DEZEMBRO

Yehova ohukanna kopolo yowavenyiha anookwa? Hee ohukanna! Teto, oliye ‘dakopolo dhatedhene.’ (Ovuhu. 1:8) Oliye ohukanna kopolo dhomugujhula mwiddani di mwiddani, ni okwawa. (1 Kor. 15:26) Nihikanna ethu emodha enanthukulela orumedha wi Yehova anere wavenyiha anookwa: Mubuwelo waye kunna manddile. Kabiha wubuwela, oliye onowubuwela ndina na kadda thendderi. (Isa. 40:26) Ohiya eyo, Yehova onowawubuwela athu aatene ekwile. (Jó 14:13; Luk. 20: 38) Wa Yehova ethu yokweya wubuwela dhikalelo dha ale enaavenyihiwe muukwani, ninga makalelo dhaali kove dhewa, dhowera dhewa, dhaatedhene dhaapadduwele mwigumi mwewa ni mubuwelo wewa. Mohanganyedha, nnohowela ororomela mpaganyo wa Yehova wowavenyiha anookwa, mwaha nihinona wi oliye ohukanna efunelo ni kopolo yowakwanihedha mpaganyo ola. Mbwenye nihikanna dhithu dhimodha dhinanthukulela ororomela mpaganyo wa Mulugu wovenyihiwa wanookwa: Kale Yehova ahavenyiha anookwa. Yehova ahavaha kopolo adhaari ohiyana-hiyana ninga Yesu wihina yavenyihena anookwa. Namasugwera 04/23 epaddi 9-10 ddima 7-9

Nawogaga ni makalelo apama vamodha nupwaseya athuya enerege ofunave onivuruwana. Ebaribari wihina muthuya aafunaga okangana obe owoga obure wodhela dhithu nnarumedhihu, iyo kannawaddihedhiwa odidela othapanya. Nafuna iyo podi ogwadda othapanyawa noona wihina muthuya anafuna akaganege baahi. (Pro. 26:4) Mbwenye naarive athu efunaga okangana, nikanne ebaribari wihina enere okalawo athu owinjhiva enaafunege onivuruwana. Enowoneya pamadhene wihina okala muthu oopwaseya ethu yapama. Bumwahaya olobele wa Yehova omulobaga kopolo wihina wande okala muthu oopwaseya, wafunaga omwakula muthu anokoha wodhela dhithu onarumedhiwe. Kuddiwale wihina omwakula muthu ni makalelo oopwaseya, podi wukavihera orabela okangana. Wakula ni makalelo oopwaseya ni anriho, podi wathukulela athu amodhaya ofunaga wiwa ni osaddula mubuwelo wewa wodhela anamoona a Yehova ni wodhela Bibiliya. Bumwahaya, ‘mukalege owiwegeredhene wihina mwawakule pama athu enuukoheni wodhela nroromelo nenyu. Mwakulaga mwamakalelo apama ni nriho.’ (1 Ped. 3:15) Teto wikome wihina okale muthu oopwaseya wi woonihe wihina oli muthu akopolo! Namasugwera 09/23 epaddi 19 ddima 18-19

Kabeni noone makalelo mannayi owoniha wi nili athu oovilela. Yobajha, muthu oovilela kananyanyuwa bure-bure. Muthu oovilela aligiwaga anakala oopwaseya ni kanawelihedha kunyawunya. Oliye kanaweddiha athu amodha ni makalelo abure dhaye dhahimweddelaga pama (Êxo. 34:6) Yanabiili, muthu oovilela anowanda ojheha nupwaseya. Muthu oovilela anowilibihedha ohutakaleliwa aajhehaga ethu, thabwa-thabwa akala ethuya kinereya ninga mwajhehedhiye. (Mat. 18:26, 27) Yanatharu, muthu oovilela kaneerana dhithudha ahubuwenle. Mbwenye akala muthu oovilela anafuna eerena ethu yathima, oliye kaneerana dhithudha ahaabihile wubuwela newene kaneerana dhithudha ni marulu. Ohiya eyo, oliye anopatha mudhidhi wihina ubuwele ele anafuniye werana. Amala, oliye anopwasedha werana dhithudha mwamakalelo apama. Yanenayi, muthu oovilela anowilibihedha wawanana makathamiho ni kanakala orogave. Mbwenye muthu oovilela, anowilibihedha osugwera dhithu dhinampadduwela mwigumini mwaaye ni anere werana ele anandiye wihina adhowegeve amulabelaga Yehova. (Kol. 1:11) Adhaari a Yehova enohowela woniha ovilela mwadhatedhene. Namasugwera 08/23 epaddi 20-21 ddima 3-6

