JUNHO

Yehova ahareeliha vanlubale makiristawu a nsaka noobajha, mwaha aliwa osayela makalelo owalemelela makathamiho ala orusa., Mwebaribarene makiristawu ale yahiharahariwa dila dhowinjhivadhene mwamakalelo yahajhehedhiwa. Kasugwa makalelo eyo yapadduwiliwa ni Bernabe vamodha ni murumiwi Pawulo mudhidhi elaleyaga Olistara. Omabajhowene athu yowawakela pama ni yovuruwana ndhe yawogiwa. Mbwenye vasogolova, labo nenne, ale yaharahara ‘oleketha muthithi waathu.’ Mwaha wa yeyo, ale vobajhavene yavuruwana vano warugunuwela ni obajha oonvonya Pawulo ofiyedha omuhiya neena ni okwa. (Dho. 14:19) Naarive dhigali ndho, Pawulo ni Bernabe kiyaselele walaleya athu amodha mburo dhohiyana-iyana. Mareeliho baani yakumelelevo? Aliwa yahahudhiha ‘athu owinjhiva ofiyedha okala anamahara’ a [Yesu]. Ohiya eyo, madhu ewa ni dhowera dhewa dhahalibiha addibila amudhidhi yole. (Dho. 14:21, 22) Pawulo ni Bernabe kiyahile olaleya naarive eharahariwaga. Mwaha wa yeyo owinjhiva yahaawakela mareeliho. Nahaselela mabasa Yehova anilobiliye wihina naapare, mohanganyedha ni iyoya nnere oreelihiwa. Namasugwera 04/23 epaddi 16-17 ddima 13-14

Mwene Davidi ahifwanyiwa makathamiho owinjhiva mwigumini mwaye, mwaha oharahariwa ni amwiddani aye yafuna ompa. Teto mwene Davidi asayelesa nikavihero na Yehova. Ohiya eyo, Davidi ahikanna ebaribari wihina Yehova owaavuruwana ni owawakula malobelo aye. Ni weya podi okanna ebaribari emodhave. Bibiliya anihina Yehova podi onivaha thotho ni kopolo nnahowelihu wihina nande ovilela. Oliye podi walabihedha addibilihu ni ale yahinamwebedha wihina enikavihere. Ebaribari wi Yehova kanaawaakule malobelo ehu mwamakalelo nnajhehedhihu, mbwenye ethu nahinanganyedhihu sowihina, oliye aneere wawakula malobelo ehu. Yehova anere onivaha ethu nnahowelihu mudhidhi wofwanelela. Bumwahaya odidele olobela ni nroromelo okannaga ebaribari wi Yehova aneere wusamalela peeno ni mwilaboni exa oliye anere wakwanihedha ‘efunelo ya dhithu dhatedhene dhinakalamo.’ — Sal. 145:16. Namasugwera 05/23 epaddi 8 ddima 4; epaddi 13 ddima 17-18

Wawubuwelege mareeliho onawakeliwe mwaha wakwanihedha yoluba yawo. Wawubuwela mareeliho onawakeliwe mwaha wakwaneliha yoluba yawo? Motajhiha, akala yoluba yawo enovolowelavo omwileri Bibiliya obe olobela, wubuwelege makalelo olobela ni omwileri Bibiliya winalibihiiwa wandana wawo ni Yehova. (Sal. 145:18, 19) Akala yoluba yawo fukanna dhikalelo dhomuzimuni, wubuwele makalelo winukaviheriwa okanna wandana wapama ni athu amodha. (Kol. 3:14) Ononamo aavi olebela vapapelini mareeliho onawakeliwe mwaha wakwanihedha dholuba dhawo? Wavira mudhidhi osugwege listana. Ojhege mudhidhi naathu enuukavihere wakwanihedha dholuba dhawo. (Pro. 13:20) Owoga ebaribari, nnokanna labo nihinakannihu efunelo yowerana ethu-sithu. Ki vano, eyo enatapulela wihina nihiye efunelo eyo enihihe wakwanihedha dholuba dhehu? Naari, nihiyoya podi wakwanihedha dholuba dhehu naarive nahinna efunelo. Ebaribari wi werana eyo kahiyo ethu yokweya, mbwenye sinahoweleya. Namasugwera 05/23 epaddi 27-28 ddima 5-8

Orumedha dhokumelelavo dha dhoothoma dhehu, podi onithukulela owoga dhotheega dhehu, woogolela dhoviriganiha dhehu ni ohuhogolowela werana emodhave. Werana dhithundha podi onikavihera odhowagave nthamagaga dila ya egumi. Akala oherana yothoma vano osinyuwa, ethu baani onahoweliwe werana? Kunonge mudhidhi wawo wisinjhedhaga obe wawinkedhaga amodha wihina aliwa binna nibili. Ohiya eyo, orumedhe wihina ohuviriganiha ni werena dhatedhene onandiwe wihina owomihedhe dhoviriganiha dhawo. Akala onowivaha nibili mwaha wa yoviriganiha weriliwena, okale owiyeviha ni olobele wa Yehova orumedhaga wihina ohuviriganiha omulobaga wihina ulevelele. (Sal. 25:11; 51:3, 4) Waalobe nlevelelo ale watheegeliwe ni yahoweleyaga osayele nikavihero na anamaholela mulogo. (Tiya. 5:14, 15) Ohudhere ni dhooviriganiha dhawo ni wilibihedhe wihina onahogolowele werana emodhave. Werana dhithu dhendha, podi okanna ebaribari wihina Yehova aneere wuweddela thagaraga ni aneere wuvaha nikavihero onahoweliwe. — Sal. 103:8-13. Namasugwera 08/23 epaddi 28-29 ddima 8-9

