OUTUBRO

Enowurusa wiwelela malabo mamodha? Mwene Davidi malabo mamodha yomurusa wiwelela, bumwahaya oliye adhe alobelaga egi: ‘Muvenyihedhe mmurimani mwaga efunelo yowiwelelani.’ (Sal. 51:12) Davidi oomudhivela Yehova mbwenye naarive dhigali ndo malabo mamodha yomurusa okala owiwelela. Ethu emodhave enonipadduwela, mwahaya bwaddi? Ethu yobajha sowihina nili athu ohulogomana bumwahaya nibaliwe ni ekalelo yohiwelela. Yanabili, sowihina Saddana anowerana dhatedhene wihina nimurugunuwele Yehova ndala ninga oliye. (2 Kor. 11:3) Ni yanatharu, mwaha wi naapeliwe ni athu oohiwelela ‘Muzimu onaweddiha anamwani oohiwelela.’ (Efe. 2:2) Nnohowela wilibihedha vanlubale wihina niwanena ohulogomana wehu ni owanana owaddihedhiwa wa Saddana ni wa elabo ela wihina nikale athu owiwelela. Wihina nande werana eyo nnohowela omwiwelela Yehova vamodha ni ale aavahiliye owedha. Namasugwera 10/23 epaddi 6 ddima 1

Nnahudhera ddi ni matikiniho a Yesu wodhela wasaddula manjhe wihina ekale vinyu? Nnahudhera wihina nnohowela okala owiyeviha. Yesu kiithukula mwaha wawerana matikiniho; Ebaribariya sowi, oliye kaniithukulege mwaha wawerana matikiniho. Mbwenye oliye aali owiyeviha ni amuthithimiha babe Yehova. (Juwa. 5:19, 30; 8:28) Namutajhiha Yesu wodhela okala athu owiyeviha kannithukulege wodhela werana ethu-sithu. Sapama ohiwonaga ninga nili athima, mbwenye ninvahe Yehova nthithimiho naatene. (Jer. 9:23, 24) Mwaha duliye anahowela othithimihiwa. Ahere ahikala Yehova anikavihera iyo, neere ddi? (1 Kor. 1:26-31) Nakala athu owiyeviha kannajhehege ovahiwa nthithimiho mwaha wawerela opama athu amodha. Wa iyo, ethu enanihagalase fuunona wihina Yehova onowoona ndhe nnawerelihu athu amodha ni onovaha thima. (Omusugwe Matewuji 6:2-4; Ebe. 13:16) Mwebaribarene nnomuhagalasa Yehova, naaharaga yotajhiha yowiyeviha ya Yesu. — 1 Ped. 5:6. Namasugwera 04/23 epaddi 4 ddima 9; epaddi 5 ddima 11-12

Murumiwi Pawulo ohakongomedha makiristawu osogolihaga dhofuna dhaathu amodha. Nnaparihedhe aavi mabasa yolaga ela nakala omutugumanoni? Wodhela ohuddiwala wi amodha enofuna ovaha dhowakula dhewa. Wathapanyaga naakwawo onakalela owogave ohavahaga ofuru wi akwawo ewoge? Naari! We onofuna wihina naliwaya evahe moonelo wewa. Nimakalelo mamodhave, iyo nnafuna wihina addibila owinjhiva evahege dhowakula dhewa yakala mmutugumanoni. Mwebaribarene makalelo owalibiha addibila fuwavaha ofuru wowoniha nroromelo newa wodhela ovaha dhowakula mmutugumanoni. (1 Kor. 10:24) Bumwahaya ovahege dhowakula dhokwiva, ndo athu amodha enere okanna ofuru wowakula. Mudhidhi wavahaga dhowakula dhokwiva, kusorihe pontu dhowinjhiva mudhidhi mmodhave. Wakula ddima yatene, athu amodha kinande ovaha dhowakula dhewa. Namasugwera 04/23 epaddi 22-23 ddima 11-13

Yapadduwa masadduwo nnohowela ohuddiwala wihina sathima wakavihera athu amodha thabwathabwa wodhela wapara mabasa oolaleya. Mmalaleyelo nnohowela okala owaguva wawerana masadduwo. Mwaha nakala mmalaleyelo nnowafwanya athu a murudda enna dhilemelelo ni enarumedha dhego dhohiyanahiyana. Murumiwi Pawulo ahinona wawerana masadduwo, teto iyo podi ohudhera ni yotajhiha yaye. Yesu ahimuthoma Pawulo ninga ‘murumiwi a malogo.’ (Rom. 11:13) Pawulo ahalaleya maJudewu, aGerego, athu yathambwe ohudhera ni yahathabwile ohudhera, anamathonga ni mamwene. Wihina ande wadahinya murima athu aatene ala, Pawulo ohowela ‘olawiha mweddelo wa athu aatene.’ (1 Kor. 9:19-22) Wihina Pawulo ande walaleya athu aatene ala, oliye ohowela onona wego wadheeliwa ni dhithu yarumedhiwa. Ndala owanda osaddula makalelo aye oolaleya. Ni iyoya podi owomihedha makalelo ehu oolaleya wodhela wubuwelaga dhithu dhinaathuwa-thuwiha athu avamuruddani veehu. Namasugwera 07/23 epaddi 23 ddima 11-12

