Ohiwegeredha wihina opeleke egumi yawo wa Yehova?

1-2. Ethu baani muthu anahoweliye werana ahinathi obaddiziwa?

YAKA tanu ndha dha mundduli, matxikwi ni matxikwi aathu ehibaddiziwa ninga Anamoona a Yehova. Owinjhiva wa aliwa eli ninga Timotiyu ehudhenre ebaribari ‘ehimeene.’ (2 Tim. 3:14, 15) Amodha ehudhenre ebaribari egaali azombweene, teto amodha egaali apogweene. Muhiyana dhaala amuhudhere Bibiliya ni Anamoona a Yehova, abaddiziwe aganna yaka 97!

² Akala we onna omuhudhera Bibiliya ni Anamoona a Yehova obe akala makolo awo Anamoona a Yehova, onowubuwela obaddiziwa? Eyo yoluba yapama. Mbwenye wahinathi obaddiziwa onohowela wipeleka wa Yehova. Ohudhera wula nnere woona ethu enatapulela wipeleka wa Yehova, teto nnere woona mwahaya bwaddi kunahowela woova wipeleka wa Yehova ni obaddiziwa akala oli owiwegeredhene wihina obaddiziwe.

WIPELEKA ENATAPULELA DDI?

3. Owoge dhotajhiha ya mBibiliyani dha athu yipeleke wa Yehova.

³ MBibiliyani madhu owi wipeleka, enatapulela osakuliwa wi omulabele Yehova mwamakalelo oweela. Amwaana Ezarayeli naali nlogo nosakuliwa ni Yehova, mbwenye yahikalawo athu amodha yasakuliwe ni Yehova mwamakalelo avayekiwa. Motajhiha, Arawu oowara ‘yotonyihedha yoweela yowipeleka’ naali lamina noojerimela na oru, nakala osogolo wa lenso nomagana musolo. Lamina nna na oru, nowoniha wihina oliye ahisakuliwa wihina amulabele Yehova mwamakalelo avayekiwa, ninga namakutha munlubale aamwaana Izarayeli. (Lev. 8:9) Anazirewu yowipeleka wa Yehova wihina emulabele mwamakalelo avayekiwa. Madhu owi nazirewu enadhela wa ewogelo ya Ebrayiku owi “Nazi” enatapulela owipeleka obe avayekiwa. Anazirewu yohowela ohara dhoholela, amwaana Ezarayeli amodha yahahoweliwa ohara yafwanyeya mmalamuloni mwa Moyizeji. — Núm. 6:2-8.

4. (a) Wipeleka wa Yehova enavolowelavo ddi? (b) “Wiikoodda” wamwinnyo enatapulela ddi? (Osugwe fotu.)

⁴ Wipeleka wa Yehova, onasakula okala namahara a Yesu, vano okuma mudhidhi yoyo, omulabela Yehova enakala ethu yathima mwigumini mwawo. Mbwenye wipeleka wula enavolowelavo ddi? Yesu ohuwoga egi: “Ole anafuna okala namahara aaga, iikodde.” (Mat. 16:24) Madhu owi wiikoodda ni egerego enatapulela “wiikoodde wamwinyo.” We wipeleka wa Yehova, onohowela okoodda ethu-sithu ononniwe wihina enere omuukula Yehova. (2 Kor. 5:14, 15) Eyo enovolowelavo wakoodda ‘mabasa oomwiilini,’ ninga wawerana mararuwo. (Gal. 5:19-21; 1 Kor. 6:18) Nerege omwiwelela Yehova ethu yorusa? Naari. Naamudhivelaga Yehova ni nakanna ebaribari wi malamulo aye enonibarela kahi ethu yorusa. (Sal. 119:97; Isa. 48:17, 18) Ddibila dhaala anithaniwa Nicholas ohuwoga egi: “We podi wawonaga malamulo a Yehova ninga txinga yamukambura ehinuvaha ofuru yowerana ethu-sithu onafuniye obe podi okala ninga txinga enuubarela wihina onatakuniwe ni apoddogoma.”

5. (a) Ni makalelo baani muthu anipelekiye wa Yehova? (b) Ohiyana baani orivo wipeleka ni obaddiziwa? (Osugwe fotu.)