Jeyoyada ahimukavihera mwene Jeyowaji okala muthu apama bumwahaya Jeyowaji agaali muzombwe oofuna omuhagalasa Yehova. Mbwenye Jeyoyada nuukwa, Jeyowaji wambela olekethiwa naathu yahamwiwelela Yehova. (2 Cró. 24:4, 17, 18) Eyo yahimukuula vanlubale Yehova. Naarive dhigaali ndo, Yehova ‘owaruma anamavuhulela yaali vaari vewa wihina emuhogolowele oliye . . . , mbwenye aliwa kayafuna wavuruwana.’ Aliwa kiyafuna onvuruwana Zakariya mwana Jeyoyada aali pirimwaaye Jeyowaji aali namakutha ni namavuhulela a Yehova. Ohiya eyo, Jeyowaji oruma wihina Zakariya apiwe. (2 Cró. 22:11; 24:19-22) Jeyowaji kamoova Yehova mwamakalelo apama. Yehova ahiwoga egi: ‘Ale enaagirehe edduni, enere ototiwa manyazo.’ (1 Sam. 2:30) Omagomihedhowa, naarive Jeyowaji aganna ‘anyakoddo owinjhiva,’ oliye ahigonjhiwa ni anyakoddo vang’ono aakudda Siriya, ‘aliwa omporosa vanlubale.’ (2 Cró. 24:23-25) Mbwenye numporose vanlubale, adharaaye ompa Jeyowaji, mwaha oliye oruma wihina Zakariya apiwe. Namasugwera 06/23 epaddi 18-19 ddima 16-17

Murumiwi Pawulo ahikala vamodha ni addibila ohEfezu, alaleyaga ni ahudhihaga muthenga dhapama. (Dho. 19:1, 8-10; 20:20, 21) Oliye owadhivela vanlubale addibila ala ni oofuna wakavihera wihina edhowegeve ekalaga oororomeleya wa Yehova. Yahinathi okala makiristawu addibila ohEfezu yorumedha dhohudhiha dha gereja dhowoota ni yowawerana masenga. Athu ohEfezu yothabwa wawerana mararuwo teto kiyakanna manyazo mwaha wa dhithu yeriwana. Wa aliwa othapanya wodhela muselu dha mararuwo kayali ethu yabure, ohiya baahi yakala vamathangani mbwenye ni mugerajanimwa. (Efe. 5:3) Akudda Efezu owinjhiva ‘yahiyelela ekalelo yaatene yemuthu yewa,’ ni madhu mamodha, enatapulela wi “aliwa yahikwa zandde.” (Efe. 4:17-19) Yahinathi omunona Yehova ni ohudhera ele eli yapama ni yabure, mubuwelo wewa kuwanyemela yeragana dhithu dhabure. Bumwahaya murumiwi Pawulo adhe awogege egi: ‘Mubuwelo wewa oli muyiihini wolapela ni egumi enadha wa Mulugu.’ Mbwenye, yohagalasaya sowihina athu amodha yakala ohEfezu yahivenyamo muyiihini. Namasugwera 03/24 epaddi 20 ddima 2, 4; epaddi 21 ddima 5-6

Wihina alabe ninga namaholela aamwaana Izarayeli, Jideyawu ohowela okanna kopolo. Amidiyanita nuuthawa mudhidhi yawaniwa emahiyu yele, Jideyawu wahara okuma oJezereyeli ofiya muhinjhe woJordawu. (Juí. 7:22) Nerege Jideyawu nufiya muhinjhe woJordawu ahahiya amidiyanita othawa? Naari! Naarive egaali oogomeene, oliye naalobwana aye owakwana 300 wabuwa muhinjhe wojordawu ni odidelave wathamagiha, ofiyedha wafwanya ni wagonjhiha amidiyanita. (Juí. 8:4-12) Jideyawu oororomela wihina Yehova eere onvaha kopolo, teto siyeyo Yehova eriliyena. (Juí. 6:14, 34) Nlabo dhaala, Jideyawu naalobwana aye wathamagiha amwene abiili oMidiya. Aliwa yaali ni mweddo mbwenye podi wera mamwene ale yaali naaKamelu. (Juí. 8:12, 21) Naarive dhigaali ndo, nnikavihero na Yehova aliwa yahanda wafwanya ni wagonjhiha amwene ale. Nimakalelo mamodhave anamaholela mulogo podi omuroromela Yehova ole ‘ahinagoma newene ahinakukumuwa.’ Yehova anere wavaha kopolo enahoweliwa. — Isa. 40:28-29. Namasugwera 06/23 epaddi 6 ddima 14, 16