Okala muthu oopwaseya kinatapulela okala oolodhowa. Ela ekalelo yaathu ooliba, mwaha nnohowela okala athu ooliba wihina nidhowegeve nikalaga oopwaseya naafwanyiwaga makathamiho oorusa. Opwaaseya ekalelo enakosa epaddi ya ‘yowima yomuzimuni.’ (Gal. 5:22, 23) Madhu owi ‘opwaaseya’ ni Egerego, yalabihedhiwa agiwagana kavalu aali amukokolani mbwenye ahudhihiwe okala oowiwelela. Alemelihiwa okala vaade ni oowiwelela, kavaluya anookala oomaleya ni oopwaseya mbwenye oliye kanahiya okala akopolo. Ki iyo, nnande aavi okala athu oopwaseya mudhidhi mmodhave akopolo? Kannande werana eyo yeekihu. Nnohowela olobela nlobaga muzimu wotxena nnikavihero wihina nikanne ekalelo ela yowoma. Dhihikalawo dhotajhiha dhinoniha wihina enowandeya okala muthu oopwaseya. Addibila ni arogola owinjhiva yahididela okala oopwaseya, naarive eligiwaga, teto ehihiya yotajhiha yapama wa ale yaasugwa. — 2 Tim. 2:24, 25. Namasugwera 09/23 epaddi 15 ddima 3

Murumiwi Juwawu ahikanna yowoona yootikiniha awooniliye anamaholela owakwana makumi menli nennayi (24) odhulu emulabelaga Yehova. Aliwa yomuthithimiha Mulugu yegihina oliye dinafwanelela ‘othithimihiwa, orihiwa ni kopolo.’ (Ovuhu. 4:10, 11) Angero ororomeleya ehikanna dhithu dhowinjhiva dhinathukulela omuthithimiha ni omuriha Yehova. Aliwa eli odhulu vamodha nuliye ni ehimunona pamadhene. Angero ala, enowanda wonelamo pamadhene dhikalelo dha Yehova wodhela dhithu apaddusiye. Teto, yasugwaga dhithu dhatedhene aneriyena, eyo enowathukulela aliwa ofunagave omuthithimiha. (Jó 38:4-7) Iyo nnofuna omuthithimiha Yehova naalobelaga wodhela omwaddela dhithu dhinanthukulela omutikina ni omuriha. Wamuhudheraga Bibiliya, osayele wonelamo dhikalelo dha Yehova dhinathabwa wudhivela. (Jó 37:23; Rom. 11:33) Voharela omwaaddele Yehova mwahaya bwaddi ogamudhivela oliye mwaha okanna dhikalelo ndha. Makalelo mamodha omuthithimiha Yehova fuudhela omutamalela wodhela dhatedhene ananereliye ni anawereliye addibilihu. — 1 Sam. 2:1, 2. Namasugwera 05/23 epaddi 3-4 ddima 6-7

Yaka ya 1919, Babiloniya Munlubale obe gereja dhatedhene dhowoota oyelela kopolo yanniwana. Yaka yele othomiwa “Mudhaari ororomeleya ni athotho” anakavihera ovolowa ni weedda “Dila Yoweela.” (Mat. 24:45-47; Isa. 35:8) Mwaha wa mabasa ala owegeredha “Dila Yoweela” ale evolonwe dila yela ehikanna gari yomunona Yehova ni efunelo yaye. (Pro. 4:18) Teto ehawerana masadduwo wihina ekalegewo mowiwanana ni malagano a Yehova. Mbwenye Yehova kawaddihendhe nlogo naaye wawerana masadduwo ala amatene mudhidhi mmodhave. Mbwenye akavihenre vang’ono vang’ono. Mwilaboni exa nnerege ohagalala mwaha omuhagalasa Yehova wodhela dhithu dhatedhene nneregihuna. Arampa aatene enohowela owomihedhiwa yegi ekala apamene. Okuma yaka ya 1919 “Dila Yoweela” enna owomihedhiwa, mwaha wa yeyo ehakavihera athu owinjhiva okuma mBabiloniya Munlubale. Namasugwera 05/23 epaddi 17 ddima 15; epaddi 19 ddima 16

Kadda ddibila a Nikuru Nolamulela anowavolowela mabasa owaxagiha anamakavihera a komisawu dhohiyana-iyana dha Nikuru Nolamulela. Okuma ovanene anamakavihera ala ehikanna mutholo munlubale ni eli owiwegeredhene wihina edhowegeve yaparaga mabasa owasamalela mambila a Kiristu. Makiristawu oothikitheliwa yadhowa odhulu waddamela omakuthulo wa mahoso manlubale, adhaari a Yehova enerege odhowave emulabelaga oliye nuuroromeleya. Mwaha wa oholeliwa ni Yesu Kiristu, iyo kannadha nihiya omulabela Yehova. Ebaribari wi mudhidhi yoyo iyo nnere orijhiwa ni Gogi a Magoge, wili wiwanana wa malogo. (Eze. 38:18-20) Mbwenye orijhiwa wula kawinalegele, kinande onigonjhiha newene kinande weeriha wihina nlogo na Mulugu nihiye omulabela Yehova. Mwebaribarene Yehova anere onivulusa! Murumiwi Juwawu ahikanna yowoona dhaala ooniliye ‘muthithi waathu’ a mambila mamodhaya a Kiristu. Teto murumiwi Juwawu ahaddeliwa wihina ‘muthithi waathu’ awooniliye yaali ale yavuluwe muhoseya winlubale. (Ovuhu. 7:9, 14) Mohanganyedha, Yehova aneere onivulusa! Namasugwera 02/24 epaddi 5-6 ddima 13-14