Ethu yathima enanithukulela obarela murima wehu sowi Yehova dinapendda murima wehu. Eyo enatapulela wihina mohiyana ni athu amodha enasugwa baahi ekalelo yehu yoode, Yehova onowanda woona ele eli mmurimani mwehu. Nadhaliha mubuwelo wehu ni malagano a Yehova, oliye aneerege onidhivela ni aneere onivaha egumi yohimala. (Juwa. 4:14) Nimakalelo yala mubuwelo ni dhowoota dha Saddana kadhinanitatamulele makathamiho, mwaha kannaavahe mburo dhithu dhendha. (1 Juwa. 5:18, 19) Naathabwagave onfiyedha Yehova, odhivela ni nriho ninnihuna nuliye nnerege othabwa wunnuwa. Iyo nnomudhivela vanlubale Baabihu oodhivela Yehova, bumwahaya nnowidda mubuwelo onanithukulela werana yothega. Murogola dhaala anithaniwa Marta anakala oKrowasiya atujeliwe wawerana mararuwo ohuleba egi: “Wa miyo kiyaali yokweya wubuwela pamadhene ni owanana munigwa wowerana ethu yabure wihina giihagalase muwari mwa mudhidhi mung’onove. Mbwenye omoova Yehova wihigibarela.” Nimakalelo baani omoova Yehova wimukaviheriwa Marta? Marta onihina oliye apendda makathamiho yakumelelevo mwaha werana ethu yabure. Ni iyoya nnohowela werana emodhave. Namasugwera 06/23 epaddi 20-21 ddima 3-4

Yesu ahinona wi efunelo ya Yehova yaali otxeniha ndina naye ni ovanyiha dhowoota dhatedhene inkedhiwe Yehova. Bumwahaya Yesu adhe aahudhihege anamahara aye olobela yegi: “Baabihu muli odhulu, ndina nenyu ntxenihiwe.” (Mat. 6:9) Yesu owonelamo wi muselu ola wotxenihiwa ndina na Yehova wopatha dhopaddusa dhatedhene. Kawo yopaddusa emodhaya etxenihe ndina na Yehova ompitha Yesu. Mbwenye Yesu nuumagiwa, amwiddani aye yamwinkedhe ddi? Oruwana dhithu dhotaleleya! Mwebaribarene Yesu ahinona wihina olabihedha mwamakalelo abure obe oruwana ndina noweela na Yehova yaali yothega enlubale. Vano otorihiwa ni winkedhiwa wi ahiruwana ndina na Yehova yaali ethu yaamukunle vanlubale. Podi wera yaali ethu yela yamuthukulenle Yesu okala “oothuwathuwene” mudhidhi ahinathi omagiwa. — Luk. 22:41-44. Namasugwera 02/24 epaddi 11 ddima 11

Mudhidhi nnathamagigihu dila ela yegumi, odhivela ninnihuna ni Yehova vamodha ni Yesu winohowela okala winlubale opitha odhivela ninnihuna ni amudhi ehu. (Mat. 10:37) Mbwenye eyo kinatapulela wi kannahowela ovaha thima mutholo ninnihuna vemudhini. Mwaha neegi nimuhagalase Yehova ni mwanaye Yesu, nnohowela wakwanihedha mutholo ninnihuna vemudhini. (1 Tim. 5:4, 8) Neerana eyo nnere ohagalala. Yehova ohunona wi emudhi enahagalala anamatelana yeddihanaga nuudhivela vamodha ni nriho, abaabi yadhivelaga ni yalagaga aniiwa teto anamwani yawiwelelaga makolo ewa. (Efe. 5:33; 6:1, 4) Akala we oli baabi, mayi obe mwaana, kuddiwale wihina ethu yathimaya fuwaparihedha mabasa malagano amBibiliyani. Kuweregena dhithudha mwamakalelo onafuneliwe obe ninga athu a murudda wawo eneriwana, newene kuxixe ohara dholaga dhinavaha mEspesyalista amwilaboni enawogiwa wodhela muselu wa murala. Olabihedhege pamadhene malivuru ehu, mwaha enonikavihera waparihedha mabasa malagano amBibiliyani. Namasugwera 08/23 epaddi 28 ddima 6-7

Murogola anohowela ohudhera werana dhithu dhinafuna omukavihera mwigumini mwaaye kadda labo. Dhithu ndho oliye podi ohudhera agaali mwana ni dhinere omukavihera egumaye yatene. Motajhiha, ohudhera wileri ni oleba pama. Dhilabo dhimodha athu enubuwela wihina ahiyana kinafwanelela ohudhera wileri ni oleba. Mbwenye onona wileri ni oleba ethu yathima vanlubale makiristawu aatene enahoweliwa ohudhera. (1 Tim. 4:13) Bumwahaya, kuhiye wihina ethu-sithu yuthukulele ohuhudhera wileri ni oleba pama. Nerana eyo yokumelelavoya enakale eevi? Eneere okala yokweya wafwanya mabasa ni odhowagave olabaga. Teto onerege wanda omuhudhera pamadhene Bibiliya ni wahudhiha athu amodha. Mbwenye yathimaya sowihina, onerege wanda omwileri pamadhene Bibiliya ni opendda dhithu dhilebiwe mBibiliyani, dhinukavihere omwaddamela Yehova. — 1 Tim. 4:15. Namasugwera 12/23 epaddi 20 ddima 10-11

Omulobege nikavihero Yehova wihina wande okala oolibeene wafwanyaga dhoweha. Iyo nli athu ohilogomana, mwaha wa yeyo, nnohowela malabo aamateene wilibihedha wihina naherena ele eli yabure. Mbwenye Saddana anere werana dhatedhene wi antotele makathamiho mwigumini mwehu wodhela onithukulela werena ele eli yabure. Ethu emodha analabihedhiye wihina aneehe si yaredhelo yonyakavala. Makalelo ala owaredha podi onithukulela odhaliha mubuwelo wehu ni dhithu dhonyakavala. Teto, bu mubuwelo yola wanthukulele werana yothega yowopiha ni oyelela wandana wehu ni Yehova. (Mar. 7:21-23; Tiya. 1:14, 15) Nafunaga ogonjhiha yoweha yanthukulele werana ethu yabure, nnohowela oloba nikavihero na Yehova. Yesu ahiwoga wodhela muselu yola mudhidhi alobelaga. “Kamunihiye omorela muwehiwani, mbwenye munobole mwa dhotakala.” (Dho. 6:13) Yehova onofuna onikavihera, mbwenye iyo nnohowela oloba nikaviherona. Teto, nnohowela werana dhithu dhiniwanana nindhe nlobilihu. Namasugwera 05/23 epaddi 6-7 ddima 15-17

