Ababi​—Mwakavihere aninyu omudhivela Yehova

1-2. Owogemo mwahaya bwaddi malabo mamodha nigakanna monelo mmodhene wodhela dholaga dha mBibliyani?

LABO namatelo, ale enatelana enopwasedha pamadhene mwaha wavathaddo wawogiwaga. Dholaga dha mBibliyani enavuruwaniwa labo nenne kahiyo dhixa mwigumini mwewa. Mbwenye okuma labo nenne, dholaga ndhe eniwiwa dhinokanna monelo mmodha mwigumini mwewa. Mwahaya? Mwaha vano enohowela oparihedha mabasa dholaga ndhe mwigumini mwewa ninga anamatelana.

² Ethu enakala ninga yoweha, bumudhidhi anamatelana enakanniwana ahima. Podi wera egaali addiye, aliwa yowiwa mwaha dhavathaddo dhawoga wodhela makalelo owalela ahima. Mbwenye vano dholaga ndha dhamBibliyani dhihikanna dhotapulela emodhene mwigumini mwewa. Aliwa ehikanna mutholo womulela mwaniwa. Oyo mutholo munlubale! Mwebaribarene, masadduwo mamodha amwigumini mwehu podi onthukulela okanna monelo mmodha wodhela dholaga dha mBibliyani. Bumwahaya, sathima iyo atene werana ele Yehova awaddeliye amwene owizarayeli. Nnohowela wileri ni opendda dholebela ‘malabo amatene’ a mwigumini mwehu.— Deut. 17:19.

3. Ohudhera wula nnasuze ddi?

³ Ababi, nyu muhukanna oneti munlubale mukiristawu anahoweliye okanna, wowahudhiha aninyu wodhela Yehova. Mbwenye kukalege wawaddelave baahi wodhela Yehova. Onohowela omukavihera mwanawo omudhivela Yehova ni murima waye wamutene. Onande addi werana ndo? Ohudhera wula, nnere woona dholaga nayi dhinukavihere. (2 Tim. 3:16) Nnere woona makalelo dhakaviheriwa ababi oparihedha mabasa dholaga ndha.

DHOLAGA NAYI DHINAAKAVIHERE ABABI

4. Dholaga baani ababi enahoweliwa ohara wihina yakavihere aniiwa omudhivela Yehova? (Tiago 1:5)

⁴ Yolaga 1: Osayele dhoholela dha Yehova. Omulobe Yehova wihina uvahe thotho onahoweliwe wihina wahudhihena anawo omudhivela Yehova. (Omwileri Tiago 1:5.) Kaavo anafuna wukavihera ahiri Yehova. Wodhela wa dhithu biili. Yobajha, kawo muthu anonne dhithu dhowinjhiva ninga babi omukwaranya Yehova. (Sal. 36:9) Yanabili, ohara dholaga dha Yehova dhinere wukavihera vanlubale. — Isa. 48:17.

5. a) Nikavihero baani nikuru na Yehova nnaavahiwa ababi? b) Mowiwanana ni vidiyu enna musolo “Yehova ohunihudhiha walela ahima” ohudherevo ddi ni yotajhiha ya ddibila ni murogola Amorim?

⁵ Wodhela nikuru naye ni madhu aye, Yehova anowavaha ababi dhoholela dhatedhene enahoweliwa wihina yaakavihere aniiwa omudhivelaYehova. (Mat. 24:45) Motajhiha, we podi ofwanya dholaga dhowinjhiva epaddi wiri muselu onna musolo “Nikavihero enahowela azombwe,” kale epaddi ela yadhesa mu revista Despertai! vano enadha mu sayitini mwehu. Vidiyu dhowinjhiva dhiri mu sayitini jw.org podi wakavihera ababi oparihedha mabasa dholaga dha mBibliyani yalelaga aniiwa.b — Pro. 2:4-6.