Mbwenye ethu baani nnahowelihu werana wihina naakele muzimu wotxena? Iyo podi olobela nlobaga muzimu wotxena, omuhudhera Bibiliya ni okosa epaddi ya nikuru naaye. Werana eyo eneere onikavihera okanna ‘dhowima dhomuzimuni.’ (Gal. 5:22, 23) Yehova anavaha muzimu waye wotxena ale enna mubuwelo wapama ni enerana dhithu dhapama. Iyo nubuwelaga ni neragana dhithu dhabure, Yehova kanaanivahe muzimu waye wotxena. (1 Tes. 4:7, 8) Ohiya eyenove, wihina nidhowegeve nakelaga muzimu wotxena, nnohowela ‘ohunyoza dhovuhulela dha mBibiliyani.’ (1 Tes. 5:20) ‘Dhovuhulela’ ndha dhinovolowelavo muthenga dha Yehova dhinawoga wodhela koddo ya Armajedo ni malabo okuthula. Iyo nihinona wi Armajedo aneere ofiya mowaguva. Nnowoniha wi kanalegele wodhela okanna mweddelo wapama ni ‘waviheyana mabasa a Yehova’. — 2 Ped. 3:11, 12. Namasugwera 06/23 epaddi 12 ddima 13-14

Mukiristawu aneere ddi yakumelela fotu ya pornografiya mutelefonini obe mukomputadorini mwaaye? Kanididele osugwa. Enere okweya werana ndo nahiddiwala wihina ethu yathima mwigumini mwehu, fuwandana ninnihuna ni Yehova. Fotu dhimodha athuya podi ohukala madave, naarive dhigaali ndo, podi otatamula munigwa wamararuwo. Mwahaya bwaddi nigahowela orabela munyafotu dhendha? Mwaha kannafuna werana ethu-sithu yanithukulele wubuwela dhithu dhonyakavala obe wawerana mararuwo. (Mat. 5:28, 29) Namaholela mulogo dhaala anakala oTayilandiya, anithaniwa Davidi, ohuwoga egihina: “Miyo ginorajhiha wimela wihina guubuwele: ‘Naarive fotu ndha athuya ehili madave, Yehova anere ohagalala gadidela osugwa fotu ndha?’ Wubuwela ndala winogikavihera werana dhothoma dhapama.” Woova werana ethu yamukuule Yehova, winere onikavihera werana dhothoma dhapama. Omoova Yehova “fumambelelo,” obe thinikoma “na thotho.” Namasugwera 06/23 epaddi 23 ddima 12-13

Nyumbadha podi wera dhinaakalege mulogo. Mudhidhi wa mahoso manlubale, iyo nnere obareliwa ni Yehova nadidelave okala vamodha naaddibilihu. Bumwahaya nnohowela wilibihedha ohiya baahi wavilela addibilihu, mbwenye nnohowela wadhivelaga. Podi wera ethu enanthukulele ovuluwa fuwadhivela addibilihu! ‘Nlabo ninlubale na Yehova,’ onaakale mudhidhi worusa wa athu aatene amwilaboni. (Sof. 1:14, 15) Ninlogona na Yehova nnere woona goyi. Mbwenye niwegeredha ovanene nnere wanda okala oopwaseya ni wakavihera amodha. Nnere wanda wawanana makathamiho bi makathamiho nuuvilela. Addibilihu yonaga goyi, nnere werana dhithu dhatedhene nnandihu wihina naakavihere ni wavaha ele enahoweliwa wodhela waweddela thagaraga. Nnere wandana naaddibila ni naarogola nonihaga odhivela ninnihuna naaddibila ovanene. Yehova anere onreeliha ni egumi yohimala navolowa elabo exa wahinakale ngovi newene makathamiho bi makathamiho. — Isa. 65:17. Namasugwera 07/23 epaddi 7 ddima 16-17

Bibiliya anowaawoga alobwana oororomeleya akale, ninga athu yanna kopolo ni yaali ooliba. Mbwenye ebaribariya sowihina malabo mamodha alobwana ala kayiwonelamo okala akopolo. Motajhiha malabo mamodha mwene Davidi iwoona okala ‘akopolo ninga mwango,’ mbwenye malabo mamodha ‘owoova.’ (Sal. 30:7) Sansawu ahikanna kopolo mwaha wa nikavihero wa muzimu wa Mulugu, mbwenye naarive dhigali ndo Sansawu ahinona wihina Mulugu ahahiye omukavihera eere oyelela kopolo, eere ‘okwerebeya ni erege oligana ni athu amodhaya.’ (Juí. 14:5, 6; 16:17) Alobwana ala akale yahikanna kopolo mwaha wihina Yehova davahile kopolo ndha. Murumiwi Pawulo ahinona wihina oohowela kopolo dha Yehova. (2 Kor. 12:9, 10.) Oliye ahikanna oredda. (Gal. 4:13, 14) Teto malabo mamodha oliye oohowela wilibihedha vanlubale wihina erena ethu yapama. (Rom. 7:18, 19) Malabo mamodha oliye owoova dhithu dhafuna ompadduwela osogolo. (2 Kor. 1:8, 9) Naarive dhigali ndo, murumiwi Pawulo akala ookerebeyeene fwakanniyena kopolo. Eyo yapadduwa mwaha wihina Yehova onvaha kopolo murumiwi Pawulo ahoweliye wihina awanena makathamiho aye. Namasugwera 10/23 epaddi 12 ddima 1-2

