliva musoko.” Nawiwelelaga anamathonga, nnowathukulela athu okanna monelo wapama wodhela Anamoona a Yehova. Vano podi wera osogolo monelo oyo wapama enniwana wodhela Anamoona a Yehova, podi wabarela addibilihu. Namasugwera 10/23 epaddi 9 ddima 13

Adhaari amodha a Yehova enna ojheha omakuthulo wa dhithu ndha dhabure muwari mwa yakadhene. Monelo waathu, podi okalaga ninga mpaganyo ndha dhinna olegela wakwanela. Mbwenye Yehova ohunona makalelo eli adhaari aye. Oliye ohuwoga nnamavuhulela Abakuki egihina: “Mwaha dhowoona, dhinere wakwanela mudhidhiya wafiya. Mudhidhiya onna othamagela omakuthulo wa dhithu dhatedhene, kunalegele ofiya. Podive verege olegela, odhowegeve ojhehaga! Mwebaribarene dhinere wakwanela mohihiyedhedha. Kunaagonela ofiya!” (Hab. 2:3) Yehova aawonge madhu ala wihina amulibihe baahi Abakuki? Obe enonikavihera ni iyowa peeno? Murumiwi Pawulo, ahalebela madhu mamodhave makiristawu enna ejhehedho yodhowa mwilaboni exa. (Ebe. 10:37) Bumwahaya, naarive ekalaga ninga mpaganyo ndha dhinna olegela wakwanela, nikanne ebaribari wihina “mohanganyedha enere wakwanela. Kinalegele!” Namasugwera 04/23 epaddi 30 ddima 16

Amwaana Izarayeli owinjhiva kayarumedha wihina di Yehova awoga ni aliwa wodhela Moyizeji. (Núm. 14:10, 11) Dila dhowinjhivadhene, yokodda orumedha wi di Yehova amulabihedha Moyizeji. Mwaha wa yeyo Yehova keenyile wihina amwaana Izarayeli ale oohiwelela evolowe elabo yothomeliwa. (Núm. 14:30) Mbwenye amwaana Izarayeli, amodhaya yahiwelela dhoholela dha Yehova. Motajhiha, Yehova ahiwoga egi: ‘Kalebe uhoniha efunelo . . . yogiwelela ni murima waye wamutene.’ (Núm. 14:24) Yehova ahimureeliha Kalebe ofiyedha onvaha epaddi ya elabo aalobiliye elabo yothomeliwa. (Jos. 14:12-14) Nlogo nooharela naamwaana Izarayeli nahididela ohara dhoholela dha Yehova. Moyizeji nuukwa Jozuwe okala namaholela a nlogo na amwaana Izarayeli, ‘teto aliwa yomuriha vanlubale egumaye yaatene.’ (Jos. 4:14) Yokumelelavoya sowihina Yehova ahareeliha amwaana Izarayeli ni wathukulela elabo yothomeliwa. — Jos. 21:43, 44. Namasugwera 02/24 epaddi 21 ddima 6-7

Ndala ninga mediku anandiye onona makalelo oli murima wa muthu wodhela olabihedha moono, iyo podi woona makalelo odhivela wehu wiliwa woliba ni Yehova wodhela woona makalelo nnadhivelihu athu amodhaya. Noona wihina odhivela ninnihuna ni addibilihu onna oridha eyo podi okala yowoniha wihina odhivela wehu ni Mulugu onna ovuguwa. Mbwenye naadhivelaga addibilihu malabo aamateene, nnere wooniha wihina odhivela wehu ni Yehova oli wolibeene. Akala odhivela ninnihuna naaddibilihu onna oridha, ola podi okala muladdu munlubale. Mwaha wa ddi? Mwaha eyo yootonyihedha wihina odhivela wehu ni Yehova onna oridha. Murumiwi Juwawu ohoniha eyo pamadhene nuwoga egi: “Muthu ahinamudhivela ddibile anandiye omoona, kanande omudhivela Mulugu, ahinandiye omoona.” (1 Juwa. 4:20) Nnahudhera ddi ni madhu ala? Iyo nnere wanda omuhagalasa Yehova naadhivelanaga “mmodha ni mukwaye.” — 1 Juwa. 4:7-9, 11. Namasugwera 11/23 epaddi 8 ddima 3; epaddi 9 ddima 5-6

