“Miyo kaginakalege meeka”

YOTAJHIHA YA MAKOLO AAGA

Apapa ni amama yaali akatolika. Mbwenye nuuhudhera mBibiliyani wi ndina na Mulugu di Yehova, aliwa okala anamoona a Yehova ooviheya. Nuwindo apapa ohiya osema dhikwamuthu dha Yesu, vano aliwa olabihedha dhipano ni enonelo yewa wihina esasanyena Nyumba Yomwene yobajha vadhulu va nyumba yehu, oSan Juan, elabo yoFilipina.

Nuubaliwa yaka ya 1952, makolo aaga wambela ogihudhiha wodhela Yehova, ndala ninga yahudhihiliwa addibilaga ni arogolaga. Mudhidhi gunnuwaga, apapa yogikongomedha omwileri Bibiliya kadda labo kapitulu modha. Teto yogihudhiha yalabihedhaga malivuru oohiyana-iyana a munikuruni na Yehova. Ohiya eyo, makolo aaga yahikanna elemelelo yowawithana anameeddela mulogo ni addibila oofiliyale wihina edhe yaredhe vaade. Vano iyo noohagalala ni noolibihiwa vanlubale ni dhopadduwa dha addibila ala yanaddeliwa, teto aliwa yoonikavihera wapweha mabasa oolaleya mburo wobajha.

Miyo gihudhera dhithu dhowinjhiva ni makolo aaga, mwaha okala oororomeleya wa Yehova. Amama nuukwa mwaha wa oredda yanniwana, miyo ni apapa wambela olaba ninga apiyonero yaka ya 1971. Vasogolova miyo nganna yaka 20 apapa okwa. Miyo giwoona ninga gili meeka mwaha wayelela makolo aaga. Mbwenye ejhehedhelo ‘yeebaribari ni yoliba’ enafwanyeya mBibiliyani, sigikavihere okala oolibeene ni oopwaseya epaddi yomubuweloni ni yomuzimuni. (Ebe. 6:19) Nuuvira mudhidhi vang’ono apapa egakwile, miyo orumedha mutholo wokala piyonero a mudhidhi waamutene wi gaalabege eliga dhaala elabo yoKoron murudda wa Palawan.

GAPARAGA MABASA OORUSA MEEKA

Miyo gifiyile oKoron nganna yaka 21. Woona wihina gahilemela okala musidadi, gahitikina vanlubale nuwoona eliga ele yanna maluju, tornera ni karo vamodha ni mota vang’ono. Naarive egaaliwo addibila, miyo kaganna mukwaaga ammabasani oolaleya, bumwahaya malabo mamodha galaleya meeka. Mweeri wobajha, gahikanna munukwela wokala ni emudhaaga vamodha ni akwaaga. Nimahiyu gusugwa odhulu gunlaga ni gokanna efunelo yohiya mutholo waaga wi gihogolowele vaade.

Mudhidhi yoole giwonimi ninga gili meeka, gonfugulela murima waaga Yehova. Ginowawubuwela malivuru gawileresimi ni yolebela dhaala yagilibihesa ya Salmo 19:14, miyo gowubuwelesa dila dhowinjhivadhene yolebela ela. Vano miyo wonelamo wihina Yehova eere okala ‘nibwe naaga ni namoobola aaga,’ gahere gididela opendda dhithu dhamuhagasa ninga mabasa aye ni dhikalelo dhaaye. Teto Namasugwera dhaala anna musolo wawoga weegi: “Nunca está sozinho”a ahigikavihera vanlubale. Miyo gahimwileri artigu ola dila dhowinjhivadhene. Mudhidhi gilerigi yakala ninga gaali ni Yehova, teto eyo yogithukulela olobela ni opendda ndhe gahudherimi.

Wahinavire mudhidhi wowinjhivene ngaali oKoron, miyo othomiwa ninga namaholela mulogo. Woona wi namaholelaya aali miyo meeka, goweddihesa sumana dhatedhene mutugumano dha vaari va sumana, wammalaleyelo ni ohudhera wa Namasugwera va mutugumano womagomihedho wa sumana. Ohiya eyo, sumana dhatedhene gowogesa mwaha dha vathaddo. Gakala oopinyaminyeyene, mwaha wa yeyo, miyo kagiwoona ninga gili meeka!