Akala malabo mamodha oniwoona ninga kunna thima, kudduwale wi kawo muthu mmodha ahili mwinnyene Yehova usakunle wihina okale mudhaari aye. (Juwa. 6:44) Yehova anowoona ethu yapama wa kadda muthu wa iyo, oliye ohunona murima wehu. Teto makalelo iyo nniwonihu ehihiyana ni makalelo Oliye ananooniye. (2 Cró. 6:30) Bumwahaya Yehova awogaga wi oli athima vamentoni vaye, kuwanganyedhege. (Juwa. 3:19, 20) Nihinathi ohudhera ebaribari, owinjhiva wa iyo podi wera naherana dhithu dhinanithukulela wivaha nibili ofiyedha peeno. (1 Ped. 4:3) Ni addibilaya ebanjhe kale omulabela Yehova nuroromeleya, enowanana mubuwelo wabure. Ki we, malabo mamodha ononamo wi Yehova kuulevelenle? Akala siyeyo enupadduwela, kudduwale wi adhaari a Yehova akale yahikanna makathamiho mamodhave. Motajhiha, murumiwi Pawulo oothabwa wukuuwa ubuwelaga dhoviriganiha dhaye. (Rom. 7:24) Ebaribari wi oliye ahithwaruwa ni ahibaddiziwa, mbwenye naarive dhigaali ndo, oliye iwoona ninga ‘ole ahinna thima,’ teto wa athu oothega iwoona ninga ‘oobajhaya.’ — 1 Kor. 15:9; 1 Tim. 1:15. Namasugwera 03/24 epaddi 27 ddima 5-6

Ethu modha nnahudherihu ni dhothoma dhabure dha Mwene Jeyowaji eeriliyena, sowihina nnohowela wasakula akwihu enafuna onikavihera — athu enamudhivela Yehova ni enafuna omuhagalasa Oliye. Teto iyo podi okanna akwihu enna yaka dhohiyanahiyana. Kuddiwale wihina Jeyowaji aali muzombwe namuliganiha ni Jeyoyada. Wafunaga wasakula akwawo, wikohe: ‘Aliwa enogikavihera olibiha nroromelo naaga ni Yehova? Aliwa enogikongomedha wawiwelela malagano a Yehova? Aliwa enowoga wodhela Yehova ni wodhela ebaribari enafwanyeya mBibiliyani? Aliwa enowariha malagano a Yehova? Aliwa enawoga dhithu dhinafuna ogihagalasa baahi, obe yahoweleyaga enoogivaha yolaga?’ (Pro. 27:5, 6, 17) Ebaribariya sowihina akala akwawo kinamudhivela Yehova, kinafwanelela okala akwawo. Mbwenye akala ohukanna akwawo enamudhivela Yehova olibihe wandana wawo naaliwa mwaha wi aliwa binuukavihere. — Pro. 13:20. Namasugwera 09/23 epaddi 9-10 ddima 6-7

Madhu owi alfa letira noobajha na alfabetu eegerego vano omega letira nogomihedha. Yehova nuwoga wi miyo gili ‘Alfa ni Omega,’ Oliye onowoniha wihina ambela werana ethu, onofiiha omakuthulo ni onoweriha wihina dhatedhene dhakwanele. Yehova numpaddusa Adawu ni Eva, ahiwoga egi: ‘Mwaabale ahima mwinjhivane, mudhale elabo yatene yavati.’ (Gén. 1:28) Yehova nuwoga efunelo yaye, yakala ninga awogile egi: ‘Alfa.’ Vano efunelo ya Yehova enere wakwanela odhuulu wowiwelela wa Adawu wakala wologomana, wadhaala elabo yaatene yavati ni wasaddula elabo yaatene wi ekale parayizu. Eyo yapadduwa enakalege ninga Yehova eere wawoga madhu owi: ‘Omega.’ Yehova nuumala opaddusa elabo yodhulu ni yavati ni dhithu dhaatene dhilimo, Oliye ahiwoga ethu enanivaha ebaribari. Eyo enowoniha wihina efunelo Yehova anniyena ni athu vamodha ni elabo yavati, enere wakwanela pamadhene omakuthulo na labo na netanu nabiili. — Gén. 2:1-3. Namasugwera 11/23 epaddi 5 ddima 13-14

