Novembro

Akala ohukanna ahima, wakavihere wegeredha dhowakula dhiniwanana ni yaka enniwana. Malabo mamodha, podi ohudhera muselu dhinawoga wodhela makathamiho a vamuralani obe muselu dhinawoga wodhela ogonihana. Naarive dhigaali ndo, podi wera onere ofwanyavo ddima modha obe biili anawo enafwaneleliwa wakula. Teto omukavihere mwanawo wonelamo wihina malabo mamodha avenyiha moono kanatonyiwe. Werana ndo, mwanawo avenyiha moono vano atonyiwa muthu mmodhaya wihina aakule oliye kanatakaleliwe. (1 Tim. 6:18) Aatene iyo podi wegeredha dhowakula dholibiha dhinanvuwiha Yehova ni dhinaalibiha addibilihu. (Pro. 25:11) Malabo mamodha naakulaga iyo podi owoga dhopadduwa dha mwigumini mwehu. Mbwenye nnohowela okala pasope wihina nnathabwe owoga wodhela iyo. (Pro. 27:2; 2 Kor. 10:18) Ohiya eyo, dhowakula dhehu dhithabwege owoga wodhela Yehova, madhu aye vamodha ni nlogo naaye. — Ovuhu. 4:11. Namasugwera 04/23 epaddi 24-25 ddima 17-18

Odhivela siithu yothabwa ofuneya wihina ndideleve okala mento ni okala owimelene txithi. (Mat. 22:37-39) Odhivela ninnihuna ni Mulugu ononikavihera ovilela nakala mmalaleyelo naarive nifwanyiwaga makathamiho. (2 Tim. 1:7, 8) Nihiyoya nnowawoniha odhivela naaleya yahinamwebedha Yehova, mwaha wa eyo nnolaleya nlabihedhaga telefoni ni makarta. Iyo kannayelela ejhehedho yowihina nnere ofiya labo athu enaasadduliwa mubuwelo wewa ni yeregena ele eli yowogowa. (Eze. 18:27, 28) Omudhivela mwanddamani enovolowelavo wadhivela addibilihu. Ni iyo podi werana eyo wodhela ‘olibihana ni ovenyihana mmodha ni mukwaye.’ (1 Tes 5:11) Nimakalelo mamodhave ninga anyakoddo enalaba vamodha vakoddoni, ni iyoya nnolibihana mmodha ni mukwaye. Iyo kannafuna wawukula addibilihu pudhave newene wawelihedha kunyawunya. (1 Tes. 5:13, 15) Teto nnowoniha odhivela wehu wodhela waariha addibila enaniholela ni enasamalela mulogo. — 1 Tes. 5:12. Namasugwera 06/23 epaddi 10 ddima 6; epaddi 11 ddima 10-11

Makalelo oobajha oolibiha nroromelo nehu fupendda wodhela mukutho. Mukutho ethu enanivaha ebaribari wihina Mulugu anere wakwanihedha mpaganyo dhaye dhatedhene. Wubuwela ethu emuthukulele Yehova onivaha mukutho ni dhithu dhatedhene oliye eriliyena, enere olibiha nroromelo nehu nowihina Mulugu anere wakwanihedha mpaganyo waye wonivaha egumi yohimala mwilaboni yavati. Mwahaya bwaddi nigubuwela ndo? Wihina Yehova anivahe mukutho, oliye omuruma mwanaye athabwiye omudhivela wihina abaliwe mwilaboni yavati ninga muthu oologomana. Yesu agaali mwilaboni yavati, ahifwanyiwa makathamiho oorusa. Nuwindo, oliye okwa vantxikwani na goyi. Mwebaribarene, Yehova ohuliva muthengo munlubale! Yehova Mulugu keenye wihina mwanaye oonihiwe goyi, ofiyedha okwa vantxikwani wihina nikanne mwanegumi ya malabo vang’onove. (Juwa. 3:16; 1 Ped. 1:18, 19) Woona wihina Yehova ohuliva muthengo munlubale, oliye anere werana dhatedhene wihina nikanne egumi yohimala mwilaboni yavati. Namasugwera 04/23 epaddi 27 ddima 8-9

Yehova ohukanna efunelo yowavenyiha athu muukwani? Hee ohukanna. Wihina onihe eyo, Yehova wavethela anamaleba Bibiliya oleba wodhela mpaganyo ola, wihina onere wakwanela osogolo. (Isa. 26:19; Ovuhu. 20:11-13) Teto Yehova apaganya werana ethu-sithu, oliye onowakwanihedha mohihiyedhedha. (Jos. 23:14) Mwebaribarene, Yehova onojheha nuuthaba wavenyiha anookwa. Motajhiha, kasugwa alembe Jo. Oliye ahikanna ebaribari wi naarive ahere akwa, Yehova eere onvenyiha mukwani wihina ahogolowele okalawo. (Jó 14:14, 15, nota.) Yehova ohukanna munukwela wa adhaari aye aatene ekwile. Oliye onojheha nuuthaba wavenyiha adhaari aye aatene ni egumi ya murenddele. Mbwenye ki muthithi waathu ekwile ehimunonne Yehova? Mulugu ehu odhivela onofuna wavenyiha. (Dho. 24:15) Yehova onofuna wi emunone ni yakeele egumi yohimala mwilaboni yavati. — Juwa. 3:16. Namasugwera 04/23 epaddi 9 ddima 5-6