Mabasa oolaleya gaaparimi okoron, yogeddela pama. Mwaha wayeyo, anamahudhera aaga owinjhiva yahibaddiziwa. Mbwenye yahikalawo makathamiho. Malabo mamodha goweddesa emambesi yantero wihina gifiye murudda galaleyesimiwo naarive gihinonne mburoya gafunimi ogonavo gafiyawo. Teto murudda wehu nalaleyesihu dhahikalawo dhiliga dhowinjhiva dhahoweleya olaleyiwa. Dila dhowinjhivadhene noweedda olenddo ni barku naarive wigaali nipevo wihina nifiye mburo nadhowihu olaleya, teto miyo kaganonne ohabelela. Muwari mwa makathamiho yaala mateene, Yehova oogibarela ni oogisamalela. Vasogolova miyo woonelamo wihina Yehova anna ogixagiha wihina gaavilelena makathamiho yaagifwanye osogolo gaakela mutholo dhimodha.

PAPUWA NOVA GINE

Yaka ya 1978, miyo othomeliwa oPapuwa Nova Gine, anakala omadhelo nduwa wAstraliya. oPapuwa Nova Gine, elabo enna mwango dhowinjhiva, enaligana ni elabo yo Espanya. Gahitikina vanlubale nunona wi athu a elabo yele yowoga dhiwogelo dhowakwana 800. Mbwenye athu owinjhiva yawoga ewogelo ya Pidigin, enoniwe ninga Tok Pisin.

Miyo othomeliwa mulogo wawoga ewogelo ya Engeleji murudda wa Port Moresby. Nuwindo miyo otamela mulogo wawoga ewogelo ya Tok Pisin wihina gihudhere dhiwogelo dhimodha. Vano miyo obajha olabihedha dhiwogelo gahudherimi mmabasani oolaleya. Eyo yahigikavihera ohudhera dhiwogelo dhimodha mowaguva. Nuuvira mudhidhi vang’ono, miyo owoga mwaha wavathaddo ni ewogelo ya Tok Pisin. Yotikinihaya sowihina, ehinavire yaka modha, miyo othomiwa ninga nameeddela mulogo a ewogelo ya Tok Pisin.

Woona wihina mulogodha dhahilapelana, gohowela wegeredha musonkano ni weedda olenddo dhowinjhiva. Omambelelowene giwoona ninga gili meeka, mwaha okala murudda yawoga ewogelo ni yanna dhilemelelo gahanonnimi. Teto kadda sumana gaadhowaga waredhela mulogo, gamugwelesa aviyawu mwaha arampaya kiyavireya ni wahithabwa okala mwango. Sumana dhatedhene miyo goweddesa olenddo. Malabo mamodha gagwelesamo meeka mwaviyawunimwa! Miyo kagadhiveliwa gagwela mwaviyawuni mune mwaha aviyawuya kaali apamene!

Mudhidhi yoole athu owinjhiva kiyanna telefoni, vano gafunaga owoga ni addibila a mulogo dhimodha wi gawaredhele, gaalebelesa karta. Mbwenye malabo mamodha goofiyawo kartana nihinathi ofiya. Mwaha wa yeyo, gafiya geresa okohedha waali anamoona a Yehova. Gaafwanya addibilaya, aliwa yoogakela nuudhivela teto yoogubusedha wihina wilibihedha waaga kawali weebewene. Miyo gahoona pamadhene makalelo Yehova agikaviheriye, mwaha wa yeyo wandana gannimina ni Yehova wowenjhedhedheya.

Labo dhaala ngaali eliga yo Bowugayinvile, anamatelana dhaala ogaaddamela eteyaga ni ogikoha yeegi: “We ononubuwela?” Miyo wawubuwela anamatelana dhaala gaalaleyimi ngaali elabo yo Port Moresby. Miyo gahibajha wahudhiha Bibiliya, nuwindo miyo omuloba ddibila dhaala wi aahudhihege. Vasogolova aliwa obaddiziwa aabiilene! Ala yaali mareeliho gawakelimi muwari mwa yaka thaaru gilabaga oPapuwa Nova Gine.

EMUDHI ENGO’NO YAPARAGA MABASA

Gihinathi otamawo luwani yoKoron yaka ya 1978, miyo omunona murogola dhaala aaviheyana mabasa oolaleya ithaniwa Adeliya. Oliye aali piyonera amudhidhi wamutene, teto owasamalela anaaye abiili yithaniwa Samuel ni Shirley. Ohiya eyo oliye owasamalela amaye yaali anakalaba. Yaka ya 1981 miyo ohogolowela oFilipina wihina gamutele Adeliya. Iyo nuumala otelana, iyo okala apiyonero nowindo iyo osamalelaga emudhihu.