Agaali muzombwe, mwene Jeyowaji aherana yothoma ya thotho. Baabe ahikwa, vano oliye othoma ohara dhoolaga dha Jeyoyada, aali namakutha oororomeleya. Jeyoyada aamulenle Jeyowaji ninga mwanaye. Mwaha wa yotajhiha yapama ya Jeyoyada Jeyowaji othoma omulabela Yehova ni okavihera nlogo werana emodhave. Jeyowaji obajha owomihedha tempulu ya Yehova. (2 Cró. 24:1, 2, 4, 13, 14) Akala makolo awo obe muthu mmodha anna wuhudhiha wodhela Yehova vamodha ni malagano aye, onone wihina oyo mukono wathima onavahiwiwe. (Pro. 2:1, 10-12) Makolo awo eneere ohagalala yuwoona waparihedhaga mabasa malagano amBibiliyani, enuvahiwa. Mbwenye yathimaya sowihina Yehova aneere ohagalala vanlubale, teto wandana onniwena ni Oliye oneere oliba. (Pro. 22:6; 23:15, 24) Ndha dhithu dhapama dhinanithukulela ohara yotajhiha ya Jeyowaji agaali muzombwe. Namasugwera 09/23 epaddi 8-9 ddima 3-5

Yehova anopaganya wihina anere wavuruwana malobelo ehu. Mulugu ehu anowadhivela adhaari aye oororomeleya, bumwahaya Oliye kadha aapwaza malobelo ewa (Sal. 10:17; 37:28) Mbwenye eyo kinatapulela wihina Oliye anere onivaha dhithu dhatedhene nnamulobihu. Dhithu dhimodha nnamulobihu nnakele baahi mwilaboni exa. Yehova anowubuwela makalelo dhooloba dhehu dhiniwananiwa ni efunelo yaye. (Isa. 55:8, 9) Ethu modha enakosa epaddi ya efunelo ya Yehova sowihina mwilaboni yavati mudhaaliwemo ni athu owiwanana ni oohagalala enathongiwege ni Omwene waye. Mbwenye Saddana aawogile wihina athu yere okala oohagalala yithongaga yekiwa. (Gén. 3:1-5) Wihina Yehova ooniwe wihina dhithu awogile Saddana sowoota, Oliye anowenya wihina onamathonga wa athu okalewo. Mbwenye onamathonga wa athu bunatatamula makathamiho owinjhiva ninnihuna peeno. (Ecl. 8:9) Iyo nihinona wihina Yehova kanaamarihe makathamiho aatene ovanene. Namasugwera 11/23 epaddi 21 ddima 4-5

Yehova ohupaganya wihina wodhela Abarawu ‘malogo’ yeere oreelihiwa. Mbwenye wahivira mudhidheene. Abarawu ahakwaniha yaka 100, Sara 90, mbwenye yaali ehinakanne mwaana. Monelo waathu, kiyandeya Abarawu ni Sara okanna mwana, teto eyo yaali yoweha yinlubale wa Abarawu. ‘Mbwenye [Abarawu] oororomela wihina eere okala baabi amalogo owinjhiva.’ (Rom. 4:18, 19) Vano omagomihedhowa mwaana yamujhehedhiwa obaliwa. Abarawu okala baabi a Izaki. (Rom. 4:20-22) Ninga nonilihu, iyo podi orumedhiwa vamentoni va Yehova ni wooniwa ninga athu owogowa ndala ninga Abarawu. Mwebaribareene Pawulo ahiwoga wodhela muselu yoyo nuwoga egi: ‘Madhu owi ‘ahirumedhiwa’ kayalebeliwe mwaha wa [Abarawu] baahi. Mbwenye yalebeliwe ni iyoya, ale yaarumedhiwe, mwaha nnomuroromela Ole anvenyihile Yesu.’ (Rom. 4:23, 24) Ndala ninga Abarawu, nnohowela woniha wihina nihikanna nroromelo wodhela dhowera dhehu ni nnohowela okanna ejhehedhelo. Namasugwera 12/23 epaddi 7 ddima 16-17