Anamatelana yavahaga thima wandana enniwana ni Yehova, enoparihedha mabasa dholaga dhaye, ndo aliwa enorabela ni onowanda wawanana makathamiho yaridhihe odhivela wewa. Muthu owithwelavo epaddi yomuzimuni onowilibihedha wihina etajhihe dhikalelo dha Yehova ninga, opama, ovilela ni olevelela. (Efe. 4:32–5:1) Anamatelana yonihaga dhikalelo ndha, odhivela enniwana mmodha ni mukwaye onerege wenjhedhedheya. Murogola dhaala anithaniwa Lena, ali ooteliwene muwari mwa yaka 25, ohuwoga egi: “Sokweya omudhivela ni omuriha muthu owithwelavo epaddi yomuzimuni.” Kabeni noone yopadduwa ya mBibiliyani. Nuufiya mudhidhi wihina Yehova aasakule makolo a Mesiya, oliye amusakule Juze ni Mariya naarive egaaliwo athu owinjhiva anihimo na Davidi. Mwaha waddi? Mwaha wi aliwa yahikanna wandana wooliba ni Yehova, teto oliye ahinona wihina aliwa yerege omusogoliha vamateloni vewa. Namasugwera 05/23 epaddi 21 ddima 3-4

Naarive namasogolela ehu Yesu Kiristu agaali oologomana, athu analabihedhiye wihina eholelege nlogo naye velaboni yavati bohilogomana. Bumwahaya malabo mamodha enonirusa wawiwelela, thabwathabwa yaniloba werana ethu nahinafunihu. Nlabo dhaala, dhahimurusa murumiwi Peduru okala muthu owiwelela. Oliye ahaddeliwa ni mungero wihina aajhe anenyama yaali ootakala mowiwanana ni nlamulo na Moyizeji. Mbwenye Peduru ahikoodda wiwelela, ohiya dila modha mbwenye dila tharu! (Dho. 10:9-16) Mwahaya bwaddi Peduru adhe ahiwelelege? Podi wera oliye koonelamo yoholela ele exa. Mbwenye murumiwi Pawulo, anamaholela yakala oJeruzale nuwoga ni Pawulo wihina aathukule alobwana annayi aavolowena mutempulu ni itxenihe aharaga mweddelo wewa wihina oliye oonihe wihina oowavaha thima malamulo a Moyizeji. Murumiwi Pawulo ahinona wihina makiristawu kiyahowela wahara malamulo ale, teto oliye keerilena ethu yabure. Naarive dhigaali ndo, Pawulo ‘waathukula alobwana ale ni odhowa witxeniha mowiwanana ni mweddelo wewa.’ (Dho. 21:23, 24, 26) Wiwelela wa Pawulo, wahakavihera addibila okanna wiwanana. — Rom. 14:19, 21. Namasugwera 10/23 epaddi 10 ddima 15-16

Mwebaribarene we kuwawoge wihina woova sili ekalelo yathima athu yandana. Mbwenye ale enafuna okanna wandana wooliba ni Yehova enohowela ‘omoova.’ Naarive akala nnamulabela Yehova muwari mwa yakadhene obe naari, iyo aatene nnohowela omoova mwamakalelo apama. Mbwenye omoova Yehova winatapulela ddi? Omoova Yehova winatapulela omudhivela vanlubale oliye ni oherana ethu-sithu yanonge wandana ninnihuna ni oliye. Motajhiha, ela yaali ekalelo ‘yoomoova Mulugu’ anna Yesu. (Ebe. 5:7) Oliye kamoona Yehova ninga muthu owoopiha. (Isa. 11:2, 3) Mwebaribarene oliye omudhivela vanlubale Yehova ni oofuna omwiwelela. (Juwa. 14:21, 31) Ndala ninga Yesu, iyo nnomuriha ni nnomutikina Yehova. Mwaha nihinona wi oliye dodhivela, dathotho, dowogowa ni dakopolo dhatedhene. Teto iyo nihinona wihina Yehova ononidhivela vamlubale ni dhatedhene nnerihuna podi omuukula obe omuhagalasa.— Sal. 78:41; Pro. 27:11. Namasugwera 06/23 epaddi 14 ddima 1-2; epaddi 15 ddima 5