Naarive gisamalelaga emudhaga miyo othomiwa ninga piyonero avayeka yaka ya 1983, gaathomiwe wihina gidhowe galabege eliga yo Linapacan, elabo yoPalawani. Emudhihu yaateene otamela murudda gaalimi wahaali Anamoona a Yehova. Nuuvira yaka modha amaye Adeliya okwa, mbwenye iyo odidela wapara mabasa oolaleya nuviheya teto eyo yahinikavihera ohukala oothuwathuwene mudhidhi yoole. Iyo okanna anamahudhera owinjhiva yanna efunelo yowoona mutugumano, bumwahaya nohowela nyumba yomwene wihina nitugumanegemo. Mwaha wa yeyo iyo omaga nyumba yehu yomwene. Nuuvira yaka tharu nigaali luwani yeele, iyo nahihagalala vanlubale mwaha wawoona athu owakwana 110 yoonanga muthupo wowubuwela okwa wa Yesu. Teto iyo nudhowa, owinjhiva wa aliwa yahunnuwelavo epaddi yomuzimuni ofiyedha obaddiziwa.

Yaka ya 1986, miyo othomeliwa Islanda murudda dhaala wo Kuliyoni, eliga dhaala waali athu yanna oredda wa maranya. Nuuvira mudhidhi Adeliya othomiwa ninga piyonera avayeka. Omambelelowene, nowova walaleya athu a murudda yole mwaha yahikanna maranya. Anamalaleya a murudda yoole, onaaddela wihina athu yanna maranya yahakela murombwe. Bumwahaya oreddaya kawavaleya bure-bure. Athu amodha yanna oredda yole, yahoona mutugumano vaade va murogola dhaala. Mohulegela iyo olemela walaleya athu yanna maranya, teto nahidhiveliwa wawaddela ejhehedhelo eli mBibiliyani. Mwaha aliwa yiwoona ninga kinarumedhiwa vamentoni va Mulugu ni vaathu. Yaali yohagalasa wawoona athu yaali aredda ehagalalaga mwaha okanna ejhehedhelo yowihina nlabo nimodha enere okanna egumi yologomana. — Lukaji 5:12, 13.

Anihu, yandile aavi olemela oKuliyoni? Miyo ni Adeliya wawithana arogola abiili ooKoron wihina edhe yaredhe vamodha naanihu. Vano mwanihu Samuel ni Shirley vamodha ni arogola ale abiili okanna anamahudhera owinjhiva mwaha aliwa yahudhiha ahimaya, vano miyo ni mwaadhaga wahudhihaga makolwiwa. Mwebaribarene wahifiya mudhidhi nahudhihihu emudhi yowakwana 11. Teto mwanamudhidhi vang’ono iyo okanna anamahudhera owinjhiva yunnuwelevo epaddi yomuzimuni, mwaha wa yeyo iyo ofugula mulogo!

Omambelelowene murudda yole namaholela mulogoya aali miyo baahi. Vano filiyale ogiloba wihina geddihege mutugumano sumana dhaatedhene mulogo wanna anamalaleya 8 a murudda woKuliyoni, teto ogiloba wi geregena emodhave ni mulogo mmodhaya wanna anamalaleya 9 oMarily. Wihina nifiye murudda yole nomala mawora 3 ni barku. Mutugumano wamala, noweedda mudhidhi wowinjhivene ni emudhi yehu murudda dhaala withaniwa Halsey waali mwango dhowinjhiva wihina nahudhihe anamahudhera ehu Bibiliya.

Iyo nowawona athu owinjhiva a murudda woMarily ni Halsey erumedhaga omuhudhera Bibiliya, mwaha wa yeyo iyo omaga Nyumba Dhomwene. Ndala ninga addibila oLinapakam, addibila naathu amodha yahikanna efunelo yoopeleka dhipano dhohiyana-iyana wihina dhimagiwena nyumba dhomwene. Nyumba Yomwene yaali murudda woMarily yaali enlubale, teto yowakwanamo athu 200. Ohiya eyo, yaali yokweya wihina nerena musonkano.