Onande aavi olibiha ejhehedhelo yawo? Akala ejhehedhelo yawo fukala nimukalakala elabo ela yavati, wilerigi ni openddege wodhela dhopadduwa dhinafwanyeya mBibiliyani dhinawoga wodheela parayizu. (Isa. 25:8; 32:16-18) Wubuwelege makalelo enakalege egumi mwilaboni exa ni wiwubuwelege ogaali wengo. Nasayelaga mudhidhi wihina nipendde makalelo enakale egumi mwilaboni exa, makathamiho ehu enakale ‘oovira ni oojajala’. (2 Kor. 4:17) Ejhehedhelo enivahile Yehova sinaanivahe kopolo. anonivaha dhatedhene nnahowelihu wihina naakele kopolo dhinadhela wa oliye. Bumwahaya wahowelaga nikavihero wihina wande wakwanihedha mutholo wawo, wawanana makathamiho obe odidelave okala oohagalala, onfugulele murima wawo Yehova ni nlobelo ni osayele dhoholela dhaye wodhela werana ohudhera wa vayeka. Orumedhe okaviheriwa ni olibihiwa ni addibila. Malabo amatene osayelege mudhidhi wihina wubuwele makalelo enakale egumi mwilaboni exa. Ni makalelo yala, ninga munawogela Kolosense 1:11, ‘We onere olibihiwa, ni kopolo dhatedhene, kopolo dhaye dhowaara, wi odidele ojhedhiha nuuvilela, vamodha nuuhagalala.’ Namasugwera 10/23 epaddi 17 ddima 19-20

Nihikanna dhithu dhowinjhiva dhinanithukulela omutamalela Yehova naalobelaga. Iyo podi omutamalela Yehova wodhela dhithu dhatedhene dhapama ninnihuna; ebaribari wihina nvaho dhatedhene dhapama dhinadhela wa Yehova. (Tiya. 1:17) Motajhiha, iyo podi omutamalela wodhela dhithu dhatedhene dhowoma apaddusiliye. Teto podi olobela wa Yehova omutamalelaga wodhela egumi anivahiliye, amudhihu, akwihu ni wodhela ejhehedho yosogolo anivahiliye. Teto, nihidduwalaga omutamalela Yehova wodhela gari anivahiliye yowandana ni oliye. Podi weera, nnohowela waaja mudhidhi wihina nuubuwele dhithu dhatedhene ninnihuna wihina nimutamalele Yehova. Ebaribari wi athu owinjhiva a malabo yala kinonne otamalela. Aliwa enolabihedha mudhidhi wewa yilibihedhaga wihina ekanne ele enafuniwa, ohiya otamalela wodhela ele enniwana. Nahiya mubuwelo ola onivolowela, iyo podi obajha olobela wa Yehova nikalaga omulobave baahi. Wihina eyo yahipadduwe, sapama ohidduwala omutamalela Yehova wodhela dhithu dhatedhene ananereliye. — Luk. 6:45. Namasugwera 05/23 epaddi 4 ddima 8-9

Ninga baabi oodhivela, Oliye kanadhiveliwa aanoonaga iyo nonaga goyi. (Isa. 63:9) Naarive dhigaali ndo, Yehova kananibarela wa makathamiho aatene enaliganihiwa ni muhinjhe obe ni mootho. (Isa. 43:2) Mbwenye Oliye anonipaganya wihina anerege onikavihera ‘wawanana makathamiho’ ala teto kanenye wihina makathamiho a peeno enigonjhihe, ohiya eyo Yehova anonivaha muzimu waye wotxena wihina anivahe kopolo, wihina anikavihere ohuselela. (Luk. 11:13; Fil. 4:13) Bumwahaya iyo podi okanna ebaribari wihina malabo amatene nnerege okanna ele nnahowelihu wi nande ovilela ni okalave oororomeleya wa Yehova. Yehova anajheha wihina nimuroromelege. (Ebe. 11:6) Malabo mamodha makathamiho ehu enoothabwa orusa ofiyedha iyo wubuwelaga wi kannande wavilelana. Iyo podi wambela wanganyedha akala Yehova anere onikavihera. Mbwenye Bibiliya anihina ni kopolo dha Mulugu, iyo podi ‘ogwelela mwango.’ (Sal. 18:29) Bumwahaya ohiya wanganyedhaga akala Yehova anere onikavihera, nnohowela olobela ni nroromelo ninlubale nroromelaga wihina Yehova anere wawakula malobelo ehu.— Tiya. 1:6, 7. Namasugwera 11/23 epaddi 22 ddima 8-9

