Kukale anrima ninga athu amodha a peeno
OHANDA woona wihina peeno athu owinjhiva, enubuwela wihina ehikanna oneti ni ofuru woweddihiwa mwamakalelo athima ni avayeka? Naarive aliwa yakelaga korowa dhowinjhiva, aliwa kinakoleya. Athu enubuwela ndala, baanrima ni kinonne otamalela. Teto Bibiliya onowoga wihina malabo ookuthula athu yakalege ndala. — 2 Tim. 3:2.
Ebaribari wi nrima kahiyo ekalelo yambele ovanene, mwaha wi Adawu ni Eva, yahoniha ekalelo ela nuuthoma osakula yekiwa ele eli yapama ni yabure. Yokumelelavoya bi makathamiho nnawonihu peeno. Nuuvira yaka dhowinjhiva, mwene Uziya ooJuda, wambela wubuwela wihina ahikanna oneti wopaha mukutho mutempulu. Mbwenye oliye kanna oneti ole. (2 Cró. 26:18, 19) Ni makalelo mamodhave, aFarizewu ni aSadusewu yorumedha wihina aliwa yohowela weddihiwa mwamakalelo avayeka ni Mulugu mwaha aliwa yadhele nihimo na Abarawu. — Mat. 3:9.
Peeno naapeliwe ni athu ethanbwe okala anrima, vano nahikala pasope ekalelo ela podi onivolowela. (Gal. 5:26) Iyo podi wubuwela wi nnohowela wakela mutholo bu mutholo obe weddihiwa mwamakalelo avayekiwa. Nnande aavi osukuma mubuwelo ola? Wihina nande wakula nikoho nna, nnohowela wonelamo mubuwelo wa Yehova wodhela muselu ola wa nrima. Kabeni nawone malagano menli enaanikavihere.
Yehova dhinathoma ele nnahowelihu wakela. Kasugwa dhotajhiha ndha:
Vemudhini, mulobwana atele anohowela orihiwa ni mwariye, teto ahiyana eteliwe, enohowela wonihiwa odhivela ni amamuniwa. (Efe. 5:33) Yehova anajheha wihina mulobwana ni muhiyana etelane yonihegena odhivela mmodha ni mukwaye, teto odhivela wula kimonihe muthu mmodha. (1 Kor. 7:3) Ababi enajheha wihina aniwa yawiwelelege pamadhene. Teto ahima enajheha wi ababi yasamalelege nuudhivela. — 2 Kor. 12:14; Efe. 6:2.
Mmulogoni anamaholela mulogo enohowela weddihiwa ni nriho. (1 Tes. 5:12) Mbwenye eyo kinatapulela wi aliwa enohowela wiwona ninga athimaya wapitha addibila amodha. — 1 Ped. 5:2, 3.
Mulugu ohavaha anamathonga ofuru wokukusa musoko, nriho wa ale enathongiwa. — Rom. 13:1, 6, 7.
Nuudhivela Yehova anonivaha okunamo ele nnahowelihu. Mwaha wa ekalelo yehu yothega, ethu nnafwanelelihu fuukwa. (Rom. 6:23) Mbwenye Yehova anonivaha mareeliho owinjhiva mwaha wa odhivela waye wahinamala. (Sal. 103:10, 11) Kadda mareeliho obe ofuru nnakelihu, nnakela mwaha wa opama wohinifwanelela. — Rom. 12:6-8; Efe. 2:8.
ENANIKAVIHERE DDI ORABELA EKALELO YA NRIMA OBE WIWONA NINGA NINGA ATHIMA WAPITHA AMODHA
Pole-pole ni ekalelo yabure ya mwilaboni. Nahikala pasope iyo podi wambela wubuwela wi nnofwanelela wakela mutholo wapitha amodha. Yesu ohoniha makalelo eliwa yokweya mubuwelo ola onivolowela wodhela owoga yoladdaniha ya anamalaba yakenle denariyu. Va yoladdaniha ela, Yesu owoga wihina anamalaba amodha yambele olaba okuma mambesi ofiyedha txiguwo, mbwenye amodha yalambe epaddi ya txiguwo muwari mwa mudhidhi vang’ono. Vano ale yabanjhe olambe okuma mambesi, wambela wubuwela wihina yohowela wakela korowa dhowinjhiva wapitha ale yalambe mudhidhi vang’ono epaddi ya txiguwo. (Mat. 20:1-16) Awogaga wodhela yotapulela ya nladdaniho nna, Yesu owoga wihina kadda namalaba anohowela ohagalala ni ele Yehova ananvahiye.
Athu yaalabile nduwa nantero yubuwela wihina yahikanna oneti wowakela korowa dhowinjhiva
Kujhehege wereliwa ethu-sithu, ohiya eyo okale muthu ootamalela. (1 Tes. 5:18) Omutajhihe murumiwi Pawulo. Oliye kajheha okaviheriwa ni dhithu dhomwilini ni addibila oKorintiyu. Naarive ahoowelaga okaviheriwa. (1 Kor. 9:11-14) Nnohowela watamalela mareeliho nnawakelihu ni osukuma ekalelo yohikoleya.
Murumiwi Pawulo kaaloba korowa
Okale owiyeviha. Muthu athabwaga wivaha thima, onowambela wubuwela wi ohukanna oneti wokanna dhithu dhimodha okwaranya ndhe anniyena. Bumwahaya wegi ogonjhihe ekalelo ela yowivaha thima, murombweya fuwiyeviha.
Wiyeviha wa namavuhulela Daniyeli wahimuthukulela okala athima vamentoni va Yehova
Namavuhulela Daniyeli ohuhiya yotajhiha yapama yokala muthu owiyeviha. Motajhiha, namavuhulela Daniyeli ahafune erege withukula ubuwelaga wi ohowela weddihiwa mwamakalelo avayekiwa ni wakela mutholo mwaha wa emudhi abaliwiye, owoma waye, enonelo anniyena ni dhithu andiye werana. (Dan. 1:3, 4, 19, 20) Mbwenye Daniyeli othoma okala owiyeviha, teto eyo yahimuthukulela akala athima vamentoni va Yehova. — Dan. 2:30; 10:11, 12.
Nirabele ekalelo ya nrima ya elabo ela. Teto nididele ohagalala ni mareeliho ananivaha Yehova wodhela opama wohinifwanelela.