Mwene Uziya nuukala muthu oovuwa ni akopolo, oliye odduwala dhithu dhatedhene Yehova aamwereliye. Nnahudheravo ddi? Nnohowela ohuddiwala wihina mareeliho ni mutholo dhatedhene nnakelihu dhinadhela wa Yehova. Ohiya withukulaga mwaha wa dhithu nnandihu werana, nnohowela onvaha nthithimiho natene Yehova. (1 Kor. 4:7) Ohiya eyo nnohowela okala athu owiyeviha ni ohudduwala wihina nili athu oohilogomana. Bumwahaya nnohowela osumululiwa malabo mamodha. Ddibila dhaala anna yaka 60 ohuleba egi: “Miyo gihihudhera ohutakaleliwa ni ohikwerebeya athu amodha yoona wihina gihiviriganiha. Malabo mamodha ginoviriganiha ninga mwaana ni ginolagiwa mwaha wa dhoviriganiha dhendha, naarive dhigaali ndo, ginowilibihedha wihina giwomihedhe dhithudha ni gidhowegeve gimulabelaga Yehova.” Naamwiwelelaga Yehova ni nilibihedhaga okala owiyeviha nnokanna ohagalala webaribari. — Pro. 22:4. Namasugwera 09/23 epaddi 10 ddima 10-11

Makiristawu oobajha yohowela ovilela. Aliwa yofwanyiwa makathamiho mamodhave yafwanya athu aatene a mudhidhi yole, mbwenye aliwa yahikanna makathamiho mamodha mwaha wokala makiristawu. Owinjhiva wa aliwa yoharahariwa ohiya baahi nanamaholela amajudewu, mbwenye nanamathonga oRoma vamodha naamudhiwa. (Mat. 10:21) Teto muwari mwa mulogo, aliwa yohowela owanana dhohudhiha dhowoota yavuwiha mapostata dhaathukulele addibila ogaweya. (Dho. 20:29, 30) Naarive dhigaali ndo, makiristawu ale yahivilela. (Ovuhu. 2:3) Nimakalelo baani? Aliwa yopendda dhopadduwa dha adhaari a Yehova yonihile ovilela dhinafwanyeya mBibiliyani ninga ya Jo. (Tiya. 5:10, 11) Teto aliwa yoolobela elobaga kopolo. (Dho. 4:29-31) Yowapendda mareeliho yawakeliwa mwaha okala oovilela. (Dho. 5:41) Ni iyoya podi ohudhera ni opendda ni dhopadduwa dha adhaari a Yehova yonihile odhivela dhinafwanyeya mBibiliyani ni mmalivuruni mwehu. Namasugwera 07/23 epaddi 3 ddima 5-6

Yehova ni Yesu kidha enisukumaga. Murumiwi Peduru numukoodda Yesu ohowela werana yothoma yathima. Oliye eere ohiya okala namahara a Yesu obe eere odidela avilelaga? Yesu ahimpigireyela Yehova amulobaga wihina nroromelo na Peduru nnaridhe. Teto Yesu ahimwaddela Peduru wihina ahimulobelela. Yesu woniha wi oororomela wi Peduru eere wanda walibiha addibile. (Luk. 22:31, 32) Podi wera Peduru akala oolibeene ubuwelaga ndhe Yesu aawogiliye! Ni makalelo mamodhave, naafunaga werana yothoma yathima mwigumini mwehu, Yehova podi onikavihera odidela okala oororomeleya. Oliye podi werana eyo aalabihedhaga anamakukula oodhivela. (Efe. 4:8, 11) Ndala ninga Yehova amusamaleliye Peduru vamodha ni anamahara amodha epaddi yomwilini, Yehova aneere onisamalela naapwehaga Omwene waye mburo wobajha mwigumini mwehu. Namasugwera 09/23 epaddi 24-25 ddima 14-15

Yehova onoopwasedha osugwa dhatedhene nnerihuna wihina nawonihe athu opama naarive dhigaali dhing’ono. Yehova onowoona dhithu dhatedhene nnerihuna ni anere onreeliha. Akala kale waali namaholela mulogo obe mudhaari okavihera Yehova kanadduwala mabasa aamateene wapariliwe ni odhivela wanniwena wuthukulele wapara mabasa ala. (1 Kor. 15:58) Teto oliye onowoona odhivela ononihiwe ofiyedha peeno. Yehova anafuna wihina aatene iyo nenjhedhedhe odhivela ninnihuna nuliye vamodha naathu amodha. Iyo podi olibiha odhivela ninnihuna ni Yehova namwilerigi Bibiliya, naapenddaga ni nalobelaga wa oliye. Iyo podi wenjhedhedha odhivela ninnihuna naaddibila vamodha ni arogola wodhela werana dhithu wihina nakavihere. Nenjhedhedha odhivela wehu, nnothabwa omwaddamela Yehova vamodha ni emudhi yehu yomuzimuni eli addibila. Teto wandana ninnihuna ni Yehova vamodha ni addibila onokala wa mukalakala! Namasugwera 07/23 epaddi 10 ddima 11; epaddi 11 ddima 13; epaddi 13 ddima 18

Kadda mukiristawu onohowela werana yothoma wodhela murombwe baani anafuniye ojha obe naari. (Gal. 6:5) Mukiristawu ahoowelaga osakula makalelo oosamalela egumaye, oliye onohowela okala pasope wihina ahalupe malamulo a mBibiliyani enawoga wodhela nikame ni makanga. (Dho. 15:20; Gal. 5:19, 20) Vano onelamo wi kanaalupe malamulo yaala, kadda mukiristawu onohowela othoma wodhela murombwe baani anafuniye orumedha obe naari. Iyo nnohowela oriiha yothoma ya kadda ddibila wodhela makalelo oojha murombwe naarive nahirumedhaga. Mowindo nnohowela wubuwela pontu ndha nayi: (1) Omwene wa Mulugu baahi bunande omariha dhiredda dhatedhene. (Isa. 33:24) (2) Kadda mukiristawu onohowela onona pamadhene ele eli yapama wa oliye (3) Kuwatorihe amodha wodhela dhothoma dhewa, newene kukale nibwe nowakwakwathusa. (Rom. 14:13) (4) Makiristawu enowoniha odhivela ni ehinona wihina wiwanana mmulogoni ethu yathima opitha moonelo weewa. — Rom. 14:15, 19, 20. Namasugwera 07/23 epaddi 24 ddima 15