Ohogolowela wIzarayeli kuwaakale olenddo wokweya, mwaha wi muthu amala mweeri minnayi eeddaga. Mbwenye Yehova opaganya wihina eere wabarela wihina ehapadduwele ethu-sithu yowopiha. Wa maJudewu yaali oororomeleya, ohogolowela wIzarayeli yaali mareeliho manlubale okwaranya ethu-sithu yahoweliwa werana. Mareeliho manlubaleya yaali ohogolowela omwebedha Yehova, mbwenye oBabiloniya amwaana Izarayeli kiyanna tempulu wihina emwebedhegemo Yehova, newene altare wihina epahege mukutho dhewa mowiwanana ni nlamulo na Moyizeji. Teto aliwa kiyanna nikuuru naanamakutha negeredhiwe wihina epahege mukuthodha. Ohiya eyo nlogo na Yehova naapeliwe naathu yahariha malamulo a Yehova. Mwaha wa yeyo maJudewu ororomeleya yaali ethakwithakwive wihina ehogolowele owaniwa wi evenyihedhe webedha webaribari. Namasugwera 05/23 epaddi 14-15 ddima 3-4

Akala nnofuna weddaga ninga ‘ahima a waara.’ Nnohowela nikavihero na muzimu wotxena. Mwaha wa ddi? Mwaha wi kahi ethu yokweya okala oweela obe ohawerana mararuwo mwilaboni ela nnakalihu. (1 Tes. 4:3-5, 7, 8) Muzimu wotxena onere onikavihera owanana mubuwelo wabure wamwilaboni, ninga dhohudhiha dha filozofiya vamodha ni monelo wa athu wahiniwanana ni efunelo ya Mulugu. Teto muzimu wotxena onere onikavihera werana dhithu ‘dhatedhene dhili dhapama ni dhowogowa.’ (Efe. 5:9) Makalelo mamodha owakela muzimu wotxena, fuudhela olobela nilobaga muzimu wotxena. Yesu ahiwoga wi Yehova “anere wavaha muzimu wotxena ale enamuloba!” (Luk. 11:13) Ohiya eyo, nanvuwihaga Yehova mmutugumanoni nnowakela muzimu wotxena. (Efe. 5:19, 20) Vano muzimu wotxena wanivolowela ononikavihera werana dhithu dhinamuhagalasa Yehova. Namasugwera 03/24 epaddi 23-24 ddima 13-15

Onofuna okala muthu ovilela? Akala siyeyo, Olobele olobaga wihina okale muthu oovilela. Ovilela winookosa epaddi ya yowima yomuzimuni. (Gal. 5:22, 23) Bumwahaya nnohowela olobela wa Yehova nilobaga muzimu wotxena, wihina onikavihere wanda okanna dhikalelo dhinakosa epaddi ya yowima yomuzimuni. Nafwanyiwa makathamiho eneeha ovilela wehu, nnere odidela olobela nlobaga muzimu wotxena wihina onikavihere okala athu oovilela. (Luk. 11:13) Teto iyo podi omuloba Yehova wihina anikavihere woona dhithudha mwamakalelo Oliye anooniye. Ohiya olobelave, nnohowela wilibihedha wihina nikale athu oovilela malabo amatene. Nalobelaga nilobaga wi nikale athu oovilela ni niilibedhaga kadda labo werana eyo, ekalelo ela ya ovilela eneere wunnuwa mmurimani mwehu ni eneere okala epaddi ya emuthu yehu. Openddege dhopadduwa dha mBibiliyani. Bibiliya anowaawoga athu owinjhiva yonihile ovilela. Naapenddaga dhopadduwa ndha, iyo podi ohudhera makalelo owoniha ovilela. Namasugwera 08/23 epaddi 22 ddima 10-11

Yesu omuroromeliha Peduru wihina Yehova eere omusamalela. Numala ovenyihiwa Yesu wawerana matikiniho dila yanabili wihina Peduru vamodha ni anamahara amodha ehidde oba dhowinjhiva. (Juwa. 21:4-6) Matikiniho ale yahimukavihera Peduru wonelamo wihina Yehova eere wanda omusamalela epaddi yomwilini. Podi wera Peduru ahawubuwela madhu a Yesu aawogiliye wihina Yehova anere wasamalela ale “enapweha mburo wobajha Omwene wa Mulugu.” (Mat. 6:33) Dhatedhene ndhe dhahimukavihera Peduru opweha mabasa oolaleya mburo wobajha mwigumini mwaaye, ohiya wasogoliha mabasa aye oomeza. Oliye ahoniha oliba murima ni ahilaleya nlabo na pentekoste yaka ya 33 M.W., aakaviheraga matxikwi ni matxikwi aathu orumedha muthenga dhapama. (Dho. 2:14, 37-41) Nuuvira mudhidhi Peduru ahakavihera aSamaritanu ni athu amodha yahali maJudewu wihina ekale anamahara a Yesu. (Dho. 8:14-17; 10:44-48) Mohanganyedha Yehova ahimulabihedha murumiwi Peduru mwamakalelo ootikiniha wihina aakavihere athu ohiyanahiyana omunona Mulugu. Namasugwera 09/23 epaddi 20 ddima 1; epaddi 23 ddima 11