Wafwanyiwaga makathamiho oorusa enuthukulela woova, kudduwale wihina Yehova onowawona makathamiho awo ni ohunona pamadhene makalelo oliwe. Motajhiha, mudhidhi amwaana Izarayeli egaali Wijipitu ninga adhaari, ohiya wawonave baahi makathamiho yafwanya amwaana Izarayeli, Yehova owoga wi ‘ginowoona goyi enna nlogo naaga’. (Êxo. 3:7) Malabo mamodha, onowikohesa nimakalelo baani Yehova anukaviheriye wagonjhiha makathamiho awo? Ononamo aavi olobela wa Yehova omulobaga wihina ukavihere wonelamo makalelo anukaviheriye? (2 Reis 6:15-17) Karajhiha wikoha: Onovuruwanaga mwaha obe yowakula ya ddibila yulibihile? Obe ethu woniliwe mmalivuruni mwehu, nvidiyuni obe mujhiboni yuhagalanse? Ohukala muthu ulibihile alabihedhaga yolebela ya mBibiliyani? Malabo mamodha iyo podi odduwala makalelo addibilihu enanoonihiwa odhivela ni olibiha nakenlihu wodhela Bibiliya winanikaviheriwa. Mbwenye dhithu ndha, nvaho dhoriya Yehova ananivahiye. (Isa. 65:13; Mar. 10:29, 30) Mwaha dhinowoniha wihina Yehova anonithuwathuwela vanlubale. (Isa. 49:14-16) Teto dhinowoniha wihina Yehova muthu anafwanelela ororomeliwa. Namasugwera 01/24 epaddi 4-5 ddima 9-10

Ohalaga mudhidhi vang’ono wi Yesu ahogolowele odhulu, oliye wawubusedha anamahara aye wi yohowela ovaha onamoona wodhela oliye ‘okumana oJeruzale, oJudeya wateweene ni oSamariya ofiyedha wigomele elabo.’ (Dho. 1:8; Luk. 24:46-48) Nuuvira mudhidhi, anamaholela gereja a maJudewu wamaga arumiwi abiili, Peduru ni Juwawu ni wathukulela Osinediriyu. Wewule, aliwa wakoddiha olaleya ofiyedha wathuusa. (Dho. 4:18, 21) Peduru ni Juwawu wawakula yegi: ‘Mpendde mwaannya akala sapama vamentoni va Mulugu wuvuruwanani nyu ohiya onvuruwana Mulugu. Mbwenye iyo, kannahiye wawaddela athu amodha dhithu nonilihu ni dhithu niwalihu.’ (Dho. 4:19, 20) Vano Peduru ni Juwawu nuukumihiwa, anamahara a Yesu olobela wa Yehova elobaga wi aakavihere odhowagave yeragana efunelo yaye. Yehova ahaakula nlobelo nna na vati va murima. — Dho. 4:31. Namasugwera 05/23 epaddi 5 ddima 11-12

Muwari mwa yaka matxikwi ni matxikwi, Yehova akala vamodha ni mwanaye Yesu odhulu ni yowonihana odhivela winlubale enniwana mmodha ni mukwaye. Yehova ahoniha pamadhene wihina oomudhivela Yesu, nuwawoga madhu enafwanyeya va yolebela ya peeno. Yehova ahafune eere owoga egi: “Oyo di muthu ginamurumedhimi.” Mbwenye Yehova afuna wihina nnone wi oomudhivela vanlubale mwanaye Yesu. Bumwahaya Yehova ahiwoga egi: “Yesu di ‘mwanaye, anamudhiveliye’.” Yehova oomuriyana Yesu, mwaha wihina oliye ahiivahedha wi avelele egumaye. (Efe. 1:7) Yesu kanganyedha wihina Ababe yomudhivela vanlubale. Oliye ahikanna ebaribari wihina Yehova omudhivela ofiyedha oliye owoga dila dhowinjhivadhene egi Ababa enogidhivela. — Juwa. 3:35; 10:17; 17:24. Namasugwera 01/24 epaddi 28 ddima 8