Madhu ala enowoniha odhivela weberibari, teto enowaroromeliha anamatelana wihina ale etenle podi wonihana odhivela webaribari mmodha ni mukwaye. Anamatelana yegi ekanne odhivela webaribari ni wamukalakala enohoweleya wilibihedha. Motajhiha, karajhiha wubuwela mootho. Mootho podi okala mudhidhi wowinjhivene ohiddaga, mbwenye wihina ohuthime onohowela otetedhela. Wahiddoddelagavo kwini onothima. Mwamakalelo mamodhave, wegi odhivela wa anamatelana okale wooliba enohoweleya wasamalela matelo ewa. Malabo mamodha anamatelana podi woonaga wihina odhivela wewa onna oridha thabwathabwa yafwanyiwaga makathamiho ninga, ohukanna korowa, oredda ni wasamalela ahima. Wihina “mootho onadhela wa Yehova” ohuthime mulobwana ni muhiyana enohowela okanna wandana woliba ni Yehova. Namasugwera 05/23 epaddi 20-21 ddima 1-3

Nnere ddi wihina nikale athu ooliba murima? Makolo ehu podi onaddela wihina nikale athu ooliba murima, mbwenye ela kahi ekalelo enavaliwa ni makolo ehu. Oliba murima enakala ninga ohudhera werana ethu exa. Makalelo apama oohudhera werana ethu exa, fumusugwa muthu anonne werana pama ethu onafuniwe ohudhera ni omutajhiha pama. Mwamakalelo mamodhave, iyo podi ohudhera okala athu ooliba murima wodhela waasugwa pamadhene ale enooniha ekalelo ela ni ohara yotajhiha yewa. Ndala ninga Daniyeli, iyo nnohowela wanona pamadhene madhu a Mulugu, okanna wandana woliba ni Yehova ni othapanya ni oliye mudhidhi wamutene ninfugulelaga murima wehu wodhela olobela. Teto nnohowela omuroromela pamadhene Yehova ni okanna ebaribari wihina Oliye anere onikavihera. Nimakalelo yala nroromelo nehu nehiwaga, nnere wanda okala ooliba murima. Oliba murima enowathukulela athu owinjhiva okanna efunelo yohudhera wodhela Yehova. Mohanganyedha, nihikanna dhithu dhowinjhiva dhinanithukulela okala athu ooliba murima. Namasugwera 08/23 epaddi 2 ddima 2; epaddi 4 ddima 8-9

Ni egeregu madhu owi “opendda” enalabihedhiwa ni anamahana mujhila yafunaga opendda akala mujhilaya bwapama obe naari. Bumwahaya, nnohowela opendda ndhe nniwihu obe nnilerihu akala sebaribari. Sathima wa iyo peeno, mwaha niina waddamela mudhidhi wa mahoso manlubale. Ohiya orumedhaga dhithu dhatedhene athu anawogiwa, nnohowela olabihedha makalelo ehu owubuwela wihina nladdanihe ndhe nnilerihu obe nniwihu ni ndhe dhinawoga Bibiliya ni nikuru na Yehova. Neerana eyo, kannalekethiwe ni muselu dhowoota dhinavuwiha ademoniyu.(Pro. 14:15; 1 Tim. 4:1) Iyo nihinona wi ninga nikuru, adhaari a Yehova enere ovuluwa mudhidhi ohoseya winlubale wafiya. Mbwenye kannonne enapadduwe wa kadda muthu wa iyo. (Tiya. 4:14) Naarive akala ohoseya winlubale winafiye nigali mento obe nigaakwile, nadidela okalave ororomeleya Yehova aneere onireeliha ni egumi yohimala. Bumwahaya, nnafuna nilibihedhe wubuwela mpaganyo wehu wohagalasa ni okala owiwegeredhene nlabo na Yehova nihinafiye! Namasugwera 06/23 epaddi 13 ddima 15-16

Iyo kannonne makalelo dhovuhulela dhimodha dha mBibiliyani dhinafuniiwa wakwanela. (Dan. 12:8, 9) Ohunona makalelo dhovuhulela dhimodha dhinafuniiwa wakwanela, kinatapulela wi dhovuhuleladha kadhinakwanele. Iyo podi ororomela wihina Yehova aneere onikavihera wonelamo ndhe nnahowelihu onona mudhidhi wofwanelela, ndala ninga eeriliyena kale. Ovuwihiwa wa ‘murenddele ni obareleya’ wineere weriwana. (1 Tes. 5:3) Vasogolova anamathonga a elabo ela eneere orugunuwela ni ogujhula dhigereja dhowoota. (Ovuhu. 17:16, 17) Yindo aliwa eneere orijha nlogo na Mulugu. (Eze. 38:18, 19) Dhopadduwa ndha, dhineere otatamula koddo ya Armajedo. (Ovuhu. 16:14, 16) Iyo nihikanna ebaribari wihina dhithu ndha dhineere wakwanela mohilegela. Njhehaga ndho opadduwa, nidhowegeve nimutamalelaga baabihu oodhulu wodhela opwasedha ohudhera dhovuhulela dha mBibiliyani ni wakavihera amodha werana emodhave. Namasugwera 08/23 epaddi 13 ddima 19-20