Muwari mwa yaka biili Jeruzale nugujhuliwa ni aBabiloniyu Nabukodonozori, mwene ooBabiloniya, ahikanna yoroha yowoopiha wodhela ekwamuthu. Nuwindo oliye wawithana adhaari aye a thotho wihina emwaddele yoroha ni yotapulelaya. Yahere yahiwoga, oliye eere wapa aatene vamodha ni Daniyeliya. (Dan. 2:3-5) Daniyeli ohowela werana ethu-siithu mowaguva wihina aavuluse athu owinjhiva. Oliye odhowa waali mwene ni omuloba ‘mudhidhi wihina ande otapulela yorohaya.’ (Dan. 2:16) Wihina ande werana eyo, oliye ohowela oliba murima ni okanna nroromelo. Ofiyedha mudhidhi yole, Daniyeli aali ahinatapulelege yoroha. Vano oliye waloba akwaye ‘wihina elobele wa Mulugu oodhulu wi aweddele thagaraga wodhela wawaddela yoviteya ele arohile mwene.’ (Dan. 2:18) Yehova ahawakula malobelo ewa. Nnikavihero na Yehova, Daniyeli ahanda otapulela yoroha ya Nabukodonozori. Mwaha wa yeyo, Daniyeli ahanda ovulusa egumaye, yakwaye ni yaathu amodha. Namasugwera 08/23 epaddi 3 ddima 4

Kawubuwele mareeliho onawakeliwe mwaha okala oovilela. Muthu oovilela doohagalala ni kanathabwa othuwathuwa. Ohiya eyo, ovilela podi onikavihera okanna egumi yapama. Nakala athu oovilela, nnokanna wandana wapama naathu amodha. Ohiya eyo mulogo wehu onakala wowiwanana. Muthu awoga ethu enanipiha mbani, nnowilibihedha wihina muladduya wahisuse. (Sal. 37:8, nota; Pro. 14:29) Ohiya eyo nnamutajhiha baabihu oodhulu Yehova ni nnolibiha wandana wehu ni Oliye. Mohanganyedha ovilela ekalelo yooriya vanlubale enanikavihera iyo aatene! Ebaribari wihina kahi ethu yokweya okala muthu oovilela. Mbwenye nnikavihero na Yehova, iyo podi odhowagave niilibihedhaga okanna ekalelo ela. Njhehaga nuuvilela elabo exa, iyo podi okanna ebaribari wi ‘mento a Yehova enowasugwera ale enamoova ni ale enajheha odhivela waye wahinamala.’ (Sal. 33:18) Obajha peeno odhowa osogolo, nnafuna niikome woniha ekalelo ela ya ovilela. Namasuguwera 08/23 epaddi 22 ddima 7; epaddi 25 ddima 16-17

Tiyagu owoga wihina mulobwana ole oowogesa wi ahikanna nroromelo, mbwenye dhowera dhaye kadhiiwanana ni dhithu dhawogiye. (Tiya. 2:1-5, 9) Tiyagu anawoga wodhela ddibila obe murogola ahinna dhowara obe dhoojha mbwenye muthuya kaneerana ethu sithu wihina amukavihere. Naarive oliye awogaga wihina ohukanna nroromelo, dhowera dhaye kadhiniwanana ni ndhe anawogiye. (Tiya. 2:14-16) Tiyagu owoga wodhela Rahabe ninga yotajhiha yapama ya muthu anna nroromelo ni oniha wodhela dhowera dhaye. (Tiya. 2:25, 26) Rahabe ahiiwa wodhela Yehova ni ahinona wihina Oliye anna wakavihera amwaana Ezarayeli. (Jos. 2:9-11) Nuwindo oliye wooniha nroromelo wodhela dhowera dhaye mwaha wabarela anameeddelela elabo abiili aamwaana Ezarayeli yaali vang’ovini. Mwaha wa yeyo, muhiyana ola oohulogomana ahaali mwana Ezarayeli aahoniwa ninga muthu owogowa ndala ninga Abarawu ooniwiye ninga muthu owogowa. Yotajhiha ya Rahabe enonihudhiha wihina nroromelo nehu nnohowela woneya wodhela dhowera dhehu. Namasugwera 12/23 epaddi 5-6 ddima 12-13

Ninga makiristawu, iyo kannafuna wonelamo baahi dhithu dhokweya dhinafwanyeya mBibiliyani. Nnikavihero na muzimu wotxena wa Yehova iyo nihikanna ethakwithakwi yohudhera ‘dhithu dhoviteya wodhela Mulugu.’ (1 Kor. 2:9, 10) Ononamo aavi ompandda porogarama oomuhudhera Bibiliya yeka wihina onfiyedhe pamadhene Yehova? Motajhiha, we podi osayela makalelo Yehova awonihiliye odhivela adhaari aye akale ni makalelo eyo enonihiwa wi Oliye onowudhivela. Teto we podi osayela onona makalelo wegeredhiwe webedha webaribari mudhidhi wamwaana Izarayeli ni makalelo Yehova anafuniye wihina nimwebedhege peeno. Obe wafuna, we podi ohudhera dhovuhulela Yesu aakwanihedheyi mudhidhi agaali elabo yavati. We podi omulabihedha Índice das Publicações da Torre de Vigia obe Guia de Pesquisa para Testemunhas de Jeová wihina werena osayela wawo wahudheraga. We onere woona wi olabihedha dhipano ndha, winere wukavihera werana ohudhera wawo wavayeka. Omuhudhera Bibiliya ni makalelo yala podi wukavihera we olibiha nroromelo nawo ni ofwanya ‘enonelo ya Mulugu.’— Pro. 2:4, 5. Namasugwera 10/23 epaddi 18-19 ddima 3-5