Kabiha wubuwela ayi: Muthu onamudhiveliwe vanlubale anowuwoga obure, we ohunona wi dhithu anawogiye kahi ebaribari, mbwenye athu amodhaya enorumedha dhowoota ndha. Yowukulihaya aliwa enoobajha ovuwiha dhowoota ndha, teto enowathukulela athu amodha orumedha dhowoota ndha. Waakale aavi? Mwebaribarene were wukuuwa, kahi ebaribari? Yotajhiha ela enonikavihera wonelamo makalelo aali Yehova emuthu yaye nutakalihiwa. Mwanaye mmodha oomuzimuni ovuwiha yowoota yobajha amwaddelaga muhiyana oobajha, teto Eva orumedha yowoota ele. Mwaha wa yowoota ele makolo ehu oobajha omurugunuwela Yehova, vano yokumelelavoya, yothega ni okwa wafwanya athu aatene. (Gén. 3:1-6; Rom. 5:12) Makathamiho aatene nnawonihu peeno ninga okwa, koddo ni goyi ekumelele mwaha wa dhowoota dha Saddana. Yehova anakala aavi awonaga makathamiho aatene eli mwilaboni mwaha wa dhowoota dha Saddana? Mohanganyedha eyo enoomukula vanlubale Yehova, mbwenye naarive dhigaali ndo, Yehova kasadduwile anookala Mulugu oowali ni anakoya ntxiga, ohiya eyo Oliye anodhowave akalaga ‘Mulugu oohagalala.’ — 1 Tim. 1:11. Namasugwera 02/24 epaddi 8 ddima 1-2

Nnande aavi okala owikomeene ninga Juze? We podi othoma ovanene ethu onafuniwe werana wafwanyiwa yoweha. Kuwubuwelevo dila biili okoodda dhithu Yehova aniddiye, newene kuwubuwelege yowehaya. (Sal. 97:10; 119:165) Werana ndo, onere wanda ogonjhiha yoweha. Podi wera, we kunanganyedha wi ohufwanya ebaribari ni onofuna omulabela Yehova ni murima wawo waatene. Mbwenye podi wera nivanove onubuwela wi kunathi wiwegeredha wihina wipeleke wa Yehova ni obaddiziwe. Akala siyeyo enupadduwela, we podi werana emodhave erilena mwene Davidi. Oliye ahimpigiriyela Yehova egi: ‘Yehova Mulugwaga gipenddeni ni munone murima waga. Mugisanyihe ni munone dhothuwathuwiha dhaaga. Mugisugwe ni moone akala gihikanna ethu-sithu yabure ni mugeddihe dila yamukalakala.’ (Sal. 139:23, 24) Yehova anowareeliha ‘ale enamusayela ni murima waatene.’ Wilibihedha wawo wihina wakwanihedhe yoluba yowipeleka wa Yehova ni obaddiziwa, enowoniha wihina we onooparihedha mabasa yolebela ela. — Ebe. 11:6. Namasugwera 03/24 epaddi 6 ddima 13-15

Namakutha munlubale, aali mwimeleli a nlogo vamentoni va Yehova. Namakutha munlubale oobajha aali Arawu, oliye aathomiwe ni Yehova labo yinagurariwaga tabernakulu, mbwenye ninga murumiwi Pawulo awogiliye yohowela okalawo anamakutha owinjhiva wihina mmodha akwa namakutha mmodhaya ahale vamburoni vaye. (Ebe. 7:23-26) Woona wihina aliwa yaali athu ohulogomana anamakutha anlubale yohowela opeleka mukutho mwaha wa dhothega dhewa, vala nnowonavo ohiyana winlubale wa anamakutha anlubale mudhidhi wa amwaana Ezarayeli ni namakutha munlubale Yesu Kiristu. Makalelo makiristawu enebedhiwa. Ninga namakutha munlubale Yesu ‘mudhaari analaba mmusasani webaribari omagiwe ni Yehova ohiya ni muthu.’ (Ebe. 8:1, 2) Pawulo ohutapulela wi woona wihina Yesu kanakwa, kavo muthu anaahale vamburoni vaye ninga Namakutha Munlubale. Teto Pawulo ohuwoga wihina Yesu kanna nihonya newene kanna yothega teto mohiyana ni anamakutha anlubale aamwaana Ezarayeli oliye kanahowela opeleka mukutho kadda labo wihina dhothega dhaye dhileveleliwe. Namasugwera 10/23 epaddi 26 ddima 8-9