Mudhidhi murumiwi Pawulo awogaga wodhela nroromelo, ejhehedho ni odhivela oliye ahimariha mubuwelo waye ni madhu ala: ‘Muwari mwa dhikalelo dhatedhene ndha enlubaleya fuudhivela.’ (1 Kor. 13:13) Mbwenye mwahaya bwaddi murumiwi Pawulo adhe aawogege madhu ala? Mwaha wihina osogolo mpaganyo dhatedhene dhinere omala wakwanela. Eyo yapadduwa kinahoweleyege okanna nroromelo ni ejhedhedhelo, mbwenye nnerege okannave odhivela ni Yehova vamodha ni athu amodhaya. Mwaha wihina nadhivelanaga mmodha ni mukwaye nnowoniha wihina nili makiristawu eebaribari. Yesu ahawaddela anamahara aye egi: “Mowindo, athu aatene enere onona wi muli anamahara aaga: mwadhivelanaga mmodha ni mukwaye.” (Juwa. 13:35) Ohiya eyo odhivela winonikavihera okala owiwanana. Murumiwi Pawulo ohuwoga wihina odhivela ‘nipara nnadhana wiwanana.’ (Kol. 3:14) Murumiwi Juwawu ohuleba egi: “Muthu anamudhivela Mulugu, amudhivelege ddibile.” (1 Juwa. 4:21) Nadhivelanaga mmodha ni mukwaye nnowoniha wihina nnomudhivela Mulugu. Namasugwera 11/23 epaddi 8 ddima 1, 3

Bibiliya analiganiha egumi ya makiristawu ni ya anamathamaga. Anamathamaga enande ofiya omakuthulo eneere wakela egumi yohimala. (2 Tim. 4:7, 8) Bumwahaya nnohowela odhowagave neragana ndhe nnandihu wihina nidhowegeve nthamagaga. Thabwathabwa vano nilihu neena wihina nifiye omakuthulo wa othamaga wehu. Murumiwi Pawulo ohuwoga ethu enaanikavihere werana emodhave egi: ‘Nirule dhithu dhatedhene dhonyemela . . . nthamage nuuvilela dila ntonyihedhiwihu, nerege oliye afuna awoge wi mukiristawu kanahowela othukula ethu-sithu yoonyemela? Naari! Ohiya eyo, oliye afuna awoge wihina mukiristawu onohowela orula ethusithu yoonyemela ahinahoweliye. Dhithu dhonyemela ndha nahinahowelihu podi onikwerebeyiha ni onigomiha. Bumwahaya, akala nnofuna odhowagave nthamagaga ni ovilela, nnohowela wipendda akala kanthukunle ethu-sithu yonyemela nahinahowelihu, voharela nirule mowaguva. Mbwenye ohukalawo mutholo mmodhaya nnahowelihu othukula, mwaha nahiya yakalege ninga neere ohiya othamagawa. — 2 Tim. 2:5. Namasugwera 08/23 epaddi 26 ddima 1-2

Okala athu ookweya wineere onikavihera oriiha moonelo wa athu amodha. Motajhiha, arogola amodha enodhiveliwa wimakiyaari mbwenye amodhaya kinadhiveliwa. Addibila amodha enosakula ong’wa vang’ono, mbwenye amodhaya enosakula ohung’wawene. Teto iyo aatene nnofuna okanna egumi yapama mbwenye kadda muthu onosakula makalelo oosamalela egumaye. Nuubuwelaga wihina iyo dinonne werana pama dhithudha ni naawaddihedhaga athu werana dhithudha mwamakalelo nnafunihu, iyo podi wakwakwathusa amodha ni othukulela mulogo ogaweya. (1 Kor. 8:9; 10:23, 24) Motajhiha, Yehova kanawoga dhithu baani nnahowelihu owaraga obe naari, mbwenye oliye onoonivaha malagano enanikavihera onona makalelo apama oowara. Iyo nnohowela owara mwamakalelo enamuthithimiha Mulugu nikalaga ookweya, amanddile ni ‘ohikaliha manyazo.’ (1 Tim. 2:9, 10) Iyo kannafuna withithimiha mwaha wa makalelo ehu oowara. Malagano a mBibiliyani podi wakavihera anamaholela mulogo ohapandda malamulo wodhela makalelo owara ni owiwomihedha. Namasugwera 07/23 epaddi 23-24 ddima 13-14

Yehova anononihe makalelo oofwanya ohagalala osogolo. Athu yaale enamurumedha konviti a “muhiyana ali taduwa,” enasayela dhohagalasa dhoothapila obe dhoviteya ninga mararuwo. Yokumelelaya sowihina mweddelo oyo oneere wathukulela “mmahame.” (Pro. 9:13, 17, 18) Mbwenye ale enamurumedha konviti a muhiyana athotho obe neere “thotho dhebaribari” yokumelelavoya sohiyana! (Pro. 9:1) Iyo ninna ohudhera odhivela ele Yehova anadhiveliye ni widda ele aniddiye. (Sal. 97:10) Ni nnohagalala vanlubale wawithana athu amodha wihina edhe ehudhere ‘thotho dhebaribari.’ Enakala ninga neere ogwela mburo dhootama dhamusidadi wawithanaga athu negihina: ‘Nyu aatene oolodhowa mudhe wuno!’ Mareeliho ehu ni aale enamurumedha konviti ola, kahiyo a mudhidhi vang’ ono. Mareeliho ehu ba mukalakala ni ononikavihera okalawo malabo amatene, ‘niharaga dila yathotho.’ — Pro. 9:3, 4, 6. Namasugwera 06/23 epaddi 24 ddima 17-18