Iyo podi okalave txithi naafwanyiwaga makathamiho bi makathamiho namuroromelga Yehova. Woone makalelo Baraki andiliye ogonjhiha koddo mwaha ororomela dhoholela dha Yehova. Mudhidhi wa Baraki amwaana Izarayeli kiyaali owiwegeredhene wihina ewane koddo newene kiyanna futhi. Mbwenye Yehova omwaddela Baraki wihina awane ni namaholela koddo aakananewu, Sizera aanna futhi dhowinjhiva. (Juí. 5:8) Namavuhulela Debora omwaddela wihina adhowe mburo wamusalasala wihina agumane ni Sizera anna karo dhowanana koddo dhowakwana 900. Waakananewu yere okala ethu yokweya owana mburo wamusalasala mwaha yahikanna karo dhowanana koddo, mbwenye naarive dhigari ndo, Baraki wiwelela. Akitelaga mwango Tabor, Yehova omurubwiha muzongwe. Vano karo dhowanana koddo dha Sizera obajha oddora mwaha wa yeyo Yehova omukavihera Baraki omugonjhiha Sizera. (Juí. 4:1-7, 10, 13-16) Nimakalelo mamodhave, namuroromela Yehova ni dhoholela ananivahiye wodhela nikuru naye oliye anere onikavihera. Namasugwera 07/23 epaddi 19 ddima 17-18

Akala nnofuna okalawo ni mukalakala, nnohowela okala athu oovilela. Ndala ninga adhaari a Yehova akale, nnohowela okala oovilela wihina nande ojheha wakwanela mpaganyo dha Yehova. (Ebe. 6:11, 12) Bibiliya analiganiha ovilela wa makiristawu ni ovilela anoniha namalima. (Tiya. 5:7, 8) Namalima analaba nuviheya wihina adhale ni ahele manjhe ndhe adhanliye, mbwenye oliye kanonne mudhidhiya enafuniwa wunnuwa. Bumwahaya oliye anohowela ojheha nuuvilela aroromelaga wihina aneere ohadda ndhe adhanliye. Nimakalelo mamodhave, nnohowela okala ooviheya ni mabasa oomuzimuni naarive nahinonne nlabo anadhe Nabuya. (Mat. 24:42) Iyo nnojheha nuuvilela, nroromelaga wi Yehova anere wakwanihedha mpaganyo dhaye dhatedhene mudhidhi wofwanelela. Nahandaga ovilela, iyo podi okwerebeya ni vang’ono-vang’ono ohiya omulabela Yehova. Teto iyo podi wambela ofunaga dhithu dhamwilaboni nubuwelaga wihina dhineere onihagalasa. Mbwenye nakala oovilela nnere wanda ofiya omakuthulo ni nnere ovulusiwa. — Miq. 7:7. Namasugwera 08/23 epaddi 22 ddima 7

Naliganiha yovuhulela ela ya Daniel 2:41-43 ni dhimodha dhinafwanyeya livuru na Daniel ni Apocalipse, nnowonelamo wihina manyalo a ekwamuthu enatapulela Estadu Unidu ni Grã-Bretanha. Malogo ala menddi enalaba vamodha ninga Potensiya Mundiyale. Wodhela Potensiya Mundiyale ela, Daniyeli ahiwoga wihina omweneya weere okala ‘wovaadda mudhidhi mmodhave wohivaadda.’ Mwahaya bwaddi Daniyeli adhe erege omwene oyo weere okala wohivaadda? Mwaha ‘athu a omwene yoyo kayiwananege. Iyo podi ohudhera dhithu dhathima ni ekwamuthu Daniyeli atapuleliye, yobajha nnohudhera wi Potensiya Mundiyale AngloAmericana, anowoniha kopolo dhaye mwamakalelo ohiyanahiyana. Motajhiha, Estadu Unidu ni Grã-Bretanha dhakosa epaddi ya dhilabo dhagonjhihile koddo yobajha ni koddo yanabiili yapele elabo yaatene. Mbwenye, potensiya ela enna oyelela kopolo ni enerege odhowave eyelelaga kopolo mwaha athuya kiniwanana ni kinawiwelela anamathonga. Ethu emodhaya nnahudherihu, sowihina potensiya ela enaakale yogomihedha othonga, Omwene wa Mulugu ohunathi ofiya wihina ogujhule onamathonga waatene. Namasugwera 08/23 epaddi 10-11 ddima 12-13

Malabo mamodha, Davidi akala owukuwene mwaha wa makathamiho yanfwanya. (Sal. 18:4, 5) Naarive dhigaali ndo, makalelo Yehova amusamaleliye ni amonihiye odhivela, womukavihera oliye ohogolowela ohagalala. Yakala ninga Yehova eere omuthukulela Davidi mburo wa ‘mpodda mukiiti ni omukwakwasela mburo dhoridhela.’ Nimakalelo yala Davidi oohogolowela okanna kopolo yodhowagave amulabelaga Yehova nuuhagalala. (Sal. 18:28-32; 23:2) Peeno iyo nnowanda wagonjhiha makathamiho mwaha wa nikavihero na Yehova. Ninga anawogela Bibiliya, ‘mwaha odhivela wa Yehova kanitolosiwe.’ (Lam. 3:22; Kol. 1:11) Davidi ahikanna amwiddani owinjhiva akopolo, mwaha wa yeyo, malabo owinjhiva egumaye yakala vang’ovini. Naarive dhigaali ndo, oliye akala oobareleyene ni koova ethu mwaha wa odhivela wa Yehova. Oliye owonelamo wihina Yehova aali nuliye mudhidhi wamutene, teto eyo yomuhagalasa. Bumwahaya oliye ahifiyedha wiiba egi: ‘[Yehova] oogikavihera ogonjhiha woova waaga.’ (Sal. 34:4) Malabo mamodha, Davidi owoova vanlubale, mbwenye oliye owanda ogonjhiha woova wula mwaha wihina ahikanna ebaribari wi Yehova oomudhivela. Namasugwera 01/24 epaddi 30 ddima 15-17