‘Elabo yodhulu yakale’ enagiwana anamathonga enasugweriwa ni Saddana vamodha ni ademoniyu. (Mat. 4:8, 9; 1 Juwa. 5:19) Madhu owi ‘elabo’ yalabihedhiwaga mBibiliyani, podi otapulela athu enakala elabo yavati. (Gén. 11:1; Sal. 96:1) Mowindala, ‘elabo yavati yakale’ enagiwana athu abure. Yehova kanaawomihedhe ‘elabo yavati’ ni ‘elabo yodhulu’ ya peeno. Mbwenye Oliye anere ogujhula ni mukalakala. Ni vamburo vewa Yehova anere opwehavo ‘elabo yodhulu exa’ ni ‘elabo yavati exa,’ obe neere onamathonga muxa onafuna waathongaga athu owogowa. Yehova anere owomihedha elabo yavati ni anere weeriha wihina athu ekale oologomana. Ninga munawogela yovuhulela ya Izayiya Yehova anere osaddula elabo yaatene wi ekale yowoma ninga aali mundda wo Ideni. Owomihedhiwa wula onere wapatha ni athuya. Yehova anopaganya wi nnere ovulumusiwa wa dhiredda dhatedhene. Aliba oohona, oohiwa ni ooragala enere ovulumusiwa ni anookwaya enere ovenyihiwa. — Isa. 25:8; 35:1-7. Namasugwera 11/23 epaddi 4 ddima 9-10

“Mahoso manlubale” enabajhe morurumusa. (Mat. 24:21) Mohiyana ni ng’ovi dhimodha, iyo nnojheha mahoso manlubale. Yaka 2 000 mundduli, Yesu ahawaddela anamahara aye wihina ekale owiwegeredhene. Nakala owiwegeredhene, eneere okala yokweya ovilelana mudhidhi ola worusa ni wakavihera athu amodha werana emodhave. (Luk. 21:36) Nnere ohowela okala oovilela wihina nimwiwelele Yehova ni ororomelaga wihina oliye anere onibarela. Nnere ddi addibila yayelela ethu-sithu obe dhithu dhatedhene dhomwilini? (Hab. 3:17, 18) Nnere ohowela waweddela thagaraga wihina naakavihere ni dhithu enahoweliwa. Motajhiha, nnedihanege aavi yahoweleyaga okala mburo mmodhave naaddibilihu mwaha orijhiwa ni Gogi a Magogi? (Eze. 38:10-12) Nnohowela wadhivelaga vanlubale addibilihu wihina nande ovilela mudhidhi worusa. Namasugwera 07/23 epaddi 2 ddima 2-3

Anamatelana podi ohudhera ni yopadduwa ya Akila ni Pirisila, yaali anamatelana yathambwe ononiwa mudhidhi wa makiristawu oobajha. (Rom. 16:3, 4) Aliwa yalaba, yalaleya ni yaakavihera athu amodha vamodha. (Dho. 18:2, 3, 24-26) Teto mudhidhi wamutene Bibiliya awogaga wodhela Akila ni Pirisila enaromoliwa vamodha. Anamatelana enamutajhihe aavi Akila ni Pirisila? Mwawubuwele mabasa munahowelinyu wapara. Nyu podi wapara mabasa mamodha vamodha? Munodhowesa mmalaleyelo vamodha? Akila ni Pirisila yoolabesa vamodha. Podi wera abiileene kamunna ganyu emodhave, mbwenye munoonamo aavi wapara mabasa mamodha vamodha ninga oxela ni wegeredha nyumba yenyu? (Ecl. 4:9) Mwakaviheranaga mmodha ni mukwaye, munerege wiwanana ni munerege okanna mudhidhi wothapanya vamodha. Namasugwera 05/23 epaddi 22-23 ddima 10-12