6. Joe ni mwariye enakala aavi yakelaga nikavihero na Yehova wodhela nikuru naye?

⁶ Ababi owinjhiva enovaha thima nikavihero natene enaakeliwa wa Yehova wodhela nikuru naye. Babi dhaala anithaniwa Joe anihina: “Walela ahima araru mwibaribarini kahi ethu yokweya. Miyo ni mwaraga nnolobelesa wa Yehova nimulobaga nikavihero. Malabo mamodha, nahona wi nifwanyiwaga makathamiho ale, wahikuma muselu ni vidiyu yiwanana ni makathamiho nannihuna. Iyo kanande walela pama aniihu niiholeliwe ni Yehova.” Joe ni mwariye enowona wihina muselu ndha ni vidiwudha dhinowakavihera aniiwa onfiyera Yehova.

7. Mwahaya ababi egahowelaga wilibihera wihina ekale yotajhiha yapama ya aniiwa? (Romanos 2:21)

⁷ Yolaga 2: Okale yotajhiha yapama ya anaawo. Ahima enasugwa ndhe ababiwa eneriwana, yindo watajhihaga enooniwa. Kawo babi oologomana. (Rom. 3:23) Naarive dhigaari ndo, ababi enohowela wilibihera wihina ekale yotajhiha yapama ya aniiwa. (Omwileri Romanos 2:21.) Kasugwa awogile babi wodhela ahima: “Aliwa enakala ninga esponja enanuula dhatedhene. Aliwa yonelamo wihina kannavirihamo ndhe nnagogihu siyeyo enonigiwa ni mweddelo wehu.” Mowindala odhivela wehu ni Yehova onofwanelela okala woliba ni ohusitheyege akala nnofuna wi aniihu emudhivelege oliye.

8-9. Ohudhere ddi ni madhu aawogile Andre ni Emma?

⁸ Ababi podi wahudhiha aniiwa omudhivela Yehova mwamakalelo oohiyana-iyana. Ddibila dhaala anna yaka 17 anithaniwa Andre awonge ayi: “Makolo aga eegihudhiya thima enna olobela. Kadda emahiyu gihinagone apapa yolobela ni miyo naarive ngerena nlobelo naaga. Apapa yogaddelesa yegi: ‘We podi othapanya ni Yehova dila dhowinjhiva onafuniwe.’ Bumwahaya olobela ethu yathima mwigumini mwaga, peeno galobelaga ginonfugulela Yehova murima waga wamutene ni ginamoona ninga babi oodhivela.” Ababi, kamuddiwale wi odhivela wenyu ni Yehova, podi wathukulela aninyu wutajhihani.

⁹ Kasugwa yotajhiha emodha ya murogola Emma. Babiwa nuwanyanyala, wahiyedha mangawu owinjhiva wihina amaye yalive. Oliye anihina: “Amama yohowela olaba vanlubale wihina yaalive mangawu amatene ni esamalele murala wehu, mbwenye aliwa yowogesa wihina Yehova kanadha aahiya adhaari aye osimwela ethu enahoweliwa. Gowona yotajhiha yewa ni gorumedha. Aliwa yowerana dhatedhene yanihudhihiwa.” Ki iyo nnahudheravo ddi? Eyo enontonyihedha wi ababi podi okala yotajhiha yapama yaaniiwa naarive efwanyiwaga makathamiho. — Gál. 6:9.

10. Mudhidhi wamwaana Ezarayeli ofuru baani yakanna ababi wothapanya naaniwa? (Deuteronómio 6:6, 7)

¹⁰ Yolaga 3: Okanne elamalelo yothapanya naanawo. Yehova ahawaddela amwaana Ezarayeli kale wihina aliwa yohowela okanna elamalelo yothapanya naaniwa wodhela Yehova. (Omwileri Deuteronómio 6:6, 7.) Mudhidhi yole, ababi owinjhiva yokanna ofuru wowinjhiva kadda labo, wothapanya naaniwa ni wowakavihera omudhivela Yehova ni murima wewa wamutene. Motajhiha, muzombwe oojha mudhidhi wowinjhivene ni ababe, elabaga omundda, yaalaga ni ehaddaga vamodha. Mwananamwali oovireliwa lado nantero aakaviheraga amaye, ni mabasa avaade. Mudhidhi yola, ababi yakaliwa vamodha naaniwa, yoparihedha mabasa wihina epare dhithu dhathima. Motajhiha, aliwa yere wanda othapanya wodhela dhikalelo dha Yehova ni makalelo Yehova anakaviheriye murala wewa.