Kabeni naapwasedhe pamadhene madhu aasorihile murumiwi Peduru. Epaddi yobajha ya versu 8 enawoga wodhela odhivela nnafunihu okanna, oli ‘odhivelana pamadhene.’ Madhu aalabihendhe murumiwi Peduru owi ‘odhivelana pamadhene’ enatapulela “onyamula ethu pamadhene.” Teto epaddi yanabili enowoga ethu baani nnafunihu werana akala nnowadhivela pamadhene addibilihu. Nnere okuneela obe ohipwatha dhoviriganiha dhaaddibilihu. Motajhiha, enakala ninga othukula odhivela wehu ndala ninga guwo enanyamuwa ni onyamula pamadhene ofiyedha okuneela ohiya yothega modha obe biili, mbwenye dhotheega dhatedhene dhaaddibilihu. Nimakalelo yaala, okuneela yakalege ninga olevelela dhotheega dhaaddibilihu. Ndala ninga guwo enakuneeliwa mabamba, odhivela wehu winokunela dhoviriganiha ni ohulogomana waaddibilihu. Odhivela wehu onohowela okala ooliba vanlubale wihina nande olevelela dhoviriganiha dhaaddibilihu, naarive malabo mamodha eyo ekalaga yorusa. (Kol. 3:13) Naalevelelaga amodha, nnowoniha wihina odhivela wehu ohuthabwa oliba ni nnomuhagalasa Yehova. Namasugwera 11/23 epaddi 11-12 ddima 13-15

Mwene Joziya nuwakwaniha yaka 26 obajha owomihedha tempulu. Waali mudhidhi yole yafwanyiliwa “livuru na malamulo muTempulu naalebiwe ni Moyizeji.” Mwene nuwiwa dhithu dhalebiwe mulivuruni mune, wawerana masadduwo mowaguva wihina iwelele dhithu dhalebiwe mulivuruni. (2 Cró. 34:14, 19-21) We onowabihaga oxixa omwileri Bibiliya malabo amatene? Akala oni ehe, dhinna wuweddela pama? Onolebelesa versu dhinukavihere? Joziya aganna yaka 39 werana yothoma yabure yamuthukulele oliye oyelela egumaye. Ohiya osayela dhoholela dha Yehova oliye wiroromela yeka. (2 Cró. 35:20-25) Yopadduwa yaye enonihudhiha ethu yathima, naarive nigaali owunnuwelavo obe akala nnomulabela Yehova muwari mwa yakadhene, nnohowela odidela onfiyedha Oliye. Wihina nande werana eyo nnohowela olobela wa Yehova nilobaga dhoholela, omuhudhera Bibiliya ni opwasedha ovuruwana dholaga nnavahiwihu ni makiristawu owithwelavo epaddi yomuzimuni. Nerana eyo, nnere wanda orabela werana dhoviriganiha, teto nnere okala athu oohagalala. — Tiya. 1:25. Namasugwera 09/23 epaddi 12 ddima 15-16

Bibiliya anowawoga ahiyana yamudhivela ni yamulabela Yehova. Aliwa yaali ‘owipimelela’ni ‘oororomeleya mwa dhatedhene.’ (1 Tim. 3:11) Mbwenye peeno mmulogoni mwehu nihikannamo dhotajhiha dhowinjhiva dha arogola owithwelavo omuzimuni, anamwali enafwaneleliwa watajhiha. Arogola munoonamo aavi osayela yotajhiha ya murogola owithwelavo omuzimuni ni wilibihedha omutajhiha? Opwasedhe osugwa dhikalelo baani oliye anniyena, wamala wilibihedhe otajhiha dhikalelo ndha. Ekalelo yathima vanlubale muhiyana anahoweliye okanna fuwiyeviha. Muhiyana akala owiyeviha anere okanna wandana woliba ni Yehova ni anere okanna wandana wapama ni athu amodha. Motajhiha, muhiyana anamudhivela Yehova ni ali owiyeviha anosakula wiwelela nlamulo na okalawo namasogolela apanddile Yehova. (1 Kor. 11:3) Nlamulo nna nnomuwoga ole asakuliwe ni Yehova wihina asamalele mulogo ni ole aasamalelege emudhi. Namasugwera 12/23 epaddi 18-19 ddima 3-5

Yehova anafuna wihina mulobwana amudhivelege mwariye ni amusamalelege epaddi yomwilini, yomubuweloni, ni yomuzimuni. Onona opendda waariha ahiyana, okala oororomeleya, dhinere wukavihera we okala mulobwana ootela apama. Wamala otela, podi wera onere okala baabi. Ethu baani onahudheriwe ni Yehova wodhela okala baabi apama? (Efe. 6:4) Yehova kaakanna manyazo owoga ni mwanaye Yesu Kiristu, wihina oomudhivela ni oomurumedha. (Mat. 3:17) Wakala baabi, kudduwale owoga ni mwanawo wihina onomudhivela vanlubale. Teto mwanawo erana dhithu dhapama omuthethelege. Abaabi enamutajhiha Yehova enowakavihera aniwa wihina ekale makiristawu owithwelavo epaddi yomuzimuni. We podi wiwegeredha wi okale baabi apama wodhela obajha ovanene waweddiha amudhawo nuudhivela vamodha ni addibila mmulogoni ni wodhela wawaddela aliwa wihina onowadhivela ni onowavaha thima. — Juwa. 15:9. Namasugwera 12/23 epaddi 28-29 ddima 17-18