Onakala aavi mukwawo ooskola obe oomabasani, ukoha wodhela dhithu dhinarumedhiwe? Onakala oothuwathuwene? Owinjhiva wa iyo nnothuwathuwa. Mbwenye makoho ninga yaala, enonikavihera onona mubuwelo wa muthu anawerana makohoya ni winonivaha ofuru womulaleya muthenga wOmwene. Mbwenye malabo mamodha athu enawerana makoho wihina nambele okangana. Eyo kinantikiniha, mwaha athu owinjhiva enowiwa dhithu dhohiyanahiyana wodhela dhithu nnarumedhihu. (Dho. 28:22) Teto iyo nnakalawo ‘malabo ookuthula,’ athu owinjhiva eliiwa ‘oohiwananeyana ni ooporosa.’ (2 Tim. 3:1, 3) Podi wera onowikoha: ‘Ginande aavi okala muthu oopwaseya, athu amodha yaafunaga okangana ni miyo wodhela muselu wa mBibiliyani?’ Ohunona ethu enafuna wukavihera? Opwaaseya. Muthu oopwaseya kanatakaleliwa bure-bure ohiya eyo muthu oopwaseya, anowanda wiisugwera naarive aligiwaga ni anakala oomaleyene thabwa-thabwa ahinona ethu yowoga. Namasugwera 09/23 epaddi 14 ddima 1-2

Malabo mamodha nnowakela munikuruni mwa Yehova dhoholela dhinanibarela. Motajhiha, nnowaddeliwa wodhela yowopiha othamagela dhoreela ni werana dhithu dhanthukulele ohawiwelela malamulo a Yehova. Naharaga dholaga ndha, nnowanda woona mwigumini mwehu wihina sapama ohara dhoholela dha Yehova. Mohanganyedha, Yehova anerege walabihedha alobwana a velaboni yavati wihina anivahe dhoholela mudhidhi wa ohoseya winlubale ni mudhidhi wa Onamathonga wa yaka Txikwi. Iyo nnerege ohara dhoholela nnaakeligihu mudhidhi yoyo? Enere okala yokweya ohara dhoholela dha Yehova mudhidhi yoyo, nabajha wiwelela ovanene dhoholela ananivahiye. Bumwahaya, nnafuna nikome oharaga dhoholela dha Yehova malabo aamatene. Eyo enovolowelavo wiwelela dholaga dhatedhene ananivahiye, aalabihedhaga alobwana aathomiliye wihina enisamalele. (Isa. 32:1, 2; Ebe. 13:17) Naamuharaga ole ananeddiha nuupama, ali Yehova, iyo podi okanna ebaribari wi anere onibarela wa ethu-sithu eli yowopiha ni nnerege odhowagave nandanaga ni Oliye ni mukalakala mwilaboni exa. Namasugwera 02/24 epaddi 25 ddima 17-18

Murumiwi Pawulo oohagalala mwaha omulabela Yehova, naarive ehili ethu yokweya. Murumiwi Pawulo ohowela weedda olenddo dholapela teto mudhidhi yole kiyaali yokweya werana eyo. Eeddaga olenddo, murumiwi Pawulo ‘ahifwanyiwa woopiha wa otekuma wa manjhe’ ni ‘osegedhiwa naambava.’ (2 Kor. 11:23-27) Malabo mamodha addibila amodha kiyavaha thima wilibihedha wa Pawulo.(2 Kor. 10:10; Fil. 4:15) Ethu baani yamukavihere Pawulo odhowagave amulabelaga Yehova? Pawulo ahihudhera dhikalelo dha Yehova wodhela omwileri Bibiliya ni dhithu dhampadduwela mwigumi mwaaye. Pawulo ahifiyedha woona wihina Yehova oomudhivela. (Rom. 8:38, 39; Efe. 2:4, 5) Mwaha wa yeyo, odhivela aanniyena ni Yehova wahenjhedhedheya. Murumiwi Pawulo ahooniha odhivela waye ni Yehova wodhela ‘walabela ni ohihiya walabela oweela.’ — Ebe. 6:10. Namasugwera 07/23 epaddi 9 ddima 5-6