Mwebaribarene we onovaha thima wandana wawo ni Yehova!. Obajha kale yahikalawo athu owinjhiva yavaha thima wandana yanniwana ni Yehova. (Sal. 104:33, 34) Teto owinjhiva yahileva ethu-sithu wihina emulabele Yehova. Siyeyo anazirewu obe owivelela yeriliwana mudhidhi wa amwaana Izarayeli. Anazirewu yaali amwaana Izarayeli yaleva ethu wihina emulabele Yehova mwamakalelo avayekiwa. Nlamulo na Moyizeji noowenya wihina mulobwana obe muhiyana erena mpaganyo wa vayeka ampaganyaga Yehova okala nazirewu muwari mwa mudhidhene. (Núm. 6:1, 2) Mwana Izarayeli erana mpaganyo ola wa vayeka wokala nazirewu, ohoowela ohara dhoholela, amwaana Izarayeli amodhaya yahahoweliwa ohara. Mbwenye ethu baani yamuthukulela muthu othoma okala nazirewu? Podi wera yaali mwaha wa odhivela anniyena ni Yehova ni otamalela waye mwaha mareeliho awakeliye. — Deut. 6:5; 16:17. Namasugwera 02/24 epaddi 14 ddima 1-2

MBibiliyani, madhu owi “ororomeleya” obe “odhivela wahinamala,” ni Ebarayiku, enatapulela odhivela webaribari onadhela vati va murima. Dila dhowinjhivadhene madhu ala enolabihedhiwa yawogiwaga wodhela odhivela Yehova anniyena ni adhaari aye. Teto madhu yaala enolabihedhiwa mBibiliyani, wihina etonyihedhe odhivela enna adhaari a Yehova mmodha ni mukwaye. (2 Sam 9:6, 7) Nuuvira wa mudhidhi ororomeleya wehu podi okala woliba. Siyeyo yapadduwile ni namavuhulela Daniyeli. Ororomeleya wa Daniyeli wahehiwa egumaye yaatene. Mbwenye aganna yaka 90 oliye ahifwanyiwa yoweha enlubale. Amusadoro a mwene Dariyu kayanfuna Daniyeli newene kayamuriha Yehova. Vano aliwa osayelaga makalelo oompa Daniyeli. Aliwa omweriha mwene wasinari nlamulo naakoddiha athu omulobelela Mulugu mmodhaya ahili Dariyu. Vano, wihina Daniyeli onihe wi aali oororomeleya wa mwene, oliye ohowela ohiya omulobelela Yehova ni omwebedha muwari mwa malabo 30. Mbwenye Daniyeli ahikoodda werana eyo. — Dan. 6:12-15, 20-22. Namasugwera 08/23 epaddi 5 ddima 10-12

Yehova anafuna wi nawoonihege odhivela addibilihu. (1 Juwa. 4:7) Ddibila aneddiha mwamakalelo abure, nikanne ebaribari wihina oliye kerilena yapudhave, ni wihina nuuliyeya anna wilibihedha wihina eerena dhithudha ninga Yehova anafuniye. (Pro. 12:18) Yehova anowadhivela adhaari aye oororomeleya naarive eviriganihaga. Naarive niviriganihaga, Oliye anodidelave okala mukwihu, teto kananikoyela ntxiga. (Sal. 103:9) Iyo nnotamalela vanlubale mwaha Yehova anonilevelela, bumwahaya ni iyoya nnohowela omutajhiha wodhela walevelela amodha yanithegela! (Efe. 4:32–5:1) Sathima ohuddiwala wihina nihaddamela omakuthulo wa elabo ela. Nili malabo oorusa, bumwahaya nnohowela okala owiwanana ni addibilihu. Podi wera oharahariwa winerege othabwa ni nnere ovokedhiwa mukambura mwaha wa nroromelo nehu. Eyo yapadduwa nnerege wahowela addibilihu wihina enikavihere. — Pro. 17:17. Namasugwera 03/24 epaddi 15-16 ddima 6-7

Bibiliya anowawoga azombwe yanfiyendhe Yehova, yawakenle mareeliho aye ni yafwannye ohagalala. Davidi di mmodha wa azombwe ayo. Agaali muzombwene Davidi ahisakula wandana ni Yehova, ni vasogolova ahikala mwene oororomeleya. (1 Reis 3:6; 9:4, 5; 14:8) Vano onoonamo aavi ohudhera wodhela egumi ya Davidi? Mwebaribarene yopadduwa yaye enere wulibiha ni enere wuthukulela omulabela Yehova nuroromeleya. Obe we podi othoma ohudhera wodhela yopadduwa ya Marku obe ya Timotiyu. Aliwa yabanjhe omulabela Yehova egaali azombwe ni yahikalave oororomeleya ofiyedha okwa wewa. Aliwa yahirumedhiwa vamentoni va Yehova. Makalelo onalabihedhiwe egumi yawo ovanene, eneere opatha makalelo enaakale egumi yawo osogolo. Wamuroromela Yehova ohiya wiroromela wamwinnyo, Oliye anere wukavihera wihina weregena dhothoma dhapama. We podi okanna egumi yohagalasa ni dhithu dhowinjhiva dhapama, mbwenye kuddiwale wihina Yehova anathabwa ovaha thima ndhe onamwereliwe. Olabihedha egumawo wihina omulabele baabihu oodhivela Yehova, yothoma yapama onahoweliwe werana. Kaawo ethu enaliganiiwana. Namasugwera 09/23 epaddi 13 ddima 18-19