⁵ Iyo nnowipeleka wa Yehova wodhela ompaganya omulabela Oliyene baahi, teto werana efunelo yaye, enakale ethu yathima mwigumini mwehu. Teto we onompaganya omudhivela Yehova “ni murima wawo watene, ni emuthu yawo yatene, ni mubuwelo wawo watene ni kopolo dhawo dhatedhene.” (Mar. 12:30) Wipeleka wula onerana we ni Yehova baahi. Mbwenye obaddiziwa oneerana va anamwinjhi wihina wawoonihe athu amodhaya wi ohivelela wa Yehova. Wipeleka wawo wa Yehova, mpaganyo wavayeka ni wathima vanlubale. Teto Yehova anajheha wihina wakwanihedhe mpaganyo ola. — Ecl. 5:4, 5.

MWAHAYA BWADDI EGAHOWELEYA WIPELEKA WA YEHOVA?

6. Mwahaya bwaddi muthu agathoma wipeleka wa Yehova?

⁶ Ethu yathima enanithukulela wipeleka wa Yehova, fudhivela ninnihuna ni Oliye. Odhivela wula kahi ethu nnakanihuna mudhidhi mung’onove nuwindo ovira, mbwenye onadhela mwaha wa ‘enonelo yowakwanela’ ni ‘wonelamo dhithu dhomuzimuni,’ obe neere dhithu nihudherihu wodhela Yehova ni efunelo yaye. Eyo enonithukulela omudhivela Yehova kadda labo. (Kol. 1:9) Mudhidhi omuhudheraga Bibiliya wahifwanya dhithu dhuthukulele okanna ebaribari wi (1) Yehova ohukalawo, (2) Bibiliya madhu a Mulugu ni (3) Yehova anolabihedha nikuru naye wihina akwanelihe efunelo yaye.

7. Ethu baani nnahowelihu onona nihinathi wipeleka wa Yehova?

⁷ Ale enivelela wa Yehova enohowela onona dhithu dhokweya dhinafwanyeya mBibiliyani ni waparihedha mabasa malamulo a Yehova mwigumini mwewa. Teto aliwa enowilibihedha wihina ewoge ni athu amodha dhithu enahudheriwa mBibiliyani. (Mat. 28:19, 20) Ohiya eyo, odhivela enniwana ni Yehova uhenjhedhedheya ni enothoma omulabela Yehova ni murima wewa waatene. Ni weya odhivela wawo ni Yehova oli ndala? Akala odhivela wawo ni Yehova oli ndala, we kunipeleke wa Yehova ni obaddiziwa mwaha onafuna omuhagalasa namahudhiha awo obe makolo awo, newene kunipeleke mwaha watajhiha akwawo ebaddiziwe.

8. Dhithu baani dhinukavihere wipeleka wa Yehova? (Salmo 116:12-14)

⁸ Wubuwelaga dhithu dhatedhene Yehova uwereliye, we onothabwa omutamalela ofiyedha ofunaga ovelela egumawo wa Oliye. (Omwileri Salmo 116:12-14.) Bibiliya anawoga egi: ‘Dhego dhatedhene dhapama ni nvaho wapama’ ananivaha di Yehova. (Tiya. 1:17) Nvaho munlubale Yehova anivahiliye bu mukutho wa mwanaye Yesu Kiristu. Kabiha wubuwela! Enowandeya okanna wandana woliba ni Yehova mwaha wa yowobola. Teto mwaha wa yowobola Yehova anonivaha oneti wokalawo ni mukalakala. (1 Juwa. 4:9, 10, 19) Wipeleka wa Yehova makalelo apama owooniha wihina onomutamalela Yehova ohiya baahi mwaha wa yowobola, mbwenye mwaha wa mareeliho aatene anuvahiiye. (Deut. 16:17; 2 Kor. 5:15) Siyeyo enafwanyeya va ohudhera 46, muselu 4, mu livuru Ofwanye egumi yohagalasa ya malabo amatene! Vamodha ni vidiyu enna musolo Nvaho baani wofwanelela onvaha Mulugu?

WE OLI OWIWEGEREDHENE WIHINA WIPELEKE NI OBADDIZIWE?