Athu owinjhiva enowoonelamo wi enowahowela anamathonga ni sapama wawiwelela malamulo mamodha enaakumiha ‘anamathonga’ ala. Mbwenye malabo mamodha athu yala yoona wihina malamuloya kinadhivela obe boohogowa aliwa enookodda wawiwelela. Bibiliya anowoniha wi anamathonga enowatatamula makathamiho, enosugweriwa ni Saddana ni mohulegela enere ogujhuliwa. (Sal. 110:5, 6; Ecl. 8:9; Luk. 4:5, 6) Mbwenye Bibiliya mmodhave anowoga wihina “ole ahinawiwelela ale enna owedha kaniwelela nlamulo na Mulugu.” Malabo yala Yehova anowenya wihina anamathonga ekalewo wihina dhithudha dheddege mowegeredheya, teto Yehova anajheha wihina nawiwelelege. Bumwahaya nnohowela ‘wavaha aatene ele enafwaneleliwa,’ ninga motajhiha oliva musoko, waariha ni wawiwelela. (Rom. 13:1-7) Malabo mamodha iyo podi wubuwelaga wi malamuloya kinandhivela, bohogowa ni enere onitotela makathamiho. Iyo nnowawiwelela anamathonga ala mwaha wi Yehova anoofuna wihina nawiwelelelege. Mbwenye yaniloba werana ethu enaalupa malamulo a Yehova kannawiwelele.— Dho. 5:29. Namasugwera 10/23 epaddi 8 ddima 9-10

Sansawu aabaliwe mudhidhi mafilistewu yawonihiwa goyi amwaana Ezarayeli. (Juí. 13:1) Mafilistewu yaali athu abure, bumwahaya amwaana Ezarayeli yothabwa woona goyi. Yehova ahimusakula Sansawu wihina awobole amwaana Ezarayeli mmadani mwaafilistewu. (Juí. 13:5) Wihina Sansawu ande wakwaneliha mutholo ole, oliye ohowela omuroromela Yehova. Nlabo nimodha, atoropa amafilistewu odhowa oLeyi, elabo yooJuda, wihina emmage Sansawu. Alobwana ooJuda obajha woova, mwaha wa yeyo aliwa othoma ompeleka Sansawu mmadani mwaafilistewu. Nlogo naye ommaga ni kabala biili dhixa ni ompeleka mmadani mwaafilistewu. (Juí. 15:9-13) Mbwenye ‘muzimu wa Yehova onvaha kopolo’ ofiyedha oliye wanda opadha kabala ndhe biili. Naali labo nenne Sansawu aathukunliye nikuva nikiti na mulomo wa buru ni waapana mafilistewu owakwana 1 000!— Juí. 15:14-16. Namasugwera 09/23 epaddi 2 ddima 3-4

Yehova anononiha vang’ono vang’ono ‘efunelo yaye yamukalakala’ enafwanyeya mBibiliyani. Yehova anowalabihedha makalelo oohiyanahiyana wihina akwanelihe efunelo yaye mwaha wihina Oliye ‘podi olabihedha ethu-sithu wihina akwanihedhe efunelo yaye.’ (Pro. 16:4) Teto dhithu dhatedhene Yehova aneriyena samukalakala. Mbwenye efunelo ya Yehova sivi? Ki masadduwo baani Oliye aweriliyena wihina efunelo eyo yakwanele? Mulugu ahawaddela anamatelana oobajha efunelo yaye anniyena naaliwa. Mulugu wawaddela egi: ‘Mwaabale ahima mwinjhivane; mudhaale elabo yatene yavati mwing’anelege; musugwerege . . . dhopaddusiwa dhinavava odhulu ni dhopaddusiwa dhatedhene dhovuma dhineedda elabo yavati.’ (Gén. 1:28) Mwaha wohiwelela wa Adawu ni Eva athu aatene ehivala yothega, mbwenye eyo kisaddunle efunelo ya Yehova. Oliye asaddunle baahi makalelo efuneloya enafuniwa wakwanela. Kale Yehova ahithoma otikitera Omwene odhulu wihina akwanelihe efunelo yaye yobajha ni athu vamodha ni elabo ela yavati. — Mat. 25:34. Namasugwera 10/23 epaddi 20 ddima 6-7

Yehova podi onikavihera ovilela. Ebaribari wihina kahiyo ethu yokweya odidelave omulabela Yehova, thabwathabwa naviriganihaga. Malabo mamodha, dhoviriganiha dhehu podi okala dhinlubale opitha dhoviriganiha dha murumiwi Peduru. Mbwenye Yehova podi onivaha kopolo wihina nahiselele. (Sal. 94:18, 19) Motajhiha, kasugwa yopadduwa ya ddibila dhaala aanna mweddelo wabure wogonihana alobwanave muwari mwa yakadhene, mbwenye oliye osaddula egumi yaye ni obajha ohara ndhe Bibiliya anahudhihiye. Naarive dhigaali ndo, malabo mamodha oliye anohowela owanana munigwa dhabure. Enamukavihera ovilela ddi? Oliye anowoga egi: “Yehova anogilibiha. Nnikavihero na muzimu wotxena, gihudhera wi enowandeya odidela weedda dila yeebaribari. Naarive ngaali muthu ohulogomana Yehova anna ogilabihedhave ni anogilibiha.” Namasugwera 09/23 epaddi 23 ddima 12