Murumiwi Pawulo ahinona wi addibile kayalogomanne. Motajhiha makiristawu mamodha a mulogo wo Jeruzale kayarumedha wihina oliye aali namahara a Yesu. (Dho. 9:26) Vasogolova, makiristawu mamodha omuwogaga obure wihina etakalihe emuthu yaye. (2 Kor. 10:10) Nlabo dhaala, Pawulo ahimoona namaholela mulogo dhaala eragana yothoma yabure yaathukulenle amodha okwakwathuwa. (Gal. 2:11, 12) Teto mukwaye mmodha eediyena ithaniwa Marku, aherana ethu yamuukunle vanlubale. (Dho. 15:37, 38) Pawulo ahafune eere wenya wihina dhithu ndha dhimuthukulele wasukuma athu yala yamuthegele, mbwenye kahi yeyo oliye eriliyena. Oliye awoona addibila ala mwamakalelo apama ni ahididela omulabela Yehova nuuviheya. Ddiniyani yamukavihere Pawulo ovilela? Pawulo owadhivela addibila. Vano mwaha wa odhivela wula, oliye apwasedha osugwa dhikalelo dhapama dha addibila ohiya dhoviriganiha dhewa. Teto odhivela wahimukavihera oparihedha mabasa madhu enafwanyeya va yolebela ya peeno. Namasugwera 03/24 epaddi 15 ddima 4-5

MBibiliyani dhihikalamo dhopadduwa dhinoniha wihina opwaseya ekalelo yathima. Kasugwa yopadduwa ya Izaki, oliye nuutamela murudda woJerari, amwanddamani aaye yaali mafilistewu, obajha omukalela nrima ofiyedha wavuhelela matxela aatene yatibile adhaari aababe. Mbwenye ohiya owana wihina aahalena matxela ale, Izaki vamodha ni amudhaaye otamela murudda mmodha wolapela ni ole yaliwa ni watiba matxela mamodhaya. (Gén. 26:12-18) Mbwenye mafilistewu owoga wihina manjhe a matxela ale maxa Izaki aatibiliye yaali ewa, naarive dhigaali ndo, Izaki ahididela okala muthu oopwaseya. (Gén. 26:19-25) Ethu baani yaamukavihere Izaki okala muthu oopwaseya, naarive amodha yeragana dhatedhene wihina emulige? Mohanganyedha oliye ahisugwa ekalelo ya makolo aye ni ahihudhera ni yotajhiha ya ababe Abarawu, aali muthu a murenddele, ni ahihudhera ni yotajhiha ya amaye Sara aali a ‘muzimu woomala ni wapama.’ — 1 Ped. 3:4-6; Gén. 21:22-34. Namasugwera 09/23 epaddi 15 ddima 4

Mwaha wa odhivela waye, Yehova ohimuruma mwanaye oobajha wihina adhe velaboni yavati mudhidhi Oliye aathomiliye kale. Ni makalelo yala Yesu eere wanda wahudhiha athu wodhela Omwene ni ovaha egumaye wihina anobole mutheegani ni muukwani. Numala, Yehova onvenyiha Yesu wihina ahogolowele odhulu ni athongege ninga Mwene a Omwene wa Mulugu. Mutoma wathimaya onafwanyeya mBibiliyani futxenihiwa wa ndina na Yehova. Eyo eneere opadduwa mudhidhi aakwanelihaga efunelo yaye ni elabo yavati wodhela Omwene waye onathongiwege ni Yesu Kiristu. Efunelo ya Yehova kinadha esadduliwaga. Yehova ohupaganya wi dhatedhene dhinere opadduwa mwamakalelo apaganyiliye. (Isa. 46:10, nota.; Ebe. 6:17, 18) Mudhidhi waviraga, elabo eneere osadduliwa wihina ekale parayizu vano odhulu wologomana ni wowogowa wa Adawu ni Eva onerege okalawo ni mukalakala. (Sal. 22:26) Teto Yehova onofuna onerela dhithu dhowinjhiva. Efunelo yaye yinlubale sowihina adhaari aye aatene odhulu ni elabo yavati emwebedhege Oliye mowiwanana. Nimakalelo yala, athu aatene enere okala oororomeleya ni enerege omwiwelela Yehova ali Namathonga Munlubale. (Efe. 1:8-11) Kunatikina woonaga makalelo Yehova anakwanelihiye efunelo yaye? Namasugwera 10/23 epaddi 20 ddima 7-8