9. Mwahaya bwaddi kaavo anahowela owaddihedhiwa wipeleka wa Yehova?

⁹ Podi wera we onubuwela wi kunathi wiwegeredha wihina wipeleke wa Yehova ni obaddiziwe. Podi wera nivanove onohowela osaddula egumi yawo wihina wawiwelele malagano a Yehova obe onohowela mwana mudhidhi wihina olibihe nroromelo nawo ni Yehova. (Kol. 2:6, 7) Kadda namahudhera a Bibiliya ohukanna makalelo aye owunnuwelavo, teto azombwe aatene kinabaddiziwa ni yaka dhimodhave. Bumwahaya sapama wonelamo masadduwo onahoweliwe wawerana mwigumini mwawo, wamala wilibihedhe wiwomihedha wahiiliganihaga ni athu amodha. — Gal. 6:4, 5.

10. Ethu baani onahoweliwe werana, wonelamo wihina kunathi wiwegeredha wihina wipeleke wa Yehova? (Osugwe kwaduru “Dhoxagiha wihina dhaakavihere ale enaleliwa mwibaribarini.”)

¹⁰ Naarive wonelagamo wihina kunathi wiwegeredha wihina wipeleke wa Yehova, kuhiye okanna yoluba ela. Omulobe nikavihero Yehova wihina wande wawerana masadduwo enahoweleya. (Fil. 2:13; 3:16) Okanne ebaribari wihina Yehova anere wavuruwana malobelo awo ni anere wukavihera. — 1 Juwa. 5:14.

MWAHAYA BWADDI ATHU AMODHA EGOOVA WIPELEKA NI OBADDIZIWA?

11. Yehova anaanikavihere aavi okalave oororomeleya wa Oliye?

¹¹ Athu amodhaya eli owiwegeredhene wihina yipeleke wa Yehova ni ebaddiziwe, enoobajha wanganyedha akala podi werana yothoma ela. Podi wera enowikoha: ‘Ki gabaddiziwa vano gerana yothega enlubale ofiyedha otxosiwa?’ Akala siyeyo onooviwe, okanne ebaribari wi Yehova anere wuvaha dhaatedhene onahoweliwe ‘wihina oharege dila enaafwanelela adhaari a Yehova wi ohagalase murima waye.’ (Kol. 1:10) Oliye anere wuvaha kopolo onahoweliwe wihina werena ele eli yapama. Yehova ohakavihera athu owinjhiva wanda omwiwelela Oliye. (1 Kor. 10:13) Bumwahaya athu vang’ono baahi binatxosiwa mmulogoni. Yehova anonivaha dhatedhene nnahowelihu wihina nikale oororomeleya wa Oliye.

12. Wegi waherena yothega enlubale, ethu baani onahoweliwe werana?

¹² Aatene iyo nnowehiwa wi nerena dhithu dhabure. (Tiya. 1:14) Mbwenye we podi osakula ethu onahoweliwe werana wehiwaga. Ebaribariya sowihina we dinna mutholo wothoma akala onere okala oororomeleya obe naari. Athu amodhaya enowoga wihina kinandeya osugwera dhithu nnubuwelihu obe nnafunihu werana. Mbwenye eyo kahi ebaribari. We podi wanda osugwera mubuwelo wabure. Bumwahaya dila dhaatedhene wafwanyiwa yoweha, we podi osakula oherana ethu yabure. Wihina wande oherana ethu yabure, dhihikalawo dhithu onahoweliwe werana dhinukavihere. Motajhiha, olobelege wa Yehova malabo amaatene, kujhombelege werena ohudhera wawo wa vayeka, woonege mutugumano dhatedhene, opathege ofuru waatene onakanniwena wihina olaleye. Weragana dhithu dhendha, we onere okanna kopolo onahoweliwe wihina okaleve oororomeleya wa Yehova. Teto kudduwale wihina Yehova anerege wukavihere okala oororomeleya malabo aatene. — Gal. 5:16.

13. Yotajhiha baani yapama Juze anihiyedhiye?

¹³ Enere okala yokweya okalave oororomeleya wa Yehova wathoma ethu onahoweliwe werana wafwanyiwa yoweha. Bibiliya anowawoga athu owinjhiva yaathomile ethu yahoweliwa werana. Teto ndala ninga iyo, aliwa yaali athu ohilogomana. Motajhiha, mwadha Potifare nuumutota Juze dila dhowinjhivadhene wihina amugonihe, oliye ahinona pamadhene ethu afuniye werana. Bibiliya anawoga wihina oliye ‘oomukodda.’ Mwinyene Juze ahiwoga egi: ‘Ki-to ginande addi werana yothega enlubale ni omuthegela Mulugu?’ (Gén. 39:8-10) Eyo enowoniha pamadhene wihina Juze ahinona ethu afuniye werana ahinathi wehiwa ni mwadha Potifare. Bumwahaya ahanda werana yothoma yapama nuuwehiwa.