Azombwe, munohowela wilibihedha vanlubale wihina mukale makiristawu owithwelavo epaddi yomuzimuni. Onohowela ohara dhotajhiha dhapama, okanna ekalelo yopendda, okala muthu oororomeleya, ohudhera werana dhithu dhinukavihere mwigumini mwawo ni wiwegeredha wihina wande wakwanihedha mutholo onafuniwe okanna osogolo. Podi wera onothuwathuwa wubuwelaga mutholo onafuniwe okanna osogolo, mbwenye kuthuwathuwe, we onere wanda wakwanihedha mutholo dhawo. Kudduwale wihina Yehova anofuna vanlubale wukavihera. (Isa. 41:10, 13) Teto addibila ni arogola a mmulogoni enere wukavihera. Wanda okala mulobwana Yehova anafuniye wihina okale, egumawo enere okala yoriha ni yohagalasa vanlubale. Nnowudhivelani vanlubale nyu azombwe, mukanne ebaribari wihina Yehova aneere wureelihani vanlubale mwilibihedhaga wihina mukale makiristawu owithwelavo epaddi yomuzimuni. Namasugwera 12/23 epaddi 29 ddima 19-20

Kubuwela ogaali vapikinikini naaddibila amodha. Nyu munowaredha, vano omakuthulowa nyu otirari fotu modha. Voharela we onotirari fotu dhimodha biili mwaha wihina yobajha kikumile pama. Vano we onna fotu tharu. Mbwenye fotu modha we woona wi ddibila mmodha kakumile pama. Oneere othimiha fotu ele mwaha wihina ohukanna fotu biili dhikumile pama, teto fotu ndhe biili onniwena ddibila ole ohukuma ni aatene eli oohagalalene. Vano kabiha oliganiha fotu ndhe onniwena ni mudhidhi oviriliiwe naaddibila ohunadhiiwe odduwala. Mbwenye podi wera muwari mwa mudhidhi yoyo ddibila obe murogola mmodha ohuwoga ethu yupihile mbani. Weere ddi ni mubuwelo yola? Onoonamo aavi othimiha mubuwelo yoyo ndala ninga waathimihiwe fotu yahili pama? (Efe. 4:32) Wapwasedha wubuwela mudhidhi wapama oviriliiwe ni muthu yole, yoviriganiha ele kinuthukulele othabwa wukuuwa. Mudhidhi ole wapama oviriliiwe ni ddibila ole ethu yapama onahoweliwe okoya mmurimani mwawo. Namasugwera 11/23 epaddi 12-13 ddima 16-17

Ni Egerego madhu elabihedhiwe vala enowoniha wihina ahiyana yohowela owara mwamakalelo oofwanelela ni oriha monelo wa athu amodha wodhela makalelo ewa oowara ni owisamalela. Iyo nnowatamalela vanlubale arogola enaparihedha mabasa yolaga wodhela wisamalela ni makalelo apama enoniwa wi ehikanna manddile! Opendda ekalelo emodhaya yathima. Mbwenye opendda enatapulela ddi? Ewedhelo yonona ohiyaniha ethu yabure ni ethu yapama yosakula werana ele eli yapama. Kasugwa yotajhiha ya Abigayili. Mamune aherana yothoma yabure yaapwehile vang’ovini murala watene ni adharaaye. Mbwenye Abigayili aherana ethu-sithu mowaguva. Mowaguva oliye ahinona ethu baani yapama ahoweliye werana, vano mwaha wa yeyo, ahivulusa egumi yaathu owinjhiva. (1 Sam. 25:14-23, 32-35) Opendda podi onikavihera onona mudhidhi baani nnahowelihu owoga obe omaala. Ni enonikavihera wathuwathuwela athu amodha, mbwenye nahivolosihile muselu dha mwigumini mwewa. — 1 Tes. 4:11. Namasugwera 12/23 epaddi 20 ddima 8-9

Murumiwi Pawulo aalebenle madhu ala, addibila a mulogo wooRoma. Addibila a mulogo ola yahihudhera ebaribari wodhela Yehova ni Yesu ni yahikanna nroromelo ofiyedha okala makiristawu. Mwaha wa yeyo, Mulugu ‘owoga wi yaali athu owoogowa mwaha wa nroromelo’ ni wathikithela ni muzimu wotxena. (Rom. 5:1) Aliwa yahikanna oneti yoojheha omwaakela padamari ewa ooriya ni kiyanganyedha wihina yeere omwaakela mwebaribareene. Vasogolova Pawulo walebela makiristawu oothikitheliwa owEfeso wodhela ejhehedhelo yakenliwa. Ejhehedhelo ela yovolowelavo wakela ‘yohiyedhiwa wa ele eli oweela.’ (Efé. 1:18) Vano aalebelaga akudda Kolosense, Pawulo woniha mburo makiristawu oothikitheliwa yaamwakeliwa padamari ewa. Pawulo owoga wi ‘ejhehedhelo mukoyeliwinyu odhulu.’ (Col. 1:4, 5) Bumwahaya ejhehedhelo enna makiristawu oothikitheliwa sowihina aliwa eneere ovenyihiwa muukwani wihina yakalege odhulu nimukalakala wewene winathongigiwa ni Yesu Kiristu. — 1 Tes. 4:13-17; Ovuhu. 20:6. Namasugwera 12/23 epaddi 9 ddima 4-5