Iyo aatene malabo mamodha nnofwanyiwa woova. Motajhiha, mudhidhi mwene Sawuli amuharaharaga Davidi ni afunaga ompa, Davidi othoma othawela luwani ya mafilistewu yithaniwa Gati. Vano mwene ooGati, Akiji, wonelamo wihina Davidi aali munyakoddo akopolo iibeliwe mwaha waapa ‘makumi a matxikwi ni matxikwi’ a mafilistewu. Nuunona eyo, Davidi ‘obajha woova vanlubale.’ (1 Sam. 21:10-12) Davidi ahithuwathuwa vanlubale ubuwelaga ethu Akiji afuniye omwerela. Ethu baani Davidi eriliyena wihina agonjhihe woova wula? Va Salmo 56, Davidi anowoga makalelo aaliye mudhidhi agaali ooGati. Va kapitulu yela ya Salmo Davidi onowoga dhithu dhamuthukulela woova, teto onowoga ethu eriliyena wihina agonjhihe woova waye. Nubajha woova Davidi ahimuroromela Yehova. (Sal. 56:1-3, 11) Teto Davidi kaathukunle manyazo mwaha omuroromela Yehova. Nnikavihero na Yehova, Davidi ahanda wamariha makathamiho aye mwamakalelo ahajhehedhiye: Oliye wiisinjhihedha okala ninga taduwa! Vano, ohiya ofunaga ompa Davidi, Akiji ofunaga omusukuma taduwa ole amunyonya. Nimakalelo yaala, Davidi wanda othawa. — 1 Sam. 21:13–22:1. Namasugwera 01/24 epaddi 2 ddima 1-3

Oosakuliwa ala enasorihiwa va yolebela ya peeno enagiwana aani? Bi makiristawu oothikitheliwa evenyihiwe muukwani! Vano makiristawu aatene othikitheliwa omuzimuni yadhowa odhulu waddamela omakuthulo wa mahoso manlubale, mutholo wobajha enaakeliwa, onaakale owana. Yamala othukuleliwa odhulu aliwa enakale ni Yesu vamodha ni angero ni enere owana koddo yogomihedha ni amwiddani a Mulugu. Kubuwela vang’ono, malabo yala a peeno makiristawu mamodha oothikitheliwa ehimala wuluvala ni kinna kopolo. Mbwenye yamala ovenyihiwa wihina yakalege odhulu aliwa enakale dhopaddusa dhomuzimuni dha kopolo ni kinadha ekwa. Bumwahaya enere omukavihera Yesu owaniha koddo ya Armajedo. Koddo ela ya Armajedo yavira aliwa enere olaba vamodha ni Yesu wihina yakavihere athu velaboni yavati okala oologomana. Mwebaribarene makiristawu oothikitheliwa omuzimuni yakala odhulu enere wanda werana dhithu dhowinjhiva wihina yakavihere addibiliwa ni arogoliwa enafwanyeya velaboni yavati opitha mudhidhi yaaliwa velaboni yavati ninga athu ohilogomana! Namasugwera 02/24 epaddi 6-7 ddima 15-16

Athu amodhaya eli owiwegeredhene wihina yipeleke wa Yehova ni ebaddiziwe, enoobajha wanganyedha akala podi werana yothoma ela. Podi wera enowikoha: ‘Ki gabaddiziwa vano gerana yothega enlubale ofiyedha otxosiwa?’ Akala siyeyo onooviwe, okanne ebaribari wi Yehova anere wuvaha dhaatedhene onahoweliwe ‘wihina oharege dila enaafwanelela adhaari a Yehova wi ohagalase murima waye.’ (Kol. 1:10) Oliye anere wuvaha kopolo onahoweliwe wihina werena ele eli yapama. Yehova ohakavihera athu owinjhiva wanda omwiwelela Oliye. (1 Kor. 10:13) Bumwahaya athu vang’ono baahi binatxosiwa mmulogoni. Yehova anonivaha dhatedhene nnahowelihu wihina nikale oororomeleya wa Oliye. Aatene iyo nnowehiwa wi nerena dhithu dhabure. (Tiya. 1:14) Mbwenye we podi osakula ethu onahoweliwe werana wehiwaga. Ebaribariya sowihina we dinna mutholo wothoma akala onere okala oororomeleya obe naari. Athu amodhaya enowoga wihina kinandeya osugwera dhithu nnubuwelihu obe nnafunihu werana. Mbwenye eyo kahi ebaribari. We podi wanda osugwera mubuwelo wabure. Namasugwera 03/24 epaddi 5 ddima 11-12