11. Ofuru baani enna ababi wothapanya naaniwa?

¹¹ Peeno, dhithudha dhomala osadduwa. Mburo dhowinjhiva, ababi kinakanna mudhidhi wothapanya naaniwa. Ababi enalaba wolapela naaniwa, teto malabo owinjhivene, aniiwa enamala mudhidhi wowinjhiva egaari oskola. Bumwahaya, ababi enohowela waaja mudhidhi wothapanya naaniwa. (Efé. 5:15, 16; Fil. 1:10) Mudhidhi wapama wowerana ndo, simahiyu yakanna ohudhera wemudhi. Muzombwe dhala anithaniwa Alexandre anihina: “Apapa ehikanna elamalelo yolobela vamodha ni emudhi yatene, ni kinahiya ethu-siithu ovunganyedha mudhidhi yola. Ohudhera wamala nnopatha mudhidhi wothapanya.”

12. Yolaga baani musolo wamurala ehinahoweliwa oddiwala yakanna ohudhera wemudhi?

¹² Aka we ori musolo wamurala, wihina webedha wenyu wemudhi oriye onohowela were ddi, thabwathabwa epaddi ya anaawo? Onoonamo avi omukunga porograma ohudhera livuru nixa Ofwanye Egumi Yohagalasa Ya Malabo Amatene! Livuru nna, nnokweyiha ni podi opatha mudhidhi wothapanya ni anaawo. Kuddiwale wihina onafuna opathe mudhidhi yola, wihina anaawo efugule murima wewa, ni yuwaddele dhithu enubuweliwa ni dhinaathuwa-thuwiha. Bumwahaya, kuwegeredhe ohudhera wemudhi wihina wasumululena anaawo. Teto, kukanne ekalelo yonyanyuwa yavaha monelo wewa ohuniwanana ni Bibliya. Ohiya eyo, ohagalalege mwaha aliwa wuwaddela ndhe dhinaapadduwela mwigumini mwewa, ni ofugulege murima wawo wihina wahiye aliwa owoga ndhe dhinubuweliwa. Onere wanda wakavihera anaawo pamadhene wanona dhithu enubuweliwa.

13. Ababi ejheherege bahi wafiya mudhdhi wohudhera wihina yasuzihe aniiwa wodhela Yehova?

¹³ Ababi, mupathege kadda ofuru munakanninyuna wihina mwawaddele aninyu wodhela Yehova. Kamujheherege wawaddela wodhela Mulugu, wafiya mudhidhi wohudhera naaliwa baahi. Kasugwa ethu awonge mayi anithaniwa Lisa: “Iyo nnolabihera dhithu dhatedhene dhipaddusiwe wihina nahudhihe aniihu wodhela Yehova. Motajhiha, mwanabwihu aavudhuwaga, iyo nnopatha mudhidhi yole wihina nawonihe aniihu wi Yehova ohukanna ekalelo yowaredha ni anodhivela egumi ninga iyo.”

14. Mwahaya bwadddi ababi egahowela wakavihera aniiwa okanna akwiwa apama? (Provérbios 13:20)

¹⁴ Yolaga 4: Waakavihere anaawo okanna akwiwa apama. Bibliya kananikuwa wi wandana podi ovolowela egumihu. Podi okala mwamakalelo apama obe abure. (Omwileri Provérbios 13:20.) Ababi, nyu muhanona akwiwa aaninyu enawadheriwana? Munorajhihaga waredha naaliwa? Onaakavihere addi anaawo okanna akwiwa enamudhivela Yehova? (1 Cor. 15:33) Nyu podi wakavihera aniinyu wodhela wawithana addibila owithwelavo omuzimuni wihina yaapare mabasa bi mabasa ni muralinyu. — Sal. 119:63.