Naarive nimulabelaga Yehova nuuroromeleya, nnofwanyiwa makathamiho ni oredda ninga athu aatene enafwanyiwiwa. Ohiya eyo podi wera nnowiddiwa ni nnoharahariwa mwaha okala Anamoona a Yehova. Ebaribari wihina Yehova kananibarela wa makathamiho aatene, mbwenye Oliye anonipaganya wihina anerege onikavihera. (Isa. 41:10) Nnikavihero naye iyo podi okalave oohagalala ni werana dhothoma dhapama wula nigarive oororomeleya wa Oliye, naarive nifwanyiwaga makathamiho oorusa. Yehova anonipaganya onivaha ele Bibiliya anithaniye ‘murenddele wa Mulugu.’ (Fil. 4:6, 7) Murenddele ola, opwaaseya wa mmurimani nnakannihu mwaha okanna wandana wooliba ni Yehova. Murenddele oyo ‘onoopitha mubuwelelo wa muthu’ teto ohukanna kopolo nahinandihu wubuwela. Onookalaga oopwaseyene numala werana nlobelo wa Yehova? Akala eyo enowupadduwelaga we ohunona ethu baani enatapulela ‘murenddele wa Mulugu.’ Namasugwera 01/24 epaddi 20 ddima 2; epaddi 21 ddima 4

Mwaha omudhivela Yehova, athu oororomeleya enofuna ovuwiha ndina nna. Mwene Davidi ahonelamo wi ovuwiha ndina na Yehova yatapulela onvuwiha mwinnyene Yehova. Ndina na Yehova nnovolowelavo emuthu yaye, bumwahaya ndina nna nnonubusedha dhikalelo dhoriya anna Yehova ni dhithu dhotikiniha aneriyena. Davidi oofuna ovuwiha ndina na Yehova mwaha wihina thowela. Oliye afuna avuwihe ndina nna ni ‘ekalelo yaaye yaatene,’ obe neere ni murima waye wamutene. Ni makalelo mamodhave malevita yahikanna mutholo munlubale wonvuwiha Yehova. Aliwa yorumedha nuwiyeviha wihina kayande ovuwiha ndina noweela na Yehova mwamakalelo Oliye anafwaneleliye. (Nee. 9:5) Mohanganyedha wiyeviha wula wahimuhagalasa vanlubale Yehova. Namasugwera 02/24 epaddi 9 ddima 6

Yehova kanahiye wuvaha thima mwaha ohanda wakwanihedha yoluba othomiliwe nimarulo. (2 Kor. 8:12) Ohudhere ni makathamiho ni wubuwelege dhithu wandiliwe wakwanihedha. Bibiliya anihina: ‘Mulugu dororomeleya, bumwahaya kadha aaddiwala mabasa enyu.’ (Ebe. 6:10) Bumwahaya kuddiwale, wubuwelege dhatedhene wandiliwe wakwanihedha ninga wandana wawo ni Yehova, owoga naathu amodha wodhela oliye ni obaddiziwa. Ndala ninga wandiliwe wakwanihedha dholuba weriliwena kale, onere wanda wakwanihedha dholuba onniwena. Nnikavihero na Yehova onere wanda wakwanihedha dholuba dhawo. (2 Kor. 4:7) Wahiselela wakwanihedha dholuba dhawo dhomuzimuni, onere wajhavo mareeliho owinjhiva.— Gal. 6:9. Namasugwera 05/23 epaddi 31 ddima 16-18

Yehova anosayela makalelo owawoniha adhaari aye wihina anowadhivela ni anowarumedha. Bibiliya anowoga dila biili Yehova awogiliye ni mwanaye Yesu, wihina oliye aali mwanaye amudhiveliye ni amurumedhiye. (Mat. 3:17; 17:5) Were odhiveliwa ahere Yehova awoga wi anowurumedha? Peeno Yehova kanawoga ni iyo tho-tho, mbwenye Yehova anawoga ni iyo wodhela Bibiliya. Iyo podi ovuruwana ndhu na Yehova nnirumedhaga, wodhela wawileri madhu a Yesu enafwanyeya mu malivuru a Evanjelyu. Yesu ahitajhiha pamadhene dhikalelo dha Ababe. Vano iyo nawilerigi madhu apama Yehova awogiliye ni athu ohilogomana iyo podi wubuwelaga ninga di mwinnyene Yehova anawoga ni iyo. (Juwa. 15:9, 15) Mbwenye ofwanyiwa makathamiho kinatapulela wihina kannarumedhiwa ni Yehova. Ohiya eyo, ofwanyiwa makathamiho winonivaha ofuru wowoniha wi nnomudhivela vanlubale Yehova ni nnomuroromela ni murima wehu wamutene. — Tiya. 1:12. Namasugwera 03/24 epaddi 28 ddima 10-11