Ohudhere ni dhothoma dhabure dha Jeyowaji. Jeyoyada nuukwa, Jeyowaji obajha wandana naathu abure. (2 Cró. 24:17, 18) Oliye othoma ohara dhoholela dhaamusadoro ooJuda yahamudhivela Yehova. Podi wera onorumedha wi yeere okala yapama Jeyowaji ohandana ni alobwana yaala. Ohiya eyo, oliye woniha wihina aali taduwa mwaha orumedha dholaga dha munyaathu yaale. Teto vadhuluva, pirimu aye Zakariya nuuxixa omukavihera oliye oruma wihina apiwe. (2 Cró. 24:20, 21; Mat. 23:35) Ele yaali ethu yowuukuliha! Jeyowaji ahambela pama, mbwenye mowukuliha oliye okala namapa ni apostata. Omagomihedhowa, oliye opiwa ni adhaari aye. (2 Cró. 24:22-25) Ahere oliye adidela omwiwelela Yehova ni ale enamudhivela Yehova dhithudha kadhamale ndala! Namasugwera 09/23 epaddi 9 ddima 6

Yesu ahinona wihina murumiwi Peduru eere wanda okala oororomeleya. Vano ni makalelo apama Yesu owoga ni Peduru egi: “Kuwoove.” Madhu ala yowoniha wihina Yesu oomuroromela Peduru, vano mwaha wa yeyo madhu ala yahimuthukulela Peduru osaddula egumaye, vasogolova Peduru vamodha ni ddibile Andere wahiya mabasa ale oomeza, obajha wakavihera mabasa oolaleya ninga anamahara a Yesu. Mwaha wa yeyo yahaawakela mareeliho owinjhiva a Yehova. (Mar. 1:16-18) Peduru ahikanna egumi yohagalasa ninga namahara a Yesu, oliye ahikanna gari yoomoona Yesu aavulumusaga aredda, awigaraga ademoniyu ni aavenyihaga anookwa. (Mat. 8:14-17; Mar. 5:37, 41, 42) Peduru ahikanna yowoona aamooniliye Yesu ninga mwene oOmwene wa Mulugu, yowoona ele yahimpatha vanlubale Peduru. (Mar. 9:1-8; 2 Ped. 1:16-18) Peduru ahoona dhithu dhowinjhiva mwaha okala namahara a Yesu. Ahere ahikala namahara a Yesu Peduru kaande woona dhithu ndhe. Mwebaribarene Peduru ahihagalala vanlubale mwaha wanda ogonjhiha mubuwelo wohivaha thima ni okanna oneti wowakela mareeliho owinjhiva! Namasugwera 09/23 epaddi 21 ddima 4-5

Karta naye noobajha, murumiwi Peduru ohalabihedha madhu owi ‘mudhivelanege pamadhene.’ Odhivela wula winonikavihera olevelela ohiya yothega modha baahi, mbwenye ‘dhotega dhowinjhiva.’ (1 Ped. 4:8) Podi wera Peduru ubuwela ethu Yesu awogiliye yaka dha mundduli wodhela olevelela. Mudhidhi yole Peduru ubuwela wi owooniha opama nuwoga wi, ddibila oohowela omulevelela mukwaye dila “dhowakwana tanu nabiili.” Mbwenye Yesu omuhudhiha Peduru vamodha ni iyo aatene wihina naalevelege athu amodha “okunamo dila 77.” Obe neere, malabo amatene yahoweleyaga. (Mat. 18:21) Akala enowurusa oparihedha mabasa yolaga ela, kuwukuwe! Iyo aatene enonirusa olevelela malabo mamodha. Yathimaya fuwilibihedha wihina omulevelele ddibilo wihina muhogolowele wandana. Namasugwera 09/23 epaddi 29 ddima 12

Agaali mbani mwa ooba Jonasi ahikanna ebaribari wihina Yehova eere ovuruwana nlobelo naye nowiyeviha nooniha wihina oliye ahithwaruwa. Yehova ahinvulusa Jonasi teto vasogolova Jonasi aali owiwegeredhene wihina aakwanihedhe mutholo aavahiwiye ni Yehova. (Jon. 2:10–3:4) Onofwanyiwaga makathamiho oorusa ofiyedha ohandaga omwaddela Yehova ethu enupadduwela? Onookalaga oogomeene ofiyedha ohikanna efunelo yohudhera? Kudduwale wihina Yehova ohunona pamadhene dhithu dhinupadduwela. Bumwahaya naarive ogeenrena nlobelo nookweya, okanne ebaribari wihina Yehova anere wuvaha ele onahoweliye. (Efe. 3:20) Akala onofwanyiwa makathamiho a mwilini obe a mmubuweloni enuthukulela ohanda omuhudhera Bibiliya, ononamo aavi onvuruwana awudiyu a Bibiliya obe a malivuru mamodha obe we podi ovuruwana jhibo dhOmwene obe woona vidiyu dhinafwanyeya mu jw.org. Walobela wa Yehova ni wasayela dhowakuladha mBibiliyani ni mmalivuruni mwehu enakala ninga onamwithana Yehova wihina ulibihe, teto oliye anere werana eyo. Namasugwera 10/23 epaddi 13 ddima 6; epaddi 14 ddima 9