Majudewu yakumile oBabiloniya nufiya oJeruzale, aliwa nufiya yahibajha ofwanyiwa makathamiho mwaha wa ohiwanana wa anamathonga, orameya korowa ni widdiwa. Mwaha wa yeyo amodha yowarusa opwasedha wapara mabasa oovenyihedha tempulu. Bumwahaya Yehova waruma anamavuhulela abiili Ajewu ni Zakariya, wihina ekavihere nlogo ohogolowela oviheya ni mabasa a Yehova. (Ag. 1:1; Zac. 1:1) Mbwenye nuuvira yaka 50 majudewu ale yahogolowenle oJeruzale yohowela olibihiwa dila biili. Esdara aanonne wakopiyari pamadhene malamulo, okuma oBabiloniya odhowa elabo yoJeruzale wihina alibihe nlogo na Mulugu opweha omwebedha Mulugu mburo wobajha mwigumini mwewa. (Esd. 7:1, 6) Dhovuhulela dha Ajewu ni Zakariya dhahikavihera nlogo na Mulugu odidela emuroromelaga Yehova mudhidhi worusa. Dhovuhulela ndha podi onivaha ebaribari nihiyowa wihina Yehova anere onikavihera mudhidhi worusa naarive nifwaniwaga makathamiho bi makathamiho.— Pro. 22:19. Namasugwera 11/23 epaddi 14-15 ddima 2-3

Nnande aavi wawoniha odhivela addibilihu? Makalelo okweya owerana eyo, fudheela walibiha. Teto nthebwa ekalelo enafuna onikavihera ‘waalibiha amodhaya.’ (1 Tes. 4:18) Ki nnande aavi olibiha odhivela ninnihuna naaddibila amodhaya? Wodhela walevelela addibilihu naarive dhirusaga. Mwahaya bwaddi peeno egahoweleyaga vanlubale wadhivela addibilihu? Murumiwi Peduru ohuwoga mwahaya nuwoga egi: ‘Wihaddamela omakuthulo wa dhithu dhatedhene. Mowindala . . . mudhivelanege pamadhene.’ (1 Ped. 4:7, 8) Omakuthulo wa elabo ela yabure onna waddamela mowaguva. Mwaha wa yeyo, dhithu baani nnajhehihu opadduwa? Yesu ahawaddela anamahara aye egihina: “Nyu munere widdiwa ni malogo aamateene mwaha wa ndina naaga.” (Mat. 24:9) Wihina nande ovilelana widdiwa wula, nnohowela odidela okala owiwanana. Nakala owiwananeene Saddana kanande onimwalaniha mwaha wihina nowonihana odhivela. — Fil. 2:1, 2. Namasugwera 11/23 epaddi 13 ddima 18-19

Ebaribari enafwanyeya mBibiliyani ehikanna kopolo. Naahudhihaga athu wodhela Yehova ni wodhela dhikalelo dhaye, ethu yootikiniha enopadduwa. Lenso Saddana anakuneliyena athu wintoni nnomorawo ni enoobajha woona dhikalelo dhapama dha Baabihu. Vano aliwa enoobajha otikina kopolo dhinlubale dha Yehova. (Isa. 40:26) Enohudhera omuroromela Oliye mwaha wogowa waye. (Deut. 32:4) Aliwa enohudhera vanlubale ni thotho dhaye. (Isa. 55:9; Rom. 11:33) Ni enotodoleya yahudhera wi Yehova Mulugu oodhivela. (1 Juwa. 4:8) Vano yathabwaga wandana ni Yehova ejhehedhelo enniwana yokalawo ni mukalakala enothabwa okala yeebaribari mwigumini mwewa. Mwebaribareene ola oneti winlubale ninnihuna wowakavihera athu wandana ni Babihu ehu Yehova. Naakaviheraga athu wandana ni Yehova, ‘nnalaba mwimodhani’ ni Oliye. — 1 Kor. 3:5. Namasugwera 02/24 epaddi 12 ddima 15

Akala we onna omuhudhera Bibiliya ni Anamoona a Yehova obe akala makolo awo Anamoona a Yehova, onowubuwela obaddiziwa? Eyo yoluba yapama. Mbwenye wahinathi obaddiziwa onohowela wipeleka wa Yehova. Ni makalelo baani muthu anipelekiye wa Yehova? Iyo nnowipeleka wa Yehova wodhela ompaganya omulabela Oliyene baahi, teto werana efunelo yaye, enakale ethu yathima mwigumini mwehu. Teto we onompaganya omudhivela Yehova “ni murima wawo watene, ni emuthu yawo yatene, ni mubuwelo wawo watene ni kopolo dhawo dhatedhene.” (Mar. 12:30) Wipeleka wula onerana we ni Yehova baahi. Mbwenye obaddiziwa oneerana va anamwinjhi wihina wawoonihe athu amodhaya wi ohivelela wa Yehova. Wipeleka wawo wa Yehova, mpaganyo wavayeka ni wathima vanlubale. Teto Yehova anajheha wihina wakwanihedhe mpaganyo ola. — Ecl. 5:4, 5. Namasugwera 03/24 epaddi 2 ddima 2; epaddi 3 ddima 5