WUKUWA, WIWONA OKALA MEEKA NI OHAGALALA

Yaka ya 1993, anihu nuwunnuwa, Adeliya ni miyo wambela olaba ninga anameeddela mulogo oFilipina. Vano yaka ya 2000, miyo okursari eskola ya Treinamento Ministerial wihina gikale namahudhihaya. Miyo goona wihina kaginafwanelela okala namahudhiha, mbwenye Adeliya oogilibiha. Oliye ogubusedha wihina Yehova eere ogivaha kopolo wihina gande wakwanihedha mutholo. (Fil. 4:13) Adeliya ahinona wihina Yehova eere ogikavihera, mwaha oliye owanda wakwanihedha mutholo waye, wula agaali muredda.

Yaka ya 2006, Adeliya waddeliwa wihina ahikanna oredda withaniwa Parkinso. Ele yahinukuula! Miyo nuwoga ni mwaadhaga Adeliya wi gafuna gihiye mutholo waaga wihina gimusamalelege, oliye ogaakula egi: “Omusayele mediku anagikaviherege ni oredda ola, mwaha gihinona wihina Yehova anere onikavihera wakwanihedha mutholo wehu.” Adeliya ahididela omulabela Yehova muwari mwa yaka 6 ahirekalamarile. Naarive ahandaga weedda, oliye oolaleya eeddaga vakarinyani. Teto naarive ahandaga owoga pama, oovaha dhowakula dhaye omutugumanoni. Adeliya owakela mensaje dha addibila emutamaalelaga, mwaha okala yotajhiha yapama ya muthu anonne ovilela. Adeliya akwile yaka ya 2013. Nahimala yaka dhokwaranya 30 ngaali ni mwadhaaga oororomeleya ni oodhivela. Vano mwadhaaga nuukwa, wukuuwa ni wiwona ninga gili meeka, wahigihogolowela.

Adeliya afuna wihina miyo gididele wakwanihedha mutholo waaga, vano miyo othoma werana eyo. Miyo othoma opinyaminyeya ni mabasa, eyo yahigikavihera ohiwona ninga gili meeka. Vano yaka ya 2014 ni 2017, miyo othomiwa wihina gidhowe elabo winakoddiwa mabasa ehu oolaleya wi garedhelege mulogo dha ewogelo ya Tagalo. Nuwindo miyo othomiwa wihina garedhele mulogo ya ewogelo ya Tagalo elabo yeTayiwani, vasogolova miyo odhowa elabo yo Wistadu Unidu oKanada. Yaka ya 2019, miyo okala namahudhiha a Eskola Yanamalaleya oOmwene ni ewogelo ya Engeleji elabo yo Indiya ni oTayilandiya. Ginohagalala ni mutholo dhatedhene ginakelimi. Teto ginothabwa ohagalala mwaha opinyaminyeya ni mabasa a Yehova.

MALABO AAMATENE NNOKANNA NIKAVIHERO NNAHOWELIHU

Kadda mutholo ginakelimi ginowanona ni ginowadhivela addibila. Bumwahaya wahiya addibila, kinakala ethu yokweya. Mbwenye mudhidhi ninga yoola, miyo gihudhera omuroromela Yehova, mwaha wa yeyo ginowoona nikavihero naye. Teto eyo ehigikavihera orumedha ni murima waaga waatene mutholo bu mutholo ginakelimi. Peeno ginalaba ninga piyonero a vayeka elabo yoFilipina. Vano ginohagalala mwaha okala mulogo muxa, teto addibilaya enogipwatha ni eli ninga emudhi yaaga. Ohiya eyo, ginohagalala mwaha omoona Samuweli ni Shirley etajhihaga nroromelo na mayiwa. — 3 Juwa. 4.

Mwebaribarene gihifwanyiwa makathamiho ohiyana-iyana mwigumini mwaaga. Ninga motajhiha, gihimoona mwaadhaga onaaga goyi ofiyedha okwa. Ohiya eyo gohowela olemela kadda ethu yagipadduwela. Mbwenye gihonelamo wi Yehova “kali wolapela wa kadda muthu wa iyo.” (Dho. 17:27) Teto ‘nlada na Yehova kanthabwile okwiiva’ wihina aakavihere ni alibihe adhaari aye, naarive ekalaga mburo wahinapariwege mabasa oolaleya. (Isa. 59:1) Yehova di nibwe naaga, teto oliye kanagisukumege egumi yaaga yaatene, bumwahaya ginomutamalela vanlubale. Teto miyo kaginakalege meeka.