Makalelo majudewu yebedhiwa. Tabernakulu ni Tempulu dhimodhadha dhaamagiwe oJeruzale dholigana vanlubale muwarimwa. Muwarimwa mwahigawiwa dila biili, “Mburo Woweela” ni “Mburo Wothabwa Weela”. Mburo ndha minddi dhahiyanihiwa ni kurtina yooluweliwa. (Ebe. 9:2-5; Êxo. 26:31-33) Mburo Woweela, ahikalamo kandelaburu a oru, altare wihina apahiwevo insensu, meza ni pawu. Yanna oneti wowapara mabasa ootaleleya mburo Woweela, yaali ‘anamakutha yaathikitheliwe ni Yehova.’ (Núm. 3:3, 7, 10) Mburo Wothabwa Weela, waali nikasa na nipangano na oru nooniha wihina Yehova aali vevale. (Êxo. 25:21, 22) Namakutha munlubale baahi danna oneti wovolowa mburo Wothabwa Weela dila modha vayakani, labo na oleveleliwa wa dhoothega. (Lev. 16:2, 17) Yaka dhatedhene, namakutha munlubale oovolowa ni nikame nanenyama wihina dhileveleliwe dhotheega dhaye ni dha nlogo natene. Nuuvira mudhidhi, Yehova ni muzimu waye wotxena woniha pamadhene ethu yatapulela mburo ndhe minddi. — Ebe. 9:6, 7. Namasugwera 10/23 epaddi 27 ddima 12

MBibiliyani nnofwanyamo dila dhowinjhivadhene nlamulo nnihina “nidhivelanege mmodha ni mukwaye.” (Juwa. 15:12; Rom. 13:8; 1 Tes. 4:9; 1 Ped. 1:22; 1 Juwa. 4:11) Mbwenye, odhivela ekalelo enakuma vati va murima, teto kaavo muthu a veelaboni yavati ananda woona dhithu dhili mmurimani mwehu. Ki vano athu amodha enaanone aavi wihina nnowadhivela vanlubale? Wodhela madhu ehu ni dhithu nnawerelihu. Ehikalawo makalelo owinjhiva owawoniha odhivela addibilihu ni arogolihu. Kasugwa dhotajhiha ndha ‘Muwogege ebaribari mmodha ni mukwaye.’ (Zac. 8:16) “Mukanne murenddele mmodha ni mukwaye.” (Mar. 9:50) ‘Mukalege oobajha othithimihana mmodha ni mukwaye.’ (Rom. 12:10) ‘Mwakelanege mmodha ni mukwaye.’ (Rom. 15:7) ‘Mudhowegeve . . . mulevelelanaga mmodha ni mukwaye.’ (Kol. 3:13) ‘Muhuselele wakelana mutholo dhenyu mmodha ni mukwaye.’ (Gal. 6:2) ‘Mudidele olibihana mmodha ni mukwaye.’ (1 Tes. 4:18) ‘Mudidele olibihana ni ovenyihana mmodha nimukwaye.’ (1 Tes. 5:11) ‘Mulobelelanege mmodha ni mukwaye.’— Tiya. 5:16. Namasugwera 11/23 epaddi 9 ddima 7-8

Malabo aamatene nnohowela werana dhothoma, dhimodha sokweya, mbwenye dhimodha dhinlubale. Ethu enanikavihera werana dhothoma dhapama, fuudhela okanna nroromelo nooliba. Motajhiha, malabo aamatene nnowerana dhothoma wodhela wandana, waredha, makalelo oolela, matelo, okanna ahima ni mabasa. Yere okala yapama wikoha. “Dhosakula dhaaga dhinowoniha wi gihikanna ebaribari wihina elabo ela enere ofiya omakuthulo? Obe dhosakula dhaaga dhinoniha wi ginorumedha monelo waathu amwilaboni enihina athu kinadha akalagawo ni mukalakala?” (Mat. 6:19, 20; Luk. 12:16-21) Nalibiha nroromelo nehu wodhela orumedha wi elabo exa ehaaddamela, nnere wanda werana dhothoma dhapama. Iyo nnohowela okanna nroromelo nooliba wihina naande owanana dhoweha. Podi weera ninna ofwanyiwa makathamiho wodhela oharahariwa obe nihikanna oredda wahinna murombwe ni dhithu dhimodha dhinanuukula. Omabajhowene iyo podi wubuwelaga wi nnere wanda owanana. Mbwenye makathamiho ala yahimalaga nnere ohowela okanna nroromelo nooliba wihina naande ovilela ni odhowagave nimparelaga mabasa Yehova nuuhagalala. — 1 Ped. 1:6, 7. Namasugwera 04/23 epaddi 27 ddima 4-5