14. Nnande aavi ogonjhiha yoweha?

¹⁴ Nnande aavi okala owikomeene ninga Juze? We podi othoma ovanene ethu onafuniwe werana wafwanyiwa yoweha. Kuwubuwelevo dila biili okoodda dhithu Yehova aniddiye, newene kuwubuwelege yowehaya. (Sal. 97:10; 119:165) Werana ndo, onere wanda ogonjhiha yoweha. Mwaha onere wanda onona ethu onafuniye werana wafwanyiwa yoweha.

15. Muthu anooniha aavi wihina ‘onomusayela [Yehova] ni murima waye waatene?’ (Eberewu 11:6)

¹⁵ Podi wera, we kunanganyedha wi ohufwanya ebaribari ni onofuna omulabela Yehova ni murima wawo waatene. Mbwenye podi wera nivanove onubuwela wi kunathi wiwegeredha wihina wipeleke wa Yehova ni obaddiziwe. Akala siyeyo enupadduwela, we podi werana emodhave erilena mwene Davidi. Oliye ahimpigiriyela Yehova egi: ‘Yehova Mulugwaga gipenddeni ni munone murima waga. Mugisanyihe ni munone dhothuwathuwiha dhaaga. Mugisugwe ni moone akala gihikanna ethu-sithu yabure ni mugeddihe dila yamukalakala.’ (Sal. 139:23, 24) Yehova anowareeliha ‘ale enamusayela ni murima waatene.’ Wilibihedha wawo wihina wakwanihedhe yoluba yowipeleka wa Yehova ni obaddiziwa, enowoniha wihina we onooparihedha mabasa yolebela ela. — Omwileri Eberewu 11:6.

ODHOWEGEVE ONFIYEDHAGA YEHOVA

16-17. Ale eleliwe mwibaribarini enande aavi olibiha wandana enniwana ni Yehova? (Juwawu 6:44)

¹⁶ Yesu ahiwoga wihina egi muthu akale namahara aye, Yehova dinamwithana muthuya. (Omwileri Juwawu 6:44.) Kubuwela vang’ono wodhela madhu ala ni makalelo enupathiwa. Yehova anowoona ethu yapama mmurimani mwa kadda muthu anamwithaniye wihina akale mudhaari aye. Oliye anamoona kadda muthu wa iyo ninga ‘muthu aye a vayeka’ obe ‘athima.’ (Deut. 7:6; nota.) Yehova anuwoona we ni makalelo yala.

¹⁷ Podi wera we oli muzombwe onaleliwa ni makolo eli mwibaribarini. Vano mwaha wa yeyo, we podi wubuwelaga wihina onamulabela Yehova mwaha makolo awo okala Anamoona a Yehova, ohiya mwaha Yehova wusakula. Mbwenye Bibiliya anihina ‘mmwaddamele Mulugu, oliye anere wuwaddamelani.’ (Tiya. 4:8; 1 Cró. 28:9) We wabajha onfiyedha Yehova, Oliye anowerana epaddi yaye ni anowuwaddamela. Yehova kanuwoona baahi ninga muthu anakosa epaddi ya nikuru naye, mbwenye vamentoni vaye we oli athima vanlubale. Yehova anonvaha thima kadda muthu wa iyo, naaleya enaleliwa mwibaribarini. Muthu abajha onfiyedha Yehova, Oliye anowerana ele enafwanyeya va Tiyago 4:8. — Omuliganihe ni 2 Tesalonika 2:13.

18. Ohudhera winaharela nnoone ddi? (Salmo 40:8)

¹⁸ We wipeleka wa Yehova ni wabaddiziwa, onamutajhiha Yesu. Ni efunelo yaye, Yesu ahivelela wihina erena ethu-sithu Ababe yamulobiwa wihina erena. (Omwileri Salmo 40:8; Ebe. 10:7) Ohudhera winaharela, nnere woona ethu baani enuukavihere odhowagave omulabelaga Yehova nuuroromeleya wamala obaddiziwa.