Nnandde aavi okala athu owandaneyana ni oororomeleya?

Onofwanyiwaga makathamiho nuwindo wiwoonaga ninga oli weka? Nnakalawo ‘mudhidhi wabure worusa ovilela’. Dhithu baani dhinanithukulela wukuuwa ni wiwoonaga ninga nili yekihu? (2 Tim. 3:1) Kahiyo yapama wawanana makathamiho yekihu. Bibiliya anowoga thima yokanna akwihu ebaribari mudhidhi ‘nafwanyiwa makathamiho’. — Pro. 17:17

NIMAKALELO BAANI MUKWAWO EBARIBARI ANUKAVIHERIYE?

Murumiwi Pawulo ahikaviheriwa ni akwaye amulenddoni. (Kol. 4:7-11) Murumiwi Pawulo nuvokedhiwa mukambura oRoma, akwaye yomukavihera wapara mabasa oliye ahandiye wapara yeka. Motajhiha, Epafroditu ahidhana dhithu aavahedhiwiye ni addibila vamodha ni arogola ofilipu wihina anvahedhe murumiwi Pawulo. (Fil. 4:18) Tikiku ahaagawela addibila a mulogo dhohiyana-iyana makarta avahedheliwiye ni murumiwi Pawulo. (Kol. 4:7) Mwaha okaviheriwa nakwaye, murumiwi Pawulo ahanda wakwanihedha mabasaye olaleya naarive agaali mukambura. Nnande aavi okala athu owandaneyana ni ororomeleya?

Ehikalawo addibila ni arogola amalabo yaala apeeno, enoniha makalelo owandaneyana ni makalelo okaviherana modha ni mukwaye. Kasugwa yotajhiha ya murogola dhaala anithaniwa Elizabeti aali piyonera amudhidhi wamutene anakala elabo yoEspanya, oliye anowoga makalelo murogola dhaala amukaviheriye mudhidhi worusa. Amaye murogola Elizabeti nuwoniwa ni amediku wi yahikanna oredda wa kanser, murogola ole ahimulibiha vanlubale wodhela omwinviyarela mensaje wihina amulibihe ni maversu a mBibiliyani. Elizabeti onowoga wihina: “Mensaje ndhe dhihigilibiha teto gahihagalala vanlubale onona wihina ohukalawo muthu anagithuwathuwela.” — Pro. 18:24.

Iyo podi olibiha wandana wehu naaddibila a mmulogoni wodhela wathukulela omutugumanoni ni okuma vamodha naaliwa mmalaleyelo. Motajhiha, nerege we podi wivahedhela wihina wathukulelege addibila owunnuwelavo omutugumanoni obe okuma vamodha naliwa mmalaleyelo? Werana eyo, onere walibiha aliwa teto ni weya onere olibihiwa. (Rom. 1:12) Addibila amodha kinanda weedda, ki nnere ddi wihina nikanne wandana wooliba naaliwa?

WAKAVIHERE ADDIBILA EHINANDA WEEDDA

Addibila amodha ni arogola ehikanna makathamiho a mwigumini enathukulela ohanda woona mutugumano. Kasugwa yotajhiha ya ddibila Davidi anna oredda wa kanser. Mudhidhi ajhaga murombwe wa kanser Davidi ni mwariye Lidiya yowoona mutugumano egaali vaade.

Nikavihero baani yakenliwa naaddibila a mmulogoni? Mutugumano dhamala addibila owinjhiva yowilibihedha wihina ewoge ni Davidi vamodha ni Lidiya elabihedhaga vidiyu konferensiya. Ohiya eyo Davidi ni Lidiya yavaha yowakula yewa mmutugumanoni, addibila ni arogola yowalabela mensaje yaatamalelaga. Yokumelelavoya, sowihina Davidi ni Lidiya yakala oolibeene.

Nnere ddi wihina naakavihere addibila ni arogola ehinanda weedda wihina edhowe mmalaleyelo? Iyo podi omusaddula porogarama ehu wihina nande olaba vamodha naaliwa. Ni makalelo yaala, nnere wooniha wi kanaadiwaale. (Pro. 3:27) Ononamo aavi waleba makarta obe olaleya vamodha naaliwa mulabihedhaga telefoni? Addibila ni arogola ehinanda weedda, podi woona mutugumano wa mmalaleyelo wodhela vidiyu konferensiya. Davidi ni Lidiya yahitamalela vanlubale mwaha porogarama ole yamwegeredhiwa. Davidi onowoga egi: “Okala vamodha naaddibila a nikuuru nehu noolaleya wihina noone mutugumano wammalaleyelo vamodha ni nlobelo vamodha naaliwa, yahinikavihera vanlubale.” We podi omukoha ddibila obe murogola ahinanda weedda akala dhinowandeya malabo mamodha omuthukulela namahudhera awo vaade vaye wihina mmuhudhihege vamodha?

Najhaga mudhidhi wowinjhivene ni addibila vamodha ni arogola ehinanda weedda nnohudhera ni makalelo ewa apama teto wandana wehu naaliwa onakala wolibeene. Motajhiha, waalebaga vamodha naaliwa mmalaleyelo ni wawoonaga yalabihedhaga pamadhene madhu a Mulugu wihina edahinye murima wa muthu, we onoothabwa waariha. We podi okanna akwawo axa wodhela wakavihera addibila ni arogola wihina edhowe omutugumanoni ni mmabasani oolaleya. — 2 Kor. 6:13.

Murumiwi Pawulo nuufwanyiwa makathamiho mukwaye Titu ahidhowa omoona, eyo yahimukavihera vanlubale Pawulo. (2 Kor. 7:5-7) Yopadduwa ela, enonubusedha wihina iyo nnohowela watodola addibilihu, ohiya ni madhu baahi mbwenye nnohowela wilibihedha odhowa okala vamodha naaliwa ni werana ele nnandihu wihina naakavihere. — 1 Juwa. 3:18.

WAKAVIHERE AKWAWO YAAHARAHARIWAGA

Addibilihu ni arogola ooRusiya ehoniha makalelo owakavihera addibila amodha mwamakalelo owiwanana. Kasugwa yopadduwa ya ddibila Sergeyi ni mwadhiye Tatiyana. Asupayi yahivolowa mba mwewa nuwindo wathukulela otiribunale wihina yakohe. Tatiyana ohiwa ni ohogolowela vaade. Ddibila Sergeyi anowoga eegi: “Tatiyana nufiya vade murogola dhaala oliba murima odha omwaredhela. Nuuvira mudhidhi vang’ono addibila ni arogola odha vade onikavihera owomihedha dhithudha.”

Ddibila Sergeyi anowogave eegi yolebela enathabwa ogidhivela si Provérbios 17:17 enawoga yeegi: ‘Mukwawo eebaribari anuudhivela mudhidhi wamutene, onokala ddibilo wafwanyiwa makathamiho.’ Gahanda wonelamo pama yolebela ela mudhidhi ngaali mukambura mwaha gahikaviheriwa vanlubale naakwaga. Yehova ahaalabihedha addibila oliba murima wihina egikavihere mudhidhi ole worusa vanlubale.”a

Mudhidhi nafwanyiwaga makathamiho orusa, nohowela nikavihero naakwihu ebaribari. Mudhidhi wa mahoso manlubale nnere othabwa ohowela nikavihero newa. Bumwahaya nohowela wilibihedha wihina nikale athu owandaneyana ovanene! — 1 Ped. 4:7, 8.