Yehova anajheha wihina nalobela, nerena ethu-sithu mowiwanana ni ele nlobilihu. Motajhiha, podi wera ddibila anolobela alobaga wi avahiwe feriya omabasani wihina ande woona musonkano wa malabo mararu. Yehova aakule aavi nlobelo nna? Wodhela onvaha ddibila ole oliba murima anahoweliye wihina awoge ni patarawu aye. Naarive dhigaali ndo ddibila ole onohowela werana epaddi yaye, odhowa wihina awoge ni patarawu aye, podi wera oliye anere ohowela oloba dila dhowinjhivadhene. Oliye podi omuloba mukwaye oomabasani wihina ahale vamburoni vaye obe podi orumedha patarawu aye awoga wihina mweri yole anere ovugula korowa anaakeliye. Yehova anajheha wihina nididele olobela nlobaga dhithu dhili dhathima mwigumini mwehu. Yesu ohoniha wi dhooloba dhehu dhimodha, kadhinakuliwe mowaguva. (Luk. 11:9) Bumwahaya kuselele! Olobelege ni murima wawo wamutene. (Luk. 18:1-7) Weerana ndo, oneere omoniha Yehova wihina ethu ele onalobiwe sathima, teto kahiyo ethu onafuniwe mudhidhi yole baahi. Ohiya eyo onowoniha wi onorormela wihina Oliye anere onikavihera. Namasugwera 11/23 epaddi 22 ddima 10-11

Yehova ahimpaganya mukwaye Abarawu wihina oliye eere okanna mwana teto malogo aamatene a velaboni yavati yeere wawakela mareeliho wodhela oliye. (Gén. 15:5; 22:18) Abarawu ahikanna nroromelo nooliba ni Mulugu, bumwahaya oliye ahikanna ebaribari wihina Mulugu eere wakwanihedha mpaganyo dhaye dhatedhene. Mbwenye Abarawu anna yaka 100 teto Sara anna yaka 90. Naarive dhigaali ndo, aliwa yaali yahinathi okanna mwana. (Gén. 21:1-7) Teto Bibiliya anihina: ‘Mbwenye [Abarawu] oororomela wihina eere okala baabi amalogo owinjhiva, mowiwanana ni ele awogile Mulugu.’ (Rom. 4:18) Teto we ohunona wi dhithu Abarawu ajhehedhiye dhahipadduwa mwebaribareene. Oliye ombala mwaana amujhehedhiye, Izaki. Mbwenye ethu baani yamuthukulela Abarawu omuroromela Yehova nimakalelo yala? Abarawu ahimunona pamadhene Yehova, bumwahaya oliye ahikanna ‘ebaribari yaatene yowihina ele [Mulugu] aapaganyiliye’ eere wakwanihedha. (Rom. 4:21) Yehova woniha wihina oomuroromela Abarawu ni owoga wi aali muthu owogowa mwaha wa nroromelo naye. — Tiya. 2:23. Namasugwera 12/23 epaddi 8 ddima 1-2

Muzombwe ali oororomeleya anosamalela pamadhene mutholo dhaye obe neere dhatedhene. Wubuwele yotajhiha yapama ya Yesu. Yesu kaapwaza mutholo dhaye. Ohiya eyo, oliye owakwanihedha mutholo dhatedhene Yehova anvahiliye, naarive dhirusaga werana eyo. Oliye owadhivela athu — thabwathabwa anamahara aye — oliye ahiivahedha wihina avelele egumaye wihina awobole. (Juwa. 13:1) We podi omutajhiha Yesu wodhela olaba nuviheya wihina wakwanihedhe mutholo bu mutholo onakeliwe. Akala kunonne pamadhene ethuya yowerana, okale owiyeviha ni olobe nikavihero na addibila enonne wapara mabasa ale pamadhene. Kuhagalalege nindhe onandiwe baahi. (Rom. 12:11) Ohiya eyo wakwanihedhe mutholo dhawo, weragana eyo wubuwelege wi ‘kahi a muthu, mbwenye ba Yehova.’ (Kol. 3:23) Ebaribari wihina kulogomane, bumwahaya waanone manddile awo teto waviriganiha orumedhege dhoviriganiha dhawo.— Pro. 11:2. Namasugwera 12/23 epaddi 26 ddima 8

Sohagalasa vanlubale obaddiziwa ni okala epaddi ya Yehova. Ale yandile obaddiziwa ni enna wandana wooliba ni Yehova enorumedha ele Davidi awogiliye egi: ‘Oohagalala duule munamusakulinyu [Yehova] wihina akale vamodha ni nyu. Ni wi akalege vaade veenyu.’ (Sal. 65:4) Yehova anowasakula pama athu anafuniye wihina ekale epaddi ya emudhi yaye. Oliye anawithana ale enafuna okanna wandana wooliba nuliye. (Tiya. 4:8) We wipeleka wa Yehova ni wabaddiziwa we podi okanna ebaribari wi wamala obaddiziwa Yehova anere ‘wureeliha ofiyedha ohujhombela ethu.’ (Mal. 3:10; Jer. 17:7, 8) Obaddiziwa fumambelelo wa omulabela wehu Yehova, we onerege ohowela wilibihedha wihina okaleve oororomeleya naarive ofwanyiwaga makathamiho obe dhoweha. (Ecl. 5:4, 5.) Ninga namahara a Yesu, we onere wilibihedha wihina ohare dhatedhene oliye ahudhihiliye. — Mat. 28:19, 20; 1 Ped. 2:21. Namasugwera 03/24 epaddi 8 ddima 1-3