Madhu elabihedhiwe vala owi ‘obarela’ ni egerego yaali madhu yalabihedhiwa yagiwagana anyakoddo yabarela musiwo dha luwani wihina amwiddani enavolowe. Vano athu yakala muwari mwa luwani yabareliwa ni anyakoddo ala yagona oopwaseyene enonaga wihina musiwo dha luwani ele dhili dhobareleyadhene ni anyakoddo. Ni makalelo mamodhave murenddele wa Mulugu wakurumusaga mubuwelo wehu vamodha ni murima wehu nnakala oopwaseyene ni oobareleyene. (Sal. 4:8) Siyeyo yampadduwenle Ana naarive makathamiho aye yahimanle mowaguva oliye ahikanna murenddele. (1 Sam. 1:16-18) Teto nakala oopwaseya, enookweya wubuwela pama ni werana dhothoma dhapama. Ethu baani nnahowelihu werana? Wafwanyiwaga makathamiho oorusa ni madhu mamodha wawithane “anyakoddo awo.” Ni makalelo baani? Olobele wa Yehova ofiyedha okanna murenddele waye. (Luk. 11:9; 1 Tes. 5:17) Akala we onofwanyiwa makathamiho oorusa mwigumini mwawo, odidele olobela. Werana ndo, onere okanna murenddele wa Mulugu onaakurumuse murima wawo ni mubuwelo wawo. — Rom. 12:12. Namasugwera 01/24 epaddi 21 ddima 5-6

Wihina atxenihe ndina na Ababe, Yesu ahoonihiwa goyi, ahiruwaniwa ni ahinkedhiwa dhithu aheriliyena. Oliye ahinona wi ahawiwelela Ababe mwadhatedhene, teto kaanna ethu yamuthukuliha manyazo. (Ebe. 12:2) Yesu ahinona wi di Saddana amutatamulela makathamiho, mudhidhi yole worusa. (Luk. 22:2-4; 23:33, 34) Saddana afuna wi Yesu ahiye okala oororomeleya wa Yehova, mbwenye oliye kandile. Yesu wooniha wi Saddana muliba woota, muthu abure ni woniha wi Yehova ohukanna adhaari oororomeleya enadidela omwiwelela naarive efwanyiwaga dhoweha dhorusa. We onofuna omuhagalasa mwene awo Yesu Kiristu? Akala onofuna, odidele ovuwiha ndina na Yehova wihina wakavihere athu amodha onona dhikalelo dhotikiniha dha Yehova. Weragana eyo, we onna ohara thalo dha Yesu. (1 Ped. 2:21) Teto ndala ninga Yesu, onna omuhagalasa Yehova ni onna woniha wi mwiddani awo Saddana, muliba woota! Namasugwera 02/24 epaddi 11-12 ddima 11-13

Yaka tanu ndha dha mundduli, matxikwi ni matxikwi aathu ehibaddiziwa ninga Anamoona a Yehova. Wipeleka wa Yehova, onasakula okala namahara a Yesu, vano okuma mudhidhi yoyo, omulabela Yehova enakala ethu yathima mwigumini mwawo. Mbwenye wipeleka wula enavolowelavo ddi? Yesu ohuwoga egi: “Ole anafuna okala namahara aaga, iikodde.” (Mat. 16:24) Madhu owi wiikoodda ni egerego enatapulela “wiikoodde wamwinyo.” We wipeleka wa Yehova, onohowela okoodda ethu-sithu ononniwe wihina enere omuukula Yehova. (2 Kor. 5:14, 15) Eyo enovolowelavo wakoodda ‘mabasa oomwiilini,’ ninga wawerana mararuwo. (Gal. 5:19-21; 1 Kor. 6:18) Nerege omwiwelela Yehova ethu yorusa? Naari. Naamudhivelaga Yehova ni nakanna ebaribari wi malamulo aye enonibarela kahi ethu yorusa. — Sal. 119:97; Isa. 48:17, 18. Namasugwera 03/24 epaddi 2 ddima 1; epaddi 3 ddima 4

Yehova anowavaha muzimu waye wotxena ale anaarumedhiye. (Mat. 12:18) We podi wikoha: ‘Ginowanda wooniha ekalelo modha ya yowimma ya muzimu wotxena mwigumini mwaaga?’ Onowanda woona peeno akala onothabwa ovilela mohiyana ni kale ohunathi okala Namoona a Yehova? Wathabwaga woniha dhikalelo ndha dha yowimma ya muzimu wotxena, kunaganyedhege wi Yehova anowurumedha! Yehova anolabihedha muthengo wa yowobola wihina aakaviherena ale anaarumedhiye. (1 Tim. 2:5, 6) Mbwenye ki akala mmurima mwehu nnowanganyedha akala Yehova anonirumedha, naarive nigamanle obaddiziwa ni nroromelaga yowobola? Kabiha wubuwela, iyo kannahowela ororomela malabo aamatene dhithu nnubuwelihu, mbwenye iyo podi omuroromela Yehova. Ale enamuroromela podi wooniwa ninga athu owogowa vamentoni vaye teto Oliye anopaganya wareeliha. — Sal. 5:12; Rom. 3:26. Namasugwera 03/24 epaddi 30 ddima 15; epaddi 31 ddima 17