15. Ababi enaakavihere addi aniiwa okanna akwiwa apama?

¹⁵ Kasugwa empadduwele babi anithaniwa Tony. Oliye vamodha ni mwariye enowoga ethu yenriwana wihina yakavihere aniiwa okanna wandana wapama: “Iyo nahikanna elamalelo yowawithana addibila ni arogola oohiyana-iyana ni ayaka dhohiya-iyana wihina naapare mabasa bi mabasa vamuralani vehu. Malabo mamodha, nojha vamodha nindo iyo werana ohudhera wemudhi. Ala yaari makalelo apama nafwanyilihu owanona addibila ala enamudhivela Yehova ni enamulabela nuhagalala. Iyo nahikanna oneti owawakela vadevihu anameddelela mulogo, amisiyonariyo, ni addibila amodha. Aniihu eehudhera vamodha naaliwa, dhopadduwa dhewa, ni oviheya waddibila yala, eyo ehakavihera aniihu wandana pamadhene ni Yehova.” Ababi, mwikome wakavihera aninyu okanna akwiwa apama.

KUYELELE EJHEHERO

16. Ababi ekanne monelo baani aniiwa yathoma ohumulabela Yehova?

¹⁶ Podi wera naarive ogilibihere wihina omukavihere mwanawo, onowona wi oliye kanafuna omulabela Yehova. Akala eyo enopadduwa kuwubuwelege wihina diwe aviriganihe. Yehova ohunivaha iyo atene ofuru wosakula, obe nere mwanawo ohukanna ofuru wosakula akala anofuna omulabela Yehova obe naari. Akala mwanawo ohuthoma ohumulabela Yehova, kuyelele ejhehero wihina labo nimodha anere ohogolowa. Kubuwela nladdaniho na mwaana oodduddumadha vaade. (Luc. 15:11-19, 22-24) Nladdaniho nna, mwaana ola aherana dhithu dhowinjhiva dhabure, mbwenye omagomiherowa oliye ohogolowela vaade. Podi wera amodha enowubuwela, “nna nladdaniho bani.” “Nerege elaya enopadduwa?” Mwebaribarene enowereya! Kasugwa yopadduwa ya mulobwana anithaniwa Elie.

17. Yopadduwa ya Elie yulibihe addi?

¹⁷ Eile anasoriha ayi wodhela ababe: “ Aliwa yahilibihera vanlubale werana enandiwa wihina egikavihere omudhivela Yehova ni madhu aye, Bibliya. Mbwenye nuwunnuwa, miyo wambela ohiwelela.” Elie wambela okanna mweddelo wohidhuwanyeya, vano ababe numukiratela wihina emukavihere epaddi yomuzimuni oliye kaavuruwane. Nuwindo, oliye odduddumadha vaade odhowa weragana dhithu dhabure. Naarive dhigaari ndo, Elie oothapanya muselu dhamBibliyani ni mukwaye. Elie anihina: “Fivenvo gonelimimo wihina kadda labo gawogimi wodhela Yehova fwathabwimi omubuwela. Vag’ono vag’ono, thanga ele yamenle mmurimani, ababa yilibiheriiwa wihina yaalemo wambela wunnuwa,” nuvira mudhidhi Elie ohogolowela mwebaribarini.c Mwebaribarene ababe yahihagalala vanlubale mwaha yambele omuhudhiha mwaniwa agaari mwaanene! — 2 Tim. 3:14, 15.

18. Munakala avi mwiwaga yopadduwa ya ababi enilibihera vanlubale wihina yaakavihere aniiwa omudhivela Yehova?

¹⁸ Ababi, nyu muhukanna oneti munlubale wolela odhuulu muxa onamwebedha Yehova. (Sal. 78:4-6) Ola kahiyo mutholo wamasika, ni munotamaleliwa vanlubale mwaha wilibihera wenyu wi mwakavihere aninyu! Mwadidelave werana dhatedhene munandinyu wihina mwakavihere aninyu omudhivela Yehova ni omwiwelela, mukanne ebaribari wihina babihu oodhulu Yehova anere ohagalala vanlubale. — Efé. 6:4.