Ki akala we ni mamuno kamunadhiveliwa ojha mudhidhi vamodha? Munere ddi? Kabeni wubuwela wodhela mootho. Mootho kunahidda mowaguva. Wegi ohidde muthu anarajhiha ohelavo taparikwa, indo ohelagavo kwini dhinlubale. Muharaga yotajhiha ela, munoonamo aavi kadda labo ojhaga mudhidhi mung’onove vamodha? Muxixe werana dhithu dhinudhivelani. (Tiya. 3:18) Vang’ono vang’ono nyu podi ovenyihedha odhivela weenyu. Orihana ethu yinlubale vamateloni. Orihana onaliganihiwa ni Okisijeniyu. Wahikalawo Okisijeniyu mootho kunaliba othima. Emodhave ni matelo, vahikala nriho odhivela wa anamatelana podi oridha mowaguva. Mbwenye mulobwana ni muhiyana yilibihedhaga orihana mmodha ni mukwaye odhivela wewa winerege wenjhedhedheya. Podi wera onubuwela wi onowoniha nriho, mbwenye mamuno obe mwariyo anowoona wi anorihiwa? Namasugwera 05/23 epaddi 22 ddima 9; epaddi 24 ddima 14-15

Bibiliya anowawoga adhaari oororomeleya a Yehova a kale yasegedheyile ni yaafwanyiwe woova mwaha wa amwiddani ni makathamiho mamodha. (Sal. 18:4; 55:1, 5) Ni makalelo mamodhave iyo podi oharahariwa nakala oskola, omabasani, ni amudhihu obe ni anamathonga. Teto mwaha wa oredda ninnihuna iyo podi woovaga okwa. Mudhidhi ninga yola, iyo podi wiwoonaga ninga nili yekihu ndala ninga mwaana mung’ono. Ki vano Yehova ananikavihera ni makalelo baani nafwanyiwaga makathamiho ninga yala? Oliye anontodola ni anonikurumusa. Bumwahaya kuhiye ojha mudhidhi ni Yehova, wodhela olobela ni omwileri Bibiliya. (Sal. 77:1, 12-14) Wakanna elemelelo yowerana eyo, wafwanyiwaga makathamiho oorusa, ethu yobajha onafunigiwe werana enakale osayela nikavihero na Yehova. Omwaddelege Yehova dhithu dhatedhene dhinuthukulela woova ni dhothuwathuwiha dhawo, wamala opwasedhe ovuruwana dhithu Yehova anafuniye wuwaddela wodhela omwileri Bibiliya. — Sal. 119:28. Namasugwera 01/24 epaddi 24-25 ddima 14-16

Neegi nakwanihe dholuba dhehu dhomuzimuni, nnohowela okanna efunelo yoowakwaniha yolubaya. Efunelo ethu enanithukulela iyo wilibihedha wakwanihedha yoluba yehu. Teto nakanna efunelo yinlubale yowakwanihedha dholuba dhehu, nnere wakwanihedha mohilegela. Onere ddi wihina okanne efunelo yinlubale yowakwanihedha dholuba dhawo? Olobele olobaga efunelo yowakwanihedha yoluba yawo. Yehova podi olabihedha muzimu waye wotxena wihina wukavihere wakwanihedha yoluba yawo. Malabo mamodha iyo podi okanna dholuba mwaha onona wi siyeyo nnahowelihu werana. Teto kahi yabure wubuwela ndo, mbwenye malabo mamodha podi wera kannakanna efunelo yowakwanihedha dholuba dhehu. Openddege dhithu Yehova uwereliye. (Sal. 143:5) Murumiwi Pawulo oopendda wodhela opama wohufwanelela Yehova amonihiliye. Eyo yomuthukulela murumiwi Pawulo omulabela Yehova nuviheya. (1 Kor. 15:9, 10; 1 Tim. 1:12-14) Nimakalelo mamodhave wapenddaga wodhela dhithu Yehova anuwereliye, onere okanna efunelo yowakwanihedha dholuba dhawo. — Sal. 116:12. Namasugwera 05/23 epaddi 27 ddima 3-5

Baabi ehu oodhulu anohagalala vanlubale aanoonaga iyo nivuwihaga ndina naye. (Sal. 119:108) Athu amodha enorabulela othetheliwa ni enubuwela wi kaavo anaapwatha, bumwahaya aliwa enofuna wi athu amodha yathethelege ni yawogege opama. Nerege Yehova ali ninga athu yaala? Naari. Nanvuwihaga Yehova nnowoniha wihina dhithu Saddana aawogiliye wodhela iyo sowota. Ni makalelo baani? Oliye ahiwoga wihina kaavo muthu ande okala oororomeleya wa Yehova ni wakihedha ndina naye. Saddana ahiwoga wi kaavo muthu ande okalave oororomeleya wa Yehova afwanyiwa yoweha. Teto ahiwoga wi iyo nere ohiya omulabela Yehova nahere nivahiwa ethu yapama. (Jó 1:9-11; 2:4) Mbwenye Jo ahoniha wihina Saddana muliba woota. Ki we onande aavi wi Saddana muliba woota? Peeno kadda muthu wa iyo ohukanna ofuru wowoniha wihina nnokavihera nuuroromeleya ndina na Yehova ni omulabela Oliye nuuroromeleya. (Pro. 27:11) Ela gari enlubale ninnihuna. Namasugwera 02/24 epaddi 8-9 ddima 3-5