Anamatelana aatene enofwanyiwa makathamiho. Bibiliya anowoga pamadhene wodhela muselu ola egi: “Ale enafuna otelana, enere okanna makathamiho mwigumini mwewa.” (1 Kor. 7:28) Mwahaya bwaddi? Mwaha matelo baathu abiili ohilogomana. Kadda muthu wa aliwa ohukanna ekalelo yaye, dhofuna dhaye ni dhothoma dhohiyana. Teto podi oleliwa ni dhilemelelo dhohiyana-hiyana. Bumwahaya mudhidhi waviraga, mulobwana obe muhiyana podi obajha woona dhikalelo ahoniliye mudhidhi ehinathi otelana. Vano dhithu dhendha podi watatamulela makathamiho. Anamatelana amodha ohiya otxokotxela muladduya vamodha, enowinkedhana mmodha ni mukwaye wodhela makathamiho enakumelela vamateloni vewa, naarive aabiilene eganna muladdu. Amodhaya enofiyedha wubuwela wihina makalelo oomariha muladduya fumwalana. Nerege siyeyo enahoweleya? Naari! Yehova anajheha wihina anamatelana ekalege vamodha naarive akala mmodha wa aliwa anowakathamiha mateloya. Namasugwera 03/24 epaddi 16 ddima 8; epaddi 17 ddima 11

Wamala obaddiziwa, onerege odhowagave ohudheraga wodhela Yehova, teto odhivela onniwena ni Oliye onere wenjhedhedheya, ndala ejhehedhelo yawo yokalawo ni mukalakala mparayizuni velaboni yavati enere othabwa oliba. (Ebe. 5:13–6:1) We onere wanda wonelamo ele anawoga Romanos 5:2-4. Podi wera we ohufwanyiwa makathamiho owinjhiva. Mbwenye, naarive dhigaali ndo, we uhanda ovilela ni ohumoona Yehova urumedhaga vamentoni vaye. Vano mwaha onona wihina Yehova onowudhivela, ohukanna ethu yathima enuthukulela ojheeha nuuvilela wihina Yehova aneere wakwanihedha dhatedhene apaganyiliye. Vano ejhehedhelo yawo ehithabwa oliba, opitha mudhidhi ohudheragawene ebaribari. Teto ejhehedhelo ela, vano sebaribari ni enotapulela ethu yathima mwigumini mwawo ni enovolowela egumawo yaatene. Ejhehedhelo ela enosaddula makalelo onaweddihiwe amudhi awo, dhothoma dhawo ni makalelo onalabihediwe mudhidhi wawo. Murumiwi Pawulo anowoga ethu emodha yoriya wodhela ejhehedho ninnihuna namala orumedhiwa vamentoni va Yehova. Oliye ononipaganya wihina ejhehedhelo yehu mwebaribarene eneere wakwanela. — Rom. 15:13. Namasugwera 12/23 epaddi 12-13 ddima 16-19

Naafwanyiwaga makathamiho iyo podi weragana ni wubuwelaga dhithu nahadhihu nerena nahere nahifwanyiwaga makathamiho. Ndala ninga barku anafwanyiwiye nipevo ni otekuma wa niya, iyo podi wonaga wihina ninnofwanyiwa makathamiho ohiyanahiyana mudhidhi mmodhave. Yehova ananikavihera aavi nubuwelaga ni makalelo yala? Yehova anonipaganya wihina anere onikurumusa epaddi yomubuweloni ni yomuzimuni. Motajhiha, niya yathabwaga otekuma barkuya anotukumiwa wula ni wula. Wihina yande ovira vaari va otekuma wa niya, anamweddiha barku owinjhiva enolabihedha dhipano dhinamukavihera barkuya wi anaaberimege. Ni makalelo yala athuya enakala mbarkuni enakala oobareleyene mwaha barkuya kanathabwa oberima, teto enokanna olenddo wapama. Ethu enathabwa otikiniha sowihina dhipano ndha dhinathabwa okavihera barkuya eeddaga. Ni makalelo mamodhave Yehova anere onikurumusa epaddi yomubuweloni ni yomuzimuni nadidelave omulabela Oliye naarive naafwanyiwaga makathamiho oorusa. Namasugwera 01/24 epaddi 22 ddima 7-8

Wafwanyiwa woova we podi wikoha: ‘Ethu baani Yehova eriliyena?’ Karajhiha wubuwela dhopaddusa. Motajhiha, “opwasedhe osugwa” makalelo Yehova anasamaleliye folori vamodha ni balame, naarive akala dhithu ndha kadhipaddusiwe moligana ni Mulugu newene kadhinamwebedha, Oliye anosamalela. Eyo enowoniha wihina Yehova anere onisamalela ni iyowa. Wubuwela ni makalelo yaala wineere onikavihera wenjhedhedha nroromelo nehu ni Yehova. (Mat. 6:25-32) Teto we podi wubuwela dhithu Yehova awereliye adharaaye, wodhela ohudhera yopadduwa ya mudhaari a Yehova enafwanyeya mBibiliyani anna nroromelo nooliba, obe wileri dhopadduwa dha mwigumini dha adhaari a Yehova a malabo yaala. Ohiya eyo, wubuwele makalelo Yehova usamalenliye. Motajhiha, ethu baani Oliye eriliyena wihina we ohudhere ebaribari? (Juwa. 6:44) Nimakalelo baani Oliye awakunliye malobelo awo? (1 Juwa. 5:14) Dhithu baani dhapama dhinapadduwa mwigumini mwehu mwaha Yehova onivaha yowobola? — Efe. 1:7; Ebe. 4:14-16. Namasugwera 01/24 epaddi 4 ddima 6; epaddi 7 ddima 17