Nuuvira yakadhene Moizeji ni Jozuwe egaakwile ,Yehova wasakula anamatoriha wihina eholelege nlogo naye. Vasogolova mudhidhi wa mamwene, Yehova wasakula anamavuhulela wihina aholelege nlogo naye. Mamwene yaali oororomeleya wa Yehova yowakela dholaga dha anamavuhulela. Motajhiha, mwene Davidi ahirumedha yolaga aavahiwiye ni namavuhulela Nata. (2 Sam. 12:7, 13; 1 Cró. 17:3, 4) Mwene Jeyozafa ahihara yolaga ya namavuhulela Jaziyeli wihina anone ethu baani ahoweliye wera wihina akavihere ni alibihe nlogo wi ‘yaroromele anamavuhulela a Mulugu,’ (2 Cró. 20:14, 15, 20) Vano mwene Ezekiya ahisayela nikavihero na namavuhulela Izayiya nuusegedheya. (Isa. 37:1-6) Mamwene yaharaga dhoholela dha Yehova, aliwa yoreelihiwa teto nlogo naatene nakala noobareleya. (2 Cró. 20:29, 30; 32:22) Yowoneya pamadhene wihina Yehova oowalabihedha anamavuhulela wihina aholele nlogo naye. Namasugwera 02/24 epaddi 21 ddima 8

Saddana anafuna wihina nandane ni athu yahinanikongomedha werana efunelo ya Yehova. Malabo ala a peeno iyo nnohowela okala pasope wapitha addibila ohEfezu, mwaha peeno nnojha mudhidhi wowinjhiva ni athu a mwilaboni, ohiya tho-tho baahi mbwenye namulabihedhaga redes sociais. Kanihiye mubuwelo wa elabo onivolowela ofiyedha onthukulela wubuwela wihina wawerana mararuwo kahi ethu yabure. Mwaha iyo nihinona wi eyo kahi ebaribari. (Efe. 4:19, 20) Bumwahaya yere okala yapama wikoha: ‘Ginokala pasope wihina gihithabwege ojha mudhidhi wowinjhiva ni akwaaga ooskola, oomabasani obe ni athu amodha yahinaariha malamulo owogowa a Yehova? Ginowanda oliba murima wihina gibarele malamulo owogowa a Yehova naarive athu amodha yahirumedhaga obe egonaga ninga muthu oorusa?’ Ninga anooniha 2 Timotiyu 2:20-22, nnohowela okala pasope nasakulaga akwihu mmulogoni. Sapama ohidduwala wihina mmulogoni ehikalamo athu yahinanikavihere okalave oororomeleya wa Yehova. Namasugwera 03/24 epaddi 22-23 ddima 11-12

Onowabihaga wubuwela makalelo ali Yehova? Ebaribari wi kannanda omoona Yehova, mbwenye Bibiliya onomuwoga Yehova mwamakalelo ohiyanahiyana. Motajhiha, Yehova anowithaniwa ‘nduwa ni yobarela’ teto anowithaniwa ‘mootho wootolosa.’ (Sal. 84:11; Ebe. 12:29) Va yoowona dhaala, namavuhulela Ezekiyeli anniyena, ahiwoga wihina Yehova anakala ninga nibwe na safira, mujhila wojerimela ni muzirilimbo. (Eze. 1:26-28) Woona wihina kannanda omoona Yehova, podi okala yorusa orumedha wihina Oliye anonidhivela. Athu amodha ehithabwa woona goyi mwigumini mwewa, mwaha wa yeyo aliwa podi wubuwelaga wihina Yehova kanadha aadhivelaga aliwa. Yehova anowanda wonelamo makalelo iyo nilihu ni ohunona mwahaya bwaddi malabo mamodha podi okala yorusa orumedha wi enowandeya omwaddamela Oliye. Vano wihina anikavihere, Yehova anomulabihedha Bibiliya wihina anoonihe wi Oliye Mulugu odhivela. Ekalelo enathabwa omutonya Yehova fudhivela. (1 Juwa. 4:8) Bibiliya anowoga wihina Mulugu odhivela, teto budhivela onamuthukulela oliye werana ethu sithu. Odhivela wa Yehova, munlubale ni bwakopolo mwahaya onowakavihera naleya ehinamudhivela. — (Mat. 5:44, 45. Namasugwera 01/24 epaddi 26 ddima 1-3

Yehova ahimuthoma Moyizeji wihina awobole amwaana Izarayeli Wijipitu. Yehova oolabihedha murabo ni mutana, vano mahiyu oolabihedha mootho wihina aweddihe. (Êxo. 13:21) Moyizeji oohara murabo ole, nimakalelo yaala oliye wathukulela amwaana Izarayeli Niya Yoofila. Amwaana Izarayeli nuwoona wihina osogolo wewa wahikala niya, teto mundduli mwewa waali anyakoddo oWijipitu aliwa othuwathuwa vanlubale. Mbwenye Moyizeji kerilena yothoma yabure, mwaha di Yehova afuna wihina nlogo naye ndhowe mburo yole, aamulabihedhaga Moyizeji wihina aakwanihedhe yofuna yaye. (Êxo. 14:2) Teto ele yahinvaha Yehova ofuru wi oonihe kopolo dhaye mwamakalelo ootikiniha. (Êxo. 14:26-28) Muwari mwa yaka 40, Moyizeji ahididela okala oororomeleya wodhela ororomela dhoholela dha Yehova wihina aholele nlogo na amwaana Izarayeli mwiddeddereni. (Êxo. 33:7, 9, 10) Yehova oowoga ni Moyizeji wodhela murabo, vano Moyizeji owawaddela dhoholela dhatedhene amwaana Izarayeli. Ndala amwaana Izarayeli yowanda woona pamadhene wihina aali Yehova amulabihedha Moyizeji wihina aweddihe. Namasugwera 02/24 epaddi 21 ddima 4-5